Sinlung Hills-ah (Part-IV)

Ziektu: Pu L.Keivom, IFS (rtd), Inpui.com columnist

Tough times don’t last, tough people do, remember? -Gregory Peck

Sakordai-Zilthaw

April 28, 2012, Inrinni. A hmaa kan prokram duong dan chun hi ni hi Tipaimukh-a inthoka longa Hmarkhawlien kan panna ni ding a nih. Amiruokchu, Sakordaiah kan la um zing. Zing dar 8 vela inthok suok ding kan ti kha ruo a sûr zing leiin kan suok el thei naw a. Kan tum dan chun Tuiruong kam Zilthaw kaiah fe thla a, chutaka inthok chun longa Tipaimukh tieng kai tung a nih. Zilthaw tlung hma hin Tuiruong zuk fintu Khawpuor vadung a um a, chu chun ruo a sûr rawn pha leh motor fe thei loin a dang hlak a. Darkar khat sungin chu vadung chu kan zuk tlung a, kan inlau ang hrimin a lo lien a. Darkar hni zet kan nghak hnung chun feet khat velin a kiem taa chuh kan driver thruoi khan a la hraw ngam naw rop a. Khuo an thim tran el ding tak leiin kan thuomhnaw seng phurin, ke-in kan lawn trèng tréng a.

Hla kan phak hmain, Senvon-a inthoka Tipaimukh-a mi lo tuok dinga kan inchà thlàk Lalchunghnung leh kan intuok a, kan inthuok huoi el. Tipaimukh-ah ni hni zet a mi lo nghak hnungin, kan inlang el ta si naw leiin mi zong dingin Zilthaw-ah a hung thlak a. Chutaka chun a mi la hmu ta naw rop leiin, lampuiah harsatna kan tuok palh ringin, kea hungin a mi hung zong pei a nih. Pa tlawmngai thei, ram le hnam invoi le hmangai, Sinlung Indigenous Peoples Human Rights Organisation (SIPHRO) ta dinga Hmar Biel aiawa a kûl a tâia thok le a khawl lipui a nih. A lua inthoka a kepâr chen hi thä-in a phan sip amanih ti ding khopa pa hrât, tungmitlika khom quintal (kg 100) khat phur vawk vawk zo a nih. A bu làk khom a thra; bu fâk rawna inel dinga cho el chi a ni nawh.

Hù hnêpa iemani chen kan lawn hnung chun Zilthaw an ti hmun chu rala inthokin kan zuk hmu thei ta a. Hmun dang ang boka vadung kama long chawlna le a se vela mi chenghaiin châk le khorsaw tinreng an lamna hmun chu dawr burip tak tak umna ni chêk dinga lungrila ka lo suongtuo le beisei khah a letling daih a lo ni chu tie! In nèk hmana rabok hoi lem pahnih a um a, pakhat chu a thlang ela vadung pang, Khawpuor vadungin Tuiruong a zuk finna lai chu a’n khat tawka a chim dur dur zing leiin, hmun himna lema son dingin an lo thriek lai mek a nih. Hi hmun hi Vanlalau le a sungkuohaiin an nghak a, in le inzoma hotel an siema chun thingpui sen dawnin, an artui but kan sehme a. Hi hotel hin hming a nei nawh; hotel um sun a ni leiin hming nei khom a ngai nawh.

Khuolzin fe le hung an suokna le lutna kotsuo a ni leiin Zilthawa hin ieng lai khomin long hmang ding a um zing a. Kan zuk tlung zan khom hin long pali inthlung a um a a, long neitu le khaltu chu Vai-Hmar-Mizo deu vong an nih. V.L.Auva hai sung le long pakhat neitu Hmar-Vai, a hming Ravi an ti chu Baibul (Delhi Version) bu khat ve ve kan rochung a, an hmang trangkai ngei kan ring. Thilpek laia hlu tak chu Baibul inpek niin ka ngai, chatuon hringna thu chuongna lekhabu a ni leiin. Hi Baibul hi Pathienin nasa takin a hmang a, hmun dang danga kan rochunghaiin malsawmna an dong thu an mi hril hlak a, lawm a um thei hle. Darlonghai khawpui Darchawia lem chu an Rorelna Inpuia an Baibul hmang tak a ni tah.

