INPUI: Hmar News & Info

Ziektu: Pu L.Keivom, IFS (rtd), Inpui.com columnist

Tough times don’t last, tough people do, remember? -Gregory Peck

Sakordai-Zilthaw

April 28, 2012, Inrinni. A hmaa kan prokram duong dan chun hi ni hi Tipaimukh-a inthoka longa Hmarkhawlien kan panna ni ding a nih. Amiruokchu, Sakordaiah kan la um zing. Zing dar 8 vela inthok suok ding kan ti kha ruo a sûr zing leiin kan suok el thei naw a. Kan tum dan chun Tuiruong kam Zilthaw kaiah fe thla a, chutaka inthok chun longa Tipaimukh tieng kai tung a nih. Zilthaw tlung hma hin Tuiruong zuk fintu Khawpuor vadung a um a, chu chun ruo a sûr rawn pha leh motor fe thei loin a dang hlak a. Darkar khat sungin chu vadung chu kan zuk tlung a, kan inlau ang hrimin a lo lien a. Darkar hni zet kan nghak hnung chun feet khat velin a kiem taa chuh kan driver thruoi khan a la hraw ngam naw rop a. Khuo an thim tran el ding tak leiin kan thuomhnaw seng phurin, ke-in kan lawn trèng tréng a.

Hla kan phak hmain, Senvon-a inthoka Tipaimukh-a mi lo tuok dinga kan inchà thlàk Lalchunghnung leh kan intuok a, kan inthuok huoi el. Tipaimukh-ah ni hni zet a mi lo nghak hnungin, kan inlang el ta si naw leiin mi zong dingin Zilthaw-ah a hung thlak a. Chutaka chun a mi la hmu ta naw rop leiin, lampuiah harsatna kan tuok palh ringin, kea hungin a mi hung zong pei a nih. Pa tlawmngai thei, ram le hnam invoi le hmangai, Sinlung Indigenous Peoples Human Rights Organisation (SIPHRO) ta dinga Hmar Biel aiawa a kûl a tâia thok le a khawl lipui a nih. A lua inthoka a kepâr chen hi thä-in a phan sip amanih ti ding khopa pa hrât, tungmitlika khom quintal (kg 100) khat phur vawk vawk zo a nih. A bu làk khom a thra; bu fâk rawna inel dinga cho el chi a ni nawh.

Hù hnêpa iemani chen kan lawn hnung chun Zilthaw an ti hmun chu rala inthokin kan zuk hmu thei ta a. Hmun dang ang boka vadung kama long chawlna le a se vela mi chenghaiin châk le khorsaw tinreng an lamna hmun chu dawr burip tak tak umna ni chêk dinga lungrila ka lo suongtuo le beisei khah a letling daih a lo ni chu tie! In nèk hmana rabok hoi lem pahnih a um a, pakhat chu a thlang ela vadung pang, Khawpuor vadungin Tuiruong a zuk finna lai chu a’n khat tawka a chim dur dur zing leiin, hmun himna lema son dingin an lo thriek lai mek a nih. Hi hmun hi Vanlalau le a sungkuohaiin an nghak a, in le inzoma hotel an siema chun thingpui sen dawnin, an artui but kan sehme a. Hi hotel hin hming a nei nawh; hotel um sun a ni leiin hming nei khom a ngai nawh.

Khuolzin fe le hung an suokna le lutna kotsuo a ni leiin Zilthawa hin ieng lai khomin long hmang ding a um zing a. Kan zuk tlung zan khom hin long pali inthlung a um a a, long neitu le khaltu chu Vai-Hmar-Mizo deu vong an nih. V.L.Auva hai sung le long pakhat neitu Hmar-Vai, a hming Ravi an ti chu Baibul (Delhi Version) bu khat ve ve kan rochung a, an hmang trangkai ngei kan ring. Thilpek laia hlu tak chu Baibul inpek niin ka ngai, chatuon hringna thu chuongna lekhabu a ni leiin. Hi Baibul hi Pathienin nasa takin a hmang a, hmun dang danga kan rochunghaiin malsawmna an dong thu an mi hril hlak a, lawm a um thei hle. Darlonghai khawpui Darchawia lem chu an Rorelna Inpuia an Baibul hmang tak a ni tah.

Zilthaw kan zuk tlung tawma ka ngaituonaa thil hung inlang chu, kum sawm chuong liem taa Rengkai mi, thu le hla sukhmasawnna dinga thaw hlawk èm èm, H.Thruomte lekhabu buotsai Zosuokthruom (Pastor Suoka) Chanchin (1999) ti ka tiem kha a nih. Chu lekhabua chun sumdawngna dinga Zilthaw ram Tuiruong kama Suoka serhlum huon siem thu dam, a siem hmaa chuong laia Borsap (Superintendent) N.E.Parry (1924-28) chu Tuivolsuoa a’n zin le a riek thu le Suoka le an inbiekna thu dam, Borsap-in huon siem theina lekha a pek thu le a huon hmun ding enpui dinga Borsapin Circle Inspector (C.I) Laldin a hung tir hiel thu dam, a serthlum huon thratzie le hlawkzie thu dam a chuong bakah hieng lai biel, anni rawiin ‘Tuisuolral’ an ti tlat hi Mizoram Synod-in a ngaisak tawka an hriet naw leia kum 1959-a khaw 14 zet Independent Church of India (ICI) a an lut thu dam a ziek a. Chuong thu vel chu ka ngaituo suok a. Kum 80 lai liem taa thil tlung khom ni sien, ngaituona lêng vêlin Suoka serthlum huon umna lai ding awm dam chu a dap a. Khâng hun laia nek hman khan an ngirhmun hi a tla hnuoi tah lem am a ni aw? ti lungrilah zawna a hung inlang bok a. Hieng thil hin ngaituo a suksei khop el. Mihriem hi hnungtol thei a lo ni takzet el.

Zilthaw-Tipaimukh

Unau hmelhai a ni ta a, ruo a sûr hmer hmer zing a, Tuiruong khom a lien sap pei a, tui so but butin Zilthaw kai a hung nèk dan khomin zai a daw ta naw a, va pang a nèk chim ri chu lipuia lung lien tak tla ri duk angin hriet ding a um zing. Hieng lai hmun, tuizangkhauh intuokna hmun hi a nèlum naw bakah, tui a lien insang pei chun, Tipaimukh tieng pana fe tung chu thimtham hnuoiah a him naw thu an hril bok leiin, a’n rang thei angin kan intawl suok a. An long hmang, a hminga ‘launch’ an ti ve hi Maldives laia ‘dhoni’ an ti ang chia buher khawl engine, a ri se èm èm inbêka an khal ve top el a ni a, hnung tieng le hma tieng elvartu ding var a nei nawh. Ratu-a kan chawl truma kawlphekhawnvar (torchlight) ka’n chawk chu kan hmang trangkai khop el. Chuonga buher khawl le minit sawmli lai kan inrùm tung hnung chun Ruonglevaisuo, Tuiruong le Tuivai infinna, Vaihaiin Tipaimukh an mi lo tipek chu him takin kan tlung tah a nih.

Kaia chun Tuidung vai ruol rawl ri a so nak nak a, a ram neituhai rawl ri ruok chu hriet ding a um mang nawh. Tui an ting hma hmana hieng hi a ni chun, tui an ting hnunga thil la hung um dan ding chu hisap ngam khom a ni nawh. Sum hmu theina awng um taphot chu anni rawi hin taima takin an hruk bit vong a nih. Ram pilril, Mauchâr lampui sira an thing thra po po âta zor hlawk dinga la khawmtuhai khom anni rawi bok hi an nih. Eini rawi chu, ieng ni bar lo, zing le zana fak ding zong fawmhai khomin, thaw nuom chin le thaw pei chin ei nei khanglang hlak. Hlawtling ding khopin teirei ei pei naw tlangpui bok. Intlansiekna khawvela hin, Pathien tak be loa ei hrilhai hi ei hnot phak tlat naw sung chun, pathien lêlo betuah an mi ngai a ni khomin, hang inthiem naw el thei an ni nawh. Mani le mani invoi pei si loa vai ramthim invoi pawlhai hi rorelna hmaa an ngir pha, iengtin am inhril hlîp an ti aw? ti zawna dam hin ka ngaituona a dêng rop chu tie! Chu chu Pathien rawl am Setan rawl? Eini le eini ei invoi hun chu thawlawm bawm inthèp châng chauh a ni el ta naw maw?

Tungmitlik

Thil harsa chu, longa inthoka suok a, vapang pil hnawng innâl èm ém, sirbi khom um lona hraw a, a chunga khuo pan tung kha a nih. Iengang pheikhok hnuoi inthap, ha thra le ngei khom bun inla, pilpokin thawklekhatah a ha kâr po po a hnaw bit vong a, thè thlak el thei a ni si naw leiin, lam pok le innâl chu sneaker ha thra leh khom law ngaina hrim a um nawh. Kelawnga fe chu ni inla, kepui le kepar hmawr bêkin pil kha bìka inkom tàng thei a ni a; sneaker le ruok chun lampui hnawng le innâlah inkom tâng thei a ni nawh. Chuleiin, za tam man seng kan pheikhok bunhai khan kawk a nei tlawm. Funghrol a trangkai.

Sawl fè tah hnunga hniek tin tiema hang kai tung kha chu, satel le intlon khom ni inla, “Tela, i fè hrat taluo. Damten. damten. Chèngkol hniek phawiin aw!” ti zing ngai chi a nih. Assam sorkar hnuoia Mizo Minister ni hmasa tak A.Thanglurin a chanchin a ziek, ZORAM POLITIC LUMLET DAN (Bel keh phuar khawm- tui pai thei lo) tia Lakher (Mara) rama an inzin thu, Lawngban pana an fena lampui intungzie a hril, “An kawng chhoh dan te kha han sawi tehchiam ngaihna pawh ka hre lo. Zahmawh hmawr rahbeh erawh kha chu a hlauhawm hle a ni. Hmun threnkhatah phei kha chuan kei ang pangkhing zeng phei hi chuan ka pum bawh chho ni ta berin ka hria (p.116 Second Edition, 1999) a ti kha ka hriet suok rum rum a nih. Tipaimukh tunga hin chu ruolpa nek hmanin hner sirde inlau a um ve thung a nih. Huihah!

Hnung kîr loa hma tieng nor tung pei na ná nà chun biek in hmasa tak, ICI Biek In umna chu kan kai suok ta hlol a, a tuola ina chun thuok lak malamin sawt naw te kan chawl a. Inrinni zan inkhawm an nei lai mek a ni a. Khaw lai khom fe inla, Hmar mi tamna khuo hriet theina pakhat chu inkhawm huna dar vuok ri le khuong ri insaikal nuk nuk a tam hi a nih. Hi khaw hlun, in 50 vel nia insâla khom hin dar ri le khuong ri a kat nuk el. Kohran pali-EAC, EFCI, ICI le UPC- an um a, insem ruol vong khom ni hai sien, kohran tinin in 12 seng, kohran member, nautê chena tiemin, 60 vel seng bak chu an chang thei naw hrim hrim.

Pathien ni tah ang inla, mani trânghma chit ngaiin mi hung dawr hai sien, ni tina an khawsakpui, an hnampui le unauhai ngei khom hmangai si loa an hmu ngai lo le hmu thei lo, kei an mi hmangai chu thil awium lo a ni si leiin, an cháng chàng chäng dinga ngaisak loa sie pawt pawt nuom a um chàng a tam ka ring. Kohran pawl rongbawltu ei tam a, Pathien rongbawltu ruok chu ei vàng. Mani thrangna kohran chauh indika ngaina nêkin Pathien thu hi thutak a nizie hrietna tieng chiengin a zawm tieng chieng zuol lem inla chuh, Pathien khom hi ei biek pop deuh ka ring. Ei ngirhmun enin, Pathien ringtuhai ngirhmun ni thei awmin ngaituona hmang tu khomin an mi ring thei ka ring nawh. Lung chauh sukphûr phak, sungril siem thra phak si lo ringna hin lemderna sikul chen chauh a mi thruoi tlung thei. Kan tlungna nu Biellienthang-in, “Churachandpur biela chu sandam kai ding mi ei tlawm taluo” a ta. David Buhrilin, “Ieng leiin am ie?” tia a’n don lèt chun, fiemthu-titakin, “UPC kohran mi an tlawm èm annawm!” tiin a don.

Kohran danghai donna khom chuong ang tho chu ni vong mei a tih. Mani kohran pawla mi chauh van ram kai dinga ring pawl ei ni deuh fur. Ei ringna hi pawla innghat le inthlung a ni tak. Ei inhèk tuona po po hi Pathienin poma a lo hnawl vong leia hieng ang ngirhmuna intâng zing ei lo ni palh a ni khomin, eini dawi sa eini bokin ei fak leia a ra ei sìk a ni a, mawsiet ding dang an um nawh ti hriet a thra. Inthlang hunah Pathien lawm naw zawng le Setan lawm zawng iengkim ei thaw ngat ngat a, inthlanga ei tling hnungin Pathien kuomah lawmthu hrilna hunser ei nei a, upa ruol le pastor ruol mipui hmaa an trongtrai vet hi Pathien ei hmusitzie tlâng hrieta ei puong langna a nih. Sim a thra. Pathien hi nuom nuoma hlèm bawl thei a ni nawh. Inthlang laia ei indawi tuona, fak le dawn ei thawhai po po kha ei inhnawm le inzun suok zoa liem hmang el tah sawn rawi ei tih. Kha inhlem tuona kansar zung khan a petu le fatuhai a zem khum a, na tak tuorin, ei ram le hnam le kohran a’n rùm a ni hi! Ei tù ra sìk hi khuorel, pumpel thei lo a nih.

Fam tah Pu Ngurdinglien Sanate-in a in a’n hlàn truma trongtrai dinga Rev. Lalngaisang a fiel thu le ama suma a bawl po nia a hril chauh Pathien kuoma a’n hlànpek thu an hril hlak hi, thudik a lo ni pal chun, enton tlak tak a nih. Inthlanga tlinghai hi kha hma khan ka hmelhriethai chu lawmpuina thucha ka thon hlak a. Amiruokchu, an hung tling dan thua ka chieng naw china inthokin, kum sawmhni chuong hi, tu khom lawmpuina thu ka thon ta ngai nawh. Ei thrangna pawl tieng a ni lei ringota thieng le thieng naw ramri nuom nuoma son hi Pathien thutak le inkal a nih. A ram le a felna hi khawlaidung amanih pawla zong ding ni loin, mani sungril sengah a um le um naw inbi chieng lem ding a nih.

Ruonglevaisuo

Tuiruong le Tuivai an infinna hmun hi a vadung hming tawp tieng ve ve la-in Ruong-le- Vai-suo (Tuiruong le Tuivai infinna) tiin an lo ko a. Mizoram tienga mihaiin Tuivai a luong suokna le a tawpna a ni leiin Tuivai Suo an lo ti hlak a. Chu chu Vaihaiin an lam thiem naw leiin ‘Tui’ ti kha “Ti’ tiin, ‘Vai’ ti kha ‘v’ an lam thiem naw leiin ‘p’ ria lamin ‘Pai’ tiin an lam a, ‘Suo’ chu Vai trongin ‘Mukh’ ti a ni leiin Tipai-mukh ti a hung suok a, chu ri ang chun British hai khan rikawtah an sie leiin ‘Tipaimukh’ ti hming hi a hung pieng tah a nih. Zieka a hung inlangna chu 1871-72 truma Vai Lien le 1873-88 inkara sorkarin dawr hong an phal hnung kha a ni el thei.

