Hmunhnok Hmunhnok

[By Pu L KEIVOM*, INPUI Columnist]

The older the fiddler, the sweeter the tune.
-English Proverb

Times of India (Delhi Edition) May 31, 2009 suok phek 18-a thu inlâr lo deu el ‘This mag has kept all letters to the editor’ ti, Mohammed Wajihuddin ziek ka tiem chun thil tam tak a mi’n ngaituotir a.

Kum 78 zeta upa tah Mumbaiah Urdu chanchinbu SHAIR an ti hi a um a. Hi chanchinbu hin kum 1930 February 14-a Agraa an trana inthoka kum 1951-a Mumbai tieng an son hnung le tu chena Editor kuoma mi lekhathon po po kawpi a la kol thra vong a. Hmun an nei inchèp leiin saiip iemani zat le thir thingrem iemani zatah chuong lekhathonhai chu an hnaw sip a. An Editor ni lai, a kawnga inthoka hnuoi tieng po zeng, kum 62 mi Iftikhar Immam Siddiqui chun, “Hieng lekhathonhai hi ka dehawn phal nawna san mi tam takin an min don tah a. Thu le hlaa hnam ro an nizie an hriet phak naw lei a nih. Lekhathonhai hi a ziektuhai ngaidan el ni loin, an ziek lai huna an thlarau chang le an khawvel hlimthla a nih” tiin TOI ripawtar chu a lo hril a. Chu chu a nih ei thu zaipui ding chuh.

Hmunhnok chu iem?
Hi trongkam hi thu mal pahnih- hmun le inhnok bel khawma siem, hmun sukhnoktu, a hmangna um ta si lo thil ei sie khawmhai tina a nih. Chuong thilhai chu a thra le hmang tlak dam le hmang tlak ta lo dam a ni thei. Hmunhnok chu thil tlaktlai ta lo le hmang tlak ta loa ei hnawmhnawl, tirdakuma ei ngai tah a ni tlangpui. Chu umzie chu, ei hlut ta naw le einia a hlutna um ta lo tina a ni bok. Thil threnkhat ruok chu a hlutna hre nawtu ta dinga umze bo, a hluttu ta dinga ngainatum, sentimental value nei a um a. Chu hlutna chu thila um kha ni loin a hluttu lungrila um, Vanlalthang Inbuon ‘Zero Theory’ ( Lungril Thudik Sierkop: Zero Theory) a inthlung a nih.

Chu thu chu hang pot sei met inla. Bekanthu, sathu, ngathu tihai dam hi a fa thrang le ngainatu ta ding chun thu rim inhnik, thu lungkuoi, thu lunghnem, chil sukput ser sertu an nih. Thei pakhat, South East Asia laia inlâr êm êm ‘durian’, hling nei, rim na deu el, fak ang deuh a nih. Ina kil khata ei inuk ringot khomin in po po a ur rimsie thei a nih. Lamkhuong hmin fak ang deuh hin, a rim dutu chun inhnik an ti èm ém a, a rim tei thei nawhai ruok chun rala inthoka an thlir ngot khomin an luok a suksuok thung. Thil ei du le hlut ei ti hi a dutu kalchara ril taka inphûm le inthlung tlat, puo tienga inthoka mita hmu thei dèr lo a nih. Ei thil du, rim nei tam tak hi a fa ngai nawhai ta ding chun thil rimsie, tirdakum, luok suksuoktu an ni daih thung a nih.

Chu thu hril tâka chun Dr. Lal Dena naunu Linda thu mi hril ka zuk hriet suok chu tie! India rama an hung inzin trumin Manipur ngathu inhnik chi kilo khat zet hi ngaina takin France tieng an hawn thlak a, chu chu fridge-ah a sie a. A tarpi enkol chun tuol an suok karin fridge-a Linda thil hlu sie chu a lo hmu pal a, a naupain fa pal a ta, thipui a tih ti inlauin a lo peihawn vong a. Pitarin thaw thra a’n ti hle laiin Linda ruok chu a ngathu inpâmin a’n chek tlok tlok thung a nih. Mawsawla le eng tlêk tlûka hme an suong rim hi a dutu ta ding chun rimtui a ni laiin, a du nawtu ta ding chun luok a suksuk put put thung a nih. Mizoram tieng mihai hin an tawk thei naw zuolin ka hriet. Sienkhom, Vairampura seilien naupanghai ruok chu vai hme rim hin an lung a len em em tah tlat thung a nih. Chu chun thu sei tak a hril a, sienkhom ei thupui a ni naw leiin hun remchanga titina dingin khêk lem inla.

