Lemderna (Hypocrisy)

[By Pu L.KEIVOM*, INPUI-news&info Exclusive!]
Rûlhai, rûlngân thlahai! Thiemnaw changa, hremhmuna in fe ding hi iengtin am pumpel thei in ta? -Matthai 23:33

Kum 2004 February khan artikul pakhat 'Hmaithinghawng' ti ka ziek a. Tuta ka ziek thupui tho, hmai kawra sakhuo hmanga lemchangna le lemderna nuna ei lut thuk takzie thu a nih. Tuta trum ruok hin chu Rom 2:17-29 sehmea hmangin, Judahai khawvel le ei suotlang thara ei khawvel, lemchang zawla ei inhnel dan le ei hmelhmang ei bitum ding a nih.

Ei hril vet Setan ang boka a zie thlak zing lemderna hi a dawha thurzie, vervekzie, inthup thiemzie, khikhawkzie, khawkherzie, zeizie le rawngzie sui suok zo mei mei ruol loa inril a nih. Ziektu hmingthang W. Somerset Maughan (1874-1965) chun "Hypocrisy is the most difficult and nerve-racking vice that any man can pursue; it needs an unceasing vigilance and a rare detachment of spirit. It cannot, like adultery and gluttony, be practised at spare moments: it is a whole time job" a lo ti a. A ni hrim a, laiking mizie le laihrui inzom lemderna hi a boruok le ngirhmun zir ang peia rong inthlak zing hlak a ni leiin, hi nun inbel hi sinpui a tling takzet a nih.

Lemderna trobul
Grik trongah 'hupokrites' ti an nei a, chu chu hla phuoktu amanih thu ziektuin amanih a ziek anga lemchangna zawla lem inchangtu, Saptronga 'actor/actress' an ti hi a nih. Trong a hung insiem tung pei ruolin, hupokrites ti khom hin umzie dang a hung put pei a, dawhaa mi hlem tum, zie thup, mani ni nawna neka thra lem le fel lem anga intar lang tuma lemchang tieng kawkin an hung hmang zui tah pei a nih.

Baibula hi trongkam hung inlangna hmasa tak nia hriet chu eini rawi hmanga thrang ve lo Apokrifa-a inthok a nih. Grik lal rilo Antiochus Epiphanes, kum 163 B.C a thi, Jerusalem voi hni zet la a, Judahai le an sakhuo rawt ram tumtu, an Grik pathienhai inbiektir dinga bei a, an tempul suosamtu khan Judahai chu ditsak awm taka zawra that treuh dingin Captain Appolonius a ruot a. Judahai Pathien neka Grikhai pathien ropui lemzie ientirna drama changtuah Judahai chu hmang a, lemchanga thrang nuom po chu that loa insuo a, a nuom naw po chu that vong ding ti thupek a um a. Hieng lai hin, dan hre mi, Juda mi fel le lekhaziektu Eleazar a um a. Lemchanga a Pathien inphat a, milem hmaa kun nek chun thi a thlang lem a. 2 Makabi 6:24-28 a chun a trongkam, "Hieng ang lemchang hi ka nun leh thil intu lo tak a nih. Lo thaw ni ta lang, kum sawmkuo a ni hnungin Eleazar chu hnam dang sakhuoah a pakai ti ruoltharhaiin hung sawn an ta, sawtnawte ka la damna dinga ka lem inchang chun thruoi suol tawl a ta, ka upatna hi sukporchein ka sukhmelhem ding a nih" ti ei hmu a. Hi thu hi hril pum zingin ring tanna khawlah a lu a rol a, a thi pha tah a nih. Lemchang nuom lo rawl hi chu a mawiin lung a tawk a nih.

Hi taka Eleazar-in 'lemchang' ti a hmang hi Grik tronga Thuthlung Hlui an hung inlet chun hupokrites tiin an hung sie a, chu chu Saptrongin 'pretence, hypocrisy' tiin, Delhi Version Baibulah 'lemderna' tiin an hung sie tah pei a nih. Chu chu hi thu mal trobul hung suokna ka hriet hlat thei tak chu a nih. Hmar tronga Baibul inlet hmasatuhai chun Lusei tronga an inlet dan zuiin 'vervekna' tiin an sie a. Sienkhom 'vervekna' chu lemderna zie laia pakhat chauh a ni leiin a umzie a phok zo nawh. Chuleiin, Delhi Version kan buotsai laiin, kha hma daia thu mal ka lo hmang tah hlak 'lemderna' ti chu kan hung hmang tah lem a nih. A umzie chu: mi hlemna dinga mani zie le nina tak thup a, a neka thra lema inlang tuma lemchang a nih.