Kan tlungna nu Bieklienthang (a pasal Lallawmthang Parate, Village Council Chairman chu Parbunga an zin lai a ni leiin a inteknu hming ei lam a nih) in chawr tieng chun khawthlir inhoi tak el an bawl a. Chu khawthlir hmaa chun Ruonglevaisuo lung an phun a. Chu lungphuna chun hieng lai hmun an hluo tranna kum nia an ngai, 1450 AD chu an ziek kuou a. Hi kum hi khawlaia inthoka an sùt suok am a na? ti ka’n don leh ka lekha zieka inthok a ni thu an mi hril a. Ka hang ngaituo chun, Guwahati Hmar Christian Fellowship-in Gospel Centenary Souvenir-a HMAR TROBUL ziek dinga an mi fiel leia October 2009-a ka ziek, Hmar hnathlakhaiin Tripura an lut hun ni dinga ngai 1450-1500 AD ti khah besana an lo hmang ni dingin ka zuk ring a, a hnunga ka’n don chieng chun a lo ni hrim bok a. Pilat thukhawchang ang deuh khan, a zieka an lo ziek tah leh, thleng nawk thu a chêng nawh.

Hmar hnathlak hrang hrang, ‘Hmar’ ti hming a pieng hma daia Tripura, Cachar, Assam ram hmun hrang hrang le Manipur phai ruom chena lo inpem darhai hi a hnungin, kum 1900 lai bawra Linguistic Survey of India an hung thaw khan G. A. Grierson chun ‘Old Kuki’ ti hnuoiah a sie vong a. Chuong lai chun an inkona hming laia pakhat ‘Hmar’ ti khom hi a lo pieng ve hman tah leiin Old Kuki ti hnamhai lai a thrang ve a nih. Hieng Old Kuki hnamhai hi an inpèm dar hmain Ruonglevaisuo lai hi an lo cheng khawmna hmun nia an hriet seng leiin an chanchin suinaah hi hmun hi a ser laia a mei ang a nih. Manipura inpêm, entirnan Anal le Chawthe hai hi Hmar hming a pieng hma kum 300 vela lo inpem tah nia hriet a nih. Chuong chu a lo chun, Tripura tienga tla thla peihai khomin an lo hluo hun chu AD 1450 bawr vela zeldin chu histawri bawma thun sa thei a nina lai a um hrim a nih.

Ruonglevaisuo fe thlenga inpêm darhai hin hi lai hmun hi an Sinlung Pahnina, an hnam hrietzingna (national memory) zàma inphûm tlat a ni theizie thu entirna pakhat chauh hmangin hang hril inla. North Tripuraa um Ranglong (Langrong) mi hlui pakhat chun Ruonglevaisuo le a se vel, abikin Senvon ram hi mak khopin an hriet a, chu thu chu an khawpui Bagbasa-a Cultural Mapping thawa David Buhril le Ringum Khobung leh kan chàm ni May 26, 2011 Ningani khan bazaar thingpui dawrah ha hîpa an hril kan ngaithlak a nih. Hi lei hin, Hmar hnathlakhai po po fuon khawmna ding Ruonglevaisuo Cultural Meet chu hi kotsuoa ngei hin a remchang hmasa taka huoihot tum a nih. Hi hmun hi Old Kuki Group ta dinga an Hebron, an Makpela, an Sinlung, an Khurpui a nih. ‘Tuiruong’ khom hi an hnam chanchina dawithiem hmingthang ‘Lalruong’ hming chawia an lo phuok, ‘Lalruong Tui, Lalruong Vadung’ tina a nih. Chuong ang hrietna chu hnam tin thil hriet zingna zàma inphûm, an inthla sawng pei chu a nih. Saptrong chun ‘ethnic collective consciousness’ ti thei a ni ka ring.

Tipaimukh Dam

Ruo le riel le thlipui hnuoia hun, thä le sum tam tak senga Tipaimukh-a David Buhril le ka naupa David Lalhmingsang ka fepui san chu ka naupa-in BD Thesis a ziek ding lei a nih. Israel thlahai, Pathien hnam thlang ni si, an bawsietna leia an ram, an hmun le hmaa inthoka hnot suoka um rop hai tuorna le Tipaimukh Dam an bawl phaa hnot suoka um ding Hmar mihai tuor nasat dingzie thu chu thesis-a ziek dinga a thupui thlang a nih. A ziek tum si chun a ziek hma ngeia a hmun fang a, a mi chenghai inhmupui a, research a thaw chu ka ditpui lei a nih. Hi thesis hi ziek zo a ni pha chun, Tipaimukh Dam kakhawk nasatzie ding thu hi theological studies thawhai khawvel khomin hung hre ve a, an thlarau chauh ni loa an taksa khawsakna khom invoi phak sa ve a, an trongtrainaah sâm a, Israel thlahai sansuok hlaktu Pathien chu ko suok a, a mihai sansuokna lampui a hung relpek beiseina lei khom a ni bok.

Tipaimukh Dam ei ti vet hi a rî ei hrietna a sawt ta a, a hlawkna le hlawk nawna, a kakhawk thrat ding le siet dan ding, lawm ding amanih hnawl ding ti thuah ngaidan ei nei deuh fur ka ring. March 24, 2012-a ama bau thusuok ngeia mipui hmaa tu chena ngaidan la nei lo nia inhril, mihriem mak ka hmu um sun chu a biel aiawtu MLA chauh a la nih! Mani phak tawk ang sengin, mitdel ruol sai hmu an hril angin, Tipaimukh Dam hi ei hisap a, a threnin ei lawm a, a threnin ei dit naw a, ei hnawl bok. Zing le zana tru bawla zuk bawl zo el dinga ngai pawl khom ei um. An bawl trana inthoka kum sawmnga vela an zo thei chun an truonrang hle ding thu ei hril chun, “Chuonga ei thi hnung daia thil tlung ding chu, tuta ngaisak le invoi iem a trangkai a?” ti pawl chu a tam lem an nih. Chu chun ransa le ei la’n hnaizie, ei thil dawnin ei dumbel tong khom a la khêl nawzie a hril fie hle awm. Compensation ringot melkai, voi khat bu faka rohluotu nina zor nuom Esau le a lungril puttu, chongkor mit put, hlam khat khom thlir phak lo, hnam damna ding neka mani hlawkna ding hnot pawl, mi kanglanghai ruok chun bawl vat vat an nghakhla.

India rama Dam lien pawl tak laia mi ding a ni leiin, hi Dam-in kawlphetha a siem ding hi India ram ta ding chun malsawmna hnàrpui pakhat ni dinga ngai a nih. Sienkhom, hi Dam hin a rama chenghai ta dingin DAMNA intlun a tim? Tukver danga thlir pawl chun, hi Dam hi sietna rapthlak intluntu ding, mankhawng trium niin an ngai. India hmar sak ram hi ram naupang, a hnuoi khom la’n hnaw muk lo, lirhning tamna a ni leiin, Tipaimukh Dam-a tui intling khawmin rik taka a del pha leh a hnuoi hi inthawtin hung insiksawi a ta, chu chun a sè vela muol le tlanghai hi a sawi chim vong ding a nih ti chu hieng tienga chinchang hrehai ngaidan a nih. Chu phaa khawpui him naw zuol ding chu Aizawl hi a nih. Khawhrawngin tuiting a sawi chim pha chun, Tuiruong dung le a se vela khuo po po, Hmarkhawlien le Silchar phaia chenghai hi thawk-le-khatin Bay of Bengal tuipuiah lèn thlang a ta, Sûra thukhawchang ang khan, ‘Rengreng vadung’ ah liem thla diel an tih ti chu an thil hmu lawk dan a nih.

Chuong thilhai chu a tlung di’m, tlung naw di’m chu la siehre phot inla. Tipaimukh Dam an hung bawl phaa chimrala um hmasa tak ding chu a rama chenghai an nih. Aithing man a hung thra met a, sum fai chawi, vai sumdawng pahni pathum an hung leng lut hmana a ram phêka an chai buoi phak lai, a ram mipui nek daia tam sinthawtu an hung pha chun sum belpui khap kuo sipa hmepok inli luoua sa tlang khat thlak ang chauh hung ni tang ei ta, umzie nei tlawm ei tih. Chimrala ei um hnung chun meivar thra, sikul thra, hospital thra, lampui thra, constituency thra, ieng thra khomin umzie nei naw nih. Chatuon rorelna hmaah, ram le hnam ei zorna compensation poisa fûn truta ei ngir pha khom, ieng angin inhril hlîp tum inla, Juda Iskariot tangka ip peihawn khan thiem chang lem mei a tih. Ram inchawkna bekin an la hmang trangkai a ni naw am a ni?

Chuong thilhai chu lungrila pai zingin, April 29, 2012 Pathienni sunchangah longin Tipaimukh Dam an bawlna hmun ding tak le a se vel chu kan fang a, Sartuinek ram tienga vakam hrula chun hla fe kan intawl tung a. Kan hung kir nawk chun Tipaimukh kai, thral huna trieuphoa futbawl an petna hmuna an goal ban phun khom chu a chenve neka sei a lo chìm pil ta a, a tawpah a la chìm pil vong ding a nih. Chuong anga ram le hnam damna dinga goal ei lo phun tah po po Tipaimukh Dam-in a la chim pil vong hun ding ei ngaituo chun thä a zoi rong rong el a nih.

Hmun serh am lo ni ta,

Kan siengna Hmar ram hi?

(May 23, 2012 Delhi)

By Timothy Z. Zote

Khawvela Manmasi thla Hmar nau hai lai hin, Hmar History ziektu pu Hrangnglien (fam) hai le ei mithiem, Dr. Rochunga Pudaite, Prof. Dr. Lal Dena hai le hnam chanchin suitu Rev. H.V.Sunga le adang dang haiin, an suinaah Sinlung hi an lo zieksa zie, le an sui dan khawm an ang vawng dan chun, Hmar hai hi Sinlung Khuo-a inthawka hung ei ni ngei zie le ziek le tiem thiema ei um hma inthawk (Oral) hlain,

“Khaw sinlungah,

Kawt siel ang ka zuong suok a, “ a lo ti ang khan,Sinlung chanchin sui thei dingin a um tlat a nih. Chun, Sinlung khuo hi mita hmutu um naw inla khawm hmuchakna le hmu tumna , um ngeia ringna hi mi tam tak lungrilah bu a khuor tlat niin an lang.Kei ngei khawmin Kum 1998 –a inthawk ta khan China Ram laia, hmun pakhat lai tak hin Sing khuo hi um ngei ding le ei hnam le suikawp thei dingin a um ngei ka ring a, thei tawkin Internet fe thlengin ka zawng ve a, mi angina pawisa neiin inla chu ka hmu dai ta khawm ka ring a nih. Hi ka zawnna ah hin SINLUNGA Company len tak chu ka hmua chuonghai chun an company- hmingah SINLUNGA an tih a, China sawrkar-in a enkawl a ni a, phone fe thlengin kan inbiek a, an ni chun thil an mi hril sei thein aw leiin hma ka sawn thein aw a nih. Hi le inzawm hin Chinaah hin Sinlung ti a mikhuol naw hle ti chu ringna a min neitir hiel a nih. Ei ni laia nei deu le Sawrkar thaufa thei deuhaiin finance hai sien a zawngdawkna sin hi thaw inla tiin ka ruol then khat kuomah khawm ka lo hril ta hlak.

Sinlung hi Hmar Tawng part –II le Part –I-hmang haiin an ko biek deu a, Chu chu umzie chu Hmar Tawng part –I ( Sinlung) Hmar Tawng part-II ( Chhinlung) tiin ko a nih.

Chun, a thenin Khul,khur ti hai chun an ko thel deu deu a ni awm de, an ni chu Sinlung taka um ni lovin Sinlung khuo sir puk vela um an ni el awm de! Ti ngai ngaituona a min nei tir bawk.

Sinlung Hmusuokna Tluonglam:

Mizoram-a Rev. Rema Venghnuai, Presbyterian rawngbawltu le hma tieng pei rawngbawlna suklienna dinga ram, hmun le hmang zawng dinga Burma fethlenga China luta 22/2/2012 nia Aizawl suoksana a suok dawkna ah chun, Hmar haik haw hlui ni ngei dinga ring el chau khawm ni lo, a tak ngeia a hei hmu chun, Khawvela Hmar mipui lungril ngui le chau ta hai chu a kei tho thar hle a. Chuleiin, upa deu le tar tah, hnam invawi deu haiin hi chanchin an hei hriet chun, an um tawk tawk the ta nawh a, an inpui the ta nawh a ni deu tak. An dam lai ngeiin hi Khaw Sinlung hi hmu hman naw pal ka tih! Ka thi hmain vawikhat bek hi Khaw Sinlung hi hmu ka chak de ti chu hla thunawn ang elin Hmar mipui laia a boruok inleng vel dan chu a hawi.

Sinlung khuo ti hi a thenin Chhinlung tia ko ei lo um a,amiruokchu Hmar Tawng part-I- a ko ang char SINLUNG tia ko le an ziek dan khawm a ni tlat chu tie….. “Haleiluija Manmasi Pathien chu inpakin um raw seh”.

Tuita Sinlung khuo hi SICHUAN Province-a Rev. L. Rema-in Chinese Pastor, Yangjun Fu Yunnan chu fielin Sinlung khuo hmu thei a umna dingin Manmasi pathien chun a ruot pek ta hlau a, chuongchun, March 13,2012 ni chun Sinlung khuo tieng chu Bus-in ni iemnazat an tlan hnung chun Garze an tlung a, a tuok Date 2oth March 2012 ( Discovery date of Sinlung Village,the Olden Village of Hmars, in china , ka ti el a nih) zingkar chun, Sumo-in darkar 5 lai tlan a ni nawk a, chun, Sinlung Khuo mang khawm khawma a mang ngai lo chu, a mit ngeiin a hmu tah a, an khawsak dan le an tawng hai chu an angna tam tak a um thu a hriet nghal. Ni nga (5) lai umin, thil tam tak hriet le sui a nei a, hi Sinlung khuo sier lai vel hin, Puk tam tak a um. Chu puk hai lai khawm chun lung milim tam tak a um a, chuonghai chu hei sui chun, Hmar hai sulhni pakhat chu a nih ring a um nawk zuol a nih. Zo hnathlak inti lai hin , lung le inzawmin Hmar thla hai hi sulhnu an hau tak a, Champhai zawla lungdaw lunga milem ziek dam,Chawngtlai , Khawzawl ,Mizoram, bula um hai dam khi Hmar hai sulhnu vawng a nih. China rama ei um laia inthawk hin lung a thil ziek nuomna le thil inchik a that zie le a tul zie an lo hrietthiem phak ta a ni ring a um hle. China rama ei um hmain Rev. H.V. Sunga chun Middle East lai vel hin ei lo um a nih a ring thu Migratory rout map a siem chun a suklang bawk a nih.

Sinlung khuo mi hai le ei inhnaina:

Sinlung khuo hi ei hnam chanchin suituhai le ei lo umna hlui le ei hlaa inthawka an lo sui a hmun le ram awm, an ringna hmun leh an zul hle a. A Sinlung hi “ China Sichuan Province a um Latitude 28% le longitude 1005 inkara um a ni a.Yalung vadung le inkar umin, a va ral veve ah, building in an bawl tawl a, khuo lien ta luo chu a ni nawh a, mi 4000.( sangli bawr vel umin a hril). Sinlung khuo-a inthawka Km 32 vela a hlaah chun pi le pu hai sulhnu beltlettlut hmu ding a tam hle thu a hril. Tawng khawm inhnaina tam tak a la nei a, mankhawng ei ti hi “mangkhawng khuoi khawm hi “ khuoi”, saruh “ saruh” ,Chengkha” Changkha” ka nau “ ka nau”,thal “thal” lung “ lung” an ti ve tho a nih. Hril ding chu a la tam el. Hril seng el chi ni naw nih.

Hienga, Rev. L. rema –in a hmuna a hmu fie ta si hin chu, hril hril ta lo vin, a hmuna intir dan ngaituo inla, chu chun, ei unau an ni dan le , ei hnam hming ding? International politics khel ding? Kristienna tieng lampui sat a,in unauna le inzawm nghet dan ding ngaituo a, History fel fai le chieng lem siem a tha naw maw? Kei chu a tul chun, kan pei zing bawk.

