INPUI: Hmar News & Info

Inpui.com Columnist Pu L. Keivom remembers (L) Rev Dr Rochunga Pudaite from various angles.

I weep for Adonais—he is dead!

Oh, weep for Adonais! though our tears

Thaw not the frost which binds so dear a head!

And thou, sad Hour, selected from all years

To mourn our loss, rouse thy obscure compeers,

And teach them thine own sorrow, say: "With me

Died Adonais; till the Future dares

Forget the Past, his fate and fame shall be

An echo and a light unto eternity!"

- P.B.Shelly’s ‘Adonais’

October 16, 2015. Voisun hi Dr. Rochunga Pudaite-in muol a mi lo liemsanna kar khat a lo ni der el tah. Chu sung chun kan khawvel chanchin tlawm te bek ziek tumin ka kompiutor hmaa ka hang inthrung hlak a. Ka ngaituona lipui, tui lien insang anga hung trè thla ding chu ieng am ka law ding ti ka buoi lai chun, a tingtu khăr a um ni ngei a ta, far khat khom a hung far thla nawh. Mak ka ti a, kan sulhnunghai ka sui neu neu ruolin a san ding awm ka dap bok a. Indopui Pakhatna laia bomb puok darh chum chumin a nghong buoi, lungril le ngaituona pangngai put le hmang thei loa umhai ngirhmun hrilna, ‘shell-shock syndrome’ an ti ang deuh kha niin ka hriet. Ngaituona chechâng thei lo, aiinkhuop (aikhirh), hamhaih, chi-ai, ngol, ngong, bîng, chawlol ngirhmuna um tina a nih. Lusun tongkhong lai trap thei der lo an um a, khawsawt tongkhong laia hla phuok amanih sak khom thil thei lo tluk a nih.

RP le Kei

Voituk ruok hin chu a hung zieum met tah leiin ram le hnam ta dinga rong kan bawl tlang dan chanchin, a thren ka lo ziek tah le ka la ziek lo laia poimaw ka ti zuolhai chu favang potsielin ka hung thuol tum a nih. Kum 2007 March 23-April 7 inkâr khan ‘RP LE KEI’ ti thupuia hmangin Part 3, phek 12, thumal 7753-a sei ka ziek ta a. Ka ziek san khom March 18, 2007 chawhnung DHCF-ah thuhriltuah an ruot a, ni danga mi po po laia thothang thra tak ni hiel dinga inper et et hlak kha chengkol hniek tiema muongin a che tah thung a. Pulpit a pan lai le dawsawna a hang lawn kai lai hei enin namen loin lungril a them a. Muol a mi liemsan hmain, mi danglam le dangdai, a dung lêt tama insang, a pum lêt tama lien le keng rawn a nizie dam; a naupang laia inthoka hnam invet chilhtu, hnam aidentiti phur suokna dinga poimaw chu hnam kalchar vong hring le sukhmasawn pei a nizie hmu chienga hnam puon nei poimawzie tlang insampui a, ‘Hmar Puon, Thangsuopuon’ hung suokna dinga bultrantu laia mi poimaw a nizie hai; Scheduled Tribe List-a Hmar hnam ziek lut dinga hma a lak dan hai; pawlitiks inher suol leia Hmar hnam bing ta dinga ngirhmun suol suok tuma Hmar National Congress (HNC) a hung indin dan hai; Hmar trong le thu le hla sukhmasawnna dinga hma a lak danhai le a bebawm thilhai dam le indik le thraa a ngai thil a thilthawhai chu soiseltu an um khoma saipui lamlawna hma tieng pan ngat ngat mi a nizie iemani chen bek thrangtharhaiin an hriet ka dit lei a nih.

Pherzawl tlangah

RP ka hriet tranna chu kum 1953 lai khan a nih. Allahabad University-a B.A a thaw laiin kan khuo Pherzawlah a hung in zin a, ni iemani zat a châm a. A u Ramlien Pudaite kha NEIG Mission Middle School-a Headmaster a ni a, a inah a tlung hlak a. Class 7 kan inchuk lai a na, a ruolnu Lal Rimawi hi kan pawla mi a ni a, nunghak danghai chu Lalhlupui, Huoli le Phiri an nih. Chuong lai chun Pherzawl-ah kohran pahnih-Watkin Roberts pawl Independent Church le H.H.Coleman pawl NEIG Mission- kan um a. A nawlpui chu Independent Church-ah kan inlawi a; mi tlawmte, hmarchadengkhop chauh ti ding hi NEIGM tieng an inlawi a. Kan pawl nunghakhai kha NEIGM tienga inkhawm deu vong an ni a. Hla phuok thiem le rawl thra, T.Khuma vanglai a ni bakah Lalhlupui kha hla sak thiema hril a ni a, hla pawl an nei changkang thei khop el. RP a hung khan Chorus iemani zat a zirtir hman a, a khawnawtin kan inbukpui a ni tak. Hi hi Chorus kan hriet le inchukna hmasa tak a nih. Chun, gramophone rikawt te, phek khata hla pakhat pei, Independent Kohran Hla bu-a hla an khumna a hung chawi a, pulpit inthokin an saktir a, Hmar trong le hla khom rikawtin a lo man el thei chu mak kan ti thei em em hlak. Hmar puon a hung bât bok hlak a, chu chun thu a hril rawn hle.

Beyond the next mountain

Pathien thu le hla le hnam ro hmangruo hmanga a mihai hmaah tukver thar hongpek a, mit thara ram thar inthlirtir a, beiseina thar pe a, Choir-a a hla inchuktir, ‘Thaw thei ruol loa inlang khom ringnan thaw thei a nih’ ti khom a tak ngeia ama nuna inentirtu a nih. Chu chu RP danglamna le chungchuongna a nih. Mi pangngai hisapnaa inthoka a thawa thaw chu hril lo, mangphan phak lo dinga ngai tam tak chu ringna hringa inthuomin ama nuna ngei a damsungin a a ziek a, tak ramah a’n changtir a, khuo chikte Phulpuia inthokin tu laia khawvela ram ropui taka ngai, kawlvalensam ram USA-ah a’n chawm lut a, chutaka inthok chun Bibles For The World indinin, Chanchin Thrain khawvel kil tin a rŭn a nih. A film hminga ‘Beyond The Next Mountain’ a’n buk khan, Phulpui tlanga inthoka inlang phak kawlrawn khelah ram a la’n zar dei duoi thu a hril bakah, hringnun tlang sîp khelah, thina vadung ralah thlarau chawlna ding khawpui mawi tak le ringnawtuhai hremna ding meidil khawvel a um thu a hril a. Meidilah fe lo a, khawpui mawiah mi tin, chi tin le hnam tin hai an inlawi theina dinga rawl tawpa tlang insama a dam lai ni po po hmangtu chu RP kha a nih.

Malsawmna ni

Abram ko suoktu chun, “Hnam ropui takin siem ka ti che a, i hming sukropui ka ta, malsawmna ning i tih” (Gen 12:2) a ti bakah “nangma zarin hnuoia hnam tin malsawmin um an tih” tiin a hril a. Tu am a nih ti a la hriet lo rawl chu awiin, a thu chu ringa pomin, a fena ding tieng khom hre loin, a kepui zawn zuiin, a’n thok suok mop a. Trampui mitsimin a lo hmuok a, harsatna le muolphona tuokin voi hni zet a nuhmei an lakpek a, sir tinah do le ralin an inhuol vel a, a hung inpempui um sun, a unau Haran naupa Lota chengna khuo hlak chu a Kotu lungsenin mei le kâtin a raw utpek vong bok. Malsawmna ni ding chun a ‘dâu’ a thra naw khop el. Kum 99 a ni chenin a nuhmei Sarai hlak chu a la ching zing. A nuhmei ringna inphetin, thikthu khom sukse phal loin, Pathien thu tiem sukpuitlingna dinga ngaiin, a pasalin nau a nei theina dingin a umpuinu Hagar chen a pasal hmei dingin a pêk a ni khah! Mani le mi ta dinga malsawmna ni theina ngirhmuna um ding chun tumruna, tuorselna, taimakna, teireina le ringna detdoa inthuoma hma nor a ngai. Chu chu thi chena inpumpekna nun a nih. Hnam pa le ringnaa thangsuo hmasa tak a hung nina dingin kum tam tak a ngai. Hebrai lekhathon ziektuin ringnaa thangsuo pasalthrahai chanchin a zieka khan Abraham chun Point 11 a hmu a, a dottu Mosie chun Point 8 vel a hmuh. Phulpuia inthoka muol a liem chena ringnaa kal a chawinaa RP point hmu zat ding hi sût inla, a hmu insang ve hle ka ring.

Phulpui-USA

Beiseinain mi tinin boruokah in ei bawl seng a, chu chu a taka bawzui pei ruok chu mi tlawm te ei nih. RP chun Phulpui kawlrawn khelah sir le hluo seng lo ram a um dei duoi ti a ring a. Chu ram paw theina um sun chu lekha thiemna a nih ti a hriet leiin, a mit a hung keu tran hlima inthokin thiemna hnotin, ieng ang rinum khom tuor huomin, a nu le pa angsung le an in lum suoksanin Churachandpur Mission Compound, Jorhat, Calcutta le Allahabad fe thlengin B.A chen a hung tling a. Chuong lai chun Zoram khawvel vanzawlah B.A tling phak chu nisa suok hlima arasi tiem ang a nih. Sienkhom, chu chun inbŭr a tum nawh. A mihai khawsakna ding ram suol suok nuoma Hmar National Congress indin le Scheduled Tribes list-a a hnam ziek lut bak chu sorkar thilah kop a tum nawh. Hmu thei lo hmutu le thaw thei ruol loa inlang khom ringnain thaw thei a nizie ringtu a ni leiin, a thaw nuom tak Pathien thu inchuk le buoipui dingin Scotland-ah a chuong lut a, chu taka inthok chun USA khawzawl, Bible Belt ti-a ko hlaw, thuhrilru ropui Billy Graham lekha inchukna, Wheaton College (Illinois) ah a tla thla a. Phulpuia inthoka inkhi chun a phak hla tah khop el.

Insuikhawmna sin

Hi hmun hi insaisangna le hmunpuia hmangin, Watkin Roberts-in ama aiawtu dinga a hung ruot hnungin, Indo-Burma Pioneer Mission (IBPM) ah Executive Director a hung ni a, hmunpuia Sielmat hmangin, insuikhawmna sin a hung tran a. Kha hmaa kohran hrang hranga lo inthrehai kha a tam lem hung hui khawmin, a hming phuok thar, Independent Church of India (ICI) hnuoiah kohranin sir tinah hma a hung sawn hlut hlut a, inchukna tieng High School chauh khom ni lo, kha hmaa mi mang phak lo, College chen a hung ngir a ni khah. Theology inchuk dingin Mission-in mi a tir suok truk truk a, chuonghai chu a hnunga kohran ban poimaw an hung nih. Sum harsatna leia inchukna sunzom thei lo ding le hmun thraa college kai phak lo ding tam takin chawmna sum an hung dong leiin mi thiem tam tak, sorkara sin insang chel dam, an hung suok pha a nih.

Mission Buoi chungchanga inremna lampui dap dinga India rama ST laia IAS tling hmasa tak Jamchong Nampui, Hmar hnathlakhai laia IFS hmasa tak Lalthanzau Pudaite le Manipur State-a inthoka IFS tling hmasa tak kei, kum 1972-a Sielmata kan fe truma keini pathum titinaa Jamchongin, “Rochung hi dem dem naw raw hai se. Kei, India ram tribal laia IAS hmasa tak intipa hin ka nauhai ti naw tu khom inchuk lai ka la chawm naw a, ama chun a zaa tiem a rongbawlna rain a chawm a nih” a ti a, ngaituo tham thudik niin ka hriet. Chuong ang inkhina hmol chu hmanga ei inkhi pha, RP ngirhmun hluo hi hriet thei chauh a nih. Ei ram aiawa ngirhaiin ei rama sikul tlusehai mit sira an mel hun chu thaw lo hlaw lahaia inthokin an chan ding a um le um naw an hisap chang chauh a ni laiin, RP chun hmangaina mita enin tungding a tum a, tlawm le za dawn chang loin, Krista hmangaituhai kuomah thrangpuina a hni a, PMS sikul hmun tam takah inngirin a um a, damsunga uniform hak phak lo ding mi tam takin hmasawnna thuom inbelin, mawlna thima inthokin hrietna var an pan a, tam tak Krista hrietna varah chatuon hringna changin a thruoi lut a nih.

