Hmar Christian Fellowship Delhi Thuring Thlirna

By Pu L.Keivom, Inpui.com Columnist

Krista zarin HCFD kan nih - Author

September 2, 2012 khan Delhi Hmar Christian Fellowship (DHCF), a hnunga hmathlir lien tak le hla tak a hung suok pei leia Hmar Christian Fellowship, Delhi (HCFD) tia her danglam thret chun a piengcham voi 24-na chu chawhnung 1530-1730 hrs sung khan Apostles Methodist Church, RK Puram, New Delhi-ah a hmang a. Hriet mang lo karin, HCFD chu mihriem khom ni sien mi puitlinga ngai, nuhmei neia intum suok thei, UPSC ekzama khom thrang a, India rama sorkar sin insang tak chel thei ngirhmuna ngîr a lo ni tah zing el.

Trŭlna leiin, mani tronga chawibiek inkhawm a la um nawnaa lekha inchuk le sinthawa khawsahaiin in le hmun remchangna-ah Pathien thu le thu dang danga inpawl khawmna an nei hlak a. An hung tam deuh pha leh kohran pawl bik um loa inkhawm tlangna an hung nei pei a, Fellowship tia ei hriet lăr tah hi a hung pieng hlak a nih. Kum 1959-63 sung Imphala ka um lai chun Hmar Company-ah kan inkhawm hlak a, chu chu kha hma daih, kum 1947-a Hmar Company (Hmar Trading Company-1961) an indin laia inthoka an lo thaw tran a ni ta awm. A hnungah kohran pawl hrang hrang an hung lut a, êk vuok chek angin an hung indar a, chu chun khawtlang inthuruolna chen khom nasa takin a vuok siet a, State sorkar rorelna inpui inthrutna le hnam tina inthoka thlang aiawtuhai umna khawpui ni siin, an ni dan dinga mi beiseina hlen phak loin an tung inmŭm ringot hri pei a nih. Fellowship pakhat hnuoiah lo inthlung khawm vong hai sien chu, Setan nui inza naw hleng a tih.

Hi ei ngirhmun hril le tekhi chun Delhi chu, tu chena chuh, danglam tak a nih. Kum 1970-a inthok khan Delhi hi hmunpuia ka nei tah a ni leiin, nuomin nuom naw inla, ka khaw hmun nghet a hung ni ta a. Chuong lai chun Zo hnathlak po po hang dap khawm khomin, kut par pahni thlieka tiem khop chauh kan la ni a. Pathienni zing tieng Parliament Street-a Free Church-ah kan inkhawm tlangpui a; chawhnungah in a remchangna ruotin, chawibiekna hun serh kan nei hlak a, ‘devotion’ ei ti ang deuh hi a ni tak. Inkhawm trinah bu kan fak tlâng nghal zie bok a. Hi hi sunzom peiin, mi an hung pung pei hnungin, Delhi Mizo Inkhawm chu Green Park-ah nei tran a hung ni a. 1980 bawr tung laia inthok khan Delhi tlanga sin zom le lekha inchuka hung tla thla an hung pung pei a, mani tronga Pathien biek an hung nuom seng leiin, Manipur-a inthoka hung Zo hnathlakhai lair ingot khom Fellowship hrang hrang pasari chuong a hung pieng a, chuong laia pakhat chu Hmar Christian Fellowship, Delhi hi a nih. Indar peiin, Guwahati, Mumbai, Pune, Bangalore, Chennai, Silchar, Chandigarh le hmun dang dangah HCF an hung indin sap pei a, Conference nei khop zet an hung suok tah a nih.

Delhi-a kan tlak thlak hlim chun kan inrieng èm ém. Tu hin chu thrang li sung chauh, Israelhaiin Aiguptaa inthoka Kanan ram an pan laia lampuia an thang sung chauin, Zo hnathlak ringot khom a sanga tiem khop ei um ta a, Mizo inkhawm khom hmun khatah an inleng ta naw leiin hmun thumah an inkhawm hrang tah. Chu hun chu Pathien lunginsietna zarin hnam tinin ei la hung tong seng ding a nih. HCFD khom ei trana inthoka kum sawm nêka tam sung khan Sunday School-a kai khop naupang an la um naw leiin, a hnung daiah ei tran thei chauh a nih. Tu hin chu Sande Sikula kai (2012) naupang za vêl an um ta a, kum sawm hnunga lem chuh a let hni nêka tam an hung ni tah ding a nih. Chu pha chun, ei um khawm rawnna veng buk zirin, hmun hni hmun thumah ei inkhawm hran ngai ta mei a tih. Chuong kauzâr hrang hrang hai inthlungna ding chu a kungpui nghet tawk ei nei a ngai a, chu chu damtea tuta ei indin tung pei hi a nih. Hi thil hi a nih kum 2007 laia Structural Reform ei hril le a taka dam tea ei hung inchangtir pei chuh.

