TU RA SÎK

By Zarzolien Keivom.

“Hlemin um naw ro, Pathien chu nuisaw chi a ni nawh. Mi tinin a tu ang char a sik hlak” Galati 6:7.

Abraham, Isak le Jakob hai chanchin ei tiem changin Pathienin mal a sawm dan le an malsawmna dong thu tieng pang hi mi tinin ei hriet nuom le hril nuom a ni tlangpui. Tuta truma tu ra sik le inzoma an chanchin ei hril ding tak ruok hi chu an thil thawsuol le an tu ra an sik dan iemani zat hril a, eini ringtu intihai hin ei ni tin nuna ei inveng fimkhur theina ding a tlawm a zawng bek hang phor lang ei tum a nih.

Pathienin Abraham a ko khan “Hnam ropui takin siem ka ti che a, malsawm ka ti che a, i hming sukropui ka ta, malsawmna ning i tih. Malsawmtu che chu malsawm ka ta, trongsie inphurtu che chu trongsie inphur ka ta; nangma zarin hnam tin malsawmin um an tih” tiin a hril a. A nuhmei Sarai kha a ching hri a nih ti hre zing sienkhom, hnam ropui taka siem ding le ama ngei khom malsawmna ni dinga thu tiemtu Lalpa Pathien chu a ring tlat a, ringum takin a zui a, sienkhom kum sawm lai an voi hnung khom chun a nuhmei sul chu hongpekin a la um chuong nawh. Sarai beidong chun a pasal Abraham kuomah “Lalpan nau a mi’n neitir nuom si naw a ka bawinu Hagar hi pawl el la, ama laka inthokin nau ka nei thei miel el rawi mawh” a ta. Abraham chun Sarai thu hril chu a lo remtipui a, Hagar chu a pawl a, a hung inrai a, sienkhom an rai ti a hriet char chun Hagar chun a pi chu a hmusit tran nghal el ta a. Bawinu-in a pi ngirhmun a hung hluolan pha tuorhla a um thu Solomon thuvara (30:21-23) ei hmu ang khan Sarai ta ding khoma Hagar hi tuorhla chu um thlawt a tih, tu ra sîk a ni mieu el si a. Nau dit luot luot leia Pathien hun tiem nghak zo lo nu Sarai thil thaw hi ama chauin a tuor naw a, voisun chena a kakhawk nasatzie hi hrilin a siek nawh; tulaia khawvelin a buoipui luoi luoi, Arab Muslim firfiek ei tihai po po khom ku hi an la ni pei a nih. Sarai ang ela Pathien hun tiem nghak zo loa mani remruotna le ditthlangna hmangtu mimal le thruoituhai lei hin ei ram ei hnam le Pathien kohranhai chenin ei tuor hi namen an ta naw niin a’n lang.

Genesis 27-29 chen ei tiem chun Jakob-in a tu ra a sik thu chieng deuin a mi hril. Isak chu a hung upa ta hle a, khuo hmu thei lo khopa a mit a hung inthim chun a naupa Esau chu a ko a, “Ngai ta, ka tar ta hle a, ka thi hun ding ka hriet si naw a, Tu hin i thal bawm le thalngul chawi la, va ramsuok la, sa mi va kappek rawh. Chu chu ka du dan ang taka inhnikin suong la, ka fak dingin hung chawi rawh, ka thi hmaa mal ka sawm theina ding chein” a ta. Isakin a naupa a biek lai chu Rebek chun a lo ngaithlak kar a, ramvak dinga Esau a suok char chun a naupa Jakob kuomah, “I pain i u kuoma thu a hril ka lo hriet a, ‘Va ramsuok la, sa mi va kappek la, ka hme ding inhnik deuin suong rawh, ka thi hma ngeia Lalpa hmaa mal ka sawmpek theina ding chein’ a ti a nih. Chuleiin tu hin ka naupa, thu ka pek ding che hi ngun deuin ngaithla la, ka ti angin va thaw nghal rawh. I pa du dan ang taka inhnika hme ka suongpek theina dingin tuhin va fe la, ran ruol laia kel tuoi thra tak pahni mi va lapek vat rawh, i pa thi hmaa mal a sawm theina ding chein, a fak dingin a kuomah i va pek ding a nih” a ta. Jakob chun a nu ti ang tak chun ran ruol laia keltuoi thra tak pahni chu a hung chawipek a.