Zilthaw kan zuk tlung tawma ka ngaituonaa thil hung inlang chu, kum sawm chuong liem taa Rengkai mi, thu le hla sukhmasawnna dinga thaw hlawk èm èm, H.Thruomte lekhabu buotsai Zosuokthruom (Pastor Suoka) Chanchin (1999) ti ka tiem kha a nih. Chu lekhabua chun sumdawngna dinga Zilthaw ram Tuiruong kama Suoka serhlum huon siem thu dam, a siem hmaa chuong laia Borsap (Superintendent) N.E.Parry (1924-28) chu Tuivolsuoa a’n zin le a riek thu le Suoka le an inbiekna thu dam, Borsap-in huon siem theina lekha a pek thu le a huon hmun ding enpui dinga Borsapin Circle Inspector (C.I) Laldin a hung tir hiel thu dam, a serthlum huon thratzie le hlawkzie thu dam a chuong bakah hieng lai biel, anni rawiin ‘Tuisuolral’ an ti tlat hi Mizoram Synod-in a ngaisak tawka an hriet naw leia kum 1959-a khaw 14 zet Independent Church of India (ICI) a an lut thu dam a ziek a. Chuong thu vel chu ka ngaituo suok a. Kum 80 lai liem taa thil tlung khom ni sien, ngaituona lêng vêlin Suoka serthlum huon umna lai ding awm dam chu a dap a. Khâng hun laia nek hman khan an ngirhmun hi a tla hnuoi tah lem am a ni aw? ti lungrilah zawna a hung inlang bok a. Hieng thil hin ngaituo a suksei khop el. Mihriem hi hnungtol thei a lo ni takzet el.

Zilthaw-Tipaimukh

Unau hmelhai a ni ta a, ruo a sûr hmer hmer zing a, Tuiruong khom a lien sap pei a, tui so but butin Zilthaw kai a hung nèk dan khomin zai a daw ta naw a, va pang a nèk chim ri chu lipuia lung lien tak tla ri duk angin hriet ding a um zing. Hieng lai hmun, tuizangkhauh intuokna hmun hi a nèlum naw bakah, tui a lien insang pei chun, Tipaimukh tieng pana fe tung chu thimtham hnuoiah a him naw thu an hril bok leiin, a’n rang thei angin kan intawl suok a. An long hmang, a hminga ‘launch’ an ti ve hi Maldives laia ‘dhoni’ an ti ang chia buher khawl engine, a ri se èm èm inbêka an khal ve top el a ni a, hnung tieng le hma tieng elvartu ding var a nei nawh. Ratu-a kan chawl truma kawlphekhawnvar (torchlight) ka’n chawk chu kan hmang trangkai khop el. Chuonga buher khawl le minit sawmli lai kan inrùm tung hnung chun Ruonglevaisuo, Tuiruong le Tuivai infinna, Vaihaiin Tipaimukh an mi lo tipek chu him takin kan tlung tah a nih.

Kaia chun Tuidung vai ruol rawl ri a so nak nak a, a ram neituhai rawl ri ruok chu hriet ding a um mang nawh. Tui an ting hma hmana hieng hi a ni chun, tui an ting hnunga thil la hung um dan ding chu hisap ngam khom a ni nawh. Sum hmu theina awng um taphot chu anni rawi hin taima takin an hruk bit vong a nih. Ram pilril, Mauchâr lampui sira an thing thra po po âta zor hlawk dinga la khawmtuhai khom anni rawi bok hi an nih. Eini rawi chu, ieng ni bar lo, zing le zana fak ding zong fawmhai khomin, thaw nuom chin le thaw pei chin ei nei khanglang hlak. Hlawtling ding khopin teirei ei pei naw tlangpui bok. Intlansiekna khawvela hin, Pathien tak be loa ei hrilhai hi ei hnot phak tlat naw sung chun, pathien lêlo betuah an mi ngai a ni khomin, hang inthiem naw el thei an ni nawh. Mani le mani invoi pei si loa vai ramthim invoi pawlhai hi rorelna hmaa an ngir pha, iengtin am inhril hlîp an ti aw? ti zawna dam hin ka ngaituona a dêng rop chu tie! Chu chu Pathien rawl am Setan rawl? Eini le eini ei invoi hun chu thawlawm bawm inthèp châng chauh a ni el ta naw maw?

