Huonah

By L.Keivom, Inpui.com Columnist

To see a world in a grain of sand

and heaven in a wild flower

 Hold infinity in the palms of your hand

 and eternity in an hour.

-William Blake

                

Huon po po laia huon hmingthang tak chu Eden Huon ni mei a tih. Chu huona chun Pathienin mihriem hmasa tak pahni a siemhai chu a sie a. A hun taka par le ra hlak thei chi tinreng chun chawmin, tlaksam hrim an hriet nawh. Chu huona chun hri le natna hrim hrim a um nawh. Nautesen lai ang elin chutaka chenghai chun zakuo an hak naw a, saruok an ni ti khom an hriet bok nawh. Mawl engthawlna, tlaksam um nawna le duthusam kimna huon a nih.

            

Huon

Amiruokchu, duthusam a kimna tak chu duthu a sam kim nawna pakhat a nih. Chu huon lailung taka chun hringna thing le sie le thra hrietna thing a um a. A hmasa chu damna thing a ni a, pakhat chu thina thng a nih. Chu mihriem pahnihai chu chanvo po po laia insang tak ditthlangna, zalenna tawpkhawk chu a pek bok a. Chu ditthlangna chu an hmang indik le indik lo maw chu an tuor ding a nih. Mihriem hmasa takhai chun an ditthlangna chu hmang suolin Pathien thupek an bawsiet a, an paradis chu an chăn tah a nih. Hi huona thil tlungin a nghong ei buoipui ang tluka mihriemin thil dang ei buoipui a um nawh.

Huon hmingthang pahnina

            

Huon hmingthang pahnina chu Eden huon ang boka Irak rama um, Isu pieng hma BC 600 bawr vela Babulon lal Nebukadnezzar huon siem, Huon Inkhâi (Hanging Garden) a ni el thei. Hi huon hi tienatlanga khawvela mihriem kuta bawl thil ropui tak pasari (Seven Wonders of the Ancient World) an thlang suok laia thrang ve phâk hiel a nih. A bawltu tak ni dinga ring dan inang naw sien khom kum 605-562 inkara lal Nebukadnezzar Pahninain a nuhmei, Median mi Queen Amytis chengna dinga a bawl ni dinga ring an tam. Phaizawlah mel 56 (90 km) laia sei pil deng pawnga muol an siem, an huonna bang ft 320-a insang le ft 80-a sa, a chunga lal in ropui tak an bawl, Manipur phairuom po po tiet vela lien a nih. German archealogist Robert Koldewey rawia kum 1897-1917 laia Babulon khaw hlui zong suok tuma beipui an thlak trum khan an hmu châk tak laia pakhat chu Huon Inkhai hi a nih. Sienkhom lirnghingin a sawi siet vong hnunga hmu thei um suna an hril chu a bul thrut lung rem chauh a nih. Threnkhat nawk chun Huon Inkhai hi Nebukadnezzar bawl ni loin Assurian lal Sennacherib-in a khawpui Ninevi-a a bawl ni dingin an ring thung. Hi khuo hi Pathienin tlang insam dinga pa lulul le phuba la chaka helhol invoi Jona a tir lui truma tlanbahrika hlawk taka sermon tawi a hrilna kha a nih.

            

Hi Huon Inkhaia hin chanchin poimaw le ngainuomum tak tak tlung ngei a tih ti ring a um. Sienkhom zieka maksan a um naw ni ngei a ta, a chanchin ei hriet tlawm hle. Hi huon bawltu Nebukadnezzar chanchin takngiel khom hi tu chena mihriemin histawri an sui le ziek ve phak chin, secular history-a chun hmu ding a vang khop el. A chanchin inlang rawnna tak chu Baibul a ni a, a chuong rawnna tak chu Daniel lekhabu a nih. Chu taka khom chun a ziektuin Daniel chanchin a thlŭrnaah a zakkep sa mei mei a nih. Chuleiin, mi threnkhat chun Huon Inkhai khom hi tienami thusim ni dingin an ngai.

Huon hmingthang pathumna

            

Huon hmingthang pathumna chu Getsemani Huon, Jerusalem suo tieng Jehosafat kawn khela um Oliv thruta huon pakhat, Isu le a zirtirhai an fienrielna rop hlak a nih.

