INPUI: Hmar News & Info

 By Lalthangsang Intoate

Hmar hnam le a tawng ’IEMANA’ ti tawng hi, Pathienin a bohmang ding a phalnaw leia khawvel hnam changkang taka ngai, Wales tlangval pakhat le nunghak pakhat chu mak le danglam taka hmanga a zawngsuok ngat ani si a. Thuvar chun, “Tum an sang chun tlakna an sang” a tia, Hmar hnam hai hin ei Pathien thilthawthei zie hi hrea hnungtawl zing dinga inngai el ding ei ni naw a nih. Khawvel revolutionary movement ropuitak hung phursuoktu Nazareth tlangval piengna Bethlehem bawng-in politics kha ei khel ngam a tul a nih.

Nambar 13 hi nambar dangdai tak a ni a, ngaituona tawite neitu ta ding chun nambar thalo tawpkhawka ngai thei a ni a; ngaituona inriltak neitu ta ding ruok chun, Pathien le inkungkaina nghet tak nei  nambar a nina lai a um a nih. Bible a, “Kei hi Alfa le Omega a bul le a tawp ka nih” ti ziek ang elin,  India rorelna insangtak kengkawtu India PM ngei khawm a 13-na dinga Pi Sonia Gandhi vel a hei tlung meu khan chuh ama Pi Sonia ngei khawm a tarpinu nisien, a pasal nisien an lo sa’rthiphana India PM hei ni chu a hnawl naw lai zing, sienkhawm ama PM ni ding leia buoina sosang chu hrillo, mani inthat hiel khawm an um el tak na lei dam chun, ama aiin Pu Manmohan Singh chu India PM an ni tir hlawl kha a nih a. Chuonga India rorelna thungphalaizawla thil la tlung ngai zen zen lo, lal thungphaa inthungpa chu inlal tak, sienkhawm a thuneitu mi dang ni tlat siin, India ram chu hmasawnna lampui pana intawl thut thut nia hriet lai mek, Pi Sonia le Pu Manmohan Singh chu hmaimawkna insang tawpkhawk an tuokna hun le ni chu State palia inthlangna result an puong ni, 8th December 2013 ni kha ani a. Sienkhawm chu an hmaimawkna chu mani phak ang tawk tawka lo hliekhutu nia ngai chu India rama state  po po laia mani intodel lo tak, Mizoram MLA inthlangna result  9th December 2013 nia suok kha ani ve tlat a nih. Amiruokchu, kha thil kha Mizoram sunga regional party chin tak nia ngai thei, ZNP le Sinlung suok lai po poa hnam tluksietna inthuk taka tluse mek nia hriet, Hmar hnam hmaimawkna tawpkhawk intluntu ani nawk letling bawk a nih.     

Mizoram a hin kum 1987, 1989, 1993, 1998, 2003, 2008 haia MLA election um tahai a khan HPC/Hmar hming hi an lang ta ani a. Tum ruk zet MLA inthlangnaa lo inrawl phak ve, MLA ngir (contest) ve le mawphurna pawimawtak tak lo chel ve tu, tuta Hmar hnam silainun kengkawtu laia mi  le HPC/SHDC thuoituhai lai hin tamtak ei la um a. Sienkhawm, hmasawn neka hnungtawlna tieng hnung ei sawn pei el hi, kawngkhat ngaituo chun, “A hmingin hnam thuoitu lo ni ve inla khawm/Hnam Pa ka ni an nawm” ti tawngkam hmang ve hlak hai hi ei mipuihai hin ei hnung tieng an mi nui-eu/nuisan nawna san ding alo um naw hle a nih. Chuonglai zing chun, Mizoram sawrkar thawdan pangngai angin, tuta tuma MLA election tawm ruoia HPC (D) le inbiekna dawkan an hei kil tlang nawknaa ngaidan pakhat pieng nawk chu, “HPC (D) tienga palaihai laia spokesman le thenkhat hai chu Mizoram suok ngei an nina lei bakah insit an um naw bawk a, chun Mizoram Hmar Welfare Committee (MHWC) indin alo ni nawk bawk leh, HPC (D) hin kum 1994 a HPC le Mizoram sawrkarin inremna an siem chu duthusam alan naw leia Hmar hnam pasaltha iemanizat ramhnuoia a maksan laia pawl hming kha ni ta chie naw sienkhawm, a thuoituhai lai hin iemani tawk an la um lei hin maksan an nina san tak kha an sukpuitling ta ding amani aw… ti dingin aum a. Sienkhawm, chu beiseina chu alimalai khawm hraw ta loin HPC, SHDC le MHWC hai chu thuongthumin an fe ta lem hlau a. Chuleiin, tuta tuma MLA inthlangnaa beisei anga aum nawnasan le ramhnuoia Hmar hnam pasaltha maksana um hai hin iengleia an lampui hraw ding tak chu hraw fu thei der lova an la um zing el mana, tihai hi Hmar mipui hriet lo thei lova ngaiin vai-hnuramah ka la hung phawrsuok ta khawng khawng a nih. Asanchu, Hmar mipuihai lai hin Hmar hnam Pathien hmel put zie le a nuom dan theinghil ei tam tak leia ei hnamin boral phana hiel thil a tawng rawp el ta

hi nguntakin ka ngaituo neu neua, a la tawng nawk pei chun, lo boral ta ang sien a mawphurtu lai ka thang ve awm si a nih.

Kum 2013 MLA inthlang tawm ruoi khan MHWC thuoituhaiin an mi hung pan ve khiet a, kei khawm chun inphalam lek lovin kum 1987 a inthawka 2008 chena Mizoram MLA inthlangnahaia ka lo tawnhriet ve sun hai chu ka lo hril mawlh mawlh a. “Tuta tum na nana chu Baal hmaa la dingthethuon ngai lo ang deu vawng inni bawka, Hmar hnam support in Independent ngatin ngir inla kei khawm ka thei ang angin ka hung thang ve ding a nih” ka lo ti a. Anni chun HPC sung inthuruol naw zie an hril uor hle a. Sienkhawm kei bawk chun, “SHDC Chairman Pu Hmingchunghnung, HPC President Pu Thangliensung, SHDC Ex-Chairman Pu Malsawm Darngawn, SHDC Ex-Chairman Pu Lalrosiem le HPC (D) President Pu Lalhmingthang hai hi Hmar hnam hmangai naw tukhawm an um nawh, Hmar hnam an inphat ngam ka ring naw  bawk, an lo inphat ani chun keiin a mawphur ngam ka tih” ka ti nghe nghe a. “Chuleiin, Hmar hnamsupport puong theitu chu MHWC hi in nih a, nang ni MHWC sunga mi hai hi hung insiemrem tawp inla, iemani tia MLA intling hlau ani chun, tu party khawm zawm lovin Sinlung Peoples Front (SPF) ti hming amani pawlthar hung indin inta, chu pawl chu Mizoram political party laia lien tak khawm a hung ni thei ding a nih” ka ti nawk ta pei a. “Chun, HPC hmingin in ngir chun CYMA chun nasa deuin hnam bil politics tiin khing a ti cheua, chun tu party amani in thawpui chun Hmar khuoa in thawpui lo party hai kha in inhmin thei chuong naw ding a nih. Independent-a in ngir ruok chun, political party tinhai chu kum 2003 a Suongpuilawn biela ang khan invet ta naw nihaia, campaign hun sung tawp tawm ruoi (last hour) ah congress sietna ding ani phawt chun Independent candidate hai le chun awlsam takin insiemrem an ta, tling hunah MNF / ZNP amani zawm dingin a rukin remna thuthlung siempui ve veng an ta, annawleh coalition sawrkar lo um ding khawm nisien congress thawpui lo ding, ti ninga ta, chuongchun, an inremna thuthlung chu CYMA hlakin hnam bil politics ti thei naw tawp a ta, awlsam deuin Hmar hnam support Independent candidate hai 3 chu tling an ta, Sinlung Peoples Party amanih political party thar indin an ta, chu party ngei chun, mani lampui hraw ding hun sawt taka inthawka inhmang tah Mizoram  chu a lampui hraw ding indik tak tieng chun a thuoi ta ding a nih” tiin ka lo hril ngiel tawl a nih. Chuongchun inthlang chu a hung hun ta ngeia kei khawm chun, “KUM 2013 MIZORAM MLA INTHLANGNAA THILTHLUNG THEI” ti thupui hmangin Mizoram MLA inthlang tum 6 lai deu thawa ka lo tawnhriet ve sun hai chu ziek ngeia phawrlangin, Mizoram Hmar Welfare Committee le Hmar Inpui Pre/Secy hai khawm chu a copy ka pek nghe nghe a. Sienkhawm, a law ngaina an hrietnaw lei amani, annawleh, Pathien remruot a ni naw lei amani ding, Mizoram a Hmar hming chawia politics khel hai chu thuongthumin an hung inthieng ta thum a nih.

Zan khat chu Pu J. Dina MHWC chairman le chun sawt fu el hi phone in kan hohlima a tawpa chun, “Pu Dina, HPC founder president I nina hi ka ngai hlu hlea, hun sawt tak i re veng veng hnunga hienga  MHWC i hung keihruoi el hin beiseina insang tak ka lo nei a, sienkhawm, Hmar hnam sansuokna ding kawngah thlang lal (elected member) hai ah innghatna pumhlum i nei chun MHWC hin kawngro deng tak tak chuong naw nih, kati ta hlawl a nih. Mizoram sunga Hmar hminga politics khelhai chu tuta tuma MLA inthlangnaa thuongthuma an fe elna san nia ngai thei chu, MHWC in ZNP hminga MLA an chu lei nia hriet a nih. A san dang nawk chu, hnam revolutionary party inti ve sia hnam pumpui inthuruolna ding lampui siel thei der lo, HPC (D) in over-ground-a inhmang nuom taphawthai ngaidan a ngielangana a hei zawm elna hlak khawm hi ani bawk a nih.

