Ei hnam sunga Monthly Magazine pakhat Manmasi Digest, Tuithaphai, Khawvela ei hnam bubitna hmun tak sirsana thlatina suok hlak, English, Hmar le Mizo ( Hmar Tawng part -II) section regular taka suok hlak, Sept. – October 2014 suoka a sungthu hai lo thlirlawk nuom leiin hei thai ei tih.
A sungthuhai :
1. Ka Pistol Te Kha Aw: Hi thu hi tienlaia Kuki le unau hmelhai thaw laia thil tlung le inzawma thu thiem tak Pu Darsiemlien Ruolngul-in a ziek a ni a. Ngainuom a umin tiemtuhai ta din bengvar phana ding tam tak um ngei a ring a um.
2. The Rise of ISIS : Tulai khawvelin a thlir le a ngaiven, khawvel pumpui buoina laia insang pawl taka ngai kristien hai chunga nunrawngna le Middle East buoina kangsuok pei thei dan le a tium zie chipchier taka Pu Samuel L. Songate’n a ziek hi, Theologian/Pastor le Bible tieng suitu, tiemtu ta dinga hrietna tharlam intlun theitu ni ngei dingin ring a um.
3. Ei Del Ram A Hai Hin: Manmasi Hmar nauhai North East-a ei chengna le inzawma Political Save Guard ei nei theina ding le a ziektu ngaituona inzam vel chanchin thiem tak le data tam tak lakhawma Pu J. Tusing-in a thai chu tiemtuhai ta ding le Research Scholar hai ta dingin hlawkna tam tak petu a ni ring a um.
4. Mitthli Hmawra Sumrisang Inzam: Ziektu Pu L. Rohlun Zote’n Hmar biel le Vangai biel sirsanaa a ngaituona invakvel le inzawma a lungril bundawkna a ni a, hnam lungril neia tiem chun hlawkna le tangkaina tam tak pe theitu ning a tih.
5. Awmhar Saisen Nau ang Tah, Ka Bangdawn Lo : Ni khat laia a thai dit takin hi khawvela inthawka a lo maksan, a ngai em em, a lem khawm ni lo, a nghil naw zie le a khawsawt zie to pui tawk tawk thei lova thiem tak le mawi taka Pu Hmangzalien’in a ziek chun mi tam tak puordo a kei tho ngei ring a um a nih.
6. Tawntir Hmangai: First Love ( Tawntir Hmangai) Tleirawl te hmangaina kuomum hung parsuok dan le a bebawm ngainuomum taka Pu Samuel Zothanglien’n a ziek chun tleirawl le tlangval, nunghak ta din ngaituona rose par an thliek chakna a sukzuol pha ngei ring a um dan an ziek.
7. Lawmpuina le Sungkuo Inkhawmna: Hmar Chief & Village Authority huoihawtna hnuoiah, ei hnama tulai hnaia Officer kai hai lawmpuina le Officer hai inpawlpuina le Lal ruoi awt tlangna nei chanchin tawifel tak le thlalak chun ngaituona thar iemani tak ei hnamah an tlun beisei a um dan an ziek a nih.
8. Hmar Literature News: Ei hnam laia pawl hlawtling taka ngai Hmar Literature Society hai chun ei hnama tawng humhaltu laia phusa tak Kohran thuoitu hai khun taka inrawnpui le a chanchin kimchang tak ziek chun beiseina insang tak ei hnamah an tlun ring a um dan an ziek
9. Meghalaya-a Hmar Literature: North East State laia changkangna hmuna Hmar um haiin Hmar Literature Society an indin thar chanchin tawi fel taka ziek chun ei hnama lungril neihai chun an phur pha hle ring a um.
10. Techno-Crime Langsar Zual Te: Hi taka hin tulaia Mobile hmang suol, ATM hmang suol le Internet hmang suol dan hai kimchang taka Er. Chhungpuia’n a ziek chu mitin ta dinga bengvarthlak tak a ni ngei ring a um.
11. My Experience During KUKI – Naga Conflict: Hi thu ziektu Pastor, K.Matia, Mozhu Prayer Centre, Mao Baptist Churches Association hin a pal ram ip nei lova a ziek, Manipur sawrkar khawma a hrietpui le a ngaisang leia Peace & Harmony Award 2013 a lo inhlan ta hielin a ziek chun tiemtu lungril a hnein tiem ngei chi a nina a sukchieng nawk zuol beisei a nih.
12. Cover Girl -Ruby Zote: Hi chanchin neitu hi hlasak thiem tak le hnam lungril nei tak, hnam inphatsan ngai lo, Hmar Tawng part –I lem hi chu an insungah le a ruol hai lai khawma inzapui ngai lova hmang hlak a ni a, hieng ang nunghak hmeltha le lekhathiem, hnam lungril nei bawk , Mizorama um nawk nghal, a chanchin hrechieng nuom chun Sept. – October, 2014 Issue Manmasi Digest agent hai kuomah lo ngaiven vat la thang a tih. Mo ding le nuhmei dinga ngaiven chi a ni naw I ti thei di’m a ni?
13. An Open letter To Lalringum Riengsete: Hmar Literature ziek dan kalhmanga ngaidan Manmasi Digest Issue hmasaa a hung ziek Pu L. Ruoivel Pangamte’n fel fai taka a dawn let bengvar thlak tak chun Hmar Literature ziek dan kalhmang a sukfie-in hmasawnna a um ngei beisei a um bawk.
Hieng a chunga zieklang hai khi nang mi var le ngaituona inthuk tak nei lem chun, tiem nuom a um zie le bengvarna tam tak an tlun thei ding zie khawm I hriet ta ka ringa, chuleiin agent hai kuomah cheng Rs. 20/- chau-in lo inchaw la, I tiem zo pha, mi dang kuomah Manmasi Digest hi inchawk seng pei ding a nih ti ip lova hril pei dingin Digest chun a ngen nghal bawk che a nih.
Mipui tiemtu ditsakna le thanhnem ngaina zarin tlin le tlin lovin suksuok a ni ang hrimin, tiemtu a tu el khawma thurawn le tha hre hai chun thurawn pek thei zing a ni thu ei zuk belsa vak bawk a nih.
A tha khawp el.
ReplyDelete