Musical Nite with Mizoram Gospel Singers

[From Pu LALCHUNGSIEM, HYG]

August 2, 2009 zan 8:30 khan Mizoram hlasakthiem thenkhat hai le HCFD Thalaipawlin Apostolic Methodists' Church, RK Puram, New Delhi a hlaruoi a buotsaia, a thang hai kha chu inhawi an ti vieu niin ka hriet.

Pi Lal Remsiemin a hlaphuok hai Music Video siem a tum le inzomin Chandigarh, Shimla ...etc a shooting nei dinga hung an nia, a hung hai po chu Joseph Zaihmingthanga, Joy Zairemmawia (Youth Icon 2007), Caroline Pakhuongte, Lalruathluii (Hluitei) Melody Zothansangi Hrangchal, Lalmuankimi Khobung (MKi) Zoramchhani (Youth Icon 2006), PBK Liankhuma, Rosy,Maremi le Lalramchan Amaw hai annih. Vangneitlak takin Delhi a Pathienni an hmang leiin Youth & Music Department, HCFD chun hi programme hi hmawsarum in a lo neipui anih.

Hieng hlasakthiem hai hin HCFD Sunday inkhawm a khom iemanizatin hla an sak a. Inkhawm tinah DHWA Executive Committee haiin Pu Benjamin Khobung inah inpawlpuina neiin thlaithleng a kil pui. Thlaithleng kil puina programme hi Pu C.Thant Khobung, Vice Chairman, DHWA in a keithuoi a, DHWA Adviser Pu Lalruotthang le Pi Lalremsiem, a in neitu Pu Benjamin Khobung hai bakah Pu Darsiemlien Ruolngul, Chairman DHWA haiin thutawi hrilna an nei bawk. Chun anni rawi aiawin Joseph Zaihmingthanga- in thu tlawmte a hril ve a, Hmar hai tupa ani thu dam le Hmar laia inzel inhawi a ti thu a hril a. Chun harsatna nasatak fethlengin rawngbawlna a ngaia an hung ani thu a hril bawk. An hungna lampuia Guwahati phak tawm lai an chuongna Tata Sumo a an accident a, Mki lem chu a lu ah hmun 25 zet an thui ani awm. (an thui lai thlalak pakhat attachement ah)

Hi Musical Nite programme hi hun chopchil tak kara buotsai a ni leiin hang puongzarna hun khom a um nawh a. Amiruokchu beisei bakin mipui an hung tha hle. Nunghak tlangval bakah nupui papui, naupang leh, biekin keng lo hielin fe khawm a nih.

Nunghak Thlirnawnmawi le Esther Lalramhuol haiin hnesaw takin programme an keihruoi a, Upa (Dr) Lalsiemlien Pulamte’n welcome speech a nei zovin hlasaka inpawlkhawmna tan a nih. Mizoram hlasakthiem hai hin solo, duet le group-a an sak bakah HCFD a inthokin Tv.Joseph Pakhuongte, Tv,Lalngailien Joute, Nk Joselyn Joute le Nk.Ruth Ruoltinsing hai khoma an sak bok.

Hieng hlasakthiemhai hi TV le video-ah an hlasak ei lo ngai ta sa deu vong an nih a, amiruokchu a tak ngeia an hlasak hang ngai chu a lo danglamin an thiem zie ei hriet zuol. Mizorama inthoka hung hlasakthiemhai hin Hmar hla khom hnesaw em ema an sak thei hi ngaisang an um pha nawk zuol. Hluitei, PBKa le MKi haiin Hmar hla an hang sak lem khan chu mipui khawmin an kut benin an lo zawm duolduol el.

Kha zan khan thawlawm dawl ania, chu taka inthok chun cheng sang li, Mizoram a inthawka hung hai hi inhlan an nia, chun DHCF Music Video Album copy khat senga pek anni bawk. Hi zan hi Pu C.Thant Khobung a piengcham kum 51na le a lo intuok char bawka, Air Condition-in an chong a, boruok inhawitak hnuoiah, an video a vawi tam ei lo hmu/ ngaithlak ta hlak hai LIVE ngeia an hlasak hang ngaithlak kha chu inhawi ve tak anih.