A rama hi , vadung bul a nih an ti lei hin Hmar hai hi hnam Advance ( varhmasa) an lo nina a sukchiengin ka ngai. Tuita, North East India cheng hai khawm hi Vadung bula khawsa deu vawng ei nih. Hi hi hnam var hmasa ei nina le ei civilisation hi China or Midle East khawm a lo ni ta el thei? China rama inthawka ei hung suok dan hi chihni ring ding a um. China Historyan hai chun kum sang bi danah tampui le, indona inthatna, natural calamity , lirinhning, arasitlak , thlipui mak, (T.Sunami ang) thina runpui a tlung hlak a chu chu taka inthawka invengna dinga nuom le nuom lo va, kawt siel ang ka zuongsuok an ti kha a lo ni el thei bawk.

Sinlung khuo a chenghai hi, an fakzawkna tlangpui chu beram,kel, vawkvai an inhnik em e, chun an ran vai vel danah hin a ram hi ram inzawl ta luo a ni dal dim? Fe chak a um ngei el.

Hmar art and Culture hai le Hmar Inpui le thahnem ngai hai, hung suok dawk tar o khai! Inzawng suokna hi Pthien hmangaina inlangna pakhat a ni tlat. Kohranhai , inngaituo chieng ei tiu, I Hmar chanpui hai chantuon hremhmuna an um el ding chu, I ngai ngam bik dim a ?

Hieng a, hun iemna chen Rema hin China ram hmun hrnan hran a fangna ah hin ei pinn le pu hai sulhnu tam tak a hmusa bawk thu telephone-a kan inbieknaah chun a mi hril. Hmaisana inbiek hun hi a tlung pha’t chun, hril ding a va tam awm de! (Date 10/5/2012)

Ziektu: Pu Timothy Z. Zote

Hi khawvel leihnuoi huop chinah hin , mihriem pakhat ve ding a, ka hung pieng suok ve le inzawmin , ngaituona le sungtuona, mi angin hau naw lang khawm ka thei ve tawk tawkin ka thluok hi ka hmang ve a. Ruol ka ban tawk naw zie khawm ka hriet zing a, anachu, a chunga thumal khi ka lungrilah hun iemnai chena inthawk ta khan a riek zing a, ka theinghil tum khawma a hung inlang nawk hlak si, chuleiin ka sui ve dan ka hung ziek vet um a ni hi….

Khawvela mihriem cheng hai hin hming le inko dan bik ei nei seng a, rambung hming khawm a um a, chun inko nuom dan khawm ei nei seng bawk. Chun, ei nuom ang a, ei inko naw pha’t a then chu an lung a sen nawk hlak bawk. Hming hi a pawimaw chu ning a tih rawlri hrie inla khawm ei hminga inkona le biekna a um naw chun, ei ngaisak ngai nawh .

A chunga ang peiin Hmar hming khawm hi suitu hai chun, Mizorama inthawka intan chau ring pawl khawm an um niin an lang a, chu chu ngaidan nei chu , ei ni laia mi inlar le ziektu hming thang em em khawm an um bawk. Hi thu hi ka sui ve dan ah chun, Mizorama inthawka Hmar hnam hi hung suok a ni nawh a , a hming hi Myanmar lai daia ei lo lam tah niin an lang. A hrilfiena hmangruo pakhat a dingin kum 2007 lai khan Mizoram Chawnsim (Champhai)–ah Pu C. Dinthanga, Editor, Lelte Weekly, le Tv. TBC Zaithanpuia , History sui dinga ka fe nuom thu ka hril le inzawmin kan fe tlang a, khuosawt a um ngei el. Lungriemin, a mi thlak rak chu tie, pi pu sulhnung hei hmu chu…

Champhai kan hei tlung chun Guest house ah kan riek a, zingkar inhma takin Pu Khamhmingthang, Custom Officer, Sielmat, Champhaia a Post lai a ni a, ama chun ka fe nuomna le ei pi le pu hai umna a hriet hai a mi fang pui a. Champhai kan hei suok a, Km 2 vel kan hei tlan chun a hming hrieta um ri ngawt , mang hrieta ka lo hriet hlak a hming “ ZOTE’ khuo chu mit ngeiin kan hei hmu a, hi Zote khuo a hin iem a um a? SIKPUI LUNG lien tak el, tawp deu hlek , a zal, a lo um, chu Sikpui lung chu a thala an inzal pha’t pha’t a rawng a dang a, an intung pha’t a rawng a dang thu a veng mi hai chun an mi hril a, mak tak niin an lang a. Hi Sikpui Lung lu tieng deuah chun an kuotlang a,chu chu dawi thil thaw a ni ring pawl an um a, ngaidan an ang naw nuol bawk.

Hi Zote khuoa hin, tienlai nun le inthlasawng pei dan le chi le kau chanchin tam tak chanchin hril le ziek ding a lo um a, tuhin chu thai seng nawng ei tih. Amiruokchu, pi le pu sulhnu pawimaw em em el hril hmai thei der lo ding le hel thei der lova hril ngai pakhat chu, MU RAU PUK um hi a nih. Hi Murau puk hi, a ten chun Mura puk khawm an ti a, ti dan le an dik lem nia inlang chu Murau puk niin an lang. A puk dang lamna pakhat chu Pasarih a ni kher hi a nih. Zote Hmar haiin , tienlai chun Naute an khatin an lo si hlak a, fena an neisan hlak a, chuong kar chun naute hai chu Murauin a lo hung lak hlak nia hriet a ni leiin, a hmingah Murau puk an ko niin an hril.

Hi Zote khuoa hin thil pawimaw , pi le pu ro a um el hi, suitu thenkhat chun hmunpawimaw le Lal hi fel tak le ro khawm tha taka rel thei, thu nei thei, ni ngei ding a, sui pawl khawm an um bawk. Tienlaia inthawk pi le pu ro thil le lungphun umna hi Lal dangdai le Lal hril hlaw met an ni vawng a nih. Chun, pi le pu ro ngainatu Lal a ni ring a um bawk. Hi khuo a hin, Zote hmu ding an vang hle a, Manmasi Year Book Vol-II na chu Village Council Secretary ka present malamin hieng thuhai hi ka sa’m “ Hmun tum tum a , Zote hnam umhai chun, Zote khuo hi kan hung ral thlirin, hung hmu nuomin a sang tel kan um a, chun a khawhluotuhai le a khawsunga cheng, mi fel tak tak hai leiin hi Zote khuo hi an thang a nih, chuleiin lawmthu kan hril a nih, amiruokchu, Hmar Inpui or Zote Pahnam rem tina naw chun a hming hi thleng thei nawng in tih” tiin ka hril ve a. An lo lawm hle a nih.

Tekhina dingin, Saikawt nekin Muolvaiphai , Tuithaphai chun Hmar History-ah an inlang dan an ang nawh. Saikawtah chun thil tam tak ei hnamin rorelna le suktlukna hmuna ei lo hmangna khuo a ni bawk a. Muolvaiphei ruok chu Historical monument mawi tak “ Manmasi Sikpui Lung” a um leiin mi hril le ngaiven, hmu nuomum le thlalak pui nuom em em a, hmun hla tak taka inthawka hung chak an um pha na a ni ve tlat. Tourist place or Historical Munument item pakhat a ni leiin Muolvaiphei chen an lar pha a, an thang pha bawk.

Hi Zote khuoa inthawka ka suina tukvera chun, Sailo haiin 1919 khan Zote khuo hi an hluo tan a, Lungdaw ah a um a, thla khawm ka lak bawk. A khel KM 5 vel ah Zotlang Lawitlang pahnam bubitna a lo um nawk a, chu lai chun Sura naute inhrona, tiin lunga milem tam tak ziek a lo um nawk a, Sikpui Lung hai leh YMA, le Art and Culture, Mizoram-in enkawlna sin a hmingin an thaw a, anachu, hmangaitu an mamaw hlein ka hriet.

Mizoram Hmar tienga an pan leia Hmar hming hi put el ei ni nawh.

Ziektu thenkhatin, Mizoram hmar tienga pan pawl hai chu Hmar hnam an ni thu an ziek lang hlak a, hi thil hi ngaituo vuot chun awm ve tak, amiruokchu, suichieng deu chun a lo indik tawk naw zie hriet theiin a um . Champhai khawzawla ei ni Manmasi nauhai lo khawsak lai hin Hmar an lo inti tho zie hriet theiin a um. Hieng a, Champhai laia thilsuia iemani chen ka umhnung hin Tiu ral chen hang lutin, Ridil ( Leiri Dil) chen ka va lut a.Tuita Hmar inti Lawitlang hnam Tlawmte, Varte papui Kum 70 vel ding Champhai Zotlang ah kan pawlpui pa chun “Hmar thlah kan ni” tiin a mi hril a. Chu umzie chu Champhai lai khin Manipur, Aizawla inthawkin Hmar Missionary tirin Hmar lo in ti ve ro, ei hang ti hriet ding a um nawh a, Mizoram tawntira um Hmar mipui Lawitlang , Pautu hai khin Lusei le Hmar indo khawm an hriet naw tlat. Hmar thlah kan ni, ti bak chu hei suklang ding bek an nei nawh. Hmarah thi an ngam vet tlat chu tie! Champhai zawlah khin Hmar a tampawl ni dingin an inngai hiel a nih.

Champhai zawl um lai hin, Zote khuo zawl hi Sailo haiin hung runin, khuo dang chu an tawkbuoi hriet ding a um nawh, chuleiin, tienlaia LUSEI le Hmar Indo ti khawm kha thudik a ni hmel naw hle.

Lusei le Hmar An Indo nawh ?

A chunga ziek ang khin, hnam le le hnam indo ni lovin, khuo le khuo indo, fakzawngna harsat lei le bu le bal thatna a nih ti leiin ram inchu le inrun niin an lang lem a, Lusei le Hmar indo ti khawm hi sui chieng chat chat inla, khuo le khuo inhmelma leia buoina insang tak, lal lien le lien buoi leia hril dar mei mei a ni ring a um lem. Saizahawl khawm Hmar tho a na, Leisei le Hmar biel khuo then khat a hung run ti hla a inthawk hriet a ni a, amiruokchu, a fe khel Hmar khuo tam tak a um a, chu leiin Hmar ngawr ngawr chau an do a ni naw zie chu a chieng hleiin an lang. Chuleiin, ei hnam Histori Hmar Le Lusei Indo ti hi thaibo ni ta sien, a tha el naw ding? Khuo le khuo indo leia ral zam hai kha Hmar ral zam ei ti pei chun, ei hnam hming chu “Zam hnam” a lo ni el lem di’m? Ngaituona suksei a, History indik le fel ei va mamaw ta de!

E he, khai ka hril tum tak ka hril hma’n ka lo thai rawn ta luo deu ta e, inthlahrung a va um ta de. Amiruokchu,ziek ta laklaw bawk si hei hril hram hram ka tih, tiemtu inzaum tak, mi la hei tiem pek hram raw khai….ei sipliema a ni hi tie! Nakie thu hma haupa I mi ti el ta awm de! Belte phulhlat ang deu ka ni hi…. Nang the iem I ni ve ding?

A thupuia zieka um ang khin, Hmar hi ka pieng a, inthawkin pakhat khawm ka la hmu nawh a, ka mit an kal lei a ni am? Ka mit a tha naw lei am? Ka hriet bik nawh ie, lo hei thlir pei ei tih. Hieng a, ka lungrila riek zing Hmar ka hmu naw leiin hmu tumin ka zawng ka zawng a, Parbung,Lungthulien,Hmarkhawlien,Senvon, Burma,Champhai , Himachal Pradesh chen zawngin hun le ni tam tak ka lo khawral ta a, amiruokchu vawisun Date 21/5/2012 chen khawm hin Hmar mi ka la hmu chuonng nawh .

Ka ruolpa pakhat Thadou pa chun hi pa hi Hmar a ni hi a ti a, ka hei belchieng leh, Lungtau a lo ni a, Ka ruolpa Meitei pakhatin “ hi hi Hmar a ni hi, a hming tawpah khawm Hmar a si a, Hmar tawng khawm a hmang a ti a, chuong a ni chun hei belchieng ka tih, ka ti tah a, ka hei belchieng chun Biete a lo ni nawk pei a, mi tam tak Tuithaphai lai khawm kan dawn tawl a, ka hmu thei chuong nawh .

Maktakin, ka buoina chu ka hung hriet suok ta a, Hmar ti bik chu tu hnam khawm an um nawh a. Amiruokchu, Hmar hi pahnam hrang hrang inkhaikhawmna le inremkhawmna, tuihawk dang dang luongkhawmin dil a siem ang khan pahnam hrang hrang luongkhawmin Hmar hi a lo siem a lo ni zing. Chuleiin Hmar hi a lo va lien de, tui ta inthawk chu Hmar hi , Khawvelah ka hmu zo ngai naw ding zie ka hriet suok ta leiin ka hlim ta hle el. Hieng a ni lei hin, Hmar pahnam hrang hrang hai hin lungril taka ei hnam popo khaikhawmtu a ni zie hi hre a, HMAR ti hming hi chawisang ding le humhim tlat dingin thang la thar inla nuom a um hle. Tu khawm a mikhuol bik ei um naw zie hre thar bawk ei tiu khai.Hieng ang deu hin Mizo khawm hi Hnam hrang hrang infin khawma a hming Mizo hi inbuk a ni leiin Mizo biek an um nawh a, athen ngaituona khingbai neiin “Hmar hi Mizo an ni lo” ti dam an um hlak a, hi hi Hmar mipuiin an theinghil thei nawh a ni hi.Chuong nek chun, a sui sei seiin tuita an tawng hmang khawm hi Hmar tawng naupang lem a nih an ti lem.

Hmar hin tawng Pahni inlar deu deu ei nei a, a then chun in lo hriet naw el thei. Chuonghai chu: tuita Mizo tawng ang a, an ti /ko hi a nih. Hi hih, a mawi em em leiin Hmar Modern language ti dinga awm em em a ni bawk, a hming indik tak chu Hmar Tawng Part –II a nih. Chun, Tuita ka ziekna tawng hi a upa lem a ni leiin Hmar Tawng part –I ti a, ko a nih. Mizo subject inchuktirtu ‘n Mizorama an hril ka la hriet zing chu “Mizo tawng upa chu Hmar tawng hi a ni an ti” hlak. Hlado hi “ kan unau Lai/Pawi ho tawng a ni tlangpui” an ti hlak. ( Sawrtui Monthly Magazine, 2003, HSA, Golden Jubilee Souvinir,Shillong, Manmasi Year Book-2005,Vol-I, Imphal).(dated- 21/5/2012, Tuithaphai Ruom, Churachandpur East District)

By L.Keivom

Thlamuongtu Thlarau Thienghlim,ka hminga Pa-in a hung tir ding chun, iengkim zirtir a ti cheu.-Isu (John 14:26)

Kum 2012-a Pentecost Ni chu May 27 Pathienni, Isu thonawkna ni April 8-a inthoka tiema chawlkâr sarina amanih ni sawmngana a nih. ‘Pentecost’ chu Grik trong thumal ‘pentekoste’ tia inthoka lak a ni a, chu chu 50 tina a nih. Judahai chun ‘Shavuot’an tih. Aiguptaa inthoka Israelhai an suok, Tuipui Sen an kàna inthoka chawlkâr sarina, a ni zawnga tiem chun 50-naah Horeb (Sinai) tlanga inthokin Mosie hmangin Pathienin an invongna ding Dànpui, Sinai Constitution a pek a. Chu ni chu makmawin an inser hlak a, Shavuot Kùt (Hag haShavuot) an tih. An lekhabu hlui threnkhata chun ‘Atzeret’ an ti bok a, chu chu an kùt ‘Trumtriekna’ (conclusion) Ni tina a nih. Isu kha a tho nawk hnungin ni 40 sung hnuoiah a la um a, chu zoah Ningani-in van tieng a kîr nawk a. Van tieng a kira inthoka a ni 10-na, Thlamuongtu Thlarau Thienghlim hung tir dinga a tiem chu a hung tlungna ni a nih. Hi ni hi Kristienhai chun Kohran piengna niah an ngai a, ‘Shavuot’ ti loin, ‘Pentecost Ni’ tiin ei hung inser tah pei a nih.

