Zalenna Hla (Redemption Song)

Ziektu: Pu L. Keivom, Inpui.com Columnist

Emancipate yourself from mental slavery. None but our self can free our minds. -Bob Marley (1945-1981)

July 16-September 12, 2014 sung khan Delhi lum tlansanin, khuonuin a dit dan ang taka ram inhoi le boruok innĕma a duong Tuithraphaiah sung le kuo le ruol le paihai kan malam le Tuibuonga kan dawr hmun bawl sap enpui dingin kan nupa-in kan hang chawl hadam a. Dr. Rochunga Pudaite hai nupa khom chawl hmangin an lo um bok a, kan remchang tlang hun hunah inhmuin, khaw thlir malama car-in Hriengkot tlang le Old Churachandpur Mission Compound dam chuonin, titi mel mel pumin sulhnung kan sui a. Hmar Inpui le HSA Platinum Jubilee huoihottuhaiin July 19, 2014-a Sielmat Trinity Bible College-a thu le hlaa fienrielna an buotsaia dam hlawk takin kan thrang ve a. Mauruo anga intuoi thar nawk thei ni sien, thaw ding le thaw nuom kan va hang hauh de aw!

Thlâkhla tak le dit khop lo takin September 12 tukin Tuithraphai kan suoksan a, chawhnung dar 4-ah Delhi kan tlung nawk a. Ka piengcham kan lawm zan, choka inthiel fai hman loa zîng hmânga kan suoksan kha a na, thla hni hnunga hang hmu nawk chu rabok rausan hnung, thla tam tak hnunga sir nawk ang el a nih. Kan inzin changin kan fridge hi that ngai lo kan ni leiin hmeruo le bu le hme hmon el thei lo chu la suok loin kan maksan hlak a. Ka hang hong a, David Buhril aieng hmedeng, a rong pangngai char la put chu a thurna haihawte leh a lo la um zing a. Kan dawn mahla beer bur iemani zat a lo la um bok a. Tlung sawla chilled beer le David hmedeng hang liek hme chu ei har song song el a nih. In inthiel fai chu kan siehlaw sor vainuin a zinga a thaw dingah siein, kan hmeraw phur laia ka du bikhai la suokin thlai ka suong sok sok a, zanbu inhma takin kan fak a, thingtum angin inhma takin khumah kan inlet thlu top a. Mani khum laizawl ngeia hang zăl nawk chu ngai a lo ngam khop el. Ka ruolnun Tuithraphai boruok inhoi thlakhla lo ang ela Delhi tieng kir nawk a rot vet kha a umzie ka man chauh a nih.

Inrinni kan chawl hadam hnungin mi thil thon kan sem dinghai chawiin Pathienni September 14 chawhnung dar 3:30-a Hmar Christian Fellowship chawibiek inkhawma thrang dingin kan nupain kan suok a. Inkhawm trinah Baibul sut ding kan buoipui lai hril tlang dingin ka sangawi zawnpui H.K.Kawllienthang inah kan lĕng a, kan thaw dan pangngaiin bu kan fak nghal bok a. Zan dar 10:30-a kan trin chun, 60-70 km per hour-a hrata car khalin, Delhi FM Radio Channel 4 ka ngaithlak a. In kan tlung tawm hnai chun Churachandpur-a ka chăm sunga kan hla sak rawn pawl, Bob Marley hlahai laia ka dit tak le ropui ka ti tak ‘Redemption Song’ hi an hung sut a. Chu hla chun khawvel dangah a mi fen hmang a, ka motor khal khom ngaituo lêk loin ka ngaithlak a. Ka bula inthrung, sakei se thieng lo, ka Darngawnnu hlak chu naute angin, a’n hnăr bur bur bok si. Taksaa chêng hmunkhat, khawvel dang daiha khawsa ve ve si mihriem ei va hang tam awm de aw!