Tungmitlik

Thil harsa chu, longa inthoka suok a, vapang pil hnawng innâl èm ém, sirbi khom um lona hraw a, a chunga khuo pan tung kha a nih. Iengang pheikhok hnuoi inthap, ha thra le ngei khom bun inla, pilpokin thawklekhatah a ha kâr po po a hnaw bit vong a, thè thlak el thei a ni si naw leiin, lam pok le innâl chu sneaker ha thra leh khom law ngaina hrim a um nawh. Kelawnga fe chu ni inla, kepui le kepar hmawr bêkin pil kha bìka inkom tàng thei a ni a; sneaker le ruok chun lampui hnawng le innâlah inkom tâng thei a ni nawh. Chuleiin, za tam man seng kan pheikhok bunhai khan kawk a nei tlawm. Funghrol a trangkai.

Sawl fè tah hnunga hniek tin tiema hang kai tung kha chu, satel le intlon khom ni inla, “Tela, i fè hrat taluo. Damten. damten. Chèngkol hniek phawiin aw!” ti zing ngai chi a nih. Assam sorkar hnuoia Mizo Minister ni hmasa tak A.Thanglurin a chanchin a ziek, ZORAM POLITIC LUMLET DAN (Bel keh phuar khawm- tui pai thei lo) tia Lakher (Mara) rama an inzin thu, Lawngban pana an fena lampui intungzie a hril, “An kawng chhoh dan te kha han sawi tehchiam ngaihna pawh ka hre lo. Zahmawh hmawr rahbeh erawh kha chu a hlauhawm hle a ni. Hmun threnkhatah phei kha chuan kei ang pangkhing zeng phei hi chuan ka pum bawh chho ni ta berin ka hria (p.116 Second Edition, 1999) a ti kha ka hriet suok rum rum a nih. Tipaimukh tunga hin chu ruolpa nek hmanin hner sirde inlau a um ve thung a nih. Huihah!

Hnung kîr loa hma tieng nor tung pei na ná nà chun biek in hmasa tak, ICI Biek In umna chu kan kai suok ta hlol a, a tuola ina chun thuok lak malamin sawt naw te kan chawl a. Inrinni zan inkhawm an nei lai mek a ni a. Khaw lai khom fe inla, Hmar mi tamna khuo hriet theina pakhat chu inkhawm huna dar vuok ri le khuong ri insaikal nuk nuk a tam hi a nih. Hi khaw hlun, in 50 vel nia insâla khom hin dar ri le khuong ri a kat nuk el. Kohran pali-EAC, EFCI, ICI le UPC- an um a, insem ruol vong khom ni hai sien, kohran tinin in 12 seng, kohran member, nautê chena tiemin, 60 vel seng bak chu an chang thei naw hrim hrim.

Pathien ni tah ang inla, mani trânghma chit ngaiin mi hung dawr hai sien, ni tina an khawsakpui, an hnampui le unauhai ngei khom hmangai si loa an hmu ngai lo le hmu thei lo, kei an mi hmangai chu thil awium lo a ni si leiin, an cháng chàng chäng dinga ngaisak loa sie pawt pawt nuom a um chàng a tam ka ring. Kohran pawl rongbawltu ei tam a, Pathien rongbawltu ruok chu ei vàng. Mani thrangna kohran chauh indika ngaina nêkin Pathien thu hi thutak a nizie hrietna tieng chiengin a zawm tieng chieng zuol lem inla chuh, Pathien khom hi ei biek pop deuh ka ring. Ei ngirhmun enin, Pathien ringtuhai ngirhmun ni thei awmin ngaituona hmang tu khomin an mi ring thei ka ring nawh. Lung chauh sukphûr phak, sungril siem thra phak si lo ringna hin lemderna sikul chen chauh a mi thruoi tlung thei. Kan tlungna nu Biellienthang-in, “Churachandpur biela chu sandam kai ding mi ei tlawm taluo” a ta. David Buhrilin, “Ieng leiin am ie?” tia a’n don lèt chun, fiemthu-titakin, “UPC kohran mi an tlawm èm annawm!” tiin a don.

