INPUI: Hmar News & Info

Ziektu: H.K.Kawllienthang, New Delhi

April 13, 1919-a Amritsar-a insamna (Amritsar massacre) leia India mi tam tak an kap hlum hnung khan, Mahatma Gandhi chun Kumpinu sorkar rorelna chu ringzo nawna nasa tak a nei tah leiin, “Sorkarin mipui tam lem ai a aw lai chun, mipuiin sorkar rorel chu an ringzo a, roreltuhai khomin a ram ta dingin rong an bawl hlak. Amiruokchu, mipui tam lem ai aw zo ta loa ringumnawna le hleihluoka an chet pha chun, rorelna khawla inthrunghai khom ringumnawna le hleihluoka chetna hmangruoah an inchang hlak” tiin a ngaidan a lo hril a.

Eini ngirhmun khom hi thlirna tukver hrang hranga inthokin hei thlir inla, ei thruoituhai hin mipui ai an aw zo chie am, mipui tam lem dit danin ro an rel chie am ti dam hi ngaituo a, bi chienga sui a hun ta hle niin a’n lang. Mani insekhêk băk chu politics mumal khom ei nei ta bek naw a hoi khop el. Thruoitu ei nei naw a, hotua inngai ruok chu sir tinah ei inthrung khup el. President, Chairman, Secretary etc tieng ei hausa. Hnam thila hotuhaiin politics-a ei ngai sun chu MLA/MDC election bak hi umin a’n lang nawh. Mimir khomin politics-a ei ngai chu MLA/MDC election hai chauh ku hi a ni el ta awm ie. A tlinghai hlakin inzor runpui ei thaw laia an sum seng po po bakah inzor runpui nawka an seng ding zongin an inlap a, ram le mipui ta dingin sor hman an ni nawh. Politics umzie hi sei taka hrilfie khom a trul nawh. A tawi thei ang taka Dictionary in a hrilfie dan chu ‘Ram inopdan ngaituona’ a nih. Ei ngirhmun hi Mipui rorelna a ni chie am ?

Kohran mi le sa hai khom “Kohran” umzie-a hin tam tak ei chieng nawh. Pawl (denomination) hi kohran sawnin pawl (ICI, EFCI, RPCetc) hmingin nasa takin rong ei bawl. Eini Krista hnung zuituhai, ama ringtu, a min tlansuok le suola inthoka ami ko suokhai ku hi Pathien kohranhai chu ei nih ti khom hi hre lo tam tak ei um. Pawl hminga ei inkonahai hi Pathien kohran indik tak ninaah ei ngai ta lem ni sien a hoi. Kan kohran/Pawl chu mipui rorelna a nih tiin ei uongpui a, mipui tam lemhai dit danin roreltuhaiiin ro an rel chie am ti ruok chu ei ngaituo lem nawh. Pathien ram lienna ding nekin mani kohran/pawl lien le inthrangna dingin thrang ei lak nasa lem ni ta-in a’n lang bok. Kohran inthruoi danhai khom hi Mipui rorelna a ni chie am? Inbi chieng a trûl tah khop el.

Bible translation hmasa haiah inlet suol a tam taluo leia hienga buoina ei tuok rop am a ni ding? Trum khat chu kohran thruoitu pakhat hin Hmar Christian Fellowship Delhi a Naupang Sunday sikul haiin Bible (Delhi version) naupang an inchuktir lai a hmu chun, “Kha Baibul, ei thuring kal translation kha in inchuktir a ni?” a ti a. Naupang Superintendent chun, “Keini hlakin thra kan ti vei leh! An leh Pu, nang hi version hi i tiem ta?” tia a hei indon chun, “Ka la tiem nawh” tiin a don, thilmak tak chu a nih. Hieng hi thil um dan a ni leiin, kum za kristien ei ni hnung khoma ‘kohran’ umzie hrilfie dinga ei beramhai ei la khal khawm hi thil mak a ni nawh. Ei beramhai nuizatbur ei hlaw am? ti ruok chu ngaituo tham a tling.