Nuhmei le Hmunhnok
Delhi tlanga kan ina hin hmunhnok chi hnih kan kol a. Chi khat chu kum tam tak sunga ka hmunhnok khawl khawm, lekha hmunhnok a nih. A dang chu ka nuhmei hmunhnok khawl khawm bûr le bel, sil le bil puon le rumrok chi hrang hrang a nih. Ka hmunhnokhai chun an poimaw le man to ang hu le an hlutzie phuin hmun an hluo tlawm a, in an sukchep pha nawh. An hlutzie tak ruok chu tangka sum zawnga hisap suok ruol a ni nawh. Zoram khawvela hausa tak rosum khawl khawm po po let tama hlu an nih. A makna chu, an hlui po leh an hlutna a pung deu deu. Hnama ei dam khawsuok pei lem chun, ei dam sawt po leh ka hmunhnokhai hlutna hi a pung deu deu pei ding a nih. Hieng ang lekha hmunhnok an khawl khawma inthok hin annawm khawvel hlut Baibul khom hi a hung suok chu nih.

Vokpui an inte tawma bû an sep khawm hnùr ang el hin, inkhat nu a tu el khom hin an nau le tehai ta ding bû a tam thei ang tak sep khawm hi an tum seng. Chu chu insung ta dinga thrahnemngai nu tin inhuotna zawng a ni deuh vong ti inla, khel ei hril ka ring nawh. Nghatna tieng tieng thuomhnawa in a sip hmurh chun an ngai a thra a, an chang khom a par. Chuong ang in chu in burip ei ti hi a nih. Amiruokchu, in a burip ei ti hin insung a burip ei tina a ni chuong kher nawh ti hre hmasa inla. Kotkhar bieng amanih, ban le tlungpum amanih nam nal taka tuoi tler, a sung ruok chu leithrain an fak siet vong hnung ang el hin, puo tieng enah in burip deu anga inlang, a sung ruok chu kawrong vong si a um thei el khom ni loin a tam khop el. Pâr chuoia inchei le hleihluoka in cheitu threnkhatin an thawna san chu an sungril kawrongna kar po po puo tieng thila thup mawi an tumna lei dam a ni nuom khop el.

Nuhmei mit hi Pathienin a siem dangdai bik chu ni ngei a ta, Setanin a lo man nalh a, Evi mita ropui le thilthawthei ni châkna inphûm kha a va saiphor a, a hung zelthel a, a chiri a. Chu zet chun leh, tu thi tri tri a um ta nawh, sie le thra hrietna theira chu a beng zot el a nih. Chu mit zelthelna chu a thlahaiin an la put zing bakah an put rawn deuh deuh amanih ti dingin a um. Zinga hlim taka tho kha mi inah an leng amanih bazarah an fe a, an mit la chi an hmu a, nei châknain an lungril a mor a, inah an hung kir a, an pasalhai an mor sawng a, an mor suok naw chun inhmùr bawtin ni an tla el a nih. Hi hi thil siemtuhaiin an hriet kar leiin an mit la ding chi thil tlereu siemah an intlansiek a. Bazara incheina thuom le hmangruo an zor zaa sawmsari neka tam hiel hi nuhmei thil deuh vong a nih. Tarlar (advertisement) ei hmu ienga khom deuthaw hin Evi zelthel lim a thrang naw chun seramu ei thùr thei ta nawh. An zelzei (sexy) po leh a entuhai khomin ei lawm a, zelzei taka an car tuoi dam chu poisa nei inla chu zuk inchawk ei nuom nghal el a nih.

Ei hril tum tak chu iem a na? Nuhmei hi hmunhnok khawl khawmtu le sukpungtu an ni thu a nih. Nuhmei um naw hai sien chu khawvelin a siem suok zaa sawmsari neka tam hi siem ngai kher naw nih. Chu umzie chu khawvel hmunhnok zaa sawmsari vel hi nuhmeihai bu sep hnokna a nih. A hausa le neinung deuin hmunhnok an sep khawm rawn.

A thren lem chu pheikhok man to chi tuok sangthum neka tam hiel sep khawm khom an um. Hieng hmunhnok sekkhawltuhai lai hin fashion inthlak ruola inranga an hmunhnok lak khawmhai hnawmhnawl le thè thla zung zung pawl an um bok a. Chuong an thil hluihlawnhai chu a nei naw deuhaiin an lo inchân a, chuonghai thè thlak chu mi dangin an lo inchan sawng nawk pei a, a tawpah ram hnufuolhaiin intuom lumna le mawinain ei lo hmang ve thei tah a nih. Cher cherah!