            

Eden huona mihriem tlûkna tungding nawk dinga hung a nina chu Isu’n a tak ngeia a hlen hun chu a hung tlung a, a lungril a’n suol buoi nasa hle a. A zirtirhai chu thruoiin trongtrai dingin Getsemani huona hin a fe a. Chu zâna thil tlung lei chun Getsemani Huon hin khawvel literechar zawlah hmun hlun a hluo tah a nih. Eden Huon fienriela thlemna châng a kam truma a tokdarh hŭm buk, Evi le Adamin an fak miel miel kha hre zingin, Thlemtu chun chu tektik bok chu hmangin Getsemani huon fienriela hin Isu khom buon thluk a tum a. Hi truma Thlemtu le Isu inbuon tluka inbeina râpthlak hi a la um ngai nawh. Zaper thapui intan throt khopa thrang la Isu bienga chun a thlan, thisen angin a far thluk thluk a; a thrangpuitu dingin vantirko a hung inthok hiel a nih. Ama nuom thu ringota inher tum chu ni sien, Evi angin thlemtu chun a buon thluk ding a hoi khop el. “Pa, rem i ti chun hi no hi ka kuoma inthokin la son rawh” (Luka 22:39-45) a ti hman dĕr tah a nih. Huon fienriela thlemna hi do zo a harsa a nih.

            

Sienkhom, Isu pawlisi le a nun thruoitu chu “keima thu ni loin nangma thu ni lem raw se” ti a ni a; a Pa thu thi chena zawm a tum tlat leiin thlemtu chun a buon hne ta naw a nih. Hi taka hin thil inchik tlak poimaw tak ei hmuh: Eden huona tlûkna chu Pa thu awi naw leia um a nizie le Pa thu zawm tlat chu thlemna ieng ang khom ngamna a nizie Isu’n ama nun ngeiin Getsemani huona hin a mi’n entir a nih. Ama thu chu ni sien, a no dawn ding chu pumpelh a nuom thu ei hmuh. Sienkhom, ama nuom thu ni loa a Pa thu chauha nung ding a nina chu a sie chunghnung tak a nih. Evi le Adam ruok chun Pa thupek le dit dan nêkin an ditthlangna an zui lem a, fak thieng lo an fak a, chu bawsietna lei chun an chungah thina an intlungtir a, thina chu an thlahai po po chungah an intlungtir sa bok a nih (Rom 5:12). Eden huon chu muonglei ram, tlaksam um ta nawna, Pathien le ni tina inpawlna hmun a ni ang bokin, thlemna leia mihriem a tlŭkna, mihriemin a Siemtu thupek a hnawlna ra suok chu thina a nizie inentirtu a nih. Getsemani huon khom Isu le zirtirhain Pathien pawla an fienrielna hmun a ni hlak ang bokin thlemna le thisen ang thlan far khopa inpom chilna hmun le Pathien thu awina ra suok chu hnĕna a nizie tarlangtu a nih.

Huona thil tlung threnkhat

            

Huona hin thil inchk tlak a tlung rop hlak. Huon hi lungril mit sunvarna hmun pakhat a nih. Gautama Buddha khom hmawng chi khat Bodhi tree sirsan meua huona an ngaituo lai chun a lungril sunvarin a um a, Buddhism sakhuo hi a hung pieng pha tah hiel a nih.

            

Scientist hmingthang Isaac Newton chu kum 1666 AD khan huonah chawl hadamin a thalin a zal a. Epul hmin hung trilh a hmu a, chu chun a thluok hnawng thra tak el chu a sukche a. Ieng leia epul chu a tung zawnga fe loa a suk zawnga a hung trilh? ti chu a ngaituo ta rak el a. Chu chu thil ho tak anga inlang, sienkhom inril le poimaw tak a nih. Chîk taka a sui pei chun ei umna hnuoi le vanvela arasi po po hin hǐpna an nei seng leia thil tlung a nih ti a hung hriet suok a, hrietna thrut poimaw em em el Law of Gravitation (Gravitational Theory) chu a hung hai suok ta nol el a nih. Hi hrietna thar fe peiin a hung hring suok chu Scientist hmingthang dang Albert Einstein hmu suok Theory of Relativity a nih. Anni pieng hma daih, kum 1500 neka tam liem taa Athen mihai kuoma Paulan, “Ama leiin ei hring a, ei chăng a, ei um a ni si a” (Tt. 17:28) tia a lo hril kha Pathienin gravitational force hmanga ei khawvel le vanvela thil umhai hi a kontrawl vong a ni thu thlaraua hrietna a nei leia a lo hril a nih.         

