INPUI: Hmar News & Info

Ziektu: Pu. L.Keivom, Inpui.Com Columnist

A thiem thu hril loin ka suol a phur zo tah,

Ka thiem thu hril loin a rong bawl tang ka tih.

-Zohauthang

            Nk. Lalruotmawiin thiem taka mitthli sur hnuoia Zohauthang hla phuok, “A thiem thu hril ve lo, Lal Isu chu, Ka Lal a ni si, ka Lal a ni si” ti a sak chun Zoram khawvel dung le khang a rùn a, a rùn dan khom a namei nawh. A video entuhai lungril a zop thla a, an lungril kul bang ngar le sakhat khom Nebukadnezzarin Jerusalem kulpui a sukchim neka nasa lemin a nor chim hum hum el niin a’n lang. A phuoktuin a phuokna trong ngeia sak theihai lem chu a Pentecost tlung phaka inngai hiel an nih. Sienkhom, hi hla thu threnkhat hi tukver danga inthok khoma bi chieng thra mei a tih.

            Tu hnam khomin hringnun le khawvel ei thlir dan le hmu thei lo khawvel le ei inlaichinna ram chu ei hnam nunphung, kalchar huongah zung a thlak vong a. Ei sumphuk, ei taptebula inthokin thil ei thlir a, ei ngaituo a, ei suongtuo bok a. Ei kalchar mitin thil ei en a, ei kalchar nain ei ngaithlak a, ei kalchar hnàrin ei inhnam a, ei kalchar leiin ei intem a, ei kalchar hnukin ei lem a, ei kalchar phingpuiin ei soi hlak. Dannaranin, mi mal, khawtlang le hnamin ei pom tlang le sungpui ngirhmun ei inchangtir thilhai rêng rèng chu sathu le changal hme inhuom bût bût rima sun le zana ei tapzawla ei baptis ta hnung a ni hlak.

            Chuong ang chun thlarau khawvel khom hi ei kalchar tukvera inthokin ei thlir a, thi hnunga van ram pana ei fe dan dinghai khom Zo hnathlakhai chun Ri Dil khawvel leh ei hmet kop tlat a, a lampuiah hoilo par hai, lunglo tui hai, hringlang tlang hai, pielral hai le thil dang dang ei inumtir a. Ri Dil khawvela Jordan vadung a hung luong lut hnung khomin ei thlarau khawpui thara an mi hril, van Jerusalem chu ei kalchar tukvera inthoka thlir naw chun a chieng naw a, lung a lèn tak tak thei nawh. Pastor Thangngurin,

            Van khawpui thar tuola leng lai khin,

            Khawzing hnuoiah inrieng an um ngai nawh;

            Hringna thing zar kur diem diem hnuoiah,

            Nunkhuo thara lengin, fiertui inthieng an dawn

a ti amanih, an naw leh Pastor Chhawna’n,

            Aw, chu hmuna lengte zawng chuan,

            An thren takte an ngaih loh nan,

            Nunna lungloh tui an in e,

            An thliak lawmna hawi lo par nen

amanih a hang ti dap dap el ruok chun ei mitah van ram hlimthla ding a hung chieng uor uor a, hmu châkin ring ei infân a, thlarau mit inlèn velin ei dàk awr awr el a nih.

            Chuong ang char chun Isu pieng dan thu le a thi dan thu khom hi ei en hlak. Mani in luma a pieng naw chu thu khat, khuolbuka khom pindan chang zo loa bawng in tlawm taka a pieng thu kum sanghni hnung deuthawa ei lo hriet ve chun, ei zaipu laia Jeremia ang deua trapder Rev. Kaplienthang (Kappu) lungin a tuor ta naw a,

            Hieng ang hrim hrima inrieng an um nawh,

            Van le khawvela hin;

            Tu khom bawng inah an pieng nawh,

            Van Lal nau ruok chu a hung pieng,

            A lainat thlak ngei maw,

            Ei Lalpa pieng dan chu!

tiin a khek suok a. Vana inthokin ropui taka a pieng thu hril dinga zaipawl an hung tir hiel khom kha hre ve naw ang elin, ranthlenga tlawm taka a zal lei chun van mihai chu ngui vong dingin a ring a, hieng ang hin Pathien a hang indon ta hiel a nih:

            Aw Pathien, i nau hi,

            Ranthlenga i’n zal hin,

            Van khuo bu ang an ngui zo am?

            Ranthleng hi an thlir am?

            Chuong ang khopa a pieng thu khom lo sùrpuitu chun a thi thua a lung hang inno dan ding chu hril loa hmâng a nih. “Ka Lal tuorna ka ngaituoin, trap nawna ruol an nawh; Aw ka Lal thina hmun saw, kei chu ka en ngam nawh” a ti el chauh khom ni loin, Luru Hmun pana a fe lai chu ringnain a hei thlir a, “Ko thiem an um naw maw, Hung kir nawk hram raw se” tiin a khek suok a. A bei sukpung lo fatuhai kha inpunin,

            A bei fatuhai hung inkhawm ro,

            Ei Lalpa san dingin iengtin am thawng ei ta!

            Kalvari tlang tieng siel angin an som

tiin rawl tawp insuoin zuol a ko a nih. Hung kir vai sien la, iem ei chang top ding ti tieng ruok chu a ngaituonaah a um phak naw hrim hrim. Lung nonain a lu sipa inthoka a ke par chenin a man a, châng dangah a pakai thei nawh. Kum 2005-a Mel Gibson film siem,  The Passion of the Christ kha en sien la lem chu mitthliin zop ral zo thei a tih.

            Khang hun lai le tu chen khoma ei lung innona tak le ei hlaa khom hmun hluo rawn tak chu Isu thi thu le van ram ngaina thu niin ka hriet. Pastor Thangngurin Isu thi thu hlapuia a’n sam suok, abikin hla pali (1) Ruoi lungsietum (2) Zan thlavaium (3) Hringna thienghlim siemtu, an dit nawh Zion-ah ti le (4) Ka hrengkol bun tihai ang khopa lung run thlak hla hi ei kawl le kienga hnam danghai chu hril lo, Saptronga hlaa khom, ka dài ve phak china chuh, ka la hmu naw hrim hrim. A thu hre loa a thluk ringot ngaithlatuhai khomin hieng hlahai hi lusun hla an nih ti inhmai ruol a ni nawh.

Hieng hla thlukhai hnai tak ka hriet ve sun chu September 23, 1993 chawhnung dar thum vela Oliv tlang tlak tieng thruta um Getsemani huon ka sir trum a nih. Hi huona hin biek in ropui tak a um a, chu taka chun chawhnung dar thumah Isu tuorna nasatzie inentirna dingin inkhawm an nei hlak a. Hre lawk dêr loin, chu inkhawm nang char chun ka tlung a. Pulpit hnung banga chun lungpui baw a, thlan thisen anga fara lungngai taka Isu a trongtrai lai lim lien tak el a um a. Thiempu a hung suok a, maicham hmaa chun berbu chawiin a ngir a, nunghak zaipawlin mombati chawi sengin lu sun hla ni awm tak, lung run thlak êm êm el hi sakin an hung zui a. Chu hla thluk chun a chunga Thangngur hla 2&3 ei hril hi a zawl hle a, lungril a tawk a, sungril a them a, lung a sukno a, mitthli a hnai nghal el a nih. Jerusalema in fe pha leh zu ngai ve hman ro, mak in ti ve hle ka ring. Chu ni chun Thangngur lo inrilzie nasa takin a min ngaituotir hiel a nih.

Kros-a Isu tuorna natzie khekpuina le sùnpuina thu ei hlaa a tam san hi hriet thiem ding chun a hung suok nasat huna ei ngirhmun kha hriet fie a ngai. Mizorama harna a tlung hmasa tak kum 1906 khan chu kristien an la tlawm leiin a fang lien thei naw a. Sienkhom kha harna khan suol inhrietna, Pathien ngaidamna, ramthim invoina le Chanchin Thra hril dar dinga turna tieng a thok a, nasa takin ringtu an hung pung pha a. Harna voi hnina, 1913-a hung tlung khan chu Mizoram le a se vel, abikin Manipur le Chin Hills chen a deng hman a. Krista tuorna le khawvel tawp el dinga ringna leia Chanchin Thra hril dar vat vat trûla hrietnain a thok nasa êm êm a. Harna voi thumna, 1919-a tlung khan chu chappui kang vanglai ang elin a puok dar a, an dar zau hle a, a dai sawt bok.

1919 harnaa an thupui tak chu hemde Isu le Kros thu a nih. Hi harna hring suok, hnam ro poimaw tak chu Zo hnathlakhai zai le thluk le hla thu hmanga anni awm suok ngei hla, a hnunga “Kristien Hla Thar Bu’ tia hriet hung ni tah hi a nih.  Kha hma po khan chu, Sap hlaa inthoka bazaar tronga inlet hla chauh misawnarihaiin ringtharhai chu an sakpui hlak a. Khuong hmang an phal bok naw a. A san chu an hnam hla thluk le trongkam hmang chu ringnawtu thuomhnawah an ngaipek a, khuong hmang khom pipu thuomhnawah an ngaipek bok a. Chuleiin, ringtharhai chun nuomin nuom naw sien, inkhor deuin Sap hlaa inthoka inlethai chu an sak a ngai a nih.

Amiruokchu, varna le remhrietnaa sip Thlarau chun ei hnam thu le hla le zai thluka Pathien ei chawimawi chu ei thaw dan ding tak a nizie ringthar mi threnkhat lungrilah a hung hril a. Chu taka inthok chun Sap hla thluk kha eini zaia kei nemin, pipu hla thluk leh chekpolin hla a hung suok ta truk truk a. Tu lai chena Hmar tronga hla ro tling tam tak hi 1919 harnain a hung nghong suok a nih. Hi hi Hmar tronga kristien hla an phuok hmasa takhai chu an nih. Hieng hlahai hi la khawmin 1923 khan a buin kawpi zathum an sut a, chu chu Hmar tronga hla bu pieng hmasa tak a nih. A hla bu hmingah Independent Kohran Hlabu tiin kum 1935 khanl an inputtir a, voisun chen hin chu hming chu a la put zing a nih.