Kristien khawvela Pentecost Ni ei inser hun ruok chu a’n ang nawh. Kohran chanchin suituhai chun hrieng an ta, Roman Empire tawp tieng khan khang hun laia sak rama ngai Balkans, Eastern Europe, Asia Minor, Middle East le a se vel rama kristienhai, Grik trong le an kalchar Hellenism-in a uopna ram po chu, Constantinople (Istanbul) khawpuia inthoka opin, Eastern Roman Empire amanih Byzantine Empire tia hriet a hung ni a, kohran chu Eastern Church (Sak Kohran) ti a hung ni a, chuonghai laia a lien tak chu Orthodox Church a nih. Rome-a inthoka ophai chu Western Roman Empire ti amanih Western Church (Thlang Kohran) ti a hung ni a. Chuonghai pahniin a ni an sut dan chu a’n ang naw leiin tu kum 2012 Pentecost chu Western Church chun May 27-ah hmang an ta, Eastern Church chun June 3-ah hmang thung an tih. Kum 2011 ruok khan chu June 12-ah an hmang ve ve. Protestant kohran chun Western Church thaw dan zuiin May 27-ah hmang veng an tih.

Judahai Pentecost

Pathienin ‘Kût’ chi hrang hrang inser le hmang dinga Israel thlahai thu a pek laia kût pathum chu Jerusalema hmang ding a ni bakah le pasal puitlinga ngai chin chu fe ngei ngei dinga bituk an nih. Pakhat chu Fekân Kùt, ni sari sung daih, Chol Thrang Lo Bei Kùt tia an ko bok chu a nih. Pahnina, loa an thar suok hmasa tak, rà hmasa kùt, Busîk Kùt an hmang ding a nih. Pathumna, thar hmasa an inhlàna inthoka chawlkar sarina amanih ni 50-na, lo tharsuok an hlù lût vong pha leh Pawl Kût an hmang ding a nih. Hi kût pathumna hi a nih Judahaiin ‘Shavuot’ an ti le Kristienhaiin ‘Pentecost’ ei ti chu. A hmang dan ding chipchier taka inziekna chu Leviticus 23:15-22 le Numbers 28:26-31 a nih. A hmaa ei hril vuot tah ang khan, hi Kût hi Pathienin Sinai Constitution a pekna ni a nih.

Kristienhai Pentecost

Kristienhai ‘Pentecost’ hung intran dan chu Thilthawhai 2:1-6 ah ei hmu a, a dangdai khop el. Van tienga Isu a kir nawk hma khan, Jerusalem suoksan lo a, ni sawt naw te hnunga Thlarau Thienghlim hung ding chu lo nghak dingin a zirtirhai a hril a (TT 1:4). Chu hun chu tri dor dorin, pindanah inkal khumin, Isu rawia zanbu nuhnung tak an kilna in, Jerusalem Zion muola pindan chunghnungah, an saku ser nghak tlok tlok el a nih. Van tienga inlawipa hlak chu chêpchêp vuok thlak ang elin a rè tah vong vong si. Tu laia ram hlaa um khom boruok zai hmanga mobile-a ei biek el ang hin biek thei a ni bok si nawh. Mobile um khom ni ta rèng sien, a network dinga tiem Thlarau Thienghlim boa inbiek thei a la ni si nawh Hi an nghak sung, ni sawm tluka an ta dinga ni sawm sawt hi um ngai kher naw nih.

Version hrang hrang ripawt

A hung tlung zet chun a mak dangdai hrim a nih. Baibul pumpuia Jentel mi, ziektu um sun Dr. Luka chun tawi fel takin hieng hin a rikawt a: “Pentecost ni a hung tlung chun an rêngin hmun pakhatah an um khawm a. Thawk le khatin van tienga inthokin thlipui na tak ri ang an hriet a, an thrungkhawmna in chu a hung tuom ta mup el a. Meichok, lei ang tak, insem dar an hmu a, mi tin chungah a fu a. An rêngin Thlarau Thienghlimin an sip ta vong a, Thlarauin a’n trongtir ang peiin trong dang dangin an trong tawl a” (TT 2:1-4 Delhi Version) tiin. Bible Society of India (BSI) suta chun, “Chun, Pentecost ni a hung tlungin, an rêngin hmun khatah an um khawm vawng a. Chun, kârloin vana inthawkin ri thlipui hrang angin a hung tlung ta phut a. Chu chun an thungna in chu a suksip ta vawng a. Chun, leihai ama le ama insemin, mei angin an kuomah a hung inlâr ta a. Chun, an chungah a chuong seng a, an rêngin Thlarau Inthiengin an sip ta vawng a, Thlarauin ân tawngtir ang peiin tawng danghaiin an lo tawng tah a” tiin an inlet.

DV le BSI Version danglamna hi samphuola Baibul tiemtuhai chun an hriet naw el thei. Research thaw a, sîr tin, abikin linguistics le theological angle-a inthoka chîk taka bi-a sui ruok chun Doctorate (Ph.D) hmu theina khopa thupui fùn niin ka hriet. Ei ngaituona mit tuomtu phuhlip chi hrang hranghai hi iemani zat bek hrietna tuia ei phi thlak pha chu, tuta thrangah la ni lo, thrang dangah, ei la hung hmu phak dingah ngai inla. Ka hril tum tak ruok chu, ripawt dan ding hang khikhawk dingzie thu a nih. Khawvela thil la tlung ngai lo a ni leiin a hrilna ding trongkam khom la pieng lo dingah sie inla. Chu thil hung tlung chu hmu thei ni lo, hmu thei ni bok si; ri nei lo, sienkhom a ri inring èm èm bok si; thilthawtheinaa sip, trong tin thiem, trong tin hriet theina dinga nä le hnam dang trong, hriet ngai lo khom hang thaw el theina dinga lei hong theitu chauh khom ni loin, trong hriet lo, threnkhatin ‘van trong’ (glossolalia) an ti chen khom inthawtirtu a nih.

Chanchin Thra bu thumna (Luka) le Thilthawhai ziektu nia ngai Luka hi Thuthlung Tharah voi thum (Kol 4:1-4; 2 Tim 4:11; Fil 24) a hming ei hmu a. A thu tam zawnga sùtin Thuthlung Thara thu chuong 27% vel hi Luka ziek a na, Paula ziek chu 24% vel a nih. Paula inzinpuitu le Rome-a lung ina a’n tang lai, mi dang tu khom an um naw lai khoma umpui zingtu a nih. Daktor a nizie hriltu chu a thu zieka hin hmu ding tam tak a um. Chuonghai laia pakhat chauh chu hang hril inla. Peter tarpi dam naw thu a zieka chun, ziektu dangin an ziek sa ve lo, a khawsik insangzie thu a ziek sâ kher ti ei hmuh (Lk 4:38). Isun a sukdam hma khan daktor a ni leiin a lo en hmasa a, a pang sat dana inthokin a khawsik insangzie a hriet a ni hmel hle. Ama kha Isu zirtir laia thrang ve ni si lo, sienkhom kum thum sung Isu rongbawl hun le a hnunga a zuituhai rongbawlnaa inzêl tlat niin a’n lang. Jentel tukvera inthoka thlira a ziek a ni leiin Juda tukvera inthoka thlir ziektu dangin an ziek hmai iemani zat a ziek sa a nih. Pentecost nia Thlarau Thienghlim hung tlung kha a tak ngeia hmutu le changtuhai lai thrang veng a ti? A thrang ve si naw chun tu ripawta inthokin am a thu ziek hi a lak ning a ta?

Mei am, lei am, trong insem dar?

Ieng le khaw leh, thil thar le danglam ei hmu thu ei hril ding pha leh ei hmu le hriet tah hlak, a angpui hnai taka ei hriet khah tekhia neiin, thu mal ‘ang, angin’ ti hmangin hril ei tum hlak. TT 2:3-4 chu DV-ah “Meichok, lei ang tak, insem dar an hmu a, mi tin chungah a fu a” tia a sie laiin BSI chun dutawka grammar suosamin, “Chun, leihai ama le ama insemin, mei angin an kuomah a hung inlâr ta a, chun an chungah a chuong seng a…” tiin, 1968 suok, Hmar tronga Holy Bible suok hmasa taka Dr. Thanglung inlet angin tu chen hin an la sie zing a. 1980 suok, Rochunga Pudaite buotsai, Bibles For the World suta chun (a hnungah BFW Version ti ning a tih), “tawng hai mei anga inlâra indarin mitin kuomah a hung tlung ta a, chun, an chungah a chuong seng a…” tiin a sie a. BFW Version hi a leplehâng deuh amani ding, 2008 suok Hmar-English Parallel New Testament-a chun “Chun tronghai chu mei anga insemdarin ân lang a, an chungah a chuong seng a” tia an hung sie hnungin 2008 suok bok, Sam le Thuvarhai (Psalms & Proverbs) thrang saa chun, “Chun, leihai chu mei anga insemdarin ân lang a, an chungah a chuong seng a” tiin a hung suok nawk daih a nih.

Khi Version pathumhai hril dan khi, mitdel pathum sai hmu an ti ang elin, a danglam vong a nih. Saptrong version hrang hranga an ziek dan khom a khuongruol chuong nawh. KJV-a chun “cloven tongues like as of fire” a ti laiin NKJV, NRSV le ESV-a chun “divided tongues, as of fire”; NIV-a chun, “what seemed to be tongues of fire that separated”; New English Bible (NEB) chun “tongues like flames of fire” ; Today’s English Version (Good News Bible) a chun “what looked like tongues of fire”; Jerusalem Bible (JB) a chun, “that seemed like tongues of fire” tiin an sie thung. A um dan ding awm chu suongtuona mitthlain a hmu a, sienkhom a hmaa la tlung ngai lo, a hnung khoma chuong anga tlung nawk ta lo a ni leiin, Peter hai, Luka hai hun laia a ni ang taka hril suokna ding trongkam an tlaksam ang bok khan tu chen khom hin khawvel hin a la tlasam a nih.

A san bul chu mi hrang hrang chunga Thlarau Thienghlim thilthaw dan hi mihriem tronga hril suok thei lo a tam lei a ni el thei. Chuong chu a ni lai zingin, ei trongkam hmanghai hi hang bi uluk deu inla chu, bèl chieng an dawl naw el thei. Chu chu fie taka hmu thei dingin, chenchiltu ding Thlarau Thienghlim, taksa le thlarau mit sukvar theitu le iengkim zirtir theitu hung tlung khan ei mit a la sunvar naw khom a ni el thei bok. Ei hmu thei tlat naw chun thangtlawm thila lak chi khom a ni nawh. Thlarau mit a mawk chun lungril mit khom a mawk a, chu chun taksa mit khom a sukmawk ve el a nih. Taksa mita ei hmu hi, ieng angin ei mit var sien khom, lungril mita ei hmu thei si naw chun, a umzie ei hriet thei nawh. Hieng lai thua hin thil insersuon a tam a, lekha tawitea hril suok zo ruol a ni nawh. Mani ngirhmun seng inen fie tum ei tiu.

Pentecost thilthawtheina

Vana a lawn hmain Isun a zirtirhai kuomah Pa thu tiem, Thlarau Thienghlim chu peka an la um ding thu dam, chu Thlarau Thienghlima baptis an ni pha leh thilthawtheina la nei an ta, an chengna khawvel le hnuoi kil tawp chena a thu hrepuitu le the dartu an la ni ding thu dam a hril a (TT 1: 4-8). Sienkhom, a hang fesan meuh khan chu a zirtirhai kha an chi-ai takzet a nih. Hi hmaa thil tlung threnkhat ei thlir chun, zirtirhai laia a sa se ngam tak Peter khom khan a hotupa bula chu zak khawng khûr khûr ngam sien khom an hang man zan zet khan chu voi thum an phatsan el bakah, trongsephur dong huoma inkhâmin “Chu mihriem in hril chu ka hriet dèr nawh” (Mk 14:71) a ti hiel a ni khah. An hang hemde lem khan chu man inlauin an tlan dar vong a, in sungah inbiin kot an inkal khum a, an inthin hawp el a ni khah.

Pentecost ni a hung tlung zet khan chu kâr sari hmaa inphattu Peter kha phatsantu Peter ni ta loin trantu Peter, lu bong le bân bong huoma trantu a hung ni ta lem a nih. Miditerranean Tuipui le a sè vel hmun le ram tina inthoka Jerusalema Fekân Kùt hmang dinga hung fuon khawm Juda mi, Jerusalema la châmbâng, trong hrang hrang hmang tah hai chu an la’n zi nuoi nuoi a. Chuong laia threnkhat chu Juda mi fir, kar sari liem taa ‘Hemde rawh, Hemde rawh’ tia rawl tawp insuoa khek pawlhai laia mi kha ni ngei an tih. Chu nia pindan chunghnunga Isu thutiem nghaka intom mi 120, Thlarau Thienghlim changhai lai khan Peter khom kha a thrang ve a. An thlarau chang ri chu a so vêl el leiin, threnkhat chun, “Zu an inrui a ni hih” lo ti tawk an um a nih. Ti awm hrim khom a ni el thei. Thli anga hmu thei lo, thilthawtheinaa sip, mi dawikawlok khom mi huoisen tawpkhawka inchangtir thei, thil mak inrui an nei tlat!

Chu phing leh Peter chu a ngir a, “Hienghai hin zu an inrui nawh. Zing dar kuo chauh a la ni hih” tia tranin, zawlneihaiin an lo hril lawk anga thil tlung a ni thu, an hnam histawri leh sehmein, sermon ropui tak a thlâk a, mi tam takin an pom a, baptisma an chang a, chu ni chun ringtu 3000 lai zetin an pung sap a nih. Chu ni vek, chawhnung tieng Peter le Johan chun Pentecost ra hlimum sîk peiin, Tempul kota kutdaw, zeng pakhat an sukdam zoin tempula chun thu an hril a, mi 2000 lai zet ringtu an man sa bok a nih (TT 4:4). Pentecost a tlungna taphotah ringtu an pung naw thei nawh. Dangtu le dâltu an nasa po leh a puok darh nasa ting el a nih.

A hnung ela Peter le Johan hai rongbawlna ei thlir pei chun, man an tuok a, tàng inah an khum a, Sanhedrin hmaah an inngirtir a, Isu hminga thu hril ta lo dinga an khap khomin zâm der loin, “Keini chun kan hmu le hriethai hi hril loin kan um thei nawh” (4:20) tiin, ieng ang vauna le inthrìna hnuoia khom huoisen takin thu an hril el a nih. An huoisenzie an hmu chun, lekha inchuk lo le mi mawl satlie el an nih ti an hriet si leiin, mak an ti hle a; Isu kuoma um hlak an nih ti an hriet ta a (4:13). Ringtu danghai leh huoisenna hnia an trongtrai zo lem khan chuh, an um khawmna in chu a hung inhnìng a, an rêngin Thlarau Thienghlimin an sip a, huoi takin Pathien thu an hril ta pei a nih (4:31). A hnunga Isu ringtu Stefen an man a, lunga an deng hlum lai khom khan Thlarau Thienghlimin a sip a, van inhonga Pathien ropuina le a chang tienga ngîr Isu (7:55) a hmu tlat leiin, zàmna hlekte khom a nei nawh. Pentecost ni tlung tah, chuong ang mi huoisen chu kohran chanchina hin hril seng lo an um. Tertulla (c.160-225 AD) lem chun a lekhabu Apologeticus (Apologia) ah, “Kohran hi martarhai thisena inthoka hung tro suok a nih” (The blood of the martyrs is the seed of the church) a lo ti hiel rèng a nih. Hi taka a hril tak chu martar changhai thisen ni loin, hringna chân ngam khopa Isu Krista ringtuhai kuoma huoisenna petu Thlarau Thienghlim thilthaw, Pentecost ra suok a nih.