Rebek le Jakob hai nufa ang ela nufa, pafa inditsak bikna le hmasielna leia sung le kuohai hlembawlna dinga inthuruol hlak hai lei hin sungkuo inrem lona le insel inhalna suksuokin inmalmakna chen a chawk dok hlak. Chuong ang bokin kohran lai khom pawl hran a ngirsuok pha a, ram le hnam hmangaitua insalhai lai chen khom inthre darna intlung tirin mihriem hringna chen khom ngainepin ei insuosam pha hiel hlak . Ei tu ra hi mani chauin ei tuor naw a, a ram phekin ei tuor pha hlak. A poi sei thei khop el a nih.

Rebek hi a truon a’n rangin a pasal du zawnga hme suong dan khom a thiem bok ni ding a na, sa chan khom a hnesaw hle ti chu a chieng, Esau sa pèl kàr chau chun kel tuoi pahni chu a pasal duzawng taka inhnikin a lo suong zo hman der el! Pasal ta dinga nu inhnarum tak chu ni ngei a ti maw le.. Ana chu nu truonrang le pasal hai lungril hre hne hai ku hi pasalhai ta dinga thawhlaum an ni deu zat zat a ni aw!

Rebek chun a naupa Jakob chu a bu le hme suong inhnik deu el chu a pa kuoma va pe ding le a malsawmna chu la dingin a tir a. Jakob chun a nu kuomah, “Nu, ka u Esau chu pa hmul hau a na, kei hlak chu hmul nei lo ka ni bok si a, ka pain a mi lo tuoi pal hlau el chun ka hlem tum sawn a ta, malsawm a ruongin trongsie a min phur lem el naw ding maw?” a ta. A nu inthok vak chun “Ka naupa’ trongsie chu ka chungah tla lem raw se, ka ti ang tak chun thaw el rawh, fe la, va la rawh” a ta. Suol thaw dinga huoisen, nuhmei tak hi chu aw.. Edena huona inthok ta khan thawhla an um thlawt el chu a ni hih! Nauhai seng seng ditsak bik nei ta tlat el chu Esau ta ding chun a nu hi hazatum thlawt a tih. A tum naw lem mal insawmtirtu a nuhmei Rebek chu Isak ta ding khoma tuorhla a va um awm de aw! Pa lung inrom lem chu ni sien, a nuhmei thilthaw hi a hriet le inruolin mâk man leh nam dok nghal el a tih ti ring a um.

Esau le Jakob hai unau kha phing sunga an um lai daia Lalpa ngeiin a upa lemin a naupang lem rong a bawlpek ding thu a lo hril ta kha Rebek hin a lo theinghil el am an ta ding chuh! Rebekin Jakob ditsak bika Esau malsawmna dong ding thukhel hrila a bawa an bawthlakpek el hi remruottu lo remruot dan hrim ning a tih tia pomzam el chu a’n dik chie dim aw? ti khom hi ngaituoum tak chu a nih. Thukhel hril le mi hlem hmanghai hi Pathienin a theidazie chu ei Baibul bung le chang tam takah ziek pek ei nih. Hieng kher kher hin lo thaw naw hai sienkhom Pathien chun kong dang le lampui dang hmanga Jakob hi malsawm dan a hriet tho awm vei leh ti dingin a um. Ana hlak chu, Jakob chun a pa masawmna dit le infawmin a nu remruotna chu a sie le a thra dawn chang loin a u Esau silfen le beram hmula inbelin a upa malsawmna dong ai chu a paa inthokin a lo lakpek ta a nih. Mani hamthratna ding a ni phot chun Jakob ang ela thieng le thieng naw dawn loa Esau silfena inbel khom poisa lo tulai ringtu intihai lai ei tam ta hle niin a’n lang bok.