Oxford Dictionary chun 'hypocrisy' hi "practice of misrepresenting one's real character, opinions, etc especially by pretending to be more virtuous than one really is" tiin a hril fie. Hi thu mal hi Saptrong chun noun, adjective le adverb- a chauh siem le hmang thei a ni laiin, Hmar tronga ruok chu verb-a khom hmang sa thei a nih. "A mi lemder" (lem+der) ka ti chun verb-a ka hmang a ni a, a zie thup a, dawha hmang a, lem inchanga a mi hlêm (der) thu ka hrilna a nih. Kong danga hril chun, "Lem inchangin a mi der" (hlèm) ti thei a ni bok. Khêla inhlèm pangngai ringot a ni nawh.

Isu le lemderna
Isu theida tawp laia pakhat chu lemderna hi a ni hmèl khop el. Hi trongkam hi Farisaihai le Sadukaihai a beinaah a hmang inrim hle. Mat 23:13-33 a lem chu an hmaisanah voi sari top 'lemderhai' tia khiksawin, an nina anga an inngaina letling char an ni lemzie thu le an chung pikzie le rikzie voi sari top a hril khum tawl a nih. 'Lemderhai' ti hi Baibul pumpuiah voi 16 a chuong a, voi 15 chu Thuthlung Thar Matthai, Marka le Luka ziekah a um a, arêngin Isu Kristan lemchang thiem Farisaihai le Sadukaihai a lepsèna trongkam vong a nih.

Khang ang khopa pa zaidam, beram, a hmul vawtu hmaa to zing ang le Isaiin a tekhi (53:7) hiel khan hieng ang trongkam na le turu a hang hmang piep piep el kha chu, ei hang tiem ringot khomin ei trim sok sok el a nih. Hi trongkam le a hmang polhai mol kha a nih a rumintang zuol chuh. Hmeithaihai fa tlarantu, thruoitu mitdel, mitdel invet, thlan lung nal var, puo tienga inlang mawi tum, a sung ruok chu mithi rû le porche tinrenga sip, sung tieng ritlonaa sip, zawlneihai thattu a ti tawl el bakah, rapthlak ka ti tak chu rûl thlahai ti ringot khom dittawk loa 'rûlngân thlahai' a la hang ti ta deuh deuh kha a nih. A dongtuhai ta ding chun trêk voi sari deng nek khoma a nat ring a um. Isu Kristan lemderna a theidazie hieng neka hang hril fie chu tu trongkam thiem khomin a dai ka ring nawh.

Lemderna le ei khawvel
Hi lemderna hin Grik mi amanih Juda mi amanih khawvela chauh hmun a khuor naw a, eini khawvela ngei khom, ei ni tin nunah, hmun lien tak a hluo tlat a nih. Kristien ei inti a, piengtharna kawr bunin gospel taka inlang ei tum a, a taka mani nuna gospel lak lut le hmang ruok chu ei ngai poimaw meu nawh. Thu ei hril pha mi dang ta ding le zawm dingin ei hril a, ei ngaithlak khomin mi dang ta ding le zawm dingin ei ngaithlak bok a. Pathien thu ei ring ei ti khom hi mi dang ta dinga ring ei hoi khop el. Pathien thu ei tiem le ngaithlak hai hi mani inen chiengnaa hmang ei tlawm em em. Mani chu fel sa angah ei insie dai a, mi dang a mamaw dinga ei ngaihai chu lungrilin ei dap kuol a, "Chu nu, chu pa ngaithlak ve dingin ka va dit de aw" ei ti mathlawn nawh. Chuonghai chu ei hmangai le ditsak lei khom a ni chuong kher nawh; ei lemderna inkhumtu ding hmangruoa ei dit le hmang nuom lei a ni nuom lem. Chuonga ei ti chun eini chu mihaiin fel saah mi ngai dingin ei ring a nih. Lemderna hi zei tak a nih.