Delhi Version hringtu

RP leh hin thu le hla khawvelah kan inthlop nasa a, lekha kan inthonna, Baibul tiet tieta sa file iemani zat ka laibrari-ah hin ka kol a. Kum 1963-a Graduate po kha Executive Director, Indo-Burma Pioneer Mission a ninain October, 1963 khan Holy Bible (King James Version) a mi rochung a. Hi Baibul hi keini sungkuo hmang tak le rikawt poimaw kan hlu lutna bu a ni a, kan hmang inrim hlea chu kan la kol thra hle a. Kum 1990 October-ah kum tina Bermuda-a an Fienrielna (Retreat) a thrang ve dinga an mi fiel trumin New International Version (NIV) a mi rochung bok a. Kan inzinna Chanchin hi phek 23 zeta sei, ‘Khawvel Thara Inzinna’ ti thupuia hmangin ka ziek a, a hnungah a bute-in an insuo nghe nghe niin ka hriet. An rongbawlna Chanchin dil sut taka hre nuomhai chun tiem non chi a ni ka ring. Hi truma a Baibul mi pek hi kum sawmpasari hnunga Delhi Version Baibul hringtu a nih. A hung hring suok dan le a bebawmhai, artikul hrang hranga ka zep sahai chu lekhabu puitlinga buotsai tham a nih.

Ramhmangai

RP khan invet chilh pahnih a nei a. Pakhat chu hnam, chu khom chu kholbing deu el, ama hnam bing HMAR hnam a nih. Hming lemah ‘Ramhmangai’ kan ti hlak a. Chu chun umzie pahnih a nei a. Pakhatna chu ram le hnam hmangaitu le invoitu tina a nih. Pahnina chu in le lo indinna ding ram inchawk ding zong zing hlak mi tina a nih. Hi hin kawk inthuk deuh a nei a, chu chu a gospel bok a nih. Hi le an vet chilh pahnina-sakhuona- chu laihrui inzom an nih. 1 Johan 4: 20-21 a chun, “Miin, ‘Pathien ka hmangai’ ti sien, a unau theida si sien, ama chu mi khêlhlip a nih. Unau a hmu zing hman hmangai si lo chun Pathien a hmu ngai lo chu iengtin am hmangai thei a ta? Hi thupêk hi a nih a mi pek chu: Pathien hmangaitu chun a unau khom a hmangai ding a nih” ti ei hmu a. Baibula mi challang pahnih-Mosie le Tirko Paula- hai kha hnam le sakhuoa hring full thrak an nih. RP khom chuong ang tho. A hnam le a sakhuo chu tangka hmai hni ang a nih. Hmar-in a pieng a, Hmar-in a thi. Chu chu a ni lai zingin, Pathien neitu a ni leiin, Matthai 5:43-48 a Isu hril khah a nunah a tak ngeia la lutin, hnam tin le khawvel pum huopin rong a bawl a. Chu testimawni chieng tak chu khawvel pumpui huopa a thlawna Baibul sem rongbawlna hma latu dinga Bibles For The World (BFW) a hung indin khah a nih. BFW hin trong hrang hranga buotsai Thuthlung Thar kawpi maktaduoi tam ram hrang hrangah a thon dar tah a nih. Thaw thei ruol loa inlang khom ringnan thaw thei a nizie a nun ngeia hriltu chu RP a nih.

‘Ramhmangai’ tia hming lem kan pekna san tak chu, khaw lai hmuna khom fe sien, ram inchawk ding a melkai zing khah a nih. Josua kuoma Iengkim Lalpan, “Mosie kuoma ka hril tah ang khan, kea in sirna taphot chu pe vong ka ti cheu” ti khah RP chang thlang laia pakhat a nih. Thil thar le hmasawnna rurel (infrastructures) indin ding chun ram ei mamaw makmaw. Ieng anga prawzek thra khom duong inla, inbunna ding hmun le hma a um si naw chun umzie a nei tlawm. Hmathlir hla tak le chieng tak neihai chun, beiseinaa boruoka in an bawl kha a taka inthrutna ding ram an melkai naw thei nawh. Development project le ram hi laihrui inzom an nih. Hmathlir sei tak le tam tak nei RP-in a thi chena ram inchawk ding a melkai khah a ram le hnam le a mihai ta dinga ngirhmun det indin a nuom lei a nih.

Mi hlawtling

Kum 2004 khan thusep, HLAWTLINGNA HI IEM A NA? ti ka ziek a. Chu taka chun ‘The Success Journey’ ti ziektu John Maxwell-in, “Success is a journey” a ti le R.L.Stevensonin “The true success is to labour” a ti chuh ka zawna donnain ka hmang a. Hlawtlingna chu tum ram pana ni tina inzin pei hi a nih. Chuonga inzin mihai chu Pathienin a vochuom, theina bik an kol chu hre zinga hmang trangkai tum mi le anni ta dinga hring loa mi dang ta dinga hring hlak mi an nih. Pastor Thangngurin,

Ka ta dinga ka hringlaiin ka lawm ngai nawh.

Ka Lal Krista kona anga

Isak maichama ka inhlan chun,

Malsawmna tuikhur lawmnan a hung luong

ti khan a hril fie hlein ka hriet. Mani ta dinga hring ta lona, mi ta ding le thratna dinga hring ta lemna nun neitu chu pasiein hausa sien, chinin lien sien, mi hlawtling, malsawmna tuikhur a nih.

Chu chu inpumpekna maicham, Thangngurin ‘Isak maicham’ a ti chu a nih. RP nun kha ei thlir kir chun a lungril po po, a theina po po le a nei po po mi ta dinga a thi chena hmang fai thrak mi niin a’n lang.

Ruol siem thiem

Kum 1990 October-November a thla khat deuthaw kannu Dari le an kuoma kan zu cheng sung khan an nupain inrim taka sun le zan chawl loa sinthaw an nizie mit ngeiin kan zu hmu a, an phur kha mihriem pangngai theina le hratnaa phur zo chi a ni naw hrim hrim. Chuong sa zing chun, ieng lai khomin hmêl hlim putin, an innui ver ver thei zing a nih. Eurokuilo thlipuiin kar hni top Mediterranen Tuipuia an chuongna long a vor let laia thlamuongna thu hrila a chuongpui mi 276 zet hnemtu le humtu chu Pathien neitu Paula a ni ang khan, ram le hnamin harsatna a tuok changa hnemtu le somdawltu laia kut trangkai pakhat chu RP a ni rop. Mi lien le poimaw inhmelhrietpui a hau a, a fena taphotah ruol a siem zung zung a. Chu chu thilpek ropui, mi nazong nei thei a ni nawh. Chuong hmelhriet le ruol a siemhai chu siet tuok nikhuoa mi trantu le hrilpuitu trangkai an ni hlak.

Chungchuongna chi hnih

RP chungchuongna dang nawk chu thu hril thiemna le thu ziek thiemna a nei kop kha a nih. Dannarain, thu ziek thiemhai hi thu hril thiem an ni naw tlangpui. Saptronga a chanchin le rongbawlna an ziek tam tak a um laiin, rong a bawl tran hlim laia a buotsai, ‘Tlângchâr Tuihnăr’ le chu taka a thusep ziek pakhat besana hla a phuok, ‘Suilung phâng lo’ hai kha literechar khawvela taktling thu le hla a ni leiin, Hmar hi hnama a dam khawsuok chun, thrangtharhaiin a mawizie le hlutzie hung hre deu deu an ta, ngaisang hlaw deu deu a tih. A hnung daia annu damnaw laia Sam 23 besana a buotsai ‘Lawmna Thuruk’ ti khom kha literechar tling lekhabu a nih. A ziek laia editing ka thawpui le a suok hnunga Mizo-Lusei tronga inlettu ka ni a. Kha lekhabu te kha a thrat em em vei leh, Mizo tronga a aitechêuna dinga inphuoi deua inlet kha tuoi nam le editing ka thaw laiin, an sut hmaa kar khat la nghak dinga Shillong tienga a suttuhai ka hril kha nghâk loin, a aitechêuna kha an lo sut a, a poi khop el. Aizawla an hang tlangzarin, thu le hlaa ka zawlpuihaiin, “A thuhmaah Keivom hming a chuong si a, ama kutsuok a va ang naw de!” an lo ti sap sap a. Kan inhmu nawkin RP ngei khomin chu chu a mi hril a. Kei chun, “Ei rawihaiin edited copy nghak loin inlet sinna kawpi an lo insuttira a ni khah. Ei sut nawk pha chu nâm tang a tih” ka ta.

Lungkham Bangna

Thu le hla hril taka chun, Muolhoia HSA Inkhawmpui voi 43-na trumtriek zo, February 15-16, 1988 sunga Haflong Guest House-a RP le HSA LEADERS RETREAT kan thawpui kha a nih. Kha hma khan ram le hnam kalchawi dan ding ngaituoin Hmar Inkhawmpui le Hmar Biel Seminar chen an lo nei ta a, sienkhom a taka ra suok a tam nawh. Ram le hnam ngirhmun thlir letna le hma tienga kalchawi dan ding hril tlangna nei hi thil poimaw a ni leiin RP-in sum tam tak sengin hi Retreat hi buotsai a nih. Thruoituah RP le kei an mi hmang a. Hi truma RP zawna siem, “Khawvela mihriem ta dinga poimaw tak iem a na?” ti donna point 14 laia ama donna chu “Iengkim siemtu le iengkim chunga thuneitu Paa nei tluka hamthratna insang lem a um nawh” ti a nih. Chu chu a testimawni, a nun darthlalang a nih.

Hun insersuon hninaah RP chun mani trong, HMAR trong, Pathienin a hran lieu lieua a pek mawizie, inthukzie, a ngainat tawp thei nawzie, a hmangtuhaiin an ngaina phot chun a thi naw dingzie le chu trong chu hmanga Hmar University chen khom indin thei a la hung ni dingzie, a duthu le suongtuona hnè takin a hril a, a ngaithlatuhai zer a sukfar hiel a nih. Ama ngeiin chuong a duthusamhai chu sukpuitling thei a nizie hieng hin an zawt zui a: Ei tum suksâng ei tiu; duthu sâm hlak ei tiu. Silai hmet puok loin râl ei kăp thei ti ka hriet tlat. Thil thra inhnar nachang hrieng ei tiu. Thil thra chang dingin thokrim ei tiu. Chuong naw chun ei Pa Pathien khomin ‘Thabohai’ tiin mi lawm naw nih.

Hi truma ka chanpuol thupui chu HMARHAI HARSATNA LE THRANGMAWBAWK, A SAN LE A DAMDAWIHAI ti a na, chu chu thupui thlung li- Pawlitiks, Ekawnawmiks, Kalchar le Sakhuo- sirsana chai dinga riruong a ni a, sienkhom hun indai naw leiin pawlitiks tienga Hmarhai ngirhmun chauh hril tlangna nei hman a nih.

Hi Fienrielnaa kan thu chaihai le a bebawmhai, phek sawmnga zeta sei ripawt kan buotsai chu ‘LUNGKHAM BANGNA’ ti hming chawiin RP-in USA-a inthokin kawpi iemani zat a hung siem a. A bu hming hi RP phuok a nih. A sung thu tiemtuhai chun Hmar hnam ngirhmun le a hmathlir ding chik taka bina lekha suok hmasa tak niin an ngai. Hieng ang char hin dodalna hrang hrang kara October 23-25, 2013 a Shillong bul, Umrana Leaders’ Retreat nei trum khom khan thu chaihai fun khawmna ‘Lungkham Bangna-2’ ti buotsai dinga riruong a na, sienkhom papers an buotsaihai kawpi mi thon dinga an ti kha tu chen hin a la hung naw leiin, buotsai thei a la ni naw zing. Saptronga ‘Umran Retreat’ ti ka ziek phek 17, thumal 9582-a sei kha rikawt maksan um sun a ni el thei.

Umran Retreat kha nei a ni theina san tak chu RP-in somdawlna sum tam tak a hung thaw lei a nih. Ama kha mi’n rawitu tak dinga beisei a ni a, sienkhom hriselna leiin a hung thrang thei naw a, a hmun kha keiin ka hluo sip tah lem a. A kum nawk HSA Platinum Jubilee prokram le inzoma dodalna nasa tak kara Hmar Inpui le HSA inkopa Sielmat-a thu le hlaa inpawl khawmna hlawtling taka nei kha Umran Retreat sunzomnaa ngai a ni a. Kha truma sengso iengkim tuma mi mikhuoltu khah RP bok a nih. Thu le hla sukhmasawnna dinga RP inpekzona le olsam lem le scientific lema Hmar trong ziek dan dinga a ngai, huoisen taka a phur suok ngamna hi ngaisang a umin, thruoitu ngirhmun a chel ngamzie hriltu a nih. Thrang la hung thar peiin nikhuo hung hre deu deu an ta, la hung ngaisang deu deu an tih.

