Kan Kuomah Um Ta La

“Chun, ṭawngbauin an chel a, ‘Kan kuomah um ta la; khuo ân hnu ding an ta hi, nisa khawm a tla ding a ni ta hi,’ an ta. Chuongchun, an kuoma um dingin a lût tah a.” Luke 24:29

Isu Krista hi khawvela misuolhai inthlan dinga a hung lâi khan, harsatna tinreng tuor muolsuoin Kraws ah hemdein a um a. Ram chanchinṭha hrila rawngbawla an vâk sung khan, a hnung zuitu khawm an tam em em. A thilmak thaw en nuomtu, a hming ringtu leh, a sawisel nuomtu an inkat nuk bawk. Mi ṭhenkhat chu a thilmak thaw râ hai sawr ṭangkai nuoma zui pawl khawm an um nuol a. Ama Isu ngei khawmin “titakzetin, titakzetin ka hril cheu hi, thilmakhai in hmu leia mi zawng in ni nawh a, bei in fâk khawp leia mi zawng in ni lem hi. Bu bohmang nâwk el hlak zawng hin inlap rak rak naw ro, chatuona hringna chena um zing ding bu, Mihriem Naupain a pêk ding cheu chu zawng lem ro; Pa Pathien chun ama chu ân chik ta sih a,"( Johan 6:27) ti’n a hal tâwl nghe nghe ani kha! Amiruokchu, an man phinga a zui ngam an um tanaw hi a lâinat um hle el a nih. A tuorna hai hi a nasa taluo el khelah, khang lâi huna ding chun Isu ngîrhmuna ngîr kha chu a hnungzuitu mi naran(an rêng chun nilo) tading lem chun van ther buoi khawm thil harsa le ṭium tak ni tho a tih. Chuleiin, Zâwlnei haiin an lo hrillâwk angin rinum tinreng tuor zovin, nang le kei ei suolna a inthawka mi’n thlansuokna dingin a hring Kalvari Kraws lêrah a hung inhlân a nih.

Isu thi hnung hin a hnung zuitu a ṭhuoihruoi hai chu an thla a’nvâi em em a. Tuol khawm an suok ngam nawh a; Jerusalem pindan sâwng chung hnungah an intawm el a nih. An hotupa, thuneina neitu tak le an ringsan um ta nghal lo chun an thla invâi hi âwm lo baksaka ngai chi khawm ani nawh. A hril lâwk ang ngeia nithum ni-a a thonawk khawm khan, a inchûktir hai ngei khawmin awi harsa an ti em em ani kha! Thiempu Lal haiin a vêngtuhai an lo hmer rûk bawk. Chu le inzawm pei chun, Emmau lampuia ruolcham pahni hai khawm hin thil umdân an hriet hai chu mak ti takin an hril vel ni awm a nih. Chuong lâi tak chun, Isu chu anni lâi hung inlârin, mak ti taka an lo hril hai chu Zâwlnei lekhabu in a hril lâwk ang taka tlung ani thu a hung hril fel pêk vawnga. Amiruokchu, ama kha tum ani ti an hriet thei nawna dingin an mit a sukthim pek tlat leiin, an hung hmu theia an hriet chieng hma khan chu a thu hril hai an awi le awi naw khawm ei hriet bawk nawh. Hi ruolcham pahni hai an vangnei em em nasan chu, Isu an kuoma um dinga an fielna hi a nih. A kuoma a um hnung hin ama Isu khawm an hung hmu fie thei tah a, thurûk inthup khawvêl mihai hriet suok ruollo, Isu Krista chu Khawvêl damna dingin thina hnein thlana inthawk a tho nawk a nih ti khawm chieng takin an hung hriet thei tah a nih.

Nang le kei hin ieng ngirhmun am ei ngir ti hi nitin, darkar tin, second tin hin ei in enfel zing a pawimaw hle a nih. Krista umpui lo dam ei ni chun ei ngirhmun in hriet suok vat a, insiem thar ei pawimaw hle a nih. Sandamna chang ringtu hai khawm, Krista umpuina a naw chun thlaraua mit varna an nei ngai nawh. Krista chênchilna um ta lo kohran dam ei lo ni el am? Tisa hi a lien pha pha chu Kohrana ṭhuoitu le member hai khawm ni inla, Krista chêng nuom nawna hmuna inchang thei ei ni hlak. Chu pha pha chun, ieng angin ṭhang la nasa hlak inla khawm, a khawlâi revival chang ngaina a um ta ngai nawh. Krista umpuina hnuoia hringnun khaltu I ni am? Nitin Krista umpuina changa, nangma ah Lalna le thuneina neitu ni dingin iengtik lai khawm I dit am?