Amiruokchu, hmunhnok ngaina le inpâm, thè thla nuom lo, a bawia intâng tam tak ei um. Kan ina inlal tak chu puontriek hmunhnok a nih. Chuong hmunhnokhai chun hmun awl taphot deuthaw an hluo sip bakah kan nu zâlna ding hmun chen khom an inken ta naw vang a nih. Aigupta bawi le Babulon sala Israelhai intâng thu ei hril rop a, Baibula khom hmun a hluo rawn hle. Amiruokchu hang ngaituo chîk inla, hmunhnok bawi le sala intang hi ei tam lem daih naw ding maw? Hi lei tak hin a nih kum 2004 April khan Secondhand Theology ti thusep ka ziel hiel chu nih.

Ka hmunhnok
Ka hmunhnok khawl khawm ve chu lekha hmunhnok a nih. Ka thil inhnikna tieng inziekna lekha ka hmu hrim hrim chun nei ve ngei ka nuom leiin a nei thei dan lampui ka zong a, ka hmu thei hlol naw a ni chun mani kut ngeia kawpi thlak ka tum hlak. Tu lai chu thil a olsam ta a, librari-ah ei fe a, ei thil dit inziekna po sum tlawmte sengin photocopy ei siem zung zung thei tah. Keini College/University kai ve lai chun hieng ang thil hi a la um ve naw leiin kuta kawpi ngat ngat a ngai. Abikin, librari amanih lekhabu zorna dawr ka fena taphota ka dap hmasa tak chu ei trobul chanchin sui suok theina dinga hmangruo poimaw ni thei awm thu inziekna lekhabu a nih. Entirnan, G.A.Grierson buotsaih Linguistic Survey of India Volume 3 Part 3 : Tibeto-Burman Family:Kuki-Chin & Burma Groups chu a kawpi inchawk ding Delhi-a lekhabu dawr thraa an hril po po dap hnungin, Connought Place bula lekhabu dawr chite-ah April 28, 1976 khan ka hmu tlat chu tie! Hi hi 1904-a an sut, kum 1967-a Motilal Banarsidass haiin an sut non nawk a ni a, a Forward khom India President S.Radhakrishnan ziek ngat a nih. Hi lekhabu hi ka hmunhnok kol laia hmunhnok poimaw pawl, Zo hnathlakhai chanchin suina dinga a hnukpui le a kila lung trangkai a nih. Abikin, hi lekhabu hi a nih zieka ‘Hmar’ hming khawvel hrieta a chuongna hmasa tak chuh.

A dang pakhat la hang hril nawk ei tih. Eini rawi ta dinga ringnaa ei Abraham ni ve Watkin Roberts le a Mission indin chanchin chieng taka hmu theina chu ka hmunhnok kola inthok a nih. Kum 1990 khan Dr. Rochunga Pudaite hai nupan an rongbawlna hmupui ding le kum tina Bermudaa Fienriel (Retreat) an nei hlaka thrang ve dingin an mi fiel leiin kan nupain Italy-a inthokin kan vuong thla a. Hi trum hi Indian Children Choir an fe hmasakna tak kum a ni a, an rongbawlna hmun iemani zatah kan thrang ve nghe nghe a. Chun, vangnei thlak takin Watkin Roberts naunu Ruthi kan inhmupui bok a. Hi trum bok hin Wheaton-a Dr. Pudaite inah Watkin Roberts-in a rochung lekha indar nuoia file-iemani zata an fun khawm chu ka hmu a. Lekha poimaw a ni leiin photostat hung thaw a, a kawpi mi hung thon dingin ka hni a. Chu sin poimaw tak el chu Jacob Pudaite-in a hung thaw ngat ngat a, kum li hnung, 1994 khan Maldives-a kan inson hnungin a hung tlung a. A rikzie chu kilo 40 chuong a ni a, indota bu hrang hranga rem khawmna dingin thla ruk pum hlum ka hmang a nih.

Hieng lekhahai hi kum 1913-1968 chena Watkin Roberts-in lekha poimawa a ngaihai a sie khawm an nih. Hi lekha hi sirsana hmangin lekhabu pahnih- Zoram Khawvel 5 & 6 ka ziek ta a. Zoram Khawvel-5 hi Mizorama misawnari um tah po po laia hmingthang tak le thaw hlawk tak Edwin Rowlands (Zosapthara) chanchin le Watkin Roberts le an inthlop dan chanchin a nih. Mizorama mihaiin a chanchin sui zom ngaina hre loa kum tam an sie tah hnungin, hi ka hmunhnok kol hmang hin ropui takin Zosapthara chu kan kei tho nawk a nih. Chawimawina hlu tak Zosapthara Award khom ka dong pha nghe nghe. Zoram Khawvel-6 hi Watkin Roberts le a rongbawlna chanchin a nih. Ka hmunhnok kolhai hi Aizawl Theological College-in voi hnih voi thum an mi hung hni taa chu ka la pek phal hri naw a nih. Ka hmunhnok kol hi hmangin Jonathan Pudaite khomin ni khat el lai khan M.Th a hmu pha bok a nih. A hlutzie chu Centenary 2010 le inzoma lekhabu iemani zat a hung suok pha leh la hung hre zuol pei ei tih.

