Kan Zinna-V

By Ramthienghlim Varte, Senior Anthropologist

Ei unau Manipur le hmun dang danga inthawk Mizoram a lut, mihai bel thei ding khawpa nina nei le burip em em tam takel hmu ding an um tah a. Hienghai hin Mizoram, Aizawl khawpui le hmun dang dangah ami suk chawngpu zuol a lawm a um. Mizoram hi ei pilepuhai delna ram, ngirhmun infuknaw leia chawngpu nina changphak talo ei ni reng a. Chuongchuh  ni hri inla khawm thiem tak le Pathien ti dek puma hma ei lak fuk pha chuh zangkhuo ala bungbu ngei ding a nih tihi ei lungbawra tu nghet tlatin um sienla. Mizoram a ei hnam thuoituhai khawm mi inza thei dingin tawng dan, chang dan, um dan thiem a tul.Tawng thei em em ringawt hi iengtina khawm an nawh.

SINLUNG HILLS DEVELOPMENT COUNCIL (SHDC)
Kum 16 zet liem ta a thisen a ei nawr dawk  a ropui am, a chin am, a lien, Mizoram ei Buzawl lo ni tah hlak ramah Sinlung Hills Dev. Council ei neive hi lawm em em.Tuchena a ngirhmun chuh General Administrative Department, Government of Mizoram chuh Nodal Department a hmangin Interim Councilin SHDC chuh a fe teng teng a. Chuongang chauh khawm chuh nisien Isarealhai anga nuom ang anga eiin huk dum dum thei nawkna dinga a bul ei intan thar nawkna ah ngai inla nuom a um.  A hungsuok dan tak ngaituo lem chun Chairman le lal inchu a, sum tlawmte hnawta inse khek le nuom ang anga nun chen ngamna ding chi khawm ani mani. Tu hri hin chuh Mizoram a ei hnam damna dinga hmalakna le innghatna thungpha ang ani leiin hi taka a inthung ding hi inchu nekin  inhlan intuo lem a theitawpa thanglakna a hmang dingah kei chun ka ngai a. Chuong nekin, SHDC a Interim Council chairman nuoma inper ka-lang mi 7/8 vel an um anla ti ta deu deu.Ta lawm lawm ah.

SHDC le inzawma hotu Chairman rim innam chin Pu Malsawm Darngawn, Pu Hmingchunghnung, Pu Thangliensung le mi dang dang mimal taka inhmupuina ka nei vawnga.  A tutu khawmin an hmazawn senga hnam tadinga thahnemngai em em, an tawngbau suoka chun hringna thap ngam khawpa hnam hmangai vawng an nih. Amiruokchuh, kuongkhata an umkhawm thei tlatnaw hi a mak a nih.

Hi Mizoram a ei hnam darthlalang a ni chun puotieng mihai mi tlir dan ding mawlh hi ngai pei a umnaw bek bekel.  Mizoram a Hmarhai del ram SHDC sunga umhai hih inthuruol inla chuh awlsam taka MLA pathum nei thei ani a, Minister chen khawm um thei ei tih. Manipur a khawm chuongang tho chuh a nin an lang.

LUAHLO LUNGDI
Bollywood film ( Hindi film ) ei en changa a an hril uor em em  Bis sal ka pahele( Kum zawmhni liem ta) ti hi a ni a. Chuongang bawkin keikhawm kum sawmhni chuong er-awr liem tah a HSA  thuoitu kani lai  lungruka kalo pai ren-rawn hlak, ruoltha tilo nulepa khawm hril ngamlo ruolhluihai Aizawl khawpuia khawsa ve dam anlo um nuol a. Nau leh buoi em emin lo khawsa ve tawl tah hai le dam kan inhmu a. Hmel dangin lo chuoi deu ta sienkhawm inngainatna ala bo chuong naw a. Kum tam liem ta hnunga ka lungril suongtuona pahla a an rikna khah ala danglam chuong bawk nawh. Mak tak a nih.In chibai seng seng khawm a rik tup bikel.