Mizoram sunga Hmar politics hungin ir suok dan hi political party besan nei der lova hung puoksuok ani ang hrimin, a muolsuona ding khawm chu Hmar hnama inthawk ngei hi a nih. Asanchu, 1989 MLA election hma khan Union Home Minister chu Aizawlah an zina HPC thuoituha’n an lo inhmupuinaa chun Union Home Minister chun, “In demand huom sunga congress MLA candidate hai hi in vote tling chun In thil demand hi kan pek ding cheu a nih” tiin a lo tiem tawl a, sienkhawm chu thil chu hnawl ngamin demand area huom sunga HPC hming ngata MLA  candidate a nih. Chu taka inthawk chun HPC boruok chu chappui anga hung tralin 1989 April thla khan a thlawna hnungkir ta ngai lo na lampui chu hung hraw nawk peiin, 1994 kum khan Mizoram sawrkar tuta sawrkarna la mek hai ngei hin HPC chu Sinlung Hills Dev Council hin an lo thlem suok ta a nih. Hieng hun lai hin Mizo historian hmingthang tak Pu R. Vanlawma chun, “Sinlung neitu nina hi hnam khat kuoma pek bik ani chun a petuhai lan sir an tih” alo ti ngat a nih. Pu R. Vanlawma hin hienga alo ti ang hrimin Hmar hnam politics hin a sawmsa ve lo thei lo chu, Sinlung suok insuikhawmna politics hi a nih. Asanchu, Sinlung neitu nina ei lak ngam si chun Sinlung politics hi ei fepui ngam ve a tul a. Chu umzie chu, Hmar hnam politics hi ani dan ding ang taka  khel theitu eini chun, Sinlung politics chu a chanve zo ang ei ni thei ding a nih. Asanchu, Hmar hnam hei ti hin buoina ding a um nghal amani aw… ti dingin a um a. Entirnan, Khingtieng pangah Mizo huong sungah mi khum nuom dawp dawp engnga ti tawng hmanghan beipui an tlak bawk, khingtieng pang nawkah Kuki huongsungah ni bawk, a Hmar azawng hlakin Sinlung suok history bulpui po po neitu eini ang reng bawk. Hmar hnam kaupeng mani pahnam tawng hmang a hrana um nuom hlak hril seng lo um bawk. Hmar tawng Iemana ti tawng hmang lo a bikin Lusei tawng hmang hai lai hlak Hmar hnam ti thei chu a tam pawl tak ni bawk. Hieng neu neu hai lei hin Hmar hnam politics hi khawvel politics lai popo hin a khel a harsatak el naw ding amani aw… ti dingin  a um chang a tam hle a nih. Chuleiin, Hmar politics khel mulsuo theitu eini chun, Sinlung suok insuikhawmna politics chu muolsuopui theitu ei ni ngei ding a nih. Chulei chun ram le hnam hmangaitu inti si hin chu elected member hai laka innghatna lientak nei hi Hmar hnam suk muolphona chau a nih ti hrea, Hmar hnam nina indiktak hi a hmang dan thiemtu ni tum seng ta inla chu nuom aum a nih.

Hmar hnam ngirsuokna ding chu khawlai political party-a inthawk khawmin hung nawnga ta; Hmar hnam sunga mi ngeihai hi hmangin hi chen mi thuoitu Pathien chun Hmar hnam hi ala tung ding ngei ding a nih. Chuleiin Hmar hnam hmakhuo chu election ah innghat hmasa lovin, inthuruolna hi a pawimaw hmasataka sie ding a nih. Inthuruolna ding chun, silainuna khawsa mek ei ni leiin, silai chawipawl mawphurna ani ruol ruolin, hnam sunga pawl hrang hrang thuoituhai mawphurna khawm hi an sang ve hle a, chulai kuokar invuokbatna inchinnuoi, thlier hran harsa em em chun HPC (D) ngei khawm hi a sukbuoi nasa ngang chu ani hi. Tu ang ngirhmun a lem hin chu, HPC (D) hi nunghak hmeltha, awmnem tak le zaidaw thei tak, a zaidawna leia zaunau vawi sari lai zet pai le hrilkhi thei ani hiel man ta aw… ti dingin a um a nih. Nunghak hmeltha tak chun a hmelthatna a hmangthiem chun, lalnu Esther ngirhmun ang kha a chuongkai thei a, a hmangthiem naw ruok chun, bazaar hmuna in tawphnawk tak takhaiah puona a saruokna hliekhu ngai hiel chang aum hlak a, a tawpna chu AIDS invawi ani chawk hlak a nih.

Chuongang bawkin, Hmar hnam sunga pawl hran hran thuoituhan HPC (D) chu AIDS hiel an vawi ding khawm pawisa lova an nuom zawng le an inhawitirna ding tieng zawng chaua keihem an tum zing el hi a pawitak zet a nih. Hi kawng a hin mani theina zawn senga HPC (D) hi sansuok dan lampui zawng seng dingin mitin ka fiel tak zet cheu a nih.

Hmar hnam le a tawng ‘IEMANA’ ti tawng hi Pathienin a bohmang ding a phalnaw leia khawvel hnam changkang taka ngai, Wales tlangval pakhat le nunghak pakhat chu mak le danglam taka hmanga a zawngsuok ngat ani si a. Thuvar pakhat chun, “Tum an sang chun tlakna an sang” a tia, Hmar hnam hai hin ei Pathien thilthawthei zie hi hrea hnungtawl zing dinga inngai el ding ei ni naw a nih. Khawvel revolutionary movement ropuitak hung phursuoktu Nazareth tlangval piengna Bethlehem bawng-in politics kha ei khel ngam a tul a nih. 

              A tawpna taka dingin, hi thuziek (article) hi ka piengchampha ka lawm vawikhatna le  khawvela revolutionary movement laia la ropuitak le la hlawtling tak chu, kum thum sung chaua zo theitu, Nazareth tlangval pieng champha a vawi 2013-na ka lawm ve na a ni bawk a nih. Tiemtu taphawt, kum 2013 Christmas Kumthar hi Hmar hnam lampui hraw, siettheina chitin fuonkhawma siem lampui khawkrawk tak el chu, hrawtawpna Christmas le Kumthar a ni theina ding le, Hmasawnna lampui hraw tanna  Christmas le Kumthar khawm  a ni ngei bawk theina dinga sungril ngaituona thienghlim tak neia, hlim le lawmtaka hmang seng dingin ditsakna kan hlan cheu.

Dated: Hmar Runpui                                                       

21st December 2013

Ziektu: Pu L.Keivom, Inpui.com Columnist

A hming Maka, Remruottu Lalpa,

Chatuon Pa, Rem Lal ropui a nih;

A ramin kin ni nei ngai naw nih,

Zau pei a tih chatuon chen khomin.

-

Hmar tronga Baibul inlet ka trana inthokin kha hmaa Baibul thu hre vieua ka lo inngai thlâk rok hlak chu ka lo hriet nawzie le ka hriet ka tihai khom ka lo hriet chieng nawzie ni tinin ka hmu suok thar a. Chuonghai laia pakhat chu REMRUOTTU MAK (Wonderful Counsellor), kha hmaa le tu chen khoma MAKA, REMRUOTTU ei ti hlak hi a nih.

An hril dan chun, kum 1611-a sut King James Version, mi tam takin Baibul lai po poa Baibul bik rieua an ngai nuom hiel, sienkhom hang bi chieng ruok chun inlet suol a tama tam um ve tho hi, khawla suttuhaiin Isai 9:6 hi proofreading an thaw laiin a fainal thawtu laia mi insukfel pakhatin WONDERFUL COUNSELLOR ti thu mal pahni inkara hin comma (,) a lo thai zau a, hming pakhat ding kha hming aiawtu pahnih, WONDERFUL le COUNSELLOR tiin a hung insuo a, chu chu einin MAKA, REMRUOTTU tiin ei lo inlet ve nawk ta pei hi a nih. Hi ‘comma’ chikte hin hi lai châng hi nasa taka a suk-coma leiin ei thu le hla a phier buoi nasa hle a, chu lung ina inthoka intâl suok ngaina chu ei hriet ta naw ni takin a’n lang tah.

Hi hi ei ni chauh khom ei lo ni nawh. Hnam hmasawn lem le var lema ei ngaihai lai khom hin thluok hmang sa loa a ringa ring tlut el dinga lungril an intŭna hmuna chu thing chu thing a nih ti an ring lai zingin lung khom hi thing a nih an ti chun an ring sa ve tlut el hlak a nih. Chuong ang bokin khêl khom tak, tak khom khêlah an pom el. Sakhaw lekhabua ei ngai le pom ta hnung, ei rǐl rem zawnga thu le hla châng ei lo inngaizawngpui tahai lem chu thlaraua ei dong nia ei bel tlat leiin, ieng anga indik lo khom ni sien, a’n dik nawna ei hmu suok thei mei mei nawh. Sakhuo hi iemani kong zawnga chu mit sukdeltu hmangruo thra tak a ni hrim a nih. Mit inkal naran chu daktor thiemin an ăt a, an siem thra thei a, sakhuoa mit inkalna ruok chu siem thrat mei mei ruol a ni nawh.

Chuong laia entirna pakhat chu THU CHU TISAA hung inchang thu, ei bau inkhap zat deuthawa ei săm tum hi a nih. Tisa chu thlarau kaltu a na, tisa chun Pathien a suklawm thei naw a, tisa thil le Pathien thil chu inkal le indo zing nia inchuktir si a, mihriem sandamna dinga Pathien remruot THU chu tisaa inchangtira ei hril chun Setan duthusam tak ning a ta, iengtin am sandam ni tang ei ta? THU chu TISAA hung inchang lo ni ta ngat sien chu, tu khom sandam ding ei um nawh ti hi zing nisa hung suok ding nêka chieng lem a nih. Ei thiempuhai hlei hlei hi, hi thua hin khêl hril rawn tak an ni leiin, THU chu TISAA a hung inchang thu an hril zat hin hremhmun thuo khat peiah lut ding ni hai sien, thuo tama inril le lumah inper vong an tih ti hi hril buoi khom a ngai nawh.

Ieng leia chu ngirhmuna chun ei intàng am a na? A donna tawi tak chu: Ei Baibul hmanga thu mi lo inbatuhai lei a ni ka ring. Indik tawpkhawk dinga thil ei ngai tah hrim hrim chu a’n dik le a’n dik naw ngaituo loa mawl ring ringot hi ringtu inti tam tak chǐng dan a ni tlangpuiin ka hriet. Chuong ang khawtlang chu ransa le inhneng zinga la khawsa a ni nuom khop el. Amiruokchu, mihriem hi chuong ang dinga Pathienin a siem chu ni kher naw nih. Ni nêk hmanin, mihriem chu thutak, thu inthup le inril, varna thu hmu thei dinga Pathienin ama angpuia a siem a ni lem. Mihriem hi thilhring le rannung hai anga siem ni loin, mihriem chu taksa put si, sienkhom ‘Mihring’ dinga siem a nih.