Kohran danghai donna khom chuong ang tho chu ni vong mei a tih. Mani kohran pawla mi chauh van ram kai dinga ring pawl ei ni deuh fur. Ei ringna hi pawla innghat le inthlung a ni tak. Ei inhèk tuona po po hi Pathienin poma a lo hnawl vong leia hieng ang ngirhmuna intâng zing ei lo ni palh a ni khomin, eini dawi sa eini bokin ei fak leia a ra ei sìk a ni a, mawsiet ding dang an um nawh ti hriet a thra. Inthlang hunah Pathien lawm naw zawng le Setan lawm zawng iengkim ei thaw ngat ngat a, inthlanga ei tling hnungin Pathien kuomah lawmthu hrilna hunser ei nei a, upa ruol le pastor ruol mipui hmaa an trongtrai vet hi Pathien ei hmusitzie tlâng hrieta ei puong langna a nih. Sim a thra. Pathien hi nuom nuoma hlèm bawl thei a ni nawh. Inthlang laia ei indawi tuona, fak le dawn ei thawhai po po kha ei inhnawm le inzun suok zoa liem hmang el tah sawn rawi ei tih. Kha inhlem tuona kansar zung khan a petu le fatuhai a zem khum a, na tak tuorin, ei ram le hnam le kohran a’n rùm a ni hi! Ei tù ra sìk hi khuorel, pumpel thei lo a nih.

Fam tah Pu Ngurdinglien Sanate-in a in a’n hlàn truma trongtrai dinga Rev. Lalngaisang a fiel thu le ama suma a bawl po nia a hril chauh Pathien kuoma a’n hlànpek thu an hril hlak hi, thudik a lo ni pal chun, enton tlak tak a nih. Inthlanga tlinghai hi kha hma khan ka hmelhriethai chu lawmpuina thucha ka thon hlak a. Amiruokchu, an hung tling dan thua ka chieng naw china inthokin, kum sawmhni chuong hi, tu khom lawmpuina thu ka thon ta ngai nawh. Ei thrangna pawl tieng a ni lei ringota thieng le thieng naw ramri nuom nuoma son hi Pathien thutak le inkal a nih. A ram le a felna hi khawlaidung amanih pawla zong ding ni loin, mani sungril sengah a um le um naw inbi chieng lem ding a nih.

Ruonglevaisuo

Tuiruong le Tuivai an infinna hmun hi a vadung hming tawp tieng ve ve la-in Ruong-le- Vai-suo (Tuiruong le Tuivai infinna) tiin an lo ko a. Mizoram tienga mihaiin Tuivai a luong suokna le a tawpna a ni leiin Tuivai Suo an lo ti hlak a. Chu chu Vaihaiin an lam thiem naw leiin ‘Tui’ ti kha “Ti’ tiin, ‘Vai’ ti kha ‘v’ an lam thiem naw leiin ‘p’ ria lamin ‘Pai’ tiin an lam a, ‘Suo’ chu Vai trongin ‘Mukh’ ti a ni leiin Tipai-mukh ti a hung suok a, chu ri ang chun British hai khan rikawtah an sie leiin ‘Tipaimukh’ ti hming hi a hung pieng tah a nih. Zieka a hung inlangna chu 1871-72 truma Vai Lien le 1873-88 inkara sorkarin dawr hong an phal hnung kha a ni el thei.

Kan tlungna nu Bieklienthang (a pasal Lallawmthang Parate, Village Council Chairman chu Parbunga an zin lai a ni leiin a inteknu hming ei lam a nih) in chawr tieng chun khawthlir inhoi tak el an bawl a. Chu khawthlir hmaa chun Ruonglevaisuo lung an phun a. Chu lungphuna chun hieng lai hmun an hluo tranna kum nia an ngai, 1450 AD chu an ziek kuou a. Hi kum hi khawlaia inthoka an sùt suok am a na? ti ka’n don leh ka lekha zieka inthok a ni thu an mi hril a. Ka hang ngaituo chun, Guwahati Hmar Christian Fellowship-in Gospel Centenary Souvenir-a HMAR TROBUL ziek dinga an mi fiel leia October 2009-a ka ziek, Hmar hnathlakhaiin Tripura an lut hun ni dinga ngai 1450-1500 AD ti khah besana an lo hmang ni dingin ka zuk ring a, a hnunga ka’n don chieng chun a lo ni hrim bok a. Pilat thukhawchang ang deuh khan, a zieka an lo ziek tah leh, thleng nawk thu a chêng nawh.

