Mizoram HSA haiin an Press Release a ring naw tieng deiin SIPHRO chu an buoinaa an kei lut a nih ti kan hmuin pawi kan ti hle. In buoinaa hin SIPHRO kan lo inrawl ngai naw a, in rawl naw bawk kan tih; a tulin kan hriet nawh.
Amiruokchu, bang ah SIPHRO hming in tat rang ta ro ro a kan tawnhriet hai chu hril lo theilo niin ka hriet leiin hrilfiena ni malamin thil umdan ka hung hril ve a nih. SIPHRO chun “Development, Rights, Land and Resources” (Dam Context-ah) chungchanga Sinlung Hills (Mizoram) a inhril hriet a hma lak dingin chu sin chu liengko a innghatin ei pen tan naa, HSA Aizawl Jt Hqrs an ti ang bawkin HSA Sinlung Hills Jt Hqrs alo um ve leiin a biel sunga hotu hai chu hma mi la pui dingin kan ngenna. Chu dungzuiin an inhman le inhman naw thu hril loin a thei theiin an mi tawi awm alo nih. A biel sung a HSA hai le kan lo inthlawp leiin SIPHRO thawsuolna a umin ka hriet nawh. Amiruokchu, HSA thuoitu inti hai hin HSA inthuoi dan le inzawmin “democratic decentralisation” umzie hi chu in la hriet thiem tawl naw niin ka hriet; hieng hin ei inti pei ding ani chun. HSA Sinlung Hills thuoitu kan zinpui hai chu Tv Lalringum Riengsete, Pu Ropieng (Vairengte), Pu Zohuol (Suongpuilawn), Pu Henry, Tv Mahriet, le Tv Ruotsang (Sakawrdai) hai an nih. Ruo hnuoia ke ngawtin kan inzin a, an thaw chi rak nawh. Sinlung Hills a khuo hai chu kan fang kim deu vawng tho.
Biel kan fang zoin, biel fang ringawt niloin “practical” deu thil thaw ei tiu an ti tawl leiin Aizawl a protest rally nei ei hung rawt taa. Chu program ding le inzawmin Pu JC (Aizawl) chu vawi tamtak ka phone a; ka phone a pick up ngai naw a; a pick up phat leh a buoi thu ami hril a. Khang lai khan exam answer paper an check buoi thu ami hril niin ka hriet; kan inhmu thei hlawl nawh. Rally zoin kan inhmu thei chauh. HSA President lo ni hlak Pu Hrata (famtah) chu ka biek a, buoina alo nei ve a; i buoi naw phat inhmu ei tih ka tia. Ni khat chu rally tawm deu khan Pu Hrata le Pu Darrosang hai chu Loisbet dawra kan inhmu ta a,“Kan thei dan danin hma lo lang kan tih” an ti a. Hnampuol inchuklai thuoitu hai fielna lekha khawm an niin an sem nghe nghe.
Chuong lai zing chun, Rally hlawtlingna ding chun Sinlung Hills le Kolasib a inthawk Aizawl a Hmar inchuklai hai inhmupui chu Sinlung Hills tienga HSA thuoitu haiin an rawt leiin kan inhmupui hrim a. Vawi hnih neka tam kan inhmupui tawl. Sawkawrdai Students' Association ti dam kha an lo um ve a; Hmarphei Students' inti le a sunga a dang dang kha an lo um nuol a. Ka ring nekin ka buoi pha hle; an nawi tha em a. Zau deu le lien deu a ei issues hai ei khekpui tum zing lai khan ziektu VS Naipaul in indona sunga indona chite te aum alo ti ang deu khan ei hriet ngai thak lo hai khan hmun an lo inchu ve seng kha alo nih; a khawhnung a ka hmu fie ve chauh. Inkhaw tak alo nih.
Chu cho chu niloin, Nk Zovi, Thingdawla HSA thuoitu chu Glenary's (Chanmari) a coffee leh ramdang bei hming phuok fain rally hlawtling dan ding kan ngaituo nawk a. Motor pathum bek leh Thingdawl tienga hai chu a hung thuoi thei ding ani thu ami hril a; ka lawm khawpel a. A tawpah Nk Zovi chun Thingdawl YMA hai lo hriet dingin rally chungchang chu Central YMA a inthawk fielna lekha hung la thei la ami ti a, ka thei zawng kha alo ni naw a; anni khawm chu rally a an hung thei ta naw vawng alo ni kha tie.
Rally le inzawm khan chu HSA Aizawl am, Kolasib am, Sinlung Hills am ti kha ka lo ngaituo ngai naw reng reng. Rally banner a khawm Sinlung Peoples' Collective ti ani kha. Rally a khan tu hai am an tam, tu hai am an tlawm ti khawm ka hriet chuong nawh. Ei thaw tlang anel! Chu po chu ani hrim.