Tlangkawmna

Ziek ding la tam hle sien khom, a sei tah leiin, kum 2007 March 23-a ka thu ziek RP LE KEI ti ka tlangkawmna thuin suktawp zai rel phot ka tih: RP le kan inzomna hi inthûk deu a na, inngai khom kan inngai a, kan hmathlir le tum ram khom an inhmu a, chuong laia thil tam tak chu hnamin kal a chawi peina dinga pholeng poimaw tak tak a ni khom ka ring. Ama ang hi Zohnahtlakhai lai hin mi ei pieng ka la hriet naw a, ei pieng mei mei khom ka ring nawh.

(October 17, 2015)

COLORADO SPRINGS (US), October. 14, 2015: Dr. Rochunga Pudaite, who rose from poverty in a remote village of former headhunters to become the founder and leader of the global Christian ministry Bibles For The World, died at a hospital in Colorado Springs, Colo., in the early hours of Oct. 10, 2015. He was 87.

"Dr. Ro was an inspiration to millions, and his life story and ministry work demonstrate how much one Christian can do when directed by the Lord," said Jeff McLinden, vice president of Bibles For The World. "Because of his efforts, millions of people around the world have been introduced to the message of the Bible, and they understand what it means to be true followers of Christ. Dr. Pudaite will be greatly missed."

Pudaite's son, John, who had served as vice president of international ministries since 2006, took over as president in May 2015 to continue his parents' work.

Where it began

Pudaite was a member of the Hmar tribe in northeast India, known by the British colonial government as fierce headhunters.  His father was one of the first converts to Christianity in the area and dreamed of someday having God's word in the language of his tribe. Rochunga was the first child in his village to go to school, finishing his graduate work at Wheaton College in Illinois, where he completed his translation of the Bible into his native tongue.

To help the largely illiterate Hmar people, Pudaite and his wife, Mawii, established a series of Christian schools, which today includes 85 village schools, seven high schools, two junior colleges and a Christian college and seminary. The largest school now has more than 2,600 students, and, today, the Hmar have one of the highest literacy rates in India.

Bringing Spiritual, Material Help

Pudaite took his Bible ministry to other nations as well. In 1973, he and his wife established Bibles For The World, recruiting volunteers to mail appropriate language translations of Bibles to households across the globe, with special outreaches into Africa, South America, and the former Soviet Union.

To help children in poverty, Pudaite and his wife created a sponsorship program in India, which now assists more than 3,000 children who receive help including medical care, schooling, shoes and uniforms. They also founded Sielmat Christian Hospital and Research Center in Manipur, India, to provide the region's poor with medical care and assistance.

"Dr. Ro was concerned for both the spiritual and physical needs of thousands of poor people in India," said McLinden. "And his ministry has touched the lives of tens, if not hundreds, of millions of people across the globe."
His Legacy

In addition to translating the Hmar Bible, Pudaite wrote The Education of the Hmar People, The Dime That Lasted Forever, My Billion Bible Dream (republished as The Book That Set My People Free), The Greatest Book Ever Written and The Hmar/English Dictionary.

Two biographies have been written about Pudaite, God's Tribesman in 1974, and Fire on the Hills – the Story of Rochunga Pudaite.  A feature film titled Beyond the Next Mountain tells how Pudaite brought the Bible to his people.

In addition to his brother, Lienkung Pudaite of Sielmat, Churachandpur, Manipur, India, Dr. Rochunga Pudaite is survived by his wife, Mawii, their three children, Paul R. Pudaite of Glen Ellyn, IL; John L. Pudaite of Colorado Springs, CO;  and Mary L. Pudaite-Keating of Antioch, IL, and six grandchildren. A celebration of his life will be held Saturday, Oct. 17, at 1:30 p.m. at The Sanctuary Church, 1930 W. Colorado Ave., Colorado Springs.

Memorial gifts in his name may be sent to Bibles For The World, P.O. Box 49759, Colorado Springs, Co 80949, or given online atwww.biblesfortheworld.org.

Bibles For The World (www.biblesfortheworld.org) is a catalyst for individual and cultural transformation through Christ and the power of His Word.  Since 1973, Bibles For The World has made God's Word available — free of charge — to millions upon millions of people in more than 110 countries across the globe.

By Prof Lal Dena

Hla phuok hi thiemfin (art) chi khat a nih a, mi nazawng thaw thei a ni nawh. Inchuk sang le hriet rawn leia thaw thei a nih bawk nawh. Hla tienga piengpui thiemna nei hai chauh thaw thei a nih. Dannaranin, hla phuok thiemhai hi hlasak thiem le khawsawt thei an ni nuom vieu. Tulaia pop song sak thiem hai lem hi chu, song winter (hla siemtu/phuoktu) an ni deuh vawng. Eini lai khawm hla sak thiemhai hi a phuok khawm an thiem nghal vawng. Chulaia laia pakhat chu Pu Sawnglienthuom hi a nih.

Eini Zohnathlakhai laia SAI HLA phuok thiem thungna hmatawnga thung ngei dinga ka ingai chu Pu Sawnglienthuom hi a nih. Hla a phuok tlawma chu, a phuok sunhai, a hun lai le vawisun chena sak hlaw pawl tak laia mi an la ni zing. Hla hi a phuok le sak a thiem kawp tlat hi mi tam tak neka a chungchuong bikna a nih.

Ama hi Zawlkhawpui (Pherzawl)-ah May,1943-in a pieng a. (Late) Lalmanlien le (late) Sawmvel nau pasal upa tak a nih. A unauhai chu Lalramlien, Lalhuoplien, Sakhawlal, Laltanlien, Rinpui, Ruthi, Hlira le Lalhlunsiem an nih. Anni sungkuo hi Pherzawla inthawkin Saidanah kum 1944 khan an inpem. A Hmar tawng hmang hi (tu theida lo di'n) 'Zawlkhawpui Hmar Oxford Tawng' a nih. Ama hi lekha inchukna tieng chu Churachandpur Govt High Schoolah pawl thum chen an chuk a. Sielmat Christian High Schoolah pawl ruk chen a zo nawk a. Bethany High Schoolah pawl sawm a pasi. A naupang lai hun le tlangval hun sung po po Saidanah a hmang a nih. Pi Mannieng leh kum 1972 khan an innei a, nau pasal pahni le nau nuhmei 'Thangthar Tuonpui Hmeltha' ti khawpa hmeltha an neih. Anni nupa hi tu mawng benin tuhin Saidanah an khawsa mek.

Pu Sawnglienthuom hi pa khawsawt thei tak ani zie chu a hlaphuokhai hin an sukchieng hle. Hla a phuok tam nawh a, a phuok sun hai hi a hun laia lar em em le vawisun chena sak hlaw tak laia mi an la ni zing. Lenruol Hlabuah(LH) hin a hlaphuokhai pali a chuong a. A hlaphuokhai hi kum 1967 lai vela a phuok deuh vawng an nih. Khang lai hun khan Vai Hla thluk hmanga SAI HLA phuok an ching zuol lai a nih. Pu Laltlansang, Pu (Upa) Darkamlo, Pu Lalruotthang le mi dang iemani zat zetin SAI HLA tha tak tak Vai Hla thluk hmangin an mi lo phuok pek a, vawisun chena sak hlaw tak an la ni zing. Pu Darkamlo-in "Aw di, aw di, lungrunpui" (LH.214) ti a phuok lem hin chu Zoram khawvel a fang suok a nih tak. Ka Pu L.Keivom meuh khawmin "Dawn ve la, nunhlui thamral hnung"(LH.158) ti hi Vai Hla thluka a phuok ve ngat a nih. Ti ema chu Mizorama SAI HLA phuoktu hmasa Pu Lalzova, Pu Vankhama le mi dang dang hai khawm khan Sap hla thluk an lo hmang ve nasa hle.

Zoram khawvela hlaphuoktuhai laia Pu Sawnglienthuom danglam bik rieuna a um a. Mi dangin an ching ngai lo, Vai Hla thluk hmanga a phuok po po deuh thaw hi pasal le nuhmei insaksawk le sak ruol dinga a phuok hi a nih. Mi dang Vai hla thluk hmang hai chun nuhmei-pasal sak ding ti an thlier bik nawh. Pu Sawnglienthuom hlahai hi chu HSA inkhawmpui changa lemchangna (drama)-ah hai khawm sak an hlaw nasa hle. A hlaphuokhai a hmatiemin hei belchieng ei tih leh.

"Dawn tam suihlunglengin ka thlir che hi"(LH.166) hi a phuoktu L.Kiemlo tiin ziek a nih a, sienkhawm Pu Sawnglienthuom chun ama phuok a nih thu a mi hril. A chunga ei hril tah angin a hla thu le chang, pasal le nuhmei sak insawk le sak ruol ding a siem diem a, a thumal hmanghai khawm hi ama kamsuok ngei an nih. A hla chang thenkhat chauh zuk tarlang ei tih,

P.-- I hlim thla ka pawm kawp lai di angin,

N--Chantawk hi chu! PN--Aw ka tuor zo nawh!

P-- I dawn lungrukah kimten dawn la,

N-- Nang ngei khawm thiem inchang ka ring nawh!

PN-Ka lungriem mitthli leh ka ko che!

Nunghak le tlangval hlasak thiem ve vein Vaitingtang deuha video-ah insaih puma an hei sak hei en lem chun, mit a tlaih a,.Bollywood hran ei ngai tah nawh.

Lenruol Hlabu 173: 'Sangpui ka ko che' ti hi Pu Sawnglienthuom chun a phuok a nih naw thu a mi hril. LH.175: "Ka ngai em che" hi Pu Sawnglienthuom-in kum 1967-a a phuok a nih. Hi khawm hi Vai hla thluk hmanga nuhmei le pasal sak insawk le sak ruol dinga siem a nih. A hla thuhai hi chang khatna inthawka a tawp chen ei en chun, lo inngaizawng le inhmangai em em, Lal Solomon tawngkam, tawng khuoizu inhlanin, nau anga tanglaiah a pawm hnung le 'biethu ti'n tiema a tuoremsa, an thepui nawk, a ngai zie a phuokna a ni tak. Chang thumna chauh hi zuk la sawng ei tih:

P--Nun hlui ka ko, kir rengin mawi nawh,

N--Aw, ei lawm lai nia i sakhmel hlim;

PN-Vawikhat bek dar ang tawng nawk thei chang sien,

PN-Aw, ka ngai em che a nih, Parte.

Pu Sawnglienthuom hin "Hril le tawngkam thiem ka ni si nawh a" ti de sienkhawm, a. hla thuhai hi a tha thei em em. "Sakhmel tuokin singmit luoithli nula", "Et ram tuonnahai ka fang chang ni hin, Singmit luoithli nulin ka um hlak a" tiin a hang insam a, "Mitthla'n innui hieua dar ang tawngin, Nau ang ka pawm che tanglaiah" a hang ti dam hi a mawiin ngaituona a suksei.

"Vawitam biethu ei tiem" (LH.183) hi Pu Lalruotthang phuoka zieka um hi Pu Sawnglienthuom-in kum 1967 laia a phuok a nih. Hi hlaah hin chu nuhmei le pasal sak bik ding a the naw tlat. A thu umzie enin hi hla hi chu a phuoktupa'n leng dang sai a nuom naw zie, hmangai dang a nei naw zie le a ngaizawngnu the tum naw zie a hrilna a ni tak.

Aw! Nunkhuo ei nuom lai,

Aw! Sam ang inthe zai;

Aw rel loin par ang,

Vul zai rel nawk ei tih.

LH.211: "Ka ngai em che" ti hi Pu Sawnglienthuom-in kum 1970 laia a phuok a nih. A hlaphuok danghai ang bawkin nuhmei-pasal sak ding a the diem a. Ama hril dan chun hi hla hi a ngaizawngnu a phuokna, hmangaina par an tlan lai, inthe lo dinga thu tiema, vanglai hun an chen laia a phuok a nih. Tum khat Delhi tlanga insukhlimna ruoi nei tuma Pu Zaituokung-in felhet lukhumpar khuma, rawl thum huma, "Lungdi" ti'n a hei insam a, Pi Rosylin-in a mit khu hmiei a, "Lungrun"ti'n a hei dawn let a, an pahni'n: "Aw di-i-i ka ngai em che, Nang naw chu lunglai hnemtu an um nawh, Ka di, ka ngai em che" ti a ruola an hang sak zo zet chun, tu khawm a thung thei an um ta nawh. Hi hla zet hin chu atar azur chen khawm a sukhlim a, mani umna sengah an lo insawi duol duol el a nih. A chang danghai:

Nangma ngaiin sunni kan tawi hlak a,

Dawntu um loin i hming ka ko hlak;

Aw hmangai mi zuk en la, mi hnem rawh,

Dawntu um loin i hming ka ko hlak.