Chang inlar tak Isai 28:16, Efesi:2:20 le I Peter 2:6-7 hai a mi Saptronga “Cornerstone” ti, “In bawltuhai lung hnawl ngei kha, a kila lung pawimawtak a hung ni tah”(BSI) tia ei inlet dan dam hi ei thaw suol niin an lang. Trangkaina nei loa a kila ei sie mei mei a ni hrim chun, ei ngirhmun chu nghet ziezang ding a ni naw hrim a nih. Oxford Advanced Learner’s’ Dictionary-a Cornerstone umzie a hrilfiena chauh hang en inla:
1. stone that forms the base of a corner of a building, often laid in position at a ceremony
2. (fig.) thing on which something is built; foundation.
In thra le ropui bawl ding chun, a bulthrut remna dingin, in neitu chun hnuoi cho khurin, a in bawl ding rik dan le tlo dan dinga a riruong ang dungzuiin a cho inthuk a, chu khura lung hmasa tak, in do nghettu dinga a bulthrut lung a phum hmasa tak chu “Cornerstone” an lo tih. Efesi 2:20 a chun hi Cornerstone hi Isu Krista a ni thu a hril. A bulthrut, a poimaw tak, a kilhai po poin innghatnaa an hmang, iengkim intranna, ei ringna siemtu le sukfamkimtu Isu Krista hi a kila lung poimaw tak anga sie el hi chu an dik zan naw deu chu niin an lang. Thingrem kila lunghlu sie ang mei mei a ni nawh. In thrut do nghettu lung, in innghatna thrut kila phum lung leh Krista chu a hrilkhi a nih. Hieng ang hin I Peter 2:6 inlet ta inla ei thuring le khom inhme lem dingin ring a um.
“ 6.Pathien lekha thuin, “En ta, lungphum hlu tak ka thlang chu, Zaiawn bulthrutah (cornerstone) ka phum a; tu khom ama ring zotu chu, muolpho ngai naw nih” a ti si a.

Lung zuk hril taka chun, a ngiel a ngana Luke 22:41 “He withdrew about a stone’s throw beyond them, knelt down and prayed” ti Hmar tronga “Chun lung deng phak chenah, a tumin a va feh a, a dingthrathruona a trongtrai a “ (BSI) ti le “Chun lunga deng phak chauvah a tumin a va fe a; chun a dingthrathruona, a trongtrai a” (BFW) tia ei inlet hi zuk bi vak inla. Thil hnai, hla lo hrilna trongkam a nih. Literechar trongkama chun ‘simili’ an tih. A hmasaa ‘lung deng phak’ ti hih trongkam indik lo a nih. Lung chu ama le ama indeng thei a ni naw a, a dengtu a um a ngai. “Lunga deng phak” ti chu indik lem mei a tih. Amiruokchu, patlingin lunga an deng phak le naupangin an deng phak chin chu inang naw hleng a tih. Tlangval lung deng hrat takin a deng phak chin dam lo ni sien lem chu, Getsemani huon kha deng khum daiin, Kidron va ral khom a phak el thei. Chuong a ni chun Isu kha Getsemani huon puo tieng a trongtrai a ngai hmel a nih. ‘Ni khat lam, ni thum lam’ ti ang deuh a nih. Threnkhat lam lawn hrat deuh ni khat lam chu threnkhatin ni thum an aw thei. Chuleiin, “An kuoma inthokin hla lo te-ah a fe hrang a, dingthrathruonin a trongtraia” tiin lo inlet inla chu a fûk lem el thei.

Hieng thu tlawmte ka hung tarlang hai hi, tulai thrangthar mithiem le thruoitu la hung ni pei dinghai a cho suok thei tak duoiin tina lei a nih. Bible hi hnuoia ei um sunga hmang dinga ziek a nih, a sunga thu umhai hi hre fiea zawm hi Pathien dit dan le thiltum niin an lang. Vanrama hlak Bible hmang a ngai ta awm si nawh. Chuleiin, Bible translation indik tak nei a, a’n khat tawka revision nei zing hi eini kristien hai rongbawlna ding tak pakhat chu a nih. Ei tronga Baibul ei nei phuisui dungzui peiin ei trong le ei literechar khomin hma sawn a ta, ringna tieng khom thutakah ei hung inthranglien deu deu ding a nih.

Ei trong hi eini darthlalang a nih a, a pasie taluoa ngaituona khom a hril suok zo nawh tia siem thrat le sukhmasawn ei tum naw chun, ei trong a bo ruolin ei hnam khom bo veng a tih. Trong danghai la lut a, trong thar cher suoka sukhmasawn hi ei mawphurna a nih. Tulai thrang (present generation) haiin ei ram ei hnam ta dinga baksamna tam tak nei puma thil ei thawhai hi nakie thrang la hung thar pei haiin ei baksamna hai hung hruk bit a, ei kalpen hung rem dik a, ei ram, hnam le kohran an mi hung thruoi ding hun hi nghakhla a um takzet a nih.

Chuleiin, thlirna tukver hrang hranga inthokin ei ngirhmun pal lai hi thlir ei tiu. Ram le hnam inrelbawlna kong hrang hrang, politiks ni leh, kohran ni leh, thiemna, sumdawngna le hmasawnna thil kong tinrengah mit thar le na thara thil en le ngaithla a, hma tieng pana kal chawi ei sunzom nawk ve chu a hun tah an naw maw?