Rawngbâwlna ei ti khawm hi mihriem ṭhahnemngâina ringawta nawr chun hma a sâwn thei tak tak ngai nawh. Tlâwm chun a lo inṭhang liem met el thei, a tâwpa ruok chu râ ṭha nek hmanin unau kârah inkhik inkhalna mei mei dam la hung râ suok lem a tih. Tûlaia Pathien ram ei inzâu tum dân hai dam hi ngaituo neu neu tham a nih. Pathien ram ti hi hming ṭhat nuomna leia phaw a ei hmang mei mei am a nih aw ti thei dingin a um hiel hlak. Unau kârah inremna nêka innghîr innghona an tlun lem chun a ieng Pathien ram am ani ta ding ti hai dam hi mi mâwl ngaituona chun hang suisuok el chu thil hau intak tak a nih! Ramthim rawngbâwlna khawm hi a Pathien thupêk tak ngaituo set set lova, midang hai rawngbâwlna râ - ringthar an hmu ta sa inlâk pêk amanih, Mission dang hai er le an hmadawm sukbuoi zâwnga ṭhang latu ei ni chun a mi tirtu suklâwm le kâr chu hla tak ning ei tih. Hi lei hin Ramthim rawngbâwlna a ṭhahnemngâi tam tak khawm an tha a zawi pha thei bawk. Hieng neu neu hung inphûsuok ṭanna chu Krista umpuina um ta lo nun bawk hi a nih. Ei hmêlma hi a var em em a, ei nâknêm taka mi sun tumin a mi vêl zing hlak a nih. Kohran le Organisation hrang hranga ṭhuoitu ditum tak tak hai khawm hi ei hmel ṭhatna suksiet tumin a mi hêl zing bawk hlak. Chuong laia, Krista anni umpuitu le an chunga thuneina nei nuomtu thu dawnsak lova mani ditdân le ṭha ti dân lampui hrâwtu hai chu suktlâkin an um hlak. Ieng anga muolpho in um inla khawm, ei hmelma hin mi tuorpui nêkin ami lawmpui lem hlak bawk. Chuleiin, ei ngirhmun hi iengtik lâi khawm chieng taka in enfel zing ei pawimaw a nih.

Ram le hnam khawm hi ei ti hlak deh a chu, tu chena ei hmadawm la muolsuo theilo a ei um zing el hi baksam ei nei ani ti chu a chieng kawng el. Ram le hnam ngirsuona dingin iem ei pawimaw tak? Lekha thiem, mivar le mi rem hrie mawh! Anni hai chu khawvêla um ei la ni leiin ei pawimaw hrim an nih. Sawrkâra thil nawr ding chun a kalhmang hriet lo chun ‘mitdel le mitdel inṭhuoi’ an hril hai ang tho kha ning ei tih. Amiruokchu, Sipai tha hrâtna le khawvêl thil haia ringna ei innghat ani ruok chun chu hnena chang ngai nawng ei tih. A pawimaw tak innghilin, mani inti pawimaw fâwma hma latu le ro in-rel a tlân ei ni chun pârvul ngai bawk naw ma nih. Ei hnam inrieng (mi ṭhenkhat ngâidân le thlîr dânin) tak mi’n duonga hieng chen mi ṭhuoitu hi ei hrietchieng a pawimaw em em el a nih. Hnam anga mi siemtu le mi châwi lientu hin hieng ang ngirhmun chau hi ei ta dingin a dittâwk ring a um nawh. Ram neia, mani ngeia rorêlna khâwl chela kal ei pên theina ding chun Krista umpuina bawk hi ei pawimaw tak a nih. “I rawng bâwl nuom naw hnam le ram chu a bohmang âwm sih a; anih, chuong hnamhai chu suksiet dêrin um an tih.” Isai 60:12

Hla phuoktu chun, “I umna chu chatuon lawmna an chang hlak…” a lo tih a. Ei khawsakna, ei rawngbâwlna le sinthâwna, ei kalchâwina tinrênga khawm nisien, chatuon lawmna nun changa ei lêng theina chu Krista umpuina nun a hin a nih. Chuleiin tiemtu dittak, ieng ang ngirhmun am ei ngir a ti in enfel a hun ta hle el. Ṭhuoitu, Rawngbâwltu le Kohran member, mi a tu el khawm hih hi kawnga hin pawimawna ei nei seng a nih. Sungkuo tin nun, Khawtlâng, Kohran, Ram le Hnam lâia inremna inlênga, ei sinthâwna le hmadawm hai ei muolsuoh a; chatuona hlimna le lawmna tâwpkhâwk ei chang theina ding chun iengtik lâi khawm “Kan Kuomah Um Ta La” ti’n Isu Krista hi fiel mawl mawl hlak ei tiu.

Guwahati: 5^th April, 2013