Ro le Kei

Inpui.com Columnist Pu L. Keivom remembers (L) Rev Dr Rochunga Pudaite from various angles.

I weep for Adonais—he is dead!

Oh, weep for Adonais! though our tears

Thaw not the frost which binds so dear a head!

And thou, sad Hour, selected from all years

To mourn our loss, rouse thy obscure compeers,

And teach them thine own sorrow, say: "With me

Died Adonais; till the Future dares

Forget the Past, his fate and fame shall be

An echo and a light unto eternity!"

- P.B.Shelly’s ‘Adonais’

October 16, 2015. Voisun hi Dr. Rochunga Pudaite-in muol a mi lo liemsanna kar khat a lo ni der el tah. Chu sung chun kan khawvel chanchin tlawm te bek ziek tumin ka kompiutor hmaa ka hang inthrung hlak a. Ka ngaituona lipui, tui lien insang anga hung trè thla ding chu ieng am ka law ding ti ka buoi lai chun, a tingtu khăr a um ni ngei a ta, far khat khom a hung far thla nawh. Mak ka ti a, kan sulhnunghai ka sui neu neu ruolin a san ding awm ka dap bok a. Indopui Pakhatna laia bomb puok darh chum chumin a nghong buoi, lungril le ngaituona pangngai put le hmang thei loa umhai ngirhmun hrilna, ‘shell-shock syndrome’ an ti ang deuh kha niin ka hriet. Ngaituona chechâng thei lo, aiinkhuop (aikhirh), hamhaih, chi-ai, ngol, ngong, bîng, chawlol ngirhmuna um tina a nih. Lusun tongkhong lai trap thei der lo an um a, khawsawt tongkhong laia hla phuok amanih sak khom thil thei lo tluk a nih.

RP le Kei

Voituk ruok hin chu a hung zieum met tah leiin ram le hnam ta dinga rong kan bawl tlang dan chanchin, a thren ka lo ziek tah le ka la ziek lo laia poimaw ka ti zuolhai chu favang potsielin ka hung thuol tum a nih. Kum 2007 March 23-April 7 inkâr khan ‘RP LE KEI’ ti thupuia hmangin Part 3, phek 12, thumal 7753-a sei ka ziek ta a. Ka ziek san khom March 18, 2007 chawhnung DHCF-ah thuhriltuah an ruot a, ni danga mi po po laia thothang thra tak ni hiel dinga inper et et hlak kha chengkol hniek tiema muongin a che tah thung a. Pulpit a pan lai le dawsawna a hang lawn kai lai hei enin namen loin lungril a them a. Muol a mi liemsan hmain, mi danglam le dangdai, a dung lêt tama insang, a pum lêt tama lien le keng rawn a nizie dam; a naupang laia inthoka hnam invet chilhtu, hnam aidentiti phur suokna dinga poimaw chu hnam kalchar vong hring le sukhmasawn pei a nizie hmu chienga hnam puon nei poimawzie tlang insampui a, ‘Hmar Puon, Thangsuopuon’ hung suokna dinga bultrantu laia mi poimaw a nizie hai; Scheduled Tribe List-a Hmar hnam ziek lut dinga hma a lak dan hai; pawlitiks inher suol leia Hmar hnam bing ta dinga ngirhmun suol suok tuma Hmar National Congress (HNC) a hung indin dan hai; Hmar trong le thu le hla sukhmasawnna dinga hma a lak danhai le a bebawm thilhai dam le indik le thraa a ngai thil a thilthawhai chu soiseltu an um khoma saipui lamlawna hma tieng pan ngat ngat mi a nizie iemani chen bek thrangtharhaiin an hriet ka dit lei a nih.