Chuong chu ni siin, hnam var le changkanga ei ngaihai khomin ieng dinga thu mal pahnih, WONDERFUL COUNSELLOR inkara comma an lo sie suol chu an hriet suokna dingin kum za tel an ngai am a na? A suol a nih ti an hriet hnungin iengtin am an thaw a? A hmasa takin, Pathien thu chu sunhang khat khom bo lo dinga inziritirna chu a umzie tak hre chieng si loa an changchawi tlut leiin, chuonga ngai pawl chun, Baibula thu mal tin hi sukbo thieng loin an ngai a, a ni ang angin an pom tlut el a nih. Pathien thu chu sunhang khat khom bo lo ding a ni lai zingin, a thu ziek thlatuhai le ziek sawng peituhai chu mihriem vong an ni leiin an trong bau le kut hmanga an ziek thlaknaah ieng zat hiel am an suksuol ding ti hi an ngaituo ngai naw a, tam tak chun ngaituo nachang khom an hriet bok nawh. Chu chu ringna hrat le hrat naw thil ni loin mawl thil lei a nih.

A buoithlakna tak chu, Pathien thu ziek suol le inlet suolhai chu an thaw suol a nih ti an hriet hnung khomin an lo hmang innâl tah leiin KJV le a sangawi zawnpuihai chun thlak an la tum chuong naw hi a nih. Chuong ang mi chu eini rawi lai khom ei um ve tho. Ei lo hriet bel tah chu ieng anga Pathien thu lo khom ni sien Pathien thu indik tak anga pom zing tumna lungril ei nei ve tlat niin a’n lang. Chu huonga chun THU, TISAA hung inchang, Kristmas ei hmangna san tak khom hi a tla tlat a nih. THU chu Pathien kaltu ‘tisa’ thilah ei bauin inchangtir inla khom, ei lungrila a umzie ni awma ei ngai chu indika ei hriet leiin, Belzibub thukhawchang ding ni awm tak chu Pathien thuah ei bel tlut el a nih. Pathien chu thlarau a ni a, chu thlarau le ei inzom thei dan um sun chu Ama Pathien ngei chu mihriem taksa puta hung inlang a nih. Kong danga hril chun, Pathien remruot chu thu chu ‘tisaa’ inchangtir ni loin thu chu taksa, mihriem taksa puta hung inchangtir phot a, chu mihriem taksa put ngei chu hmanga mihriem sandamna dinga a remruot mak tak el chu hlen suok a nih. Chuleiin, a hlentu hminga khom Remruottu Mak, Pathien Hrat, Chatuon Pa, Remna Lal (Isai 9:6) tiin a pieng hma kum zasari neka tam hielah Pathienin Isai bauah a lo puong lawk a nih.

Thuthlung Hlui hi chik taka ei bi chun, bu tin deuthawa hin Pathienin Bethlehem le Kalvari fe thlenga mihriem sandamna ding a la hung hlen suok ding thu hi an hriet der loin Israelhai khan a umzie ding an lo thaw lawk ngat ngat a nih. Chu Pathien remruot chu mihriem hmanga fe thleng ding a ni si leiin, Sandamtu hung piengna dinga a chi-hnam thlang chu Davida thla hung peia inthoka suok ding chu a nih. Chu Sandamtu hung pieng ding chu Pathien Naupa ni si, sienkhom mihriem dana chu Davida naupa tia ko a ni bok ding a nih. Chu lampui chu khar tum le siktan tumin sun le zan Setanin thrang a lak a, a hung piengna ding hnamhai chu ieng lai khomin Pathien lakah a’n heltir ngat ngat el a nih. Remruottu Mak ni naw sienla lem chu, mihriem hisapna ringot chun a tum hi hang hlen suok ngaina hrim um naw nih.

Chuong sa khom chun, Davida thlaa mi, lal hung inthla sawng peihai laia pakhat Jekonia le a thla peihai chu Davida lalthrungpha hluo thei lo dinga siemin an um der el! Matthaiin (1:11-12) mihriem inthla dan anga Isu thlatuhai chanchin a suina ei en chun Jekonia hming ei hmu a. Chu pa thlaa mi hung inthla sawng peia a tawpna chu Josefa a na, ama chu Mari pasal a nih. Josefa hi Isu Krista thlatu anga ngai ni si, sienkhom a nauin ama chi pai si lo a ni leiin Luka chun Isu chu “mi ngaia chu Josefa naupa a nih” tiin a ziek kher a nih (3:23)

Judahai chanchin ei sui kir chun, Isu hung pieng hma kum zaruk sung khan Davida lalthrungphaa inthrung pakhat khom an um ta nawh. A san chu hi hi a nih. Babulon lalin Juda lal sala a thruoi kha a hming chu Jekonia (Jehoiachin tia ko bok ) a na, ama chu a thlahai Davida lalthrungphaa thrung um lo dinga Jeremia hmanga Pathienin trongsie a’n phur ta sa a nih. Hieng hin a lo hril a nih (Jer 22:24-30):

24 “Nang Jehoiachin* hi Juda lal Jehoiakim naupa, ka suoi namna kutsebi khom ni la, ka kuta inthokin ka phawi suok ding che a nih. 25 That dinga zongtu che, Babulon lal Nebukadnezzar kuta le Kaldaihai kuta ngei chun pe suok ka ti che. 26 I piengna ni lo ram dangah nang le i nu, a hringtu che hi pei suok ka ta, chu taka chun thîng in tih. 27 Kir nawk in châk êm êmna rama chun kir nawk ta naw ti niu” tiin.

28 Hi Jehoiachin hi bêl koi dar,

Mi hnawl hnung a ni naw maw?

Ama le a thlahai chu,

An hriet ngai lo rama chun,

Ieng leia an pei suok am?

29 Aw ram, aw ram, aw ram,

LALPA thu hi lo ngai rawh!

30 Hieng hin LALPA chun a hril:

Nau nei dêr naw ang elin,

Hi mipa hi inchik rawh:

Pa hmuingîl lo ding a na,

A thlahai laia mi tu khom,

A hmuingîl um naw ni a,

Davida lalthrungphaah,

Tu khom inthrung naw ni a,

Judai ram chungah tu khom,

Inlal ngai bok naw ni hai,”

Tiin LALPA chun a puong.

Chuong chu a ni leiin, Krista Isu kha Josefa naupa chu ni sien, Davida lalthrungphaa inthrung thei lo dinga trongsie inphur ta sa ni vêng a tih. Chuleiin, Luka ve thung chun (3:23-38) Isu thlatuhai a suinaah a nu Mari tieng sungkuo suiin, Nathan fe thlengin Davida-ah a lut a, chu thlaa chun trongsephur Jekonia (Jehoiachin) kha a um ta naw leiin trongsephur sungkuo a ni ta nawh. Chuleiin, Pathienin a vantirko hmangin, “Tri naw, Mari, Pathien ngaisak i nih. Ngai rawh, nau pai i ta, nau pasal nei i ta, a hmingah Isu i sak ding a nih. Ama chu mi ropui tak ning a ta, Chunghnungtak Naupa ting an tih. Lalpa Pathienin a thlatu Davida lalthrungpha chu peng a ta, Jakob thlahai chungah chatuonin inlal a ta, a ramin kin ni nei naw nih” tiin a hril a ni kha.

Chuong anga Pathienin rem a hung ruot leiin Isu chu Pathien Naupa, Mihriem naupa, Davida naupa, Josefa naupa, Mari naupa, hrillawkna thu po po khom sukkimtu a hung ni tah a nih. Pathien thil rel dan hi a makin hriet phak ruol lo a na, Remruottu Mak a lo tling takzet a nih.

* 22:24 Jehoiachin ti hi Hebrai tronga chu ‘Konia’ amanih ‘Jekonia’ amanih an tih.

Ziektu: L.Keivom*, Inpui.com Columnist

Silent night, holy night
All is calm, all is bright
Round yon Virgin Mother and Child
Holy Infant so tender and mild
Sleep in heavenly peace
-Joseph Mohr

Kristmas zùn

Kristmas a hung hnai a, a boruokin a mi hang chim meu hin chu, ngai aw loin iemani ei ti deu hul chu tie! A hang hril suok dan khom ka thiem nawh. Khawsik hung intran dinga a mi thram lai ang deuh hi niin ka hriet. Thaw thrang leia ngaia nei el thei khom a ni nawh. Upat leia rè el chi khom a ni bok nawh. Upat hnunga a mi thram dan le naupang laia a mi thram dan a danglam mei mei chauh a nih. Naupang lai chun hma tieng beiseinain a mi thruoi a, thingtlanga lem chu kristmas phaa silfen thar ei inbel ding chu hril lo, belpuia khu hlut hluta sa an suong, a’n hnikzie khom ei hriet tah hlak chu hang kil nawk ei chak a, hung tlung vat vat sien ei ta, December thla bula inthok lem chun ei thrung khom a’n dèn ta nawh.

Upat hnung ruok chun kristmas sikserin a mi thram pha leh nun hlui chul hnung ramah ngaituona a’n zin kuol a, kumpui sul tamin hnawl anga a lo chim nel tahai chu ruom dapa ru trawl indar phung el, Pathien mi hmang zawlnei Ezekiel rawl hrea an hung tho sung sung ang el khan, an hung tho nawk a, lung hlui a’n leng vong vong a, “Bethlehem ngaina chul hnung, par ang a vul nawk tah’ ti hla hi naah a’n bu veng veng zing el a nih.

Tuta hi lekha ka ziek lai ngei khom hin ka ngaituona chu Pherzawl tlangah a kir nghal a. Lal pieng hun chawimawi dinga tlang tina tlangsam par vul chuk el dam, fai tak le nal taka kristmas hmuok dinga Changpui tuikhur amanih Maukot tuikhur amania puonsawp le insila fiel bikhai leh kan fe lai dam, kan khaw sak Zopuia siel keia kan fe lai dam, hall cheimawina ding sawlfang thing puta kan fe lai dam, ruoithrenaa hmang ding hnachang hna kan lak lai dam, zan tieng in tin deuthawah kristmas bei ding suka an inthumron tlut tlut lai ri dam, meipuia sep ding thing bul trawl kan fom lai dam, zanah Independent Church biek in kotzawla meipui intrek uoi uoi hnuoia,

Hlimna ni ropui chu a var,

Zan tieng ni kawlrawnah a liem;

Hnuoi Bethlehem dai re a nghak,

A hming chu Lal Immanuel

tia khuongpui, khuongte le seki leh inrem bak baka Van Lal nau kan inawi lai dam le thil dang dang ka mitthlaah an hung invir let vut vut a nih. Kristmas hi a tleipuitu ta ding chun ieng kong zawng khomin tleipui tham a lo tling hrim a nih. Tu lai lem chu, a hmang suol ei ti ti hi an hmang dan kia inrui nasa lem lem an ni nuom khop el.