(June 21, 2013 Delhi)

Ziektu: David Buhril

Tulai hnai el khan Hmar Literature Society (HLS) hai inkhawmnaah ka sangnu trum hnih zet ka thak inlon a. Literature Society-hai intuok khawm le inzom chun ngaituona tam tak a chok tho a. University-a ka kai laia ka ruolhai kha a tam lem chu literature inchuk an ni a; a thren translation tieng awn, a thren linguistic, a thren literature. Kan titi thruoitu tak hlak chu French literature, German literature, English literature, Dalit literature, Indian-English writings dam a ni tlangpui hlak. Anni-a inthokin French le German tronga ziekmihai kutsuok, Saptronga an inlethai chu ka lo tiem pha ve a; fak le dawn inhnik ei la fak ngai lo fak phak leh chu a hlutzie hril khi ruol a ni nawh. French le German tronga ziekmi threnkhat lem chu ka ngaizawng tawp thei nawh. English literature ruok chu voisun chen hin ka la’n thla thei nawh. Amiruokchu, khang khop khan ‘literature’ kan lo chai hlaka chu ‘literature’ hi iem a na ti ruok chu kan lo chai tlawm khop el. Chai khom ngaiin kan hriet nawh ni takin ka hriet. Kan inhlieuna dil tak kha a ni tlat a.

Literature hi iem a na? ti hi zawna olsam tak ni si, a donna chu khir deu a nih. ‘Thu le hla’ hang ti el chu dol hnaa tui ei sunga an tawl liem zut ang deu hin hrilfiena olsam tak chu ni mei a tih. Ei rongbawltuhaiin vanram kai dan ding banga an ziek dok ang el kha chu a ni naw deuin ka hriet. Hrilfie a harsatna san pakhata ka ngai chu literature hi ei nei le ei nei naw inkhi a harsat lei a nih. Ei nei ei sawn po po hi tet muk ta inla, antram mu tiet chauh ei tet suok thei a lo ni pal chun ‘literature’ ei ti chu ei lo nei ve chu a lo ni el dim ti chu Hmar literature khawvel ka lo hmu ve dan a nih. Pasal po po hi ‘pa’ an ni naw ang bokin ‘thu le hla’ po po hi ‘literature’ a tling thei naw a; tling ngai bok naw nih.

University tlang sanga inthoka Anglo-Saxon hun (450-1050 AD) pal tlanga Victorian Age khel tieng chena ziekmihai khawvel ei fang kuol thei lei ringot khan ‘literature’ hlimthla hmu le hriet el thei ding khom a lo ni nawzie chu ka hriet. ‘Literature’ khawvel inrilzie chu ei them le ei hmu tah raw’m ei sawn lai zingin mitdel ruol sai them a hoi ka ti hlak.  Political Science le International Relations- chu ka’n bŭrna, ka subject, a ni lai zingin, ka tiem zau naw chun ruol ka ban zo naw ding a nih ti ka hriet leiin Old English hun an ti-a inthoka Victorian Age hun sunga sap (English) ziekmihai ziek lem chu tiem hmai ka lo tum ngai nawh. A na chu ‘literature’ hi ei tiem rawn po leh ami domsang ruol ruolin ami suktlawm deu deu bok hlak niin ka hriet. Hi tak hi a nih ‘literature’ mawi dan le nunrawng zie ka lo hriet ve dan chu.  Chu thil hmu chiengtu William Wordsworth chun hieng hin a lo ti hrim a nih:

To me the meanest flower that blows can give
Thoughts that do often lie too deep for tears

‘Literature’hi ieng tak am ning a ta? ti ruok chu Johan bung thum chang sawm paruk fie hlek hlok ang naw deuin ka chai nuom a. ‘Literature’ chun ‘style’ amanih ‘zierang’ a nei a, chu chu hung hmang tum ve tlat ka tih. Tamenglong district-a pieng le kum iemani zat sikul khom ka lo kaina a ni a. Tamenglong chu Manipur-a khom ruo le thli tamna hmun a nih. Zan khat chu, ka naupang lai, ka puhai ina damnaw khum beta ka um lai le ka’n ngaituo bangbo lai takin thlisie a hung hrang hrep a. Raw pum lien tawk tak, tîngbăn bana an hmang chu a lo inkuokna a um a; zana thliin a hei mut chun faifuk angin a hung inri hlar hlar a. Ka voi khat tonhrietna a ni leiin mak ka ti a, a mi răp a, ka pang a sukza deu a, sienkhom ka ngainuom angreng bok si. Ka pute chun, “Thli a ni chu tie” a ti ringot a. Sienkhom, thli danglam, rawl danglam nei le mawina danglama inthuom, khawvel danga inthoka hung anga ngaina ka nei tlat a. Ka hriet ngai der lo tuin amanih rimawiin ami’n awi tum am a ni ding; an naw leh ami’n thrì tum am a ni ding; rimawi khawvel dang ami’n fangtir tum am a ni ding; khawvel danga umhai rawl ami hril sawng tum am a ni ding maw? Beidong rawl am beiseina rawl lem? Lawmna rimawi am khawsawt lungleng hla a rem?

