Prepared by L.Keivom, Inpui Columnist
Tu lai ni le thla le kum tiemnaa kawlendar ei hmang, Gregorian Calendar anga sut chun Isun a hun tawp a hmang dan, a chanchin ziektuhai rikawta inthoka suiin, hieng ang hin a nih:
April 2, 30 A.D Sunday: Lal angin Jerusalemah a lut a, a lut hmain Jerusalem a trà khum; Messia angin an lo chawimawi; Jerusalem tempulah a lut a, a fang vel; zan tieng Bethani tieng riek dingin a kir nawk. Hi ni hi Palm Sunday (Tumkau Ni) tiin ei hmang.
April 3, 30 A.D Monday: Bethani-a inthokin zing tieng Jerusalemah phingtrâmin a hung kir nawk a, theichang a hal hlum; tempul a’n thiel fai; tempulah mitdel le kebai a sukdam; Bethani tieng bok riek dingin a kir nawk.
April 4, 30 A.D. Tuesday: Bethani-a inthokin Jerusalemah a hung kir nawk a, a theichang hal hlum thu a hril fie; ngaidamna poimawzie dam, Pathien rongbawl le ama ring a poimawzie dam le thil dang dang hrilin tempul-ah mi a zirtir; Sanhedrin-haiin an inselpui a, anni donna dingin nau pasal pahni tekhinthu le Grep huon tekhintu (Mat 21:28-32; Mk 12:1-16) a hril; Sanhedrinhan man an tum leiin tekhinthu Mt 22:1-14 a hril; Heroda pawla mihai le Farisaihaiin man an tum (Mt 22:15-22); Sadukaihaiin a thuneina an cho (22:23-27), a seldong tawl; Farisaihaiin khit tumin thu khir tak tak indonin an inselpui a, hrem an la ni ding thu a hrilpek (22:34-46; 23 1-36; Jerusalem siet ding thu a hril a, a trà khum (23:37-39; khawvel tawp ding le inchiknahai le thil dang dang hung inlang dinghai a hril.
April 5, 30 A.D. Wednesday: Juda Iskariot-in Isu inmantir dan ding a phan a, sienkhom Sanhedrin lai chen khom ama ringtu an pung (Mt 26:1-6). Jerusalemah a riek.
April 6, 30 A.D. Thursday: Zanbu nuhnung tak buotsai dingin a zirtirhai pahni a tir (Mt 26:17-29). Jerusalemah a riek.
April 7, 30 A.D Friday. Judahai ni tiem dan chun nisa tlak charin ni a tawp a, a zinga niin a sunzom nghal a. Eini tiem dan ruok chun zan dar 12 zoa inthoka intrana zan dar 12 nawk chen hi ni khat a nih. Judahai ni tiem dan chun Zirtawpni intranna chu eini ni tiem dana Ningani zan tieng nisa tlaka inthokin a nih. Chuleiin, eini ni tiem dana hril chun zanbu an kilna hi Ningani zan tieng, thimbut vel a ni. Judahai ni tiem dan ruok chun an bu fakna hun hi Zirtawpni intran hlim, zanah a nih. A zirtirhai zanbu a fakpui lai le an fak zo hnungin thu tam tak inchain a zirtir a, chu zoah Getsemani huon tieng a panpui a, chu zan la la chun an man a, a chungthu an rel sok sok a, eini hun tiem dana Zirtawpni zing tieng dar 9:ah kros-ah an hemde. Chawhnung dar 3-ah a thi a, Jerusalemah an vui.
Post a Comment
Comments not related to the news or article may be deleted.