   

Thei trilh hril taka chun eini rawi tienami pakhat a mi zuk inhriet suoktir chu tie. Thei trilh le inzoma eini chanchin ve chu thabo tienga Sientist hmingthang tak Samdal ni mei a tih. A ramvâkin theichang hmin tuor el a hmu a, fak châkin a chil a pût a, sienkhom a lo pei hlol si nawh. Theichang hmin zŭm a hung trilh beiseiin a buk hnuoia chun a bau ka kungin a thalin a zâl a. Vangneia siemin pum khat chu a bauah a hung tla nol el a. Chu chun thil thar hmu suok dinga a ngaituona inchêttir chu hril lo, theichang hmin chu hang soi dingin a bau a chăng pei nawh. Tienami el khom lo ni sien, Samdal hin India hmar saka hin thla a hau hle awm. Khaw laia inthoka hung tla dinga ei beisei thil inchănin, bau ka kangin ei tang farh hi! NGO ei hauh em em khom hi chu thil le inzom chu a nih. Sienkhom, chu chu tuta truma ka sabzek a ni nawh.

Tolle lege! Tolle lege!

      

      Kristien sakhuo thuring tieng ngha lekhabu 70 neka tam ziektu, Apostol Paula dottu nia an hril hiel, St. Augustine of Hippo (354-430 AD) chanchin hi i hriet ta hlak am? Hi thusep hi ka ziek laia ka umna Italy hmar tienga an khawpui Milan-a an Bishop hmingthang tak St. Ambrose-in kum 387 AD –a Isu tho nawk ni champhaa a baptis pa kha a nih. England ram baw êng dinga Pope Gregory The Great-in misawnari a tirh, St. Augustine of Canterbury, kum 604 AD a thi leh khan ngai pol ding a ni nawh. Sakhaw hrang hrang zirtirna bi a, lungrila thlamuongna lampui a dap lai chun, ni khat chu huonah beidong takin, “Lalpa, ka khawlona hi mi la hmangpek rawh” tiin a trap suok ta phong el a. Chuong lai chun naupang rawl ni awm tak hin, “Tolle lege! Tolle lege! (La la, tiem rawh, la la tiem rawh) hung ti ni âwm takin a hriet a. A ngha vel a, tu khom a hmu bok si nawh.  A ngaina hre loin huona thrungphaa a maksan, Rom mihai kuoma lekhathon bu ziel chu a pan a. A phet hmasa taka a chang tiem chun a lungril mit sukvarin, Pathien thlamuongna eng chu a nunah a’n zăm lut a. A lekhabu ziekhai laia inlâr tak pahnih- CITY OF GOD (PATHIEN KHAWPUI) le CONFESSION (INPUONGNA) lem chu khawvel literechara lekhabu ropui le hlua an ngaihai laia tiem sa a la ni zing. Huona mit varna changtuhai nun hin a nghong sei hle hlak a nih.

Wellington-a ka huon

          

  New Zealand khawpui Wellington-a ka um laiin huon thurûk threnkhat dong ve-in ka’n hriet a, chu lei chun hi thusep hi ka ziek a nih. Kan chengna India House, 128 Knights Road, Lower Hutt-a um chun kompaun lien ve tak a nei a. A kot tieng, in le lampui inkar, pên sawmli nêka sei chu hlobet inhoi tak, carpet sa tak pha ang el a nih. Hung lutna lampui sir tuoka chun rose kung 28, khing tieng khing tieng 14 ve ve, zikhlum lien chi tiet deuthawa rong chi hrang hranga par hlak chu ft li danah an intlar a. Dai bul sir tuok po po chu par chi hrang hrang chingna vong a nih. Huon dai anga kan hmang thing buk inbêm lii liei hai khom chu a hun taka par chi vong an nih. Chuonghai laia ka dit bik le duot bik chu rong chi hrang hranga par hlak sokhlei kung sari chu a nih.

