Mizo Hnahthlak Tawng Te Hi Kan Tawng A Ni

Pu C. CHAWILIANA

Tawng lam zir thinte (linguish) chuan Mizo tawng hi Tibeto-Burman chhungkua atanga lo chhuak niin an sawi. Tibet atanga China ram thlenga tawng hlawm thum lian tak tak Chinese, Tibetan leh Burmese tawng chu Sino-Tibetan group tiin an vuah a. Heng tawng pathum inhnaih deuh tawng te chu a indawtin SINITIC, TIBETIC leh BURMIC tiin an khung hrang leh a ni. Tibetic leh Burmic hi a hlawmin ‘Tibeto-Burman’ tiin an vuah ta a ni. Tichuan Mizo tawng chuan Tibet tawng aiin Burmese (Kawl tawng) a hnaih zawk avangin ‘Burmic’ group-ah a awm. Kawlho tawng aiin Tibeto-Burman chhungkua atanga chhuak Meitei (Manipuri) tawng chu kan Mizo tawng hian a la hnaih zawk bawk a ni.

Tuna kan Mizo tawng hman mek hi Zo hnahthlak dang chuan Mizo tawng a ni lo, Lusei/Duhlian tawng a ni, Mizo tawng chu a piang mek a ni, mi thenkhat huamhap deuhvin Lusei/Duhlian tawng chu Mizo tawng an lo ti mai a, thliarkar rilru zim tak atanga chhuak a ni, an ti a. Kawng leh lamah chuan a dik viau mai; mahse, tuna kan tawng hman mek hi Mizo tawng a ni tlat si a ni. Mizo tawh phawt (Zo hnahthlak hrang hrang) tawng chu Mizo tawng a ni mai alawm a tih theih rualin Mizo hnahthlak zawng zawng huapzo tawng kan neih chhun Mizo hnahthlak min phuarkhawmtu, inbiakpawhna leilawn chu tuna kan Mizo tawng ngei hi a ni.

Lusei tawng emaw, Duhlian tawng emaw heti taka Zo hnahthlak tawng zing a a lo thanduan bikna chhan thenkhat han sawi ta ila. Lalthangfala Sailo chuan, ‘Lusei tawng tuna Mizo tawng kan tih tak hi kum 1894 hmalam daih tawh atang khan, Mizoram hmar lamah Kolasib atangin chhim lamah Phawngpui tlang thlenga tawng hman lar ber a ni daih tawh’ a lo ti a, a dik ngei ang. Dr. Vumson chuan, ‘Luseiho thlangtlak laia Sailo lal Lallula a lal laiin Duhlian (Lusei) tawng hi a vawrh lar a, tawng tlanglawn leh tawng hman berah a siam tan a ni’ a ti bawk. Lallula’n Zopui khua a thut tan kum hi kum 1750 vel niin an sawi.

Lusei/Duhlian tawng tilartu leh Mizo tawng dinhmun luahtirtu ber zawk ni a lang chu kan Zosap, kan Missionary-te hi an ni. Kum 1894 khan Pu Buanga leh Sapupa te khan A, Aw, B min siam sak a, Zirlai bu reng reng Lusei/Duhlian tawng vekin an buatsaih a nih kha. Hmar tawng emaw, Paihte tawng emaw khan Zirlai bu hi lo ziak hmasa se Hmar tawng emaw, Paihte tawng emaw chu Mizo tawng a ni lovang tih tunge sawi thei. Kan Sakhaw lehkhabu thianghlim leh Hla bute chu Duhlian/Lusei tawng ngei hmanga ziah a lo ni a, Zo hnahthlak hrang hrang tawngpui (Common language) atan Zosap te hian min lo chher sak a lo ni.

Lusei tawng hi a tirah Luseiho, heng- Pachuau, Chhakchhuak, Hauhnar, Hrahsel, Tochhawng, Vanchhawng leh lal chi - Sailo, Palian, Zadeng, Thangluah, Rivung, Chenkual, Rokhum leh Chawnghlut hnamte’n a tirah hmang mah se, tunah chuan Mizo hnahthlak dang heng - Ralte, Khawlhring, Khiangte, Chawngthu, Ngente, Renthlei, Tlau, Pautu, Rawite, Zawngte, Vangchhia, Punte, Hmar, Thahdo, Pawih leh Paihte hian an hmang deuh vek tawh a ni. A bikin Ralte, Hmar, Thahdo, Pawih, Paihte leh Mara lam pawhin anmahni tawng an hlangna hmunah hmang tha hle mah se, tam tak hi chuan an tawng hi an thiam reng reng tawh lo. Kan zinga chibing inlak hran duhna lo piang thin pawh kan Mizo tawng ngei hian zawi zawiin a la thiat ngei ang.

Tuna kan Mizo tawng hi Luseiho tawng hlang a ni tawh lova, Mizo hnahthlak tawngin a pawlhsawp nasa hle tawh a. Kan tawng, kan hlaahte hian Lusei tawng leh Mizo hnahthlak dang tawng hi thangtung inphan tuak ang mai hian a inphan chhuakin a inkaiherh chial hlawm a ni. Tin, Mizo hnahthlak hrang hrang tawng inbelhbawm chu Mizo tawng han tih loh chi a ni lo. Hnam dang Vai, Sap, Kawl tawng tlem tlemin Mizo hnahthlak hrang hrang tawng Mizo tawng chu a belhchhah ve leh ta a ni. A reng thuah kan Hlado leh Bawhhla te chu Pawih tawnga phuah a ni hlawm a. Dawi Hla leh Thiam Hla kan chham thinte pawh Hmar lam unaute tawng a ni deuh vek bawk. Dar Hla te, Puipunna hmuna sak chi Chai Hla, Chawngchen Zai leh Tlanglam Zai tam tak kan neihte hi Luseiho tawng atanga phuah a ni thung. Tichuan hmanlai zawk hlate hi chik taka kan bih chuan Hlado leh Bawhhla-ah pawh Mizo hnahthlak hrang hrang tawng a inphum a, Pawih tawng erawh a tam deuh. Chuvangin, Mizo tawng chu Lusei tawng leh Mizo hnahthlak hrang hrang tawng leh hnam dang tawng infinkhawmin a siam a ni.