A khulang khangna dinga thu mal zali chuong zet ka zuk ziek hi ka thu ziek tum chu a la ni nawh. Amiruokchu, kristmas zùnpuiah ei hang lut hin chu tonhriet hang phor suok ding a tam taluo a, ei inring naw karin nun hlui chângin a mi lo phi awk nawk el hlak a nih. Hi bung le chang hi pumpel thei mol lo thil a nih. Manipura chenghai lem chun kristmas hi kum za vel ei la hmang hman chauha chu ei ram le hnam le mi mal nunah inpui hluotu tak a ni ta a, ei Sikpui Kut ropui tak khom a hlân dèr a, a chim pil a, hnam hmangaina kutin khawpuia umhaiin ei kei tho nawk leia hung hring nawk mei mei a nih. Kristmas hi a huhang a na a, sumdawnghai ta ding lem chun an sekibusuok dawbol a ni ringot el. Krista ringnawtu Marwarihai tak tak hi kristmas sor nasatu an nih.

Bethlehem tlang

Chuong chu a ni laiin, Bethlehem khawzawl ruok chu Arab-hai le Judahai inkara pawlitiks boruok leiin, iemani chena inthok khan ni danga a khuo keng lo hiel khopa tam khawvel hmun hrang hranga inthoka biekzin le kristmas hmanga hung an phul el hlak ang khan, abikin kum 2006 hnung lem chun a lùn zo ta nawh. Bethlehem hi Palestinhai ram hluo bik sunga um a ni a, a mihriem chenghai khom Arab kristien deu vong an nih. Israel le Palestinhaiin inremna thuthlung an siem angin Palestinhai chun an ram hluo chin sungah sorkar hrang an siem a. Sienkhom anni sunga mi kukal le turu pawlin Israelhai lakah buoina siem an thrul chuong naw leiin, Israel sorkar chun Palestina le an ramri zar zarah kul bang insang tak a bawl huol vong a, Bethlehem chu kul bang puo tieng, Arabhai enkolna hnuoiah a lo um tah a nih. Remna le muongna a um nawna hmun chu ieng anga hmun thienghlim le inhoi khom ni sien mi an ngampa naw leiin damten rausan a tuok hlak a nih. Manipur khomin chu lampui chu a hraw mek a nih. A poi khop el.

Bethlehem hi Jerusalema inthoka km riet vela hla ni sien khom tu ruok hin chu a karah mi an cheng rawn tak leiin khaw khat ang vong an ni tah. A hming hmasa chu Ephrath ti a nih. Jakob nuhmei Rachelin hi hmun an tlung hin a nau tlum tak Benjamin a nei a, a thipui a, a thlan khom Bethlehem tlung hma hin lam sirah a la um zing. September 28, 1993 Thawleni chawhnung tienga Bethlehem tlang ka kai hmain hi thlân hmuna hin minit sawm ka chawl a, mani thlatuhai thlan hmun sir ang elin lung a’n leng rum rum thei chu tie!

Bethlehem hi Jerusalem neka feet zakhata inzo lem, a sim sak nghaa muol inzam thla diei, hmun mawi tak a nih. A puollawi lienna tak le hmun thengthaw tak chu Shepherds’ Fields an ti a, chuong lai hmun chu beram tlatna hmuna an nei hlak a nih. Hieng lai hmun hi Davida thlatu laia mi, nawchizor Rahabi naupa Boaza le Ruthi an intongna hmun kha a nih. Ruthi chun Obeda a hring a, Obeda chun Jesai, Jesai chun Davida. Hieng lai hmuna hin Davida chun a tleirawl laiin beram a veng hlak a, a beram hung se tum sakeibaknei le savom dam a that a, an ran sehai khom an baua inthokin a’n chù thlak hlak a nih. Filistinhai mi hrat khawkheng Goliatha khom kha hieng laia a beram vengna virvom bok hi hmangin a nih a deng thluk bul chuh. Chuong a tonhriethai chu hmangin, a hung upat hnungin,

Mi vengtu Berampu chu,

Ka Lalpa a ni leiin,

Tlasam ngai hrim hrim naw ning

tiin hla ropui takin a khek suok a ni kha.

Chuong lai hmun bok chu a nih beram vengtu danghai kuoma Lalpa ropuina hung inlang a, vantirkoin chatuon thuthlung, mi tin ta dinga chanchin thra lawmum, mihriem sansuokna ding thu a hung puongna le van zaipawl hung chim thla huk a, hlapawl ropui an hung remna hmun kha. Kristmas a hung hnai pha pha leh chu Bethlehem dai re, vanmihai zai hung vawrna hmun chun lungril le ngaituona a hîp a, chu hmuna chun kristien po poin lungrilah sun le zan umni ei kham hlak a nih. Zaipuhai lunglai a run a,

Berampuhai ram truonna,

Serafimhan zai an vawrna chu

Ka Lal piengna i lo nih.

Aw angelhai chun hung sak non nawk sien,

Bethlehem dai hmun khawsawta ka leng lai hin,

An rimawi le an thawmhai chu,

Ka lungrilah kumkhuoin cham raw se.

Aw van angelhai hla sak ri chun,

Bethlehem dai a nghor vel ie,

An lawm hla ri zam velhai chun..

ti le hla tam tak el chu ei khawvel hmun tina inthokin a hung far thla truk truk a, chuong hlahai chu kristmas huna mi’n awitu tak an nih.

Silent Night

Chuong laia hla ropui pakhat chu German tronga Joseph Mohr phuok ‘Stille Nacht! Hidige Nacht!’ ti, Saptronga Silent Night! Holy Night! tia an inlet hi a nih. A phuok hun le a phuok dan chanchin hi hril dan hrang hrang um sien, a chanchin tlangpui nia an hril chu ngainuom a um kher el. Chu chu a tawi thei ang takin hang hril ei tih. Kum 1815 khan Europe ram chokbuoitu Napoleon an man hnungin Europe-a thruoitu lien po po chu Vienna-ah inkhawmpui neiin Europe ram um dan ding an rel a, chu taka an thuthlung zam chu Treaty of Vienna Convention ti a nih. Chu taka inthok chun Europe-ah iemani chen inremna le muongna a hung um nawk a, kum tam kristmas hmang dukdak thei loa umhai chun kristmas hmang dingin an insingsa nawk thei tah a nih

Amiruokchu, Napoleon-in Europe ram a chil sop hrep lai, mani in lum khom nghak thei loa an um sung khan tu khom kristmas hmang mumal thei an um naw bakah an piano le rimawi hmangruohai a lo nghar-ĕk zo a, mazu ruol huongtauin lawmsa tiin, ha tât ngei nan an hmang a, an lo rèt siet nasa hle a. A thra sunhai khom a ri a lo dul zo ta a, her thrat lo chun hmang theia muol a um ta nawh.

Chuong ang ngirhmuna an um lai chun, kum 1818 khan chuong laia Prussia an ti, tuta Austria ti hung ni tah rama um, Alp tlangrama Salzburg vadung kama khaw chikte Oberndorf khomin urlawk zana Mass an nei ding chu khùn taka hmang tumin an inbuotsai a. Chu hmuna an Assistant Pastor Joseph Mohr, kum 26 mi chun an kohrana an pianist le zirtirtu Franz Gruber chu zingtieng a va pan a, kum 1816-a a hla phuok, a thluk la siem lo chu zan inkhawma perkhuong le sak thei dinga a thluk siempui dingin a fiel a. An piano hlak a ripertu ding a kum nawka hung chauh ding a ni leiin perkhuong chauh naw chu rimawi tum ding an nei nawh. Chuong lai chun biek ina hla sakna dinga perkhuong hmang chu thil porche anga an ngai a nih. Kan tleirawl lai chen khom khan ei kohran thruoituhai ngaidan chu chuong ang tho chu a la nih. December 31, 1957 zana kum hlui inthlàna dinga hla ka phuok, perkhuong le Rengkai ICI biek ina kan sak kha biek ina hla sakna dinga perkhuong ei lak lut ka hriet hmasakna tak a nih.

Joseph Mohr le Frank Gruber khomin an biek in St. Nicholas Church-ah December 24, 1818 zan inkhawmah perkhuong le remin zing tienga hla thluk an siem chu an sak a. Chu hla chu khawvelin hla a hriet lar pawl tak laia mi ‘Silent Night! Holy Night!’ ti hi a nih. An sak trum hin inkhawmhai lungril a tawk hle a, tam tak mitthli a tla niin an hril. Amiruokchu, a hnungin a chanchin hriet zui a ni el ta naw a, kristmas nawk khomin an sak zui ta naw khom a ni el thei. Vangnei thlak takin a phuoktu Mohr chun kum 1820 khan a kawpi thra takin a lo siem a, a ziekna phek mong hnuoi voi tieng chun a phuoktuah ama hming, chang tieng monga chun a thluk siemtuah Franz Gruber hming, a phuok kumah 1816 tiin a ziek a. Chu ziek chu um naw sien, hi hla hi kumkhuoa bo song ding a nih. Chuonga a riral song chu Lalpan a phal si nawh.

Kum 1825 khan an biek in St. Nicholas Church chu riper thra vong dingin mi pakhat Carl Mauracher an ruoi a. Chuong lai chun Joseph Mohr chu hmun dangah a lo inson ta a. Carl Mauracher-in piano siena hmun a riper lai chun hla ziek hi a hmu a, an ram Tyrol tlanga Ziller phaia chun a chawi a. Tyrol mihai hi rimawi tieng inhnik mi an ni leiin hi hla hi an sak lar a, “Tyrolian folk carol” ti hming a put pha hiel a. Prussia lal King Friedrick Wilhelm IV-in hi hla hi carol hlaa a dit tak a ni leiin Berlin-a Director of Royal Court Choir chun a phuoktu sui suok dingin hma a lak a, 1854 khan Salzburg bielah an sui lut a, a phuoktuhai hi an hmu suok a, chawimawina an pek bok niin an hril. Amiruokchu, hi hla hi a hung inlar phing leh a phuoktu nia inhril le insâl an hung pung a. A thluk siemtu Franz Gruber ngei khom chuonghai laia pakhat chu a nih. Amiruokchu, kum 1997 khan Salzburg Museum chun a tira a Manuscript le a phuoktu indik tak an hmu suok a, Joseph Mohr chu a hla phuoktu, Franz Gruber chu a thluk siemtu an nih ti chu sel ruol loin an namdet tah a nih.

Saptronga inlet hmasatu tak chu John Freeman Young (1820-1885) a na, chu taka inthok chun chappui kang vanglai ang elin British ramper khawvel hmun tinah a hung in dar tah a nih. Trong tenau tiem sa loin, hi hla hi trong 300 chuongin an inlet ta a, inlet pei zing bok an tih. Mizo tronga inlettu chu thu thiema hmingthang Upa Lalmama a ni a, Mizorama mingo misawnari hmasahai khom khan a saptronga mi nêk hmanin a thra lem an ti hiel a nih. Hieng ang khopa kristien ram le ram naw khom fang dar nasa hla hi vang ngot a tih. Lalpan ama chawimawitu hmangruohai chu inkhel loin a chawimawi hlak hrim a nih. Ring tlak Pathien a ni takmeuh si a.