Ngaituona le thuok nei ni awm takin ri pangngai ngor ngor a’n suo nawh. A chângin inhmaw le inring deuin, a châng ruok chun muong le innêm deuin a rem a. Chuong ang chun kan umna tlangbâwk, zan thimin puondum anga a’n khum dé tlat hnuoia chun ruo thram lo hlapui a mi rempek a. Ruopui vanawn sûr tum, sûm pik taka hung inkhai fuol khom chu hre fu mang loin, kawl inlep zuk zuk kara chun tîngbăn bana inthoka hmŭr inzum vur hung suok dinga ka ngai chu hmu tumin beiseina lien tak leh ka nghak a. Ka’n ring hma’n hmain khawvel dang daiah ka ngaituona chun ami lo thruoi hman a. Sim le hmar, sak le thlanga inthoka thli intuok khawm meu hai hlapui rem ri chu mihriema inthoka suok ni ta loin ban trawl chu hringna petu ni awm takin an hung inthuok hring ta daih a nih.

Literature chun a mawinaah inhoitirna (enjoyment) le ngaihlutna (appreciation) a fûn sa a; chun, bĕl chieng nuomna (analysis) le a nina ang taka puong suok chăkna (exact description) a fûn sa bok. Ei ti tah ang khan ‘literature’ chu hming inhril anga fel fai deua thumal pahnih pathum inhril anga inhril fie el chi a ni naw leiin ei fie zuol nawk theina dingin a zierang poimaw threnkhat chauh hei sui ei tih.

(i). Mawina (Artistic qualities of literature): Saptronga ziek ka ni naw lai zingin ‘art’ an naw leh ‘artistic’ ti chu ei hriet thiem dingin ngairuot el ka ta; ei trong chun hrilfiena siem a ngai hiel ding a nih. ‘Art’ thil hrim hrim chu mawina le thudik tarlangtu a nih. Chuong thilhai chun ei khawvel hi lo del sawt ta de hai sien khom mihriem mit le na, ngaituona le suongtuona them thei ding khopin a mawina phursuoktu/phorsuoktu a lo um hlak. Tîngbăn ban lo ngir trok trok ringot kha ni loin, khaw tienga inthokin am, ieng lampui hrawin am thlipui a hung hrang ti khom ni bok loin, mihriem mitin a hmu le a lo ngaituo zen zen lo rimawi mak danglam tak a hung siem suok leiin, chu mawina le makna chun mihriem le a ngaituona po po chu khawvel dang daiah an lengtir a lo nih.

Chanchintha mansapui ei pai puom luoi nia ei ngai ta hnung le inchukna leilawn ei hraw sei ve tah nia ei inngai hnungin sorkar sin insang thlazar hnuoia um chu thangsuo pielral kai anga hadam rong rong tah dingin ei lo ngairuot tawl ka  ring a. Chuong ang ngirhmun tlung phak tah chu a mimirin ei ngaisang bok a, tlung tumin ei inphu sup sup hrim a nih. Amiruokchu, chu ram lo zuon phak tah, a taka tonhriettu, zaipu L. Keivom ruok chun,

            Sappui run rem sungah kai a,
            Ziekfung chela truon rel ni tin;
            Lung a dam nawh, ningtel a na,
            Hai ang tar hma rêng a ol ngei.

            Zo tlang sangah va chuong inla,
            Singmit lĕnin thlîr vêl inla;
            Thrâl hna virthli’n a lĕn angin,
            Lĕn hmang a tih, lungkham reng hi

a lo ti daih thung a! Ei khawvel thara hadamna banga min huontu ding raw’m ei lo sawn kha hla phuoktu chun lung damnawna le ningtelna rip angin a hmu a, eini tlangram pa ngeiin ngaia ei lo nei tah Zo tlang sanga hin lungkham bangna ding a lo um lemzie mawi deuin a hril a nih. Chu chu mi tam lemin ei hmu dan le lo sui hlak dan chu a ni naw el bakah trongkam mawia inthuomtu lem hi chu vang tak ei nih.

Chuong ang bok chun, ‘literature’ chu mi tam lemin ngaia ei lo nei thil tam tak kara a mawina inphûm tlat, mihriem lungril le ngaituona them le sukchăng thei hmangruo, a zongtu le ngainatu ta dinga hmun tina hmu theia um, a ngaisak nawtu ta ding chun tawk zing khoma hmu thei tlat lo chu a nih. ‘Literature’ chun ei nun, mizie, tonhriet, histawri, beiseina, hmathlir, dawnseina le mihriem nuna thil tlunghai indik tak le ngainobei takin a phor suok hlak a nih.