Lemderna hi ei hmaithinghawng a nih. A thrang naw chun khawvar ei nèl naw a, hmai inchang lem chun mi hmel ei hmu ngam naw a ni tak. Lungril naw pui hril hi hawihawmnaah ei ngai a, lungril tak a mû mua khè ngam chu mi invetah ei sie tlangpui. Lemchang hi ni tin darkar 24 sunga mi tam tak inhnel rawnna tak a nih. William Shakespeare khomin a drama ziek As You Like It-ah, "Khawvel hi lemchangna zawl a na, A pa a nuin lemchangtu mei mei vong ei nih" (All the world's a stage, And all men and women merely players) a lo ti hrim khah. Chu lemchangna zawla a hmunpui tak chu sakhuo buzawl a nih. Isu Kristan lemder le lemchang a theida tluka nasain lemder le lemchang hi ei taima niin a'n lang.

Hi lemchangna zawl, tle sura lemderna thuom ei inbelna hmuna hin inhlem tuo hi ei inthuruol tlangna tak a ni bok. A danglamna um sun chu a zei deuin an hlem rawn a, a zei naw deuin an hlem tlawm mei mei a nih. Amiruokchu, mi ei hlem hmaa ei hlem hmasa tak ruok chu mani le mani ei nih. Ei ni naw anga inlang dinga lemchang ei thaw tum laia mi lo kaltu ei sie le thra hrietna chu ei sirde a, trong thei lo dingin a bau ei huppek a. Chuonga ei thaw rop hnung chun ngaiin ei hung nei a, lemchang chu ei nina tak ding hrimah ei hung ngai song el a nih.

Pathien ruok chu lemder le hlem thei a ni nawh. Ieng angin insukthlarau mi inla khom, a tirh Isu Krista zomtu le zom nawtu, neitu le nei nawtu chu a hriet chieng. Chu chiengna namdettu chu Thlarau Thienghlim a nih. Pa, Naupa le Thlarau Thienghlim chu pumkhat an nih. Rorelna niah ei lemchang thiem le thiem nawin kongro suk naw nih. Ei felna dinga Pathienin a ruot Krista chauh naw chu inkhina dang hmang ni bok naw nih. Chuleiin, "Isu Krista hmanga mihriemhai thuruk Pathienin a ngaituo ni chun, ka Chanchin Thra hril ang hin rèl ning a tih" tiin Tirko Paulan huoi takin a ziek a nih (Rom 2:16).

Mani inringzoa inngaina
Mihriem tin ngaituonaa Siemtuin a sie tlat laia pakhat chu rorelna la um ding le thiem le thiem naw chang dinga inringna lungril a nih. Chuleiin, sakhuo ei ti hi pieng lo thei lo a nih. Hnam tinin rorelna nia thiem chang theina lampui ei dap seng a, chu lampui ei dap suok le hraw chu sakhuo tia hming ei inputtir hi a nih. Thiem changna lampui amanih felna lampui amanih ni dinga dan thraa ei ring ei hraw chun him dinga inringna ei nei a, chu chun mania inringzona a mi pek hlak. A thren ruok chun, Pathien a um nawh tiin an thrang thung. Um loa an ngaina tak khan inringzona le ngaingamna tehlem a pek a, chu chânga chun an inawk hlak.

Chuonga nun dan thraa an ngaihai ringsan leia Pathien hmaa dingchang dinga inngai Judahai ngirhmun indik nawzie chu Paulan Rom 2:17-24 ah a phor lang a. Anni khom an barakhai hle ring a um. A san chu, Judahai hi Hinduhai ang deua sakhaw mi deu el, Pathien hmaa an khawsak dana khom khermei tak el, ser le sang le felna Dan zawm thua khom tu tluk ruol lo khopa fîr an nih. Pathien hnam thlang le a Danhai koltua inngai, chu leia Pathien hmaa thiem chang dinga insie tlat an nih. Amiruokchu, an chungchuong biknaa an ngai tak chu an ngirhmun sukderthawngtu a nih. An thilthaw leiin Pathienin lawm le pom dingin inringna an nei tlat a. Pathien an ngai dan khom inhnuoi tak a nih ti ngaituo nachang an hriet fuk ta nawh. An thilthaw le thilpek hai leia Pathien lawm ding le anni chu a hmaah mi fela inlang dinga inngaina an nei tlat a nih. Chu ngaidan indik nawzie chu Paulan Rom 2:17-24 a hin a hmatiemin a hung phet thluk a nih.

