HPC-D Press Release on Talks with Mizoram

PRESS RELEASE (July 29, 2013)

Mizoram sawrkar le HPC(D) palai hai chu July 18, 2013 khan Conference Hall, Tourist Lodge, Chaltlang, Aizawl-ah inbiekna nei a nih. Mizoram sawrkar palai thuoitu chu Pu Lalbiakzama, Joint Secretary (Home Department) a nih. Mizoram sawrkar tienga inthawk palai dang hai chu Ramthlengliana, SP, CID (SB), Lalchungnunga, Addl. DC., Aizawl District, Lalhriatpuia, Deputy Secretary (Home), David H. Lalthangliana, OSD (Home) le Laltanpuia Sailo (Interpreter) hai an nih. HPC(D) palai hai chu Pu LT Hmar, Working Chairman, HPC(D) in an rawi a; palai dang hai chu Lalchhanhima, Council Member, HPC(D), Lalthalien, (delegate), Joseph R. Hmar (delegate), Lalmuanpuia Punte (Spokesperson), Rohringa (delegate) le Remruata Varte (delegate) hai an nih.

Inbiekna chu Mizoram palai thuoitu Pu Lalbiakzama’n a keihruoia. Lalbiakzama chun HPC(D) palai hai chu lawmlutin inbiekna dawkan thataka an hung thang thei chu hmasawnna thatak ani el bakah inremna lampui le Mizorama Hmar hai ngirhmun siemthatna ding zawnga an hung pensuok hi a lawm thu a puong.

HPC(D) Working Chairman Pu LT Hmar chun HPC(D) memorandum chu Mizoram sawrkar kuoma apek zo hnungin HPC(D) Spokesperson Lalmuanpuia Punte chu hun an hlan sawng a. HPC(D) memorandum hi Mizoram Governor, Union Home Minister le Joint Secretary (North East, Home Ministry) hai pek anni bawk.

HPC(D) chun an memorandum a an tarlang angin July 27, 1994 a HPC le Mizoram sawrkar haiin Memorandum of Settlement/ Peace Accord an ziek chu lekha kawrawng anizie le Hmar hnam dam khawsuokna ding iengkhawm a kengkaw naw thu an hril. Hi lei tak hin HPC(D) chun MoS/ Peace Accord zieka lo um ta kha a pawmpui naw a nih an tih. Hi lei tak hin HPC(D) chun sin zo lo chu sunzawmin Mizoram a Hmar hai ta dingin India danpui hnuoia Hmar Autonomous District Council, Sixth Schedule dungzuiin a ngen a nih. HPC(D) thil phut hi Sinlung suok Hmar nau hai ta ding el cho niloin Mizoram sawrkar khawmin an tangkai pui intawn ding ani thu fumfe deuin an hril.

HPC(D) chun a thil phut le inzawmin Hmar nau hai chu Mizoram a inthawk inhrangna an zawngnaw thu an hril sa bawk. Amiruokchu, India danpuiin a phal ang hrimin Hmar nau hai chu hnam ang le pi le pu hun a inthawk an del ram chu mumal taka sawrkarna le inthuom a hma an sawn nuomna leia an hmalakna hi a puitling ngei a tul thu an hril bawk. HPC(D) chun Hmar tawng, culture, literature, Hmar hai del ram le aram sunga rohlu hai humhal leh democracy indarzau theidan umsun chu Mizorama Hmar hai ta dinga Hmar Autonomous District Council indin chu a nih an tih. HPC(D) chun midang, hnam dang hai anga hmasawnna sirbi sir ve ding chun Hmar hai ta dinga district indin a inthawk an tan a tul a nih an tih.

HPC(D) chun Mizoram a Hmar hai ta dingin politics a chanvo Hmar nau haiin an dawng ding ang hrim an dawng hma khat chu inremna tluontling um thei ngai naw ni an tih. Hmar nau haiin politics a an chanvo ding an dawng hma khat chu indikna khawm um thei ngai bawk naw ni an tih.

HPC(D) chun an thil ngen a puitling theina dingin Union Government of India le Government of Mizoram haiin fumfe nawk zuola hma an hung lak dingin an phut bawk. Tuta tum inbieknaa hin HPC(D) chun hienghai hi an phut:

1. Mizoram a Hmar Autonomous District Council indin ani vat theina dingin ‘tripartite dialogue’ – Union Government of India, Government of Mizoram le HPC(D) tan vat ni rawse;
2. Hmar Autonomous District Council chu India danpui hnuoiah, Sixth Schedule huom sungah ni ngei rawse.

Inbiek pei naa chun Mizoram sawrkar tienga palai hai chun July 2013 a tawp el ta ding Mizoram sawrkar le HPC(D) hai inkapchawlna le operation hrim hrim siehrena (Suspension of Operation- SoO) chu pawtsei dingin nasatakin ngenna le phutna an hung siem a. HPC(D) tieng ruok chun inbiekna in lampui mumal tak le tak inningna a kengkaw naw chun SoO hun pawtsei chu thil tul le tangkai ani naw thu an hril thung. HPC(D) chun Hmar hai ta ding Mizoram sawrkarin “political solution” inzaum tak a riruong naw chun HPC(D) ngirhmun chu an phet el naw ding anizie an hril leiin inbiekna chu stalemate/deadlock ngirhmun alo tlungpui hrim a nih. Hmar ram, Hmar hnam ta dinga kan ngirna le kan inpumpekna chu intawlkirpui nawng kan tih; hi hi HPC(D) ngirhmun ni tlat a tih. Hmar haiin politics a kan chanvo chu kan dawng a hun ta el bakah a tul tah.

HPC(D) le Mizoram Hmar Welfare Committee hai chun Mizoram sawrkar, Governor of Mizoram le Centre hai kuoma ‘joint memorandum’ an pek bawk. Mizoram a Hmar mipui le pawl tum tumin HPC(D) hotu le palai hai uorsun taka an lo lawmlutna le fak le dawn ditsak taka an lo siemna chungah HPC(D) chun lawmthu a hril bawk. Ei ram, ei hnamin hmadawm lien tak a nei chu Pathien ropuina dinga ei sukpuitling theina dingin tlawmngaina insanglem insuo a, inthuruol taka kal chawi pei dingin HPC(D) chun Hmar mipui hai a ngen takzet a nih.

(John F Hmar)
Secretary, Department of Information & Publicity
Hmar People’s Convention (Democratic)