Hril mei an nawh, ka ngai em che a nih,

Neisun hmangaina le ka hung pan che;

Ngai naw lai i um nawh, lawmna Parte,

Neisun hmangaina leh ka hung pan che.

Oriflame nalbuong chi hran hran nal le Paris rimtui inchulin, a kawppuipa liengkoah a nghei a pha hnepa, a kawppuipa'n "I sakhmel enchimlo a mi run ngei" a zuk tia, an pahni'n a ruolin, "Nang naw mi suklawm thei reng an um nawh" ti'n an heih insep sawi a. A thunawna:

Aw di-i-i, ka ngai em che,

Nang naw chu lung lai hnemtu an um nawh;

Ka di! ka ngai em che.

I sakhmel en chim lo a mi run ngei,

Nang naw mi suklawm thei reng an um nawh;

Leng dang thlir naw ning nang chauh en ka che,

Nang naw mi suklawm thei reng an um nawh-

Hmel hlim suoua, insuh duol duola heih lam dam kha, a man hisap seng a nih nawh. Hi hla hi chu a bula inthawkin a tawp chen a tha tluon suok par ringawt a nih. Ei thu le hla kungpui Pu Thangsawihmang Sawngate chun hieng hin a lo ziek a: "A hlaphuokhai hi Hindi film hla angin nunghak le tlangval intukna (insaina) hla deuh vawng an nih. Chuleiin an chuoi thei nawh. Tulai chen khawm hin TV local channel ei en chun, nunghak le tlangval ama hlaphuok sakin an intuk a, a hla thu zir ang peiin an inkuo vak, a inthe nawk vak, a en an hawih a, mit khawm  a tlaih a nih. Chuleiin ama hlaphuokhai hi Hindi film ei ngainat sung chu, chuoi ni nei ngai naw ni hai. Chun, a hlahai hi TV local channel-a sai hla (lengzem hla) suklartu le sukhausatu niin ei hriet".

Ei hriet seng angin, mi tin deuh thawin ei dittak le ei hmangai tak nuhmei/pasal ei innei kher nawh. Heih intiem chie inla chu, "Luahlo Lungdi" nei pawl hi a tam lem an ni el thei. Pu Sawnglienthuom khawm hi a ngaizawng hmasa tak leh khum hmun khatah salin dam lai nun hi a hmang ve nawh niin an lang. A tuolto thlukin hla pakhat char "Dawntam I suksei vawng vawng"ti a phuok hin a sukfie. A chang tawp taka hieng hin an sam a,"Ka pawm lai di nek khawmin ka ngai che" tiin. Kei chun hieng hin Pu Sawnglienthuom hmai sana kan dawn a,"A thu umzie enin, nuhmei i nei hnunga i phuok a ang bak a," ka tih a. Ama chun, hi hla a phuok lai hin nuhmei a la nei naw thu le a phuok khumnu Saikawt nunghak hming chen a mi hril a.(Mi nuhai an ni ta leiin a hming ei ziek lang naw a nih). Hi nu leh hin "tangnema inpawma thu tin lo inhril ta si, hnungkir ta hnung chu "Nau ang mi pawm nawk el rawh" tia inrieng taka a kona hla a nih. Hi nu a the hnunga, a ngaizawngnu a pawm lai mek nek khawmin, ama nu bawk hi a lungdumtu tak a ni zie "Ka thlang tak chu nang chauh i nih, Lam ang hung letin nau ang mi pawm nawk rawh" ti hin a sukchieng hle. Hi hla hi LH-ah a chuong ve naw leiin a hla pumpui zuk tarlang ei tih:

Nunhlui muol liem hnung ka hang dawnkir che chun,

Ka ngaina che dawn lungrukah a hung zuol;

Dawn tam i suksei vawng vawng ngei,

Sulhnung ka fang lem chun, ka ngai zuol ngei che.

    Bawite! Bawite! Ka ngai em che,

    Lenruol le tlangrel chena hlim lai ni;

    Riel ang an ral el ding chu, ka ngai ngam naw,

    Dawn tam i suksei vawng vawng ngei;

    Dawn tam i suksei vawng vawng.

Mitthlain ram tuonnahai ka thlir lem chun,

I dang chuong nawh, ngai nekin ka hmangaih che;

Tangnemah pawm lai biethu tin,

Riel ang an ral nawh, nang ka hmangaih zuol che.

Zan lungmawl le ei Lalpa niah hlim le,

Indi suihlungruola leng lai thu tin di;

Kimten lungrukah dawn kirin,

Ka the naw che, nau ang lengtuo rel ei tih.

Ka pawm lai di nek khawmin ka ngai che,

Kei chun ka ni tin el hin ka ngai zing che;

Ka thlang tak chu nang chauh i nih,

Lam ang hung letin nau ang mi pawm nawk rawh.

    Bawite! Bawite! Ka ngai em che,

    Lenruol le tlangrel chena hlim lai ni;

    Riel ang an ral el ding chu, ka ngai ngam nawh,

    Dawn tam i suksei vawng vawng ngei;

    Nau ang mi pawm nawk el rawh.

Hi hla hi Pu Lalbieklien Saikawt valin fawn hlep hlepa, video-a a sak lai enin I lo ngaithlak tam? Lo ngaithla ve reng ta; a thluk le a thuhai hi an chawi tawk bawk a, thu le hla khawvelah Pu Sawnglienthuom-in hmun insang tak a hluo ve zie hriet chieng pha ngei i tih. Hla a thluk that leia tha amani, a thu that leia tha amani khawm hriet an tak. Hi hla hi chu a thluk a tha bawk, a thu a tha bawk. Hi hla chauh hi lo phuok sien khawm, Pu Sawnglienthuomhin chawimawina nopui dawm a phu hrim hrim.

Pu Sawnglienthuom hlaphuokhai reng reng hi ei bi chieng a, thumal harsa pakhat khawm a hmang ve nawh. Thumal tlanglawnhai hi thiem tak le fie takin a hmang el a nih. Ama hi daktawr mi at thiem (surgeon) le tekhi rem takin ka hriet. Surgeon chun chemte le sakawrbakchep ngei tak hmangin, phingpui, lung, thin le kal chen a nuom dan danin a at hlak. Chuong ang deuh chun Pu Sawnglienthuom khawmin thlarau le lungril, zung le zam fang thei khawpin thumal tlanglawn tak tak hai a zuk rem khawm el a nih. Chuleiin, thu le hla khawvelah hin Pu Sawnglienthuom-in hlaro, rohlu chuoi thei ngai ta ngai ta lo ding a mi maksan pek a. Pathienin a hringnun suksei pei sien, hla dang khawm mi la phuok belsapek sien ei va nuom de!. Pu Sawnglienthuom dam sawt raw se.

(Canchipur, 10 September,2015)

By Ramthienghlim Varte

Mihriem hi rannung anga a ruol ruol a inpawl (social animal) le khawsa a khawtlang dan le dun mumal tak leh chengna le umna hmunbik neiin khawvel hmun hrang hrangah Sungkuo bing bingin ei um tlang a. Ei ni khawm ei khuo le veng-ah Hnam-khat tawng hmunkhat khawm ni inla Sungkuo bik neiin ei khawsa a. Chuleiin, Sungkuo le Kristien Sungkuo a pawimawna Kum 2007 khan ziekin Khawnvar Le Thuhriltu Journal/Magazine-a insuo ani tah nghe nghe. Tuta tum ruok chuh Mihriem Nunphung hung intan dan le bulthut, chutaka inthawka Sungkuo hungsuok danhai hi hrietchieng a pawimaw hle’n ka hriet a, Mihriem tobul le insiemdan mithiemhai tlirna tukver ah tanin tawite te’n hei suklang tum ei tih.

EVOLUTION THEORY :

Scientist-hai chun leihnuoi hi Kum Makteduoi 400 B.C. neka upa ni dingin an zeldin a. Kum Makteduoi 300 B.C. laivel khan khawvel hi hringna nei pakhat khawm um lova re thuop anga ngaiin chuhnung kum iemani chen a thilhring chite a hung inlang a, chu Bacteria tiin an inbuk a; Mit lawnga hmutheilo, Enlenna (Microscope) hmanga hmuthei hringna nei an nih. Chu thilhrik chite inthlapung peiin umna/chengna boruok angin piengphung hrang hrang nei a chi intlasawngpei ni dingin an ring. Chu hung inthlakdanglam pei chun thilhring danglam le mak tak tak an hungsuok a chuonghai lai a Ransa ke pali nei le piengpui varna nei Mihriem le inhnai hrietthei hmasatak chuh Mammals hi a nih. Hieng rannung-hai lai a nau pai a hringve chi, Nu nenetui a chawmlien Kut, Ke, Lu, Thluokbawm, Thin, Chuop, Thisen lum nei Ransahai chuh ani leiin Animal (Ransa) tiin an inbuk tah a nih. Mammal eiti a khawm hin piengzie in-ang naw, Sungkuo chi tum tum an hungsuok nawk pei a.

Hieng Ransa ( Animal) eiti hai hih Kum Makteduoi 64 B.C. laivel khan khawvel an hluo tan a, an ni lai a var tak chu Zawng chi hi a nih. Zawng hi chi hrang hranghai hi a huhouva (Group)/Sungkuo a khawsa chuh an nih ti vawisun chen khawm hin hmutheiin an um reng a nih. Hun iemani chen hnunga Zawng lien chi thenkhat Chimpanzee, Gorilla le dang danghai chuh Thinglera khawsa talovin hnuoia fak zawngin, Ke pali-in an lawn phawt a, chu hnungah Ke pahni-in an hung lawn tan nawk a, an Ke hnungtieng chuh lawnnaa hmangin, an hmatieng ruok chuh nuom nuom thawtheina le hmangruo siemna Kut-in an hung hmang ta pei a, a tawp a chun Mihriem angin an hung ngir-tlun at thei tah a. Chuh, Mihriem hmasa HOMO ERECTUS (Homo-Mihriem, Erectus-Ngil)/APE MAN tiin chuonglaia a var le hriet lar deua ngai an Ru hieng- Luru, Malpuiru, Khakru, Kut le Ke ru-hai an hmu/chosuokna hmun dungzuiin an hming an siem pekin hieng- Java Man, Peking Man, Nebraska Man, Piltdown Man, Neanderthal Man le dang dang ti a hung nih.

Chuleiin, Zawng Sungkuo hi Kum Makteduoi 27 B.C.vela um ni dingin an ring a. Hun a liempei a, kum 40,000 B.C.vel liemta khan an khawsak le nun a changkang ta vieu a. Chu inthlasawngpei chuh Mihriem nun intanna a hung ni a. Kum 12,000 B.C. hnungtieng lem khan chu Lo neina chang hrein Wheat, Barley, Maize dam chingin Beram dam Kel dam vaiin an khawsa ve ta a. Chuleiin, Baibul puotieng suinaa inthawka tlir chun Mihriem nunphung le Sungkuo intanna hi Kum 8000-7000 B.C. vel khah ni dinga ring a nih. Mihriem chanchin suitu (Anthropologist) hai khawmin Mihriem nunphung le Sungkuo (Family) a hung intanna le hungsuok dan hi chipchier deuvin an sui dawk thei bik chuong nawa chuh khawvel inthlakdanglam peiin a hung relsuok ngei chuh an ringdan a nih. Sungkuoa inenkawlna bik a um hma chun ransahai ang bawkin mumal umlo takin nuhmeiin nau an nei khawma Pa bik umlova nun inpher neinuoia um hlak khah, nuhmei-pasal bik neia nauhai le khawsakna ding ngaituo’n Puk le hmun remchang zawngin Ransa dang laka invenghim nachang le mumal nei taka Sungkuo siema khawsak relna chang an hung hriet ta pei a nih. Hi Evolution Theory-a Mihriem hung intan dan le Sungkuo suok dan an ring le hmu dan tlangpui a tawi thei anga ei hei tarlang chuh a nih.

CREATION THEORY :

Mihriem Zawng thla nia suisuoktu Charles Darwin le mithiem dang danghaiin an pawm thei derlo chuh Baibul-a ei hmu ‘A tirin Pathienin hnuoi le van le a sunga um po po a siem a, Nikhat a inthawk Ninga sung khawvela thil um po po a siem zo vawng hnungin ama angpui Mihriem Adam le Evi (pasal le nuhmei) nupa a siem’ ti hi a nih. Chun, Mihriem a siem ruol ruolin Sungkuo hmasatak an din pek nghal bawk a. Mihriem a siemhai umna dingin Eden huon a buotsai pek a; Chutaka chun inhawi takin an khawsa a, theira chitinreng hnieng-in-hnar taka an fakding a buotsai pek bawk. An sungkhuo khawsak danding chenin a rel pek a, thaw ding le dingnaw, fak ding le ding naw, chu chau nilovin khawvel a Ransa le thil dang danghai chunga thuneina khawm a pek a, mal a sawm a, a Mihriem siem Adam le Evi-hai nupa chuh an chetdan le an Sungkuo khawsak dan chuh a hmuin a lung a awi a, tha a ti bek bek a, a en nghawk nawh a, an kuoma um zing a nuomin, a kan hlak ti a nih.