Pherzawl tlangah

RP ka hriet tranna chu kum 1953 lai khan a nih. Allahabad University-a B.A a thaw laiin kan khuo Pherzawlah a hung in zin a, ni iemani zat a châm a. A u Ramlien Pudaite kha NEIG Mission Middle School-a Headmaster a ni a, a inah a tlung hlak a. Class 7 kan inchuk lai a na, a ruolnu Lal Rimawi hi kan pawla mi a ni a, nunghak danghai chu Lalhlupui, Huoli le Phiri an nih. Chuong lai chun Pherzawl-ah kohran pahnih-Watkin Roberts pawl Independent Church le H.H.Coleman pawl NEIG Mission- kan um a. A nawlpui chu Independent Church-ah kan inlawi a; mi tlawmte, hmarchadengkhop chauh ti ding hi NEIGM tieng an inlawi a. Kan pawl nunghakhai kha NEIGM tienga inkhawm deu vong an ni a. Hla phuok thiem le rawl thra, T.Khuma vanglai a ni bakah Lalhlupui kha hla sak thiema hril a ni a, hla pawl an nei changkang thei khop el. RP a hung khan Chorus iemani zat a zirtir hman a, a khawnawtin kan inbukpui a ni tak. Hi hi Chorus kan hriet le inchukna hmasa tak a nih. Chun, gramophone rikawt te, phek khata hla pakhat pei, Independent Kohran Hla bu-a hla an khumna a hung chawi a, pulpit inthokin an saktir a, Hmar trong le hla khom rikawtin a lo man el thei chu mak kan ti thei em em hlak. Hmar puon a hung bât bok hlak a, chu chun thu a hril rawn hle.

Beyond the next mountain

Pathien thu le hla le hnam ro hmangruo hmanga a mihai hmaah tukver thar hongpek a, mit thara ram thar inthlirtir a, beiseina thar pe a, Choir-a a hla inchuktir, ‘Thaw thei ruol loa inlang khom ringnan thaw thei a nih’ ti khom a tak ngeia ama nuna inentirtu a nih. Chu chu RP danglamna le chungchuongna a nih. Mi pangngai hisapnaa inthoka a thawa thaw chu hril lo, mangphan phak lo dinga ngai tam tak chu ringna hringa inthuomin ama nuna ngei a damsungin a a ziek a, tak ramah a’n changtir a, khuo chikte Phulpuia inthokin tu laia khawvela ram ropui taka ngai, kawlvalensam ram USA-ah a’n chawm lut a, chutaka inthok chun Bibles For The World indinin, Chanchin Thrain khawvel kil tin a rŭn a nih. A film hminga ‘Beyond The Next Mountain’ a’n buk khan, Phulpui tlanga inthoka inlang phak kawlrawn khelah ram a la’n zar dei duoi thu a hril bakah, hringnun tlang sîp khelah, thina vadung ralah thlarau chawlna ding khawpui mawi tak le ringnawtuhai hremna ding meidil khawvel a um thu a hril a. Meidilah fe lo a, khawpui mawiah mi tin, chi tin le hnam tin hai an inlawi theina dinga rawl tawpa tlang insama a dam lai ni po po hmangtu chu RP kha a nih.

Malsawmna ni

Abram ko suoktu chun, “Hnam ropui takin siem ka ti che a, i hming sukropui ka ta, malsawmna ning i tih” (Gen 12:2) a ti bakah “nangma zarin hnuoia hnam tin malsawmin um an tih” tiin a hril a. Tu am a nih ti a la hriet lo rawl chu awiin, a thu chu ringa pomin, a fena ding tieng khom hre loin, a kepui zawn zuiin, a’n thok suok mop a. Trampui mitsimin a lo hmuok a, harsatna le muolphona tuokin voi hni zet a nuhmei an lakpek a, sir tinah do le ralin an inhuol vel a, a hung inpempui um sun, a unau Haran naupa Lota chengna khuo hlak chu a Kotu lungsenin mei le kâtin a raw utpek vong bok. Malsawmna ni ding chun a ‘dâu’ a thra naw khop el. Kum 99 a ni chenin a nuhmei Sarai hlak chu a la ching zing. A nuhmei ringna inphetin, thikthu khom sukse phal loin, Pathien thu tiem sukpuitlingna dinga ngaiin, a pasalin nau a nei theina dingin a umpuinu Hagar chen a pasal hmei dingin a pêk a ni khah! Mani le mi ta dinga malsawmna ni theina ngirhmuna um ding chun tumruna, tuorselna, taimakna, teireina le ringna detdoa inthuoma hma nor a ngai. Chu chu thi chena inpumpekna nun a nih. Hnam pa le ringnaa thangsuo hmasa tak a hung nina dingin kum tam tak a ngai. Hebrai lekhathon ziektuin ringnaa thangsuo pasalthrahai chanchin a zieka khan Abraham chun Point 11 a hmu a, a dottu Mosie chun Point 8 vel a hmuh. Phulpuia inthoka muol a liem chena ringnaa kal a chawinaa RP point hmu zat ding hi sût inla, a hmu insang ve hle ka ring.

