Art and Culture Poimawna-I

By Pu Timothy Z. Zote

Art And Culture Umzie : Hel lovin hei hril chawt el inla, Art and Culture hi ram le khawtlang nuna vawnghimna sin thawtu le inchiktu a ni a. Hnamzie, tienlai chanchin, le hnam nunphung mumal deuva humhal theina suklangtu le pholang theitu haiin an sawr tangkai thiem lei chaua thaw thei an nih. Social Scientist hrilfie dan khawm an ang naw a, amiruokchu, pawm dan tlangpui a um a, chuonghai chu suklang le tarlang ei tum ding a nih.

Art And Culture Umzie: Hi thu hi thumal pahni inkawp le inmat a ni a, amiruokchu thumal pakhat khatin hrilfie ta ang inla “ Art” sap tawng chun Noun a ni a, thil hming inbukna a nih. A umzie tlangpui chu, lemziek,painting,milem ker thiem ( engraving), Music,lim,puk, le lungpui cheina ( statues, Cave and rock painting),thu le hla phuok ( composition of Hymns and poetry ) , hlasak thiemna le art ( themthiemna ) chi hrang hrang hai hi a huom sa vawng a. Tienlai a hmang hlak thuomhnaw ( artefact) , tienlai thuziek le tulai thil ziek tha tak tak hai khawm hi , art hin a huom sa bawk a.

Culture : Culture khawm hi English thumal le thilhming ( Noun) pakhat a ni ve a. A umzie chu hnam nunphung le hnamzie, hnamdan

(Custom) , hnam nina,(ethnic identity), tawng,

hnam lam,hnam hla, hlado le lemchang nun suklangna le humhalna le chawikangna po po hi Art and Culture in a huom vawng ti thei dingin a um.

Art And Culture Pawimawna: Art and Culture hma dawmna le inzawmin , tienlaia pi pu

thilhlui tha tak tak, chanchin, lalram ropui tak tak le tienlai thu le hla inchiktlak hriet theiin a um. Chu bakah, hnam nunphhung, hnamzie le hnam inchikna thil hrang hrang hai khawm hi Art and culture fethlengin humhalna le tlangzar thei chau a nih. Khawvel a Civilization ( khawtlang nun inrelbawlna le inthanglenna) inchikna tlak tak tak hai : Indus Valley civilisation, chinese civilization , Mesopotamian civilization le Egyptian civilization hai chanchin hi Art and Culture hmalakna chi hrang hranga inthawka suisuok le hriet thei chau a ni a.. Hieng a ni lei hin, inchiktlak, inhma . tulai le hun la hung um ding mihring hai chanchin le nunphung khaikhawmtu vawnghimtu tha tak chu Art and Culture hi a ni a. Entirna’n , Aigupta ram hi khawvel a ram upa tak laia mi a ni a. Inchikna chi hrang hrang lemziek, temple banga thuziek , pyramid in ropui tak tak hai lung le lungpui chei le inchikna chi hrang hrang hmangin Aigupta lalram chanchin sui hi a awlsam pha em em a nih. Chung ang peiin, Indus valley civilization , Chinese civilization le Mesopotamian civilization hai khawm hin inchukna bik an nei tawl a. Chu chun, an chanchin sui kha a sukawlsam pha hle a nih. Hi hin an entir chu civilization ei suklang tah hai pawimaw zie a suklang bawk a nih. Chun, tienlai huna art and culture sinthaw dan sui ding khawm, tu huna art and culture hi inthuom that a tul em em a nih.

Tienlai nun chanchin suina, hnam zie le nunphung vawnghimtu le themthiemna chi hrang hrang humhaltu le pholangtu tak chu Art and culture hi a ni a. United Nations le khawvel huopa pawl hranghrang khawmin hnam zie hi an ngaipawimaw tak pakhat a ni a. Chuleiin , sawrkar khawmin department pakhat ah a si hrim a nih. A san pakhat chu, art and culture sinthaw hin ram dang mi inzin veivak ( foreign tourists) a hip tak a.Chu chu sumhnar tha tak a lo nih. Khawvel ram hrang hranga inthawk mi tam takin Israel ram an va sir rawp hlak a, asan khawm hi art and culture fethlenga thil hlui le Baibul-a hmun pawimaw inlang ve chin-hai an vawng that lei a nih. Chun, Art and culture hi hnam zie le themthiemna chi hrang hrang vawng thatna le tlangzarna dingin a pawimaw bakah, khawvela remna le muongna a um theina dinga hmangruo pawimaw tak a ni ve tlat.

Nitla seng lo Kumpinu rorelna tia ei lo hriet United Kingdom hin Art and Culture a lo siethat em leiin, research thil-a mamawtu le belchieng dawl tak tak a thil hei sui chiengna dingin British Meuseum, Bristish Record le British thil inchikna hrang hrang tuchen hin a la um zing a. Hienglai zing hin, Afghanistan –a Taliban sawrkar chun Buddha Statue kha Bomb hmangin an suksiet a. Hi hin Art and Culture pawimawna an la man phak naw mani aw ti dingin a um.

India danpui ( Indian Constitution) –a khawm art and culture hin hmun pawimaw tak el a hluo a, a sukchiengtu chu District Council intantirtu a nina hi a nih a. Hi naw khawm Sixth Sheduled intanna khawm hi a ni bawk. India danpui hi siem lai hin ngaituotu hai chun ngun takin an ngaituo a, chi le hnam tamna ram a ni lei hin thiem harsa hle sienkhawm that tlangna dan ruokchu zam a ni tlat hi, ei vangneina thuruok chu a nih. India danpui siem ding hin constituent Assembly -in kum hni le thla 11 le ni 18 a hmang a. Chun, danpui a hin, Constituent Article 447, part 22 a um a. (Sub- part pali (4) leh 26 ) schedule 12 a um a. ( Sun Zawm pei ding)