Harsatna

By Dr Lal Dena, Inpui.com Patron

Harsatna hi kawng hran hrana inthawkin a hung um thei a; hieng pasietna, titna, thlaphangna, tlaksamna, hrivawihsietna, lusunna, hmusitna, endawngna, hlawsamna, neksawrna, sirdena, channa, hnawchepna, rinumna, sawiselna, ringmawna le a dang danga inthawkin harsatna chi tum tum a hung um hlak. Harsatna hi thlipui siruktlak ang hiel khawpa nunrawng hmel put hlak sienkhawm a dawngtu zirin malsawmna hnar a ni thei.

Dam khura thing le ruo chu an pupindawngin thli le ruo, a lum a sa an ngam tak tak ngai nawh. Tlakden nikang tenbarama thing le ruo ruok chu thlipuiin a nuom a ninga a sawplet hlak an ni leiin an fiek a tha bik a; thli le ruopui vanawnin an sawp nasa po leh zung thar an thlak rawn a, an det deuh deuh hlak. Hiengang bawk hin mi harsatna-a intuoi naw chu suongum a tling tak tak ngai nawh. Sahrang hliem suih ding chun pasaltha sahuoi habe le vunghling vawitam tuor tahnung chu muongpui a um bik. Dr. Rochunga Pudaite’n ‘ Suilung Phanglo’ a zieknaah hiengang hin a lo hril a, “Dannaranin beidawngna tuor ngaider nawtu chu mi suongum le inhnempui tlak a ni ngai nawh. Thlipui a hung hrang pha diriem um khawpin a ti hlak si a. Natna tuor ngai nawtu chun lusun a hnem bawk nawh, a zuolko thiem leiin lungkham a bang si nawh. Lawngpu vawikhat khawm thlipui la tuok ngai lo mi chu, khaw that ni chun suong um hle sienkhawm van a hung innim pha chun thlaphang a sukzuol. Thlipui le tuiliensang vawi tam tak tuok ta a, dama la um a, lawngkandara thung chu, chu ngei chun thanghmun siem a thiema, lawnga chuonghai chun an inhnempui hlak” tiin..

Harsatna hi mizie inlang fiena darthlalang thatak a nih. Mi dawi le mi huoisen, mi zawmthaw le mi tumru hrietchieng theina thatak a nih. Mi tamtak chu harsatna an tuokin chinlem nei lovin a zung phirtan ang elin a themin an them ngawi ngawi hlak. Chuongang mi chu khawvela mi lungsietumn tak an nih. An zawmthawa, an zuova, an sirbi an phet awl leiin harsatna phir thluka an um pha leh, thonawkna chang an hriet ta ngai nawh. An chanah lungawi theina tak tak an neinaw leiin an phunnawia, an chierinthluoka, utum vuok an hril ang elin harsatna chu an suktuonga thuo tamin an inbelsa hlak.

Chanin siet tieng a hung pan deuh deuhva, lungriem mithli pumin “harsatna popo hi ka chan bik ding a ni ta maw!” tiin an khek rawng rawng hlak. William Shakespeares chun vangduoinahai hi an hung tlungin a mal chauvin an hung nawh a, a kawp a thuoin an hung lem hlak a lo tih a; a tuor thiem khawm an tak hrim a nih. Pa awmkhauh tak tak khawm harsatna hmunah chu sikinhning tet angin an thu an hla dawn lovin an inthin hlup hlup hlak; an hner an sawi a, an zuolko ngun hluong hlak. Lal le pasie, mi hrat le hrat naw, mi lien le mi chin tuelkhawm harsatna`n a fie thei naw an um der nawh.

