HEMDÈNA TLÀNGAH

By L.Keivom, Inpui.com Columnist

Kei chu Krista kuomah kraws-a hemde ka ni tah a,
ka hring zing ta naw a, Krista chu keimaah a hring ta lem a nih.
Tuta taksaa ka hring hi mi hmangai a, ka ta dinga hringna petu
Pathien Naupa ringa hring ka nih. (Gal.2: 19-20)

Thlaichi hi a thi phot naw chun a hring thei nawh. A hring ding chun a thi hmasak phot a ngai. Fanghma mu amanih vaimim mal amanih a hringin tû la chu hmon hmang el a tih. Nisa amanih rap amania inhro trawl hnunga i tu ruok chun hringna thara trovin hung mawng suok a ta, a puitling pha rà tam tak insuong a tih. ‘Bu mal khom hnuoiah a tla a, a thi zet naw chun bu chi malin a um zing hlak a, a thi ruok chun rà tam tak a’n suo hlak’ a nih (Johan 12:24).

Hi hi Khuonu thil rêl dan a ni tlat leiin, thi thei lo Ama Pathien ngei khom mihriema hung insiengin, Mihriem Naupa le Pathien Naupa hming chawi kopin, Kalvari tlang, Luru Hmun an ti bokah kraws-ah a hung thi a, phûmin a um a, a tho nawk a nih. A thìna, phùma a umna le a thonawkna chun rà ropui hril seng lo, chatuon bohmangnaa inthoka mihriem intlanna chu a hung intlun tah a nih. Chu thilpek ropuizie chu annawm Johanin, “A famkimnaa inthoka ei dong seng chu lunginsietna ngot lunginsietna ngot a nih” ( DV 1:16) a lo ti chu ni. Chu umzie chu tawpintai nei lo lunginsietna tìna a nih. Ei Baibul inlet hmasaka chun ‘lunginsietna chunga lunginsiet nawksawnna’ tiin ei hmuh. Chu umzie chu chin (limit) nei, lunginsietna dawbol chauh tina a nih.

Hi thu hi hieng zawng hin hang hril fie inla. India sorkar pêk tribal concession chu zaa 50 a nih. Student’s Concession khom zaa 50 a nih. A thuphungin, tribal ni bok, inchuklai ni bok chun a pahnia lak kopa a thlawna rêl le vuongnaa inzin thei a nih. Amiruokchu, India sorkar hnuoiah konseson hrim hrim a ruola pahnih lak kop phal a ni nawh. Chun, India sorkar lunginsietna konseson chu tiem chin nei vong a ni a, sorkarin a nuom pha pha a sukbo thei. Pathien lunginsietna ruok chu tiem chin nei lo, chatuon dai lunginsietna a nih. Chu lunginsietna chu hmangaina famkima inthoka luong suok, a thlawn top, iengkima dinga chatuon dai a nih. Lunginsietna dawbol, lunginsietna chunga lunginsiet nawksawnna chauh a ni nawh.

Chu konseson famkim, hla phuok thiem Edwin Rowlands (Zosaptharin) in ‘Thûkna pui’ a ti le Kamlalin ‘Thûkna Ropui’ a ti, suol bawia inthoka mihriem intlanna sin chu Iengkim Pathien ta ding chun voi khat chauh bau hang phonga thaw vong thei a ni vei leh, ieng leia Hemdêna Tlang fe thleng kher khera a thaw a ngai am ning a ta? Ieng leia Abraham kha hemdêna tlang kai a, a thil hlut tak, a naupa hringna inhlan dinga Pathienin a phût kher kher am ning a ta? Chu lampui, Golgotha tlang thlavaium chu hraw kher lova Jehova Jire tlang sîp tlung theina lampui dang kawitan a um naw am a ni? Aiguptaa inthoka ram tiem Kanan ram, chawlkar khat vêl chaua tlung el theina lam phei inhoi Mediterranean Tuipui kam Gaza phaizawl tieng a um vei leh, ieng dinga long khom nei bok si lova Tuipui Sen kàn a ngaina le kum sawmli tâl top el Sinai thlaler nunrawng, thina ko tlâng hraw a ngaina kher kher lampuiah Pathienin Israelhai kha a thruoi am ning a ta?