Hmar hlaa Isu tuorna le kros thu a tam êm êm san hi a mor suoktu chu ei hril tah 1919 harnaa an thupui tak a ni lei a nih.  Hmar kristien hla hmasahai hi chik taka ei bi chun thlûr hniin a fe tlângpui a. Thlûr khatna chu Isu pieng le thina thu a nih. Thlûr hnina chu khawvel rinum ei nghok thu le van ram ei beiseina le thlirna thu a nih. Saphai hlaah Pathien inpakna thu le rongbawl dinga pen suok poimawzie a tam hle laiin, chuong tieng pang chu Hmar hlaa hin hmu ding a tam nawh.

Chun, Hmar hla tam lem hi ei en chun mong inlang kuka inbikrukna hla a nih. A phuoktu nuna tak ram leh inzom lo, duthusam hrilna hla a tam êm êm. Hausakna le inlalna hnawlin ei inhril a, sienkhom chu thil pahnihai chu ei hnot tak an ni bok si.  ‘Lungawi dan ka thiem tah’ ei ta, mi thil ei inhnar hlak chu a zuolkai deu deu. Khawvel ei nghok thu le maksan vak ei nuom thu ei hril ei hril a, thi ruok chu ei rin êm êm tawl bok si. Chuong ang thu hrilna hla, Kanaan ram thar awina hla an phuok tharhai lem hi chu fiemthu titaka “Hla Hur” ka ti hlak a na, chuong hlahai chu khuong le dar le ei kurinkukpui nuom zawng tak a nih. Tak rama inthoka lem rama inbikruk le for hmang tum hi ei hnam sakhuo kalchar pakhat a ni tah. “Ei ralthuom chu Gospel chauh hi a nih” tiin ei khek indur a, a gospel tak chu mani nuna hmang le lak lut ei nuom tawl bok si nawh. Hmai kawra hmang ding ruok chun ei hmai phi sung ti chauh naw chu ei inthla nuom der nawh. A hriltu le ngaithlatuhai hi zat khat vong ei nih. A hril tieng ei huoisen a, a thaw tieng ei dawikawlok.

Chun, ei hla thu le ei Pathien thu hrilhai hi Pathien thu am, an naw leh ei lung tluk zawnga ei sirtlukpui ti khom sui tham fe um a tih. Lal a nina ang taka Jerusalema ropui taka Isu a lut thu ei hril changa ei uor nuom tak nia ka hriet chu sabengtung chunga a chuong thu ni sien a hoi khop el. Hi sabengtung hin sermon a hlaw nasa bek bek el. A chang chun a sabengtung am, a chunga chuongtu kha a poimaw lem ti khom ei hriet thei naw hiel a nih. Sabengtung kha hung tho nawkin, mihriem angin hung trong suok sien chu, a chungthua sermon po po hi a hriet charin, maktiin a thi nawk nghal ka ring.

Hieng thil hi ei kalchar mita ei hmu dan le naa ei hriet dan anga sermon ei thlak lei a nih. Sabengtung te chungah ei inchuongtir a, a awm le awm naw khom ei ngaituo nawh. Sabengtung te chungah patling nutling tu am an chuong hlak a? Sabengtung tuoi chungah a nih Isu kha a chuong lem chu. Chun, sabengtung hi a tlangpuiin chi hnih an um a, chi khat chu rikphurtu (beast of burden ti tronglamkei a hung suokna hiel) sabengtung an na, an thehre a, an khàn an hnuoi a, sienkhom thil phur le rinum tuor an hrat a, thunun an inhoi lain a khaltu um lo chun an nuomna tieng tieng pet hmang an ching. Sabengtung dang chu sabengtung naran neka lien lem, sakor le sabengtung inkara mi an ni a, chu chu a nih mihriem chuongnaa an hmang hlak chuh.

Chun, Middle East khawvela an thil ching hlak pakhat chu, inremna siem dinga lal a fe pha leh sabengtung chungah a chuong ngei ngei hlak a nih. Isu khomin Pathien le mihriem inkara inremna siem dinga Jerusalema lal a nina anga a lut khan an hnam dan zuiin, sabengtung chunga a chuong ngei ngei a ngai. Chu a thaw dingzie thu chu a hma daiin zawlnei hmanga hril lawk a ni ta a, chu chu Pathien thu a nih. Sai amanih le indona hmangruoa ngai sakor amanih chungah chuong sien chu thil konglam hraw lo ning a ta, hril lawka lo um tah Pathien thu chu khelah inchangtir a ta, a mission a hlawsam der ding a nih. Chuleiin, sabengtung chunga Isu a chuong kha Pathien remruot dan tak a na, lainata lo inhniekpui le trappui chi ni kher naw nih.

Chuong ang char chun Isun a thiem thu a hril naw kha Pathien remruot dan tak a nih. A thiem thu hril pal sien, Pilat khan insuo el tah sien, Setanin hnèna chang a ta, a mission a hlawsam der ding a nih. Chuleiin, a thiem thu a hril naw kha trappui neka lawm hla insam ding lem ei ni naw maw? Suol nei naw sien khom khawvel suol phurtu a ni tlat leiin, chu chu a hringna inhlàna kros-a a thipui a ngai a, a thiem thu hril dinga ruot a ni naw a, hril thei ding ngirhmuna ngir a ni bok naw a, a thiem thu a hril dan ding chu thi chena thu zawm le a hungna san hlen suok a nih.

Isu khan a thiem thu hril loa a Pa thu thi chena a zawmna leiin mi tin ta dingin thiemchang theina kot a hung hong a, ama ringtu taphot chun chatuon thina le hremna lakah sandamna ei lo chang thei tah a nih. A thina leia thiemchangna lampui a hung hong thu chu khawvel po poa tlang insampui dingin mawphurna a mi pek a nih. Thiemchangna la chang ve lohai, thiem thu la hril ve thei lohai kuoma thiemchangna ei chang thu, ei thiem thu hril hi kristienhai thaw ding tak chu a nih. Chu chu a nih Pathien thu; chu chu a nih Chanchin Thra hril ei ti hi. Chuleiin, ringtu taphotin ei thaw ding chu ei thiem thu hril dar a nih. Ei thiem thu hril ngam si loin iengtin am Krista rong bawl thei ei ta?

Chuleiin, a chunga ei hla thu lak suok hi ka hla phuok chu ni sien, “Ka thiem thu hril loin a rong bawl tang ka tih” ti nekin Marka 16:15-a Isu thucha leh inremin “Ka thiem thu puong darin a rong bawl tang ka tih” tiin sie lem ka tih. ( Delhi , Good Friday, April 14, 2006 )

Ziektu: H. Zate*, Silchar

Retheina hi chu aw! tia lungawinaw pum zingin ka Farhai Mûtmaleng bil/hmun chu ka vat a, rethei luot leiin mani chi-le-kuong le Farhai khawm hla theilo in ka um ana tiin ka ngaituo a, ka lungril ana rum rum a.

Kum tamtak anlo enkawl tak an Mut-maleng bil chu kan vat anta chu, indawi hle inla khawm a hlawknawh, a nikhatna chun Mu-maleng umna chu kan hel thei a, sienkhawm, anihnina ruok chun hel thei ani ta si nawh. Thlan-saphul kaia anlo enkawl an Mut-maleng chu kan vatthluk rum rum el anta chu. Mut-maleng bil vat e ti lo chun a Mut-maleng lem kha kan vat lem ani chu!! Rubber bil dingin.

CHulaitak chun Ka lungrilah thil tamtak ahungluta, Mihriem hringnu lo derthawngzie dam, Hmangaina lo tlawmzie dam, chun, ka ngaituo pei a, Hringnun a khawm hin Mut-maleng hringnun alo um thu kan ngaituosuok ta a.

Mut-maleng chu ei muta anleng a,ei mutna tieng tieng anleng pei a, simtieng I mut chun simtieng inleng ata, Hmartieng I mut chunHmartieng, chuongang pei cun, kil tin kil tang ah, I mutna tieng tieng inlenga tih.

Khawvel a uma, asungah Mihriem ei uma, mize in angnaw tak tak dam, inmilnaw tak tak dam ei um anih. Thenkhat chun tumruna le huoisenna an changchawia, ringumna inruoltha puiin hi khawvel rinumna le harsatna tinreng hi an ner/tawn thleng hlak. Hienghai hin, rinumna chu tuor hmasain an damsung seitak chu hlimna le lawman le inhawitirna in a sip ta hlak anih. Mihriemin ei tuor peinaw le ei hmasawn peinaw tak chu Rinumna le Harsatna hi ni ngei atih.

Pu Chop Singh chun kan sikul ahung kan tumin thutluon pahni tah deu el a hril a, ”kum 70 dam dingn inngai la,kum 28 sungin inchukna izo dingin ngaila, kum 42 vel ila nei a, hun tawi lem rinum tuor am a sawt lem kum 42 rinum tuor I thlang lem” ani takluo ie, a tawi lem rinum tuora a sawt lem inhawitir am a tawilem sikul kailai inhawitir a a tawpa rinum tuor, tukhawmin a sawtlem rinum tuor chu ei peinaw, chulei chun, a sawtnaw lem a hin rinum tuor met angai ani chu.

Inhawi chen eiti taka chun, khawvel inhawi chena tlan hai khawm hin inhawi an chenna dingin ‘rinum’ an tuor hmasa tho hlak, sienkhawm chu rinumna chun inhawitirna antlun hlak, amiruok chu thilthanaw a rinum tuor anni leiin an rinumna chun inhawitirna in dawt hlak sienkhawm rinumna le tuorna bawkah a kirnawk hlak. Iengtinam? Ilo ti ani el thei.