Pentecost Hlui le Thar

Pathienin Horeb tlanga inthoka Sinai Constitution a pek trum, Pentecost ni hmasa tak kha a rî a râpum bek leiin mipui chu triin an inthin hawp a. Mosie kuomah, “Nangman kan kuomah thu hril lem la, lo ngaithlang kan tih. Pathien ruok chun kan kuomah hril ta naw hràm raw se, kan thi el ding a nih” an ti hiel a. Hi lai chanchin hi kha hma khan ‘Sinai Constitution’ ti thupuia hmangin ka ziek ta a. Chu chu Israelhai Pentecost hmasa tak ‘Shavuot’ a ni leiin, chik zuola sui nuomtuhai chun hi lekha leh hin tiem kop dingin ka’n fui a nih. Chun, hi trum bok hin, Dan laa Sinai tlanga Mosie a thang sung rangkachak bawng lem lo be hman pawl an um a, chuonghai chunga chun Pathien lung a sen leiin mi 3000 velin hringna an chan a nih.

Thlarau Thienghlim hung tlung ni khom hin Zion tlanga lo nghaktuhai umna in chu thlipui na tak ri angin a hung tuom mup a, an rêngin Thlarau Thienghlimin an sip vong a, thlabar tah nekin an lawmna ri chu a so-inêk thung a nih. Pentecost hmasa taka khan mi 3000 laiin hringna an chàn a, Thuthlung Thar Pentecost-a ruok chu Peter thu hrila inthok ringot khomin trum khatah mi 3000 velin sandamna an chang thung. Chu chu a nih Paulan, “Ama chun Thuthlung Thar rongbawltu ni tlâkah a mi siem a, chu chu Dàn, hawropa ziek ang kha ni loin, Thuthlung Thar, Thlaraua ziek chu a ni lem. Dan, hawropa ziek chun thina a’n tlungtir a, Thlarau ruok chun hringna a pêk” (2 Kor 3:6) tia a hril kha.

Pentecost hmasaa Dan a pek lai khan Israel mipuihai chun lungruol takin, “Lalpa hril taphot chu thaw pei kan tih” an ti duol duol a (Exo. 19:8). Sienkhom anni theina ringot chun an thaw thei naw ding ti an hriet. Hla taka ngirin, inthin pumin, Pathienin an kuoma daireka thu hril ta naw hràm dingin an ngen a nih. Chu Pathien bok chu Thlarau Thienghlima Pentecost nia a hung inlang chun mipuiin Peter kuomah, “Unauhai, iem thaw tang kan ta?” tiin an indon a, Peter chun, “In suolhai ngaidam a ni theina dingin inrêngin sim unla, Isu Krista hmingin baptisma chang ro. Chuongchun, hi thilpek Thlarau Thienghlim hi dong in tih. Thutiem hi nangni ta ding a na, in nauhai ta ding khom a na, ei Lalpa Pathienin a ko taphothai ta ding khom a nih” (TT 2:38-39) a ta, a hril ang chun an thaw a, thutiem chu an zui theina dingin Thlarau thilthawtheina chu an chang tah a nih. Ei hlaa khom, “Suol hre dinga mi san dingin, Thlarau chauh a trangkai” a ti hrim a nih. Hi lai châng DV-a kan inlet hi UPC mi threnkhat chun an thuring le inzirtirna tawkbuoia an ngai leiin, sut nawka chuh inlet thra dingin an mi ngen chu tie!

Nambar 50-na poimawzie

Thuthlung Hlui hunah nambar 50 (Pentecost) hi zalenna le sansuokna kum a nih. Kum 50-na hi Jubili kum, insuona kum, bawihai an suok zalenna kum, leibat po po an fihlimna kum, in le lo zor tah khom a neitu hlunin an chang nawkna kum, ram khom insuo zalen a, ieng khom ching an phal naw kum, amaa tro bu le bal le theihai khom sik an phal naw kum a nih. Hi thu hi chipchier takin Leviticus 25:8-55 ah a’n ziek. Aigupta bawia kum 430 zet intang tah Israelhaiin Tuipui Sen kân a, an Pathien Jehova chu zalen taka ‘Ni thum lamah’ be dinga Mosien Faraw kuoma a lo hni khah sukpuitling theiin a lo um ta a. A mihaiin a thuthlung an zawm theina dinga an thaw ding le khawsak dan ding Danpui chu meichoka lungphek ngeia ziek a pekna ni chu Tuipui Sen an kàna inthoka ni 50-na, tu lai thil anga hril chun, an ‘Republic Day’ a nih.

Thuthlung Thara Pentecost nia ruok chuh lungpheka ziek ni ta loin, an lungrilah ziek a ni tah lem. Chu chu a nih Jeremia-in a lo tlanginsampui (31:31-34), a hnung kum 650 vela Hebraihai kuoma lekhathon ziektuin,

Chu phaa Israel sungkuo kuoma

Thu ka thlung ding chu hi hi a nih:

Ka danhai an lungrilah sieng ka ta,

An lungrilah ziek bok ka ta,

An Pathien ning ka ta,

Ka mihai ni bok an tih

tia a hung insam non khah (8:10).

Tlangkawmna

Ziektu hmingthang Alexander Dumas tienami ziek ‘The Three Musketeers’ –a bu pakhat, Twenty Years After- tia khan kul sung tang ina um pasalthra mi pathumhai hin an suok dan ding an phan laiin bu fa dingin lung in vengtu lu tak dottu La Ramée chu an fiel a. Chu pa phierpuina lei chun Duke of Buckingham chu a suok hrim a. A tlan suok ding thu fiemthu anga hril lawkin, “Khai, Pentecost chu ieng kongin am ka sor trangkai ding? Thlarau Thienghlim chu lei chok anga hung trumin, ka’n tàngna lung in talahai hi hung hong el a tih ti i ti ngam naw a ni?” (Now, what has Pentecost to do with me? Do you fear say that the Holy Ghost may come down in the form of firey tongues and open the gates of my prison?) ti thu a ziek a.

Hi thu hi ka tiem laia ka lungrila thil hung inlang chu Filipi khuoa Paula le Sila lung in intang lai thu Thilthawhai 16-a inziek kha a nih. Zanah an trongtrai a, hla an sak zoin lir nasa tak a hung inhning a, lung in kotkhar po po a hung inhong a, tânghai kol bun khom a hung insût vong a. Lung in vengtu a hung har chun tânghai an suok vong tah ringin inthat a tum a, Paulan a khap a, ama le a sunghai leh Isu ringin chu zân lá là chun baptisma an chang tah a nih. Chu chu a tak ngeia Pentecost ni hmangtuhai tonhriet chu a nih. Pentecost chu suol bawia intanghai kol bun suta chatuona zalen dinga insuotu a nih. Amiruokchu, ei ring ang phu peia Pathien ropuina hmu chauh dinga ti ei ni leiin, kong hrang hranga ei kol bun sut thla theitu Thlarau Thienghlim chun ei ringzie ang peiin thil a thaw hlak. Chu chu a nih Paulan, “Pathien felna chu ringnaa inthoka ringnaah suklangin a um pei” (Rom 1:17) thu, inril tak, sienkhom fie tak sia a lo hril kha. (May 17, 2012, Delhi)

[1] Rev. Lalsiesang Joute, Pastor, Hmar Christian Fellowship, Delhi-in Pentecost Ni hung tlung dinga Delhi Thurawna insuo ding artikul hung ziek dinga a mi fielna chu ngai poimawa ka hung ziek a nih.-Author

Ziektu: Pu L.Keivom, IFS(retired)

As I grow older, I pay less attention to what men say. I just watch what they do. - Andrew Carnegie

HSA Park

April 26, 2012 Ningani, Mauchâr. HSA-in ran thata zingbu an buotsai leiin inhma taka suok dinga ka lo remruot kha a thei ta naw a. Remchang hun inchawin, ka tlungna pa Vanlallien le HSA thruoitu mi iemani zat leh khaw fangin kan suok a. A hmasa takin, Sakordai tienga inthoka Mauchâr hung lutna kotsuo-a ‘HSA Park’ dinga hmun an ser hrang, muol zâl inhoi taka chun kan fe phot a. Hi Park hi 1992 vela hla phuok thiem H.P.Runremthang haiin HSA an thruoi laia hmathlir sei tak neia an lo ruohmang niin an mi hril. Inchikna dinga an lungphun le fienrielna ding bûk chite an rel tran mek ti naw chuh chei iengkhom a la um naw a, a tuoltro thing, a tam tak chu inkhieng thing, zing dura ngirhaii chu a nghaktu um sun an la ni hri. Chuong thingkau thruta mawng nauban chi hrang hrang vul chek hai chun lung an suklawm a, kan naupang laia Pherzawl rizapa bulhlawng par chi hrang hrang kan thliek lai dam a min hriet suoktir a, lung hlui a’n leng vong vong a.

Hi hmuna hin thing pakhat, damdawia thra eltienga an hril chu a um a. Thing, ruo, ramhmul le hna tin hin an tuoltrona hmun hi a leilung le boruok an ngeina hmun (natural habitat) tak a ni nuom a. Hi thing khom hin, a ram hi a ngei ni phot a ta, a chî amanih a kaka inthoka tam tak phun sap dan ngaituo a, sumdawngna hnàra inchangtir dingin a thra khop el. A rama hin orchids, abikin bulhlawng (nauban) chi dang dang le damdawi le rimtuia hmang thei ramhmul hrang hrang a tam niin an hril a, sienkhom vai sumdawnghaiin an inchawk ram tieng a ni tah thu an hril bok. Hi hi thil poi tak a nih. Hieng thilhai hi hriet chieng a, humhal a, ching sap pei a ngai. Tu ruok hin chu sum tlawmte ei hmuna ding a ni phot chun a zung puma kara zor riral ei poiti nawh. Hi hi inrùnna tribaium laia pakhat a nih. Ankhapui dam a hrui puma ei sat top el hi chuh pangzatum deu a nih. Hi hi khuongbai pawlisi, mani le mani lu inbeng thoi nun a nih. Lungril thar puta ei insiem danglam naw chun, Isun Jerusalem a tra khum anga intrà khum chauh ei hmabak a nih.

Khawvela hin HSA Park ieng zat am a um ti ka hriet nawa chu HSA Chawlhmun am ei ti ding Khawthlir (Lookout) pakhat ka hriet a, chu chu North Cachar Hills-a khaw pakhat Tuolpui hmar tieng kotsuoa um a nih. Chu hmun chu February 1-2, 2009 khan ka sir a. Tuolpui hmar tieng tlangin hi khuo hi a hlie leiin hmar tienga inthok chun hmu thei a ni nawh. An khaw sìntu tlang kawn ei tlung chun, lamlien ko chungah chawrsong, HSA Sunset Viewpoint an siem a, an thaw thra kher el. Hi kawna chauh hin mobile network a um a, mobile hmang nuom chun fe lo thei lo a nih. A khaw chengker deuh hi an lo bengvar lem am a nih ti hiel dingin, Tuolpuia hin HSA hmingin chawlbûk chauh ni lo, HSA Guest House-cum-Office, Football field (playground) le Lungdaw an nei chu tie! An thaw thra hle. Mauchara an khaw sattu le mi poimaw dang lungphun umna chu thabo lengkhawm ang elin, a tam lem hnuoiah an zàl a, a thren inawn deuin an ngir trawk trawk a, a ngîr chang um sun chu pakhat pahni vel chauh a nih. Lungphunhai hi to troka ei histawri le nina (aidentiti) hriltu sakhi poimaw an ni leiin, hnam var le changkang taphotin a hlutzie an hriet a, ngai poimaw le duot an hlaw.

Mauchâr sim-sak tieng nghaa muol inzam phei chu khawthlirna inhoi tak el a ni a. Sak tieng ei thlir chun Vangai Tlang le Hmar Biela khuohai an inlang ier bakah, hla taka Kailam Zopui bok ruou el chu ei hmu thei a. Sim tieng hnai teah Tringhmun, Upper Sakordai (Sakordai khaw hlui le tlang insangna tak, Raja Sanga inlalna khuo), Palsang le khaw dang ang an inlang a. Sak tieng ruomah Tuiruong, thlang tieng ruomah Tuiriel vadung a luong a. Hmar tieng ei hei thlir chun Silchar phai hlietu Khawbon Tlang, kha hmaa khawhri khawpuia an hril hlak, huoi chi tintang tamnaa tu chena an la hril chu, a bok ruou bok a. Hi lai ram hi Tuiruong kam hrûta Champhai-Trieu chen paw thei lampui siem chun a ram hausakna sor a, tu dang pur loa mani inchawm thei khawvela olsam taka siem thei a nih. Tu ruok hin chu infepawna lampui a mumal naw leiin, ram hausa tak deltu ni siin, ‘zangkhaw bungbut hnan’ tia hriet an la hlaw hri a nih. Ei biek Pathien hi Pathien tak a ni phot chun, a tak be pawlhai zâr bekin zangkhuo a bungbut hun la hung inher suok ngei a tih.

Bawia ei intàngna

Jean-Jacques Rousseau thu ziek laia hril sawng hlaw pawl tak chu, “Mihriem hi zalena pieng ni si, hmun tinah kol an bun si” (Man is born free, and everywhere he is in chains) ti hi a nih. Ama bok hi a nih “Muong taka bawia um nekin trit puma zalen ka thlang lem” (I prefer liberty with danger than peace with slavery) titu chuh.

Ei khawvel hi a zalen hle ruolin, a sûnga chenghai hi bawi chi hrang hrang nina hrênga intâng le kol chi hrang hrang bun deuh vong ei nih ti inla, khêl ei hril ni kher naw nih. Thaw fû inti deua sakhaw bawia intâng, nal inti taka lemderna thuom hrang hranga inthuom, mani pawl sanna dinga lei kungfu hmang thiem deuh fur, ei intang nasat po leh sakhaw mia inngai ei tamzie thu hi chuh hril ngai loah sie phot inla. Politiks tieng, hnam tam lemhai tam chilna hnuoia khawvel um sunga intang ding ei nizie le sum le pai le fak le dawn, sumpai thila khom kutdaw ngirhmun deuthawa ngir, Punjab bufai thrang loa thla khat khom khawsa thei lo ei nizie khom hril sap trûl loah sie bok inla. Chu khêla bawia ei intang nghetna chu hawp le hmuom, kamcherek bawi a nih. Eini rawi tluka hnam vir le hnukinrawl, bu fak khop hlol khoma baua hnaw lut ding zong zing hnam hi khawvel hmun hrang hrang ka sirnaah hnam dang ka la hmu ngai nawh.