Ngaituona’n chulram lo theilovin a fang a, ‘Dite kangai em che, sakhmel tawnglo ni reng a sawt ngei’ ti Pu Edawrd T.C. le kan siem hai dam  le ‘A remnaw maw’ti hla Pu Zama hla siemhai khan lungbawr a hung tuomvela, khawsawt chulram fang hi khawsawt alo um zie chuh  Pu H.Thangluoi AIR a Director sin  Shillong a thawlaia a tleirawl nun hai dawnkira khawsawt em em a‘Tawn mang em ni lunglem ka neilo, ka hawivel a ka tawng silo,Zunleng  e rawh a chamreng thinlai a, Luahlo lungdi nghilni i awm lo’ ti hla hai ami sakpui hai kha ka hrietthiem pui thei chauh a nih.Lung an lengve vawng vawng ngei el.Synod Higher Sec. School, Mission Vengthlang, Aizawl a kum iemani zatzet Science Teacher a ka sinthawna hmunhai dam fangkuolin ruolhlui tamlem chuh anlo pension tah a, thenkhatin chungtieng an milo inlawi san tah bawk.Khuo a sawt veng veng a nih.

Aizawl a ka cham sunghin hotu lien le ofisar hai inah ka leng kim deu phuor a. Chethei tak tak, an sinthawna senga  nina insang tak tak nei, insung burip khepkhupa khawsa  anlo ni tawl vawnga, Churachandpur ka pieng le murna le ruoltha tamtak umna hmun a inzin nek hmanin thla a muongin ruolpawl zalen dan a changkanga, inhawi kati lem dai a, in le lo neinawna hmun nisienkhawm kan sukchawngpu lem bawk.A mak khawpel.

Tarik Ni 3, December 2011 zan Ruoltha kokhawmin ka sangpa Samuel Hrangate Tuikhuahtlang, Aizawl bufak tlangna kan nei a, hi zan hin Pu L.Hrangchal IPS inhlan ani lawmpuina Thangsuopuon insil tirna kei le Pu H.Thangluoihai nupa’n kan nei a an hawi kan ti tlang khawpel. A in neinu ka sang Lalnunziri ( Zirtei ) a fel bawk a, a ruoltha nunghak fel tak takel hai leh fak le dawn buoipuia an hei invilik vel kha chuh mit a tlaiin an hawi tawp a nih. An mi vil hne ngei el.

Dr H.THANGLAWRA KAN HMUPUI
Ei mi hlui Dr H.Thanglawra kum 91 mi ( ama mi hril ang chara ziek a nih) a hratlai le vanglai hun a College iemani zat lo hawng le ama thiemna le inpekzona zara Pherzawl H/S  hming tha le mi tamtak lekhathiem lo cher dawktu,  tuhin a pension nun hmangin Edenthar, Aizawl khawpui khawsa mek a.A chengna hmun ngeia ka va pan nihin chuh ngaituona tam tak ka nei a.  Ama hi thiembukinsang bela thiemna le inchukna tienga hnar kai tu ei Hnam pa, taksa ngei inbiekpui thei umsun nin ka hriet leiin ka ngaisanga, kan hmupui thei hi ka lawm tak zet. A hmel ka hmu chara ka lungrila hung inlang chuh “Pherzawl Reader” ti lekhabu ka naupang lai a kan chuk hlak khah a nih.

Lekhabu a buotsai mekhai chuh  (i) Teaching Children of Primary School  (ii) Teaching Children of Secondary School (iii) Teaching Children of College and University  (iv) Tiny book on leadership training ti le (v) Superiority Country I visited hai English le Mizo tawnga sut dingin a buotsai mek a.Chubakah, ama chanchin bik ziekna ‘ KA NUN KHAWVEL’ ( The world of my life ) ti Mizo tawnga sut tumin  a buotsai mek a. Hiengang a thiltum a hlawtling theina dingin taksa hratna le hriselna tha a mamaw leiin tawngtai pui dingin a mi ngen ngawi ngawi a, chu sin chuh hi zan hin ka tan nghal reng a nih.

(KAN ZINNA –VI  Next)
20th January 2012