Zu dawn mi chun zu inhawitaka anrui theina ding chunzu kha em em kha rinum takin a dawnlui hram hram a, chu zo a chun inhawi ti deu in an rui thei ta hlak chau ani. Inchiu hlak hai khawm hi inhawi ti taka an inrui theina ding chun na ti ngawi ngawiin an inchiu hlak anih. Chuongang bawkin Nuhmei-Pasalna a tlan hai khawm hi inhawi titak le insim ngawi ngawi, thuok lum hal hal a nuom an tawlna ding chun atirah an ‘thienghlimna’ hawngin na ti ngawi ngawi, thisen suokhiel khawpin antuor angaia, chu zoa chun inhawi titakin anchen thei antah. Sienkhawm, hienganga ‘Pasal sulhnung le lawng sulhnung hrietthei ani nawh’ ti le ‘CHangchep in Sa tha le thanaw a thenawh’ ti le ‘ Mangkhawng in asa del ding a thlang khernawh’ ti dam changchawia inhawi chenna dinga rinum tuortu hai hin thatna niloin Sietna antlun lem hlak. Chu rinumna chu rinumna vekin a zui nawk hlak anih.

Rinum taka inchiu, zudawn le thienghlimna thapral hai khan anchan chu ‘ser’ thu theinaw an insiem chau kha ani. chuongchun, rinumna tinrengina hnawtzui a, beidawngna in thlazarin, natna tibaium tinreng kaiin, Nunghak hmeltha em em le Tlangval hmeltha em em hai chu an hung zuora a tawpah thina in a hmuok ta hlak anih.

Vawikhat chu ka Laibunghailaia mi pakhat hin Nunghak a biek a, apa in alo hriet a, ehe, bawia, anu khawm ‘ Ui thi keia ka kei hnung’ anu apuo chun thanaw viu atih atipek a tuta nangin inhawi ilo chena haulam taka I hringnun ilo hmang hin I nau hai le I tu hai chenin an tuor thei ani ti hriet apawimaw.

Rinumna tuor seng seng mani sietna dinga rinum tuor nek chun, Inkhawm kai, zu dawnlo dinga insum, damdawi thaw le inchiu lo dinga insum, le Sex hmanglo dinga insuma rinumtuor hi a hlawk thlak lem naw ding maw, a tawpah hlimna-lawmna a um si a. Lawithat zana mani kawppui hai chan ding midang lo inhlan dinga rinum tuor chu a thanaw em el. Chun, rinumna le harsatna tuor si si a rinumna vekin azuinawk dinga rinum tuor nek chun Inhawitirna in azui chu thlanglem atha.

Pu Chop Singh athu hril pakhat nawk chu “ I don’t want to impose Discipline on you, but be in a discipline yourself” ti ani. Eitawng chun, “KHUOKHIR CHEU KA NUOMNAW, NANGNI INKHUOKHIR RO” ti inla amawi in andik awm ie. Khawmhi thil tah tak anih, Tleitir, Tleirawl, Rawlthar, Nunghak le Tlangval haiin ei nghawk tak chu mi khuokhirna hnuoia um hi anih. Chulei chun, mi khuokhir ngailoin mani inkhuokhir lem eitiu. “ Mani inkhuokhir thei hai chu an hlawsam ngainaw a, beidawngna ruoma imthawk beiseina mei de va va chu thlirin Beiseina le Nun-hlimna tlangsip panin an tlung hlak anih”. Sienkhawm, mi khuokhirna nghawk si, mani inkhuokhir bawklo hai chun, Beiseina meide chu hmethlumin Beidawngna ruom anpan a, a tawpah thlakbalna le Rinumna in a bawm hlak.

Mani Inkhuokhir theinaw hai hin mi nau hai chu dem kaiin ansiem hlak. Ringumna an piengpuinaw a, Harsatna an tawn pei bawknaw, an inhawitirna zawnga char antlan a, an ruolhaiin A AW B an tilai le A-nunu B-papa an tilai chun nuomsip bawlna ah anlo tlan hlak. Anni lei hin annu haiin minau hai andem a “bawia chu a ruolpawl haiin an zirnaw a” anti a , minau hai thiemnaw an inchangtir hlak. A thiemnaw lem le a zirnaw lem chu a ruolhai niloin ama ngei ani. A nuomzawng angpui a tawngfuk a ” Dit le dit intawng chu Daifem ah” anlo ti ang deu inanlo thawkawp ta lem ani. Nuomnaw sien khapa khan a thawnaw el ding ba, anuoma a thaw ve a, a tawpah a nuhai chun ‘ Bawia chu a ruolhaiin an zirnaw a’ anti hlak. Nu pakhat chun a naupa leiin mi nau hai a dem a dem el a, ak chek le alo inmil rak reknaw ni ngei ding an’a. anleh, pi I nau hai anfel leiin mi nau hai inpak ta,ani sinaw chun mi nauhai dem ngawtnaw rawh, I dem ang tho khan mi khawmin I nauhai an dem ve el thei I sawnnaw, ek fa dinga anti in afak chuonga?!! Ka tipek zek a, ka hril indik deu mani zate haiin in tawngthei ie ati a a fehmang dei. Mani in khuokhirna neinaw hai chun ti takna le tak-in-ningna an neinaw a, amni mawphurna an hlen ngai bawknaw a, hlawtlingna chu hlawsamna in an thlakthleng hlak anih.

Tak-in-ningna neilo, an lungrilin thlurbik neilo hai chun ringuman an thlasama,an nuomna tieng tieng an inhem a, inhawi anti zawng zawng anthaw a, rinum hmasak loin inhawitirna an hmasak a a tawpah rinumna in a bawm a beidawngna in a phier ta hlak ani.

Hienghai hin rinum tuor an peinaw a, an nina an in zapui a an nina neka insanga inlang antum hlak, a tawpah chun an ruolhai motor dawng khu ah anla Hritlang hlak. Mani ruolhai motor khu a Hritlang le Inrui hi thil ti um tak ani. Mani in dawngpha siloin mani ruolhai motor khu ahin Hritlang pha hram ei ti ti ti a um hle.

CHuongchun, mani mawphurna zo lo, hlenlo le hrelo, lungril thlurbik neinaw , Tak-in-ningna neinaw, mani inkhuokhir peilo le theilo, Ringumna thlasam le mani nina neka insang a inlang tum, nuomna tieng tieng a pet le inhem el hai hi “MUT-MALENG” chu annih.

Date 10 July 2012, Silchar (http://www.hzate.wordpress.com/)

Ziektu: - H.Zate*

Hi Khawvel, rinumnain an huol, ringumna neitu hai hlawtlingna ram a hin, parmawi vullai chuoiin, par thar a hung chuong a, hna hlui ṭilin hna thar in a thlek hlak. Hmangai em em a kumtluonga rûnhmunkhat a leng dinga intiem a tiemthu thlung hnunga puonṭawp hnawl taka an inhnawl nawk hlakna a hin, Rinumna le Hlemhletna in a sukdal zolo thutiem hi a um ve a, chu thutiem chu ringumna in an huol a, selna in a tuom hlak. Hi thutiem hi anih khawvelin a zawng a, a buoipui rawp hlak chuh.
Chris Medina in mawi le lungkuoi em em a a sak “Whats are Words” hla hi ilo ngaithlak ve ta am aw ! Hmar Pa in a phuok chu nisien, ‘Tiemthu Di’ tiin a phuok el rawi mawh. Hi hla hi Rodney Jerkins, Andre Lindal le Lauren Christy haiin Chris Medina le a nuhmei Juliana an phuokkhum anih. 

Kum 2011 American Idol kha ilo thlir ve di’m chuh, kha tum khan anih American Idol el chauh nilo Khawvel Reality show a thil la tlung ngailo chu a tlung. Chris Medina kha American Idol a a thangsan an indawn a, ‘a nuhmei zeng enkawlna ding a ṭhang ‘ ani thu in a dawn ani kha. Chutaka chun Judge laia mi Hlasakthiem inlar chun iem a phen a thilum hrietchieng nuomin a nuhmei chu stage a thuoi dingin ati a, a hung ṭhuoi chi khan chu Jenifer Lopez khawmin a mit mawinaw ding a dawnsak thei tanawh, men pûr pumin “I Nuhmei hi kan hnar” a ti hiel anih kha. A natna an hnarnaw a, a rinumna anhnarnaw a, hi hlasakthiem hin an lar le an hawitir lai chauh a hmangaitu nilo, a rinum laitak khawm a inphatlo a, “a mi mamaw laitakin inkiengsan theinaw ning “ ti a, ringumtak a chel zingtu a dit ve lei lem anih.
.
Kum tam an in ngaizawng ta a, hlimtakin an lo um ta hlak,Nu lepa kara um ran chu inthlakla ana tiin kumtluonga runhmunkhat inlawi dingin an intiem a, tiem tlat ie tia Nupa an ni vena dingin Thla hni chauh a um tah. Nghakhla em em in an um a, chuonga nghakhla le hlim em em a an um lai chun thil lawmumnaw tawpkhawk a tlung a, khawvel hi an ditdan ringawt in anhernaw anih. Oct Ni 2, 2009ani a, ei rama chun nisien Mahatma Gandhi chawimawi rek ngei eitih. A phone a hung inri ral ral a, a thurhiet chun a lung a ṭhawng ngei el, Juliana damdawiin ah a um, car changsuol leiin. Ana ngei ie maw! Thlahni chauh nghak a ngai ta vei leh.inhmaw takin damdawiin a pan a, inhmaw khan umzie a um ta sinawh. Ani ding ang alo ni zo ta si, An in enkawl a sienkhawm, ngai a aw thei tam awl sinawh. zeng ania Piengphung ruolbanlo ani tah. 
Juliana chun chris hin inphat in nein aw sienkhawm, awm a ti hlie hlie ring a um. A sanchu ama an en a, ṭangkaina reng reng a nei tanawh, ṭangkaina chu thuhran, phurrik chau ani ta si. ‘Bawite,ka dâwnin nangleh sakhmelhrietlo ienga leng a ṭha lem, ngaingam tein kiengzai mi relsan el lem rawh’khawm ti ta rawinaw nim. Sienkhawm, Chris chu chuongang mai mai a, lungril detlo/nghetlo le mi dawldâp aninawh. Sum ngainatna a hlak duam le pamham ani bawknawh. An innei ding Ni a hung tlung a, Juliana in a beiseinaw ang takin, ruolbanlo ani lei ringawt a ṭhena biethu inhlan el lovin , ‘biethu khawlkhawmin tiemthu vawngnaw lang, iengang mi am ni tang ka ta, I mi mamaw lai taka kan kiengsan che chun ? ’a ti lem a, ala dittawk nawh. 