Ei hnam thrangmawbawk lien taka mi tam takin ei ngai chu kohran pawl innghirnghona le a kakhawk a nih. Kohran khata ngìr thratzie hi ei hriet a, ei hril rawn a, sienkhom ei tranghma kei zawnga thil infetir dinga ei phan lawk china chauh ei inhnik. A chok chen hrât hràt hi a hril rawn khom ei hoi. Hmaithinghawnga ei hmang lei khom a ni el thei. Chun, ei êk chè seng inthiel fai hi Pathien ringtu ei ni chun ei mawphurna le ei kros put ding a ni hrim hrim. Ei sukhnok inthielpui dinga mi ei fiel hlak dam hi thil thra fè thaw-ah inngai ding ei ni bok nawh. Ei sukhnok seng hi inthiel inla chuh, trieu sûm angin sawt naw teah ei khawmuol hung fai vŭk a ta, ‘pielral nisa’ hung inlang a ta, a êngah hlimin lêng thei ei tih.

Hieng ang thil lei hin, kohran pawl kansar hri a lut inlau leiin Delhi tlanga Fellowship thruoituhai lai kohran a ieng khoma rongbawltuhai chu thrang phal a ni naw hulhuol. Puo tienga inthoka thlirtuhai chun HCFD ramri khang hi a khauh taluo ti mei an tih. Sienkhom, a trûl tlat si. Khauhlâng ben threlh pawlisi hi, ei ngirhmun zirin, hmang a trŭl chang a um hrim a nih. Kohran pawl hrang hrangin thoktu pastor an hung sie po po bakah Delhi le a se vela um pastor, HCFD-a hung inkhawmhai chu kohran ser le sangah a trŭl hunah hmang trangkai an ni vong a, anni khomin inphal takin rong an bawl a, sienkhom an pawl hri hung phur lutin, an pawl ta dingin kuo suot an tih ti inlauna leiinn, rorelnaah an thrang ve phal a ni nawh. Chuong sa khom chun, kohran threnkhat chun an mi le sahai hmangin HCFD dai hung nêr an tum chàng a um. Sienkhom, tu chen hin Pathienin a la veng him hri a nih. Kohran pakhata inlawi nuoma inhril po po thaw ding hmasa tak chu, a tak ngeia insuikhawmna lampui hrawtu le pawl leia indaidangna bang ngir fek fuk hai sukchimtu Fellowship thrangpui le mani hmun sengah a lam lo sàt hraw a nih.

Tu chena Pathienin HCFD a la hum tlat san hrang hrang ni thei ding laia poimaw ka ti zuol pathum chauh hang tar lang inla. Pakhatna, kohran inpumkhat thratzie hi a hril ringota tlâk el loa a tak taka zawmtu le thawtu a ni lei a nih. Unau inngei diel diela um khawmhai chungah Lalpan malsawmna a vŭr hlak thu Sam 133 phuoktuin a hril kha a lo indikzie hriltu săkhî (witness) chu HCFD hi a ni ve ti inla, khêl ei hril ka ring nawh. Pathien thu zawm hi ringtu taphot sinpui a ni a, chuong mihai kuoma malsawmna le lawmman pek tiemtu chu felna le ringumnaa sip Pathien a nih. A thu zawmtu chunga a thaw ding a hriet; ‘remind’ a ngai nawh.

Pahnina, tlâk lo le hrât naw tak puma Pathien chauh ringsana sorkar thoktuhai rongbawlna chu Lalpan mal a sawmzie chieng taka hriltu a ni bok. Ka hril suol a ni chun Pathienin mi ngaidam sien, sum tam tak senga kohran ngelnghet le hluna inngai, thoktuhai hming hma le hnunga dikri ropui tak tak intlar thret thrut hai rongbawlna nêk hmanin Vaihai laia tlak naw puma HCFD rongbawlna hin ra hlimum a’n suo rawn lem niin a’n lang. Mani theina le dikri suong loa Pathien ringsana rongbawl hi hlawtlingna châbi pakhat a nih.