Amiruokchu, khawvel mithiemhai tlirna tukver hi Baibul thiem tamtak haiin tlawp naw hai sienkhawm a tirin Pathienin Hnuoi le Van a siem a (Gen.1:1) ti hi an ring naw lei ni lovin Gen. 1: 1na le Gen. 1: 2na inkar hih kum zabi zawng a sui khawma hun sawt tak ni dinga ngaidan an nei ve tho. A san chuh, a thilsiem duthusam le thafamkima a ngai chuh Setan (Lucifar) suktlawmna dingin Hnuoi le Van a siem chuh suksiet vawngin a um a, hremna namenlo tuokin Zingtieng naupa lei chun Hnuoi le Van ruok huoiin a hun sawt tak a sie hnung a Gen.1:2 hin a sunzawm anga ngaidan an nei a, chuh, GAP THEORY ti a nih. Chun, mithiem haiin DAY AGE THEORY an ti Niruk sung a thilsiem khawm hih “Nang a ngai chun Kum sangkhat hi zan vengkhat ( Nikhat) sung ang chau a nih (Sam No. 90 : 4) “ ti le “ Lalpa ngaia chun Nikhat khawm Kum sangkhat ang a na, Kum sangkhat hi nikhat ang chau a nih” (II Peter 3:8 ) ti a ni si chun hi theory nikhat a ti hih Kum sangkhat sung pei khawm a ni thei leiin Niruk ati hih Kum 6,000 vel khawm thil ni thei dinga ringna nei pawl khawm an um ve tho.

Chun, kum thua hin Scientist-hai sui anga Kum upat dan sui thei dingin Baibul hi ziek a ni ve naw tlat leiin ‘a tirin’ tihi innghatna ding chu ni’l a ta. Ei chengna khawvel upatzie ei mithiem (Scientist) haiin Mihriem le Sungkuo insiem tanna hi Kum Vaibelse tamtakin suisuok hai sienkhawm ‘a tir’ ti neka upa hi a ni thei chuongnaw leiin khawvel mithiemhai suidan le khaikhin dingchun ‘a tirin’ ti chu an bul lem hrim hrim a, mithiemhai tlirna le ringdan po po a pei/hnawl tlak vawng ni’n an lang.

Iengkhawm nisien Mihriem nun intanna le Sungkuo insiemdan a chunga Theory pahni tlawmte te ei hei tarlanga inthawk Creation Theory Baibul-a ei hmu neka inril le chieng fek fawka inziekna chuh khawvel mithiem haiin ramtin ramtang kei fanin thaw hai sienkhawm belchieng dawl, hmu theia ziek le zawm ding Evolution Theory-a hin a um nawh a. An suia an ziek rawn po leh pawm dan, ngaidan le inselna a tam a, a buorchuorin a dal deu deu el. Chuleiin, Mihriem nun le Sungkuo chanchin sui ding chun Creation Theory/Creation hi ei pawm ding le Sakhuonaa khawm Christien-hai thuring bulpui chuh a nih.

SUNGKUO (FAMILY)

A chunga ei thu inbuonpui le inzawm hin Mihriem hi khawvel hluobit tuding le a chunga rorel dinga Pathienin alo ruot ei ni leiin Sungkuo bik nei a mumal um taka khawsa ding le cheng dinga ami siemhai ei nih. Chuong nilovin ka Nu, ka Pa, ka Nau ti bik umlovin mani tlat tlatin mumal um der lovin khawsa/tla ta mur mur inla Ransa-hai ang mei meiin inditsakna, hmangaina, lunginsietna umlovin ‘A ru no no suok’ thaw’n insuol, inhal, invuokhlumna/inthatna tam a ta, pung hratnaw hleng ei tih. Entirnan – India rama khawm Andaman and Nicobar-a Jarwa, Shampen hnam hnufuol, Sawrkar thangpuina khawm hmang tangkai nuomlova ning ninga khawsahai hi an population pung nekin tlawm tieng a panpei a, Jarwa hai lem chuh an rengin 600-700 bawrvel chauva ngai an ni tah.

Chubakah, mani a fak zawng theilo Pitar, Putar damnaw natna khirkhan nei le piengsuolhai tading lem chun thi nghak seng seng rin a um zuol hle ding ning a tih. Chuleiin, Mihriem hi khawvela thilsiem po po chunga rorel dinga ruot, ama (Pathien) angna neia siem, a hringna intawmpui eini leiin rorelna mumal tak nei a inrem tlang diel diela Sungkuo indin a inhawi taka nun chen a van nun intem-lawkna ding a Pathien thuruk inthup le a thiltum chuh a nih.

Chuongangin, nunphung umzie nei, nundan mawi, khawtlang rorelna tha le thildang Mihriemin ei mamaw zuolhai chu Sungkuo inchuktirna ah an tan phawt a tul leiin khawtlang nun inchukna (Sociology) tienga mithiemhai chun ‘Mihriem Ransa-hai neka ei hlutna chuh hieng- Nundan tha le mawi, Inza umna, Hlutna, le dang danghai hih ana, chu Inchukna School pawimaw hmasatak chuh Sungkuo hi a ni a; khawvel hi Mihriem chengna dinga siem a, chengna tlak a inbuotsaina hmun/institution pawimaw tak chu Sungkuo (family) hi a nih’ an tih. Chuongangin, “Sungkuo eiti chu a bika in-enkawlna Buzawl nei, chengna hmun bik um a, hotu pakhat rorelna hnuoia mi iemanizat um khawm hi a nih”.

SUNGKUO ( FAMILY) CHI HRANG HRANGHAI :

Anrian Wilson chun ‘Thisena inzawmna nei le khawtlang dan siemin a phuor tang tlat, hmunkhata cheng, fak le dawn a sem sem dam dam thaw a, in khata inlawi hlakhai hi Sungkuo’ (family) a ti bawk a. Chuongang chun Sungkuo ro-in-rel dan hi khawvela hnam chi hrang hrangin ei hmangdan an angnaw a, hieng a hnuoia anghin.

i) Hnamkhat, thlatu hming chawia suon thumna chen Sungkuo pakhata tiem pawl an um a, chuh Sungkuo huopzau/lien (Extended family) ti a nih.

ii) Sungkuo Nu-pa le nau hai chau chengna insung a um a, chuh Sungkuo hlang/inhlir (Nuclear family) an tih.

iii) Sungkuo Pa lutak ni a, nuhmei nau le insung thuomhnaw pasal thuneina pahai hnam nuhmei le nauhai intawmpui a um a, chuh Pa thuneina Sungkuo (Patriarchal family) an tih.

iv) Sungkuo Nu lutak pasal le nau le insung thuomhnaw nuhmei thuneina le Nu hnam pasal le nauhai intawmpui a um nawk a, chuh Nu thuneina Sungkuo (Matriarchal family) ti a ni nawk a.

v) Sungkuo nau pasal upatakin nulepa chanvo changa rorelna insung a um nawk a, chuh Nau Lutir thuneina Sungkuo (Fratriarchal family) ti a nih a.

vi) Sungkuo memberhai thuneitu bik um chuonglo, pa ruokchu nu neka thuneina insang lem nei patriarchal family ni si lo a um a, chuh Thuneina intawm Sungkuo (Egalitarian family) ti ani nawk a,

vii) chun Sungkuo memberhai mimal zalenna nei a um bawk a, chuh Mimal zalenna Sungkuo (Atomistic family) ti a nih.

Hienghai naw khawm tamtak a um. Eini ruokchuh Sungkuo Pa lutak ni a nuhmei nau, ro thil le insung thuomhnaw Pasal thuneina le pahai hnam nuhmei le nauhai intawmpuia um, Pa thuneina Sungkuo (patriarchal family) chu ei na, Baibul-a ei hmu angin khawtlang le Sakhuo thil kawng iengkima roreltu ding le hmathuoitu ding chuh Pasal ei nih.

PATHIEN SUNGKUO :

Sun hun a hmun hrang hrangah sinthawin ei fe khawm a, zantieng mani chengna hmun sengah Sungkuo bikin ei inlawikhawm nawk diel hlak hin vantlang le khawtlangnun a suk thienghlimin nun venghimtu thatak a nih. Chuleiin, Thutlunghlui hun a, Biekin ala um hma lem khan chuh Sungkuo nuna inthawk Kohran hung piengsuok a ni leiin Sungkuo le Kohran hi Pafa anga pumkhat an nih an ti hiel.

Pathienin Sungkuo a lo remkhawm dan hi an thuk em leiin insung khawsak relfello chun Kohran le khawtlang nun an fuk thei tak tak ngai nawh. Sungkuo neilo Ransahai chuh an hung piengsuok a, hun sawtnawtea inthe darin, an nuom nuom an inse-khek hlak. Mihriem ruok chu ei hung piengsuok a, Nu mal chunga Kumli vengvawng hmangai le duot takin nundan mawi, nungchang tha le thiltha an hriet taphawt an min chuktir a, ei chengna khawtlang, nundan le chetdan ang dungzuiin ei hung inthanglien hlak. Chuleichun, Sungkuo Skul (Family Institution)-a Zirtirtu pawimaw le naupang ta dinga an Inchuk Bu le Nun Robu pawimaw tak chuh Nu le Pa anni leiin ei Baibul khawm hi Sungkuoah a tan a Sungkuo bawkin khar a nih.

Nunghak-Tlangval inditna hi suol a ni nawh a, Pathien remruot a ni lem. Chuleiin, Pa thuneina Sungkuo (patriarchal family) ei nih a, Pathien remruotna a Nuhmei-Pasal innei a Pasal chu alu tak le roreltu (Head of the family) ni’n Sungkuo hi indin a nih. Pasal le Nuhmei mihrang dai Nupa pumkhata siem, man le muol inpek lei el khawm nilo inhmangai le indit em em, Pathien hming lama kut insuina, Pathien Thutlung SA-Ui ei tanna ang a ni leiin ‘Pathien Sungkuo’ ei nina dinga thuruk inthup, hmu theia Lal remruot le vanram hawl phak a Pathienin a nina an puongsuokna tak tak a nih tihi hre a, Lalpa ditdan anga Sungkuo ditum ni dingin ei inbuotsai a pawimaw. Pathien Sungkuo ni dinga a naua inbuk ei ni si a.

By Prof Lal Dena

Switzerland map ei en chun Zurich khawpui chu hmar tawp tienga um a nih a. Geneva khawpui ruok chu sim thlang rawta um a nih. Zurich Airport-a inthawka Geneva ei pan chun Switzerland ram zatve hmawk ei paltlang ang a nih. Switzerland-ah hin a tuolbawm ram France le Germany hai angin phaizawl incham dei duoi hmu ding a um nawh. Lampui intluonin muol insang rak lo deuha lam lien a fe a. Chun, Geneva-ah ka um sungin ni li zet chawl a um leiin, Strasbourg (France)-ah Good Friday le Easter Sunday hmang dingin ka va fe a. France le Geneva inkarah vel thum kan lawn hman hiel. Tlang le muol kar deuh ruoka rail lam khawm a fe a, hmun iemani zata tlangver a um bawk.

France le Switzerland ramri taka Basel khawpui a um a. Khawpui hlui ve tak a ni lei amani ding museum a tam a, 'land of museum' ti hiela hriet a nih. Kunstmuseum, Dolihouse Museum, Museum Tinguely, Basel Minister le Swiss Architechture ropui tak tak hmu ding a um. Basel hi Geneva le Zurich dawttu a nih. Reformation hun lai le a hnung tieng peiah khawm Christian sakhuo hmun pawimaw le World Church leader-han "Basel thupuong" tia ro an relna hmun a nih.

Basela nek hmanin Geneva-ah museum a tam lem a hawih; museum sawmthum le art galleries iemani zat zet a um. Khawpui sungah hin park inhawih tak tak pangnga a um a. Gare Cornavin (Rail Station) hmun laili taka a um a, khaw tieng fena ding khawma a remchang leiin sin nei naw chang ka leng deuh zing. Tum hni zet direction kan hmanga, nisa a chang leh ka hmasuona, a chang leh ka hnungpuoka, ka nuom lei ni der loin France ramri bula Airport chen tum hni zet ka fe. Nupui bus khaltu motor bawk ka zui nawk a, UN building bulah ka tuma, chutaka inthawk chun ka tlungna chu ka zawngsuok thei hram.