A pain Jakob chu mal a lo sawmpek tah leiin a chungah Esau chu a lungsen em em a. “Ka pa ka sùn ni chun ka sangpa Jakob hi ka that ngei ngei ding a nih” a ta. Esau thu hril Rebekin a lo hriet chun Jakob chu a ko a, “I u Esau inhnemna tak chu i pa a sun ni nia sukhlum che a nih. Tu hin ka naupa inrang takin ka trapa Laban kuom tieng Haran-ah tlan hmang rawh. I chunga i u lungsen a dam a, a chunga i thilthawhai a theinghil pha leh hung hril ka ti che a, chu pha chun hung kir chau rawh. Ieng tin am ni khat thilthuah inpafain ka chân el ding cheu a na?” a ta. Jakob malsawmna dong chu hlimna nekin tritna le lungzingna sukpungtu chauh a hung ni tah. A in lum chu suoksanin, iengtik khawtika a la hmu lo, a pu Laban umna Padan Aram tieng chun a tlan hmang ta a. Rebek chun a hmangai em em le a disak leia a upa malsawmna dong ding chen a pasal hlema a’n chuthlakpui Jakob chu ngai tak pumin an threpui tah a nih. Mani tu ra hlak chu sik lo thei a ni si nawh.

Chuong ang bokin nupui tam takin nau seng seng lai thlei bik neiin an unau danghai theida an inhlawtir a, unau karah intuithlarna chen a ra suok hlak. Nu le pahai hin ei nauhai ei hmangai luotin suol ding khoma ei phal naw a, ei ring phal bok ngai nawh. Sienkhom hriet naw karin chu hmangaina mitdel chu Setanin remchanga lain mi tam tak a fen hmang a, nuhai ta dinga phurrik le pahai ta dinga beidongna an tlun hlak.

Pathienin Abraham chu ‘malsawmna ni rawh’ a lo ti ta ang hrim khan, Abraham chun a naupa Isak chu mal a sawm a, Isak chun a naupa upa lem Esau chu mal sawm a tum lai khan Rebek le Jakob chun an pa Isak hlemin a malsawmna chu Jakob ta dingin an lo inchu thlak khom lo ni sien, Abraham kuoma Pathien thutiem chu Jakob chunga chun a tla ta tho tho a nih. Genesis 28:10-15 ei tiem chun Bethel a Jakob manga a thil hmuhai ei hmuh, “Kei hi i pu Abraham le i pa Isak Pathien chu ka nih, Nang le i thlahai kutah i zalna ram hi peng ka ti che a, i thlahai chu hnuoia pilvut anga tam la ning an ta, sim le hmar, sak le thlangah la um dar an tih. Nang le i thlahai leiin hnam tin malsawmin la um an tih. I kuomah ka um a, i fena taphotah veng zing ka ti che a, hi rama hin thruoi kir nawk ka ti che. Ka thutiem hi ka hlen hmakhat chun thlathlam naw ning che” a ta, chuongsa khom chun Jakob chun a khel hril ra chu a sik tho tho nin an lang.

Jakob chun Rachel hlaw dingin kum sari a pu rong a bawl a, a hun tiem a hung tlung chun a pu chun hlèmin zanah Lea chu a pek ta lem daih a, kum sari dang a pu rong a bawl nawk a Rachel chu a hlaw ta tr awk a nih. Chu hnunga khom chun ran hlaw dingin kum ruk a pu rong a bawl nawka, chu taka khom chun a pu Labanin a hlaw voi sawm rau hlemin a sukdanglampek thu ei hmuh (Genesis 31:41).

Pathien chun Abraham le a thlahai kuoma a thutiem chu a sukpuitling hmakhat chun a thlathlam naw ding zie chu Genesis 28:15 ah ei hmu a, amiruok chu an tu ra chu an sik tho tho a nih. Eini tulai ringtuhai khom hin Pathien lunginsietna zara a naupa Krista Isu ei ringna leia ei sandamna hi a bo naw ding a ni lai zingin, hi khawvel thil le inzoma tisa chak zawng le lawm zawng thawtu chun a tu ra sîk ve ngei a tih. Pathien hi nuisaw chi a ni nawh. “Chuong nia hai chun mihaiin, ‘Pahaiin grep thur an fak a, an nauhai ha a suktrim’ ti dam hi ti nawk ngai ta naw ni hai; chuong nek hmanin mi tinin mani suol thaw thipui an ta, grep thùr fatu ha chu trim lem tang a tih” ti Jeremia 31:29-30 le Ezekiel 18:2-4 ah uor taka hrilin ei um a ni kha. Ei thilthaw tinrengah fimkhur nawk zuol ei tiu khai!

KEIVOM RUN (Greater NOIDA)

17 May 2012.