Dik tak chuan Mizo hnahthlak dang tawng thu mal thenkhat phei chu Mizo tawng tobul a ni zawk mah mah. Paihte lam unaute chuan tha (good) hi ‘hawih’ an ti a, ‘Sem’ hi ‘hawm’ an ti a. Miin thatna a sem a, mi chunga thatna a chhuah chuan mi hawihhawm an lo ni a. Chu tawngkam chu Mizo tawng chu a lo ni. A tawi zawngin heng Paihte tawng ‘Thawl’ atang hian ‘Tuithawl’ Mizo tawngin kan nei a. ‘Pau’ an tih pawh tawng tihna a ni a, ‘Paukhauh’ tih tawng tobul a ni ta a. ‘Suan’ insawn an tihna atangin ‘Suankual’ hming a lo piang a. Hla thu a ‘suang lung’ kan hman pawh ‘Suang’ hi Paihte tawng ‘lung’ tihna a ni. ‘Naktip-nakthai’ tih a ‘thai’ lai pawh Paihte tawng tho a ni. Lusei hovin Sakhaw serh leh sang khawihtu atan kan hman Bawlpu leh Sadawt pawh hi Paihte tawng tho a ni. ‘Tang’ hi ‘mal’ sawina a ni a. Mipa kawppui nei lo hi ‘Tangval’ an ni a, Mizoho chuan ‘Tlangval’ an lo ti a, ‘Khanvual’ pawh ‘thanrualpui’ tihna a ni a, heta tang hian ‘thenrual’ tih tawngkam hi a lo piang bawk a. ‘Tuai’ hi sen leh no lampang sawina a ni a, heta tang hian ‘Mautuai’, ‘Rawtuai’, ‘tuaithar’ tih tawngkam te hi a lo piang a ni. Hetiang tawngkam inang tam tak sawi tur a tam mai.

Pawih tawnga thil hming, tawngkam leh tawngkauchheh tam takte hi Mizo tawng nen a thuhmun reng a, tidanglam lovin kan hmang zui a ang hle mai. Ran vulh hming vawk, ar, ui, varak, bawng tihte chu a lam dan a thuhmun vek a. Savawm, sazuk, sakhi (khite), sanghal (Ngal), sanghar (Nghar), sava (Vate an ti). A hram dan ang a an koh chu ‘uchang’ hi ‘utlak’ an ti a. Kel hi a koh dan ‘meme’ tiin an ko bawk. Van, arsi, thla, ni, pangpar, ser, kawlthei, buh, thal, khua, chhum (sum), hnar, ka, ha, hmel, hmai, kut, ke, ban, pum leh a dang tam tak sawi tur a awm.

Heng Mizo hnahthlak hnam hnih tawng atang ringawt pawh hian Mizo tawng a pian hnem zia kan hria a, Zo hnahthlak dang tawng atang phei chuan engzah fakau nge Mizo tawng piang ang, ngaihtuah tham tak a ni. Paihte hnam zinga Lamzang, Sihzang, Teizang, Dapzar pawh an inhre tawn vek a, heng Gangte, Simte, Mate, Vaiphei leh Zo (Zono) te leh Kuki hnam hrang hrang Khuangsai, Haukip leh Thahdo pawh tawng an inhre tawn vek a ni.

Ralte leh Pawih tawng inhnaih zia te, Pawih leh Hmar tawng inhnaih zia te, Pawih hnam Halkha leh Laizo te pawh an inhnaih em em a ni. Chutiang bawk chuan Mizo hnahthlak India ram pawna cheng Bangladesh lam ami te, Tripura lam ami te, Manipur leh Assam phaitual a Zofate tawng pawh inhnaivai tak vek a ni. Mara leh Laiho tawng inhnaih dan pawh chhuttham a awm.

Entirna tlem kan han sawi atang hian Mizo hnahthlak tawngte hi bul thuhmun a ni a, tuma ta bik a ni lo ‘Mizo tawng’ hi hman thiam zir theuh ila. Tawng pui (Official language)-ah pawm tlang ila. A hmang thiam lo kan awm pawhin tumah innuihzat lo ila, Zofate min zawmkhawm a, min phuarkhawmtu pawimawh tawpkhawk a nih i hre thar leh ang u. Zo hnahthlak dangin tuna Mizo tawng an lo pai deuh pawhin ‘Mizo i ni na nge, Mizo tawng i va thiam lo ve’ inti lovin inzirtir hreh lo ila a tha hle ang. Mizo tawng thiam loh avanga min hmusittute hi chu mi a, mahni unaute pawh hmusit thin an ni tih hria ila, a tak taka an tawng thin hi thinrimah la lovin i ngaidam zel ang u. An tawng vai fo a nia.

Tawng thu loah pawh Mizo hnahthlak, Mizo nisi Mizo nih duh lo na na na chu ngaihsak hurh lo ila, harh chhuah hun an la nei ve mai ang. Mizo te min ti mizotu hi kan tawng a ni tih hria ila, dik taka tawng i tum thin ang u. Zofate inzawmkhawm nan Mizo tawng hi uar sauh sauh ila. Zofate tawngpui atana Pathian min pek a ni tih i hre thar leh ang u.