Ni khat chu sun ni thlaka lengna ding ticket ka lak a. Bus stop tina ticket lakna khawl a um vawng a. English channel ei khika, ei fena ding option a man leh a hung inzieka, pawisa'n ei pek nuom leh pawisa ei thun a, a bang po a mi let a, credit card-in ei pek nuom khawma, a remchang hleih hleih. Ni khat chu tum bik nei loin tram pakhatah kan chawmlut a, a tawp rawt chen ka chuong a, mi po po an tum vawng tah a. Driver-in iemani a hung hril, ka tum ve chawt a. Ka tum hrim ni lo, Korean le Thai tourist-hai leh ni khata ei hril Univers de particles ka en pha ta a nih.

Geneva hi 'a tak'nina hi iemani zat a nei a. Ni khata Geneva Lake ei hriiah khan khawvela tui inkhawdawk insang tak a um a. Holiday hmangna le entertrainment tienga

World class top rank a lak bawk a. UN palaihai le international organization-hai palaihai fe khawmna a ni leiin khawpui sengso (most expensive cities) pathum laia pakhat a ni ve. World Happiness Report tum thum thaw a ni tah a, tum thumnaah khawm Switzerland hin 'happiest country' ti title a la lak. Hma an sawn tawngkhawng tah a, hi neka hmasawn nawk dan ding hi a um chuong ta nawh ning a tih. An buoi pui tak chu hringna hlutna chawisang ni'n an lang tak. Hi kawngah khawm hin Zurich le Geneva chu an sang tak (topper) an ni ve ve (cities with the highest quality of life of the world). Anni pahni inkarah khawm Geneva hi a la chunghnung lem rawp.

Mi an ringum ning a tih. Bus stand-ah ticket la hman naw hai khawmin, bus lut chara driver hnung taka computer khawl ticket katna uma, ticket lak a ni nawk hlak. Hieng hi mania thaw vawng a nih. Mi an chek zen zen nawh a, chek pala ticket nei naw chu muolphona a ni bak a, inchawitir an ni hlak. Tum khat Basel le Strasbourg inkara ka rail ticket an chek nawh a. Geneva ka sucksan ding tumin ka hmang nawk heuh heuh. Keia suksuol ni lo a.

Switzerland hi European Union-ah member a la ni nawh a. Amiruokchu, Schengen European country- hai laia inzawmna Schengen Treaty dungzuiin member pakhat a nih.

Chuleiin, Schengen country pakhat phawt phawta visa i hmu chun, a dangah khawm visa hran ngai ta loin i lut thei vawng tina a nih. UK ruok chu European Union- ah member a la ni naw el baka, Schenghen inzawmnaah khawm hin a la thang nawh. Tuta tuma parliamentary election- ah khan Conservative party an hrat leiin European Union-ah chu member an la ni vak ring a um nawh.

Ngaisang um em em zawm ve thei inla chu hun an hmang dik hi a nih. Bus, tram annawleh rail a ni khawma, an hung hun ding bus stand/rail station-a an ziek ang thlapin a minute chenin an hmang dik a nih. Biekin inkhawma le vantlang inkhawma hai hun hmang dik ve ta inla chu hmasawnna pakhat chu ni ngei a tih. 

Hnam dang dan thahai la veng ei tah,

An dan suol thik loin;

Ei ram lung  mawl indar hi,

Keikhawm tuma varna tha zawngin;

Hmatieng ke pen ei tiu.

(Tawnmang Mawl )

Ramthienghlim Varte

Nunghak Andy Rose le kan inhmelhriet hnunghin inngaina takin kan inbiek zeu zeu hlak a. A nungchang le a lungril ka hriet vawng nawa chuh, a hmel, a piengphung, a tawngkam inhmisal le innem riei ka hriet hnung hin chuh sawiselna ding reng reng ka hriet naw a, ka ta ding chun a tlingzo a nih. Chun le zuo nunrawng thlipuiin a nuoivel leiin a hmangai em em le an karah buoina sumpui a zing a; a hmangai tak leh nuom anga leng hmun khat thei lo, chu hmangaina Tupui-a inhlieu, pil vang vanga nun rinum tak hmang mek, lungril pangai khawm put thei lova um, nu lungsietum a nih.

Ama hi damlai lampuia lo tlusil tah hmangaina kuta kei tho tum nekin tlangram khuo kawtsuo bula Inkhieng thing a nuom nuomin an khaw, an deng, an sat, chilsak khum le sawisak ang; an khawtlang zanthima leng, mi sirde tlawk tlawk, chek ek le khiksaw a nih ti ka hriet hnunglem hin chuh a nun hih ka tuor puiin ka hrietthiem pui nawk zuol a. A chanchin a min zawt khum rawn po leh ka hmangaiin ka lunginsietna a zuol hlak. Nuhmei thenkhat mizie hi a mak bek a, bau le mit inro der lo, Beram anga nunnem lungril ruok chuh Malaria damdawi anga kha lo tawng tah ka ni leiin fimkhurna’n ka sip naw thei ngai naw a. Amiruokchu, keikhawm ama ang bawka damlai chirdum lo palve hrep tah, hmangaina no thlum tak khawm tur kha em ema hung inchang dan lo hrechieng tah ka ni leiin Andy vangduoina nopui hi dawmpui theitu ni dinga inngaina ka nei lei nin ka hriet hieng em ema kan inngainat hi. Kan thusep nuom an ang a, kan hei inbiek chang hin phurrik a zang huoi huoi hlak an nawm. Chuleiin, a lak a hin chuh ka khawnghat a tawiin ka mit an del a, ka fimkhur seng naw nih.

Vawikhat chuh zan Dar 12:00 velin a hung phone a, ieng thil am a ni ding tiin ngaipawimaw takin Mobile/Phone chuh ka pick up nghal a. A pa hi mi zaidam, tawng tam lo le mi inngaitlawm tak nisienkhawm an khawtlang nuhmei rorelna insunga khawsa, lungril intar taka um hlak a ni leiin a beidawng chang chuh a dawmve zeu zeu hlak a ni awm a. Hi zan hin chuh a lem rawn deu hlek lei ni mei a tih a nu le an inhal buoi thu a mi hril nuom leia mihung phone a lo ni zing a.

NU rorelna insung hi buoithlak deu el a na, an hnam innei danah nuhmeiin pasal an thuoilut lem a ni tlat leiin, Pa’n insungah thuneina changphaklo, thiltha thawding hre sienkhawm nu ngaidan an naw chun thawthei ni lo, insung thil le thuomhnaw reng reng nuhmei hminga um vawng a nih. Chuleiin, PA hin insungah thuneina an nei tlawm em em a, khawtlang le puotienga thawding a um ruok chun hmathuoitu pasal ni hlak ang reng si hi Kristien thuring bulpui leh khawm an kal tlata a ngai leiin a pa khawm an khawtlang nun hi a ngaidan a ni naw bakah a pawmzam thei lo tam tak a um a. Andy khawmin a dit naw leia pasal nei naw pha reng a nih.

Chuonga a nulepa insel ri a hriet chun room-a inthawk hung suokin tha taka um dingin a hril a. Lungawi naw deuvin a pa chun “I rorel dan indik naw le mumal naw leiin ei naunu khawm vawisun chen hin pasal khawm nei lo a ni hi “tiin chier pumin room tieng a pan a. A nu hi nu naran chung, ro rum tak el, an insunga ding chun Sakeibaknei ang a nih. An hnam nunphung hi nuhmei inlalna a ni leiin a tlangpuiin nuhmei hi an hrohrang a na em em a, pasal ngirhmun hi an hnuoi a, an rimsi em leiin an hringnun a tawiin Putar hmu ding an tam naw em em el hih hieng lei khawm ku hi ani’l awm de aw ti dam ka ngaituo a.

Chuongchun, a nu khawm chuh an room-ah lutin a pasal chuh rau pumin a riek khawm phal lovin, a hung nam suok a, an insungah buoina sumpui a zing a nih. Andy Rose chun a pa a lunginsiet em leiin a room-a inriek tir a tum hlak chun a nuom bawk si nawh. Common room-a khawvar nghaka um, a beidawng thu a mi hung hril a nih. A pa ti ang chun Andy hi a nu thu hrat leia a hmangai tak nei lo a ni leiin apa hin a khawvel nun hi a hriet puiin a lunginsiet a, thawi dam tumin kawng hrang hrang dapin a hnem hlak. Insung nei nung, hausa, chang kang, nuom nuoma in-vilik le dit dit nei thei ni inla khawm a sunga chenghai thu le hla an vuok fuk naw chun Tingtang her mil lo angin a ri a sie a, nun hi rin a um a, bei a dawngin hremhmun intem lawk ei ni zing hlak ti dam ka ngaituo neu neuvin a pawi kati pui em em a, keikhawm ka in thei bik nawh.

TAWNMANG MAWL:

Hun a liem pei a, keikhawm Ofis thil le inzawmin Kolkata, Nagpur le Mysore-a inzinin ka thang hmang nawk a, hi sunghin chuh chanchin kan inhrietpaw bek naw a. Ka sinthaw dinghai ka thaw fel vawng ta leiin vengtienga hung dingin kan siem a, hi zan hin mang mak tak el ka nei a.

Ka mang chun “Ka farm kan dingin ka lo suok a, lampui ka fe lai chun Andy Rose’n ka Farm hi hmu nuoma fe dingin a mi fiel hlak vei leh, vawisun hin hungve sienla chu an hawi awm de aw ! tia ngaituo neu neu pumin ka tlan pei a. Ka Farm Gate ka tlung chun nuhmei pakhat a lo ngir a, a sam thla hrep-hrupin a hnungtieng a min nghat tlat a, ka Jeep khal chuh chawlin ka en ta zing a, hun iemani chen hnungah a hung ngha a, mi lungsietum Andy Rose a lo ni zing el. Motor-a inthawk ka tum a, Gate ka hei hawng tum chun tawng lovin a mi lo hawng pek a ‘Hung lut rawh’ ti ni awm takin kut a hung vai a. Ka hei biek hlak chun a mi dawn nuom der nawh. A hmel chuh thil ngaituo rik tak nei angin a hlim naw hlea chuh a hmelthatna hi ka mita ding chun a chuoi chuong naw a, ka tading chun Rose parmawi tak ang a ni zing a. A rawlmawi le innem rieiin inphisala a mi hei biek changhin ka dam sawng sawng hlak a nih.

Ka hmaa chun a ngir a, a mi en vawng vawng a, a biengah mitthli hung luongsuokin a tap ta ngawi ngawi el a. Andy iem! ieng dinga i tap am, a san mi hril rawh ka ti a, chungtieng a khik ringawt a, chun vantieng ngha’n a kut a phar a, a tap sunzawm pei a, ka lunginsiet taluo leiin kan sumzo hlawl naw a, a beidawngna hnem tumin ka kuo vawng vawng a, ka tangnemah an bei a, an hniek fat fat a. Iem harsatna i nei, iengdinga hi lai hin ilo um ringawt ? tiin kan dawn nawk khawm chun mi sang lovin an hniek fat fat zing a, thla invaiin a mi kuo tawt tawt a. Lungngai der naw rawh, Andy, I harsatna po po phurpuitu ding kei ka um, hadam takin inbei rawh tiin ka thei ang angin ka thlamuong a. Hun iemani chen hnung chun a thuok le pangsa a hung re a, bo riei rieiin a chat thla tah a. Andy ! Andy ! Andy ! mi maksan naw “ tiin a ka khek suok a.

Chun, ka thanghar a Andy Rose hi nu vangduoi tak el a ni leiin a ringkawl bat hi rik a ti em a, a nun nghawkin a phurzo ta ngang naw a, khawvel var hmua dam zing khawm pei ta lovin beidawng-mangangna khel pielral rammawiah a thlarau chawl hadam rawng rawng lem ta dingin a hringnan khawvel a lo suoksan el tah dinga ringna lien tak ka nei tlat a; annawleh, keiin chu ngirhmun chuh chang lem dinga a mi lo hmu lawk pek lem am an ta ding ti dam ngaituo’n ka in thei tah reng reng nawh.

Bengaluru International Airport-a inthawk ka hung vuong ding khawm chuh um inden lo tutin ka um pha a, ka Ticket cancel hiel khawm ka nuoma chuh an hnu velvawng tah bawk si. Lungril sawl le ngaituona mumal nei thei mang lovin Guwahati himtakin ka hung tlung hram a, chun kan tuok huoi a. Airport-a inthawk Shillong tieng panin kan hung tlan ta vang vang a, Nongpoh-a thingpui kan dawn a, chuzova muongchangin kan hung pei a. Umiam (Barapani) kan tlungin Barapani Nga an lo khai fer-fur rek a, Andy Rose kan chawk pek khah kala hrietzing leiin kan chawl a, Andy Rose biek hmasa phawt nuomin ka Mobile ka hei zawnga ka hmuzo ta reng reng nawh. Nongpoh-a sunghai ka phone khah ka hmang tawpna nin ka hriet a, midang hei intum dingin Driver pa le chau kan ni bawk si. A number bek khah lo inchik lang tha ding a na. Ka biek thei naw phingin Nga khawm inchaw ta lovin kan hung tlan ta pei el a nih.