          

Kan chawr tieng chun infiemna in inhnuoi te hi a um a. Chu in chu Saptronga ‘ivy’ an ti hrui inzam chi hin panruongin thing a zem ang hin a’n zam khum vong a. In chunga inthoka a kau zîk hung kai hla dinghai chu dithlafarfem le inruolin mawi takin kan tan a. A mawi em leiin a tak nekin lemziek a ang lem hman a nih. Hi in bul suo tieng hin thlai huon siem theina hmun lien tham tak a um a, chu chu thlai huona siem tumin, bawngtuthlaw hmangin, kut inthi phung khopin, ka cho dŭr a, thlai tum tum chingna dingin thlur hrang hrangin ka pawn a. Hnuoi thratna chi hrang hrang ka’n chawk a. Zikhlum, parbawr, antram, hmarcha le be chi hrang hrang chi ka’n chawk a, ka’n so a.

Chuong ang chun Zopa-in New Zealand khawpuiah huon ka siem ve a nih. Bachikhawm mu, Khawmawia inthoka ka hawn chu tuolah kan so kak thei naw leiin in sung lum, in suklumna khawl bulah par khawina belah ka’n so a, thla thum hnungah pakhat char a hung tro a, a thra nuom khop el a, sawtnawte sungin tong khat deuthawa insangin a hung inthrang a, bachikhawm ka hmu china chu a la lien tak. Kan duot leiin hme tina khom kan ruot nawh.

India House-a huon enkoltu (gardener) chu police officer, kum sawt tak lo thok tah, ka hlaw nek daiha hlaw rawn a nih. Huon enkol hi a’n hnikna zawng a ni bâkah a thiem em em a; a huon enkol khom a nau ang chiea ngaiin a duot liem liem a; sum a hnot leia hung inhlaw khom a ni nawh. Kar tin voi khat, darkar hni sung a hung hlak a. A hung naw sung po chu keinin kan lo enkol a. Par chi hrang hrang, abikin naute ang ela enkol ngai rose kung enkol dan, bu pek hun le pek tawk ding hai; an damnaw ti hriet dan le damdawi tui kap ding le a kap dan hai; a kau tan hun le a tan dan hai; a zungin a mamaw boruok a hip theina dinga a bula pil kar let dan hai; par chi hrang hrang inso hring dan hai; purun bul anga inbâl par chi sie thrat dan le a hun a hung tlung nawk phaa inso dan hai le huon enkol dan kalhmang hrim hrim hai chu a mi’n chuktir hlak a. Chu chun a nih ram hmasawn ei tihaiin thil an lo chǐkzie le thil an thaw hrim hrim chu eini rawi anga an ar khaw thim dai el nawzie le mumal tak le titakzeta an thawzie ka hmu suok zuol chuh.

Inrinni le chawl a um chang, ka’n hman hun taphotah sunnithlakin huona hin ka thok hlak a. Insuk chĕrna dingin a thrat bakah huon sin thaw hun hi Siemtu le a thil siemhai le inpawlna remchang le hlu niin ka hriet a; thlarau tieng bu ka lamna tak laia pakhat a nih. Ofis-a sinthaw chu thluok hmang zing a trul leiin lungril le ngaituona invâk suokin a lêng hman naw a. Huon sin thaw ruok chu a thaw dan kalhmang hriet tah chun taksa hratna thahrui hmanga thaw mop mop a ni el a. Chuleiin, kil le kap tlokin ngaituona zalen takin a leng suok hman a, thil thar a va tong a, chu chun trek anga inrangin a mi hung deng kir a. Epul trilin Newton ngaituona deng hara a sukchet ang khan, zing thla neka hrata vuong thei ka ngaituona invâk vĕl chun mi vuongpuiin, Siemtu ropuizie a mi thlirpui hlak a; chu chun ka phak tawk ang peiin ka thlarau mit a sukvar ve hlak niin ka hriet. Chuong huna ei thil invoi le inzoma ngaituonaa thil hung de zok dam hi ngaisaka ei inchik chun a hmaa ei lo hriet chieng nawhai le ei la ngaituo phak ngai lohai khom hriet fiena a mi pek a; ei ngaisak naw ruok chun a bo nawk daih a, ieng anga nasain bei inla khom ei hriet suok thei ta mei mei naw a, ei hriet suok a um khomin a tira angin a fie thei tah ngai nawh. Chuleiin, notebook pai zing a, ei thu donghai ziek thlak nghal hi chǐng ding a nih.