Anywhere you are, I am near
Anywhere you go, I'll be there
Anytime you whisper my name, you'll see

A la ti ṭal a, bawihte. Khawikip-ah lengin ṭuon la,hlat ngainaw ka ti che a, I kiengah umin hnai zing ka ta, mi mamaw a Ka sakhming I lam zat,a chun, ka sakhmel innuisieu chu hmu hlak I tih.

Where every single promise I'll keep
Cause what kind of guy would I be
If I was to leave when you need me most

Nang leh lungruoltea biethu eilo thlung a, ka lo intiemna hai, tiemthu khawlkhawmin vawngnaw ka tih, iengang mi am ni tang ka ta, tiemthu sût a I mi mamaw lai taka kan kiengsan che chun ? a natna leiin inkiengsan aa tum venaw a, tiemthu sûthmang nunrawng ni a tum venaw a, chunek chun a hmangaitak mamaw em em tu chu a kuongkuo lem a, khawvel ngai a hmangna um talo ding a hmangai chu ‘keiin kan phatsan chun tuin am hmangai tang an ta’tiin duottakin a enkawla ta lem a. 

What are words
If you really don't mean them
When you say them
What are words
If they're only for good times
Then they're done

An hawi le a rinum a khawm tia intiemin, fangchang pielral chen khawmin,thutiem chu intiem ang nilo I hril chun iem ṭangkai ata, an hawi le hlimni a chau a dingin ani chu thutiem chu iem a hlawkna um chuong ata? Ani ie, a ni takluo ie. Famchang pielral chena intiem ta hnung natna pakhat lei chau dam a, ei thuhril a danglam ani ngai chun iem kawk nei ata. A ngaithlatu tadingin hlimna nekin natna an tlun lem ding anih. Hienga thutiem a ringumnaw lei hi annaw pasal khawm pasal zolo a ṭapna khur a lut a ‘ṭap ruoi a awl bawite, tiemthu sût mang el ini si. A ngûr nun kan ieng ve sinawh, I hlimna ding ani chun damlai thlanthim lo chang lem ka tih’an ti hlak hi.

When it's love
Yeah, you say them out loud
Those words, They never go away
They live on, even when we're gone

Hmangaihna anih ti a, I hmur inno sar a hril a, thutiem hai kha riel ang luongral el di’n an mawinawh. Lairilah châmin, a hring zing a, famchang dairiel chang chen khawmin. An dik anih. Mihriem hi liem sienkhawm , ei thuhril le thutiem hai hin muol a liem ve ngai sinawh. 

And I know an angel was sent just for me
And I know I'm meant to be where I am
And I'm gonna be

Hi Khawvel a hin ka tadingin Angel pakhat a hung ṭum a, chu angel chu ama hi anih ti ka hriet a, chun, ieng dinhmun a um ding am ka ni ka hriet angin ieng ngirhmun a ngir am ka ni ka hriet bawk leiin chu chu lampui chu hraw tlat ka ta, a damṭhat laia angel hawlthlak ka lo ti hlak chu natna khirkhân takin a thlakbuok ta leiin inphatsan theinaw ning. A ṭhatlai le a hrisel lai po ‘ka tading chun angel hawlthlak ini ringawt’in ti a, sietna a hung tlung pha ‘zawngsennu’in ti el khan chu a tuortu tadingin damna a umnaw deu anih. Hmangaina hin pumkhat in ami siem a, chu pumkhat nina chun ‘an hawi, a rinum le lungngai beidawng hai intuor ṭawm a, inthlamuong intuo dingin ami siem a, chu thil vêk chun ei ṭhatlai le taksa mar lai a ‘duot’inti ngawi ngawi ang khan Tarsie el ei ni hnung le zun le ek inthiel ei ngai pha khawm ‘duot’inti ran dingin a mi khitde tlat anih.

Standing right beside her tonight
And I'm gonna be by your side
I would never leave when she needs me most
I'm forever keeping my angel close

Vawizan zan thim satak hnuoia hin , I kiengah ngirin I kiengah um ka ta. A sie a ṭha, an hawi le a rinum a khawm ti a, intiem hnung kha bawrsawmna lei chau hin a mi mamawlaiin inkiengsan theinaw ning. 
Hiengang hmangaina hi anih khawvelin a mamaw a a zawng rawp chuh. Hi hmangaina ngei hi annawm Pu Edward khawmin a ditlai thlawibuong kha alo inhlan. Hmangaina chun rosum le neinungna a ennaw a, hun ṭha le hun khir ah a danglam chuong bawk nawh. Khawvel in inphatsanin diriem sienkhawm hmangaina chun a kuongkuo tlat hlak. Chuongang ni talo a, an hawi le hlimna huna chau ‘ai laf iu’ei inti chun a kawk a bo taluo deu ding anih. Hmangaina chun hmangaitu le hmangai a thlungzawm a, mi pahni ni hlak kha, mi pakhat a pahni (2 in 1) ah a siem ta hlak a, rinumna, harsatna, lungngaina, beidawngna, hlimna le lawmna inṭawmza dingin. Hmangaitu hmangai a zawng a, hmangaina an hlan hlak ang hin, hmangai khawmin hmangaitu chu ringumna alo intiem ve hlak. Hi hmangaina a ringumna ngei hi anih Khawvelin a zawng a a beisei tlat hlak chu. 

Hmar Rûn,
Ni 15 THLATUN (April) 2014

Ziektu: H.zate, Hmar Rûn

A hungna hrietlo le an ṭanna hriet ni bawklo, hringnun suk tâwitu le Hringnun parvullai sukṭuoitu hi nunrâwng tinaw tu’m um anta. A tobul hrietnaw angin a tawpna hriet ani bawknawh. A pieng le murna hril thei umlo, an siengna le a seilienna hril thei um bawklo. A thubul ka hrietnaw a, Grik(Greek) tawngin a tobul ka hrietnaw ang bawkin Latin tawngin iem ani ka hril thei bawk nawh.

Mihriem chu Thi dingin a pieng a,hring dingin Thi a ngainawk si. A piengni chun a khatin a ṭap a,a sunghai po hlimin an innui a, a thini ruok chun a sunghai an ṭap ve thung hlak. Aw Thina nunrawng kher hi chu aw ! tiin Patling khawm a suk ṭap rawng rawng hlak chu ani hi.Hun bi bek chu nei sien eilo inring thei ding an’a,sienkhawm hunbi chu hrillo, a hunnaw khawm a nei sinawh. Naute, naupangte, Tleirawl, Nunghak Tlangval, Nupui Papui, pitar Putar chenin a vai hma el si. Naute ani leiin a mannaw biknaw a, Naupang ani leiin a hla chuong bawknawh. Tleirawl khawm an suonaw a, Nunghak le Tlangval ṭhalai anni em a tiin a kut a sâwp chuong naw a, Pitar Putar vuoi tahnung ti lei ringawtin a kut dei chun a tawknaw chuong nawh.

Mihriem hi Hmangaina nei a siem le lainatna nei ei ni lei mani mi an hang thi hin hun hi ei ti theinaw a, a thi hun chie ah a thi anih eiti thei ngainawh. Damdawiin Pakhata ‘Lawmna Ward’(Nau neina ward) a chun nau nei dingin Nu pakhat an phur lut a, a hnung chawmkhat a chun ṭapri a hung inri chêlchûl el ta a, Naute ṭapri aninawh, puitling ṭap rawl anih. An naute pieng chu dam zoloin a thi a an ṭappui anih. ṭhenkhat tading chun ‘ienga an dawn hman khawm la nilo’ ti dingin a um sienkhawm, anni chuongchun anti nawh ‘aw, ava hunnaw de, I Nu nenetui khawm ne hmanloin maw I liem nawk el, Fammuol-ah hmun I chang ve awm sinaw a!!’an ti a, Hlamzui a thi ani kha an tuorpui em em anih. Hlamzui tho, mitthi pangai a tiem hman silo hai an hei thi nawk a, ‘aw, Fammuol b6ek hei chang hman la, I ruong chunga ṭaphla bek inzawt thei lang’anla tifan a, Naute dang an thi nawk a, chuong ang bawk chun ‘Kan hlimna le lawmna tak I ni hlak vei le maw?!’ an ti nawk hlak. An hung leikang a, Naupang ti thei an hung ni a, ruollai a khawm a hmelsie pawl khawm ni haisien an sunghai chun a hun takah a muol a liem an tithei chuongnawh. ‘hung puitling hmanla aw’anla ti fan tho. Ṭhalai an thi leh sungkuo nghakfak annia eiti a, Nu le Pa an thi leh sungkuo innghatna tak anna An ṭhanglo a sungkuo a hei um el ding chu eiti nawk a, pitar putar thi hun ngawi ngawi a thihai hlak sungkuo anal uoplum a eiti nawk a, natna khirkhan invawi bawrsâwm em em Khuotlangin ei nghawk pui el ta hai khawm hi an hei thi meu chun ‘imi la uoplum a, I ṭhangnaw chun sungkuo a re awm de’anla tit ho I sawn naw.
Thina kher kher hi chu ana ni ngei atih, Inzaum Pi Nienglawmkim meu khawmin

Chungturni le Sawrthlapui hai khi
Hun mi hriltu an tling zonawh,
Hrilthiemin mi hrilhai sien chu
Hieng ang em hi ka ringnawh.
Aw, ana a na ngei ie,
Ka ditlai rohlu chân chu,
A neitu’n I laknuom pha chu
Chelthei tukhawm an umnawh.
Tiin alo inkiu pui rawng rawng a, chuelchu ala ditawk le, Pathien rorelna ani ti ahriet a, pathien sêl ni a ṭi si,
Ka phal lulnawh an sakruong
Buonlei chang ding chu,
Lal rorelna ka sêl chuongnawh,
Hring ramah ka la châm si chun
La chengpui ka nuom anih’

Ani ngei, phal thei di’n a mawinawh, an parmawina chuoia pil an hei inchang el ding chuh. Sienkhawm, Lal rorelna sêltu ni ṭi takin ‘ Ka la dam si hin chu la chengpui ka nuom anih’ tiin ngenngawl takin a ngen ani kha. A ti mama ilo ti ani khawmin ka demnaw che, ‘Bu khawp tal a ei faklai chun ṭamsawl rinumzie ei hrietnaw reng anih’.Ṭhenkhatin Thina nunrawng chu Hmelma anga hmu thei nisien sat sawk sawk ka nuom anlo ti ve tho annawm ‘ Hnam ka len nuam mang e,Hmuh theih se doral ang hian, Awmlai lianin hringnun par mawi,Vul lai a thliak ta mai si a.’tiin a hlaphuok ah an zawt kha.

