Vanramah Hnam Dang Nekin Hmar Mi Hmurawn Ka Nuom*

::By LALRINGSAN HRANGCHAL, Sub-Inspector::

(Based on the swimming pool of the Hmar Churches-EFCI, ICI, EAC, and RPC in Shillong and its KTP activities)

Hophni le Phinehas hai suolna leiin Thiempu Eli insunga chim chau nilovin, Israel hnam pumpuiin sietna an tuok ang bawkin, Shillong kohran thuoituhai pharisaina leiin Hmar hnamin sietna ei la tuok pei ding nek chun, vawisuna kohran thuoitu hai po hi ban in la, pastor boin um inla a tha lem el naw ding maw?

Hi thupui ziek ding hin ka nina le ka thiemna’n phaknaw ti ka hriet hlea. Amiruokchu, Isu’n, “hienghai hi an khek naw khawma, lungte bek kheksuok a ti” a ti ang khan, Shillong sunga HSA Member 95% vel enin, ei sin le ei inchukdan kalhmanga hai hin Pathien mit ei tlung zo tanaw n’in ka hriet a.

Shillong sunga HSA members lekha inchukhai hi mani inchukna kawnga taima taka inbur pei siloin, kohran le khawtlanga mihai inpakna hnawta, fel inti em em a, rawngbawl ei tam a. Kohran thuoitu tamtak hlak chu ieng college am? Ieng subject am? Ti nekin kan Kohrana I hming hung zieklut raw aw? Tiin new comer hunghai reng reng hlak chu eilo welcome a. Pastor pakhat, a hming chu hril dal ei ta, new comer paruk (6) alo hmu fuka, an veng mi anni tawla, iem inchang? ti nekin kan kohran inhung lut naw chun, siet-le-that intuok ani khawmin inchunga ka kut ka sawp a ti tawp.

New comer ka ni ve lai Local Secretary pakhat chun kan ina vawihni hungin an kohran a din a mi hung fiel chu tie, College ka tin min channa mi fiel khawm an bo nawh. Siet le that tuok ni hin Kohran an lu anling vieu el hin HYA le Val-Upa ei nei hai hi tangkaina bo der an nih. Students Shillong fe hai ei welcome dan andiknaw leiin, kum hni/thum inkhawm lova veng tieng inlawi ei tam pha a nih.

Kohrana inhmang laklaw si chun thawding a tam hle a, hmingthat, langsar le mipui ruol lawmzawng thaw khawm an hawi vieua, ngaizawng tha khawm hmu pha thei a nih. Pathien ramah lungril taka rawngbawl nuomna lungril umsi lova, kohran rawngbawl chu anhawi hle a, thaw chi tak ani leiin mi tamtakin kohran activities hi HOBBY a nei ei tam reng a nih!

Ka hmudan chun Shillong inchuklaihai hi BA/MA degree khelah, pharisai nina degree ei hawnsa seng niin ka hrieta.

College/Competitive Exam a hung huna, Kohrana ei lo inhmang rawn nazar le nupui ruol mi tawngtai pekna zarin tling/pass inring deuin ei hang umsur a, Pathien hlak chun Pharisai le mani sina ringum nuomlo hai kha thangpui nekin mi ringumloa alo sie hlak leiin, hlawsamnain mal amisawma, a tawpa Pathien kuomah nuor thusim inzawt cho ei chantawk ani nawk hlak a nih.

Kohran (KTP) activities reng reng le lekha inchuk hi inkalna chite khawm a um naw a. Sadrak, Mesak, Abednago le Daniel hai ang khan, ei thei tawkin Pathien rama rawngbawl ei ta, ei thei baka Pathienin ami thangpui ding ani ti hi det taka pawm le zawmtu ka nia. Chulleiin, KTP Secretary a hai kum 6 lai lo thangin, Hmarkhawlien, Diger, Chandrikhal le Savawmphai a hai khawm Pathien thu khawm hrillin inkhawmpui a hai ka lo fe hlaka. Kohran thuoitu tamtak lem chun “I nu le Pa’n inkhawmpui/Pathien thuhriltu invak dinga antir che ani? Pathien thu awi tak tak I ni le Missionary a fe la ni naw ni’m! KTP hai I thuoisuol vawng tah” ti dam a halna hai khawm ka tuok.

