Ram Le Hnam Hmasawn Inkhina Tak Pakhat Chu– Chanchinbu!

Ei ni hi teh, ram le hnam hmasawn ei ni am leh?

-Tv. LRS Puruolte, Rengkai

Chanchinbu tha nei hi tawng humhalna le sukhausakna ding khawma thil pawimaw tak le a bulpui hai laia mi pakhat chu ni ve ngei a tih. Nitin, Kartin le thlakip le hunbi tum tum a suok hlak Chanchinbuhai chun bengvarna le hrietna an mi pek chauh khawm nilovin hrietna, bengvarna, lekha, thu-le-hla tieng haia dangcharna an mi pek thei. Hrietna tienga dangcharna mihriemin ei nei hi ramsa le ei inang nawna tak, ei danglamna tak chu a nih.

Ram/Hnam hmasawnna hmunah chun Chanchinbu an mamaw dan le fak le dawn an ursun dan an ang deu rawng hlak a. Ram le hnam hmasawn le sawn naw inkhi theina pakhat chu Chanchinbu an nei that le an nei rawn dan le an tiem nasat dan hai a dam hin a nih.

Chanchinbu hi kawlhnam ngei tak neka ngei lem a nih. Mihai ngaituona a hem ngilin, a hem kawi thei bawk. Chun, tawng hmangruo thar serna khawl lipui a nih. A chang chun lal a siem a, a chang leh lal a peithlak hlak. Mi thudikah a thuoi thei ang bawkin, khel thu hmangin mi a sukvet thei a. Chuong an lei chun, chanchinbu tha nei hi a pawimaw em em a nih.

Mi tamtakin, tawngna takin, “Hmar-haiin Chanchinbu tiem tlak ei nei nawh, ei nei ve sunhai khawm hringin hrova um an nih” ei ti awl et naw leh, “Ieng chen am a dam ding chuh?...” tiin chier hla, hla phuok thiemnaw tak chen khawma ei inzawt suok rawp hlak. “Khaw hem,  kei a lei a nih, a man hei pe thang ka ta, mi hai ta neka thalemin a la hung um ding an nawm.” ti hrim chu ei ngaituo ta ngai der naw nisien a hawi!

Hmar Chanchinbu a chu Cartoonist hmasatak khawm ka ni el awm (?). Sawrtui Monthly Magazine a Cartoon Column (Sawrtoon) a “Hmar Chanchinbu” ka draw tum lem khan chu ei Chanchinbu tam tak an thi ka’n lau leiin Hospital ah ka admit nghe nghe a ni kha! An thi vak, an dam vak, an thi sawng, a dam a sun khawm kawr taluo ringawt el le ru khat el, Ni tam tak tak bu fa ta lo, A then lem chu thla tam, a then nawk chu kum dam a tling! Drip khai a dam tawk tawk khawm an bo naw a ni kha! A draw a draw lem chun a hril inthuk zuol hlak. An natna doctor in uluk taka a hang enfel zet chun le! An mamaw tawk fa lo leia hrisello le thi an lo ni pei a nih! Hmar Chanchinbu tam tak chu ei lo the tah a, Hrietzingna thlan lung daw khawp zet el, vawisunni hin chu an hmel hmu phak um ta lovin muol an mi lo liemsan zo der an tah. Khawsawt khawm a um thei hle. An hming khawm Hmar hnam sung a pawl tam ang el a tam an tah a, thangthar tamtak lem chun hrie naw ni hai.

Hieng lawm lawm a Hmar tawng a suok Chanchinbu an hang bawrsawm el hi a san iem ning a ta?

An bawrsawmna san ni awm a inlang a san dang dang um mei a tih. Chuonghai laia mi hai chu hienghai hi an ni ngei ring a um. A lakman in lawi that naw lei, A buoipuitu tadinga inhmangna char char a ni lei, Ngaidan sepna thu changkang neka mimal inkhengna thu a lut hlak lei damin a chanchinbu tiemtu nekin hmelma, theidatu a sukpung nuom lem lei. Mi tukhawm suktha le sukhlawk chuong si lo a tam lei. Hieng nek hman hin thu changkang le ngainuomum insuo ta lem inla, a tiemtuhai khawmin hlawkpui lem ngei an tih. Chun, Hmar tawng Chanchinbu tamtak chu hnam dang hang inhnik ngaina um lo khawpin sungbing thil ah a lut hlak a, hi hi thil pawi tak a nih. Hiengang khawlbingna laka inthawka a fihlim hma khat chun Hmar tawng chanchinbu hrim hrim chu a hlawtling thei ring a um nawh. Chanchinbu chu ngainuomum, bengvar le tiem tlak a ni pha pha an chawtu ding zawng fahran a ngai der nawh. Chuongang a ni theina ding khawm chun fak hmuna ni thei khawp a inchawtu ding ei um a ngai a. Chu ding chun mipui tieng hin mawphurna lien tak ei nei ve a nih. Ei thaw ding tak hang thaw phawt hi a ngai hmasa tak chu niin an lang.