Sung tienga Dan ringsanna
Judahaiin Pathien laka inringzona an neina san chu Dan hmanga inchuktir le thruoi an nina chu a nih. Thratna dan mumal tak nei lo hnam dang ang ni ve lo, Pathiena inthoka iengkim dong, Dan a pek hnam, chu dan chu kengkaw dinga a hnam thlang bik, chuong Danhai chu an pienga inthoka inchuk hlak hnam an nina chu hnam danghai neka an danglamna le chungchuong bikna niin an ngai a, an uongpui bok a nih. Dan neitu an ngainatna le an trobul chu laihrui inzom tlat niin an ngai. Juda mi ni le Dan neitu an nina chu an hnam aidentiti-ah an bel tlat bok. Thu tiem dongtu ding le chu leia zangaina, ditsakna le vobikna changtu dinga an inngai tlatna chun Pathien hmaa khom thiem chang saa inngaina lien tak an lungrilah a'n neitir tlat a nih. Damaska kotsuoa Isu Krista le an intuok hma chun chu chu Tirko Paula ngirhmun khom a nih (Filipi 3:4-6). An intuok hnung ruok chun, Pathien lunginsietna zara Isu Krista ringna leia thiemchang thei chauh a ni thu a hung hriet a, a hmaa uong taka a lo innghaisan hlak po po kha a chim thla vong a, saruok el a nih ti hmu thei dingin a mit sunvarpekin a um a, a letlingin a'n thlak top el a nih.

Puo tienga Dan ringsanna
Judahai chun Dan chu felna dan ringot ni loin hrietna le thutak hnarpui niin an ngai a. Dan hmanga Pathien hmaa fel hlaw thei a ni nawzie ruok chu an hmu thei nawh. Dan chu a fel tawk naw lei ni loin a zawmtu dingin an zawm zo naw lei a nih. Paula ngeiin, "Dan chu a thienghlim a, thupek khom a thienghlim a, a fel a, a thra" (Rom 7:12) tia a ziek laiin, chu Dan chu taksaa cheng, suol kai mihriem chun phur suok ruol a ni nawzie thuin a sunzom nghal a nih. Chu lei tak chun, "Dan zawm la chu sertan hi a trangkai takzet a nih. Dan bawsetu i ni ruok chun i sertan chu tan naw naw ang chie a nih.. A'n lang chaua Juda mi ni chu Juda mi tak tak nina a ni naw a, taksa chaua sertan chu sertan tak tak nina a ni chuong bok nawh. Sungrila Juda mi ruok chu Juda tak tak a nih; sertan tak tak chu lungril tienga tan hi a nih (2:25-29) a lo ti chuh. Mosie ngei khomin Israelhai kuoma thuro a sie khan "Chuleiin, lungril ser tan unla, lulul zing ta naw ro" tiin Paula hung inlang hma kum 1400 neka tam liem tah khan a lo hril daih tah a nih (Deut.10:16)

Dan ringsanhaiin an nina nia an ngaihai chu Paulan ieng tin am a hril a? Pakhatna, "mitdelhai keithruoitu" (2:19) niin an inngai. Pathienin Dan hmanga an lungril a elvar, Pathien ditzawng le a lampui hretu le chu tienga mi thruoi theituah an inngai a nih. Annin an thruoi sung phot chun thlaraua mitdelhai chu himah an ngai bok. Isu ruok chun hieng mihai hi 'thruoitu mitdel, mitdel invet' a ti tawl tlat thung a nih. Chuong ang mi chu eini lai khom ei va hang tam awm de aw! Rongbawl dan ding inchukna class-ah ei kai a, tlawmte ei inchuk a, rongbawl dan ding thiem hleah ei inngai nghal a. An naw leh, Baibul inchuknaah ei kai a, dikri ei hung hawn hnung chun Pathien kuoma mihai thruoi dan ding lampui hre vieuah ei insie bok a. Chuong ang hrietnahai chu a trûl tak hriet chieng hnunga hmang dingin an trangkai em em. Amiruokchu, Chanchin Thra chauh hi a ringtu taphothai sandamna dinga Pathien thilthawtheina le Pathienin mi fela a ruot theina (1:16-17) um sun a nizie ei hriet chieng hmasa phot naw chun mani ei inringzonahai chu ieng tina khom a ni nawh. Chu chu hre chieng le nei chieng loa rongbawl chu khuorkhuruma thlaraua mitdelhai thruoi luttu ni thei a nih.