Redemption song

Tuithraphaia kan chăm sunga kan innghatna tak chu Bethel-a David Buhril hai in a nih. Khum pindan tinah inthrung khawmna ding bathlar inhoi a um vong a. Kan riekna pindan puoa chun bathlar inhoi tak, inleng hrang hrang an hung changa zalen taka arasi de chuoi thlir zing puma inpawl le fienriel theina a um a. Thu tin thu tang hrila inlenghai leh kan inpawl khawm bakah an Yamaha Guitar perin, tu-kha ngaidan le mitmei vêng loin, kĕl rawl suok rak khopin, hla tin hla tang sakin kan inbŭkpui a. Inlĕng an um naw chang leh thupui hlapui saiin David leh zing dar khat chen chen kan titi a. Kan thupui tak, kan thu zai po po zemtu chu ram le hnam damna ding dap le ei mipuihai lungril le ngaituona mit sukdeltu phuhlip thuo tam hi iengtin am phi thla thei ei ta? ti hih a nih. Chu chu a nih Bob Marley hla a,

Emancipate yourself from mental slavery,
None but our self can free our minds

Lungril saltangna a’nthok intâl suok ro,
Mani thu chauhin ei suok thei

tia a lo hril hi.

Intâl suok dinga thrang la lo a, chĕpa anga ‘awk ta laileng” titu ta ding chun hi hnuoi ram hi châng trium-a sip a ni leiin sîr tinah inâwk theina vong a nih. Ei intang a nih ti hre lo khopa ei lungril le ngaituona an mi’n hmin tah lem chun that dinga arbawma ar ruol khum khawm ang chauh ei ni tah. Mingohaiin sala sumdawng an thaw nasat lai khan Africa khawmuolpuiah ran ruol angin mi an man khawm a, America tieng sin inhram le nawkor sin thaw dingin longin an tol thlak a, an taksa chauh salah siem loin, an lungril khom bawiah an siem a. UK chun 1833 khan British lalram le a ramper po po huopin sal suokna thu a puong a; USA President Abraham Lincoln-in January 1, 1863 khan a puong bok a. Sienkhom, an taksa zalenna thu puong sien khom sal, bawi le suoka an lungril le ngaituona an lo intangtir chu dan siema insuo zalen el thei a ni nawh.

Lungril saltangna tluka inbawina trium lem a um nawh. Bob Marley pieng le murna ram Jamaica chu British ramper laia pakhat a ni ve leiin sal suokna dan Kumpinu-in kum 1833-a a puong khan midum tu khom a huop vong a nih. Kum 1979/80 laia Redemption Song a phuok le sal suokna dan an puong inkara hin kum 146 a tla dêr tah. Sienkhom an lungril saltangnaa inthokin an la suok zalen naw leiin, “None but our self can free our minds” (Ei lungril insuo zalen theitu chu eini chauh ei nih) tiin a khêk suok a nih.

Zalenna Ni
Lalhmingthang hla phuok, ka sak changa ka hnuk sukulhtu le ka mitthli suktla vettu chu ‘Zalenna Ni’ ti hi a nih. “Inthuruolna nei si loin, hnam zalenna hmu thei ei ti’m?” ti zawna hi zawna mawl le fie tak, a donna khom ei hriet seng, sienkhom tak rama ei hoiher enin, a letlinga sukdik tuma theipatawpa thrang la ngat ngat ei hoi khop el. Chuong laia hmalatu tak chu kohran pawl ei niin a’n lang bok. Pathien thu thrangsana hmang a, mani agenda tŭ tuma Baibul chang nuomna lai lai fom khawm a, thu riengvai tak tak sŭrpui a, mani beramhai seng lungril le ngaituona inhmin a, salah intăngtir a, ei beramhai chawm loa ei beramhaiin mi chawm lem dinga inngai tlat a, Paula nun letling hraw a, thawlawm a tla thra naw leh mei le kâta hrem tuor dinga ei beramhai inthrì chîng, ei pi le puhaiin âr lungmawl le nu lungmawl an ti hlak hai suklungmawl zuol a, insung khawsak khom ngaisak hman lo hiela thawlawm ding zonga inphêttirtu chu kohran pawla thruoitu intihai niin a’n lang bok. Pawl khatin biek in an bawl leh an beramhai an inlawipek inlauin pawl dang khomin a hnaiah bawl ve an tum pei a, tawpintai a um nawh. Ei thaw char chu ram le hnam hmingin silai chawi pawlin an hung thaw ve a, ei khawvel hi demand area-ah ei inchangtir vong tah a nih. Pakhatin Pathien hmingin, a dangin ram le hnam hmingin. Pathien bân sei thu ngot ei hril hlak a, Setan băn hang seizie khom hi ngaituo rop hlak ding a nih. Pawl inernaa thangtlawmna thra lo mi’n neitir dinga nâka mi khik zok hlaktu hi Pathien kut a ni ngai nawh. Chu ngirhmuna intâlhai ta dingin ieng leiin am Zalenna Ni chu a hung suok ta ding?