Ngun takin hi hla hi hang ngaithla veng veng la, a thu le a thluka hin hang cheng la, i hriet naw karin Bethlehem dai re, berampuhai ram truonna, van inthieng em em, arasi paw tuor hnuoia serafimhai zai remna hmuna chun thruoi tlung nghal a ti che. Chu hmun chu a nih lungruol taka tlang hrang hranga cheng Zohnathlakhai kum tina ngaituona le thlaraua ei lengkhawmna hlak chu. Chu hmun fienriel, van hmangaina tuipui a hung fawn lutna, van le hnuoi inzoma an infawpna, lawmna thli a hrang del delna hmuna lungril le thlaraua chengtu chun kristmas ruoi tak tak a kil hlak a nih. Hla phuoktu Patea khomin chu chu thaw dingin a mi fiel zing a nih:

Awleh, tu hin fe veng ei tiu,

Hmun khawsawt tieng chu pan pei ei tiu.

Chawhnung ni nêm, September 28, 1993-a van mihai zai remna hmun phai rai inhoi tak el ka fang ni chun Pherzawl khaw hlui fang ang elin lung hlui an leng vong vong a. Khuong-seki leh rem a, insim hmer hmer a Thangngur hla phuok ‘Zan ril laia Berampu’ ti hla saka kan insawi del del lai chu mitthlaah chieng em emin a hung inlang a. Pang lum hlata ei inhnengpuihai rim dam hnârah a hung inzăm lut chem chem a. Khanga lungkima Bethlehem muol fanga Lal pieng hun ei inawi lai kha a taka fang nêk daiin a mawi lemin a lo inhoi lem chieng khop el.

Tiemtu po po kristmas chibai vochuom ka buk a, in kristmas ruoi seng khom taksa le thlarauah khuoizu angin thlum raw se.

(*The writer is a former Indian foreign diplomat and well-known writer among the Mizo tribes- Editor)

Ziektu: Pu L.Keivom

My children don’t have a father, only
a mother who is a  virgin!
-TOI (Cartoon)
   
Inrai versus naupai

“Ar that dan kong khat chauh a um nawh” ti angin nau pai dan khom hi kong khat chauh a lo ni nawh. Nuhmei-pasal inpawlnaa inthoka naupai hi eini trong chun ‘inrâi’ ei tih. Chuleiin, nau neinaa thi hrilna trongkam ‘raichea thi’ ti khom hi a hung pieng a nih. Hi hi mihriem ei hung insieng dan le pieng dan tak chu a nih.

    Kum sanghni vel liem tah khan thil dangdai tak, pasalin pawl si loa nuhmei pakhat nau pai ei hriet a. Ama chu nunghak thienglàm Mari a nih. Chuong anga naupai mak chu khawvel histawria rikawt um hmasa tak a nih. Nau inpaitirtu chu Thlarau Thienghlim a ni thu Baibulah ei hmuh. Mari hi Thlarau Thienghlim leh nupa nun chèna inrai a ni naw a, Thlarauin nau inpaitir dan danglam tak hmanga a’n paitir a nih. A nau hung pieng khom chu kristienhai chun ‘nau thienghlim’ ei ti a, chu chu Saptronga ‘holy/immaculate conception, virgin birth,’ an ti kawi nuoi hi a nih.

    Chuleiin, Hmar tronga Baibul inlet sin, tuta Delhi Version hung ni tah hi kan buoipui lai chun ei Baibul hmang hlak a, “nunghak thienghlim chu inrai a ta” (Mat 1:23) ti hi Pathien remruot dan leh inmila kan hriet naw leiin “nunghak  thienghlim chun nau pai a ta” tiin kan sie ta lem a. Baibul pumpui sut dinga ngun taka kan en nawk trumin ‘nunghak thienghlim’ ti hin ‘virgin’ ti a kawk bik chie naw leiin “nunghak thienglàm chun nau pai a ta” tiin, nuhmei-pasal inpawlna thrang loa Isu kha hung insieng le pieng a nizie tar lang thei dingin kan hung sie ta lem a nih. A san chu, ‘inrai’ ti le ‘nau pai’ ti hi thil thuhmun angin ngai hlak inla khom, theulawzi taka Isu insieng dan sui le hrilnaa chun an kawk chu hnuoi le van anga indanglam a nih. A hmasa hi Isu hung pieng ding thu Setan hril nuom dan ding tak ni mei a ta, a nuhnung ruok hi chu Pathien remruot dan ang taka thil hung tlung a nizie hrilna a nih. 

    Tu laia nau pai dan amanih, nau inpaitir dan danglam mi thiemhaiin an hung dap suok chu ‘in vitro fertilization’ (IVF) method an tih. Nuhmei le pasal chia thil hrik an lak suok a, chuonghai chu labawretawri-ah intuitirin an inopkeutir a, chu chu a paitu ding sulah an thun a, nuhmei-pasal inpawlna thrang dêr loin nau an inpaitir thei a nih. Mani nau pai hman naw khomin mi sul hawa inpaitir thei a nih. Chuong ang method chu hmanga November 28, 2008-a nau nuhmei nei Rajo Devi, Haryana mi chu kum 70-a upa a ni ta a, a pasal khom kum 72 mi a nih. Baibula Sari ti loa chu hi nu hi khawvel hrieta upat hnunga nau nei nuhmeihai laia chu a la upa tak a nih. Chu method chu Isu hung insieng le pieng thua khan Pathienin a lo hmang dai tah a nih. IVF method pangngai nêk daia changkang lem a nih ti ruok chu inhmai ruol a ni nawh. A ieng khom chu ni sien, ‘IVF’ method an hung hriet suoka inthok hin Thlarauin Mari kha nau a’n paitir ti thu, thil thei loa kha hmaa ngai hlak kha, thil thei a nizie chieng takin ei hriet tah a nih. Thil thei loa ei ngai tam tak hi ei hrietna le thiemna tlawm lei a nih.

    Thil mak dang, September 12, 2005-a India chanchinbu hrang hrangin an ripawt chu Scotland rama Roslin Institute-a an thil hmu suok, nuhmei le pasal chia inthok ni lo, nuhmei le nuhmei chia inthoka nau insiengtir thei dan thu a nih. Hi hi Saptrong chun ‘parthenogenesis’ an ti a, chu chu Grik tronga a umzie chu ‘nau thienghlim’ (virgin birth) tina tho a nih. Hi thil hi rannung chi inthla thei dan an ensinnaa inthoka an hmu suok a ni a, mihriema ruok chu an la ensin hri naw a, sienkhom thil thei a nih ti an hriet. Chuonga pasal thrang loa nuhmei le nuhmei an intodel thei ding a ni ta si chun a letlingin khawvel hi a’n thlak danglam ding a na, pasal le pasal inkara naute, pasal bokin a pai thei dan zong chu thil makmaw hung ni thei a tih.  Chu hun chu ei tlung phaa ei khawvel um dan ding chu suongtuo thiem a harsa a, ei bo map el a nih. Tuta inthoka kum sangkhat vela ruok chu thil mak a ni ta awm naw vei leh! 

Mihriem Naupa

    Judahai le kristienhai tukvera inthoka thil hung insiem dan, Genesis-a ei hmu dan chun, hnuoi le van le a sunga um thil hrang hranghai chu Pathienin “Um raw se” tia a’n umtir el a ni lai zingin, mihriem le rannunghai ruok chu a siema a siem a nih ti ei hmu a. Chuleiin, hringna thuok an thuok khum ngat mihriem lem hi chu ama angpuia siem a ni leiin a siem uluk hle a nih. Chu thuruk, thlarau mita hmutu Davida chun “mak tak le râpum taka siem” a ni thu a tlang insampui hrim a nih (Sam 139:14). Mihriem a siem dan makzie le ropuizie hi mihriemin hrietna le varna tienga hma ei sawn ang dungzui peiin ei la hung hriet zuol deu deu ding a na, ei hmu suok rawn po leh ei maktina khom a zuol pei ding a nih. Tu hin chu tlawmte chauh, zaa sawmkhat vel ei hriet suok phak trawk a, ei theina khom chu bak chu a hmang dan ei la hriet nawh. Zaa sawmnga vel ei hriet suok a, ei theina khom ei hmang thei pha chu ngaituona hmangin nuomna hmun hmunah ei la fe thei ding a nih.

    Pathienin ama angpuia a siem mihriem chungthuah “Um raw se” ti thu a hmang ve naw hi theulawzi inril tak niin an lang. Chuleiin, mihriem sandamna lampui a remruot khom “Um raw se” tia inumtir el loin, a thu tiem chu ama ngeiin mihriem taksa puta a hung hlen theina dingin mihriem insieng dan le pieng dan lampui chu hung hrawin, zaa za Pathien Naupa le Mihriem Naupa a ni kop theina dingin Thlarau Thienghlimin Mari chu a’n paitir a, nuhmei sunga inthokin mihriem taksa le nina po po neiin a hung pieng a nih. Chu nau pieng chun Pathien Naupa nina le Mihriem Naupa nina a nei kop naw chun Pathien sandamna prokram hi hlen thei a ni si nawh. Hi thil hi a mak êm leiin ringna mit le lungril mit ngot naw chun hmu chieng thei a ni nawh.

    Hi thu ei hril lai le inzom hin Hmar Christian Fellowship, Delhi-in kum 17 a tlingna champha September 4, 2005-a a lawm trum khan mipui insam ruol dinga HCFD Thuring (Statement of Faith) an buotsai le an mi’n sampui kha hang hril hai inla. Hi Thuring hi kha hmaa kohran tuoltroin mawl taka an lo buotsai, an trongkam hmang khom la songnawi deu el, en chet le siem thrat um loa kohran tinin ei hmang sawng pei a nih. Kha taka khan Isu Krista chu Pathien Naupa a nina ei pom thu a uma chu Mihriem Naupa a nina chu ei pom sa ve naw amani ding, a thrang ve tlat naw a nih. Kei chu hieng thila hin ka ti kher kher bok a, thuring an insam ruol lai khan ka bau ka phong ve naw hrim hrim a nih.