Pahnina,
"thima umhai èntu" niah an inngai. Thima la um zing ni siin inthima chenghai thruoi suok dingin hma an lak. Chuonga an thaw chun annia inthimna chu thupin, mi mithmuah hmaiman duok dinga inringna an nei. Thuhriltu ropui John Wesley (1703-91), Methodist kohran indintu khom kha thima a la'n tang zing laiin, inringzo takin London khawpuia lung in le mi retheihai um khawmna hmun hrang hrangah rong a bawl hlak a, America chenah tla thlain Georgia-ah thima chenghai èntu dingin misawnariin a zu um a, ngaizawng dam neiin a che buoi fe a ni khah. Thlaraua mit varna le hringna a hmu hnung ruok chun Paula ang charin Pathienin a hmang a, hmun hrang hrangah rongbawla mel 250,000 zet inzin suokin sermon 40,000 chuong hiel a hril a nih.

Pathumna,
"mi invethai thruoi vartu' niah an inngai. Hi hi mimawlhai thruoi vartu tia inlet thei a ni bok. Nun dan ding lampui hriltu le inchuktirtu, mi fe suolna le indik nawna man zung zung a, lampui indik hriltu le kawkhmutu niin an inngai. Chu chu ngirhmun insang tak a ni leiin, chu nina cheltu an nina chun Pathien hmaah thiem chang dinga inringzona nasa tak a pek. Amiruokchu, mani le mani inhlema ngaingama insiena a ni thu Paulan a hnam chanpui Judahai a hril a nih.

Palina,
"naupanghai zirtirtu tak" niin an inngai. Hi hi 'puitling lohai zirtirtu' tia inlet thei a ni bok. Thlarau tieng thila zirtirtu le chuong tienga mi thruoi theitu nia an inngai leiin thlarau tienga hrietna la tlawm le la puitling lohai chung daiah an insie a, chu chu an nungchang le khawsak dana khom suklang an tum hlak. Sienkhom, mitdel an nizie Paulan huoi takin a hril a nih.

Hi taka inthok hin ieng am ei hmu a? Juda mi chun Dan a nei le a hriet leiin Pathien ditzawng hretuin an ngai a, a hmaa thiem chang dinga mani inringzona a nei a nih. Pathien hretu a nina chu a langa chelekin mihai kawktu, thruoi vartu, siem thratu le lampui indik inchuktirtu takah a'n ngai pei bok a nih. Chuong chu a ni si chun, Krista leia felna le thiemchangna chu a ta dingin ieng am an ta leh? Chu tak chu Paulan a Juda chanpuihai hril hriet a tum a nih. An ngirhmun an inhriet chieng theina ding le lemchangtu le lemdertu mei mei an ni thu a hril fie theina dingin zawna ni si, kawkna le halna thu ni bok, iemani zat a sak suok a, chuonghai chu ei thlir pei ding a nih.

Zawna poimaw le khirkhan
Ieng tin am Paulan indoi der loin a Juda chanpuihai nina a phor lang a? Mi dang zirtirtua inngai, mani inchuktir nuom si lo; inru lo dinga hriltu ni sia inruk chîng mi; uire lo dinga mi hriltu ni sia uire hmang; milem biek theida sia milem biekna ina thil inruk ching hlak si; Dan uongpuitu ni sia bawsetu le a bawsiet leia Jentelhai laia Pathien hming sukpawitu ti sartifiket a pek tawl a nih. An insuong vei leh an sarifiket dong chu suong a um naw khop el. Chun, Dan zawm si loa sertan chun umzie a nei naw thu, lungril le thlarau tienga sertan chauh sertan tak tak a ni thu le a pawnlanga Juda mi ni nekin sungrila Juda mi chu Juda mi tak tak a ni lemzie a hril tawl bok a nih.