(ii). Infuina petu (Suggestiveness): A pahnihna, literature chun mihriem suongtuona le lungril ngaituona keithoin, dawn sei lem dingin a’n fŭi hlak. Puritan hun laia hlami (poet) John Milton chun Setan a’n trongtirnaa “Kei ku hi ka nih Meidil chu” (Myself am Hell) a ti khan thudik a hril nek hmanin kha thumal pathum khan ngaituona kotpui a hong lien lem a; kha thumal pathum khan mi lungrilah infuina thu nasa takin a hril a nih. Chuong ang bok chun Faustus-in Helen hma bula “Hi hmêl hi maw lawng sang tel hawrkhawmtu chu?” (Was this the face that launched a thousand ships?) a ti khan donna a beisei naw lai zingin, an khawvel – pasalthra, huoisenna, hmangaina, inhlanna, inpekna, thratna (hmel) – zau tak ngaituo zom dingin a mi’n fui hrim a nih.

(iii) Tlo le dai sawt (Permanent): Literature chu a tlo a, a dai sawtnaa inthokin a hlutna inkhi thei a nih. Literature chu tloin a dai sawt ding a nih tina a nih. Ei thu le hla tam tak hi ei bi chieng chun voi khat bâk tiem le ngaithlak non tlak lo deu vong a nih. Ei phak chin a ni tlat leiin thangtlawma inhantaw trangkai naw nih. Ei kawl le kienga mi dang le hnam danghai tonhriet khom a ni ve tho. Mizorama ei unauhai dam hin thu le hla thar khawl thar thra tak takin an sut a, an khum a, an her suok zung zung leiin  thu le hlaa changkang tah vieu an insawn a, sienkhom ‘literature’ tling khopa tlo le dai sawt ding chu an nei tlawm ve hle. Ngaizawng nei thar am a ni, an naw leh ngaizawng thre thar lei ringot a ni si naw chun ei dithaiin an mi lo dit ve naw lei ringota ‘bazar literature’ hung inderhai hi an hril angin “thutak, hlataka khukpui tlak an nawh” an ti ang chu a lo nih. Zingkar daidawin nisa hmel khom hmu ngam loa a ral angin thu le hla, ‘literature’ tling lo chu a dai sawt thei nawh. A video a nal, an naw leh a CD cover a changkang ti ringot ang kha chu a lo ni naw deu a nih.

Rock band Drixian Empire-a drummer ka lo ni hlak a; professional deu lem chun kum thum le ti vel Jawaharlal Nehru University-a ka lut tirin sinin ka lo nei pha bok. Pathien zarin khuong le thu le hla leh University runpui ka lo inchawm hlĕn ve a nih. Ka profession (drummer) le inzom chun hla chu ngai rawn le hriet rawn ding a ni top el. Ka ngaituo rop hlak chu hi hi a nih. A hun lai khan chu Vai ruol hin insuk changkang deuin Dutch mi ‘Vengaboys’ hai an naw leh ‘BarbieGirls’ hai vel kha an invet chila chu an hlahai khan a mi kuoi naw thei taluo a, a hla rema thrang ve khom inzak a um lem hlak a nih. Ana chu Pink Floyd hai hla, literary trongkam takin ‘surrealism’ ze put, ei hang rem zet chu chatuon dâi-a phurrik thĕ thlak ang hielah kan ngai hun a tam hlak.

Ei thu le hla tam lem hi threnkhatin khirkhan deua nuhmei/nunghak an bi chipchier le bel chieng hnunga, “Ei en sawt deu deu a, a se deu deu” an ti ang deu hi a nih. Tuta inthoka kum nga an naw leh kum sawm hnungah lem chu tiem tlak a la ni tawl dim ti chu zawna lien tak a tling hrim a nih. Old English huna inthoka Puritan hun khel tieng chena belchieng dawl khop, thi thei lo ang hlola namdet, ‘literature’ lo siemtuhai malsawmna dong hi chu them theiin a bang le a ruo um naw sien khom a tlona le a daisawtna ruok hi chu thilmak a tling a nih. An kutsuokhaia inthokin Pathien hmêl lem chu hmu lo thei lo a nib ok. Hi hi a nih ‘literature’ ei ti chu.