    Hi Thuring hi Baibul le inmila her rem ding chun siem thrat ngiel a ngai thu ka hril leiin kum 2006 khan siemphuisui rot a ni a. Hung bi chieng ding le siemphuisui dinga an mi fiel leiin Baibul inchuktirna le inmila ka hriet dan angin Thuring chu ka rem thra a, a kim nawna laia ka hriethai chu ka thol bit bok a. Chutaka chun thil dang iemani zat ka bel sa bakah Mihriem Naupa a nina khom ka zep sa a. Kum 2006-a inthok khan HCFD chun Thuring insam ruol a nei pha Mihriem Naupa a nina a pom thu hi a chuong ve tah a nih. Kohran dangin Mihriem Naupa a nina hi an la bân zing am ti ruok chu ka hriet phak nawh.

    Ei thupuia bok kir nawk inla. Hnuoia Isu Krista rongbawl dan chanchin ziektu mi pali- Matthai, Marka, Luka le Johan-hai chun uor nuom bik an nei seng a. Mathai chun Isu Krista chu Thuthlung hluia Judahai lal Messia hung ding hril lawka lo um ngei chu a nizie thu a uor hle a. Marka chun rongbawltu Siehlaw a nina a uor a. Luka chun Mihriem Naupa a nina a hril uor a, Johan chun Pathien Naupa a nizie a hril uor ve thung a nih.
Mathai ziek ei bi chieng chun, Judahai lal hung ding a ni ngeizie sukchiengna dingin Abrahama inthoka Mari pasal Josefa chen, pasal tienga Isu thlatu bulhai fimkhur takin a hung sui chet chet a. A tum tak chu Isu Krista kha Abraham thla, Juda hnama mi Davida thla fe peia inthoka hung pieng, Davida lalthrungphaa inthrung dinga ruot sa a ni thu sukchieng a nih.

    Ei hang bi thuk pei chun, Isu Krista hungna ding le sandamna sin a hlenna ding lampui chu siktan tumin Setanin a bei char char a, a siktan vàng váng chang a tam el. Chuong thilhai chu Genesis-a inthoka kros-a hnena changa a tho nawk ni chenin hmu ding a tam èm èm. Chuong laia pakhat chauh chu hang thlir ei tih. Davida thla fe peia inthoka Messia la hung ding thu hril lawk a ni lai zingin, pasal tienga Davida thla fe tung pei Jekonia (Jehoiachin tia an ko bok) chu Nebukadnezzar-in salah a man a, Babulon tieng a thruoi a. Mak tak elin, Jekonia le a thla peihai chu Davida lalthrungpha hluo thei lo dinga Pathienin Jeremia (22:30) hmanga trongsie a lo inphur ta sa an lo ni dai el!

Nau nei dêr naw ang elin,
Hi mipa hi inchik rawh:
Pa hmuingil lo ding a na,
A thlahai laia tu khom,
A hmuingil um naw ni a,
Davida lalthrungphaah,
Tu khom inthrung naw ni a,
Judai ram chungah tu khom,
Inlal ngai bok naw ni hai.

            Hi hi thil buoithlak tak chu a ni phot el. Sienkhom, Pathien thu ruot a ni tlat leiin inkhêl thei a ni bok si nawh. Thil inlumlet dan ei thlir pei chun, a chunga hrila um hi a hung indik thlap vong a nih.     Babulon sala intang Juda lal Jehoiachin (Jekonia) huna inthoka Isu hung pieng chen khan, kum zaruk ding lai, Davida lalthrungpha hluotu lal tu khom an um ta nawh. Mihriem thila sut chun an mang thrak ti thei a nih. Mari pasal Josefa, Nazaret khuoa karpentar chu Davida thlaa inthoka sui chun Israel lal, Davida lalthrungpha hluotu ding a nih. Amiruokchu, ama khom kha trongsie phur Jekonia thla fe pei laia mi a ni leiin a hluo thei nawh. Chuleiin, Isu kha Josefa thisena inthoka insieng, a naupa ni sien chu, Davida lalthrungphaa thrung thei lo ding a nih.

    Luka ruok chun huop zau takin, Isu chu “mi ngaia chu Josefa naupa a nih” (3:23) tia hril tranin a thlatuhai chu Mari chi zunga inthokin a sui a, mihriem po po intlan dinga hung, Mihriem Naupa a nizie sukchiengna dingin Davida thla a nina chu Davida le Bathseba naupahai laia pakhat Nathan fe thlengin a sui lut a, mi po po pa Adamah a sui tawp a. Hi thla hi Jekonia thlahai anga trongsie phur a ni ve naw leiin, Pathienin vantirko hmangin, “Tri naw, Mari, Pathien ditsak i nih. Ngai rawh, nau pai i ta, nau pasal nei i ta, a hmingah Isu i sak ding a nih. Ama chu mi ropui tak ning a ta, Chunghnungtak Naupa ting an tih. Lalpa Pathienin a thlatu Davida lalthrungpha chu pêng a ta, Jakob thlahai chungah chatuonin inlal a ta, a ramin kin ni nei naw nih” tiin Mari a hril a ni kha (Luka 1:30-33).

Hi hi Pathien thil rel dan inthukzie le makzie, Thlarau thilthawtheina hmanga, hril lawka a um ang thlapa Mari hmanga thu chu taksaa a hung inchangtir dan chu a lo nih. Hieng thil neu neu, ngaisak tlaka ei ngai nawhai hin umzie inthuk tak an lo nei a nih ti hre suok ding khopa Baibul thu hi ei bi pei phot chun, phêk tina hin ringna sukhrattu le suknghettu ding thu rangkachak, Pathien ropuizie le makzie hrilna, pai dan chi hrang hranga pai, a lo tam a nih.

Mi var, mihriemna hin chu,
A ngaituo suok zo thei naw ie,
Ka Sandamtu i thuruk hi.

Ziektu: Pu L.K. Varte

Thu hmahruoi: Vawisun hin ka beisei phak derlo keimaa hmathlir lo um hril suok theina platform thatak pek ka ni hi lawmum ka ti tak zet. Kei mi naran, layman pakhat ve el, Gospel Centeneray lawmna Sielmat ah khan hung thang ve theinaw lang khawm ngainatna ka chang bawk, vawisun ni niropui le sinsie tlak, thang la hungthar peihai sunzawm ding Khawpui Rawngbawlna mellung phun nia hin hun hlutak inkien ka la ni nawk ta peia, vangnei kan ti tak zet anih. Mihriem dan takah, ka ta ding chun hringnun chawhnung tieng lo ni ta sienkhawm, Lalpa`n ieng tin takin amanih chu mi hmang tangkai ala tum ani ti hi chu ka chienga. A takram la tlung chie naw langkhawm, Pathien thilpek talent keima a um hi a hlim-thla anlang ta in ka hriet. Pathienin in iengang takin am keimaah hin a hungphur suok ding ruok chu Ama thu thu ni tang tih.

Antioch Mission Centre, Guwahati ka hmu dan:

Ka lungrila turna a nasat leiin March 20, 1986 khan UPSC, New Delhi maksan in tuva ka sin thaw na mi piengsuolhai sawmdawlna sin hi Guwahatia hin ka hung zawma, intieng pan e` tilo chun bel ding remchang tukhawm anla um nawa, inhluo ding zuk zawng dan khawm chu thiem antak khawp ela. Chuonga inhluo ding zawnga kan vak vel lai chun beiseina khela Circuit House ka zuk lut ve reng reng leh Pu J.C. Nampui, IAS (Chief Secretary, Assam & Meghalaya loni hlak kha) kan hmupui hlau ela, ka buoina a hriet phing leh Guwahati Circuit House ah VIP Suit food & lodging free nawk nghal, nisari sung zet amin hluotir nawk nghal, ka lawm dan chu vanram tlafuol amani aw! ti pal a awl ngei el. Kan family life history ah chu thaibo ruollovin record a tling a nih. Sikpuiruoi Shillong 1983 inngainatna fa`ng-thlifim kha alan lengkuol vel ani awm ie! ka ha dam huoi huoi el.

Chuonglai huna chun Guwahati hi a bala bal el, mise an tam bawk a rinum khawp ela, Delhi khawpui le hrilkhi chi chu alan nawh. Tu ruok hin chu Delhi nek hman hmanin an hawi lem an ta ie!. Hun le kumhai a hung invawia, students an hung tlathla pheu pheua, sawrkar sinthaw pakhat pahni an hung um tan a, eini Hmar nauhai ta ding khawmin hmun pawimaw a hung ni pei tah ani ti hin ka lungril a hne ta khawp ela, vairamah nitina to-let mel kai el khawm nghawk a um zozai ta leiin Inhmun vaihai kar lai ni si lo, nakie tienga khuo la hung um theina ding hmun-awl hi kan nupa hin kan zawng ngat ngat hlaka, Guwahati le a se vel hi chu kan fang kuol hne vieu in ka hriet. A tawpa vawisuna hmun kan khuorna Pillangkatta hi kristien hnam lo chengna, hmun inthawl ruoltha unau hung lut thei vena tiin kan lut chawta kan hluo chu ani der el ta a. Hieng hun lai hin khawpui sunga khawm plot pakhat pahni tihai chu man tam bek lova lan chawk thei a nih. Amiruokchu, chuong hmunhai nek chun ruoltha unau hung lut ve theina Garo le Khasi hai hnawmkawl, leilet zau ah kan lut tawpa, ruol thenkhat mi nuisantu khawm an bo nawa, tu ruok hin chu khuoletui kan hung ni tlang nawk ta pei lem anih. Suok san lungril put chu kan um tawl ta naw ni awmtak anih, kan det tawl hle an tah.

Chuonglai chun vawisun nia ei ngirna Urban Ministry zungpui ei thlakna hmun hi Deepor Beel (a historical migratory bird sanctuary @ a natural large lake) kam, Guwahati khawkawl Dustbin phairuom ania, ei sira National Highway lientak khawm hi mumal alan naw a, A.T. Road, G.S. Road hai hraw lemin via Pan Bazaar, Paltan Bazaar fe thlengin line buses, trucks, heavy vehicle, light vehicle an rengin anla tlan pawl nuoi nuoi hlaka, ka naupa Nelson R. Varte, Assam Engineering Collegea a kai lai chen khawm khan lungkawhrawt, kacha road vawng ala nih. Tu ruok hin chu, East-West Corridor National Highway project former Hon`ble Prime Minister, Pu Atal Bihari Vajpayee a vision hung ra suok khan National Highway four lane pucca tuong a tlep zuoi el ta a, hadam deuvin ei tlan zuoi zuoi el an tah.