Pathumna, sakhuo le kalchar, kohran thil le khawtlang thil inkhaktuo loa lungruol taka an insom tlangna hmun a ni lei khom a ni bok. Hnam le khawtlang thilah Delhi Hmar Welfare Association (DHWA) chu iengkimah thruoitu niin, tlawmngaina thilah DHWA member-hai tluka tlawmngai thei hi Zoram khawvelah an um ta naw el thei. Tlawmngaina nun zawmtu chun Baibula nun thruoitu dinga a ngai poimaw tak ‘hmangaina’ hi a tak takin a thaw a nih. HCFD chun sakhaw thil a buoipui a, HSA-in inchuklaihai thil. Tu china chuh, hi pawl pathum bak chu pawl dang a la ngîr hri nawh; pawl tam chu insekhêkna mei mei a nina chin a um.

Hi a pathumna, sakhuo le kalchar inlaichinna hi hre fie lo, hnam thil hrim hrim hmu khawvêl ngŭk tum an um a, hnam thil an tlansan nasa po leh thlarau mi nia inngaina an nei. Sakhaw tina hin chuong ang mi chu an um hlak. ‘Taliban’ pawl, sakhaw mi tawrot hringtu an nih. ‘Kristien Hla Bu’ chawi lâr a, Solomon-a ‘Hlahai Hla’ ngaisang a, ‘Lenruol Hla Bu’ phŭm hmang nuom tlat si pawl dam, ‘Sikpui Kŭt’ hnawl a, Baibula chuong lo ‘Good Friday’ le ‘Christmas’ hlut a, fak le dawn thila insukfir hlè sia Baibula sa thieng lo a ti, entirnan, voksa dam beng pŭk pûk a, sathu ngaina a, Sabat inser loa a tuka ni inser lem si dam an lo ni nuom khop el. Hi thu hi a hrana lekhabu tam tak ziekna tham a nih. A poimaw le ei hril nuom tak chu, taksa put le thlarau neia siem ei ni leiin, ei taksa le thlarau mamawhai inbuk tawka phuhruk le chawmlien a nih. Hi hi threnkhat chun ‘chokpol nun’ nia an ngai leiin an hnuolsuot. Chuong mihai chu mit khingdel ang an nih. A varna tieng hup a, a’n delna tieng an en pha leh an hmu thei ta ngai nawh. Mihriem hi bei chaua a hring thei naw ang bokin Pathien thu tak chauh ringin a hring thei bok nawh. A siksawina a um pha leh nun a buoi hlak. Fak le dawn zong loin Pathien thu ngot ring tum la, ni tam a liem hmain hlangva (leithra) bu zawlah inchang i tih. Lunginsietna zara hring le chang le khawsa ei nih. Chu thila chun Delhi tlang le khawpui danga chênghai hin ei ram tienga khawsahai nêkin thil buk ton dan an thiem lem a hoi khop el.

Thuring

HCFD chu kum 24 zeta upa a lo ni tah thu a bula khan ei hril ta a. Pathien lunginsietna zara a hlawtlingna muolhai khom iemani zat ei phor lang a. Baksamna tam tak a nei a. Mi khawsak dan ei hmu tlawm lei dam, theulawzi tienga mi thiem ei um naw lei dam, kohran hmasahai lo thaw dan kha rău deua ei ngai lei dam, ei thabo lei hrim hrim dama ei chawibiek dan le ser le sang ei hmang dan thlak loa kha hma, mawl huna an lo thaw dan kha ei la sunzom pei a tam a. Chuong laia thring deu el chu kum tina voi khat bek ei insam ruol hlak HCFD thuring hi a nih. Ka’n sampui hmasa tak ding trumin a kawpi mi hung thon dingin Pastor Laldiksak Inbuon ka ti a, a mi hung thon ngei a. Kha hma daia mi, a thu fûn khom kim lo, a Hmar trong khom inphuoi tak el a la ni a, a trong ringot hriet fie thei dingin kan chŭl nâm phuor a, chu chu ka’n sampui a.