Anachu thudik hril ka tih, Aizawl Rally a khan Pu JC Tlangthansiama (Aizawl) annawleh Tv Rothanglien hai chu an taksa leh an hung thang thak nawh; an buoi ve ve. Rothanglien chu naupangte kan ni a inthawk Happy Heart Sikula kan lo kai khawm a. Khawvel a HSA um naw sienla khawm kan in pawl pangaiin kan in pawl tho ding ana; kan lo inpawl leiin hotu inti haiin a kawi thei dan po poin in mi lo lak kawi ani chun lamkawi chu a tluon thei ta ngai nawh ti hre ding khawpin khawvel chu ka lo hmu ve tah; in mi thuoi kawi tum ani chun hlawtling chuong naw ti niu.
Thudik hril nawk ka ti cheu; hotu inti tlawmte hai hi in inhmu thiem tawl nawh. Chuleia kar a keu a nih; chu leia mipui lai in puon bal insawp a nih; chu leia SIPHRO dam in hril kai a nih; chuleia a biel biela inthe in rawt a nih. Ka hlawk na ding chite khawm aum naw a chu ei ram ei hnam le ei mipui hai in suk muolpho a nih ti bek chu lo hre ro! In inrem thei naw leh mihriem inrem thei ei tam taluo; ei inrem el ding a nih. A tul tak bawk. Thuoitu tlawmte inthuhmu thei lo leia hnam a buoi ding an naw reng reng. Inzak ro. Nachang bek hre tawl ro. Inrem nachang le inthuruol nachang bek hrein ei pawl pui hi inthuoi thei naw chun ei ram ei hnam thuoi dingin Baal hmaa la kun ngailo ngawt hung inthlar ve ta raw hai se. An tam taluo! Tlawmte buoi leiin a hnamin in mi kawp kai vawng ding ani nawh. Ei buoi dan hai kuhi ei ngirhmun le khawm eiin hme ta le. Thlierkar lungril put zing pumin mitdel sai themin ei hun pawimaw tak hi ei la them pei ding ani chun Pathien khawmin hun remchang mi siem pek thei naw nih.
Aizawl rally zo khan HSA Aizawl election in a zui a; tul lo deuin Rally kha election agenda pakhat a in hung sie zui nawk a. Inthlang tawm khan line-up in siem tawl a nih ti khawm ka hriet. Tu hi tum ana ti khawm ka hriet tawl naw cheu; a tul tul in thaw el bakah in thaw dan pangngai bawkin thaw ning a tih ka lo ti el a. Amiruokchu, inthlangna hall sung a (Chanmari YMA Hall) khan ka hming khawm vawi sari neka tam an lam a nih an ta; a tul ka ti naw khawpel. Kha inthlang a khan tu ta ding khawm ka thang bik nawh. In buoi naa in mi kei lut ringawt hi chu iengtik lai khawm inphal ngai naw reng reng ka tih. In buoi naa thang der loin dam lem bawk ka tih. Ka thu hriet danin kha tuma inthlang khawm khan Council pawl versus HSA Gen Hqrs a nih an la ti deu deu. Ka lo inzak el.
HSA (Aizawl Jt Hqrs) hai khan Pu Samuel Hrangate a inah uisa thlaithleng an mi buotsai pek a, ka lawm. Kha ni khawm khan thil umdan ka hrilfie ka sawn a; hun in alo nawt bo hman rek am an ta ding; A fie rek tanaw bak a! In buoinaa SIPHRO hming hi chu lunginsiettakin hung hril ri/ ziek lang ta ngai naw ro.
Ngaidan le Ngenna:
* HSA buoina hi hotu inti hai mi tlawmte buoina niin ka hmu. Inhmu ro, in chibai ro, inbie ro, rel fel thei a nih.
* Ram le hnam hmingin ram le hnam kei dar naw ro.
* Mi tlawmte, hotu, buoina leiin kum sawm, kum zakhat dei buoina lien lem in intlun thei a nih ti hrein pielral a rel fel dingin hla naw ro.
* Mi thiem, mi fel, mi tlawmngai vawng in nih, thangruol inla hnam thuoi ro; ei nasa ding annawm.
* In buoina hi mipui lo hre phak ve hai hin chu tha an ti nawh, tul an ti naw bawk; thuoihruoi ding zawng zawng naw ro in rel fel hma chu.
* Nang ni leiin a ram, a hnamin Hmar hai hi chu ei va nep lawm lawm an ti zing an tah.
Sd/-
David Buhril
Chairman
Sinlung Indigenous Peoples Human Rights Organisation (SIPHRO)
Post a Comment
Comments not related to the news or article may be deleted.