‘Ka Lunglai Hluozotu’ ka lo tiem ve a

Prof. Lal Dena, M.U.Campus, Imphal.

Mi romantic tak ka ni leiin, a bu hming ringawt khawm hin ka thla ngui le chau tak khawm a sukhar nghal. Taksa inlaichina tieng chu a ziektupa Prof Lalruoivel Pangamte hi ka u naunu pasal a nih a, makpa naran khawm ni lo, makpa bul ngat a nih. Lamka khawpuia ka hung chang in hi ka fak le dawn zawngna le ka riekna a ni hlak. Amiruokchu hienghin fel lawngin ka ti hlak, “Ka makpa inah hung ka ni nawh a, ka Pute ina hung ka ni lem”. Pu Ruoivel pa hi ka tarpinu (Tuosungnu) tapa a nih a. Tulai huna Sodom khawpui vanglai ang el a ’iengkim ching le zawr’ rama khawm hin, an farhai samal sadar la pe hlak, tuletehai hrefu le hmangai em em sungkuo an nih a. Pu Ruoivel chu ka lungdumtu (kan nupuinu) pute a ni leia, inphalam der lova a ina tlu lut ngam ka nih. Hmar thuphunga “Puhai inah lei chawina a um thei nawh”an lo ti hlak kha ka hrietzing bawk a.

Pute Ruoivel hi keia nek daiha lekhathiem lem a nih a. Kei chun pasietna kara hring inhrovin pawlsawm khawm a mawngkhawna ka pasi tawk a. PUC anthawk M.A.chen lem chu sawrkar sin thawpum le nau inkawt puma private-a inchuk thei tawk, ruol el zo ka ni nawh . Pute Ruoivel ruok chu First Divisioner ruok, B.A.Distinction, Assam ram pumpuia a pasarina tling phak a lo nih a. Insung le nau enkawl, Pathien thuawina tienga ka tluklo mihriem, ka ta dinga iengkima “Role Model” tling phak a nih. Hmar tawng le Sap tawng ziek tak taka hin ka tluk nawzie ka hriet zuol hlak.

A lekhabu hi 17 August, 2012 tuk khan ka lo hmuh a, ka tiem zo nghal a. A lekha zieka inthawk hin tawng a dittuizie a chieng a; AW le O inang nawna, T aia Tr hmang thei a ni nawziehai hi, ei hriet tasa khawm nisien a hung thailang chieng nawk zuol a. Tawng thua a thahnemngaina tak tak khawm hi entawn tlak a nih. A hrim hrim thua, Pathien thu khawm hi puotieng mawina el ni lova, a taka nuna hmangtu tak tak a lo ni zie, hi lekhabua inthawk hin ka hrietchieng nawk zuol. An nupaa an insung enkawl dan, an nauhai an inchuktir dan le tribal scholarship khawm la ve lova, an thla hlaw lieu lieva an nauhai an chawm dam hi ngaisang um tak an nih.

Pathien kuomah a tawngtaina tak tak hin chona lien tak a mi pek a, “Lalpa, harsatna mi pe rawh. Chuong naw chun mamaw naw’ng ka ti che a. I lampuia inthawkin peng hla rawi ka tih”{phek 69). Kei chu hieng hin chu ka la tawngtai ngam nawh. Tu tieng tieng hin “Lusun nau ka nih” ti ka hung inhrietchieng hnung le ka khawvel zantieng ka hmang tan mek lai hin, iengkhawm thaw thei ka nei nawzie ka hrietchieng hnung hin hi hla hla hi dit thar ka thaw a:

Dam sung mi tuok ta po,

I tir ni sien;

An hawih le rinum khawm

Hi lawm ka tih.

A hi ka hung hni che,

Dam sung ka tuokhai chun;

I tirko tha angin,

Nang min hnai sien.

Beidawng tawp khawka Pathien bel el le, a sie a tha ka chunga thil tlunghai Pathien tieng mi hip hnaitu din a hni el hi hadamna a ni lemin ka hriet tah. Ka hni naw khawmin, pieng tira inthawka pasietna le nau inphir anga pieng hmun khat kan ni leiin, Pute Ruoivel angin Lalpa kuoma a hrana harsatna mi pe ding chun ka hni ngam lul nawh. Hi khawm hi ka tluk nawna a nih. Hmar thuvar bawkin “lamsak sul le puhai chu hne ban thei an ni nawh” a ti reng kha tie.

Hi lekhabu hi a ziektupa autobigraphy ang reng a nina lai a um a. A dam lai khuolzinnaa a thil tuok le thilthawhai, a thuhril le tawnhriethai, kohran a hmu dan, Pathien thu puotieng nun chauhva ei fepui dan dam, kohran rorelnaa tisa taka thlei bik neia ro ei rel dan damhai tlang takin a ziek a. Kohran le khawtlang hlimthla, takna ei nei nawzie fie takin a mi tarlang pek a. A ziektupa beiseina “Thawlawm hrilrik nawna Kohran, Pathien thilthawtheinaa inghat Kohran hi a hung pieng vak tah ka ring” a ti hi hung pieng vak mawl sien nuom a um. Chu pha chun, thawlawm thienghlim khawm tam lem tang a tih.

Hi lekhabu ziektu hi chu khawvela mi pieng vangnei tawp a nih. A chana a lung a awi a. A lunglai hluozotuhai a hmatiemin a hmu pei a, a la hmu naw a lan tlar hai khawm Lalpa Pathien a ring zo em leiin la hmu pei ti ka beiseipui tlat. Taksa thil taka, ka naunu, a lunglai hluozotuhai laia pakhat a ni tlat leiin, a mak naw ding a nih ti ka hrietchieng. Mi tu khawmin, a bikin rawngbawltuhai lem chun tiem ngei inla, a va ziek tha de ti el lovin, mani nuna, mani insunga a takin hmang tan inla nuom a um. Hi lekhabu hi a china a tawia chu a thufunhai hi rotling, khawtlanga le ringna nuna keithuoitu ropui tak an tling a nih. Tiem manhla um tak a nih.