In ka tlungin ka Mobile sukhmang ka hril a, ka thuomhnaw phurhai kan hei phawrdar vawng a, fiemthua an hril vet Hmeithai khuoa Sertan ding zawng ang el a nih, kan hmuzo der nawh, an hmang tak tak chuh a ni el. Ka ruolhai biek thei pakhat khawm ka nei ta naw leiin lung indenlo tuta zal tumin room ka pan a, in thei lovin khum chungah kan tal kan tal a, beidawngin ka thova ka in thei tak duoiin tin zal pumin ka hla dittak “I am sailing…. Across the sea..!!” ti Rod Steward sak ni lo lem Nk. Tracy Huang-in zun thanga innem rieia awmbawra inthawka sipliem a hung mut suok hem hem ngei khah damte ten ka ngaithlak ta lem a. Ka taksa khum chungah zalin ka thla ruok chuh a hla i zirin van boruok le tuipui chungah an leng vel a.

“Tuifawn insawk bur bur chungah, Damlai Lawngin kan tawl ,

Hnuoi rinum hnusawnin, ka thla invai takin an leng der der,

I kuom ralmuong hmuna chawl dingin, Ka hung pan che….,

Mu anga vuongin, luoithli leh lungngaina sumpuihai ner tlengin,

Hnuoi rinum hnusawnin, ka thla invai takin an leng der der,

I kuom ralmuong hmuna chawl dingin, Ka hung pan che….,

Nun Thlaphang khek le inrumna khel rammawi chu ngaiin,

Hnuoi rinum hnusawnin, ka thla invai takin an leng der der,

I kuom ralmuong hmuna chawl dingin, Ka hung pan che….,” Andy Rose

tiin suongtuona’n ramtin a dap kuol vel a, ka hriet naw kar zanmu chuh kan tuorem thei tah hram a nih.

RISANG MUOL LIEM :

Ka taksa bunga pawimawna nei le mi suk hrattu tak ni naw sienkhawm ka ngaipawimaw laia mi Andy Rose ka biek thei naw hin ka umdan a mi suk khawrin kan khawnghat khawm an mit sel sulin ka hriet a. Ofis-a khawm muong matin kan thung hlei thei naw a, a ruolnu Kong Anita number hlak ka lo inchik bawk nawh. Number pangai an rang thei anga buoipui el naw chuh thawdan ding a um nawh. Ka buoipui sunghin karkhat zet a liem hman nawk tah a. Ka mang khah ka ngaituoin ka lung hi a kap zuol a, mi hrietpui lovin ka chung hi rik tupin helhawl invawiin ka nun hi ka hmang a, phone call ka nghakhla tak nisi’n ka huphur ruk hle bawk a. A hmaa kan inbiek chang in-a leng dingin a mi fiel hlak a, a nu le pa lakah a Hembawk inchang lem pal kan lau leia kalo nuom naw hlak khah pawi kati thar ta em em el a.

Kalo tung em em ka huphur bawk Kong Anita’n a mi hung phone ta ngei a, “Iem i chang a, Andy chanchin i hriet am, Inzin kar a pa a boral ti hung hril che ka tuma chuh ka phone thei der naw che a, Andy khawmin a phone thei bawk naw che ni khah. A pa ruong an vuiliem hma po keikhawm kava um a, ka ruolnu lungsiet umzie hi chu aw ! A pa hi a lungngai-beidawngna le harsatna iengkim an tlunna a na, ata ding chun vanpui chim ang a nih“ tiin. Chuphingleh, ka Mobile sukhmang le ka beidawngzie ka hei hril mawl mawl bakah ka manga ka hmu dan iemani tak a tuok ni ka ring reng thu ka hril mawl mawl a, Andy number a mi hung hril nghal a. A pa hi ka manga Andy ka hmu zan char khah a nih Risang muol a liem ni chuh. … Andy Rose -III ( Luahlo Lungdi ) - Next.

30^th June 2015.

India hmarsak a State hran hran hai inbeina khel zawl Tamchon Trophy a nawn a trophy la tah Hmar Football Club chun All India Registration alo hmu tah (Registration No. S/ND/676/2015 dated 28 July 2015). All India Club pakhat a in register kher nasan khawm Tamchon Trophy chau en ta lova Football Club puitling anga a trul le ei thei taw kanga inkhel pei ding hmathlir lei a nih. India ram ah football ngaisangna a zuol pei lain Hmar nau talent thra tak tak nei hai ta ding a platform ni a, ei hnam chawisang pei dinga beisei anih.

National level tournaments haia inkhel pei dingin Football talent thra nei hai tadingin kawl a eng tran mek!

TAKCHAPA HMAR FC!

Hmar FC, the Current/Defending Champion of the NE Tamchon Football Tournament (NETFT), is proud to announce that we are now an All-India registered Football Club vide Registration No. S/ND/676/2015 dated 28 July 2015.

As we prepare to defend our NETFT title, Hmar FC also looks forward to playing a bigger role in Indian Football. We look forward to providing a platform for talents from the North East.

Long Live Hmar FC!

By Prof Lal Dena,Sr.Fellow,ICSSR, New Delhi.

Tuta lekhabu ka ziek mek hi "FOURTH WORLD" ti a nih. Hi thu ziekna dinga hmangruo tam tak chu Geneva khawpui hmun pakhatah a um ti ka hriet a; chuonghai chu hmu dinga fe ka ni tak. Vangnei thlak takin ICSSR (HRD, GOI)-in ka kalman le Geneva-ah hmang ding a mi tum pek nawk hlauh a. Hi hi sorkarin zar zoa Europe kan zin vawihnina a nih nghe nghe.

Ka fe dan ding thuah sorkarin dit dan a nei a. Domestic le International flight-ah Air India-a vuong ngei ding; chuong a ni naw chun Ministry of Civil Aviation, GOI-a inthawkin phalna lak ding. Amiruokchu, Air India Delhi-Zurich direct flight a lo um hlauh a. France-a um ka naunuin "Zurich Airport-ah lo tuok kan ti che. Geneva-ah thak kan ti che a. I umna ding khawm kan lo sukfel vawng tah" ti an mi hung hril a, a hamthat thlak ngei el. Ka hamthat nawkna chu ka visa hnina vawisun anga Swiss Embassy tlung chu Pute M.Keivom, Ministry of External Affairs,GOI, a hei tawng zauha, a ni la lain an mi zo pek nghal. A hrat zar le keipui zar ka zo nawk ta pei a nih.

Darkar 8 neka tam met kan vuong hnungin Zurich Airport chu March 27 zing dar 6:30-in kan zuk tlung a.  Ka naunu le a pasalin an mi lo tuok a; darkar 3 vel kan tlan hnungin Geneva khawpui chu kan hei tlung ta a nih. Kar khat ring ding fak le dawn iengkim an mi lo ngaituopek diem a. March 27 le 28-in khawpui an mi fangpui a; ka sinthawna ding an mi kawk hmu a, bus ticket kat dan chen an mi hril a. Pathien niin Geneva ramri bul hnai French khuoah sunbu kan zu fak khawpin an mi maksana ta a nih, khuo chu a sawt vawng vawng kher el.

Geneva hi Switzerland rama khawpui langsar pawl tak laia pakhat a nih a. Khawpui lien a ni nawh. City bus khawmin a dung a khang darkar chanve sungin ei fang suok hman vawng. Tlang le muol chunga bawl a nih. Geneva hi "Global City"annawleh "City of Peace" tia hriet khawm a nih. Tawng pali: German, French, Italian le Romanian an hmang. German-hai hi zaah sawmruk chuong an nih a, French mi'n an dawt. Khawlai hmuna khawm fe la, Engligh-a biek thei vawng an nih.

Sakhuona tieng chu Reformation hun laia John Calvin hratna hmun a ni leiin Geneva hi Protestant City tia hriet a nih. Hi khawpuiah hin khawvel pum huop organization pariet lai a um a; chu laia langsar zuol chu UN palaihai inkhawmna, UN Human Rights Commission for Refugees, High Commisioner for Human Rights, Red Cross Society le a dang dang an nih. Khawpui lai taka Geneva Lake hi lengna hmun inhawih a nih. Tu dang ngai loa kut insuiha leng vel le dil kama kara boruok inleng lo khawpa inthung bo lo. An khat tawkin daffodil parvul hmu ding a um bawk, ei Wordsworth ve tep a nih.

Thil dang po neka mi'n dawnriltirtu chu khawpui puo met Meyrin muolhlum chunga UNVERSE DE PARTICULARS hi a nih. Khawvel mi thiem filawr scientists le electronic engineer zakhat pawlin an indin a ni a, scientific background nei naw leiin hriet thiem harsa ka tih. An thil mi'n suitir chu "Iem ei ni a? Khawlaia inthawka hung am ei ni a? Khaw tie'm ei fe pei ding?" tihai indawnna thenkhat chu an nih. Hi glope lien tak sungah hin ballon ball ang deuh zeng ruol vela lien sawm neka tam a um a. Button ei zuk hmeta khawvel ei nuomna tieng tieng ei inzinin kuol el a nih. Hi touch ball-hai hin ei tulai khawvel ni tina ei hmang, computer hmanga ei inbiekna, electronic power le damdawi tieng suithuk zuolna basic research thawna an nih. A tawizawngin ei chengna khawvela thu inthup, iem a chang pei ti dam suihna a ni bawk a. Chun hi First World Wide Web hi 1990-a indin a nih a; science inchuk a lo en nuom in um chun, hi hi an website a nih: www.cern.ch

Switzerland hi Europe ram danghai naw ang takin tharum hmangin ramper a hlutsak (colonizing) a thaw ve nawh a. Sienkhawm ramper hlutsak pawl (colonizing powers) hai lai a rukin sum thilthawtheina hmangin a kut a lo rawl hlak. Ram chite ni sienkhawm sum a hauh tlat a, hi hi vawisun chena a hratna thuruk a nih. Geneva khawpui hi Napolean Bonaparte a tluksiet kum 1814-a inthawka Swiss Federation a zawma inthawka hung inder suok a nih. Entawn tlak khawpui pakhat a hung ni ve. (Kilstett 10 May, 2015).

By LRS Puruolte

Khawvel hnam ze tinrenghai ta di’n,
Hmun le ram Chungkhuonu in a lo ruotpek;
Hmar nau lenghai khawmin hmun le ram chu zawng vein,
Hmar mihrangha’n an hringna an inhlan.

Mihrang fam lo changhai, in ta di’n hun le ni
A tharin kan hung inhlan cheu;
Hmar nau zaleng ruolha’n May ni sawm le paruk (16) hi,
Martyrs’ Day ti'n kan inhlan cheu.

Ram santu mihrang, buonleia lo zal ta hai,
In tlawmngaina kan innghil nawh;
Tlang tin muol tinah sam ang lo zal inla khawm,
In sakhming hril hi bang thei nawng kan tih.

Ram le hnam ta dinga mi tlawmngai hai le
Hringna chen lo inhlantuhai leiin,
Ei hnamin par anga vul ni la nei a ta,
In sakhming thangthar lai mawi zuol a tih.

Tukum 2015 a May 16 Hmar Martyrs’ Day hih inser tan a ni a inthawka a tum 25-na (Sawmhni Panga-na/Silver Jubilee Kum) ding a lo ni ve der tah. Hmun hran hran a cheng Hmar-nauhai chun hi Ni hin umni khamin hnam nipui a ni ang hrimin, hlu le inza taka suklangin, hlutsak takin programme chi tum tum hai buotsai le huoihawtin hmang an tih.

Hmarnauhaiin an phu hlie hlie, India danpui hnuoiah an i ngen, July 3, 1986 laia inthawka hma an lo lak tan tah le October 5, 1987 a inthawka vawisunni chena  Mizoram-a Hmar Autonomous District an ngenna le inzawma  pensuok, hnam Pasaltha chungchuong, an hringna hlu tak el in ro lo a, ram le hnam tadinga lo inhlan (Martyr lo chang pha hiel) tah hai hriet zingna, inzana le chawimawina Ni a ni ang hrimin hi Ni hi ursun tak, hlu tak le inza taka hmang le inser ning a ta. Chun, hi Ni hin hnam pasaltha, fam lo chang tah hai hrietzingna, inzana le chawimawina in an ruong zalna hmun ngei le an thlan haia dam fein totawka tawngtaiin, parhai inhlanna nei a ning a tih. Manipur State Level in Saikot Playground, Tuithaphai hmun a khawm ursun le ropui takin chawhnung dar 1:00 PM a inthawkin inser le hmang ning a tih.