(iv) Zauna (Universalism):  Literature ramri chu a zâu ding a nih; hnam dang, rong dang, ram dang le trong dang hmangtuhai khomin a mawina le a hlutna an fak thei ve vong ding a nih. Mihai ngaizawng dingin ‘literature’ hi hnaw lui thei a ni nawh; amaa a mawina le a hlutnaa inthokin mi lung a kuoi lem hlak. Ei trûl em tia ziek fawm, phuok fawm le siem fawm el thei khom a ni naw bok; chuong leia thaw chu tru bawl ang mei mei a lo ni nuom lem hlak. Pathien thlarauin a sukhring hla (gospel) tlawmte ti naw chu thu le hla einia inthoka suok, mi danghai dai ei va kănpui ngam chu ei la hau bik nawh. ‘Literature’ chu chuong ang sin ropui thaw dinga duong a ni lai zingin, chuong ang chun a thok thei si naw chun ‘literature’ rim le rong a tlasam hle tina a nih. ‘Literature’ chu mihriem thlarauin ziek a ni leiin, chu thlarau chu indaidanna dai bo dêrin a thok ding a na, a thok hlak hrim a nih. ‘Literature’ a ni chun “a chăng nawk tah”, ti ringot ni loin “a châng zing a nih” ti a ni lem hlak.

Greek, Hebrai le Rome hai chun ‘literature’ a hin an ram an hnam kal pĕn po po an lo hlu lut a; ram le hnam hma dom (ideals) inkottu takah an lo sie hrim a nih. Chu hma dom chu thrang la thar pei hai dom zui dingin ‘literature’ chun nasa takin a lo keihruoi a lo nih. Literature umzie le literature miin an lo hmang trangkai danhai ei en chun mi mal ta ding chauh ni loin, a ram le a hnam ta ding chenin nina (identity) le hlutna (values) petu dinga bulthrut (foundation) siemna hmangruo a ni hlak.           

Literature chu mi po po ziek thei chi lem chu an naw lai zingin, mi tu el khom a siemnaa ruok chu an lo thrang ve vong. Zeldin khawvel ringot ni loin, mi po poin an sungtuona inril tak leh an biekzin theina ding khawvel thar a ni leiin a namei naw reng a nih. Delhi University le India university dang dang hai khomin literature syllabus-a Indian English Writings an lo hlu lutna lem kha chu la sawt lo deu a nih; ka hriet phak ve. Tu lem hin chu Dalit Literature chen khomin university rŭnpuia khom hmun an chang ve ta pei a. A san tam tak laia poimaw deu pakhat chu India mi saptronga ziek literature hi university-a hlu lut a ni naw chun khawvel literary map-ah  India chu a nina (identity) poimaw tak leh a’n lang ding angin an lang zo naw ding lei khom a nih. Literature hmangin khawvel dang hai kuomah India khomin a rim dam, a rong dam, a rimawi dam, a zau dan dam, a boruok dam, a mawizie dam, sakhaw hrang hrang  hringtu sul hnienghnâr a nizie dam le thil dang dang an hriettir el chauh ni loin an ngaizawngtir ve thei dan a nih.

Literature ze poimaw deu pakhat ei tarlang chu a zauna (universality) a ni a; a zau em leiin khawlai khom, tu el khomin kholbing deuin an enkol chun theira fak lo ding fak ang ni mei a tih. Eini lem chu literature bulthrut ei rem tran ding chauh a ni leiin fimkhur a ngai nawkzuolin ka hriet. University tukver dak phakhai chauh inthĕnpui ding thil khom a ni naw leiin, hming hma le hnunga belsa ding nei der lo hai khomin ei literature bulthrut remnaah ei thawlawm thei ding a tam a nih. Old English huna inthok Puritan hun sunga ziekmi/hlami, an naw leh Irish, German, American, French, Chinese, Japanese le hnam dang dang hai an ziekmi/hlami hai khom kha literature inchûk amanih, University-a intât ngei amanih hai kher an lo ni teu nawh. Chuleiin, eini khom mi ‘naran’ haia inthokin ‘literature’ iengtin am phor suok thei ei ta ti chu a buona inbuon suokpui dan ding ngaituo a trûl a nih.

Goethe chun khawvel le mihriem hi a nina ding ang taka siemtu chu literature a nih a lo ti hiel a ni kha. Mi tlawmtehai hrizawla a’n chang chun fak khop nei ngai nawng ei ta, fak sawt ding lem chu nei kher naw mei nih. Chun, Hmar trong ziek kop dan le ziek kop naw dan ding lekhabu sawmruk pasari nei inla khom thu le hla tling ei phu suok si naw chun literature ti tlak nei chuong nawm ei nih. Miin an tlang le muol hai, ruo le thli hai, thing le vadung hai, nisa suok le thlavar zan hai, samsei le an innui ri hai, an khawte nun le tlawmngaina hai, ruol le lungdit hai, le thil dang danga inthokin literature an induong a. Eini khom chuong haia inthok chun ei literature induong dingin har thar nawk ei tiu. Ei ziek suok hma khat chu literature nei ngai naw mei nih.