Ka hmunhnok kol tam tak hi keima ngeiin mi hrang hrang an chanchin ziek dinga ka fielhaiin an dam laia an kut ngeia lekha an ziek ka sie thrat an nih. Chuonghai chu khaw lai hmun danga khom zong inla, lekhabua hlu lut tahai chauh naw chu, hmu ding a um nawh. Chun, hmun dang danga kan khawsak sunga ei ram tienga ei khawvel inlumlet dan chanchin hrilna le thil dang danga mi hrang hrang le ngaidan kan inhril tuona lekhathon po po, abikin kum 1970-2000 sunga mi po po chu file-ah ka kol thra vong bakah newspaper, magazine le lekhabu hrang hranga thu poimaw inziek, a hnunga ka la mamaw dinga ka ngaihai chu ni tin la khawmin file hrang hrangah ka sie bok a. Entirnan, HPC Movement vanglaia national le local newspaper-a an chanchin le thil tlung an ziek ka hmu thei taphot chu a kawpi ka sie thra a, ka thrui khawm a, Holy Bible nek hiela sa a nih. Chun, magazine thra le poimawa ka ngaihai hrim hrim chu ka khawl khawm a, kum tawpah kum khat sunga suokhai po kha bu khatin ka thrui khawm hlak a. Chuong ang chu a suttuhai khomin an kol ta lo, iemani zat ka hmunhnok bawma hin a um a nih. Hmar trong le Lusei tronga lekhabu sawmhni chuong ka ziek tah hai hi ka hmunhnok bawma mi zaa sawmhni vel phor langna khom a la ni naw el thei. Ngai maka lak lo dingin, ka hmunhnok bawma hin Ph.D dikri iemani zat hmu theina a um ka ring.

Kum 1995 vela computer ka hmang trana inthokin kha hmaa zieka lekha ka lo sie thrat hlak hai kha computer-a thun vong thei a ni tak leiin chanchin lak khawm tieng ka hung inthlada deu deu a. Internet khawvela ka hung lut hnung lem chun boruok zai hmanga information tam tak zong suok thei a hung ni tak leiin, internet hmang loa lekhathon ziek dam ka hung chawlsan a, ka hmunhnok kol khom a tlawm tiel tiel a. Chu chu a hadam thlak lai zingin, thil thra tak a ni di’m maw? ti dam ka ngaituo a. January-February, 2009 sunga India hmar sak State panga sunga Hmar umna khuo tam lem sira ka’n zinna, ni tina ka laptop-a ka rikawt, thu poimawa sip, lekhabu pakhat tling tah ding hiel chu a back-up copy ka lo siem si naw leiin Delhi ka tlung hnung thla khatah, khik lo ding iemani ka lo khik pal ni ding a na, thawklekhatah a bo rip a, hril ding a vang ngei. Bauah meikhu a suok naw chauh a nih. Ni dang angin, ka notebook-ah lo ziek chu ni lang, bo song lo ding a ni bah! Hi ka tonhrieta inthok hin, kum tam computer-a ka lo innghat hlak kha innghatna tlak a lo ni tak tak nawzie le a lekha hmunhnok ngeia kol a poimawzie le vong fimkhur a trulzie ka hriet chieng pha a, doka si siin ka hlawkpui tho.

A tawp taka chun, ei hmunhnok kol seng hi rorelna nia ei ngirpui ding an ni si leiin, kol chi le kol naw chi hriet hi mani nun sengah a poimaw takzet a nih. Ngaituona hmunhnok thu trawng le rimsie kol lem lem chu mani chauh khom ni loin sungkuo, khawtlang le ram le hnam chen sukporchetu a ni thei. Ieng ang Golgate thra khom hmanga ha nawtin, bau thruo fai inla khom, sungril tieng thil a ni leiin a trangkai nawh. Mi thiema ngai ni si, hrietna thring trawng, hmunhnok neka hmunhnok lem koltu ei tam dam hi ei thrangmawbawk lien tak laia pakhat a ni tah hrim a nih. Sakhuo le inzom pawl thila lem chu ei ni zuolin ka hriet. A thùkin ei thu vut vut a, Thlarau Thienghlim hang inlawi lutna ding hmun thienghlim a vang. Ei hmunhnok kol seng hi bi chieng ei tiu.

[*Editor's Note: INPUI columnist Pu Keivom is a retired Indian foreign diplomat and a respected Hmar Mizo litterateur. This article was written by him on June 5 2009, New Delhi.]