Nang le keia innghat

Ei ram ei hnam zalenna chu,
Nang le keia innghat a nih;
Inthuruolin kal chawi ei ta,
Zalenna ram panin;
Malsawmtu Chung Pathienin zarin,
Par ang la vul ve ngei ei tih

tia Lalhmingthang a khek suok lai khan pastor a la ni nawa chu ram le hnam zalenna dinga a thlarau tarmit bun hi a fie kel kol khop el. Threnkhat chu kohran pawl pakhat hnuoia rongbawlna sin a chel pha, pawl tarmit chauh an bun a, chu chun an sungril mit a hlie leiin thil pangngai tak khom hi phe ruoiin an hmu hlak. ‘Lu chunga dere dere’ an hmu pha lem chu bawngchal hur chu nêpte! Ama ruok chu kohrana rongbawlna sin a chel hnung khomin pawl tarmit bun loa a thlarau mita fie zuola a la hmu zing ka ring.

A ieng khom chu ni sien, hi hla hi eini ta dingin ‘Zalenna Hla’ (Redemption Song) ei ti ve thei ding? Lo ti ding ni inla, inthuruolna bawse zawnga mei kawa thrang latuhai hlapui ding chu ‘Unredeemed Souls’ ei ti thei ding? Tuin am intlan suok tawl ta’ng a ta? Thil thra thawa inngaina lungril an put tlat sung chun chihraka inbuol ta lo dinga vokpui hril ang chauh a nih. Lungrila lo intu nghet tah chu chawlolna khârin inraw buma a tuom khum tlat leiin an intangna ripa inthokin insuo la khom suok nachang an hriet ta nawh. Chu chu a nih lungril saltang tri a umna chuh. Zoram Tan (1969) ziektu Vomphungin, “Suok nuom ningintel bawngpui a’n tăl khut khut a, a thlungna hruol hang sûtpek inla, a bûka inthoka suok nuom si lo ei ang” tia a lo hril ngirhmun kha a nih.

Bob Marley hla ei hung thur suok taa, “Emancipate yourself from mental slavery, None but our self can free our minds” ti le “Ei ram ei hnam zalenna chu, Nang le keia innghat a nih” ti hi thu zai khat, trongkam hranga hrilna a nih. Taksa zalen sien khom lungril insuo zalen a ni naw chun mi a zalen thei nawh. Hieng lai thu hi October 1937-a Canada rama thlierkar pakhat Nova Scotia-a Marcus Garvey thu hril, Bob Marley-in Redemption Song-a a mei zăng hlaptu dinga a hmang sawng a nih:
“Lungril saltangnaa inthokin ei intal suok ding a nih. Mi dangin ei taksa an mi’n suo zalen thei a, ei lungril ruok chu eini chauh naw chun insuo zalen thei a ni nawh. Lungril hi nangmaa inlal tak, i chunga roreltu um sun a nih. Tu khom lungril sukhmasawn lo le hmang nachang hre lo chu lungril hmang nachang hrehai salah an intang ngei ngei hlak” (We are going to emancipate ourselves from mental slavery because whilst others might free the body, none but ourselves can free the mind. Mind is your only ruler, sovereign. The man who is not able to develop and use his mind is bound to be the slave of the other man who uses his mind).

Ei saltăngna

Political philosopher hmingthang Jean-Jacques Rousseau (1712-1778) chun a lekhabu Social Contract-ah, “Mihriem hi zalena pieng ni si, hmun tinah hrengthira thlung a nih” (Man is born free, and everywhere is in chains” tiin 1762 khan a lo hril a, thu ziek laia hril sawng hlaw pawl tak a nih. Ieng leiin am? Thu indik, nun rama thil tlung zing a ni lei a nih.

