Hmar Thanghlui Huna Thlarau Suol Hai

By Pu MK
Hmar upahaiin thlarau suol hming iemani zat zet an lo phuok a, chuonghai chuh hienghai hih an nih:

Khawhri - Hming tlanglawn a nih.

Khawchawm - Ar la hlak, a ring herkawi a, a thisen dawn hlak.

Ramhuoi - Rama cheng khawhri

Nelhau le a rawihai - Khawhri ruolkhat, a hotu nei an nih.

Kelet khawhri- Khawhri hawn chikhat, a ke a letlinga ngha, an hnung ei zui ding a ni khawma an ke hniek a letlinga zui ding.

Lasi le lasawi - Khawhri nunghak, mihriem mit hmua hmel tha em ema inlar hlak.

Chawngtinler - Khawhri lalnu; a ram nghak/a ram neitu; hmel tha taluo ringawt; sazuk, sanghal le sahrang danghai chunga thuneitu nia an ngai; Hmar pasalthahaiin sazuk an naw leh sanghal an kap ding phata a ruka lo tap hlak, pasalthahai hriet thei ding tawk chaua lo inhnik fat fat hlak. A kar chang chun pasaltha thenkhatin Chawngtinler sanghal chunga a chuong an hmu hlak.

Tulum - Mihriem thi hnung sunga lut nawk hlak khawhri; mi thi ta hnung a hring anga i'nchang tir nawk hlak khawhri.

Nuoia -Hi chu Baibul thumal le inzawm deu khawm a hawi.

Retrawt - Thilhring anga ngai, nisienlakhawm khawhri anga sin thaw.

Phungpui - Khawhri suol le mihriem zawl ni hlak, mi hratna mak tak pe hlak. Mi tium deu hai chu 'phung zawl' ei ti hlak.

Trau - Trau meiser sit khawm ei ti hlak. Lungtrau pahnam hming hung intanna khawm a ni nghe nghe awm ie.

Khawmu - Naupang inru hlak khawhri. Khawmu chawi ei ti hlak. Puitling khawm a'nruk chang a um ve tho.

Vanchunglaizuor - Van boruok laia cheng hlak khawhri, a chunghnung bik deuhai an nih.
Khuo - A nina hrilfie thei chie lo khawhri. Ramhnuoiah ei invak chang khuo'n a mi bel chun ei lam hraw ei inhmang chai a, ei intanna a bawk ei hung kir nawk hlak.