Hlahai hla, Maktak chuh!

::By LALMALSAWM SUNGTE, Journalist::

[Ei hla thlum takhai khom ei lungngaina thu mi hriltu an ni si a. - PB Shelly]

Rail inri bur bur chun khawsawt hla, Lalruotmawi in a sak ngei ka ngai nuomna chu a sukre zo si nawh. Mangalore a inthawka Tuithaphai chu nithum lam a la ni si leiin hringnun a harsatna tuok tah hai le tuok dinga inlang hai ka hang ngaituo chun inhme dingin Ni thla ngainaw Zion Khawpui, Ngaiin kan rum …ka hang inzawt ta chawt a. Mittui farkhat a suok tep laitak chun hla dang changnawn inlar takel, Aw min thuom la Immanuel, I thlarau in min thuom zing la, Hi khawvel suol thim kulpui hi I ta dingin do ka ti…, ti hla a hung inlang lem thlat chuh leh, kan phu zawka; Seola ka lo chawl hadam tumna lungril chu AK-47 a chipchier taka kap ang chun a kap dar ta lem thunga.

Hmarhai hi chanchintha khuongtevik a inthawk ta khan thu le hla tiengah mi hma ei khal a. Zaihla tam takhai chun ei lungngaina le hlimna hmunah a min awi a, lungrim mitthli le innuina thlarau a min changtir rawp hlak. Hnam dang hai le in el ding ni inla khom a pakhatna chuh Hmar hla phuoktu hai chan dinga ruot reng ning atih!

Saphai hla le Hmar gawspel hla in angnawna hang hril ding ni inla chu, a pakhatna chu Pathien Hmangaina ei dawng dan an ang naw zie ti hi hril hlaw tak a thling phak a tih. Entirnan, Saphai hlapui chu Ka Sandamtu Hmangaina ( KH No.50) le A mi thuoi pei (KH No.11) nisien la; Hmarhai hlapui chu, Ka tan ni leh thla ( a eng tawh lo!) le Pielral ram inhawi an ni ve thung.

Hla thluk mawi tak le thu tha ei ti tam lem hai hi ringtu indik takhai hlapui ding chun insit a um hle naw naw? Sap hla hai chu Pathien hmangaina-ah hin an lung a awi tawk a, Hmar hla hai ruok chu khawvel a cheng a rinumzie le a harsat lei a, lungawi lo, vanram ngaina a tam.

Hmarhai hih lungleng le khawsawt thei tak eini lei hin ei hla haiah chen mimal lungngaina le harsatna ei zepsa hlak. Khawthlang le Hla lenglawng ti dinga laklaw tawk chau in Pathien Hla ei phuok nuom vieu hlak. Chuleichun ei hla tamtak hai hi dilsut taka hang bi chieng chun thupui an fun rawn naw hle. Hla tam tak hai hi la ennawn thar thei nisien la, ei tangkai pui hle ring a um.

Tulaia hla inlar Thiemthu hril thei kan tah nawh ei hlasak thiem ha’n an hang sak lem hin chuh lungril a sukno a, mihriem nina a suktho a, mithli a far deu tuk hlak. 'Thiemthu hril thei kan tah nawh...' ei ti a ni chun a ruk te in 'Ka thiem lem a chu...' ti mipui hmaah ei ti zing a ni lem naw ding maw? Thiemthu hril ei thei tak tak ta si naw chun Pathien le mipui hmaah hi hla hih sak suok dal ei tiu. Thu le hla hmangin ei thiemthu inzawt hi bansan zai relin, khawvela hmangthlak le hringnathar mi pe theitu ding hla phuok ding ei la um am? Einia mihriem lungril ngawng kawp tang tang hih chuh vantirko lungril hmang khomin hneban a lo harsa chuh a nih hih!

[Editor's Note: This material was published under 'Nahai Column' in Sawrtui Monthly way back 2006]