Phulpui-USA

Beiseinain mi tinin boruokah in ei bawl seng a, chu chu a taka bawzui pei ruok chu mi tlawm te ei nih. RP chun Phulpui kawlrawn khelah sir le hluo seng lo ram a um dei duoi ti a ring a. Chu ram paw theina um sun chu lekha thiemna a nih ti a hriet leiin, a mit a hung keu tran hlima inthokin thiemna hnotin, ieng ang rinum khom tuor huomin, a nu le pa angsung le an in lum suoksanin Churachandpur Mission Compound, Jorhat, Calcutta le Allahabad fe thlengin B.A chen a hung tling a. Chuong lai chun Zoram khawvel vanzawlah B.A tling phak chu nisa suok hlima arasi tiem ang a nih. Sienkhom, chu chun inbŭr a tum nawh. A mihai khawsakna ding ram suol suok nuoma Hmar National Congress indin le Scheduled Tribes list-a a hnam ziek lut bak chu sorkar thilah kop a tum nawh. Hmu thei lo hmutu le thaw thei ruol loa inlang khom ringnain thaw thei a nizie ringtu a ni leiin, a thaw nuom tak Pathien thu inchuk le buoipui dingin Scotland-ah a chuong lut a, chu taka inthok chun USA khawzawl, Bible Belt ti-a ko hlaw, thuhrilru ropui Billy Graham lekha inchukna, Wheaton College (Illinois) ah a tla thla a. Phulpuia inthoka inkhi chun a phak hla tah khop el.

Insuikhawmna sin

Hi hmun hi insaisangna le hmunpuia hmangin, Watkin Roberts-in ama aiawtu dinga a hung ruot hnungin, Indo-Burma Pioneer Mission (IBPM) ah Executive Director a hung ni a, hmunpuia Sielmat hmangin, insuikhawmna sin a hung tran a. Kha hmaa kohran hrang hranga lo inthrehai kha a tam lem hung hui khawmin, a hming phuok thar, Independent Church of India (ICI) hnuoiah kohranin sir tinah hma a hung sawn hlut hlut a, inchukna tieng High School chauh khom ni lo, kha hmaa mi mang phak lo, College chen a hung ngir a ni khah. Theology inchuk dingin Mission-in mi a tir suok truk truk a, chuonghai chu a hnunga kohran ban poimaw an hung nih. Sum harsatna leia inchukna sunzom thei lo ding le hmun thraa college kai phak lo ding tam takin chawmna sum an hung dong leiin mi thiem tam tak, sorkara sin insang chel dam, an hung suok pha a nih.

Mission Buoi chungchanga inremna lampui dap dinga India rama ST laia IAS tling hmasa tak Jamchong Nampui, Hmar hnathlakhai laia IFS hmasa tak Lalthanzau Pudaite le Manipur State-a inthoka IFS tling hmasa tak kei, kum 1972-a Sielmata kan fe truma keini pathum titinaa Jamchongin, “Rochung hi dem dem naw raw hai se. Kei, India ram tribal laia IAS hmasa tak intipa hin ka nauhai ti naw tu khom inchuk lai ka la chawm naw a, ama chun a zaa tiem a rongbawlna rain a chawm a nih” a ti a, ngaituo tham thudik niin ka hriet. Chuong ang inkhina hmol chu hmanga ei inkhi pha, RP ngirhmun hluo hi hriet thei chauh a nih. Ei ram aiawa ngirhaiin ei rama sikul tlusehai mit sira an mel hun chu thaw lo hlaw lahaia inthokin an chan ding a um le um naw an hisap chang chauh a ni laiin, RP chun hmangaina mita enin tungding a tum a, tlawm le za dawn chang loin, Krista hmangaituhai kuomah thrangpuina a hni a, PMS sikul hmun tam takah inngirin a um a, damsunga uniform hak phak lo ding mi tam takin hmasawnna thuom inbelin, mawlna thima inthokin hrietna var an pan a, tam tak Krista hrietna varah chatuon hringna changin a thruoi lut a nih.