Chu mita inthoka bi chun huona hin ei nghatna tieng taphotah Pathien ropuina hmu hmaih ruol a ni nawh. Chuong tieng nghaa lungril hongin hang ngha vel hrim ta. Par chi tum tum insi riela tro hmunkhat hmung i tih. Rong hrang hrang put le rim hrang hrang paiin an hung par suok a. Khaw laia inthokin am chuong ang rong mawi le rimtui hai chu an lak am a na ti en fie tumin an hung tro suokna pil kha zuk phir suok la, pil hâk el naw chu thil dang hmu naw ti nih. Thei kung hrang hrang hmu bok i tih. Chuonghai chu an hun tiem sengah rong chi hrang hrang putin an hung păr a, chu pâra inthok chun a ra a hung insiem a, damten an hung inthranglien a, chu ruol chun an hmelhmang a hung inthlak a. Thei a dawng laia phak le kha em em kha a hung hmin huna chun thûrin amanih a thlum em em thei a. Chu phakna, khăkna, thŭrna le thlumna ringot hai khom chu khaw laia inthoka hung insiem am an nih ti i dap chun, Siemtu ropuizie sui suok ruol lo chu inngaituotir a ti che. Huon thuruk hre chiengtu Isu chun, “Tûktinpar inthrang dan dam hi ngaituo ro” a ti chauh khom ni loin, a thuom ropui po po inbela Solomon inchei ve khan tuktinpar pakhat tluk khoma chei a ni nawzie a mi hril.

Mit lâwnga ei hmu thei hnuoi chăra hin hmu thei lo, thilthawtheina mak tak inphûm a um a. Ei hmu thei nêkin ei hmu thei lo hin hratna thâ a hau lem pei niin a’n lang. Ei hmu thei le hmu thei naw po po hi a hmangna ding taka hmang chun hratna tha hlawm vong a nih. Hratna tha hlawm intet muk chu ei tet muk nasa po leh a chin deu deu a, a hrât deu deu bok a. Thil thaw thei rapthlak ‘atom’ ei ti khom hi chuong ang chu a nih. Hmu thei lo khopa intet muk a ni pha lem chu hril thei lo khopin a hrât a nih. Chuonga hmu thei lo khopa hratna tha hlawm intet muk, Thim Awng (Black Hole) an ti chuh van boruoka hin tam tak a um thu mithiemhaiin an hril a. Thim Awng chun a hîp hrât em leiin, var (light) khom a hǐp tah chu a hîp dê tlat leiin a êng a suok thei ta nawh. Leihnuoia hratna thâ po po hi thrim hmawr tiet vela lienin tet muk inla, chu nêk daih chun Thim Awng chu a la hrat lem a nih. Vanvêl (universe), mihriem ngaituona chun a lien dingzie khom a hisap phak naw khopa zâu hi Thim Awngin zaa sawmkuo vel chu a hluo sip niin Scientist-hai chun an hril. Peter lekhathon pahninaa zawlnei tehlêm le zirtirtu indik lohai hremna dinga, “thima khom thim sâ tak chu an umna dinga ruot a nih” (2 Pet 2:17) a ti kha Thim Awng hi a hrilna ni sien a hoi khop el.

A ieng khom chu ni sien, ei chengna hnuoi chiterek, vanvel lienzie-a inthoka inkhi lem chun sunhăng khat tiet khom ni phak teu teu lo hi arasi ei hriet tah po po laia mak danglam tak,  hna hring le nungcha tinreng um theina arasi um sun chu a nih. Ei hnuoi le ni var le boruok inmil tawka inchokpol chun hratna tha mak tak el, thil introtir le inthrangtir theina a siem a. Chuong anga thilthawtheina insuikhawmna chu tiem seng lo arasi dangah a um ti ei hriet nawh.  Chu chu ei umna hnuoi hi a mak chuongchuongna a nih.

A mak bĕk bĕk zuolna chu mita hmu thei hna hring, thlai, thing le ruo, ram hmul, thilhring po po le a suk a tunga inlonhai hi ze hrang hrang puta pilvut inlărna el a nih. Mihriem ngei khom hi Siemtuin, “Pila inthoka siem i ni leiin pila bok kîr nawk i tih” (Gen 3:19) a ti mieu si annawm. Pilvut ni si, ze hrang hranga a hung inlar dan i thlir nuom chun huonah fe la, huon chun a thuruk lo hril a ti che. Chutaka chun Siemtu ropuizie i hmu naw chun, van rama khom zong zong la, hmu chuong naw ti nih.

Note: Originally written in Mizo-Lusei on March 10, 1993 at Milan (Italy) and translated in Mizo-Hmar with minor revision at Delhi on September 23, 2014)