Ni kum September 4, 2011-a insam ding Thuring chu thruoitu dinga an mi ruot leiin chuong laia HCFD Secretary Herbert Lalsanglurin Thuring kawpi a mi hung thon a, chu chu a Hmar trong inthirna le a kim naw langsar zuol belin ka siem thra phuor a. Ka thon malamin a thuhmaah “Ei thuring hi a hma khan ei en chieng tawk naw khom ning a ta, duthu a sam naw khop el a, theologically and grammatically unsound a um zeu zeu a, siem phuisui met ngai a tih. In inkhawm nawk pha leh in en tlang dingin a hnuoia hin ka hung siem thrat phuor chu ka hung thon” tiin ka ziek a. Hi ka thon hi thuring insamah kan hmang a. Chu hnung ela chun fumfe lema ensui nawkin, an bi tlang dingin Thuring nambar pakuo ka thon a.

Thuring nambar 1-ah, “Baibul pumpui, Genesis-a inthoka Thupuong chen, bu 66 (Thuthlung Hlui bu 39 le Thuthlung Thar bu 27) hai hi Pathien thu hring, mihriem hmanga Pathien inthuok khuma ziek, ringna le thilthaw inkhǐna dinga indik tak a nih ti kan pom” ti a nih. Hi hi a tawi tek toka chu a thu fŭn hi khǐn deu el a na, mi thiemhai insĕlna bupui laia mi a nih. “Inthuok khum” ti (2 Tim 3:16) hih a ziektu um sun Paulan a umzie a hril fie si naw leiin hril fie dan dang dang a um a, ngaidan a khuongruol nawh. Baibul inleta inhmanghai chun hrieng an ta, “Pathien Lekha Thu tinrênghai hi Pathien inthuok khuma pek a nih” tia hin Grik tronga chun thuziek (graphe=writing/scripture) ti a na, a hmaa um ‘Pathien’ ti hih a thrang sa ve nawh. Chuong ang chun Delhi Version-a chu inletin, “Lekha Thu po po hi Pathien inthuok khum a na..” tia inlet a ni a. Hi inlet hi a fel zo chie nawa hriet a ni leiin, tuta siem thrat sin thaw lai meka hin chu “Pathien inthuok khum Lekha Thu po po hi..” tia sie lem a ni tah. Chun, “ringna le thilthaw inkhina dinga indik tak a nih” ti hi hriet dan le hril fie nuom dan inhmu lo a tam leiin insêlna a suktam bok. Chuonghai chu hi taka hin a hmor khom ei phor hman naw ding a ni leiin, ei thiempuhai buoipui dingin sie inla.

A pahnina hi United Church of North India (UCNI) Thuring 12 laia pakhat a nih. Chu taka chun “The Scriptures of the Old and New Testaments are the Word of God and the only infallible rule of faith and duty” (Thuthlung Hlui le Thuthlung Thar buhai hi Pathien thu a ni a, hienghai chauh hi ringna le thilthaw inkhina indik lo thei lo a nih). Hi hi 1823-a Welsh Presbyterian Church Thuring 44 an pom laia pakhat a ni a, sienkhom thuring hril changa hril sa hlaw tak laia mi Westminster Confession of Faith (1646), bung 33 hiela sei le chipchiera ruok chu a thrang sa ve nawh. Hi thuringa mi tam tak buoipui chu “indik lo thei lo” (infallible) ti trongkam hi a nih. A san chu, Pathien inthuok khuma ziek thu chu indik lo thei a ni zing lain, Baibula thu chuonghai hi mihriem hmanga ziek a ni leiin an thaw suol palh tam tak a um. Entirnan, Mat, 27:9-10 a Zawlnei Jeremia hril anga ziek hi Zawlnei Zakaria 11:12-13 a ni a, thaw suol palh ni ngei ding a nih. Luka’n Suria rama larsap (governor) Kurini a thrang sunga intiemna uma a hril khom hi (Lk 2:2) a hriet suol a nih. Romanhai rikawta chu intiem hnung kum sawmah Kurini kha Governor-a ruot a ni chauh a nih.