Ka thawthei bakah, Pathien hmel anlang ding ani ka ti leiin ka hmabak ah ka fe pei hlaka. Kumthum sung written vawi 12 ka tlinga, interview 9 ka hang tla meu chuh, Kohran activities le tak-in-ning deu a inchuk ding chu ankal nasa hle ti hi ka hrietchieng niloin a paltu ka lo ni zing ani ti hi ka hriet dawk chau a ni chu!

Tulai Kohran rawngbawl nuom dan le activities tamtak hai lem hi chu Lalram hi a sun rawn taluo a, Pathien khawmin ieng Lalram tak awn a rawngbawl am an nit awl aw! Mi ti hiel a ti. Chu ei rawngbawlna hai chun Pathien ei hang dawra, tiem pei silo a tawngtai le pawl rawngbawla sin hmu ei tum leiin Pathien nui khawm inza phak naw nih. Pathien chu Ama hming leia chanhai chu malsawmna’n vur hlak deh, amiruokchu, Shillonga Kohran rawngbawlna le KTP activities hai hi chu Pathienin a hriet nuomlo thil a ni leia, I rawngbawlhai kha, Pathien ram hmasawnna nilovin I “HOBBY” rawng I bawl ani ti khaw hre mawl raw aw. Chuleiin pawl rawngbawl nek khan inchukna kha ngaisak tum lem la I ta dinga thiltha chu ning a tih.

Kohran tinah thalai hai target tam tak tak ei neia, thalai group tum tum a inthein pawisa ei zawng sup supa, a tha hle. Chuonglaizing chun thalai hai 85% vel hi chu Pathien hminga thalai thilthawnahai reng reng hi inhawi chenna chaua hmang ei ni tawla. An ngaizawng hai an hmu nuom zata group inhlaw rawt el khawm ei um. Kum 2006, August thla sung lem khan chuu Kohran thenkhat Pathien hminga rinum tuor inti em em a zan kher kher a thalai inhlaw thaw khawm ei um a. Nu le Pa hlak Pharisai Degree nei vawng eini leiin ei pawl thalai hai inhlaw a ni phawt chun, lekhatiem nekin zana ansuok khawm ei phal em em a. Zan kher kher, chu khawm chu dar 2:00 am/3:00 chen chen khera inhlaw hlak khawm ei uma. Chuonga thalai thisen lum lai Pathien hming leiin, nu le pa hmuphakloa zan sawt tak tak ei hang inhlaw chu, ei rawngbawlna ra, thla 2/3 hnungin hriet ding a um hlaka, tlang I hriet hma a to tawka, “intuokkhawm ni ropui a tlung huna intuok dingin”, Doctor pa’n khawm kutpar thliek khawp hril ding ei um tah. Chuonga ka sawl-ka kham khawm ti theiloa ei rawngbawl tawk tawkna leia, thieng-le-theingnaw kara ei sum lamdawk hai te khan Missionary kan chawma ei la hang ti nawk deu deua. Aw! Ei Missionary thenkhat, ringnawtu man nekin “Zaunau” an hung pai puom pang ti hi lawm naw thei ding ei ni naw reng a nih.