Khawvela nitin Chanchinbu Hmarha’n ei neisun le damsawt tak te hih i dawn chieng hlak am?: Hmar tawng a suok Nitin Chanchinbu umsun le Manipur a hnam dang chanchinbumi hai laia khawm rawnkai ve phak, Manipur a Award khawm lo dawng thei hiel, AIR FM a khawm ‘This Week in CCPur’ lakhawmtu a hmang rawp hlak, Manipur pumpuia chanchinbumihai laia a tak kai phak, i enkawl, Hmasawnna Thar (An Independent Daily Newspaper) hi lo hei dawn chieng nawk inla. Inzaum Pu Editor, Pu Lalmalsawm Sellate hi ka’n pak le ngaisang em em nasan a um a. Hi chen kum 29/30 (??) lai zet Chanchinbu a suk hring thei hi Hmar-nau laia chu ‘a tak’ a kai ta hrim hrim a. Mihai tiem tlak ziek suok hi thil awlai an nawh. Lekha thiem fufu ziek ding hre der lo khawm ei hnam sung ah an tam! Ama thiemna le hrietna that zie le inril zie ka ngaituo chang lem hin chun ka’n pam ruk rieu hlak. Amiruokchu, ei hnam a lo hmangai leia Chanchinbu hi a thaw tawk tawk, a insung khawmin a ni ding ang a ni phak naw pha hiel khawp a Hnam tadinga sinthaw a nih, ti chu ka hriet chieng hle. Hi lei hin Hnam pumhuop khawma Chawimawina Insang tak ei pek a phu ka ti tak zet. Ama hrietna hlutna (Quality) en chun Sawrkar sin hmu le Officer lien khawm ni ve thei ding a nih, ti chu hriet thei a nih. Mi tamtak chun Chanchinbu hi ei tiem nuom a, a man pek ruok hi chu harsa ei ti rawp hlak! Hi thil hi thil tha lo tak, bansan hmak chi a nih. Chun, thenkhat nawk chun, ‘Tiem ding khawm um lo, tiem tlak an nawh, Mi insuosa…’ ti dam khawmin ei chier hla ei inzawt kuol rawp hlak. Tiem nuomum le tiem tlak, tiem senglo khawm chu thaw ding chun a latuha’n a man ei pek that phawt a ngai a nih, ti le mi a hran pa taka an ruoi le staff an hau chun sum tam tak a ngai a nih, ti hre puiin, a latu tiengin ei thaw ding hang thaw hmasa phawt hlak inla chu ei in thangpuituo le ei renga tadinga changkangna ding ei thaw a nih, ti hi ei hriet thar nuom a um ka ti thei hle. An unau pahni inthlawpin an enkawl hring hram hram a. An sawlpuina le an laklut ngaituo lem chun an man naw hle. Mitam tak chun nikhat khawm ei pei ring a um nawh. Tlawmngaina le hnam hmangaina nei naw ta ding lem chun sin dang zawng san awl tak ding a nih. Anni hi ei hnam tadinga Missionary le rawngbawltu ropui tak ah kei hin chu ka ngai.

Chanchinbu suksuokna ding hin mihriem hun, tha-le-zung, khawl, thil tul le makmaw le sum-le-pai a ngai rawn em em a, nitin a sengso chu tam tak a nih. Hieng a ni lei hin ram le hnam var lem hai thaw dan angin ei Chanchinbu neisun sun te hi duot deu ei tiu ti chu ei hung hril nuom tak chu a nih. Chuongang bawkin ei tawng a suok hlak Chanchinbu dang danghai khawm duot ei tiu. Ei duot thei dan ruok chu in ang thei naw ni a, mani le mani ngun taka in ngaituoin, ei phak tawk ang peiin le ei in hriet suok dan a zirin chang sup sup el ei tiu. Ei duot thiem po leh ei Chanchinbu hai hi a thain, a/an dam sawt ve pei ding a nih. Hmar Chanchinbu a ni manin lang ei ta, tiem ei ta, a man khawm bat lova pein, suk vul tum seng ei tiu. Ei hnam damna dinga pawimaw a ni si a.

Vawisunni hin Hmar hai lai Officer le mihausa iemani zat ei um tah. Ram le hnam hmangaitu a insal ngam ngat khawm tiem senglo ei um tah. Chanchinbu tha dit a titi sep khawm ei inchatlak nawh. Ram le Hnam hmasawn inkhina tak pakhat chu– Chanchinbu a ni rawp hlak si a! Ei ni hi teh, ram le hnam hmasawn ei ni am leh?

Hmar tawnga nitin Chanchinbu umsun le damsawt tak,

Hmasawnna Thar (An Independent Daily Newspaper);

Tuithaphai a inthawka suksuok hi lain, tiem la,a man pe tha bawk la,

Nitin a Tharin hma sawn rawh…