By Dr. Rochunga Pudaite, President, Bibles for the World
Kom-hai hi Hmar an ni ngei ti ei hriet chieng tawl leiin lawmum ka ti ngot el. Hmar ni lo anga an hung inlangna hmasatak chu, Tangkhul-hai Missionary, William Pettigrew khan, Baptist anni a nuom leiin. “Hmar khom in ni nawh, an trong khom inhriet naw a, in trong khom an hriet nawh,’ tiin a lo thlêm a. ‘Kan kuoma tieng in hung chun, Thrangpuina le sin in trûl angang pêng ka ti cheu,’ a lo ti bok a. Chuleichun Baptist tieng tamtak an lût a. ‘ Amiruokchu, Naga laia mi tlawmte um an ni leiin, an lung a lawm taktak thei naw amanih, Aw!’ ti dingin a um a. Mary Kom-in tuta hamaa Boxing-a hlawtlingna a neihai a khom khan,Tangkhul le Naga danghai le Meimeihai khan chuong lawm chun an inpâka le lawmpuina an nei ei hriet tlawm hle!
Chun Rev. Pettigrew-in Baptist Mission zom dinga Independent Church a mi zawr lai khan, Coleman-in Pu Tlangval sin ân chupui a, an buoi nasa hle lai kha a ni a. Pettigrew vêkin eini Manipur simtieng a mihai kuomah Mr. Teba Kilong Senvon-ah a zuk tir a, “Manipur pumpui hi Baptist-hai rongbawlna dinga pêk a ni a. Chuleichun buoina um lo dingin, Ukhrul-a hunga Baptist Mission zom dingin a zu fiel a. Mr. Thangngur, Mr. Chawnga Puadite, Mr. Lienrum, Mr. Thangler, Mr. Kunga, Mr. Mamma-pa (a hnunga Tinsuonag inthoka Phulpuia hung inpêm, a hming ka zuk theinghil) le mi dang sawm lai an hang fe a. Ka pa hril dân chun, “Pettigrew chun, Manipur pumpui hi Baptist rongbawl dinga pêk suok ta sa a ni a. Watkin Roberts hi intruder a nih. Chuleichun la buoi la buoi in tih. Chuleichun Baptist hung zom in la, thra deuvin sin thaw tlâng ei ta, sum tieng khom Watkin Roberts le Coleman haiin an pêk nêka tam pêng ka ti cheu,” a ti a. “Kan hang hril tlânga, kan lungril chun Mission buoina hnuoia um nêkin a thra lem el awm de aw!” kan ti a. “ Pettigrew vêk chun, kan kuoma a hril dinghai a hril zo vong hma chun bufâk tlângna a siem a. Thlaithlêng ka kîl tlâng a.
Bufâk zo chun Pettigrew chun room lien fût a hin a mi thruoi tawl a. “ Kan kuom tienga in hung hi in ta dingin, thil thra a ni leiin, hlasak tlângna le inpawlhlimna la nei ei ta, inhoi deuvin voizân hin hun hmang ei ta, zînga chu Kohran pawl khat ei ni ding an tah,,” a ti a. “In hla dit hung hril ro le,” a ti a. Thangngur-in Liangkhaia hla phuor thar hlim, chuonglaia kan sak nuom êmêm, ‘Thisen hlu, Thisen hlu, Thing Kross Chunga Luong Khân,’ ti kha a hei thlang a. Pettigrew chun, “Thisen tieng chu la to san ei tih. Fellowship-na ding hla thra dang hung thlang ro,” a ti nawk a. Chuonglaia kan hla dit êmêm dang pakhat chu, ‘Imanuela Thi Zâman,’ Pastor Chhuahkhamin ân let hlim, hla inlâr deu chu kan thlang nawka. Pettigrew bok chun, ‘Nangni hi a thisen tieng naw chu hriet in nei naw a ni maw?” a ti zo char chun, Ka pa Chawnga chun, , “Enge Sual Tifai Thei Ang, Isua Thisen Chauhvin,” ti Pu Buonga le Rev. Savidge-in Sap hla an inlet, kan dit êmêm kha ka hei thlang nawk a.”
“Chuzet chun chu Pettigrew chu a ngîra ‘Nang ni hi, Lutanmi in nina a la sawt naw leiin, thisen chau in hriet a nih,’ a ti ta a. Thangngurin ‘Isu thisen hlutzie khom I la hriet naw ni awm a na! Chuong a ni chun insuikhawm theina lampui a um naw a ni chuh. Isu thisena intlan le sawpfai ni naw in la chu Hrem Hmun fe cho kan hmabâk a ni a. Isu mi hmangaina ropuizie a chu Vân ram ropui mâksanin, ei ta ding a kross chunga ama thisen ngeia a mîn tlanna kha a ni a. Isu thisen înzapui a ni chun inpawlkhawmna (fellowship) ei nei thei naw a nih chuh,’ a ti, kan suok ta vong a. A zîngah inhma deuvin, khuo a lân thim lai, Pettigrew le khom inhmu nawk ta lovin, in tieng kan hung pan el a nih. Hlimtaka hla sak peiin, in kan hung tlung nawk a nih! Chuleichun a nih voisûn chena, Tangkhul Kristien-hai leh inpawna ei nei thrat nawna hih,” a ti hiel a nih.
Iengkhom nisien la, hi lekha ka hang ziek tran khan, Kom le Hmar hnam khat ei ni thu a ni a. Politic le Sakhuo hin mi hi a sukdarin, sukthre sien khom, Krista thisena in sawpfaia, insuikhawmhai hi chu an inzawmna a ngheta, Chatuan chenin a hlu deudeu ding a nih, ti hi ka ring tlat a. Indo-Burma Pioneer Mission-a hotu nina Pathienin ka kuta a hung inhlân thut a, tlin le tlin lovin, hma ka hang lâk tran lai khan, Kom-hai hotu tamtak khan an mi hung hnai tranin, mi hung zom an nuoma. Chulai tak chun ei Kohran sûngah Setan a hung inrol a, a mi hnai nuomtuhai ta ding khom a, hnai tlâk le bêl tlâk ei hung ni ta nawh. Tuhin hienga Krista Kohranhai ei hung inhnaia, Krista chun a thisenin ei innêlna dingin kot a hung hong nawk mêk ta lei hin, unau Kom-hai khom inkoppui le Lalpa sinthawtu ni tlâng theina lampui a hung um tran nawk ding niin ka hmu a. Krista thisena inluontuo ei hung ni vak khom ring a um.
Mary Kom, tuta hmaa Meitei-hai le Nagahaiin an hriet fûk nuom naw, Delhi-a HSA le Hmar unaudanghaiin in lo chawimawi a, in lo ngaisak hi lawmum ka ti tak zet el. Pathienin mi thruoi khawm ngei dingin ka trongtrai. Tienlaia ei Upahai chun, “Nga-in an tam an thi pui a, Mihriemin ei tam ei dam pui,” an ti hi hung tlung ngei dingin, EFCI le Kristien pawl dang Krista thisena insawpfai hnunghai hi insuikhawm ei tiu. “Hmar lai hin Kristien nuoi khat (100,000) bêk lungruol tak, Pawl khata um ni in la chuh, ei Lalpa Thupêk Ropui, “Khawvêl popoah fe un la, hnam tin kuomah Chanchin Thra hril ro,” a ti kha tuta nêka a let zaa tam khom ei thaw thei ka ring,” ka ti hlak kha, hung hnai thuok ei tih. Chuchu a tlungna dingin ringna mitin ka thlîr zing a nih. Thupêk zawm hi athra si a.
Lamwm a va um ngei de.
ReplyDelete