Delhi Version hringtu

RP leh hin thu le hla khawvelah kan inthlop nasa a, lekha kan inthonna, Baibul tiet tieta sa file iemani zat ka laibrari-ah hin ka kol a. Kum 1963-a Graduate po kha Executive Director, Indo-Burma Pioneer Mission a ninain October, 1963 khan Holy Bible (King James Version) a mi rochung a. Hi Baibul hi keini sungkuo hmang tak le rikawt poimaw kan hlu lutna bu a ni a, kan hmang inrim hlea chu kan la kol thra hle a. Kum 1990 October-ah kum tina Bermuda-a an Fienrielna (Retreat) a thrang ve dinga an mi fiel trumin New International Version (NIV) a mi rochung bok a. Kan inzinna Chanchin hi phek 23 zeta sei, ‘Khawvel Thara Inzinna’ ti thupuia hmangin ka ziek a, a hnungah a bute-in an insuo nghe nghe niin ka hriet. An rongbawlna Chanchin dil sut taka hre nuomhai chun tiem non chi a ni ka ring. Hi truma a Baibul mi pek hi kum sawmpasari hnunga Delhi Version Baibul hringtu a nih. A hung hring suok dan le a bebawmhai, artikul hrang hranga ka zep sahai chu lekhabu puitlinga buotsai tham a nih.

Ramhmangai

RP khan invet chilh pahnih a nei a. Pakhat chu hnam, chu khom chu kholbing deu el, ama hnam bing HMAR hnam a nih. Hming lemah ‘Ramhmangai’ kan ti hlak a. Chu chun umzie pahnih a nei a. Pakhatna chu ram le hnam hmangaitu le invoitu tina a nih. Pahnina chu in le lo indinna ding ram inchawk ding zong zing hlak mi tina a nih. Hi hin kawk inthuk deuh a nei a, chu chu a gospel bok a nih. Hi le an vet chilh pahnina-sakhuona- chu laihrui inzom an nih. 1 Johan 4: 20-21 a chun, “Miin, ‘Pathien ka hmangai’ ti sien, a unau theida si sien, ama chu mi khêlhlip a nih. Unau a hmu zing hman hmangai si lo chun Pathien a hmu ngai lo chu iengtin am hmangai thei a ta? Hi thupêk hi a nih a mi pek chu: Pathien hmangaitu chun a unau khom a hmangai ding a nih” ti ei hmu a. Baibula mi challang pahnih-Mosie le Tirko Paula- hai kha hnam le sakhuoa hring full thrak an nih. RP khom chuong ang tho. A hnam le a sakhuo chu tangka hmai hni ang a nih. Hmar-in a pieng a, Hmar-in a thi. Chu chu a ni lai zingin, Pathien neitu a ni leiin, Matthai 5:43-48 a Isu hril khah a nunah a tak ngeia la lutin, hnam tin le khawvel pum huopin rong a bawl a. Chu testimawni chieng tak chu khawvel pumpui huopa a thlawna Baibul sem rongbawlna hma latu dinga Bibles For The World (BFW) a hung indin khah a nih. BFW hin trong hrang hranga buotsai Thuthlung Thar kawpi maktaduoi tam ram hrang hrangah a thon dar tah a nih. Thaw thei ruol loa inlang khom ringnan thaw thei a nizie a nun ngeia hriltu chu RP a nih.

‘Ramhmangai’ tia hming lem kan pekna san tak chu, khaw lai hmuna khom fe sien, ram inchawk ding a melkai zing khah a nih. Josua kuoma Iengkim Lalpan, “Mosie kuoma ka hril tah ang khan, kea in sirna taphot chu pe vong ka ti cheu” ti khah RP chang thlang laia pakhat a nih. Thil thar le hmasawnna rurel (infrastructures) indin ding chun ram ei mamaw makmaw. Ieng anga prawzek thra khom duong inla, inbunna ding hmun le hma a um si naw chun umzie a nei tlawm. Hmathlir hla tak le chieng tak neihai chun, beiseinaa boruoka in an bawl kha a taka inthrutna ding ram an melkai naw thei nawh. Development project le ram hi laihrui inzom an nih. Hmathlir sei tak le tam tak nei RP-in a thi chena ram inchawk ding a melkai khah a ram le hnam le a mihai ta dinga ngirhmun det indin a nuom lei a nih.

Mi hlawtling

Kum 2004 khan thusep, HLAWTLINGNA HI IEM A NA? ti ka ziek a. Chu taka chun ‘The Success Journey’ ti ziektu John Maxwell-in, “Success is a journey” a ti le R.L.Stevensonin “The true success is to labour” a ti chuh ka zawna donnain ka hmang a. Hlawtlingna chu tum ram pana ni tina inzin pei hi a nih. Chuonga inzin mihai chu Pathienin a vochuom, theina bik an kol chu hre zinga hmang trangkai tum mi le anni ta dinga hring loa mi dang ta dinga hring hlak mi an nih. Pastor Thangngurin,

Ka ta dinga ka hringlaiin ka lawm ngai nawh.