Harsatna hi sahuoi anga tawng le awmkhauhva nek chi a ni nawh. Sahuoi tawng ding chun vawikhat bek zupeng tawntir dawn ta le tawnlairang tawn ta ni a tul. Chuongang mi ngei chu sahuoi lungril le a hnung thlep dan hrechieng thei mi a nih. Thangsuo dingin sahuoi lukip lak a tul. Chu ding chun khuontevika thova lamsak lamthlang thul ner a, invawt, thangtham, ruopui, thlipui, riel le hling tuor a tul. Amiruokchu rinumna tam tak ner thleng hnunga sahrang a kap a, hnena hlado insama tlang a hang tlir zet chun Chawngtinler mitthli`n hul zai a rel thei ngai nawh. luongliem hlak. Khaw khat nunghak hmeltha dam chu a ta dingin bela suongsa a nih ringawt el.

Thangsuo dingin harsatna maichama inthawi bawk a tul. Chawimawina le lallukhumhai hi tu khawma awlsam taka hlawsuok an um ngai nawh. Rinumna hril senglo an tuok hnunga chawimawina le ropuina chu a hnia hni ni ta lovin, a peka pek an lo ni ta lem hlak. Vawisuna mi-le-nel kara thibe tam pawla ei ngaihai khawm hi harsatna tiem senglo le ekdura inthawka laksuok deuh vawng an ni. Harsatna hin mi a lo siem tha thei hle a lo nih. Rangkachak chu rawtuina mei a fe tlang rawn po leh a tha inhlir angin, mi harsatna fiea a um rawn po leh thangkhaw a thiem deuh deuhva, ruo a sur le ai ang, nisa a sa le thereng angin a lawm hlak.

Harsatna hnuoia thilthaw hrim hrim a awlsam a um ngai nawh a; amiruokchu an nghatna a detindova, a ra khawm a thlum bik. Harsatna-a zung la le hung seilien hrim hrimhai chu sawihning ruol an ni ngai nawh. Mi lien le mi ropui an hung ni hnung khawmin michavaih le chansiehai chan an hriet thiempuiin an chan an changpui thiem hlak. Hiengang mihai hi an ni, harsatna hmuna khaw eng inlang lo khawpa pika um chang khawma mi hnem theituhai chu. An thurawn le an thuhrilhai chun mi a hne bik hlak. A san dang iengkhawm a um nawh, harsatna le rinumna tamtak lo pal tlang tah an ni lei a nih.

Chuleiin a dawng thiemtu ta ding chun harsatna chu malsawmna hnar a ni lem hlauh. Mi dawikawlawk khawm mi houisen an nitir theia, mi an tumru tir thei a, beiseina thar a siem pek bawk hlak. Tuorselna le tumrunahai hi khawlai sikulah khawm inchuk thei a nih nawh; HARSATNA SIKUL-ah chauh inchuk thei a nih. Negro industrialist mi fel hmingthang pakhat chu London-ah inkhawmnaah a fe a; mihaiin a hawiher le a changzie an hmuin an ngaisang bek bek a, khawlai sikula seilien am a nih tia an indawn chun “University of Adversity” (Harsatna thiembuk insanga inchu8k a nih tiin a dawn hlauh. Hi harsatna thiembuk hi hmun dangah zawng a tul nawh. Mitin kai theina dinga khuonu`n a lo relbawl sa a nih. Mi thabo, mi zawmthaw, thazukinhrul le leplehanghai kai theina khawm a nih. Natna le rinumna mi ti sim ei tuok chun tuorselna inchuk ei ni zing el. Mi neksawrna, endawngna, hmusitna le sawiselna ei dawng chun dawtheina sikul an mi hawng pek a ni zing lem.

Damlai hringnun hi zalna khum rawsipara siem a nih nawh. Ansielawna hnuoiah um ei ni leiin harsatna pumpel thei a ni nawh; chuleiin iengang harsatna khawm tuok dinga kampeta thangkhawnaah hin hratna thar le beiseina thar a hring suok lem. I sinthawna kawng hrim hrima harsatna tlakbuoka I um pha pha leh ‘takchapa’ annawleh, ‘takchanu’ tia thang i lak chun i sinthaw ra hmuh nghal naw la khawm, hnena nun i chang tah zing a nih ti inhre rawh.