Thina hin Mi Hausa le rethei a thlier hran naw a, angkhat rawngin a en hlak.A nuom huna chun dam ṭha lai tak khawm a hmet hlum a, ṭul atinaw chun damnaw thi el ding dinhmun a um khawma hmethlum nawk chuong dêrnawh. Iengkim hi a ngai a chun a hun ani a, mihriem hunbi sût angin a sût ve nawh. Miin an ngai le ngainaw ah a buoinaw a, mi inro le inronaw ah a buoi venaw bawk. Chuelkhawm chu ala ni le,a sûntuhai lungril ding khawm a dâwnpui chuongnawh. Hmar Hlakungpui le Hmar ṭawng sukhringtu Pu Thangngur ngei khawmin hienghin alo inzâwt kha,

Ka lawmna par-ang an thliek tah,
Ka ngaihai thina’n a ṭhuoi tai e,
An sulhnung Khawtlang ngui ahin,
Ṭapin Kei Ka la’n vai ie,
An fena ding chu Ka’n nghil theinaw ie”

Khawvel hi ṭhena ram ani a, inṭhe ding seng eini ti hre inla khawm thina hi chu a tuor antak anih. Sienkhawm, hlunlo ram a hin ch6eng zing thei eini sinawh. Hring dingin thi a ngai si a, chatuon ramhlun tieng pan eini leiin ei pan ram chu tlung ding le Hringna thar nei dingin ei thi a ngai anih. Thina hi tawpna aninaw a, sandamtu’n a buotsai ram, ṭhenawna ram ei luttheina dinga kawtkhar pawimaw ani lem.

Pi Runchawng chun ringna mit a thlirin

Kan lengna thlalêr maksanin,
Van Jerusalem inhawiah,
Iengtikam hung tlung vêng ka ta?
I chatuon pielrâl ramah,

Alo ti a, chuelkhawm chu dittawk loin,

‘Aw, Ka ngai inṭhenawna ram inhawiah,
Hringna tui a luong,
Sandam nauhaiin an dawn,
Kumkhuo hringna an chang

Tiin van Jerusalem tlung kar a nghakhla thu an zâwt ve bawk a, Pastor S Lienrûm chun ,

Ka va ngâi ngêi, Ka va ngâi ngêi,
A hmun ropui a mawinahai nêkin,
Lungsiettu Lal Krista Hmêl mawitak chu,
Hmu Kanuom Ka lungkham bângna dingin,

Alo ti ve thung a, hieng an beiseiram an nghakhla em em hai tlung ding chun Thina hi a kawtkhar pawimawtak ani nawk si.

A tawp taka ding chun Thina nunrawng hi inṭhena rapthlak intluntu nisienkhawm, ei beisei ram ropui min tluntu dinga khawtkhar pawimawtak ani a. Chatuon hringna nei ding chun ei thi a ngai si anih. Thi na rapthlak ṭapna intluntu hi samdam nauhai tading chun Van Jerusalem intluntu ani lem si.

- Ni 15 Thlaṭau (March) 2014. http://www.hzate.wordpress.com/

ZIektu: Pu L.Keivom, Inpui.com Columnist

            India sorkar makna le dangdaina bik pakhat chu hnam hnufuolhai khum khawmna dinga arbawm lien tak el, a hming ‘Scheduled’ Arbawm a ta hi a nih. Hi Scheduled Arbawm sunga hin Hindu hnam laia a mong khawn le hnufuol po chu Scheduled Caste bawmah an khum khawm a; tlangmi hmel put, abikin Aryan le Dravidian thlaa mi naw po chu Scheduled Tribe bawmah an mi thun ve thung a. Chu indaidanna bang sunga an khum khawm po chu sorkar ditsakna dong bik dinga vochuom pawla mi hrilin, an mi sie bok a, chuong ang chu ni dinga inngaina khom chu lungril ruk takah ei nei ta hiel niin an lang.

            Khawvela ram tin hin hnam chekhnok le hnufuol an nei vong a, chuong hnam tenau le tlawm lem (minority) hai chun mani chi le hnam (tribe) hming an nei seng bok a, sienkhom Scheduled Tribe ti hming put ruok chu tu khom hre ngai naw ti nih. Scheduled Caste ti lem lem chu khawvel hmun dangah an um naw hrim hrim. ‘Caste’ ei ti hi Hindu sakhuo hnuoia chi pali-Brahmin, Kshatriya, Vaisyas & Sudra- tia inthre darhai chauh hi an nih. Chu taka a hnuoi hnung tak, mi sirsop le sorbawk, Sudrahai hai chu Scheduled Caste an tihai hi an nih.  Anni rawi Scheduled Caste hnuoia an sie hi a langa chu an hmakhuo an ngaipek leia an thaw khom a hoi khop el. Chik taka ei bi ruok chun, Hindu-a inthoka suok dok thei lo ding le an ngirhmuna khit de tlat an tumna ni lemin a’n lang. Sakhaw dang an zui vai chun Scheduled Caste-a inthoka suok doka ngai an ni leiin hamthratna an dong po po an lakpek vong el a nih. Chu hamthratna chàn chu inlâu leia kristien anga um, sienkhom a langa inti ngam si lo, mi ka hriet rawn. Hienga mihriem thlier hrang a, suok dok thei lo dinga hrèn a, ro rel khum hi Hindu thiempu chihai chemkalna zawng tak a nih.

Hnam changkang lem haiin nuom nuoma hnam hnufuol lem hai soisak a, an ram le in le loa inthoka an hlu suok nawna dinga veng him hi sorkar tin mawphurna a ni hrim a. British opna hnuoia ei um lai khan, eini tlangrama umhai chu hnam hmasawn lemin an mi hung chim nel nawna dingin dai an mi lo sakpek a, chu an dai sak chu Inner Line Regulations ti a ni a. Chuong chu ni naw sien, ei chengna hmun thra deu chu bu thleng khata Jakobin Esau nau lutir nina an chawkpek ang khan vaihaiin mi lapek zo tang an tih.

British-hai khan chuong ang chun mi lo humhal hai sienkhom, tribe po po aiawa tuta hming tlanglawn ei hmang tah ‘Scheduled Tribe’ ti hi an lo hmang ngai nawh. Ei hnam hming sengin an mi ko el a nih. Scheduled ripa an mi khum hnung ruok chun Hindu Caste laia hnuoihnung tak ngirhmunah an mi nam lut a, hnam hnuoihnung anga inngaina ei lungrilah an tu a, chânga awk chèpa, intâl suok thei ta lo dinga inngai anga inngai vena ei hung nei a, iengkim thawnaah, Scheduled Tribe kuata chauh chang phak dinga insiena ei lungrilah a siem bok a nih. Hi lungril hi ei thir khaidiet bun, ei thrangmawbawk pakhat a hung ni tah.

            Khawvela thil trium laia trium tak pakhat chu mani inngaihnuoina, mi neka hnuoihnung lem dinga insiena, mi thaw thei chu thaw thei ve dinga inngai nawna lungril, mi thluok tluk lo dinga inruotna hrim hrim chu a nih. Chuong ang dinga mihriemin a’n ngai sung chun ama le ama an ngai chen char kha a theina a hmang a, a bâk chu hmang a tum naw a, hmang nachang a hriet bok nawh. Chu lungril, Scheduled Tribe ninaa um tlat chun bawiah a mi’n tàngtir leiin, hi hming hi ei hrengkol bun, ei hrengthir kol a nih. Chu lungril chu a nih Tribal Lungril ka ti chu.

Competitive Exam-a Class 1 Service ei tling hnung hin SC/ST ta dingin ieng khom ditsak bikna a um ta naw a, mi tin angkhata en a ni ta vong a. Keini Foreign Service-a chu ST hai hi a fel pawl tak kan ni bakah ruol siema lem chu tu khomin an mi tluk nawh. Chuong sa khom chun, ST ei ni leia thiem naw bik deu dinga mi zuk ngai tumna hi an nei trawk trawk a, theidaum deu a nih. A fel naw deu an lo um khoma SC/ST an ni leia fel naw deu dinga zuk ngaithiem tumna an nei bokin ka hriet. SC hai chu anni Hindu laia hnam hnuoihnung an ni leiin le anni laia hnam chunghnunga inngaihai tirdak kai an ni tlat leiin, an ngirhmun chel chu Hindu huonga an um tlat sung chun ieng hang law ngaina rak a um nawh, thlak danglam thei a ni naw leiin. Amiruokchu, eini Hindu chi-hnam le inzomna nei der lohai, SC levela an mi sie tum tlat ruok hi chu  theida um tak a nih. SC hai anga mi thîm an tum lem chu theida a um nawk zuol. Hi hi ieng dang lei ni loin ei Constitution siemtuhaiin SC hai leh Hindu ringkol mi’n battir a, Fifth Caste ang ziezanga an mi khit de lei niin an lang.