Kamcherek bawia ei intang nghetna chu kuva le sada le inrui thei thil dang dang, abikin tûr pangzatum pai, dum (tobacco) thrangna a nih. Mauchâr khuo khom hi chu bawia intâng chu an ni ve chieng khop el. Kuva zorna hmun nga vel a um a, chuonghai laia pakhat chu ka tlungna hai dawr a nih. Kuva le a hna hi Bagha-a inthoka Vaihaiin an hung thon, annin an lo zor sawng a nih. Nguk taka zor chun dawr tinin sing khat man hu thla tin an zor suok anga hisap thei a nih. A tlawm thei ang taka sùtin, kuva ringotin thla tin cheng nuoi chenve an hmang ral tina a nih. A khaw mi hmun thuma threa hmun khatin an fak dingah ngai inla, mi tinin a tlangpuiin cheng 125 man, ni khatah cheng 4 man an fak tluk a nih. Sienkhom, fùn khat hi cheng 5 man a ni a, a fahai chun fùn tam an fak a nih. Fun 10 fahai chun fa rawnah an inngai nawh. Chuonga hisap chun, thla khatah nuoi 6 man an fak tina ni thei a tih. Mizoram pumpuia an fak zat lem chu hisap ngam chi khom a ni nawh. Sada ei hmuom le ziel ei hawp zat leh hisap lem chun, pangzatum tak a nih. Chuonga kamcherek bawia mi’n tangtirtu chu tu am a na? An mi man tàng hnunga ei bawi intang man fa char chartu chu vairampura mihai an nih. Chuonghai kuoma misawnari ei tir treuh thu ei hril dam hi Tuolte Vanglai fiemthu nekin nuizat a um lem daih.

Taksa ta dinga trangkaina um lo, sietna intluntu ni lem kamcherek bawia inthok hin iengtin am intâl suok thei ei ta? Chu zawna chu Mauchâr khuo khoma a don lo thei lo zawna a nih. Kamchereka an hmang po po hi inchukna tieng sukhmasawnna dingin hmang hai sien chu, tuta NREGS-a inthoka sum far thla tlawmte ringsana High School an tran hi zirtirtu tam lem ruoinain hmang an ta, sikul thra lem an hung nei ruolin hung inthrang tuol tuol an tih.

Zohmun-ah

Zing dar 8 vela Mauchâr suoksan ding kan ti khah, kan suok meuh chun a lo inhnu roi el ta a. Ruo a sûr zom ta naw lei le niin iemani chen a lo em hul hman tah leiin kan beisiei nekin lampui a por naw lem a, voi khat khom intâng loin chawhnung dar 2:30-ah Zohmun kan tlung a. Hril khom hril lawk hman loin an High School kan va sir thut a. Zohmun High School-a hin Class 7-10 inchukna a um a, Pawl sawm ekzamah khom a thaw thra pawl laia hril a kai ve a nih.

Class an zo chun beisei naw ang takin thu kan hrilna ding Hall-ah inkhawm an huoihot thut a, a vangneithlak hle. Hi sikul danglamna ve pakhat chu trong thum (English, Mizo-Lusei & Mizo-Hmar) hmanga thu hril thei a nina chu a nih. Hi hi Aizawl le hmun danga chenghai an khùmna pakhat chu a nih. Ka naupa David Lalhmingsangin Saptrongin infuina thu tawite, khawvel dang le inpawna dinga Saptrong thiem poimawzie thu a hril a. David Buhril-in Hmar trongin infuina thu inril tak a hril bok a. Kei khomin Hmar trongin ka hril a, inhoi ka ti hle.

Inchuklaihai, career siem mekhai laia thu hril hi ka thil nuom zawng le inhoi ka ti zawng tak a nih. A san chu khuolzin hmasa, a tak ngeia chona le harsatna lo hmasuon le tawn tah, a lam intungna le insukna, tlùnna le kawina, màmna le kawhrotna, an ngirhmun pal lai hi ka lo pal ta a, an la hung pal pei dinghai khom ka hriet a, an pal hnè dan ding khom ngaidan ka nei a, chuonghai chu hril ka nuom a nih. Damlai lampuia hin mani kraws seng puta inzin ei ni leiin, an kraws put ding ka putpek thei naw a, sienkhom a put dan ding le harsatna tawn tlang dan ding, ka lampui lo pal tlang taa inthoka ka daihriethai hril chu ka mihai laka ka tha bat, ka tlak ngei dinga ka ngai ve chu a nih. Keini hun lai chuh a lo pal tah hai tonhriet kan ngaithlak phak naw a, kan ui mawl ram suk top a, trûl rak loa thä kan sêng treuh chang khom a tamin ka hriet. Chuong ka tonhriethai chu hril ka nuom a nih, a trangkaipui an lo um takduoi beiseiin.

Ka nu le pa-in A AW B an inchuk phak nawh. Primary le Middle School-a kan kai lai chun sikul chite, pindan bik um lo-ah kan kai a. Zirtirtu pahnih, Headmaster chu Pawlriet tling, Second Master chu Pawlhni (Lower Primary) tling kan nei a. Headmaster chun Period tinah Class voi nga a lak a ngai. Zirtir vong ngaina a um naw leiin baihat ding a mi pek a, chu chu kan baihat top el a nih. Chu zoah kan khuoa bok High School-ah Class 7-10 ka thaw a, kan zirtirhai lai B.A tling pakhat chauh a um. Class 9 ka’n chuk tran kumin motor ka hmu ve chauh. Matric trum hni zet hnesaw takin ka tlol. A trum thumnaah tharuma sierkop buonin ka tling. College-ah ka matric fail hmingsiet phuhruk tumin thrang ka lak a, kan inchuk po po baihat tumin ka bei. M.A inchuk dinga Gauhati University-a ka fe-in rêl (train) ka hmu ve chauh. M.A ka zoin Indian Revenue Service-ah ka lut phot a, chu zoah Indian Foreign Service-ah. Ka penson hnungin kum ruk sung Baibul inletin mani sum sengin ka sut a, damsunga ka thil tum le beisei ka hlen.

Hi po le kan sungkuoin vangneina kan dong nasatzie thu ka hril san chu pieng le murna ropui le ropui naw, nu le pa thiemna tieng an insang le inhnuoi, sikul kaina bilding thrat le thrat naw, mawtor le rêl hmu inhmat le inhmat naw, khawpuia um le um naw, thuomhnaw nei thrat le thrat naw hi thil poimaw tak a ni naw a, mani inchukna ngai poimaw a, ni tin mawphurna hlen suok dinga thrang lak a poimaw tak. Hlawtling ding chun sekhon tin, minit tin, darkar tin hmang hlawk a trûl. Lekha hi tiem el loin inchukin ei inchuk ding a nih. Huphur ti hi chonaa ngaiin, harsatna hi malsawmna hnâra ngaiin, hnè tumin ei tawn ding a nih. Harsatna pumpel le tlansan tumtu chun a sukpung a, a buontu ruok chun a hmatiemin a hnè hlak. Chun, eini tlangmihai thluok hi khawvela hnam var taka an ngaihai thluok tluk, an naw leh a neka thraa Pathienin a siem a nih ti hi ring ngam ding a nih. Chuleiin, ei inngaihnuoi ding a ni nawh. Inngaihnuoina chu thaw thei lo dinga inngaina lungril, inferiority complex-a inthoka hung suok a nih. Sienkhom, ei inngaitlawm ding a nih. Inngaitlawmna chu hratnaa inthoka suok a nih. Chu zie chu Isu Kristaah a kimin a’n lang. Isu kha an ngaitlawm a, sienkhom an ngaihnuoi ngai hrim hrim nawh.

Naupanghai khan an hriet thiem le thiem naw ka hriet nawa chu, an la hriet thiem phak vong naw a ni khoma an hriet thiem hun la um ngei a tih ti ka ring tlat. Mi tam tak chun hlawtlingna hi vana inthoka a hrana hung tlung ding ei sawn a, ei sin thaw ding thrul rak rak khopin ei hni hlak. Hausakna iengkim hi Pathienin hnuoia a phum sa vong a nih. A huot dok dan hrie le a huot dok pei peiin an huot dok rawn el a nih. Chu chu thaw dingin kristien ni khom a ngai kher nawh. A thlarau a hlim am, a hlim naw am ti ruok chu thu dang daih a nih. Mihriem hi taksaa siem, sienkhom nun khaltu thlarau nei a ni leiin, a thlarau le Pathien Thlarauin inzomna a nei si naw chun Pathien lakah mithi a nih. Miin khawvel hi a pumin nei sien la, a thlarau chân si sien, iem a ta dingin a trangkai a? Chu taka chun a nih Isu Krista le inzom trulzie thuring ei inchuktir hi a hung poimaw chu nih. Ama ngeiin, “A ram le a felna chu zong hmasa zet lem ro, chuongchun, hieng thil po po hi a pêk belsa ding cheu a nih” (Mat 6:33) a lo ti chuh. Sienkhom, ‘a ram le a felna zong’ ei ti hih piengthar lema insiemna ding a ni nawh ti hre tang ei tiu. Iengkim hi, thil thra tak khom, mani inhlemna le sietna dinga hmang thei a nih.

Sakordaia tlung in invai

Chawhnung dar 4:30-ah him takin Sakordai kan tlung a, khawpui tlung ang deua inngaina a um a, ngai a ngam. Tourist Lodge changkang ve deuh el an nei a, chu taka tlung tum chun kan pan phei a. Sienkhom Mizo Hmeichhia Inzawmkhawm Pawl (MHIP) inkhawmpui tran ni a ni leiin an lo huol vong a, Josefa le Mari khuolbuk zong kha chu nêpte a nih. Zana kan bu fakna dinga kan lo hril lawk Darliensang in tieng kan inson lut tah lem a. Ama hi hnam le HSA thruoitu laia mi poimaw le tlawmngai thei lo ni hlak le ni zui zing a ni a. Ei thu thiem L. Thanmawi Pajamte naunu a tlum tak nuhmeiin a nei a, an fel nupa-in an zâu bok a, neitu chan kan chang a, inhoi kan ti kher el. Chun, ruol le pai hung leng lutna dingin a lawilèn a remchang a, Pherzawla kan um laia ruol hlui threnkhat leh dam kan inhmu pha a, a vangneithlak hle. Ruopui vanawn a sûr deuh zing lei le ran thata mi la thlo an um bok leiin a tûka fe dinga insiem kha kan thrulh pha dèr a nih.

Sakordai hi March 2011 chawhma tieng khan David Buhril leh kan sir a, Tourist Lodge-ah kan tlung a, zanah vantlang inkhawmah thil fe le hung le hma lak pei dan ding kan hril tlang a, a tukah an High School kan sir zoin Ratu tieng riek dinga kan kir nawk el leiin a hmun le hma hi ka la fang hman naw a, a hmelhmang ding awm khom suongtuo ngaina rak ka hriet nawh. Sinlung Hills Development Council (SHDC) khawpui ni bok si, zing thoa Tourist Lodge bathlara inthoka naupang inhnel ri ka hriet le mi dang inbiek ri ka hriet po po chu Aizawl tlanga ka trong ri hriet pangngai vong a ni tlat leiin, hi khuo hi tuhai khuo am a na? ti ka chieng tlat naw a, tuta trum khom hin ka la chieng bêk chuong nawh. Kawngkawipatawt inhràm ri ka hriet ruok chu kum 2011-a Cultural Mapping le inzoma Manipura unau Komhai khawpui Sangang le Tripuraa Darlonghai khawpui Darchawi kan sir truma ka hriet leh a danglam chuong nawh. Khaw lêlo taka a hung inthranglien zui pei le pei naw ruok chu a mi chenghai ditthlangnaa innghat lieu lieu niin ka hriet. Mi inza phur ding chun ringum taka thudik le mani nina kengkaw ngam a ngai. Mani ina tlangnêl ngam lo le kimki mihriem chu thaibawi tlàk khom a ni nawh. Dam khawsuok lem chu: KA HA SE!

(May 19, 2012 Delhi).

By Zarzolien Keivom.

“Hlemin um naw ro, Pathien chu nuisaw chi a ni nawh. Mi tinin a tu ang char a sik hlak” Galati 6:7.

Abraham, Isak le Jakob hai chanchin ei tiem changin Pathienin mal a sawm dan le an malsawmna dong thu tieng pang hi mi tinin ei hriet nuom le hril nuom a ni tlangpui. Tuta truma tu ra sik le inzoma an chanchin ei hril ding tak ruok hi chu an thil thawsuol le an tu ra an sik dan iemani zat hril a, eini ringtu intihai hin ei ni tin nuna ei inveng fimkhur theina ding a tlawm a zawng bek hang phor lang ei tum a nih.

Pathienin Abraham a ko khan “Hnam ropui takin siem ka ti che a, malsawm ka ti che a, i hming sukropui ka ta, malsawmna ning i tih. Malsawmtu che chu malsawm ka ta, trongsie inphurtu che chu trongsie inphur ka ta; nangma zarin hnam tin malsawmin um an tih” tiin a hril a. A nuhmei Sarai kha a ching hri a nih ti hre zing sienkhom, hnam ropui taka siem ding le ama ngei khom malsawmna ni dinga thu tiemtu Lalpa Pathien chu a ring tlat a, ringum takin a zui a, sienkhom kum sawm lai an voi hnung khom chun a nuhmei sul chu hongpekin a la um chuong nawh. Sarai beidong chun a pasal Abraham kuomah “Lalpan nau a mi’n neitir nuom si naw a ka bawinu Hagar hi pawl el la, ama laka inthokin nau ka nei thei miel el rawi mawh” a ta. Abraham chun Sarai thu hril chu a lo remtipui a, Hagar chu a pawl a, a hung inrai a, sienkhom an rai ti a hriet char chun Hagar chun a pi chu a hmusit tran nghal el ta a. Bawinu-in a pi ngirhmun a hung hluolan pha tuorhla a um thu Solomon thuvara (30:21-23) ei hmu ang khan Sarai ta ding khoma Hagar hi tuorhla chu um thlawt a tih, tu ra sîk a ni mieu el si a. Nau dit luot luot leia Pathien hun tiem nghak zo lo nu Sarai thil thaw hi ama chauin a tuor naw a, voisun chena a kakhawk nasatzie hi hrilin a siek nawh; tulaia khawvelin a buoipui luoi luoi, Arab Muslim firfiek ei tihai po po khom ku hi an la ni pei a nih. Sarai ang ela Pathien hun tiem nghak zo loa mani remruotna le ditthlangna hmangtu mimal le thruoituhai lei hin ei ram ei hnam le Pathien kohranhai chenin ei tuor hi namen an ta naw niin a’n lang.

Genesis 27-29 chen ei tiem chun Jakob-in a tu ra a sik thu chieng deuin a mi hril. Isak chu a hung upa ta hle a, khuo hmu thei lo khopa a mit a hung inthim chun a naupa Esau chu a ko a, “Ngai ta, ka tar ta hle a, ka thi hun ding ka hriet si naw a, Tu hin i thal bawm le thalngul chawi la, va ramsuok la, sa mi va kappek rawh. Chu chu ka du dan ang taka inhnikin suong la, ka fak dingin hung chawi rawh, ka thi hmaa mal ka sawm theina ding chein” a ta. Isakin a naupa a biek lai chu Rebek chun a lo ngaithlak kar a, ramvak dinga Esau a suok char chun a naupa Jakob kuomah, “I pain i u kuoma thu a hril ka lo hriet a, ‘Va ramsuok la, sa mi va kappek la, ka hme ding inhnik deuin suong rawh, ka thi hma ngeia Lalpa hmaa mal ka sawmpek theina ding chein’ a ti a nih. Chuleiin tu hin ka naupa, thu ka pek ding che hi ngun deuin ngaithla la, ka ti angin va thaw nghal rawh. I pa du dan ang taka inhnika hme ka suongpek theina dingin tuhin va fe la, ran ruol laia kel tuoi thra tak pahni mi va lapek vat rawh, i pa thi hmaa mal a sawm theina ding chein, a fak dingin a kuomah i va pek ding a nih” a ta. Jakob chun a nu ti ang tak chun ran ruol laia keltuoi thra tak pahni chu a hung chawipek a.

Rebek le Jakob hai nufa ang ela nufa, pafa inditsak bikna le hmasielna leia sung le kuohai hlembawlna dinga inthuruol hlak hai lei hin sungkuo inrem lona le insel inhalna suksuokin inmalmakna chen a chawk dok hlak. Chuong ang bokin kohran lai khom pawl hran a ngirsuok pha a, ram le hnam hmangaitua insalhai lai chen khom inthre darna intlung tirin mihriem hringna chen khom ngainepin ei insuosam pha hiel hlak . Ei tu ra hi mani chauin ei tuor naw a, a ram phekin ei tuor pha hlak. A poi sei thei khop el a nih.