(June 5, 2013, Bethel)

Ziektu: H.K.Kawllienthang
New Delhi Dated 4-6-2013

Sielmat, 11th February,1985 tuk, zingkar inhma takin Imphal Airport panin ka suok a, chawhnung thlanghera chun iengtik lai khoma ka la hmu ngai lo, India khawpui Delhi-a ngei chun ka lo um der el tah a. Ka tarpu L.B.Sinate in 390/9,R.K.Puram-ah ka’n nghat a. Ni 12.2.1985 zingtieng chun L.B.Sinate’n a Motor bike-in a mi phur a, Shastri Bhawan chen a min thla a, Ministry of Information & Broadcasting, Administration Section-ah sorkar sin zom ve dingin Joining Report ka pêk a. Kar khat sung zet chu ka sin ding an la ruot fel naw leiin, India Gate/ Boat Club vela thingbuk hnuoia inthrunga hun hmang chu ka sin tak a la ni hri. Kar khat hnunga chun Directorate General:Doordarshan, Budget Section-a thok dingin an hung sukfel a, Mandi House-ah ka’n son phei tah a nih.

Chuonglai chun Hmar nau, Delhi-a sorkar sin chelh, Hmar trong hmang chu 8/9 vel chauh kan la nih. Student, College le University a kai hai leh kan rengin mi 30 vel chu ni mei kan tih. Hmar trong hmanghai a hrana inkhawmna a la um naw leiin, Green Park-a Biek-in, Mizo inkhawmah kan inkhawm tawl deu tak. Chuonglai chun tu laia ei nunghak le tlangval tam tak sinthawna BPO sin ang hi a la um nawh. Private Company-a thrangna nei khom ei la um naw a, thrang thei a nih ti khom ei la ngaituo ngai nawh. Pa pakhat, Security Guard inrawitua thrang ve ti chauh naw chuh mi dang private company-a thok kan hriet nawh.

Hun a fe pei a, sorkar sin hung zom thar le student an hung pung a, chu ruol chun Hmar trong hmanghai a hrana inkhawm nuomna lungril a hung um a. September 1988 khan Hmar trong hmanghai po chu L. B. Sinate kuartar No.390/9, R.K.Puram-ah kan inkhawm a, chu taka inthok chun Delhi Hmar Christian Fellowship hi tran a lo ni tah a nih. Chuong lai chun L.B.Sinate chu Regional Director, Staff Selection Commission (SSC) sin chelin Guwahati-ah a um leiin a kuartar chu C.Thant Khobung-in a hluo lai a nih. Rênga kan inkhawm kim khomin Sitting room-a inleng tawk chauh kan la nih.

A tira Fellowship tran a ni lai chun, vision ropui tak nei le, a hnungah Hmar nauhai hi a sâng tel Delhi-ah la um ei tih ti ringna khom kan neiin ka hriet nawh. Sienkhom, kan inthuruolna tak le kan nuom tlang tak pakhat chu, Hmar trong hmanghai pumkhata um hi a nih. Hmarhai lai Kohran/Pawl tam tak a um tah a, Delhi-a ruok hin chu kohran/pawl hi indin ni naw sien, trong khat hmang po inthuruol le pumkhata Pathien chawibiek hi kan duthusam le kan nuom tak chu a nih. Delhi-ah Hmar nauhai ei hung pung pei a, Fellowship chun thuring le thupui nei inla ti a rot angin, Thupui dingin “Khawvel po poah fe unla, thilsiem po po kuomah Chanchin Thra hril ro” (Marka16:15) ti hi Fellowship thupui a hung ni tah. Chun, ICI Kristien Magazine-a Kohran thuring inziek chu a ni ang anga a Hmar trong siem thrat trulna lai hai, a thu sukdanglam chuong si loa siemthrain Delhi Hmar Christian Fellowship thuringa hmang a lo ni ta bok. Hi thuring hi Fellowship inkhawmah kum tin voi khat bek insam a ni hlak. Naupang Sunday sikul-a lem chu thuring chauh ni loin Baptisma-hai uluk taka inchuktir an nih.

Hmar nauhai hi Pathienin a chanchin thra puongdartu dinga a mi lo duong lawk hai chu ei nih. Hi Fellowship khom hi tlawm taka intran ni sien khom Lalpan a mi thruoi pei a. Pathien ram ta dinga thrahnem ngaia ringthar lak tum mimal iemani zatin Fellowship hi insaisangnaa hmangin rong an bawl a. A huhoa Fellowship in ramthima rong a bawlna hmasatak chu Shiv Vihar hmun hi a nih. Hi hmuna tuolpara (Open –air) inkhawmna nei hmasa tak ni chun, Delhia Hmar nauhai po po mi 50 vel kan fe khawm a, eini mi Doctor inchuklai hai (mi 5 niin ka hriet) chun damdawihai hung chawiin Free Medical check-up an nei a, a trul ang angin villager hai chu a thlawnin damdawi an pek a nih. Ei thralaihaiin ringnawtu hung pungkhawm, vai naupang trop tak tak hai hmai phi faipek a, an hnaphai chen an hruk faipek lai dam ka mitthlaa hin a la cham zing.

