Hmar MIL D.M. College-ah

Hmar MIL hi Manipur University le Assam University-ah B.A subject-a thang lo ni ta sienkhawm, College taphawta inchuk thei a ni chuong nawh. Manipur-ah chu Bethani College, Churachandpur College le Lamka College-ah chauh Hmar MIL hi lak thei a nih.

Prof L.Ruoivel Pangamte, Secretary, Hmar Literature Society, chun Principal, D.M.Collge, Imphal, kuomah Hmar MIL hawng dinga hnina lekha 23 Agust, 2010 khan a lo pek ta a. Kum 3 a niin Principal chun Director (University & Higher Edu), Govt of Manipur kuomah chu lekha chu a pek sawng a. Director chun chu lekha bawk chu Commissioner(Higher Edu.)-ah a thawn nawk a. May 15, 2013 khan Manipur sorkar chun Hmar MIL D.M.College-ah lak phalna chu an hung pek ta a nih.

Manipur sorkar tienga zo thawk khat ni sienkhawm, academic tienga thuneitu insang tak Manipur University phalna lak a la tul rawp a. Hi thu hi University thuneituhai kuomah intlun a ni hnung chun, D.M.Collge-ah Hmar MIL hawngna ding hin infrastructure huntawk a um am? ti’n Inspection Team tir an ni nawk a. Inspection Team chun D.M.Colllge-ah Hmar MIL inchuktir thei zirtirtu le DMC Library-ah text book khawm a um naw thu report an pek a. Chu report dungzui chun Hmar MIL D.M.collge-ah lak el thei dinga beisei chu van lera ra ang a hung ni tah. D.M.College-ah hlak chu Lecturer pakhat khawm ei lo nei der si nawh, MIL text book Inspection Team-hai hmu dingin ei lo sie bawk nawh..

Amiruokchu, beiseina khel tienga Pu David K.Zote, Deputy Registrar, Manipur University, hma thuoinain Director, College Development Council, MU-a inthawka file chawiin Pu Darliensung leh Prof H.Nanda Kumar Sarma, Vice Chancellor chu 25 June 2013 khan an van hmupui a. Manipur sorkar lekha no objection certificate le lekha dang dang an hmutir zung zunga, “First le Second Semester-ah Hmar MIL introduce el chu a rem naw maw?” a heih ti chun, VC khawm chun a remti nghal el tah a. Hmar MIL D.M.College-ah inchuk phalna chu Pathien le Pu David K.Zote zar lieu lieuva ei hmu a nih. Chu lai zing chun Directorate office, D.M.College le MU kara mani sum senga tlawmngaia tlan veltu Pu Upa Darliensung inpek zona khawm hi theinghil thei ding a ni nawh

D.M.College-a Hmar MIL chu hlaw bovin Prof Lal Dena le Pu Darliensung-in tuta session thara inthawkin an lo inchuktir tan nghal ding a nih. Anni thangpuitu dingin Imphala University le College dang danga ei Lecturer hai tlawmngai suo dinga contact mek an nih. (Source: Prof Lal Dena 29/6/2013)