Amiruokchu, hi Antioch Centre hmun re le mihai hriet fuklo hlak kha, ei Pathien hi a thaa, mihriemhai ngaituona le suongtuona hrimin a phaklo khel deiah Remruottu Pathien ani leiin Sinai chimbuk ramtawl le hmun khawsawt-um, Lalpa Pathien hmunthienghlim alo ni zing ang el khan, hi lai dum hmun le Guwahati khawkawl Dustbin phairuom hi Jerusalem khawkawl kalvari muolah ti ang deuvin Lalpan a rawngbawlna hmun thienghlimah alo ruot der el ta hi a ropui tak zet a nih. Hnatlang ni khan ka tarpupa leh kan zun lang ve zawka, pil an thak, a thenin anin khi nawk nawka, a thenin ei sira pil vurpawng tasa lai sawn thingpui, theituihai an buotsai nawk nawk lai khan ni danga keima a um ngai derlo mitthla khawm chu ni chuong silovin hmathlir hi lai ei hmun phei vel popoa hin building hai a phei zawngin a tlep tuor ela, khawpui le ase vela rawngbawltu dinghai trainingna hmun le chanchintha kapsuok uoi uoina hmun loni hin ka hmu ve tlat a nih, a ropui ka ti ngei el. Suk puitlingtu ruok chu mihriem nilovin Lalpa Pathien ani lema, chuleiin, Lalpa hmang tlak ni dingin inzo sa, inpei sa in ‘Lalpa hitaka hin ka um,’ ti thei seng dingin vawisuna thalai, nulepa, thang la hungthar pei dinghai khawm ei rengin Lalpa hmang tlak ni din eiin fiel sa nghal nisienla. Tawngtai ei ta, hnena chu Lalpa ta ani sia.

Khawpui le ase vel rawngbawlna hin ka nun a hne dan:

Khawpui Rawngbawlna hmathlir ka lo nei ve dan hieng ang hin hang hril tawi tum inla: March thla 1984 in Shillong maksana Mumbai-Goa hmuna India Tourisim a sin zawm tuma ka fe malam in Delhi ka zuk hraw malama, U`ruot Pu Lalruotthang le U`Darsiem Pu Darsiemlien Ruolngul hai milo ngainatna leiin Assistant Grade UPSC Officea ka sin hmu, zawm tum talo, ka zawm lem el ta a. Khawpui puotieng Vikaspuri ah kan chenga, Pathien thua inenkawlna tieng ruokchu kan buoi hlein ka hrieta, Mizo Service, R.K. Puram a van khawm kha chu an tak khawp ela. Pi Indira Gandhi in India ram inret dan economy a uor lai kha ani bawk, indeilo leiin kan inkhawm tlawm hlea. Pathien thu tiengah kei ni le naupanghai ngaituona leiin Vikaspuri Worship Service 1985 khan, kan inhluo Mr.Tirkey ka thawk chanpui pa inah kan tan tawp el ta a, Rev. J. Huoplien Neitham hai nupa in an mi hung hmangpui nghe nghe a nih. (Delhi Ebenezer a Vikaspuri Worship Service tan na hmun a ziek kha an dik naw deuva, sawisel lei an nawh). Chuonga inhawi kan hang ti tan vel ding chau chun khi a chunga ka hril tasa ang khin piengsuolhai sawmdawlna or, ruolbanlohai ruol ban phak dinga siemna team kha March 25, 1986 khan Guwahati a hin ka hung fin ve ta a nih.

Kum 1987-89 sung hin Guwahatia student hmasahai hniekhnung zuiin Hmar Students Association Guwahati Branch chu sukthar in a hung tal thar nawk ta a. Pathienni zat deu thaw hin kan inhluoah hin bufakkhawmna kan nei tlang hlaka, kan hlim thei der der khawp el. Pathien thua inenkawlna tieng ruok chu kan basamin kan chekrau khawpin ka hriet. Thenkhat Mizo Service (ZPMK), thenkhat in Zomi Worship Service kan bela, Chairman, Vice-Chairman positionhai chen khawm chelin kan lova tlang nel vea. Nisienlakhawm, Pathien ei inpak dan kal hmang alo in ang naw deu lei am ani ding, hieng unau Servicehai lai hin thla a ngam thei tak tak naw a, studenthai ta ding lem chun hun awl thaa ngaiin, Pathienni hin chu Cinema Hall tieng hin an lung a len lem ta hlak a. Chuleiin, studenthai le Biekin inlawitlang dan mawl hin ka lungril ngaituona a maksan thei naw a, Khawpui Rawngbawlna ei ti hi alo ni ta zing ani awm ie!. Chuongchun, kan hang inrawn khawm nawk nawka Hmar tawng hmanga inkhawm hran chu nei tha kan ti tlang ta khawp ela, ruol thenkhat leiin lo inhnu met inlangkhawm lungruoltakin September 6, 1992 khan Guwahati Hmar Worship Service chu kan lo tan der el ta a nih. Hi taka kan thiltum chu student Guwahati le asevela umhai, sinthawna leia Guwahati khawpuia hung posting hai Pathienni Biekinah worship nei tlang hi a nih. Kohran nulepahaiin an hung sir chang Pathien thu mi hung hril pek le inzin invakhai khawma Pathienni an tuok fuk changa an inkhawm ve theina ding hi anih. Hi hmathlir ka lungrila a hring lei hin le chanchin inhriet pawna platform ni fawmin Hmar Weekly: HMATIENG kan lo insuo ve hlaka, tuhin chu la chawl san hri a nih.

[Hieng hun lai hin ei hotu lien Rev. Dr. J.L. Songatehai sung khawm Pu Henlallien Songatehai inhluo Chenikuthi tlanga khan an hung vea, an foreign fe tawm lai kha ni nghe nghein ka hrieta, inpak der thu lovah, an nupa inngaitlawmna le an ngilneina hi kan nupa hin kan hril hlaka, vawisun ni chen hin sungkuo fel le inza tlak tak anla hung ni pei na hi ropui kan ti hle a nih].

Ei thupuiah hang lut nawk ta inla, vairam khawpuia sin neia sungkuo hung indin mekhai, lekha hung inchuktuhai hin mani khuoah kohran ei nei seng dea chu ei naupanghai khawvel le an seilien na chu hieng khawpui lien le chin hai hi ani el ta bawk si. Khawpui Rawngbawlna bawk el kha ka lungrila hin a tawp thei ta naw a nih. Amiruokchu, hun a hung fe peia kan hung changkang deu deua, Guwahati Hmar Worship Service khawm chu a thing an mi ti pek am ani ding, Guwahati Hmar Christian Fellowship an mi ti pui nawk ta a. Kan hung burip tuol tuol peia kohran ngaipawimaw bek nawna nge hi a hung lut ta ni in ka hriet tlat ela; ka lungril Mission le hin an mil ta naw hle in ka hriet hlak. Ser le sang thuah hai nileh, kohran inenkawl dan thu hrim hrim ah Fellowship ringawt in a thaw theilo chin hi tamtak a um hlaka, hieng lei hin Khawpui Kohran hi nei thei ngirhmuna um si chun nei ngei chu a tha ti hi kei ka hminna ani zing hlak a nih. Gospel Centenary ei hung tlunga GHCF in a hran lieu va lawmna nei kher kan hung rawt nawk ta peia. Changkang deuva Gospel Centenary lawmna kan hang inpuocha khan a sungril dictatorial nge`in a fak nasa hle ani ti ka hmu leiin ka ziek tiel ve nuoia. Amiruokchu, ka ringnaw tieng takah Guwahati le a mipuihai boruok hriechieng met met lo, ei mithiem thenkhatin social network ahai chen counter mi thawin zupeng chang phak lo leia chierinthluok mei mei dama deu saw in, an ngaidan besan bo le thing, tirdakum le tenum takhai leiin kan inkal nasa hle a, ka lungril natna panser vawisunni chen hin ala dam theinaw zing anih.

Gospel Centeneray ra ka lungril hnetu:

Amiruokchu, Gospel kum 100 lawmna thilpek proposal ka siem ve laia mi Executive Committee in ami pawmpui a, chuleiiin hieng ei kohran bulpuihai alphabetical order in EAC, EFCI, ICI, PCI le RPC haia hin Missionary pakhat support hlak kha pahni sengin support ve an hung ni taa, chu hnungah remchang lem a ngaiin pakhat seng thlatin cheng 9000/- sengin support an hung ni nawk ta anih, thawzawm thei peia ei um leiin ei Pathien ropui raw seh.

Hmar hnam thla bikhai sungah, Centenary ei hang lawm zova hlahai leh Lalpa pawlna ei hang dawng khan ara suok iem ning ati aw! tia kalo thlir ve zing laiin Kristien Magazine April 2011 issue, Vol.-LIV, No.4, pages 22-24 ka hang tiema hmathlir ka lo buoipui ve zing, zuk hril dan ding bek ka hrietlo kha keimaah hin a chieng ta em em ela, lawmum ka tiin ropui ka ti tak zet el. Chuleiin, hi Article ziektu hi kan tawmpui ve ani leiin ka hmin hlea, a ziektu Pu Rev. Darsanglien Ruolngul khawmin a theida ka ring chuong naw leiin ka ditna laitak ka hung ziek nawn nawka, hieng ang hin:

“Urban Ministry hi lo theilova Lalpan ami thuoi tumna a nih ti hi chieng ei tiu. Ei nauhai, lekhathiemhai khawpuiah sin thawin an lut zung zunga. Anni enkawl ding hin Rural Ministry a inthawkin a thei ta naw leiin, ei rawihai Pathien thutaka enkawl zui dingin Lalpan kum 100 ei tling chara inthawkin Urban Ministry tan dingin ami tir suok a nih ti hi kei ka hmu dan ana, indik bawkin ka ring. Ei ro hlutak, ei nau lekhathiemhai kohran in enkawl lovin, Fellowship in an enkawl ana. Kohran in pastor rawngbawlna leh a enkawlna hnuoia an um hmanin Pathien thutaka enkawl hne an tak vei leh, ei rohluhai enkawl lova khawpuiah an um hi an mawphurtu ding tu dang an um nawh a. Ei ni nu le pa, Kohran hi an umna na ah enkawl zuitu ding ei nih. …… Chu le in ruol chun ringnawhai laia rawngbawlna leh a fe kawp zing ding a nih.”

