Hmar-hai thil tuok hlak le inzawma Human Rights dan hriet ve dinga pawimawhai

- LRS Puruolte

December 10, 1948 khan United Nation General Assembly chun khawvel pumpui huop a mihriemin Chanvo a neihai puongna (Universal Declaration of Human Rights) a lo nei tah a, UNO-a member taphawt chun chu puonga um ‘Human Rights’ chu Inchuknain (School) le Inchukna insanghai po po ah mitin hriet a thedar dingin Khawvel a ram po po an hriettirin, hrilin an um a. Chu a puong le inruola Articles an duonghai laia mi thenkhat hai chu hieng hai hi an nih. (Article/s hai hi ei mamaw zuol bik hai chauh ei laksuok a, an dawtin, a reng a ram chun ei suklang nawh).

Article 1: Mitin hi chanvo le nina hi angkhat nei le zalenin an pieng a. Sie le tha hrietna le an dik le an diknaw thlier hrang thei dingin pek a ni bawk. Chuleiin, inunauna lungril neiin thil an thaw tlang ding a nih.

Article 2: Mitin hi thupuonga um, chanvo le zalennahai po po hi hnam thu a, hmel put dan thu a, nuhmei pasal thu a, tawng thu a, Sakhuona thu a, politics le ngaidan thu a, thuomhnaw, piengna le ngirhmun thu hrim hrim ah inthlierhranna um der lova pek an nih.

Article 3: Mitinin mani mimal himna, zalenna le hringna dingin Chanvo an nei seng.

Article 5: Mi tukhawm hremna mani mihriem hlutna sukhnuoi khawpa insawisakna, nunrawngna le tuorna nasataka inumtir a thieng nawh.

Article 6: Mitin khawlai hmuna khawm dan hmaah a nina ang tak Chanvo a nei.

Article 7: Mitin dan hmaah angkhat vawng an ni a, hnam humhalna thuah inthlierhranna um der lova pek seng an nih. Mi po po hi thupuong kal zawnga inthlier bikna le inthlier bik dinga infuipawrna laka inhumhimna angkhat seng an nei bawk.

Article 8: Mitin Constitution/Danin a pek Chanvo hlun (Fundamental rights) a i nei suksiet ding zawnga thilthaw laka Rorelna  khawlah inhumhalna Chanvo an nei.

Article 9: Mi tukhawm mumal um lova man, khum/intangtir le hnawtsuok phal a ni nawh.

Article 10: Mitin an chanvo le thaw makmaw an thawna kawnga le dan bawsea intumna kawnga dan kengkawtu le roreltuhai hmaa indik taka a chanchin rel theina chanvo an nei.

Article 11: Mi tukhawm thil suksuola heka umin, an humna (defence) dinga thil tul po po nei a; a chungthu rel a, danin thiemnaw an changtir hmakhat chu, iengkhawm pawi tawk lo (Thil suksuol lova) ngai a nih.

Article 13: Mi tukhawm a umna state/ram sunga a nuomna naah zalen taka invak vel theina le cheng theina chanvo a nei. Chun, a nuom hun hun ah a chengna ram maksan theina le a nuom hun hun ah kir nawk theina chanvo a nei bawk.

Article 15: Mitinin mani hnam nina chanvo an nei senga, chu Chanvo chu nuom thua lakhmang pek thei a ni nawh.

Article 17: Mi tukhawmin ama mimalin amani annawleh mi dang le intawm khawmin Thuomhnaw le Hmun le hmang a dit ang ang a nei thei.

Article 19: Mi tukhawmin mani ngaidan tlang taka hril theina zalenna Chanvo a nei.

Article 20: Mi tukhawmin Pawl siem theina le Inkhawm theina zalenna Chanvo a nei. Tukhawm Pawl hrim hrima ama nuom thu ni lovin inzawmluitir theina a um nawh.

Article 22: Mitinin mizie le nina ang peiin an thanglienna dingin Economic, Social le Cultural rights an nei.

Article 25: Mitinin an sungkuoin hriselna tha an nei theina dinga khawsakna ngielnghet, fak le dawn, silfen, In le lo, damdawi le vantlang sawmdawlna dawng theina Chanvo an nei.


National Human Rights Commission (NHRC), Protection of Human Rights Act, 1993
(Human Rights Humhalna Dan, 1993)
Protection of Human Rights Act, 1993-na besanin, ‘human rights’ humhalna ding le dawmsangna dingin, India sawrkar chun October 1993 khan National Human Rights Commission chu a hung indin ve ta a nih. Mihriem nauhai chanvo humhalna ngielnghet lem a um thei ngeina ding le inzawm a National Human Rights Commission dam, State Human Rights Commission dam le Human Rights Courts dam indin a a um theina dingin, Protection of Human Rights Act, 1993 chu September 28, 1993 khan India rama hmang tan theina a hung um ta a nih. A tak tak a hmangna ding chun eini mipui ah an nghat lien ve hle.

Matters not subject to jurisdiction of the State Commission (State Commission hmalaknain a huom phaklo thilhai)

1.      State Human Rights Commission hin dan hnuoia indin, State Commission hran annawleh Commission dangin an ngaituo lai thil hrim hrim chu sui naw nih.
2.      State Human Rights Commission hin, ‘human rights’ bawsiet a um hi, Kum khat a lo liem tah a ni chun, suizui naw nih.
3.      Sipai ralthuom chawiha’n ‘human rights’ an bawsietna thil chu New Delhi-a National Human Rights Commission Chauvin a suizui ding a nih.

Hriet ding a tha: Mizoram Sawrkar in Human Rights dan a bawsietna tam tak a um zing. Manipur State Sawrkar ngei khawmin hi dan hi a bawsiet nasa hle. Chuleiin, ei himna dingin iem ei thaw ding? ti chu tiemtu le mani seng in ei dap suok a hun ta hle.