Shillong kohran hai te hi aw! Pathien ram nilovin pawl rama rawng ei bawla. Pathienni a thawlawm thaw rawna hming inlang ei nuom leiin, nauhai lekhabu man ding sik sikin thawlawm ei thawa. Pastor le upa hai hlak chu, manin thaw tum siloin, mihai thaw ding tiin thawlawm thawrawn a tulzie pulpit ah chil inhnak rak khawpin ei sermona, “kiemna hi van hlawkna a nih” tiin nupui ruol lungril tawk zawnga sermon hlak an thiem. Upa pakhat (Shillong a la um) lem chu pulpitah khel chieng em em in vawihni a hril ka hriet taha, ka lo ngi ropuina pop o a bo tawp. A kar chang chang kan inhmu hlaka, ka hmu zatin khel hrilpa tiin ka lungrila anlang hmasa zie chu tie! Ei UPa le Pastor hai hmel a reng reng Pathien hmel hmu ding umlo, an khel hril hmel ei hmu zing khawm hi mipuihai indiknawna chu anih. Ei nauhai inchukna ding sik sik in ramthim fund, ramthar fund, thalai fund, building fund etc. ei pek a. Ei I hmu phak zing ei thisena insieng ei naw hai invawilovin, ei la hmu ngailo, ramthim ei ti a chenghai ei hei hmangai em em a, ei nau hai le insung invawilovin ramthim invawi leiin Biekin ah mitthli tla zawi zawiin ei tawngtai. Ei ramthim invawi luot leia ei invawi hmanlo ei nauhai te khan ei ramthim hmangaileia ei tawngtai lai ziel hawp, zudawn, thil zamaw, ruk-inruk le suolna chi hran hran hri an milo invawi peka. Tripura, Bhutan, Nepal, Myanmar etc. ei invawi luot leia ei ngaisak hmanlo ei nauhai ramthim le lekha inchuk invawk ve hman lovin drug addict-na hri an mi lo invawi peka, kir zai an rel thei bik tanaw leiin, a tawpa, “Ka lawman par anthliek tah ie” tiin Pastorin, “Nitin thlungthar anlo tuoka anlawm nitin a zuol pei” tiin chatuon hremhmun fe ding hai te kha vanram fe dingin a mi vuiliem pek, a thi mahla, mit lankhap thei tawk tawk hai te kha “CAMP” a ei sie khawm rama, vawi tamtak an mi piengthar peka, karkhat/karhni hnung, “Ui uo le uo le uo, ekthing tien I pan nawk si” tiin an nunhlui an min vawi kir pek nawk pek hlak si an ni hi. Chuonga nunhlui invawia kir nawk hai te khan invawi ding dang net a nghal lo hai chu, ei ram le hnam te hi thei tawpin an min vawi peka. Drugs le nunghak invawi sa zingin ei ram le hnam an min vawi peka, an min humhimna le venghimna hnuoia hin ngai muong em em in Kohranin ramthim ei invawi a nih.

Ei ram ei hnam, Kohran le khawtlang I hmangai a ni si chun ramthima ringnawtu hai invawia, anta dinga thiltha I thaw hma khan I insung I naw le te hai kha ngaituoin invawi hmasa lem rawh. Vanram-ah I hriet ngailo hnam dang I hmu teu nekin I thisen in zawmpui Hmar mi hmu teu I nuom lem naw maw? Ei insung invawi ding sik sik a ramthim invawi dinga thudik le thukhel chekpawla Pastor ruolin Pulpita nupui lungril hne tuma an sermon hi sim hai sien. Khawkhat, khawhni biek neia, a chang chang leh kan vuot vuot a nupui ruol thawlawm pe teu teu dinga inchuktirna pea, annawleh, thlangrama ansawn phata thlakhat/thlahni hla an hmu naw phata Kohran dang insawnna ding melkai nghal Pastor ruol hi Kohranin chawm tanaw inla, Hmar mi vanram fe ei tam pha el naw ding maw?

[Editor's Note: *Hi artikul hi HSA magazine 'Thangthar Rawl' a lo insuo tah a nih. A ziektu Tv Lalringsan Hrangchal hi HSA Shillong Branch ah mawphurna sin a lo chel el bakah EAC kohranah thalai pawl thuoitu a lo ni ve a nih.]