Tuithraphaia ei khawzawl hmun hrang hrang fang a, ei ngirhmun ei bi chieng chun, indaidanna bangin a sip a, ei kut le ke le rîngah thir khaidiet a thlungin ei um furh a, mi zalen hmu ding ei vang em em. Mawlna khaidiet, pasietna le tlaksamna khaidiet, thabona khaidiet, depdena khaidiet, inhlemna le khel hrilna khaidiet, ruihlo chi tin châkna khaidiet, lemderna le lemchangna khaidiet, nuhmei-pasal tienga nun zalna khaidiet, inngaihlutna khaidiet, mi dang neka thra lema inngaina khaidiet, piengtharna lem/der khaidiet, a taka thaw neka a hrila tlak tumna khaidiet le khaidiet hrang hrang hrêngah ei intang a nih. Ei hnufuolna hrila mani le mani indiriem hi inhoi ei ti bek bek bok niin a’n lang. Sorkarin a mi ngaisak nawh, chu e kha e ei ti a, einin sorkar ei ngaisak naw a, sorkar ngaisak tlakah ei insiem bok nawh. Ei kohran pawl hrang hrang hmunpuia bilding changkang ei hmuhai chu ei kutdaw ra suok a ni deuh tei! Hnam danghai lai chuong ang chu hmu ding a tam nawh. Ei sawisaiti le hnamin a thawhlâ tak le ei thrangmawbawk chu Pathien hming sâla ei kohran pawl seng ei biek hi a ni ta naw maw? Hi ngirhmuna inthok hin tuin am mi sansuok tang a ta? ‘Sappui nun ka ngaisang nawh’ ti hla dam ei inbukpui hin Esop tienamia sihal thukhawchang, “Grêp chu a thûr ĕm el!” ti le Sura pelte lo tum an hril hlak chu ei insìr an naw maw? Ei ngaisang nalawm ie! Chu nun chu tlung ve phak tumin, nei le nei loin, in tinin sikulah ei nauhai ei inkaitir mur mur a ni hih. Sienkhom, mi thaw thei, thaw ve thei lo anga inngaina lungril, mental slavery-a inthoka ei intal suok si naw chun zalenna ram tlung ngai nawng ei ta, ei ta dingin zalenna ni suok ngai bok naw nih.

Indona trium

Churachandpur le a sè velah sum le pai hmanga indona, economic war a nasa tran hle a, a thren an lien duok duok a, a thren an tlum tiel tiel bok. Hi hi khaw lai khom economic war-a thil tlung hlak a nih: a ru no no suok. India laipui pawlisi, sak tieng nor, Look East Policy hi a hung sukpuitling pei ruolin, tlangmihai hi inthuruola ei inhumhimna ding lampui ei suol suok vat naw chun sakeibaknei baua mazu intel ang chauh ning ei tih. Tu khom hin Churachandpur khawpui sunga dawr thra le burip deu chu Vai dawr a ni deuh vong. Chu taka inthoka banga kut ziek ei tiem thei naw chun Rengreng vadunga pil hmang chu ei chantawk ni hrim a ta, ei suong em em ei kohran pawlhai hin mi san naw nih. Ei ngai thupui, ei September Beiruola ei thu chaihai hin mi san bok naw nih. A thren lem chun kum za kristien ei ni hnungin ‘kohran’ umzie inhrilfie ei la tum trĕk trêk chauh a na, ei hma tawn ding hi a pik a nih. Hausak thut nuoma ganja le kani ching pawl hlak bo lo! Setan băn hi sei tak a nih. Lemchangna hmangruoa Pathien thu ei hmang nasatzie dam hi a hriet naw ei ring a ni? Lemchang nun mi’n chuktirtu le thutak hmu fie thei lo dinga ei sungril mit sukdeltu chu ama tho a nih. Kohran pawl hrang hranga mi thai darhtu khom ama bok.

An leh, ieng Redemption Song am khekpui ve tang ei ta? Nang le keiin ei lungril saltangnaa inthoka suok nachang hre a, mani lungril seng ei insuo zalen hmasak phot a ngai. Chutaka inthoka thutak hrietna rama luthai chauh chu thutakin inzalentir a tih. Inthuruolin kal chawi ei tiu, zalenna ram panin. Hringnun Tuipui Sen hraw thleng a, varal ei kai ve pha leh, Israelhai angin hlimna hlado ei la’n sam ve thei chauh ding a nih. (Delhi, September 17, 2014 Wednesday)