Rebek hi a truon a’n rangin a pasal du zawnga hme suong dan khom a thiem bok ni ding a na, sa chan khom a hnesaw hle ti chu a chieng, Esau sa pèl kàr chau chun kel tuoi pahni chu a pasal duzawng taka inhnikin a lo suong zo hman der el! Pasal ta dinga nu inhnarum tak chu ni ngei a ti maw le.. Ana chu nu truonrang le pasal hai lungril hre hne hai ku hi pasalhai ta dinga thawhlaum an ni deu zat zat a ni aw!

Rebek chun a naupa Jakob chu a bu le hme suong inhnik deu el chu a pa kuoma va pe ding le a malsawmna chu la dingin a tir a. Jakob chun a nu kuomah, “Nu, ka u Esau chu pa hmul hau a na, kei hlak chu hmul nei lo ka ni bok si a, ka pain a mi lo tuoi pal hlau el chun ka hlem tum sawn a ta, malsawm a ruongin trongsie a min phur lem el naw ding maw?” a ta. A nu inthok vak chun “Ka naupa’ trongsie chu ka chungah tla lem raw se, ka ti ang tak chun thaw el rawh, fe la, va la rawh” a ta. Suol thaw dinga huoisen, nuhmei tak hi chu aw.. Edena huona inthok ta khan thawhla an um thlawt el chu a ni hih! Nauhai seng seng ditsak bik nei ta tlat el chu Esau ta ding chun a nu hi hazatum thlawt a tih. A tum naw lem mal insawmtirtu a nuhmei Rebek chu Isak ta ding khoma tuorhla a va um awm de aw! Pa lung inrom lem chu ni sien, a nuhmei thilthaw hi a hriet le inruolin mâk man leh nam dok nghal el a tih ti ring a um.

Esau le Jakob hai unau kha phing sunga an um lai daia Lalpa ngeiin a upa lemin a naupang lem rong a bawlpek ding thu a lo hril ta kha Rebek hin a lo theinghil el am an ta ding chuh! Rebekin Jakob ditsak bika Esau malsawmna dong ding thukhel hrila a bawa an bawthlakpek el hi remruottu lo remruot dan hrim ning a tih tia pomzam el chu a’n dik chie dim aw? ti khom hi ngaituoum tak chu a nih. Thukhel hril le mi hlem hmanghai hi Pathienin a theidazie chu ei Baibul bung le chang tam takah ziek pek ei nih. Hieng kher kher hin lo thaw naw hai sienkhom Pathien chun kong dang le lampui dang hmanga Jakob hi malsawm dan a hriet tho awm vei leh ti dingin a um. Ana hlak chu, Jakob chun a pa masawmna dit le infawmin a nu remruotna chu a sie le a thra dawn chang loin a u Esau silfen le beram hmula inbelin a upa malsawmna dong ai chu a paa inthokin a lo lakpek ta a nih. Mani hamthratna ding a ni phot chun Jakob ang ela thieng le thieng naw dawn loa Esau silfena inbel khom poisa lo tulai ringtu intihai lai ei tam ta hle niin a’n lang bok.

A pain Jakob chu mal a lo sawmpek tah leiin a chungah Esau chu a lungsen em em a. “Ka pa ka sùn ni chun ka sangpa Jakob hi ka that ngei ngei ding a nih” a ta. Esau thu hril Rebekin a lo hriet chun Jakob chu a ko a, “I u Esau inhnemna tak chu i pa a sun ni nia sukhlum che a nih. Tu hin ka naupa inrang takin ka trapa Laban kuom tieng Haran-ah tlan hmang rawh. I chunga i u lungsen a dam a, a chunga i thilthawhai a theinghil pha leh hung hril ka ti che a, chu pha chun hung kir chau rawh. Ieng tin am ni khat thilthuah inpafain ka chân el ding cheu a na?” a ta. Jakob malsawmna dong chu hlimna nekin tritna le lungzingna sukpungtu chauh a hung ni tah. A in lum chu suoksanin, iengtik khawtika a la hmu lo, a pu Laban umna Padan Aram tieng chun a tlan hmang ta a. Rebek chun a hmangai em em le a disak leia a upa malsawmna dong ding chen a pasal hlema a’n chuthlakpui Jakob chu ngai tak pumin an threpui tah a nih. Mani tu ra hlak chu sik lo thei a ni si nawh.

Chuong ang bokin nupui tam takin nau seng seng lai thlei bik neiin an unau danghai theida an inhlawtir a, unau karah intuithlarna chen a ra suok hlak. Nu le pahai hin ei nauhai ei hmangai luotin suol ding khoma ei phal naw a, ei ring phal bok ngai nawh. Sienkhom hriet naw karin chu hmangaina mitdel chu Setanin remchanga lain mi tam tak a fen hmang a, nuhai ta dinga phurrik le pahai ta dinga beidongna an tlun hlak.

Pathienin Abraham chu ‘malsawmna ni rawh’ a lo ti ta ang hrim khan, Abraham chun a naupa Isak chu mal a sawm a, Isak chun a naupa upa lem Esau chu mal sawm a tum lai khan Rebek le Jakob chun an pa Isak hlemin a malsawmna chu Jakob ta dingin an lo inchu thlak khom lo ni sien, Abraham kuoma Pathien thutiem chu Jakob chunga chun a tla ta tho tho a nih. Genesis 28:10-15 ei tiem chun Bethel a Jakob manga a thil hmuhai ei hmuh, “Kei hi i pu Abraham le i pa Isak Pathien chu ka nih, Nang le i thlahai kutah i zalna ram hi peng ka ti che a, i thlahai chu hnuoia pilvut anga tam la ning an ta, sim le hmar, sak le thlangah la um dar an tih. Nang le i thlahai leiin hnam tin malsawmin la um an tih. I kuomah ka um a, i fena taphotah veng zing ka ti che a, hi rama hin thruoi kir nawk ka ti che. Ka thutiem hi ka hlen hmakhat chun thlathlam naw ning che” a ta, chuongsa khom chun Jakob chun a khel hril ra chu a sik tho tho nin an lang.

Jakob chun Rachel hlaw dingin kum sari a pu rong a bawl a, a hun tiem a hung tlung chun a pu chun hlèmin zanah Lea chu a pek ta lem daih a, kum sari dang a pu rong a bawl nawk a Rachel chu a hlaw ta tr awk a nih. Chu hnunga khom chun ran hlaw dingin kum ruk a pu rong a bawl nawka, chu taka khom chun a pu Labanin a hlaw voi sawm rau hlemin a sukdanglampek thu ei hmuh (Genesis 31:41).

Pathien chun Abraham le a thlahai kuoma a thutiem chu a sukpuitling hmakhat chun a thlathlam naw ding zie chu Genesis 28:15 ah ei hmu a, amiruok chu an tu ra chu an sik tho tho a nih. Eini tulai ringtuhai khom hin Pathien lunginsietna zara a naupa Krista Isu ei ringna leia ei sandamna hi a bo naw ding a ni lai zingin, hi khawvel thil le inzoma tisa chak zawng le lawm zawng thawtu chun a tu ra sîk ve ngei a tih. Pathien hi nuisaw chi a ni nawh. “Chuong nia hai chun mihaiin, ‘Pahaiin grep thur an fak a, an nauhai ha a suktrim’ ti dam hi ti nawk ngai ta naw ni hai; chuong nek hmanin mi tinin mani suol thaw thipui an ta, grep thùr fatu ha chu trim lem tang a tih” ti Jeremia 31:29-30 le Ezekiel 18:2-4 ah uor taka hrilin ei um a ni kha. Ei thilthaw tinrengah fimkhur nawk zuol ei tiu khai!

KEIVOM RUN (Greater NOIDA)

17 May 2012.

Hmar Martars Day hi Mizorama cheng Hmarhai pawlitics-in a hung cho suok a nih. Lai, Mara le Chakma hai nei Autonomous Distict bek suol nuomna leiin July 3, 1986 khan Aizawlah pawl pakhat, Hmar Association (HA) an indin a. September 22, 1986-a Sakordaia an inkhawmin HA chu Hmar Peoples Convention (HPC) tiin an thlak a, Autonomous Distict hnina Memorandum khom Mizoram Governor kuomah an pek a. Ngaisak an hlaw naw leiin March 17, 1988 khan Indian Prime Minister kuomah Memorandum an thè lut nawk a. PM ofice chun an thil hni tak hung hril sa lovin, lekha inchukna tienga an harsatna chu thra taka somdawl dingin Mizoram sorkar a hang hril a.

Chun, January 21, 1989 khan Chief Minister thar Lalthanhawla an inhmupui a, an hnina chu ngaiven dingin thu a tiem a, sienkhom ieng khom hriet zui a ni nawh. Hienga an khawk pei lei hin tharum thaw loa ri siem thrain an hriet a. March 28,1989 khan an biel huop sungah darkar 24 sung band an huoihot a. Mizoram Armed Police (MAP)-in indawina nei dêr lovin tlawmngai pawl hai hi a vuok tawl a.

April 16, 1989 khan HPC chun nasa nawkzuolin darkar 144 sung band an huoihot nawk a. Hi tum hin MAP chun rawng zuola hmet dei an tum leiin mi tam tak an vuok hliem a, nuhmei le naupang tamtak hospital a admit ngaiin an um a, thenkhat lem MAP vuokna leia piengsuol sawng ta khawm an um. Hi tuma hliemhai chu Churachandpur tieng an thawn tung zut zut a. Chuonga buoina a hung sosang tak lei chun an nuom thu khom ni loin silai chawia ram rawl pawl Hmar Volunteer Cell (HVC) an indin a, silai piellungin an indawr tan tah a nih.

Chun, hieng ang hin thil a hung tlung tah pei a. May 16, 1989 hin Sub-Inspector Vanlalauva, (Prasenjit Biswas le C.Joshua Thomas buotsai Peace in India’s North-East:meaning, metaphor and method-2006 a ziek danin) sipai bâng, huoisen leia chawimawina (gallanty award) khom vawi 60 neka tam hiel dong tah le MNF sipai khawm 50 neka tam lo kaphlum tah tu nia an hril chun MAP tieng a hung inrawi a, Hmar Volunteer-hai chu Mizorama inthokin Assam ram chen Assam sorkar phalna khawm la lo le hril khawm hril lovin an hung hnawt lut a. Monierkhal Tea Estate an tlung chun muol pawngah Hmar volunteer hai chun an lo inchàn a. An silai puok hmasa tak chun Vanlalauva bawkah a ver sat a, bau khawm phawng hman loin a thi nghal. Sawt fe an inkap hnung chun MAP tieng mi 3 an thi a, Hmar Volunteer tieng mi 2, Lalhuoplien (Sakordai) le Lienhmingthang (Sartuinek)- an thi bawk a. Silai dukdak la nei lo an ni leiin an ruolhai ruong chu inkhawm hman loin Hmar Volunteer danghai chu him takin an inrel hmang a.

Lalhuoplien le Lienhmingthang ruong thu dur tah chu May 19, 1989 khan Silchar Medical Collegeah post mortem an thaw hnungin Cachar a Hmar thruoituhai kutah an pek suok a, an phu ang hrima hnam ta dinga martar chang tah ngirhmunah hlang kaiin, ropui tak le inza takin an vui liem tah a nih. December 1989-a Hmarkhawliena HPC Inkhawmpuiin hi ni, May ni 16 hi Martar Nia inser dingin an rel a, HPC sunga 1990 khan an hmang tan a. kum 1991 a inthawk khan Hmar hnam pumpuiin an hung inser tung ta pei a nih.

Aizawl: Hmar Martyrs’ Day hmangna dinga Chanmari Hall lo huol le a haw man pek ta sa nisien khawm CMYA inrawl leiin hall hmang chu voisun phal a ni ta nawh.

Hmang ma hi thlakhat hma a lo pek sa diem a ni a, amiruokchu “CMYA in Hmar autonomous district council an dit naw” thu public a an hril hnunga hienga thu hung um a nih.

Chanchin ei dawng dan in Berawtlang ah May 16 ni a Hmar hai ta dinga hun inser poimaw em em el chu hmang dingin Aizawl Hmar mipui an insiem.

Hi thu le inzawm hin Hmar nauhai thisen a “lum” hle ni’n chanchin ei dawng bawk a, amiruokchu ‘peaceful’ taka prokram hmang a ni ding thu hril a nih.

April is the cruelest month, breeding lilacs out of the dead land, mixing memory and desire, stirring dull roots with spring rain.-T.S.Eliot (1888-1965)

Keivom bilpui

April 24, 2012 Mauchâr. Ka naupa David Lalhmingsang le kan tlungna dinga an lo buotsai chu Mauchâr Village Council Secretary Vanlallien in a nih. A nuhmei hi Keivom a lo ni leiin kan màkpa a nih. Mak takin, Mauchâr-a hin Keivom in 29 zet an lo um chu tie! Cachara Keivom hlang umna le inlalna, ‘Aw Kan Hmar Ram’ ti phuoktu Lalkhum Keivom (1920-1997) inlalna le a thlan umna Kuokluong (Budonnagar) nekin an tam lem a nih. Iemani zat chu hungin an mi hung chibai a. An hmèl le changchavoi vêl khom Keivom tak a nih. Dannaranin Keivom ruol hi pauzo rak lo, inphalam hmel put, a lu neka a meitehema thrang, khawtlang ta dinga hnoksak lo, kohran tieng le thu le hla tienga inhmang mi, an ni tlangpui. Keivom ruol hi kan lo hâng deuh hlak hrim am a ni ding, ka nu, Pherzawl lal sungkuoa inthoka hung, ngo ve takin a mi hril dan chun, “In pu Bulhmang kha a hang dawn inrui deuh phuol pha leh, ‘Keivom ruol, Keingoa ka siem cheu’ tiin fiemthuin ka pa a soisak hlak. Mauchâra kan tlungna nu khom hin keivom nekin keingo tieng a pawl lem.

A hmaa ka hril tah angin, kan inzin lai hi hmarsak tlangrama thlipui hrang nuom hun a ni bakah kum 2012 hin furpui vanglai angin ruo a tam a, thli leh riel leh an inthuo a, khaw tinah in a mùt siet thu chu an titi zai thruoitu laia pakhat a nih. Zan khawvar deuthawin ruo le thliin a mi not a. Kan inhnàr riin mi sukin thei naw kan inlau kha thli ri le rangva inchunga ruo thûm chur chura sûr ri chun a hlân dai a, a tizie khop el. Kei chu tlangrama seilien ka ni leiin, sawt tak tlang hmu loa ka um hin ka thlarau a ngui a, a khuo a sik a, tlang ka hmu hin ka thlarau a keihar a, chona a mi pek a, ka chang a par. Rawsur ka hmu hin ka thlarau a kei har a, ka nuna thlaler a sukhnawng. Zana raw sur hmer hmer ri le imu mi zim chiei chiei lai hang infawp kara imu intuo tluka inhoi hi khawvelah a tam nawh. Tu khom hin nipui inthuok huom huom hnuoia inzin dinga kan inbeisei laiin, malsawm ruopui a hung lèng inhma leiin, tui harsatna khuoa hril, chu leia khaw hminga put hiel ni awm Mauchâr khom thral rum lai, April tlangah a hnawng dup el.