Tukum hin Manipur a chun kum dang neka ropui le puithu lema hi ni hi inser dinga hmalak a nih a, kum dang haia la um ngailo item chi tum tum huoihawt ning a tih. Flag le T-Shirt hai khawm a hranpa taka buotsai a ni a, State puotienga inthawk khawmin ngaiven a hlaw hle a. Order a tamin, a’n zawm zut zing leiin buotsaitu Hmar Martyrs’ Trophy Organising Board (HMARTOB) le an thlawppui Print le Marketing mawphurtu Downtown Grafix, Tuithaphai laia mi hai chun an pekdawk seng naw tiengpang hiel a nih! Hiengang khawpa hnam le mipui hlutsak a hlaw hle-na thu a hin i/c Media & Publicity Department, HMARTOB chun an lawm hle thu hrilin, hnam tadinga mi thahnemngai, inphal tak tak, an hming lam senglo hiel an umna thu a khawm lawmthu an hril mawl mawl a nih. HMARTOB huoihawtna hnuoiah April 7 - May 16, 2015 inkar sung aw ding a buotsai The 12^th Hmar Martyrs’ Trophy Football Tournament 2015 chu Saikot Playground ah khel a nih a. Kum dang po po nekin thlirtu mipui an thahnem thei hle a. Final ni le Hmar Martyrs’ Day Manipur State Level May 16 a hi lai hmun a inserna hun a lem hin chu mipui an thahnem zuol hle dinga beisei a nih. Chuleiin, Traffic, Steward/Usher, Official T-Shirt, Badges, Security, Stall le thil tul chi tum tum hai chu uluk taka huoihawttuhai hrietpuia peifel diem a nih. Unau hnam tum tum hai khawmin an hlutsak em em a, hi tournament a khawm hin Team 34 lai zet thangin, State le National Level a in khel phak, Club inlar tak tak haia Player ni phak dam, District puotienga mi khawm hi huna inkhelna a hin an thang a nih. Hieng a ni lei hin mipui mit khawm a tlaiin, hi Tournament hi ngaiven a hlaw em em el a nih. Manipur sung a bawk hin Sinlung Badminton Association (SBA) huoihawtnain 3^rd Hmar Martyrs’ Badminton Tourney 2015 khawm May 14 – 15 inkar sung Muolvaiphei Community Hall ah huoihawt a nih. Hieng Hmar Martyrs’ hai puol a thil huoihawt a um hai hih, hi neka ropui le huop lien lem le hmun pakhat ah khawvel huop a la thaw a hung ni pei hi mi tamtak chun an lo nghakhla hle a. Chuongang chu huoihawttuhai ngaituona inril tak khawm a ni mek a nih.

Tukum a Saikot khuo a hi Ni le inzawma item suklang a um dinghai lai hin Hmar mihrat hmingthang (L) Pu Khuplal Songate a tuhai laia mi Mr. Khuplal (16) khawmin Hmarhai hrat zie khawvel hmuhawiah a pholang ding a nih. Hi hun a hin Cultural Show chi tum tum Muolvaiphei le Rengkai HYA hai a inthawk in entirna um a ta, ram le hnam hla  Nk. Lalengvari Sinate, Nk. Gladys Lalparzo le mi hran hran a inthawk ngaithlak ni bawk a tih. Hi hun a hin Prof. (Dr.) L. Fimate HoD, Forensic, JNIMS chu Khuollien niin, Khuol inzaumin Puhai- Thanglianpau President, ZRO le P.S. Haokip President, KNO hai thang an ta, Khuol Chawngpuin Pu Laldawnlien Varte President, HYA Gen. Hqrs. A thang bawk ding a nih. Hmar Martyrs’ hai inzanain Commemoration Service um a ta, HPC Returnee haiin hun hmang bawk an tih. Football Final Match chu Hilltown FC le Lamka Sports Club (LSC) in inkhel an tih. 2014 a Hmar Martyrs’ Trophy latu chu B. Aijalon an ni a. Runner Up chu FAST (Rengkai) an nih. Tukum a hi Trophy 3^rd Place chu Sielmat in an lo lak tah a nih.

Hrietzing tlak hai:

*December 1989 khan Hmarkhawlien Khuo, Assam  ah Hmar Peoples’ Convention (HPC) Inkhawmpui nei a ni tumin kumtin-in May 16 hi “Hmar Martyrs’ Day” ti a inser di’n rawtna le thutlukna siem a nih.

*1990 khan chu HPC sunga chauh hi Ni hi ursun taka inser tan a hung nih a. A kum nawk 1991 a inthawk khawvel huop, Hmar hnam pumpuia inser dingin HPC chun ngenna le thupek an insuo a. Hnam sunga Political tienga Pawl lien tak a ni lei le a hmalakna chu Hmar mipui inhniktlangna a ni bawk leiin, thlawp a hlaw thain, a hlawtling hle.

*HPC Returnee hai chun Nov. 12, 1996 khan Saikot khuo ah Hnam Santu Pawl ti hming chawiin Pawl an indin a. 1997 khan Hmar Martyrs’ Football Trophy hi an hung rawt dawk a, anni hai hmalakna zar le huoihawtna hin Football Tournament kum tin, tum 11 lai zet huoihawt a lo ni tah a, Unau hnam tum tum le Team inlar tak tak hai chu hi tournament a hin suokin, an inkhel hlak a nih. Hi tournament huoihawt hi tukum a inthawkin Hnam Santu Pawl hin an pekdawk angin Hmar Martyrs’ Trophy Organising Board (HMARTOB) indin a hung umin, anni kut ah a hung um tah a ni a.Anni inrawina le huoihawtnain Saikot Khelmuol ah Manipur State Level a ding bikin The 12^th Hmar Martyrs’ Trophy Football Tournament 2015 ti a a hming inbukin huoihawt zawm pei a hung ni tah a nih. An thil tum chu inpumkhatna le inthuruolna thalem a hung um theina ding, hnam tadinga fam lo chang tah hai hrietzingna ding le Thalaihai insukhlimna hmangruo pawimaw tak ni dingin Football le Badminton Trophy hai hi an hung huoihawt ta pei a nih.

Hmar Peoples’ Convention (HPC) hung in tan dan le Hmarhai:

Hi pawl hi hnam tadinga tlawmngai fal bik Pu J. Laldinlien, Pu Thanglien sung, Pu L. Sungte le Pu J. Thanzuola hai chun July 19, 1986 khan Pu Mana & Sons hai building Dawrpui, Aizawl-ah an inthung khawm a. Chutaka inthawk chun  Mizoram Hmar Conference koin Organising Committee Chairman  dingin  Pu J. Laldinlien le Secretary dingin Pu Thangliensung, Treasurer dingin Pu J. Thanzuola le Convenor dingin Pu L. Sungte hai ruot an nih. Chuongchun, Mizoram Hmar Conference chu Vaitin ah October 19, 1986 khan rawt a nih a. A thupui chu Hmar Political Future a nih. Hi tum hin pawl indin le hmalak a tul zie an hriet leiin Mizoram Hmar Association indin a ni a, hi zo December 9, 1986 Sakawrdai-ah Convention chu ko nawk a nih a. Hi taka hin Mizoram Hmar Association ti chu Hmar Peoples’ Convention (HPC) tia thlakthleng a nih. HPC President hmasatak chu Pu J. Laldinlien a ni a, Vice President Pu Thangliensung, Gen. Secretary Pu Malsawm Ralsun le Treasurer Pu J.H. Thanzama a nih. Hi zo sawtnawte a (1). Pu J. Laldinlien, Suongpuilawn A/C, (2). Pu Thangliensung, Ratu A/C, (3). Pu Malsawma Ralsun, Bilkhawthlir  A/C-ah an ngir a. Vangduoi thlaktakin an hlawsam seng a. Chu hnung chun President chu 1987 khan MAP haiin an man le inzawma a bang leiin Pu J.H. Thanzam rawiin October 5, 1987 khan Mizoram Governor kuomah Hmar Autonomous District hnina Memorundum an peklut a. Sawrkardai ah April 12 – 13, 1988 khan 1^st Assembly chu nei a nih a. Hi taka hin President Upa Hmingchunghnung, Vice President Pu Thangliensung, Gen. Secretary  Pu T. Thangtluong  le Treasurer Upa Thangsung thlang an nih. Pu T. Thangtluong in a sina harsatna a um leiin Pu Malsawm Ralsun hmang a nih. Hiengang hin Politics inlumlet chun hun a hung fe pei a. Mizoram sung le khawvel a Hmarnauhai thlawp a hlaw hle a nih.

An thil ngen sawrkarin a ngaisak naw leiin an lungawinawna suklang dingin March 28, 1989 chun Peaceful Bandh darkar 24 sung Demand Area ah neiin chu taka chun Mizoram Armed Police (MAP) hai chun pawitawklo, Inchûklai, Nunghak le Tlangval hai chu indawina thang der loin Khukri Chem damin an sat a, thingher in an vuok bawk a, thisen a luongin a luong el a nih. Chutaka hliemhai chu  Aizawl pan ngam lovin Tuithaphai tieng an pan a, Rengkai Community Hall ah enkawlin sawt tak bawsawmin an um a, vangnei thlak takin a thi ruok chu an um nawh. Chu zo April 18-19, 1989 sung khan Bandh (Peaceful Bandh) darkar 48 an ko/huoihawt nawk a, hi tum hin MAP ha’n Tlangval le Nunghak tam tak chu ramhnuoiah an hnawt lut tah a nih. Hienganga thil a hung ta pei lei hin ramhnuoiah thang khawin  kum iemani chen an khawsa hnungin Mizoram Sawrkar Congress (I) Sawrkarna Congress- (I) sawrkarna hnuoiah July 27, 1994 khan MoU an hung ziek thei tah a. Hi Accord Signed hun laia thuoituhai chu President Upa Hmingchunghnung, Vice President Upa Thansung, Gen. Secretary Pu Lienhmingthang Varte, Asst. Secy.- Sapkhum, Info. & Pub. Secy Pu Sangthankhum, Chief Organiser- Lalmalsawm Darngawn le CRC Members: 1. Dawnsavung 2. Darlaithang 3. Khumte Hmar 4. Manthamawi 5. Tlangthankhum 6. Rosiem 7. Lalthanmawi hai an nih.

July  ni 27, 1994 a Mizoram Sawrkar le Remna Thuthlung ziek a, nundan phung pangngai hung zawmtu HPC hai chun Sinlung Hills Development Council (SHDC) huom chin ding RAMRI an siem/rin dan chu Mizoram Sawrkar ah ni 20.11.1994 khan an thelut a, SHDC chu mi thenkhat in rawina hnuoiah Hmar hai ngen tak District niloin Sinlung Hills ah sin a thaw mek tah a nih. –( RAMRI an siem/rin dan chu Manmasi YB 2006 – 2007; Phek 166, 167, 168, 169 hmu thei a nih). Amiruokchu, Hmar mipui tamlemin an thil hni tak le dit dan tak a ni phak naw el bakah Mizoram sawrkarin inremna thuthlung an siem chu a zawmnaw le bawsiet a um lei le an thil ngen ang tak a la pek naw le ngaisak nuom naw zing leiin vawisunni hin Hmar ha'n Mizoram a Autonomous District an ngenna chu an la sunzawm zing a, thahnemngaina le hnam hmangaina a nasa deu deu leiin Pawl khawm tam tak a hung pieng pha ta pei a nih. Mizoram  le India Sawrkar hai hin an hmatienga Hmarhai thil ngen hi an ngaisak hi an thaw ding tak a nih ti hi an hriet thar nuom a um  hle. Mizoram-in zalenna le India ram laka ngen a nei lai hun a khan Hmarhai chu a thuoitu, hmalatu, a tuortu tak le an hnik hnik an nih a. An hringna chan khawm tam tak an lo um a nih. Hmarhai hi mihriem le hnam pakhat, Pathien siem  an ni ve a, chuleiin inza a, ngaisak an phu hle a nih. An tawng humhal pek, kawng hran hran haia thlir hranglo le an tawng, khawvela tawng mawi le hausa ve pawl a ngai thei hiel hih Mizoram Official Language a hmang khawm a phu hle a nih. Mizo inti nuomlo tam tak thangthar lai an hung um pei ta nasan tak khawm sirde an ni lei a nih! Hmarhai chunga Human Rights dan kal a chetna hi Mizoram a a hluor hle el khawm hi mitam tak mak ti le unau kar hung suk hla dei deu tu a nih ti Mizoram sawrkar le Mizo hnam hmangaituhai hin an hriet thar dinga tha chu a nih.