Hmar Inpui Vice President-in Manmasi Channel A Hawng

By Timothy Z. Zote

Date 23 April, 2012 ni khan ZRS Cable hnuoia insuo ding Manmasi Channel ropui takin VTI, Rengkaiah a hawngna hunser hmang a nih.

Hi hunser hi, Dr. Rosiem Pudaite, Chairman,HACS –in thiem tak le hnesaw takin a keihruoi a. Hun hawng tawngtaina Upa K. Lienzathang-in a hmang zoin Tv. Lalzarlien Zote –in Kanaan phaizawl “ ti hla Guiter leh thiem taka a sak zovin Pu R. Tawna Khawbung,Secretary,HACS chun Keynote address mawi takin a nei.

Hun pui tak Manmasi Channel chu Pu Joseph D. Hmar, Vice President, Hmar Inpui chun thuhrilna tawite a nei zovin hawngna a nei, Rev. Ros Infimate-in Pathien kuomah inhlanna a nei nghal.

Ms Lydia chun Pathien inpakna hla mawi takin a sak zovin, hieng a hnuoia mi hai hin thu hril tawi an hmang:

Pu S. N. Ngurte, Vice President, HACS chun “ Manmasi ei thlatu a ni dan le History, culture le inzawmin hrilna hun a hmang”. Dr. L. Fimate, Chairman, Manmasi Channel Management Committee chun “ Manmasi Channel chu ei hnam ta dinga hmasawnna kawtsuo tha tak pakhat a la ni ngei a beisei thu le, mi tu el khawm, thurawn tha le ngaidan tha nei hai chun mi hung hril pei inla “ tiin mipui a ngen.

Pu K. Lalremruata, Proprietor, ZRS chun “ thu tha tak le pawimaw tak tak hrilna a nei”

Pu L. Muonthang, President, HAA, chun “ Thei tawka hmalak a tul zie le Artist hai kuomah thu cha tha tak tak” hrilna a nei bawk.

Pu Thangsawihmang, Executive Member, HACS chun lawmthu hrilna a hmang zovin, Rev. Rokhum Zote-in tawngtainain hun a khar.

Hi hunser hmang ding hin mi iemani zat fe khawm a ni a, Ei hnam sunga Artist inlar em em Tv. Lalsanglien Zote khawm thangin thuhril tawi hai khawm hmangin, HSA thuoitu hai le mi pawimaw tam takin hi hunser hi an uop a nih.

Hmar Arts and Culture Society chun hi Manmasi Channel le inzawma thu rawn tha le ngaidan tha hai chu a lawmlut zing thu puongin thei tawka mi lo cooperate dingin Manmasi thla hai chu a ngen tak zet a nih.