Bangalore Hmar Freshers' Social 2009

[Thlalak: Bangalore a hung thar mi 30 vel laia thenkhathai. Lalmalsawm ]

Bangalore, August 16, 2009: India IT khawpui a Hmarnauhai chun tarik ni 15, August thla khan Freshers' Social 2009 chu inhawi takin Lakshmi Party Hall, Kammanahalli hmunah ruoithe in an hmang.

Inkhawmpui hi Hmar Students Association, Bangalore Branch, in a ibuotsei a nih.

HSA hotu tienga inthawka chanchin ei dawng danin mi thar 30 vel an nia, amiruokchu mi 15 chauh hi ni hin an hung thang nia hriet anih.

Kum dang naw angtakin, prokram chawhnung dar 3 a inthawkin tan ding ti a nia. Amiruokchu, hall hmang hmasa han an prokram an zo fel vat theinaw leiin zantieng dar 4.30 velin prokram tan a nih. Kum dang po po, 'hall' in member hai a nghak hlak kha a nia. Tukum ruokchu member ha'n hall an nghak ta lem a, anhnu khawm an um mang nawh.

Mipui hlasak zovin Pi Lalrodang Kungate in trawngtaina'n hun a hawnga. Chun HSA president Tv Rama Khobung in Freshers a lawmlut hai chuh adviser Pu Robert L Sungte in infuina thucha a hril. Chu hma chun, Fresherhai stage a an ngir lai zing mipui le prokram thuoitu Nk Merina Infimate le Tv John Ringsan han indawnna tam tak an nei tawl. Fresherhai lai hin Haflong nunghak Rohlupui mipui han an 'sawp' nasa taka chu Miss Fresher dingin an thlangtling nawk.

Fresherhai le inhmelhrietna zo hin inchukna tieng panga pasi hai chu education secretary le president ha'n chawimawina lekha an pek.

Hi zo hin May thla a HSA, Bangalore Branch in a ibuoipui Hmar E-Bible chu Rev Lalsandam in mipui hmangthei dingin Pathien hmaah hawngna a nei. (Hmar-E Bible Hawngna tiem rawh)

Bangalore Hmar Christian Fellowship le HSA in hun iemanichen a inthawka an lo ngaituo tah, Bangalore Hmar Emergency Fund khom hi ni hin mipui hmaah a kalhmanghai BHCF secretary Pu Jonathan Kungate in tiem lang na a nei bawk.

Chun kum tinna election nei hlak a ni ang bawkin kum 2009-10 sunga HSA thuoitu dinghai thlangna nei a nih. HSA Thuoitu thar 2009-10 tiem rawh Pu Robert le Rev Lalsandam han vote an tiem a, chu kar lakah nunghak le tlangval hlasakthiem tak takel han mipui an lo in awi a; lamzawla kut le ke then el dittawkloa kawng hei awt awt an bo nawh. HSA games and sport secretary Tv Zairemthang meuh mipui hmaah Michael Jackson lam dan a thaw ngam tah chun prokram an hawi hle a nih tu'n am ti naw ngam an ta!

Ringbakzetin, tu kum chu, Bangalore Hmarnauhai lai hlasakthiem an lo tam a, prokram an sukhoi hle.

Vairampura Hmarha’n nipui eiin ser changa thupui lo ni rawp hlak: 'A lam thei lam ei ta,...an rui thei inrui ei ta', ti kha Bangalore hai chun 'An rui thei inrui ei ta...' ti po peiin Freshers Meet 2009 chu zan dar 9.30 vel chen inhawi ti takin an hmang a nih. Prokram zo fel a ni hnungin bawngsa-chartang le arsa-hmepawk in an phing an chawm bawk.

[Thlalak: Vanglai hun hrietzingna dingin member thenkhat 'stage'ah an in 'pose'.]
Thlalak Danghai En Rawh