Mi danghai zirtirtu, kawkhmutu, elvartu le thruoitu inti sia mania inchuk nachang hre lo le inchuk nuom lo, trening thei lo thlarau koltu ni hi thil trium tak a nih. Chuong ang mi chun kutchala mi kawkin a soisel a, thaw dan ding ni awm tak tak mi kuomah thurawn a pek a, sienkhom ama lungril ruok chu a hriet chieng naw a, a suolna a hmu thei bok nawh. Mani fela a'n ngaina chun Pathien a hlatzie chu a'n hmutir thei nawh. Fela ama a'n ngaina chun amaah indik nawna hrim hrim Pathienin a hmu a'n ringtir thei nawh.

Zirtir thei i ni am? Isu Krista chanchin thra ang dungzuiin i nun siem thrat i tum hlak am? Baibul chang ram tin thlang khawmin, Thuvar po po baihatin, ei nun khaltu dingin ei hmang thei. Judahaiin poimaw an sak tak le an hlut tak chu Mosie lekhabu panga, Torah, Grik tronga Pentateuch an ti chu a nih. Chuong lekhabuhaia chun Mosie hmanga Pathienin a pek danhai chu a chuong. Pathien hmaa mi fel ni ding chun chuong danhai chu a kip a kawia zawm vong a ngai. Dan thupek 613 (365 thaw lo ding & 248 thaw ding) an nei laia a ieng khom bawsiet chun a rênga bawsiet ang a ni leiin dan thupek zawm kim chu mihriem nina chun thil thei lo hulhuol tluk a nih. Chu taka inthoka sansuokna lampui chu Thuthlung Tharah a um a, chu chu Judahaiin an pom ve si nawh.

A dota Paula hril chu a thuphunga hril le a taka thaw indanglamna a nih. A thu chauha hril, a taka thaw si lo le ei hril letling char thawtu ei ni am? Inru lo dinga hriltu inru hrat si, uire lo dinga hriltu uire hmang si, milem theidaa inhril sia tempul rok hlak ei ni? Entirnaa chanchin an hril vet hlak hi mi tam lem chun ei hriet tah ka ringa chu hang hril non ei tih. Kohran upain Inrinni zan inkhawmah rukruk thrat nawzie a sermon rak a. Inkhawm an trin chun inrang takin a nuhmei chu inah a fe nal nal a, Pathienni tuka that dinga a pasalin ar a thlung chu a sût a, a'n suo a. A pasal a hung tlung chun, "Khawm, ka ar thlung kha teh?" a ta. A nuhmei chun, "Inru lo dingin mi i hril si a, ka lo insuo el a nih" a ta. A pasal chun, "Kha chu mi ta ding le zawm dinga ei hril a ni kha tie!" a ti sam et el a nih.

Lemchang le lemder ching mi chun thaw lo dinga mi a zirtir chie kha a thaw hlak. Judahai khomin Dan an uongpui a, an inchuktir a, a langa mawi le mi inpak hlawna dingin theitawpin a langah an zawm a, an sungrilah ruok chu suolnain hmun a khuor a, mi hmu loa chu thil tirdakum tinreng an thaw hlak. Eini khom rawl tawp insuoin sermon ropui le ngei tak tak ei kap suok uoi uoi a, sienkhom a taka zawm tieng ruok chu ei inthawt hle. Pulpitah vaninrum anga inringin inremna thu ei sermon a, ei hung trum a, ei mi theidahai ei theida dan a danglam chuong nawh. Sermon ei thlak lai tak hin ei sermon thlak le a taka ei nun ngeia ei khawsak dan enmil nachang hre inla chu, ei sermon thlak danhai khom hi a danglam daih ka ring tlat chu tie! Sienkhom, lemchang hi sinpui taka ei nei a ni ta bok si.

Ei hmelhmang
Kum za kristien ei tlingna kum chu ei hraw tung mek a. Hi lemchangna zawla ei ngirhmun hi Paula kam hawin hang hril ve inla, hieng ang deuh hi a ni ka ring:

"Nang chun Kristien i'n ti a, Chanchin Thra mansapui bangna i'n ti bok a, Baibul thu i ringsan a, i Pathien chu Pathien hring bikah i hril a, Baibula inthokin a ditzawng khom i hriet a; i kawl le kienga chêng hnam danghai elvartu, thima umhai thruoi suoktu, thu le hlaa chawmtu le zirtirtu tak niin i'n ngai a, Baibula chun hrietna le thutak a'n phum ti i hriet chieng leiin. Mi danghai zirtirtu inti siin ieng dinga nang le nang i'n chuktir naw am a na? Inru lo dinga mi hriltu, nangin inruin a hlepru hrat hratah i thrang an naw maw? Ieng leia beram inruktuo hi sinpui taka in nei am a na? Aw mihriem, uire lo dingin mi i hril a, nang chu uiretna tinrenga inhnelin, pawl pakhata inthokin pawl dangah pakaiin, sum nei neihai kuomah inzorin zawlpuon i zawnpui hlak si an naw? Milem theidatu ni siin milem betuhai leh inbekborin an sum i fakrukpek hlak si maw? Baibul uongpuoitu, nangin Baibul thu i bawsiet leiin Pathien i sukhmingsiet zing zing hlak an naw? Pathien kohran inti siin ringnawtuhai hmaah inhêkin, hnam danghai hmaah ieng leia Pathien hming i sukpawi am a na? I nungchangin ringnawtuhai hîp loin a hnot zam lem an naw maw?

"Aw nang mihriem, Chanchin Thra mansapui inbangna inti siin, mi a hmu taphot pangzatum khopin ieng leia Lalpa zong suok ram tia in hril vet si hi i sukchieurieu am a na? Phawa Pathien nei inti siin, thliin a hnatrawng a mut leng khom ral an hung sawna ieng leia baklenga i tlansie am a na? Kaina thilthaw theida vieua inhril siin ieng dinga a let tam i unauhai chungah thisen insuoin, Martyr Day dam i hmang ngam am a na? Pathien thu awi inti siin ieng leia hnam dang an insang tuol tuol a, nang i tlum tiel tiel? Ieng leia hnam danghai inpuktirtu ni loa kum tina tram zing le chawmhlawm ngaia i um? Ieng leia sin insang hmu thei ta loa thrung inhil che? Hnuoi le van po po siemtu le neitu nau inti sia ieng leia a hminga kut i daw hlak am? Hmeithaihai le miretheihai somdawltu inti sia ieng dinga Pathien hming sala a rok hrat taka thrang che?

"Aw nang mihriem, thima chenghai elvartu in ti siin ieng leia i zirbuk po po thimna inbawmtira siksikrieu an inhram am a na? Mi invethai thruoi vartu le naupanghai zirtirtu inti siin ieng leia taksa le thlarau tieng chawmlienna ding hrietna bel tlak le fak tlak i kol naw am a na? I puo tieng nâm puta inlang sia i sung tieng ieng leia a kawrong am a na? Ieng leia taksa le thlarau chawm thei thu le hla taktling i phu suok naw am a na? I bawkah dikri chi hrang hrang bel tlar thrut ve sia ieng dinga i sungah thiemna mal hlek khom khom hmu ding a um naw am a na? I kaipui ringnawtu vaihaiin thiemna sahrang lu an hung hawn a, ieng dinga nang, ringtu inti siin zawng lu kawrok i hung hawn bik?

"Chanchin Thra hung lutna champha voi zana ropui taka lawm dingin i'n singsa a, chu chu kha kha thaw tumin i'n buotsai lawk a. Kum za sunga i khawsak dan enin, a ieng tak hi'm a na lawm dinga i insingsat chu? Baibul darthlalangah inen la, i mita mit ek le phuhlip kai po po nuoi thla la, i hmai kawr le lemderna thuom i'n bel po po hlip thla vong bok la, i hmelhmang indik tak inen la, i pang inzain i mang a se hiel naw ding maw? I mit inkal dan khom hang inchieng rawh. Kalendara February 5, 1910 inziek kuou kha May 7, 1910-in i hmu tlat an naw? Miin i mit inkalzie an hril fie tum che khomin i na i hup tlat a ni naw am a ni? I lulul le lungril ngar leiin lungsenna ni le Pathien rorelna nia dingin i chungah hremna i khawl khawm chauh lem a nih ti ieng leia i hriet thei naw am a na? Pathien chun mi tin an thil thaw ang peiin an chungthu a relpek ding a nih. Lemchang banin, i lemderna thuom hak kha hlip thla la, Krista felna thuoma inthomin, i lungril ser tan rawh" tiin.

[*Editor's Note: INPUI-news&info columnist Pu Keivom is a retired Indian foreign diplomat and respected Hmar-Mizo litterateur. This article is dated May 24, 2009, New Delhi]