Hmar Students’ Association in rukru anga che hai a dem hle

HMAR STUDENTS’ ASSOCIATION

Joint Headquarters, Delhi

PRESS RELEASE

The 4th of July, 2013

Tv. Zacharia Varte, General Secretary, Hmar Students’ Association, Joint Headquarters, Delhi S/o (L) Lalhmingthang Varte, Shillong Hills, Rengkai, hai in inhuonna Rangva Dai haiah esel le deusawna thu hieng: DHWA A HRANA INKHAWM KAN DIT NAWH, LAST PROTEST KOHRAN, DHWA PALAI-INPUMKHATNA, AW KAN VAI RAM DELHI, DELHI DHWA CID hai rawng dang danga ziek ani el hi pawi kan ti takzet.

Hi chungthu a Hmar Students’ Association, General Headquarters in June 3, 2013 a thusuok a siem hi kan thlawpin, kan lawm takzet.

Hieng ang indiriemna le eselna thu zieka um hin, Tv. Zacharia Varte, HSA-ah a sin chel leia Delhi Hmar khawtlang le pawl binga inkhawmhai kara buoina chungthua mawphurtu in ni tira, a sung-le-kuo hai chen suklungnilo le sukmuolpho tum an ni ngei ni a hriet le ngai a nih. Chu el khelah, HSA hminga Hmar hnam ta dinga rawngbawlna sin thawtu hai diriemna le suk chi-ai tumna a mi ṭhenkhat thilthaw hi kan dem takzet.

Hienga indiriemna le ineselna hi khawtlang invawng dan palzutna khawm ani ti a/an thilthaw nuom dan a’nthawk hin a hrilin a tarlang. Rengkai khawpuia Khawtlang Ṭhuoitu le Nu-le-Pa inza umtak tak haiin hma la ngei bawk hai sien ti mipui hriettin kan ngen sa nghal a nih.

June 3, 2013 a Hmar Students’ Association, General Headquarters thusuoka tarlang ta ang khan Delhi laia kohran pawl buoina le inzawmin Tv. Zacharia Varte’n iengkhawm ama puolin hmalakna a nei ngai naw a, thuteplo haia khawm an hnamhnawi nawh ti mipui hriet dingin kan puong.

Chun, Hmar sunga roreltuhai khawmin hieng ang thil ditum lo, indeusawna le indiriemna hai hi a re nghal theina dingin hma mi la pek ngei hai sien ti mipui hrietin kan ngen sa bawk a nih.

Hmar Students’ Association, Joint Headquarters, Delhi chuh Delhi a Hmarnau hai laia pawl binga inkhawm le inlakhranna thu-ah, a thei ang anga hma la zawm peiin, khawtlang inpumkhatna le inthuruolna dinga a ngirna-ah la ngir zawm pei a tih ti kan puong nghal bawk.

Sd/-

(Lalhrietsung Sanate)

Secretary, Information & Publicity

Hmar Students' Association

Joint Headquarters, Delhi