Siphro thusuok: Hmar Hills-a oil exploration chungchangah

Vawisun, August 15, 2012, sun dar 2:00pm khan Vangai Centre, Nehru Marg Churachandpur-ah SIPHRO le Vangai, Tuiruongdung Village Authority (VA) le Lal hai Oil le Gas Exploration chungchang a thil um dan hriltlangna le hmalak dan ding chipchier deuin an hriltlang a. Vangai le Tuiruong dung a hin Oil le Gas Exploration chu an tan hmasatakna hmun ani lai zingin tuta “Public Hearing” a ding khawm hin iengkhawm inhriettirna, fielna an dawng naw thu VA le Lal haiin an hril. Jubilant Oil and Gas Pvt Ltd hai le Asian Oil Fields haiin hi lai biela VA le Lal hai chu inthi thaina chi hrang hrang hmangin an lo sirde hlak. Mandatory process, hieng – “free, prior, and informed consent of the affected people” ti lem chu van a ra a nih. “Institutional injustice” chu nasatakin hmalatu haiin an chelek a nih.

Tuta exploration hi Ministry of Petroleum and Natural Gas , Government of India haiin Jubilant Oil and Gas Private Limited (JOGPL) hai chu “exploration and drilling works” sin thaw dingin license an lo pek a nih. JOGPL hai hi India a Noida (UP) a office nei an ni el baka, Nehru Place (New Delhi) a khawm office an nei. An headquarters ruok chu Netherlands a innghat a nih. Anni hi London Stock Exchange (LSE) a chen in register an nih. Exploration le drilling sin hi Jiribam (Imphal East), Tamenglong le Churachandpur a thaw ding a license nei an nih. India sawrkar leh “Production Sharing Contract” (PSC) chu July 19, 2010 khan an inrem siem a; Manipur sawrkar le ruok chu “Petroleum Exploration Licence” (PEL) November 15, 2010 khan an lo ziek ve thung. Exploration le drilling le inzawm hin Manipur-ah 2950 sq kms them a tih.

Nikum 2011 a inthawk khan satellite le aerial survey an lo thawna le inzawmin Manipur a hin 5000 Billion Cubic Feet (BCF) petroleum um dinga an hmu ta sa a nih. A hming mawina dingin “exploration” chu an inbuk ve chauh a nih. Hi sin, exploration le drilling, le inzawm hin tuta company haiin an sum seng ding zat a an riruong chu 240 Million USD a nih. Manipur a hin oil well 30 an tinzawn phawt a, oil well pakhat peia USD 8 Million an invest pei ding a nih. Hmarbiel (Vangai, Tuiruongdung le Hmarbiel) a hin oil well 13 um dinga riruong a nih.

Chu lai chun, “free, prior and informed consent”, mandatory process ding ni ve bawk chu zui ani thak nawh. August 8 khan Parbung a Public Hearing a um a chu Vangai le Tuiruong dung hai chu inhriettirna iengkhawm an pek nawh. Public Hearing um ding khawmin programme a um naw bawk. Parbung a public hearing a khawm khan SIPHRO Hmarram Cell thuoitu, Pu Lalchunghnung chun, tuta sin an thaw naa ava thang ve leiin “Ui ang chauhin an mi sawisak a nih” ti chu Public Hearing-ah a hril. Sin rum intang le risk involve hrim hrim chu Hmar hai an inthawtir vawng. Vai kut sinthawhai le khawm an hlaw an ang thei nawh. Sin harsa po po an thaw lai zingin, CCPur DC chun Public Hearing an nei naa SIPHRO hai hi ti in um ngei, sawrkar hmalakna po po in dodal vawnga a ti nghe nghe. SIPHRO Chairman (Manipur) Pu Buonga chun, “Kan rights sirde a a um phat kan tawng suok chauh ani lem” ati pek.

Manipur sawrkar le Company hai MoU a chun a ram hlu tu hai phalna thang thak loin an ram del, an thing-le-ruo, an huon le an in hai an phalna thang loin suksiet lo ding le pawi themlo ding an ti lai zingin huon, lo, thing-le-ruo chu nasatakin an suksiet der tah. Complain an siem phat leh sipai (Assam rifles) hai le thang khawmin VA le khaw mipui hai chu an inthi thai hlak.

Insirdena karah Lal a ei lo zawn haiin an chan ding nasa takin an zawng zing. “Compensation” ringawt khawm ei chan ding um lo khawpin an mi hnawde zing. Ei thangruola ei ram humhalin ei rights ei chawisang phawt naw chun “development” chu ei ta ding a ninaw ding a nih, ti chu a chieng hle. Tuta, company haiin “Benefits to local people” tia an ziek thlar thei po hai chu hieng hai hi a nih:

* Improvement in roads conditions

* Some temporary direct employment

* Other indirect opportunities through:

- Contract workmen for construction,material handling, etc

- Selling and trading of goods for daily needs

- Fooding and transportation for local workforce

- Vehicle workshops,tyre repair

- Mobile SIMS, telephone booths

* Community activities

* Future opportunities for support/ ancillary industries

Vawisun hin ei ram, ei hnamin thutlukna det deu leh thang ei khaw ta naw chun Centenary dar ei lo vuok ta kha ei bo na dar vuok ding ani el thei an tah. “Development” hmaikawr hi ngainep el ding chi an ta nawh.

Thawro ngaituo tlang ei tiu, an hnu hma hin.