            Hi chungchang thu hi tu khomin an ziek ka la tiem ngai naw a, ei chanchinbua lem chu a’n lang voi khatna a ni el thei. Amiruokchu, thu poimaw tak el, thirkola ei lungril le ngaituona an mi thlungpekna thil a ni leiin, chik taka ei bi a trul ta khop el. Scheduled tribe inti le Kristien inti dam khom hi hang ngaituo chet chun thil inhme lo tak a nih. Pathien naua insalhai nina ding khom niin a’n lang nawh. Iengkimthawthei Pathien nau le rohluotu ni sia Tribal lungril put zing chu thil intu lo tak a nih.

Amiruokchu, ei sakhuoa chen khom tribal lungril hi ei som lut a, mi tam lemin van ram khom hi tribal concession-a lut ei tum niin a’n lang. Bible College hmunkhata kai seng seng, eini rawi le vaihai hung inchuk suok hi an inthiem hlei taluo a. Hienga chen hin Tribal concession an lo pek hlak ni dingin ka ring. Chun, ringna sartifiket chauh leklama thilthaw thrang loa kristien ni ei tum a. India sorkara inthoka kuata le chawmna ei beisei ang bokin kohrana khom ram danga inthokin khel le tak inpolin kohran chawmna ding sum zongin ei inmai a, a kutdaw thiem thiem hi hotu hlawtlinga ei ngai an ni hiel tah. Isu khom hi a dik chie chun kutdawnaa hmaimalar dinga Scheduled Christ-a ei sie ni tain a’n lang.

Ei pi le puhai khan an huna chu tu khom huoisen takin, “I chawm sa kan nawh” tiin an lo hmasuon ngam a, an tri tak le rin tak chu mi chawm hlawma um a nih. Anni tawka intodel le mani thaw suok sa ringa khawsa an ni leiin an lungril a zalen a, tu bawia um khom an nuom naw a, an huoisen a, tu khom an lo cho ngam a nih. Taimakna, tlawmngaina, huoisenna, ringumna, inthuruolna le iengkima insomdawltuo a, “Sem sem, dam dam, ei bil thi thi’ ti pawlisi chu nun meisera hmang an ni leiin, kristien an ni hma dai khan kristien thra lem an lo ni dai tah a nih. Anni huna chu tala le chabiin hmun an chang naw a, piengthar trium khom an la suok bok nawh. An lungril khom dol hnaa van daidaw intling khawm anga thienghlim le fim a la nih. Chu chu a nih Tribal Lungril indik tak lem chu. Tu laia Scheduled hnuoia Tribal lungril hi chu bawi lungril, kutdaw lungril, suoka khom suok dawbol a nih.

(August 16, 2004)

Ziektu: Pu L. Keivom, Inpui.com Columnist

Milan, April 22, 1990, Pathienni tûk dar 10:30. Khuoin Pathienni inser ve nghal lo chu, Europe rama tlang hmingthang Alps tlangpui bawmtu sûm zun inzam vel chun a tlang thruta Lombardy phairuom hring dup el chu thla a zar khum a, Milan khawpuia khom ruo tehmer a phingphi seng seng a. Nipui sen vung hung inthok thuok lumin Delhi tlang a ur tran rek tah leia nupa inngai tak tak khom an inral en tran nawk mek tah laiin, Milan-a chu 5 degree centigrade a la ni a, pang lum thra koppuia kuol kuol chu mi hamthra an nih.

Lombardy State khawpui Milan, Italy hmar tienga an khawpui tak le a ram sunga sumdawngna le thilsiemna hmunpui tak, fashion designing tienga hmun poimaw tak hluotu, Paris meu khom lekhela khûmtu, Shakespeare tienamia hai khom inlang rop hlak, February, 313 AD a Roman Lalram sunga kristien sakhuo zalen taka zui le puong dar theina Edict of Milan an insuona, Consul General of India sin ka chelna hmun hi kan tlung thlakna ni nga chauh a la ni a. A hmaa kan chengna Rangoon (Yangon) le lampuia kan hung chawlna Delhi tlanga hun le sik le sa an thre dan le tiem dan le Italy-a an tiem dan hi an inmil ta naw tlat el a. Mediterranean Tuipui kam le a se vel hmar tienga um Italy le ram dang danga chuh thlasik December-a inthoka nipui May chen hi raw sur hun a ni leiin, eini hun tiem dana hril chun ‘fŭr hun’ ti ding ni awm tak a nih. An thlasik le thral hunah fŭr a tlung tlat si leiin ‘sikthralfur’ an nei ta bik a nih. Chu chu nipuiin a zui a, favangin a zui nawk a, sik-thral-fur a ni nawk el. Hi hi Italy hmar tieng a ni bik.

Ram hrang, time zone inang loa inson chu ei tlung hlim iemani chen hi ei taksa sana (biological clock)-in hun a mil thiem hma chun in hun le tho hun hi ei theinghil rop hlak. Zan dar 9 amanih ei ti laiin a chang chun zing dar 6 dam a lo ni daih a. Voituk khom ka hang thranghar chun zing dar 9:30 a lo ni dĕr tah a. Inhmaw takin ka’n siem sok sok a, zingbu khom bâr hman loin, Leonardo da Vinci ZANBU HNUHNUNG TAK chu kîl lem dingin ka driver leh Santa Maria delle Crazie (Church of the Blessed Saint Mary) panin kan suok a.

Hi biekbuk hi ka ofis kaina lampui sira um, kum 1463 AD-a an bawl tran, ropui le lien ve tak el, thingtlang inkhawmpui nikhuoa biek ina ei inbeng khawm angin inhnaw sip inla chu mi a sanga tiem ei inleng ka ring. Roman arkitek le Lombardian arkitek chokpola an rel a ni a, sienkhom chu chu a hming inthangna san a ni nawh. Khawvel hrieta a hming inthangna san chu hi biek in kot chang tienga fak le dawn an neina Hall (Refectory) a thil um lei a nih. Puo tienga inthoka thlir chun hall naran ve el angin a’n lang. A lutna kotkhar bul banga chun dar sen phek chikte-ah CENACOLOA tia ziek an tar a, chu chu Saptrong chun THE LAST SUPPER an ti a, eini chun ZANBU HNUHNUNG TAK ti-a ei inlet kawi nuoi a ngai. Pastor Thangngur chun ‘Ruoi Lungsietum’ tiin a hlaah a hril. Chu ruoi chu kîl ve dinga fe ka nih. Ka phŭr dan chu a namei nawh.

Tu khom indon chuong loin ka ring lût ve top a, Lal Isu le a zirtirhan zanbu hnuhnung tak an kil lai lim inziekna hmaa chun taksa ngeiin, iemani chen chu chang lo le thuok khom la loin, ka ngir ve tah a nih. A mak de aw! Suongtuonain hi hall-a hin ka lo ngir rop tah hlak a; a tak ngeia ka hang ngir ve zet chun suongtuonaa ka ngir lai nekin mang a hoi lemin ka hriet. Hi penting (painting) hi Zoram khawvela chu penting inlâr tak, a ziektu Leonardo da Vinci khom hi khawvela lem ziek thiem hmingthanghai laia Zoram khawvela hmun hluo lien tak le inthuk tak a ni ring a um. Zo hnathlakhai chengna hmun tinah hi penting thlalak hi an tar deuh fur a, pastor ina lem chu saser laia a mei ang a nih. Sienkhom, ei thil tar ropuizie le inthukzie hre phak hi ei um ngut di’m maw! A ziektu hming hrie lem chu mi tlawmte ei ni ka ring.

Hi penting (9m x 4.5 m) hi Refectory Hall hnung tieng banga inziek a nih. A ziektu Leonardo da Vinci hi khawvela lem ziek thiem hmingthang laia thrungna tlar hmasa hluo zing thei a nih. A ziek lai hin a talen a vul vanglai, a ngaituona khom Liendo se chi thra an hril ang ela a hnienghnar lai a nih. Chuong sà khom chun kumpui linglet iemani zat a buoipui a nih. Hun sawt taka inthoka a lo invoi tah ni sien khom, lekhapuon ngeia a ruongam ding drawings le sketches a ziek tran kum chu 1492 khan a nih. Mosie kuoma Pathienin biekbuk bawl dan ding a kipkawia a hril ang khan inhriettirna dangdai a dong ve ti ei hriet nawh. Sienkhom a lungril mitah a ziek nuom chu a chieng a, iengtin am a ziek suok zo ding ti chu a lungkham tak a nih. Kum 1494 khan a ziek tran a, kum 1497 khan a ziek zo trawk niin an hril. A mei mei naw khop el. Eini rawi tru bawla bawl chu a ni naw chieng hle.

Ngaituona mita thil hmu hi thuin amanih, hlain amanih, lem ziekin amanih a ni ang taka puong suok le tar lang a harsa ĕm êm a, chu chu penting-ah a ni nawkzuol. Thu le hlaa chun zalenna zau tak, lekha phek sei taka pot sei thei a ni a; penting-a ruok chu, chu zalenna chu phêk khat sunga khum le hmang thei chauh a ni leiin, thu laimu el khom ni lo, thu rilmu chauh phor lang a ngai a, chu chu a hautakna a nih. Leonardo khomin hi thu ropui ei hril hi a ziek lai chun, arpuiin fak le dawn khom zong loa chêr rak khopa a tui op kêu dinga a op ang elin a thrung chilh ve a. Voi tam tak chu ieng khom ziek loin, zĕl anga umin, a lem ziekna bang chu hmasonin to trokin sunnithlak a thrung hlak a; a chang ruok chun a hung vuot a, thai khat thai hni a thai a, a fe hmang nawk daih a; a thlarau a thok chang ruok chun fak le dawn ngaisak loin sunnithlak a thai mol mol hlak niin an hril.

A uluk bok a, a ziek tah sa khan a duthu a sam naw chun a chunga ziek thrat nawk el theina ding chi, rong chokpol chi khat a hmang a, chu chu lem ziek trong chun ‘tempera technique of painting’ an tih. ‘Tempera’ hi dannaranin lem ziekna rong le artuiteeng chokpol a ni a, a hul nghal bakah ziek suol a um khomin a chungah ziek non nawk thei a ni a; amiruokchu, tuihu kai le hip thei banga lem ziekna ding chun a thra nawh. Leonardo khomin chu chu a hriet zing a, sienkhom ziek thrat a nuom taluot leiin a hmang el niin a’n hril. Hi lei hin a hnunga hi penting humhal dinga beituhai lu a sukhai nasa hrim a, tu chen khom hin maktaduoi tam sengin an la buoipui ngat ngat a nih.