Ka Lal Krista kona anga

Isak maichama ka inhlan chun,

Malsawmna tuikhur lawmnan a hung luong

ti khan a hril fie hlein ka hriet. Mani ta dinga hring ta lona, mi ta ding le thratna dinga hring ta lemna nun neitu chu pasiein hausa sien, chinin lien sien, mi hlawtling, malsawmna tuikhur a nih.

Chu chu inpumpekna maicham, Thangngurin ‘Isak maicham’ a ti chu a nih. RP nun kha ei thlir kir chun a lungril po po, a theina po po le a nei po po mi ta dinga a thi chena hmang fai thrak mi niin a’n lang.

Ruol siem thiem

Kum 1990 October-November a thla khat deuthaw kannu Dari le an kuoma kan zu cheng sung khan an nupain inrim taka sun le zan chawl loa sinthaw an nizie mit ngeiin kan zu hmu a, an phur kha mihriem pangngai theina le hratnaa phur zo chi a ni naw hrim hrim. Chuong sa zing chun, ieng lai khomin hmêl hlim putin, an innui ver ver thei zing a nih. Eurokuilo thlipuiin kar hni top Mediterranen Tuipuia an chuongna long a vor let laia thlamuongna thu hrila a chuongpui mi 276 zet hnemtu le humtu chu Pathien neitu Paula a ni ang khan, ram le hnamin harsatna a tuok changa hnemtu le somdawltu laia kut trangkai pakhat chu RP a ni rop. Mi lien le poimaw inhmelhrietpui a hau a, a fena taphotah ruol a siem zung zung a. Chu chu thilpek ropui, mi nazong nei thei a ni nawh. Chuong hmelhriet le ruol a siemhai chu siet tuok nikhuoa mi trantu le hrilpuitu trangkai an ni hlak.

Chungchuongna chi hnih

RP chungchuongna dang nawk chu thu hril thiemna le thu ziek thiemna a nei kop kha a nih. Dannarain, thu ziek thiemhai hi thu hril thiem an ni naw tlangpui. Saptronga a chanchin le rongbawlna an ziek tam tak a um laiin, rong a bawl tran hlim laia a buotsai, ‘Tlângchâr Tuihnăr’ le chu taka a thusep ziek pakhat besana hla a phuok, ‘Suilung phâng lo’ hai kha literechar khawvela taktling thu le hla a ni leiin, Hmar hi hnama a dam khawsuok chun, thrangtharhaiin a mawizie le hlutzie hung hre deu deu an ta, ngaisang hlaw deu deu a tih. A hnung daia annu damnaw laia Sam 23 besana a buotsai ‘Lawmna Thuruk’ ti khom kha literechar tling lekhabu a nih. A ziek laia editing ka thawpui le a suok hnunga Mizo-Lusei tronga inlettu ka ni a. Kha lekhabu te kha a thrat em em vei leh, Mizo tronga a aitechêuna dinga inphuoi deua inlet kha tuoi nam le editing ka thaw laiin, an sut hmaa kar khat la nghak dinga Shillong tienga a suttuhai ka hril kha nghâk loin, a aitechêuna kha an lo sut a, a poi khop el. Aizawla an hang tlangzarin, thu le hlaa ka zawlpuihaiin, “A thuhmaah Keivom hming a chuong si a, ama kutsuok a va ang naw de!” an lo ti sap sap a. Kan inhmu nawkin RP ngei khomin chu chu a mi hril a. Kei chun, “Ei rawihaiin edited copy nghak loin inlet sinna kawpi an lo insuttira a ni khah. Ei sut nawk pha chu nâm tang a tih” ka ta.

Lungkham Bangna

Thu le hla hril taka chun, Muolhoia HSA Inkhawmpui voi 43-na trumtriek zo, February 15-16, 1988 sunga Haflong Guest House-a RP le HSA LEADERS RETREAT kan thawpui kha a nih. Kha hma khan ram le hnam kalchawi dan ding ngaituoin Hmar Inkhawmpui le Hmar Biel Seminar chen an lo nei ta a, sienkhom a taka ra suok a tam nawh. Ram le hnam ngirhmun thlir letna le hma tienga kalchawi dan ding hril tlangna nei hi thil poimaw a ni leiin RP-in sum tam tak sengin hi Retreat hi buotsai a nih. Thruoituah RP le kei an mi hmang a. Hi truma RP zawna siem, “Khawvela mihriem ta dinga poimaw tak iem a na?” ti donna point 14 laia ama donna chu “Iengkim siemtu le iengkim chunga thuneitu Paa nei tluka hamthratna insang lem a um nawh” ti a nih. Chu chu a testimawni, a nun darthlalang a nih.