A donna pakhat chu, thlaichi hi a thi phot naw chun hringna tharin a tro thei nawh ti hi a ni ring a um. Tarkûn hnung, kum zaa nau lutir hmu phak chauh, tu mong a ben hun ding khoma ben phak ve lo Abraham chu Babulon phaizawl ram hnienghnara inthoka ram a la hriet ngai hlei lo hluo dinga rawlin a ko suok laia a thu zawmna kha a kotu chun a’n ring songtir el nawh. A kotu thu chu ring ngam ding le a dit zawng anga nung thei dingin ni tinin Abraham chun ama dit zawng le nuom zawng chu hemdea a thisan zing a ngai a nih. Chu hemdena tlanga fiena vawrtawp a tlung chu, hlanbiekna dinga ran aia a naupa Isak inhlan dinga Pathienin a phût trum kha a nih. Chu chu Abraham ta ding chun thil harsa tawp a nih. Hnuoia trieu zât le vana arasi zâta tam a thlahai sukpung dingin Pathienin thu a tiem a, sienkhom thlatu ding nau pasal a pêk el si nawh. Tarkûn chenin a nuhmei Sari sûl hlak chu a nuor si. An hmabak chu suonmong a nih. An suonmong chun a pasal kuoma Pathien thutiem chu a’n khêl ding a nih ti Sari’n a ngaituo chun a bei a dong thlu thlawt ni naw nim, a pasal chi thlăna dingin a siehlawnu Hagar a ruoi ta hiel a. A pasal chî hlak chu a lo chang chieng khop el a, Hagar chun nau a pai nghal a, Ismail a hung pieng tah a nih. Amiruokchu, Sari remruotna hi hemdĕna tlang le inzom lo thil a ni leiin a kakhawk a râpthlâk a, voisun chen hin Ismail thla Arab mihai le Isak thla Israelhai chu tawp loin an inbakkei zing a nih.

An chanchin ei sui pei chun, Ismail a pienga inthoka kum sawm hnunga khom Sari chu a la ching ta zing a. Kum 90 a hawl phak hnung, Ismail khom kum 13 vêl a niin a sûl a hung inhong ve ta trawk a, nau a pai a, Isak a hung pieng tah a nih. Tuhin chu chi thlatu ding a hung pieng tah leiin Sari chang khom a par ta a, a pasal leh an ha ngot a’n lang ta thung a nih. Sienkhom, Isak chu tleirawl chedek a hung ni chauin pumraw thilhlâna inhlan dingin Pathien chun a phût ta tlat el! Nau dang nei nawk dinga inbeisei ta lo, Abraham le Sari ta ding chun an hnuoi beisei tawp innghatna an nau nei sun inhlàn chu, mihriem mihriemnaa chun, thil invetthlak le thil thei lo tluk a nih. Sari ngirhmuna ngir nuhmei tu khomin chuong ang thil chu thaw dingin an pasalhai an remtipui ring a um nawh. Suonlam ding khom an nei thra. An inhlân chun Pathien thutiem sukkhêltu an ni thei ding a nih. Mani nau that chu tuolthat a na, dan khomin a phal bok nawh. Chuonga mani nauhai that a, hlanbieknaa hmang dinga ngêntu Pathiena hang nei tum tlat chu mihriem sierkopa hang chok chun thil invetthlâk tâwp a nih. Chun, chuonga an naupa an inhlàn chun an kawl le kienga um hnam, pathiena Molek be a, an nauhai inthawinaa inhlan hlaktuhai leh an indangna um naw nih.