Hmar hnathlak hrang hrang, ‘Hmar’ ti hming a pieng hma daia Tripura, Cachar, Assam ram hmun hrang hrang le Manipur phai ruom chena lo inpem darhai hi a hnungin, kum 1900 lai bawra Linguistic Survey of India an hung thaw khan G. A. Grierson chun ‘Old Kuki’ ti hnuoiah a sie vong a. Chuong lai chun an inkona hming laia pakhat ‘Hmar’ ti khom hi a lo pieng ve hman tah leiin Old Kuki ti hnamhai lai a thrang ve a nih. Hieng Old Kuki hnamhai hi an inpèm dar hmain Ruonglevaisuo lai hi an lo cheng khawmna hmun nia an hriet seng leiin an chanchin suinaah hi hmun hi a ser laia a mei ang a nih. Manipura inpêm, entirnan Anal le Chawthe hai hi Hmar hming a pieng hma kum 300 vela lo inpem tah nia hriet a nih. Chuong chu a lo chun, Tripura tienga tla thla peihai khomin an lo hluo hun chu AD 1450 bawr vela zeldin chu histawri bawma thun sa thei a nina lai a um hrim a nih.

Ruonglevaisuo fe thlenga inpêm darhai hin hi lai hmun hi an Sinlung Pahnina, an hnam hrietzingna (national memory) zàma inphûm tlat a ni theizie thu entirna pakhat chauh hmangin hang hril inla. North Tripuraa um Ranglong (Langrong) mi hlui pakhat chun Ruonglevaisuo le a se vel, abikin Senvon ram hi mak khopin an hriet a, chu thu chu an khawpui Bagbasa-a Cultural Mapping thawa David Buhril le Ringum Khobung leh kan chàm ni May 26, 2011 Ningani khan bazaar thingpui dawrah ha hîpa an hril kan ngaithlak a nih. Hi lei hin, Hmar hnathlakhai po po fuon khawmna ding Ruonglevaisuo Cultural Meet chu hi kotsuoa ngei hin a remchang hmasa taka huoihot tum a nih. Hi hmun hi Old Kuki Group ta dinga an Hebron, an Makpela, an Sinlung, an Khurpui a nih. ‘Tuiruong’ khom hi an hnam chanchina dawithiem hmingthang ‘Lalruong’ hming chawia an lo phuok, ‘Lalruong Tui, Lalruong Vadung’ tina a nih. Chuong ang hrietna chu hnam tin thil hriet zingna zàma inphûm, an inthla sawng pei chu a nih. Saptrong chun ‘ethnic collective consciousness’ ti thei a ni ka ring.

Tipaimukh Dam

Ruo le riel le thlipui hnuoia hun, thä le sum tam tak senga Tipaimukh-a David Buhril le ka naupa David Lalhmingsang ka fepui san chu ka naupa-in BD Thesis a ziek ding lei a nih. Israel thlahai, Pathien hnam thlang ni si, an bawsietna leia an ram, an hmun le hmaa inthoka hnot suoka um rop hai tuorna le Tipaimukh Dam an bawl phaa hnot suoka um ding Hmar mihai tuor nasat dingzie thu chu thesis-a ziek dinga a thupui thlang a nih. A ziek tum si chun a ziek hma ngeia a hmun fang a, a mi chenghai inhmupui a, research a thaw chu ka ditpui lei a nih. Hi thesis hi ziek zo a ni pha chun, Tipaimukh Dam kakhawk nasatzie ding thu hi theological studies thawhai khawvel khomin hung hre ve a, an thlarau chauh ni loa an taksa khawsakna khom invoi phak sa ve a, an trongtrainaah sâm a, Israel thlahai sansuok hlaktu Pathien chu ko suok a, a mihai sansuokna lampui a hung relpek beiseina lei khom a ni bok.

