Beiseina Arasi (Short Story)

[By OLIVER INTOATE, Inpui Exclusive]

...A nu le an hung intlawn lai kan intuok thut a, ka hamhai taluo hril ding hriet lovin a kut ka chel chawt a, “Kristaah chun unau vawng ei ni an nawm maw…Ma’am, Natalie” ka ti thei hram a... A hmel hang en ringawt khawmin, beidawngna la tuok ngai lo a ni zie chu hmu theiin a um.

Ngaituona pik tak kara, sungkuo thenkhat thina tuok leiin Tuithaphai (Churachandpur) tieng kan sungin suok dingin kan inthawk suok a. Car-a Churachanpur le Imphal inkar kan tlan lai chun, an khat tawk tawkin, khuohai chu ka thlir vel a. Tleirawlte hmeltha tak tak thenkhat tuichawi tuma hung suok hai dam ka thlir vel a, a then lo sinthawna hmangruo chawia, lova sinthaw tuma hung suok le mi dang dang thlasik nisa innemtak hnuoia an invak vel hai ka thlir chun ka lungril pik takel, kum thum lai hiel ka lo pai ta, chuleia nasataka dam nawna ka tuok pha, la dam tha naw zing nia inlang chun ngaituona thar tamtak a mi pek a. “A ni ngei, ka U, ka ruol nei sun chu mi kut chunga thina rapthlak tak lo tuokin mi lo thisan ta sienkhawm, kei hienga natna khuma khawsawta mitthli le inrum inrum nek chun, ruolthar hai dam siem tum lem lang ka ta ding hin a tha lem el naw ding maw!” ti damin kan ngaituo ta neu neu a.

April 18, 2006 zingkara ka U Aizawl-a kan project zusukfel zo cho, Imphal tienga a hung vuong ding zana min an thuoihmang thu ka hriet khan, ka hamhaiin ka suongtuonahai chu nasatakin an vak vel a. A thlaphang dan ding lai dam ka zuk ngaituo laia ka lungril teka deng ang tluka naa hamhai taka ka um lai, ka nu tap hla “Ka nau..ka kut luma beka hin thi la ka va nuom de…” ti ri hai dam chu ka lungrilah chun, zani laia thil tlung ang chaua fiein an la cham a. Kum thum lai hiel lo invawi ta sien khawm, ka ta ding chun an la thar zing a.

Chuong thilhai ngaituonaah a chamzing lei chun ka khawvel hmang khawm inhawi tina reng reng a min neitir thei naw a. Sienkhawm, ka pi thina lei chun, makmawa Tuithaphai Churachandpur) tieng fe kan ni hrim a. Chuonga thil liem tah hai ka ngaituo zing lai chun, kan fe tumna in chu kan lo tlung ta der el a. Ka pi ruong zan khat khuo varpuia kan vuiliem hnung chun, insukhar tum malamin ruol thenkhat hai leh chun bazar tieng panin kan leng vel a. Dawn ding le fak ding hai kan inchawk zo chun, hmun thawveng zawngin ruol dang hai chu fiel sa pei malamin kan tlan kuol vel a, sawtnawte hnung chun, hmun pakhat inhawi deu elah chun thung tlangin, kan hunhai chu inhawi taka hmangin kan sa bal bal a.

Ka ruolhai chu hriet chieng tuma pakhat khata chik taka ka zuk en tawl chun, tleirawl te la naupang hmel deu pakhat chun kum tamtak liem ta a, ka ruolnu Brenda, Delhi a lekha inchuka ka um laia mi nu chu, a min hrietsuoktir ta hlawl el a!

A ni ngei hunhai chu a lo liem hratin, mi tukhawm el hi a nghak bik naw tak zet zie chu a min hrietsuoktir ta pei a. Khang lai khan kei khawm tleirawl, beseina insang tak le ruol lo pawl ve hlak kha ka ni a. Conference dam kan nei ding changa drama kan inchuk lai thlir nghawk hmel put thak lova mi lo thlir hlaktu Brenda kha ka zuk hrietsuok ta vawng vawng a. Vawikhat a nu le an hung intlawn lai kan intuok thut a, ka hamhai taluo hril ding hriet lovin a kut ka chel chawt a, “Kristaah chun unau vawng ei ni an nawm maw…Ma’am, Natalie” ti a, a nu hamhai taka ka zuk biek lai, Brenda chu hung inrawl vatin, “Oliver, I violin inchuk ding in pei an ta? Hung ro, hi tieng hin, tan nghal el ei tiu,” ti a, a mi hung ko lai dam chu, ka lungril mitthlaah chun a hung inlang ta pei a.