Hun insersuon hninaah RP chun mani trong, HMAR trong, Pathienin a hran lieu lieua a pek mawizie, inthukzie, a ngainat tawp thei nawzie, a hmangtuhaiin an ngaina phot chun a thi naw dingzie le chu trong chu hmanga Hmar University chen khom indin thei a la hung ni dingzie, a duthu le suongtuona hnè takin a hril a, a ngaithlatuhai zer a sukfar hiel a nih. Ama ngeiin chuong a duthusamhai chu sukpuitling thei a nizie hieng hin an zawt zui a: Ei tum suksâng ei tiu; duthu sâm hlak ei tiu. Silai hmet puok loin râl ei kăp thei ti ka hriet tlat. Thil thra inhnar nachang hrieng ei tiu. Thil thra chang dingin thokrim ei tiu. Chuong naw chun ei Pa Pathien khomin ‘Thabohai’ tiin mi lawm naw nih.

Hi truma ka chanpuol thupui chu HMARHAI HARSATNA LE THRANGMAWBAWK, A SAN LE A DAMDAWIHAI ti a na, chu chu thupui thlung li- Pawlitiks, Ekawnawmiks, Kalchar le Sakhuo- sirsana chai dinga riruong a ni a, sienkhom hun indai naw leiin pawlitiks tienga Hmarhai ngirhmun chauh hril tlangna nei hman a nih.

Hi Fienrielnaa kan thu chaihai le a bebawmhai, phek sawmnga zeta sei ripawt kan buotsai chu ‘LUNGKHAM BANGNA’ ti hming chawiin RP-in USA-a inthokin kawpi iemani zat a hung siem a. A bu hming hi RP phuok a nih. A sung thu tiemtuhai chun Hmar hnam ngirhmun le a hmathlir ding chik taka bina lekha suok hmasa tak niin an ngai. Hieng ang char hin dodalna hrang hrang kara October 23-25, 2013 a Shillong bul, Umrana Leaders’ Retreat nei trum khom khan thu chaihai fun khawmna ‘Lungkham Bangna-2’ ti buotsai dinga riruong a na, sienkhom papers an buotsaihai kawpi mi thon dinga an ti kha tu chen hin a la hung naw leiin, buotsai thei a la ni naw zing. Saptronga ‘Umran Retreat’ ti ka ziek phek 17, thumal 9582-a sei kha rikawt maksan um sun a ni el thei.

Umran Retreat kha nei a ni theina san tak chu RP-in somdawlna sum tam tak a hung thaw lei a nih. Ama kha mi’n rawitu tak dinga beisei a ni a, sienkhom hriselna leiin a hung thrang thei naw a, a hmun kha keiin ka hluo sip tah lem a. A kum nawk HSA Platinum Jubilee prokram le inzoma dodalna nasa tak kara Hmar Inpui le HSA inkopa Sielmat-a thu le hlaa inpawl khawmna hlawtling taka nei kha Umran Retreat sunzomnaa ngai a ni a. Kha truma sengso iengkim tuma mi mikhuoltu khah RP bok a nih. Thu le hla sukhmasawnna dinga RP inpekzona le olsam lem le scientific lema Hmar trong ziek dan dinga a ngai, huoisen taka a phur suok ngamna hi ngaisang a umin, thruoitu ngirhmun a chel ngamzie hriltu a nih. Thrang la hung thar peiin nikhuo hung hre deu deu an ta, la hung ngaisang deu deu an tih.

Tlangkawmna

Ziek ding la tam hle sien khom, a sei tah leiin, kum 2007 March 23-a ka thu ziek RP LE KEI ti ka tlangkawmna thuin suktawp zai rel phot ka tih: RP le kan inzomna hi inthûk deu a na, inngai khom kan inngai a, kan hmathlir le tum ram khom an inhmu a, chuong laia thil tam tak chu hnamin kal a chawi peina dinga pholeng poimaw tak tak a ni khom ka ring. Ama ang hi Zohnahtlakhai lai hin mi ei pieng ka la hriet naw a, ei pieng mei mei khom ka ring nawh.

(October 17, 2015)