Eini lai Hindi tronga Pathien thu hril thei ei la um naw leiin Rev. Robert, vai Pastor chu ruoiin Pathien thucha hrilna a nei a. Pastor amanih Evangelist amanih khom la nei zo lo, hienga tlawm taka rongbawlna ei intran ni sien khom Pathienin Delhi khawpuia rong ei bawlna hi mal a sawm a. Tuhin chu Shiv Vihar kohranin anni puolin Nepal-ah Missionary an chawm der an tah. Chun Hmar Christian Fellowship Delhi khomin Pastor pahni (2), le Missionary pasari (7) lai Pathien thrangpuina zarin a enkol mek bok. Uttar Pradesh, Mainpuri le hmun dang danga ei rongbawlna hai khom Pathien zar chauin a la fe tluong pei. Pathien chauh ringsana Delhi Khawpuiah Biekin hmun ding vaibelsie khat le a chenve laia ei inchawk khom tu chen hin harsatna um loin EMI pek zom zing a nih. Sienkhom, Fellowship hin eini tieng suong ding le uongpui ding pakhat khom ei neiin ka hriet nawh, Pathien lunginsietna zar lieu lieu niin ka hriet. Unau inngei diel diela tu pawl kha pawl ti um loa lungruol taka Pathien ei chawibiek le a ram ta dinga tlak lo taka ei thawna hi Lalpan mal ami sawmna san ni takin an lang.

Hratnawnaah i thilthawtheina chu,
An langna ding hi i lawm a nih.

Khawpuia Fellowship hai hi, makhata ka lo hmathlir ve dan chu, ei ram tieng Pawl/Kohran-in nasa taka a mi thre dar tak leiin, unau laibung khom mani pawla mi nawhai chu inbe paw thei lo, hnam thila khom kohran tukvera inthoka thlirin, pumkhata um thei ta lo hai hi indin thar nawk dingin khawpuia Fellowship hai hi thrangtharhai laia inthuruolna le inpumkhatna chi tutu dinga Pathien ruotah ka lo ngai hlak. Hun fe peiah Khawpuia Fellowship-a ei thralaihai hi ei kohran le hnam thruoitu la hung ning an ta, chu pha chun, inthuruolna le inpumkhatna tlangsamtu la hung niin, Hmar nauhai inthre dar nei nuoi hi ei la’n dinthar nawk beiseina lien tak ka lo nei hlak. Pumkhata luongkhawmin, a hamda um loin, Hnam le Pathien ta dinga rong ei bawl hun ding hi nghakhla a um takzet a nih.

Delhi Khawpuia hung chuongkai mi tharhai khomin, hmunkhatah Hmar trong hmang hai po po inlawi khawm a, tu pawl kha pawl ti um loa Pathien ei chawbiek hi inhoi an ti seng niin ka hriet. Ei thralai pawlhai khomin inhoi an ti a, Pathien khomin mal a sawm a, Delhi khawpuia Kristienhaiin kum tina hlapawl inruolsiekna (competition) a khom 1997 a inthok khan voi 10 zet lawmman (lawmman pakhatna voi 8 le 1st runner-up voi 2) an lo lak tah. Chu chauh chu ni loin, ringthar tam taka belsain ei um bok. Tulai ei boruok inlumlet thrat naw lai khom ei Missionary-hai rongbawlna Pathienin mal a sawm a, ringthar 24 lai tarik 5-5-2013 khan baptis inchangtir dingin an hung thruoi a, Pastor Lalsiesang-in a baptis tawl a ni kha. Khang baptisma chang dinga hunghai po po khan anni nuom thua Isu Krista hnung zui dinga inpe an nih ti District Magistrate kuomah lekha an pek a, an inhriettirna lekha kawpi chu an hung chawi seng bok. Pathien kuomah lawmthu um raw se.

India ram Khawpui haia Hmar Christian Fellowship hai chauh ku hi Hmar nauhai inthuruol taka tu pawl kha pawl ti um loa Pathien rong bawl le ei chawibiek tlang theina um sun chu a ni el ta awm. Tulaia “PAWL” thlipuiin a mi hung not hi, a siemthra theitu Pathien kuomah, Hmar nauhai inpumkhata, inthuruolna thra lem ei nei theina dinga hmangruoa inchangtir dingin nasa nawk zuolin hning ei tiu. (Delhi, June 4, 2013)