Hi penting-a hin Isu’n a zirtirhai zanbu hnuhnung tak a kilpui laia thil um, Johan 13:21-22 a, “Isun chuong thuhai a hril zo chun namên loin a lungzing a, ‘Thudik ka hril chêu hi, nangni laia mi pakhatin mi’n mantir a tih’ a ta. Tu tak am a ti bik an hrriet naw leiin an inen thrap a” ti a hril zo chara an barakhaih lai hmel le a nghong dan chu Leonardo chun a hmu dan angin, inthuk le inril takin, hi lemzieka hin a hung phor suok a nih. A hril tum tak a hril fie theina dingin zirtirhai kha pathum peiin a sie kop a, a laiah a fâlin Isu a sie a. Voi tienga inthoka chang tieng zawnga tiemin an thrungna hieng ang hin a rem a: Bartholomai, Jakob (Alfai naupa) le Andria; a dotah Juda Iskariot, Peter le Johan; a laiah Isu; a dotah Thoma, Jakob (Zebedai naupa) le Filip; a tawpah Mathai, Juda Thaddai le Simon.

Loenardo da Vinci (1452-1519) hi painter hmingthang el ni loin sculptor, architect, musician, engineer, town planner, mathematician, botanist, philosopher, inventor le scientist a ni a, mi ropui le hmingthanghai lai ama tluka ‘si’ hau hi an vang khop el. Khawvela mi hmingthang, talen hau, iengkim nei kim mihriem (complete man) ti-a an ko nuom hiel mi tlawmte laia pakhat a nih. Ri thangkhawk (sound wave) in mihriem na a tlung a, chu ri chun a hung suokna hnaizie le hlatzie zirin mi a nghong dan le chu chu mihriem hmêl le chêt zie-a a hung inlang suok dan a chîk nasa ĕm êm a. Entirnan, ri hlimuma lo pomtu chu ri thangkhawk chun a hmêl a sukhlim a; a lo pom nawtu hmel chu a suknǐm thung a nih. Inthlang rizal an hung puong a, a tling le tling naw hmel danglam ang hi a nih. Chun, ‘theory of natural sound’, ri thieng, ieng khomin la pol sop lo ri hung suok mizie le umzie nasa taka suiin a buoipui bok a. Hi a thil chik lei hin a hnunga piano key indik hnai taka an ngai, Halelujah Chorus phuoktu Handel-in a hung siem suok hi Leonardo da Vinci thil sui ra suok niin an hril.

Chun, thim le varin mihriem chetziea thu a hril dan hai, lungrila thil umin mihriem hmel le chêt dan a sukdanglamziehai le ri thangkhawkin mi a nghong nasat dan le nasat naw dan, a ri hretu kha a hnai po leh a nghong dan a’n rang a,a hlat po leh a nghong nat dan a zuoi a nih tihai a sui nasa bok a. Chuong a thil thlir danhai chu ZANBU HNUHNUNG TAK-a hin praktikalin an entir a nih. Chu thu chu a hnuoia hin ei thlir pei ding a nih.

Leonardo thlir dan chun, “nangni laia mi pakhatin mi’n mantir a tih” ti Isu’n a puong chara zirtirhai a nghong dan kha a’n chen naw rup a nih. Isu chang tieng le voi tienga inthrung hnaihai kha a nghong dan le an dawkan kil lai hmor tieng ve vea inthrung mi parukhai a nghong dan a’n ang nawh. Isu chang tienga inthrung hnai tak pathumhai- Johan, Peter le Juda Iskariot- ngirhmun, a pentinga inthoka a’n lang dan chun hieng ang hin a nih: Isu thu puongin Peter kha a thrawng thut leiin Isu kuoma indon chieng dingin Johan a biekruk nghal a, chuong lai chu Juda Iskariot chun poisa ip chel zing pumin, ringhla hmel putin a lo ngairuk kar a. Leonardo hin zirtir danghai po po hmel nêkin Juda Iskariot hmel le inthuomna chu a sukthim a, a sam a sukdum bok a, chu chun Iskariot lungril le ngirhmun awm chu hril fie a tum a nih.

Isu voi tienga inthrung hnai tak pathum- Thoma, Jakob & Filip-hai ngirhmun ei thlir chun an phâwk hle a, an inchawm tho zok niin a’n lang. Jakob-in bân a phar a; Thoma chun a kut chang tieng kutchal meuh Isu hmaa inhmuin, “Chuong ang mi tu am a na? Mi hril rawh, hang nuoi hrep ka tih” tia indon ni awmin a’n langtir a; Filip ruok chun poiti le lung na em em hmel putin a awm a dom a. An pathum hin a nghong nasa hle ti inhmai ruol a ni nawh. An mizie ang sengin annia a nghong dan a danglam seng a, chu chu a penting-a hin a suklang a nih.

Dawkan hmawr tieng ve vea inthrung zirtir mi parukhai ngirhmun ruok chu a danglam khop el. Voi tieng tawp taka inthrung hla tak Bartholomai chun Isu thu hril chu ngaithla chieng nuom ni awm takin a en phei ringot a. A dota inthrung Jakob (Alfai naupa) chun thu indon chieng dingin Peter hnung zangah kut voi tiengin a va kheu a. Andria ruok chun, “Kei chu ka ni teuh nawh!” ti ni awm takin a kut khing hniin a phar a. Dawkan chang tieng tawpa inthrung Mathai chun “To ta u, ei titi ei inhnik vieua chu ei hotupa thu hril chu hang ngaithla vak ei tiu” tia a thrungpui Juda Thadai le Simon chu hril ni awmin a’n lang a. Hieng zirtir pathumhai hi Isu tienga ngha pakhat khom an um nawh.

Isu tieng hang ngha thung inla. A mal a nih. A lungril mangang le beidongin a’n rum a. A hmêlah ‘lungngai le hmangai a luong kop’ a. A chana tlu tah chu thu awi taka pom nuomna le tumna hmei ei hmuh. A chang tieng kutpar a phar dan hi Leonardo-in chi hniin a’n entir a. Pakhat chu bei a lak ding lai ni awm a ni a; a dang chu a kut a lak kir lai mek niin a’n lang. Chu chun thil pahnih inentir a nuom khom a ni el thei. Pakhatna, a thil tuor ding chu hlen ngei dingin inpe sien khom, a thei hrăm chun a lungngaina no dom ding chu Isu’n “Pa, rem i ti chun hi no hi ka kuoma inthokin la son rawh” ti a nuomzie thu chu kut a lak kir lai lem hin a hril nuom ni thei a tih. Pahnina, nasa taka lungril mangang le inrûm leia sungrila tha sang rak a, ‘Takchapa!’ tia thrang lakna dinga kut a fŭn ru lai a ni thei bok. A voi tieng kut ei en ruok chun, a chana tlu chu thu awi taka pom hmak dinga a inpek takzie a suklang thung a nih.

A ziek thiem bok a, a lema inthok chun Isu le a zirtirhai inthrungna hnung tieng, tukver pathum le dawkan inkara hin hmun lien tak um ni awmin a’n lang a. Tak tak amanih sawna hang lut tum ve el a ol awm khop el. A penting ei hang tawk hlak chun bang sakhat el a ni bok si. Tukvera inthoka var hung lutin a khaw var dan ding le inmil chiein penting hi a ziek a nih. Chun, zanbu an fak hun hi kha hmaa Churachandpur vela zanbu fak hun standard time an hmang ve ni ngei a ta, nisa tlak hma a ni chieng ti penting-a inthok hin ei hmuh.

A hmaa ei hrl tah ang khan, Leonardo-in hi penting a ziekna ding hin ‘tempera technique’ a hmang a, chuleiin kum sawmhni hnung elah a penting hi a hung kak tran a. Kum 1726 vela inthok tah khan hi penting hi hum hrâm tumin mi thiemhai ruoiin an bei ngat ngat a. A threnin a rong inkhokna hmun kha riper tumin an ziek thra a, chu chun a penting hmel a sukhem niin mi thiem dangin an ngai bok a, a original painting ang chara indin thar nawk tumin, an ziek nonna rong kha sukfai vong tumin thrang an lak bok a. Kum 1947-a inthok khan hi penting hi humhal tumin beipui an thlak a. Leonardo-in rong chokpol a hmang ang chie hmang sia se mei mei lo dinga thaw dan an hmu suok thar bok a. Tuta an thaw dan tak chu an ziek belna po po kha sukfai vong a, Leonardo rong chokpol ang chie kha hmanga he penting hi tungding nawk a nih. Hi sin hi sin hautak tawp el a ni a, feet khat biel vel hruk faina dingin kum tluon a ngai. An zo fel pha chun Tuolte vanglaia an puon bal sawp fai an hril ang khan Leonardo kutsuok indik tak angin zanbu hnuhnung tak khom hi a la suok nawk el thei a nih.

Ka ngaituo a. Leonardo-in kum 493 lai liem taa ZANBU HNUHNUNG TAK a ziek lai khan eini rawi hi khaw lai am ei um a? A threnin, chu khom chu a changkang pawlin, siepsuop an la bi hun lai kha a ni hiel naw maw? An naw leh, a huoisen pawlin inhlieu tuma sum leivak an baw hun kha? Mihriem seng seng, kalchar ei nei inthuk dan inthlauzie ka hmu chang hin ka lung a se rum rum hlak. Einihai thiem ve sun hnâng them le tà ringot khom ei theinghil nawk zo tah a, arbawm ta thei khom ei vang phar el tah. Hieng ang thila hin ram le hnam hmasawnna ding ngaituo ding hin Bethel uor inla, ei hnam nun inhnok nuoi hi ei inthiel fai lem naw ding maw? (Originally written in April, 1990 in Mizo-Lusei and revised rendering in Hmar on Easter, April 20, 2014, Delhi. Perhaps the first ever piece on art appreciation published in Zoram khawvel)

By Prof Lal Dena*, Senior Fellow (ICSSR).