Tipaimukh Dam ei ti vet hi a rî ei hrietna a sawt ta a, a hlawkna le hlawk nawna, a kakhawk thrat ding le siet dan ding, lawm ding amanih hnawl ding ti thuah ngaidan ei nei deuh fur ka ring. March 24, 2012-a ama bau thusuok ngeia mipui hmaa tu chena ngaidan la nei lo nia inhril, mihriem mak ka hmu um sun chu a biel aiawtu MLA chauh a la nih! Mani phak tawk ang sengin, mitdel ruol sai hmu an hril angin, Tipaimukh Dam hi ei hisap a, a threnin ei lawm a, a threnin ei dit naw a, ei hnawl bok. Zing le zana tru bawla zuk bawl zo el dinga ngai pawl khom ei um. An bawl trana inthoka kum sawmnga vela an zo thei chun an truonrang hle ding thu ei hril chun, “Chuonga ei thi hnung daia thil tlung ding chu, tuta ngaisak le invoi iem a trangkai a?” ti pawl chu a tam lem an nih. Chu chun ransa le ei la’n hnaizie, ei thil dawnin ei dumbel tong khom a la khêl nawzie a hril fie hle awm. Compensation ringot melkai, voi khat bu faka rohluotu nina zor nuom Esau le a lungril puttu, chongkor mit put, hlam khat khom thlir phak lo, hnam damna ding neka mani hlawkna ding hnot pawl, mi kanglanghai ruok chun bawl vat vat an nghakhla.

India rama Dam lien pawl tak laia mi ding a ni leiin, hi Dam-in kawlphetha a siem ding hi India ram ta ding chun malsawmna hnàrpui pakhat ni dinga ngai a nih. Sienkhom, hi Dam hin a rama chenghai ta dingin DAMNA intlun a tim? Tukver danga thlir pawl chun, hi Dam hi sietna rapthlak intluntu ding, mankhawng trium niin an ngai. India hmar sak ram hi ram naupang, a hnuoi khom la’n hnaw muk lo, lirhning tamna a ni leiin, Tipaimukh Dam-a tui intling khawmin rik taka a del pha leh a hnuoi hi inthawtin hung insiksawi a ta, chu chun a sè vela muol le tlanghai hi a sawi chim vong ding a nih ti chu hieng tienga chinchang hrehai ngaidan a nih. Chu phaa khawpui him naw zuol ding chu Aizawl hi a nih. Khawhrawngin tuiting a sawi chim pha chun, Tuiruong dung le a se vela khuo po po, Hmarkhawlien le Silchar phaia chenghai hi thawk-le-khatin Bay of Bengal tuipuiah lèn thlang a ta, Sûra thukhawchang ang khan, ‘Rengreng vadung’ ah liem thla diel an tih ti chu an thil hmu lawk dan a nih.

Chuong thilhai chu a tlung di’m, tlung naw di’m chu la siehre phot inla. Tipaimukh Dam an hung bawl phaa chimrala um hmasa tak ding chu a rama chenghai an nih. Aithing man a hung thra met a, sum fai chawi, vai sumdawng pahni pathum an hung leng lut hmana a ram phêka an chai buoi phak lai, a ram mipui nek daia tam sinthawtu an hung pha chun sum belpui khap kuo sipa hmepok inli luoua sa tlang khat thlak ang chauh hung ni tang ei ta, umzie nei tlawm ei tih. Chimrala ei um hnung chun meivar thra, sikul thra, hospital thra, lampui thra, constituency thra, ieng thra khomin umzie nei naw nih. Chatuon rorelna hmaah, ram le hnam ei zorna compensation poisa fûn truta ei ngir pha khom, ieng angin inhril hlîp tum inla, Juda Iskariot tangka ip peihawn khan thiem chang lem mei a tih. Ram inchawkna bekin an la hmang trangkai a ni naw am a ni?

Chuong thilhai chu lungrila pai zingin, April 29, 2012 Pathienni sunchangah longin Tipaimukh Dam an bawlna hmun ding tak le a se vel chu kan fang a, Sartuinek ram tienga vakam hrula chun hla fe kan intawl tung a. Kan hung kir nawk chun Tipaimukh kai, thral huna trieuphoa futbawl an petna hmuna an goal ban phun khom chu a chenve neka sei a lo chìm pil ta a, a tawpah a la chìm pil vong ding a nih. Chuong anga ram le hnam damna dinga goal ei lo phun tah po po Tipaimukh Dam-in a la chim pil vong hun ding ei ngaituo chun thä a zoi rong rong el a nih.

Hmun serh am lo ni ta,

Kan siengna Hmar ram hi?

(May 23, 2012 Delhi)