A siehlaw Hagar chu chi thlana dinga pawl el dinga Sari’n a rot laia ringnaa thaibawi lo thlang tah Abraham chun a nuhmei thil rot a zawmpui leia a insunga buoina namên lo a suokzie a hriet chieng ta êm lei ni ngei a ta, a thuthlung naupa inhlàn dinga thupek a hmu zet chun Sari phal le phal naw thu a ngaituo ta naw a, rawn khom rawn der loin khawvela a dit tak a naupa chu inhlanna tlang, inpumpekna tlang, hemdena tlang, Golgotha a panpui el a nih. Khawvela a thil hlut tak, a naupa a’n rona le a hmangaina po po hemde a, phûm a, a kotu kona san anga nun thara hring le nung dinga a’n hlàn ngam phing leh Jehova Jire, hnèna tlâng le malsawmna tlàng chu a tlung tah a nih. Chu chu annawm Pastor Thangngurin hla mawi taka a lo khèkpui kha.
Salem puonzar hnuoia himna,
Salem Lalpa kuta malsawmna,
Jeho-Jire tlanga mihai chun,
An chang ngei ding a nih;
Haleluiah Amên.

Jehova Jire tlang, hnèna tlâng le malsawmna tlàng ei ti hi a hming dang chu ‘Hemdèna tlàng’ a nih. Chu chu Pathien dit zawng anga a thupek hlenna tlang a nih. Chu tlang chu chânna tlang, inpumpekna tlang, inhlânna tlang, thu zawmna tlang, inngaitlawmna tlang, tlawmna nun changna tlang, mi hmusit, endong le invêt hlawna tlang, tuorna tlang, inrûmna tlang, hnena tlang, hlimna le malsawmna tlang, suonmong khoma chi thla tiem seng lo nei theina tlang a nih. Chu tlâng chu hringna thara leng dinga ‘mihriem hlui’ hemdena tlâng chu a nih. A hemde rawn le thisan rawn rawnin hringna thar an nei rawn a, a hemde tlawm le thisan tlawm tlawmin hringna an nei tlawm el a nih. Chu chu a nih Tirko Paulan suol thisana Kristaa nun thara lêng thu a hril kha (Rom 6:1-18; Kol 2: 12-14; Gal.2:20).

Inremna dittu le zongtu chun amaa inremnawna, a hringnuna bu khuor a, kansar anga a nun fa setu hlak po po kha hemdèna tlangah a hemdê phot a ngai. Hemdê nuom si loa inremna a zong pha leh a hlawsam hlak a nih. Inremna tlang zuon phak si lo le intheidana lungril hemde si loa inremna dittu chu hmur inchîp hmaka innui rak tum ang a nih. A hemde ruok chun ama tienga bêk inremna um a ta, hadam a tih. Mi hnàmtu le mi theidatuhai theida dan hlawk tak chu an mi hnàmna le theidana po po hemde a, anni hmangai lêt a nih. Hlim nuomtu chun amaa hlim nawna siemtu po po kha a hemde a ngai. Chuongang bokin tlawm nuom chun chapona le inngaihlutna lungril po po thè thlâka hemde; lungrila zalen nuom chun lungrila zalen nawna siemtu po po hemde; mi dang chawimawi le inpâk thei ding chun mani thra intina le mi dem nuomna po po hemde le mani neka mi dang thra lem vonga en theina lungril put; taima ding chun thabona hemde; thil chîng thra lo bansan ding chun thaw châkna le thaw dinga mi turtu hemde a nih. Tlawm lem ni nuom lei amanih, chunghnung lem ni nuom lei amania insuol chu ‘lem ni châk tumnaa’ inthoka suok ve ve a ni leiin a porchè dan a’n ang char a, hemdena tlang tlung hma nun ve ve a nih.

Hemdèna tlàngah hemdè nuom si loa mihriem hlui inkot luoia kotkhar chîna lut tum chu thil thei a ni nawh. Inleng naw ti nih. I’n lengna ding chu kotkhar lien, bohmangna lampui chu a ni lem. Hemdèna tlàngah i hemde ruok chun, i phur hung zâng a ta, i phurrik po po phurpektu che Isu chu kal zâng vûkin zui thei tang i tih. Hemdèna tlang tlung phak lo nun chu nun rik le rimsi a nih. Hnèna nun changtu ei tihai hi hemdèna tlang tlung phak chin, Krista hnèna kraws-a inhemde phak, ni tin thia hringna thara hringhai chu an nih. Chu chu a thuphung chauva hretu le mani nuna a tak ngeia hmangtu nun chu hremhmun le van ram angin a danglam a nih.