Ei mi hmasahai khan Sai Hla an lo phuok tan lai khan Sap hla (love song) thluk an lo hmang nasa hle. A bikin Pu Lalzova le Pu Vankhama lem kha chu an hla phuok po zatve deuh thaw kha Sap hla thluk an hmang ti thei a nih. Khang lai huna Sap hlahai kha a tha thei bawka, muong chata sak chi deuh vawng an nih. Entirna dingin hieng River of no return, Prisoner’s song, Be faithful darling, Whispering Pine, Bring back my bonnie to me, Moon on my pillow, Roses are red, my love hai le hla dang danghai kha hei sak chang khawm zung leh zam an fang a, Sap nunphung ruongama phuok ni hai sien khawm ei nunphungah laklut an hawih. Mihriem chu dumin ngo inla khawm, zie thlungpui ei intawm tlang a um a, chu hai laia mi chu khawsawt lunglengna le lusunna hi an nih. Tuta ei hla thlir let mek ‘Luah lo lungdi’ khawm hi a hma chun ei tuolto hla thluk reng ka lo sawn hlak a. Sap hla thluk hmanga phuok a lo ni ti ka hrietna a la sawt nawh. Sap hla ‘Waiting for me’ ti thluk hmanga phuok a lo ni zing. A hla original chang khatna chauh zuk tarlang vak ei tih:

Waiting for me, they’re waiting for me,

Oh what a glad meeting there’ll be;

Waiting for me, they’re waiting for me,

My loved ones are waiting for me.

Hi hla hi chu a sak an hawih bik a, a thluk hi an nem riei a, an sang taluo le an hnuoi taluo a um bawk nawh a, a sak khawm an hadam em em.. Pu Lalzo-in hi hla thluk kher a lo hmang hi a fuk bawk a nih. A hla hin Pu Lalzova le a ngaizawngnu chu kum tam tak lo inzui tah hnunga inthe thu, an sulhnung a hung fang nawkna thu a mi hril a. Iengleia inthe am an ni ti ei hriet thei nawh, ringthu hril ngawt naw chu. A phuoktupa hi Vairama lekha an chuk kar, a ngaizawngnu hin val dang a lo pawm san ni sien a hawih. An naw leh a nunghak nu le pa thawluina leia pasal a lo nei san el amani ding. Khuo hmun khata um an lo ni chun chengkawl rut, ai meiser sit, nga man, tingdawn khe, theipaling le sulhlu loa dam vawi tam lo inzui tang an tih. An naw leh, nipui chawl chang hlo thloa vawi ieng zam an lo inlawm ta ding! Ma thei loin Krismas thingphura khawm vawi iemani zat lo fe hmun khat tang an tih. An sulhnunghai abikin hmangaih biethu hrila an inhlanna hmun chu hun iemani ti hnunga a hei fang nawk a, suongtuona mitthlaa ka hei ngairuotna khawm hin kei chu kan tuizo tep a nih. Hieng ang hin chang khatna a hang inzawt suok ta phawng a:

Ka rawn fan leh hmana kan tuanna tlang,

Tuahpui leh vau an vul leh tah;

Kan sulihnu khuahrei an chang zo ta,

Hring leh thar hna nem ten lo bawm.

A fang hun khawm hi thal hun hung intan tir vel, thlasik phalbiin a lo sawr kawl thing le hna tinrengin der thar an hung insuo hun; intuo le vaibe par hun a nih. Hieng huna hin chu khawlai hei leng suok inla ser le saiserpar rimin a mi tuom vel a, parzu tlana khuoiva le khuoimu vuong ri ham ham dam ei hriet hlak. Ruomei a zing riei a, khawtlang lungleng lei ringawt khawma kur inkukna theina hun a nih hrim hrim. A hla thunawn tak tak hin ka lunglai a sun::

Tawnmang em ni lunglem hi ka nei lo,

Ka hawi vela, ka tawng si lo;

Zunleng erawh a cham tang lai a,

Luah lo lungdi nghil ni awm lo.

Mang amani tiin ama le ama an dawn a; mang hlak a ni awzawng si nawh. E khai! Khawvelah luo hin ‘Luah Lungdi’ nei le ‘Luah lo Lungdi’ nei hi tum an tam lem ding maw? ‘Luah lo Lungdi’ nei hi an tam lem el naw dim a nih? ‘Luah lo lungdi’ nei hai hin thu le hla an sukthlumin an sukhausa lema, literature sukburiptu an nih. Hi hmun lo sir vetu ka Pu L.Keivom bawkin thiem em emin Zoram Khawvel Vol.8 phek 234-na hnuoiah hieng ang hin a lo kawmen a: ”Khawvela inhmangaihna thawnthu lar berte hi luah lo lungdi thawnthu an ni. Shakespeare-a ‘Romeo & Juliet’ entirna fiah ber a ni awm e. Zofate thawnthu lar tak ’Zawlpala leh Tualvungi’ leh ‘Neilala leh Tuanpuii’ te pawh hi ‘luah lo lungdi’ thawnthu vek an ni. Engah nge khawvel mihringin heng thawnthute kan tuipui em em? Kan nun hlimthla, engemaw kawng zawnga kan thawnthu an ni vang pawh a ni mahna”.

Hmun fienriel, sawlhna phaa tu dip loa an inthungna hmun hi bulhlawng, lawnlei, senhri par le naubanhai par vul chukna hmun a nih a. Chuonga an inthung lai chun, an chunga sehri-nauban par loin nunghaknu samah an tawntir a: hieng hin a zuk insam nawk a:

Hmana chuan e a basam thlai mawi a,

Kan thliah sehri nauban a tawn;- tiin.

Makhat chauha hi hmun hi a phuoktupa hin a hung sir nawk a. An par vul hmasak hun ‘hmanah kha chuan’ a phuoktupa hin senhri par le nauban par thliekin a ngaizawngnu sam tla hniengah an tawntira. Tawng loin thilthawin hmangaihna phul liem an chen a. Hun hung inher peia senhri le nauban par vul hun a hung tlung nawk ngei a. Amiruokchu, tuta a hung nawk tum ruok hin chu a ngaizawngnu a um tah nawh. Hril a va haih de! Senhri le nauban parkung bula ngirin. chung tieng a hang thlira, a ngai bawkin senhri le nauban parhai chun tu pawi khawm hril loin an lo par vul nawk chiei a hang hmuh a. “Awi a!, tien lai ang kha ni sien chu, khieng parhai khi thliek ka ta, a sam tla hniengah ka tar nawk ding a na “ tiin mitthli pumin an ngaituo vawng vawng lem tah. Chuongchun, ama tawng lem loin, hieng hin senhri par le nauban parhai chu mihriem angin an tawngtir lem tah a nih:

‘Tuna erawh vul leh sang thing lerah

Thliah lo ten par vul tang’ an tih, tiin.

Kum sawt tak lo inzui ni ta si, an inthe el hi chu a na a nih. A phuoktupa hin chu a the phal lul nawh. An inthe tlat, mang amani a sawn leh, a tak a ni miu bawk si!. A phuoktupa hin tuor harsa a ti a, hieng hin a zuk inzawt suok nawk ta hlawl a::

Tawnmang si lo maw, kei zawng ka ring lo,

A mi tawna zamuol I liam;

Kumtluang kha chen kha sul ang ka zui sa,

Heti mai a, ka then tur chu!

Kumtluong kha chen lo inzui ta an ni leiin, nupa nun khawm lo hmang hmunkhat ta rawi naw ni ha’m. A manga chen in hmun khata inlawiin, an lo zal hmunkhat rawp a. A thangpha mang chauh a lo ni hlak leiin khum chul vel le an puon silhai zut vel el naw chu thaw ding dang a nei tah nawh. Hieng hin beidawng takin a zuk insam nawka:

Tawnmang lama kan zalna run dang lo,

Hai ang thang suihlung lam vai e;

Ka chul ruai ruai kan zalna laikhum hi,

Ka thle nem puan mai a lo ni.

Hi hla hi a that vei leh, Mizoram tienga ei hlasak thiem haiin a chang tawp tak chang ngana hi an sak hmaih zie. A pawih ngawt el. A chang tawpna tak chu hieng ang hi a nih:

Ka zawng leh dawn ka thinlai lung damna,

Kan thliah thingsiri zar hnuai sawh;

A riengte hi tu zuna uai ang maw?

Piallei hi kei ka tan tahna.

Hi hlaphuoktupa hin hmu nawk inring ta naw sienkhawm a ngaizawngnu le sawlhna an phana hmun thing zar hnuoia a ngaizawngnu va zawng nawk a nuom hiel a. Va fe nawk sien khawm, thing le parhaiin an tuorpuina thu bak thu dang iengkhawm lo hril naw ni hai. A chan chu “piallei hi kei ka tan tahna’ a nih tah tho tho a nih. Tapin khawvelah ei luta, tap bawkin ei suok san ding a nih.

Thu kharna: Hi hla hi kum 1956 high school ka lut tan lai vela ka thluok computerah ka lo download daih tah a nih a; delete thei a ni ta naw leiin ka kutpar ka hriet chieng ang tawpin ka hriet chieng a nih. Pi H.Lalchawimawi’n fawn help hlepa a sak ka mobile-ah ka thuna, an khat tawkin ka play deuh ran hlak. Mi lo dem naw ro aw. Gospel Song-hai hi direct-a Pathien inpakna an nih a. Love Song (Sai Hla) hai hi Pathien thilsiem laia chunghnung tak le mawi tak inpakna le chawimawina hla an nih. Pathien thilsiem chawimawi le inpak chu Siemtu chawimawi ei nih. Chuleiin, love song-hai hi indirect-a Pathien chawimawina hla an nih.

(*Prof Lal Dena is a noted historian on North East India and he teaches at the Manipur University. This article is dated Canchipur, April 14,2014. You may contact him at laldenas@rediffmail.com – Editor)