Nghil lo champha

Hi thil ka zuk inzawtna san chu kum sawt tak liem taa Pherzawla ka thil tuok rapthlak tak ka hril sa nuom lei a nih. Puithuna (superstition) ring mi ni lang chu, hi ni hin inzin kher naw ning. Mauchâr kan lut ni champha, kum 57 liem tah, April 24, 1955 chawhnung, sikul trina raw puta kan fe kha, sangharkhawthlir kan ti lai hmun kan hung khêl charin thlipui le rielin a ni nuoi a, thi loa kan dam khawsuok kha thil mak a nih. Kan umpui C.S.Row Riengsete le Fimlienvung leh kan ni a. Kan raw put chu lamlien koah intung a, a hnuoia inbik chu kan tum hmasa phot a. Sienkhom a hung hrang tak zet chun, chem ngei taka thing kau ei fik ang elin hmu thei lo thli kawlhnam chun thing kau lien tak tak chu a sok hmok hmok a, a sok nawhai chu a fen thluk a. Riel hlak chu kutpui tiet tieta lien hi a hung inbaw thla huk huk el a. Ram tieng kan tlan a, ka ruolhai pahni chu inkhieng lien tak, thliin a mut thluk hnuoia chun an inbi a. Kei chu lamlien hrawin ka tlân pei a. Lamlien chunga cherpui thing, mi pathum pom vela lien chu a hung mut thluk a, ka tlân pel hman char a, a zung inkarin pil a hung vor thlak chun a mi hung phû sung el a. A vela hnuoi chu an hning dut a, ka hamhai taluo chu ka tlu a. Ka hang tho chun kuo phakin cherpui thing chu ka sirah nu buon hrât lo zalin a lo zâl ruou el! Ka lawm, Lalpa.

Ka la dam zing a nih ti ka hriet suok chun lam chung tieng, phùl hmun, thing a tam nawna tieng chun ka tlan tung a. Theichang, ui pum tiet vela lien, tlang châra zung nghet tak phan chu ka bèl a. A zik hnuoi phit hiela nain thli chun mut sien khom a tlu nawh. Riel le ruo chun chàt zâi a rêl el naw a, saihlia inper angin inri fok fokin a mi hung deng zot zot a. Ka tuolzakuo chu ka hlîp a, ka lu chunga chun domin, theichang bula chun ka tuktuum inthrung a. Kutchâng inri foka a hung dèng chàng chu rem lo deua thin hlawp hlawp naw chu chang dang a um nawh.

Riel le thlipui a hung rê deuh chun ka ruolhai zongin ka suok a, rawl tawpin ka ko khek a, ka rawl chu thli hrang vut vut chun a lèn hmang a, mithi khuoa tlang insam ang a nih. Ka raw put kan intung khawmnaa khan an um ringin ka tlan phei a, sienkhom a chung ela vangsîp lien tak, thliin a mut thluk chun a lo del hmât vong si. Lovai inlawi hun a ni leiin, mi incha ding zong dingin khuo tieng panin ka hung tlân a, lampui chu thing tluin a dang rawn leiin fe hrat thei a ni nawh. Lovai ka hmu hmasa takhai chu thil umzie hrilin thu ka’n cha a, ram tieng pan chun ka ruolhai zong dingin ka kir nawk a. Lam sir intluonin rielin vate a deng silhai, vuong thei loa inban lawp lawp le inhrâm rong rong an tam em em a, hang thrangpui ngaina hlak chu a um si nawh. Thlipui kan tuok hi fîng khat vela liena thli hlawm inleng a ni leiin, a lampuia thing le ruo chu chem ngei taka buor bil sam fai ang elin hlà muol a nei nawh. A tukah thlipuiin rampui a hrawna lai chu hei thlir inla, lamlien sat thar hlol ang elin a’n lang. Riel khom a tlak rawnzie chu, a luong khawmna lam sira chun dung chen chena insangin an intieng hnèr hnûr a, kâr khat sung khomin an intui ral nawh.

Hringnun khaltu

Jona hai, Paula hai ang ela a tak ngeia thlipui triumzie tuok tah ka ni leiin, iemani chen chu thlipui hi ka trì thei khop el. Amiruokchu, hmangaina thilthawtheizie tlang insampuitu, Amerikaa an guru Leo F. Buscaglia (1924-1998)-in, “Mihriem nun khaltu kut thil pahnih, puo tieng le sung tieng a um a. Puo tieng thil, thlipui dam, lirhning dam, tuilien dam, sietna chi hrang hrang dam, natna le hrileng dam chunga hin mihriemin thu ei nei tlawm em em. A poimaw tak chu sungril tieng thapui a nih. Sietna hung tlunghai chu iengtin am lo dongsawng ka ta? Chuong thil ka dongsawng dan ding chu keima lieu lieua innghat a nih” (There are two big forces at work, external and internal. We have very little control over external forces such as tornadoes, earthquakes, floods, disasters, illness and pain. What really matters is the internal force. How do I respond to those disasters? Over that I have complete control) a ti angin, khuorèl thil tlunghai hrim hrim hi mihriem kuta innghat a ni naw a, thaw thei ei nei tlawm. Amiruokchu, trit amanih le lo lungngai sap rakin umzie a nei nawh. Sawl thlawnna mei mei a nih. Chuleiin kum sawmli vêl liem taa inthok khan kei chu ka thaw pei ta nawh. Lungril taka, “Damsung mi tuok ta po, i tir ni sien, A’n hoi le rinum khom hi lawm ka tih” ei ti ngam pha leh chu rama chun ei lut thei chauh a nih.

Ditsakna ruoi

Chuleiin, Mauchâra kan riek hmasa tak zan khom, ruo le thli a hrât deuh changa in hnuoia kèl inbe throtin a mi sukthrang zeu zeu ti naw chu, thlamuong takin imu kan intuo a. Ka zing tho chun, kèl khan kan hung inzin lawmlutna ruoipui chang dingin bêlpui a lo nghak hman dèr tah a nih. Lawmum bèk bék ni si, sienkhom inphalamum ka ti hlak chu, inzin chang buoi èm éma an mi lo mikhuol baka ran thata ruoi an mi siempek hlak hi a nih. Mauchâr khaw mihai lem hin chuh thingtlang khaw tam tak nekin ei suotlang hluia ei Eden nun ze mawi kha an la kol rawn a, van leh an inkar a la hnai a, an trong a hawikhawm a, châm dinga an mi hang thlo lem chu, ka mi thruoi David Buhril le ka naupa David Lalhmingsang tieng ngha a, Peter dungthul a, “Hi khuoa chàm zing hi ei ta dingin a thra. Bekte pathum khawng ei ta, in ta dingin pahnih, ka ta dingin pakhat” ti hlut nuom a um el a nih.

Fienriel bûk

Tlangram le phairama khom eini khawvela inzin chânga thil buoithlak pakhat chu insilna le inzun-inhnawmna in a nih. Ei thokrim ra, ei baua lut po po a luong suokna le inzak loa ei inphor vongna hmun um sun a ni leiin ram changkanga chuh khum pindan tluka fai le inhoiin an siem hlak a nih. Zing tho, thingpui inhnik tak dawn zoa ngaingam taka Europeon-sitail inhnawmna ‘Commode’-ah inthrung a, inhnawm puma newspaper-a khom Editorial Column ngei hang tiem veng veng chu dam man a um hlie hlie a, chu ruol chun hrietna thar le varna thar ei dong treuh bok a nih. Chu nun chu kum sawmli chuong hi tuk tin deuthaw ka lo thaw tah hlak a ni leiin, a boa khawsak a ngai chang hin kal a kim naw tlatin ka hriet hlak chu tie!

Sapramah in hluo ding ei zong changa a in neituhaiin an min hluotir nuom ding le ding naw an sukthluk hmaa an indon chîk laia pakhat chu choka le insilna/inhnawmna in ei enkol dan a nih. Eini khawvel chiktea khom hin ngaituona changkang le hnufuol inkar inkhìna chu hi thil ei ngaithà le thà naw-ah a ni sei khopin ka hriet. Inhnawmna in nei lo ei la um bakah a nei ve hai khomin inchêp tak, ei hlaa, “kot chu kùna lut a nih” a ti ang deuh khan kùna lut ngei, kotkhar nei loa puon zar fawm ngai a ni deu vong. Kan nauhaiin ei khawvela inzin an huphurna tak chu fak le dawn ni loin ei thil hril hi a ni hlak. Inhnawmna tlak fienriel bûk siemna dingin ni tam le tha tam a ngai nawh. Panthlang elah thing le ruo lak ding a umna hmuna lem chu ni khat thil thua bawl el thei a nih. Sienkhom, a ngaisak naw chun an thaw chuong nawh.

Vangneithlak takin, Mauchâra kan tlungna ina kan fienrielna bùk chu leidâr le hmol chawi ngai loa inzo theina a ni leiin kan vangnei èm èm.

Tlâng inkhawm

Zing dar 10:30-ah Community Hall-a a khawnawta inkhawm dingin HSA thruoituhai le khawtlang thruoituhai chun prokram an siem a. Inkhawm zoah Sinlung Hills HSA Joint Headquarters thruoitu thar thlangna le rorelna nei dinga ti a ni bok a. A khawnawta umni khama hmang dinga inbuotsai an ni leiin, loriek le ramrieka fe dinghai khom an inthrultir vong a nih. An khawtlang inthuruol dan hi kum sawmnga lai liem tah, keini hun laia khawtlang inthuruolna ang kha an la som hring pei a nih ti a chieng a, enton tlak tak an nih.

Kan tlung chun Hall inleng lo khopin mipui an lo inhnaw bit ta a. Session khatna chu ka thuhril ngaithlak a ni top a, a thupui dinga intuk bik ieng khom a um bok nawh. Mipui hmèl ei en chun an mitah beiseina êng a de a, an nà chu thu thra le thil thra chanchin hriet nuomin a kap a nih. An inthuomna enin, Aizawl District-a cheng seng seng, Aizawl tlanga chenghai thuom le anni thuom chu hnuoi le van anga inthlau a nih. Chik nawkzuola ei zuk bi chun, an ram hausakna le an thokrimna rà po po deuthaw chènraltu, vai ruol sora an rama thing le ruo thrá thrà tol hmangtu chu Aizawl tlanga thrunghai le an sangawizawnpuihai an nih. Compensation lak theina hmun taphot deuthaw chu Aizawl tlanga inthrunghai ram inchawk hnung deuh vong a ni thu chu tlâng titi tak laia pakhat a nih. Hausa le rethei inkâra chadan hi kuta inkhi ruol a ni ta naw khom a hoi khop el. Zalenna par zu indawk thau lênglung an pung laiin, inrim taka thok thingtlang mihai chu a ni têlin an chèr tiel tiel si. Chuong dangchar le phingtramhai kuoma chun kei, mikhuol lenglak hin ieng thu am hril tang ka ta? Ram hmasawn le changkanghai thaw dan hril lang, a taka an fak thei chi a um si naw chun iem a trangkai a?

Kum 2009-a Jampui Hills ka sir truma Behliengsip khawthlira inthoka ei ram ka thlirna thu ka zieka chun “tuthlaw le laptop civilization” inkara khawsa ei ni tak thu ka hril a. Uong thuah mi ngaipek naw hram inla. Kei, Pherzawl tlanga vok êk dùra inthoka zung kei hin Pathien thruoina zarin, thiemna thla zara vuongin, civilization tam tak chawm hlênin, tuthlaw civilization-a inthokin laptop civilization-ah ka chuong lut a. A kâr inhlatzie khom a tongtu ka ni leiin ka hriet. Tak ram nek hmanin mang ram a hoi lem chang a um. Sienkhom, ka nina tak chu a la danglam chuong nawh. Ka hmaa inthrung, ka mihai leh hin hna khat suok, trong khat hmang, buchangrum le sithu/sathu changal hme inhnikna hre ve ve, kan lawmna le lungngaina intrawma hril tlang thei kan nih. Amiruokchu, tak ram le ngaituona rama kan chengna khawvel chu khawvel dang daih a ni bok si. Kei chun anni ka hriet thiem a, an ngirhmun lo pal tah sa ka ni leiin. Anni ruok chun ka ngirhmun tlung chu an la pal phak si naw leiin, anni le intuok ding chun an sumphuka ka hung trum a ngai.

Ka hril hmain ka naupa David Lalhmingsangin Saptrongin a hril hmasa phot a, chu chu David Buhrilin hnesaw takin Hmar trongin a’n let a. Khawvel le inpawna dinga hmangruo poimaw chu Saptrong thiem a nizie thu a hril a. Chu zoah David Buhrilin a hril ve a. Kha hma, kum iemani zat kha hieng laia chenghai ngirhmun hi chik taka a hmun ngeia Social auditing an thaw leia kelawnga furpui hnuoia a suk a tunga a lo pal tlang tah sa vong a ni leiin, hieng lai biela khuo ei lutna taphotah David Buhril chun chongpu nina a chang thei vong a, chu chu tu dang neka a chungchuongna a nih. Hi hi tak rama ram le hnam hmangaina sikula inchuk suokhai chauh naw chun, College le University-a inthok amanih, thosilen hnuoia ngaituona invak vela ram hmangai raka inthoka hlaw suok thei a ni nawh. Chuleiin, a thu le hla an fàk a, mi ringzo le lawm a hlaw. Scottish historian, essayist le mi dawnril Thomas Carlyle (1795-1881) chun, hieng ang mi hi a nazongin an suok ngai naw a, ram le hnam tluksiet tungdingtu dingin kum za dana dam, kum sang dana dam Pathienin hnuoiah a hung tir chauh hlak niin a hril. Chu thu chu a lekchar lak khawm, On Heroes, Hero Worship and the Heroic in History (1841)-a a thu zaipui tak a nih.

Ka unauhai kuoma ka hril ding chu, thiemna leilak hmanga mang rama um anga ngai khom hi tak rama inchangtir thei a nizie thu a nih. Keiin ka thaw thei chun anni khomin an thaw ve thei. Ei thluok hi hnam var taka ei ngaihai thluok tluk, an naw leh a neka thra lema Pathien siem a nih ti ei pom a ngai. Tu thluok nek khomin ei thluok hi a nèp bik nawh ti hriet chieng a trûl. Chun, thil thaw tum rikngota tlak loa a tak taka thaw a ngai. Sukpuitling ding chun sekhon tin, minit tin, darkar tin, ni tin hmang hlawk a ngai. Hmang hlawk ding chun a hlutzie hriet a ngai a, taimak a trûl bok.

Miin an thaw thei chu thaw thei ve chauh khom ni lo, a neka thra lema thaw thei dinga inring le chu chu a taka thaw suok dinga inbuotsai ding a nih. Harsatna hi chonaah ngai a, malsawmna hnâra inchangtir ding a nih. Huphur nei lo ding. Huphurna chu mani inngaihnuoina lungrila inthoka suok, thaw thei lo dinga inngaina lungril a nih. Ei inngaitlawm ding a na, ei inngaihnuoi ding a ni nawh. Inngaitlawmna chu hratnaa inthoka suok a nih. Entirna thra tak chu Isu Krista a nih. A’n ngaitlawm a, sienkhom a’n ngaihnuoi ngai nawh.

Session khat kan zo chun cultural dance mawi tak el an inentir a, chawhma prokram chu zana a nek daia ropui le inhoi lema sunzom dingin kan chawlsan hri a. Vangduoithlak takin, nupui pakhat a hming Nguri, hun iemani chen damlo chu a thi leiin zan prokram chu kan thrulh tah vong a nih. HSA palaihai ruok chun rem le rem loin chawhnung tieng rorel inkhawm le inthlang an nei a, an hung san an tlingtla thei hram a nih. Thil mak tak el chu, 2008-a ka naupa David Lalhmingsang ka’n zinpuiin Pherzawl le Senvon-ah mithiin a mi nang ve ve leiin kan prokram ruohmang a khakbuoi a, tuta trum hi kan tuok voi thumna a ni tah. Prokram buotsai lawk tah, mithi leia thrul hi, a ram pumin sûn dinga sorkar thusuok a um si naw chun, hmun danga chuh an thaw ngai nawh. Eini khom hma hung sawn pei ei ta, umni khama siet tuokhai ei insunpui diel diel hun, ei Eden hlui hi ieng angin thlakhla inla khom, ei bansan hun a la um ding a nih. (May 12, 2012 Delhi)