Pathiennia ei insama khan chu “hienghai chauh hi ringna le thilthaw inkhina indik lo thei lo” ti hi a thrang sa ve nawh. Chun, Nambar thumna, “Isu Krista chu Pathiena mi pakhat, Pathien Naupa, Thlarau Thienghlim thilthawtheinaa nunghak thienglâm Mari sunga mihriema hung insieng, Mihriem Naupa, suol nei lo, suol intlanna dinga thi, a thisena suol sawp faitu, a ringtu taphot thiemchangna dinga taksaa tho nawk a nih ti kan pom. Ropui takin a la hung nawk ding a nih ti kan ring” ti chu “Isu Krista hi Pathien Naupa, nunghak inthieng sunga Thlarau thilthawtheina-a insieng, suol neilo, suol intlanna dinga thi, a thisen leia suol sawpfaina le taksa-a a thonawkna kan pawm a. Ropui taka a hung nawkna ding kan ring” tia sie a ni bok a. Hi taka hin ‘Pathien Naupa’ a nina chauh a pom a, ‘Mihriem Naupa’ a nina a pom sa si naw leiin “thu chu taksain a hung inchang a” ti kha a hnawl tina ang a nih. Isu kha ‘Pathien Naupa’ a nina chauh pom a, ‘Mihriem Naupa’ a nina ei pom si naw chun ei Pathien thu ringnain umzie a nei nawh. Chun, “a thisen leia suol sawpfaina le taksa-a a thonawkna kan pawm” ti hi sentence indik lo hulhuol a nih.

Nambar 5-na, “Baibul-in ringna leia lunginsietna-a sandam ni dinga a hril hi kan pawm” ti hi hang ngaituo chet chun pangzatum deu a nih. Ringna leia sandam ei ni nawh; lunginsietna zara sandam ei ni a, chu ringtu le pomtu chun chatuon hringna a chang a ni lem. Saptrong chun, “For by grace you have been saved, through faith” (Eph. 2:8) ti a nih. Ei ring rak leia a mi sandam duok a ni nawh. Kum sanghni liem tah khan a thlawna lunginsietna zara sandamna sin chu Kristan a lo thaw zo der tah. Chu ringtu chun sandamna a chang a ni lem. Chun, ‘sandam ni dinga’ ti trongkam hin ‘element of doubt’ a pâi a, hmang lo chi a nih. Hi hi kum hmasaka draft ka thona chun, “Pathien lunginsietna zara Isu Kristaa mihriem intlanna a siem ringtu taphot chu sandam an ni thu Baibulin a hril hi kan pom” tiin ka sie.

A tawpna tak Nambar 9-na, Thlamuongtu Thlarau Thienghlim thu hi ka draft thona chun Pathiena mi pathum um indota hrilnaah ka sie a, Nambar 4-na a hluo. Ei Thuring insama a tawpna taka ei sie hin Pa, Naupa le Thlarau Thienghlim insersuonna a khakbuoi a nih.

Tlangkawmna

A dang khom hril ding a lam tam el. Sienkhom dit tawk inla. A tlangpuiin, ei Thuring insama ei Hmar trong hmang kha a trîtro a, kum 24 tling tah trong ding chun inzàpui a um deu a nih. A tûk khan Malsawmthangpa’n a mi hung fawn a, mak a ti thu hahîpin a hril a. Kei chun, “Ei ti zawng a ni rak naw leh ei insam ve nawa a ne’l annawm. Kei chu ni kuma ka’n sampui kha ka ring el a nih” ka ta. Ama chun, “Kei khom ka’n sam ve le! Insam hma khan ka tiem a, ka dittawk khop el” a ta. A mi thruoitu Upa Ruolkhumlien Buhril kha a fel hràm a, bau hni chen bak bakin, fak thei dingin a hung chan nawi a, kan tlingtla hram chu a nih. Insam zo char khan a lekha khah inkhup inla, mipui kha an thu insam indon inla, a hril thei an tam hmèl naw kher el.

Thuring hi kum khatah voi khat chauh ni loin, thla tin voi khat bêk insam ruol ding a nih. Chu ding chun insam tlaka ei duong suok a ngai. ‘Ka sunghai tu am an na?” ti duol duol anga khawvel la pal zing hi kum 24 mi nungchang ding a ni ta nawh. Patling chu patling chêta chĕt ding a nih. Puitling tieng pan tum ei tiu. Pathien thu hi samphuol ela tlak chi a ni nawh. Hebrai lekhathon ziektuin, “Krista chungchanga inzirtirna mawl tak tak hril zing ta loin puitling tieng pan ei tiu” (Heb 6:1) a ti khan Hebrai kohran kha kum sawm vel chaua upa a la nih. Eini kum za kristien lo ni tah haiin ringna tieng le Pathien thu hrietna tienga A AW B ei la khĕl thei naw hih inzakumah ngai inla, theida zawnga la loin, chona thraah ngai ei tiu. Krista zara HCFD ei ni ve si a. (September 8, 2012 Delhi)