Chuonga suongtuona khawela ka pil mek lai chun, ka ruolpa pakhat Imphal tieng a fe ding leh chun, bus station tieng inrang taka panin kan hang inthla liem ta a. Chun keini khawm chu kan inthe dar ta nghal a.

Ka pi sunna hunhai kan hmang zo vawng hnung chun, in tieng kirnawk dingin kan insiem a. In kan tlung hnung chen khawm chun, kha tleirawlte hmeltha deu nu kha ka lungrilah chun a la cham ta zing a. Ka ngaituonahai khawm chu nasataka thlakthlengin a um a. Ka hun hmang tum danhai dam chu ka zuk thlirkir chun thiltha ni theiin ka hriet ta naw a. Khang ang khan Brenda nu le pahaiin kan innei an phal naw leia, an naunu ram danga lekha inchuk zawm dinga an tir a, kum nga sung la nghak la tia mi hlem an tumna tuor zo lova ka sinthawna hai chen maksana Imphal tieng beidawng taka ka hung kir hnung, beiseina thar nei nawk inring naw laizinga project thaw theina ding lampui a hung in hawnga. Nasa taka kum thum lai project kan buoipui; tan thei el ani ding laiin, a neka nasa beidawngna ka hung tuok nawk a, hriselna chenin a thaw hla hnunga, kha tleirawlnu leia beseina thar ka zuk nei thei el hai khawm chu mak ka ti hiel.

Beseina thar le nunthar nei nuomna hiel min nei theitirtu, kha tleirawl hmeltha inno takel khan ka ngaituona a hluo sip chu a ni deu tak ta a. Hang en le hang biek khawma la naupang hmel hle sienkhawm, inza hi a phur ngawi ngawi a. A hmel hang en ringawt khawmin, beidawngna la tuok ngai lo a ni zie chu hmu theiin a um a. A hmeltha hle sienkhawm, amaah hin chapona hmel reng reng hi hmu ding a um nawh; chu nek hman chun ka hang biek chang khom hin a bau a zangin, thuawi takin ei ti naw chen chen thaw pal a ti ti inlau um rak khawpin a fel.

Khang ang lawma hmeltha, ngaituona la thienghlim em em nei ka hang inpawlpui tan khan, kei khawm chun ka ninahai chu ka lo theinghil ta vawng a. Ka thei ang anga thangpui tumin, a thil ditzawnghai dam chu kan dawna. Ama khawm chun ip nei lovin a mi hril pei a. A thil lawm zawng ni ngei a tih ti ringin Tuithaphai (Churachandpur) fe nawk phat le chawi ding tiin kan thlalakhai dam chu print dawkin, fakthei chi dang danghai inchawin ka hunhai chu phur takin ka hmang hlak a.

Tuithaphai kan fe nawk ding ni zingkar inhma takin ka thova, ka hmaihai phi faiin, kan
siem mawl mawl a. Sielmat a zingbu hang hnawt a suok kan nih. Ka ngaituonahai khawm chu a zangin, a thawveng em em a, ka hma tieng peia nun khal dan ding chen ka ngaituo ta neu neu a. Zingbu fa dinga in kan zuk lut lai chun, ka unaunu pakhat chun ka thil chawihai chu a en vela, thlalak pakhat a zuk lak dawk le inruol chun hieng hin a hung tawng suok ta a, “Eh! hi nu hi ka hriet hlak, mi pakhat leh tha taka ingaizawng an nih”a hung ti a. Mangang takin, ngaisak lo tehlem thawin ka thil chawihai chu ka bag-ah ka zuk sie lut nawk a.

Phur taka Tuithaphai kan suoksan laia ka thil ngaituo hai po po chu, chipchier taka ngaituo nawn zing pum chun, car-a darthlalanga ka hmel ka hei en chieng chun, ka hmel khawm chu zur deu kiengin ka hei hmu thei a. Kan hun hai hmang zova Imphal kan hung tlung nawk hnung chun, in chungah kaiin hmar tieng ka hang thlir ta vang vang a. Hmar Arasi kum sang khat dana khawm inchi khat khawm insawn ngai lova an hril chu de var varin ka hang hmu a. Tuifinriet chunga lawng mi thlavaihai le nga mantuhai lampui kawk hmutu le thuoitua an hmang hlak angin, kei khawm 'beiseina arasi' chu en zinga damlai hringnun tawite hi khal pei dingin lungril ka siem lem ta lem a.

[Editor's Note: Ngaituo din takel, tangkaipui thei ding 'Short Story' mi hung ziekpektu Tv Oliver Intoate chungah lawmthu ei hril. Chanchin tawi zieksa le ziekmek nei hai chun nahai@aol.in ah thon thei zing anih]