Hmar Fing A Tlai

By Lalremlien Neitham
May 23, 2003

Ei hnam unau danghai mi hmusitna tawngkam ei ti dim, ei hnam mizie an hmudan an hril ei ti dim, bau an nei a an tawng ve mei mei ei ti dim, ei lungril thienghlimtak lungsenna le thangtlawmna mi sukpawrche pek tuma an tawngkam lak ta laklaw ei ti dim.

Annawleh, Hmar nauhai ngaituona hi ei kum hmanglai le inhme lo raka changkang ei ni lei dam ei ti dim. Iengpo khawm nisien, tawng kha deu, ei i fak le lem thei bek bek naw tawl "Hmar Fing A Tlai", ti tawngkam naltak, unau thenkhat hai fiemthawna le innui vur vurna dinga an i hmang hlak hi ka tading chun a thlum a, inhnik ka ti a, ka Amen pui zan tawl e!

Ei Hmar hnam mizie tak tak hrelo, thei a kawr la khe hman lova, a puotienga a thur inhnikna zawng hlak mi, nunghak hmeltha le piengnal zet zawt, amiruokchu, nungchang tha rak silo, hlataka inthawka hang thlira a hmelthatna leia a nungchang khawm a tha tia ngaidan awlsam taka siem hlak tuhai tawng hmang uor ding chi reng ani ngei el!

Bakna thenkhat nei inla khawm, Hmar nauhai hi hnam zaidaw thiem le zaidam tak, thudik fepui le tan tlat mi, mani sietna ding ngaituo bek lova midang dawmsang lem hlaktu, hnam tawngtlawmtak, ringumna indiktak nei,bu a hangna hre a se chawt chawt hlaktu, hnam tlawmngaitak le mi inza thiemtak hnam niin kei chun ka hmuh.

Ei unai hnam danghai hin ei hnam mizie hlutak le mawitak, inhnar umtak hi an nei ve naw lei hin an fak zawng ve na tak an bau chu rimtui a sukhnik fawmin an hmang tangkaia, Hmar nauhai chu ei var hun chu an mi sukinhnu pek mei mei lem a nih. Hnam changkang rak lo, ngaituona tha neilo hai tawngkam ding reng chu a nih.

Ka Hmar hnam chu nuizat siemna le fiemthawna a hmang hlak hai sienkhawm ka buoi chuong nawh. Lo innui ve mei mei raw hai sen, ka tangka derek pai hlutna chu ka
hriet, an sukdat pha bek chuong nawh. Ka hnam chu a puonbil inbak neng nung sienkhawm, kan zapui chuong nawh.

Ei hnam unau danghai hi an hung var deu phat, ei Hmar hnam mizie hlutak la hung hre veng an ta, an inthungna tha hai chu mi lan ken tawl ngei an tih. Amiruokchu, an var intak ve awm sia maw? Ei unau hnam dang hai hi sukvar le keitho chu an tul ngei, Hmar hai liengkho chu a sukrik ngei de maw?
BDV-240575-BDV