Khawpuia rawngbawl dingin Kohran det makmaw a nih:

A chunga thu khi a chieng leiin zuk hril nawn ngai bek ta naw sienkhawm, Urban Ministry vungtaka fe pei ding chun, kumthar thupui KOHRAN ti hi a tul hmasa, a pawimaw le makmaw chu a hung ni ta a nih. Chu Kohran chu A hrieknal Upa le Pastor hai rawngbawlna kawnga Lalpa rawn zing hlak, thlarau mihaiin enkawl pei hai sien. Chu Kohran deta inthawk chun in train up ei ta, Gospel Chanchintha hi ei kap dawk uoi uoi lem ding anih. Chun, Hmar Christian Fellowship le inkar thuah, tukhawmin mani kohran maksanin Fellowship ei zawm nuom naw ding an leiin, chu chau lova, Fellowship memberhai popo hi mani kohran chitah kohran memberhai ei ni vawng sia, intieng inlawi hunah mani kohran tho kha eiin lawi nawk na ani hlak. Chuleiin, unau dittakhai, hrie thiemtu ni seng tum ei ta, Kohran hmalakna le a thiltumhai reng reng hi support tlat tum ei tiu. Thuthlunghluiah Lalpa hnamthlang Israel thiempuhai chun Urim le Thumim hmangin an lampui ding Lalpa an rawna, chu chu an zui hlak a. Chuongangbawkin, ei Kohran thuoituhai khawm hin ei Lalpa Pathien hi ngunthluka rawnin hma an lak ngei hlak ni ding ania. Chuleiin, Pathien Kohran le a hrieknalhai inzatakin thlawp tlat lem ei tiu. Chu Kohran chun Christian Fellowship hi a sukdar nawa, a do ngai nawa, do nekin Fellowship ban pawimawtak ani zing lem ding a nih. Ei ni Fellowship memberhai hin ei Kohranhai hieng anga ei thlawp tlat chun, Khawtlangah, Fellowshipah inremtak le lungruoltakin kal pen tlang thei ngei ei tih. Chuongang ding chun Fellowship hotuhai, Kohran thuoituhai hi lungril lientak putin kengrawn hle tum ei tiu. Ni dang khan Hmar Felowship a hin UPC, Roman Catholic hai chen kha anin lenga tu ruok hin chu anin leng ve ta naw tlat. A tuma Biekin an kai khawmin ei theida chuong nawh.

Hieng anga ei thaw chun iengtik lai khawm Fellowship hi bo naw nia, a hring zing ding a nih. Kohran chu a mit a vara, a chin alien, hmun kilkhawr ami chen khawm a hmufuk thei pei hlak a nih. Chu chu ei Fellowshiphai ta dinga rawngbawlna suk zau tu opportunity thatak ani lem anih. Pathien Hring Kohranhai hmalakna hi thlawp tlat lem ei tiu! Hnam damna ding le Gospel Chanchintha indarlien peina dingin. Kohran Fellowship hi dam zing raw seh, Kohran memberhai eini vawng sia.

(Dec 5, 2013, Pillangkatta,Guwahati)

Ziektu: Pu L.K. Varte, Guwahati

Ang hle sienkhawm zawng chu zawng ana, mihriem ani thei chuong nawh. Mihriem chu mihriema pieng ani leiin mihriem ani ela, i pieng ta rau rau chun mihriem Man ini tho thoa vantirko chu ini ta naw phawt chu a nih, lungngai naw rawh. Hmar nau ini phawt chun dum inkhal ngawk lakhawm, ngo dawng duok lakhawm Negro amanih, Sap Mingo chu ini naw phawt a nih. Ka pansakpa in amanih, ka panthlangpa in zawngah ami ti leia zawng monkey ka zuk ni el dan chu a um naw a, ka dang lam chuong bawk nawh. Hmar ka ni leiin Hmar ka nia, a definition dang a um nawh.

Chuongang bawkin Hmar Welfare chu Hmar Welfare ana, Hmar nauhai ei welfarena dinga eiin din hlak chu ania, unau hnam danghai ruokchu hi Hmar hming bika welfare program hin a huomsa naw a. Chuongang bawkin Hmar Inpui chu Hmarnauhai Inpui Hmar Supreme House anih. Chu Hmar Welfare le Hmar Inpui chun a huop sunga hmar-nauhai hrim hrim zuk hnar el thei dan a um nawh. Hmar ka ni sia, a huong sungah ka um a ni bawk si chun a member ni dingin Natural Right ka nei ve anih. Hotu pakhatin ini nawh, a ti leia zuk ni naw el thei an nawh. Mihriem chu zawng ani thei bawk si naw a, Hmar chu Negro or Sap Mingo ani thei ta si naw a. Chuleiin, hotu, hmathuoitu chun lungril lientak le thienghlim, demkai lovin a unauhai chu a remkhawm lem ding ana, ruollaia tlathlalo mainstream a la umlohai hmusuok tumin mi bengvar deuhai leh Lalpa Beram sawmkuo pakuohai chu ti hla kha an sak lem ding anih. Lalpa hnamthlang Israelhai hi enta u!, vawisun chen hin anni laia hnam inhmanghai kha zawngin, identification camp thawin an Rabi haiin khawvel an dap zing an naw am anih?.

Hmar nauhai ei chanchin sui kirin kum 1910 hma po khan chu Rom 1:18-32 a Jentelhai suolna turu popo kha eiin hnelna ani ve a, khawvel A AW B a innghatin tui-sam po, thingbul lungbul danglam po bie`in an inthawina hrietnaw pathien kuomah anin hlan hlak kha ana, mawlna rama Jentel suolna turu khan mi hem kuolin ei chungah ro arel hlak anih. Kohran khawm ala um chuong naw leiin chu pawl kha pawl ti ding ala um bawk nawh. Hnam kau penghai le family hran hran chu lo um ngei an tih. An Fellowship ni awma inlang chu kumthat kum a Sikpui Ruoi an hmang hlak hi ala nil awm ie!. Tulai khawm, ei hriet ang tawk tawkin pilepu nun kha sukhring tumin ei hriet phak tawk tawka eila sun zawm pei anih; an hawi thei der der si a. Ti tak takah, ei pilepuhai khan iengti ang charin am anlo hmang hlak ding chu aw!.

Amiruokchu, vangnei thlak takin kum 1910 a inthawk khan vawisunna ei buoipui luoi luoi Gospel Chanchintha hin Hmar nauhai ami hung envar tanna, hung indar lien peiin kum 103 zet ei lo chuongkai nawk an ta a. Kristien ei hung ni tan dan le, chanchintha rawngbawlna a hung indar lien pei dan hrietu le ziek thiem ei tam em em, Debate in tawpni ala rel nawh. Chanchintha sukdarna rawngbawlna a lien zuol pei beisei nahai leiin simtieng, hmartieng, sak le thlang ngha velin Krista hminga Kohranhai a hung mawng tuk tuka Hmar nauhai lai Gospel Chanchintha Hqrs. ei tiem chun kutparin a dei ta naw tieng a hung ni tah. Pathien ropui raw seh.

Hieng ani tak lei hin North East Hill Tribes hai laia hin a thiempu chi, a Levi chi ni awmtak ei nih, ei unauhai enin ei danglam bik rieu anih, biekbuk indina, thiempu rawngbawlna sin thaw hi ei talent bik rieu niin an lang anih. Ei tha bik tina ruokchu ani naw khawp el. Chuleiin,a thlarau mi am, ei ni naw am, mani khuo le veng or ei umhmun khuorna chit ah Pathien Hring Kohran @ Gospel Chanchintha Hqrs. hai ei tum tawk ang peia ei neihai hi nghettakin chel seng thang a tih. Ei hung inthanglien peia, Pathien zarin 1980-85 vela inthawk khan New Delhi hmunah sin lairawl chel dingin ei hung baw tana, khawpui danghaia khawm hung tlalut tan in, inpawl khawm khawp ruoltha ei hang um tan pei ta a nih. Biekin kai mi, Pathienthu bova umtheilohai eina, Kohran tum tuma inthawka hung hlak niin lakhawm Thuring hmunkhat, Ringna hmunkhathai eini leiin Pathienthu leia inpawl khawmna platform ei zawng ruoi el an tah. Ka hriet suol naw chun Vikaspuri Worship Service, New Delhi 1985 a kan indin kha Hmar nauhai hmalakna a Gospel Fellowship hmasatak ala ni el naw dim ani aw?.

Hun hung fe peiin khawpui lien le chin haiah sin a chin a lien ti lovin Government Departments, NGOs, Private Companies, Business Firms ei hung baw tan ve ta a, inchuklaihai khawpui lien le chinhai ei hluo kim ve deu thaw an tah. A suol le a tha, a var le a thiem, an vet deu le mawl em em, thlemsam vaihai ang deua mitamna tieng tieng luongthli mutkur ang ela kur duol duol khawm ei bo ta nawh. A tha ve hrim hrim anih, Pathien ropui raw se. Kristien sungkuohai ei ni leiin, khuopui chin le lienhaia tlathlahai Pathien bieka inkhawm tlang nuomna leiin tu kohran, kha kohran ti lovin Hmar nau, kristien ni bawk, ringna hmunkhat ei nina in Hmar Christian Fellowship a min dintir hlaka, a memberhai ruokchu permanent tak tak ruokchu ei tlawma, eiin kapupchaw zut zut zing hlak a nih. Chuleiin, Hmar Christian Fellowship hi a damna ding mawl hi ngaituong ei tiu.

Hieng ang hin a tam a tlawm hril lovin Hmar Christian Fellowship in eiin khai luoi luoia, ei rik ta khawp ela, a sehriet mutpuom hi a tha ta bek naw amanih kawipup rawi ati aw` ah, tiin ei inlau dawr dawr tawl ani deu tak ani hih. Utawk tur vawn dam ei hawi hang ti vel inla. Anih, fimkhurtaka a damdawi ding ngaituotu ruokchu ei la um hri naw niin an langa, ngaidan thingler bukkur ei thawa, a natna hrik, a nge`in eiin chang lem nawk ang reng bawk. I lo buoi ve ani chun inkhatpa chan chang in i thluok hmang la ngaituona siem ve rawh. Unau Israelhaiin an hnam inhmang the lost tribes zawngin an buoia identification camps thawin an Rabihai inrawina hnuoiah khawvel tukver an ngha a, Hmar nauhai, e ka ti suol, Israel hnam inhmanghai an zawng zing a nih, anin hmu kim hun chu Lalpa Pathien khawm in a nghak zing anih. Eini chu in zawng hranpa taluo ngai lovin inkeikhawm, inremkhawm hi ei thawding ani lem chau a nih. Chuleiin, Hmar nauhai hin tienlai zawlbuk order ei practise thei ta naw rau rau chun, Indian khuo`letui nina, Indian citizenship neitu in Fundamental Rights, Secularism, Freedom of Speech le zalenna dang dang aneihai hi i mimal nuomthua i kal le keihem el a theinaw ding ani leiin inhriet thiempui tuo lemin mihai an in zawng khawm lai laia lovin hnawt dawk tum ve sen khawm chu a hnawt dawktu ding khawm chu ini reng reng amanih? Hang in en chieng rawh. Hmar naua pieng ta chu zawngpa, ngaupa, negro pa inti hlak inlakhawm zawnghai ngauhai negrohai ei va ni el thei chuong si nawa, zawng amanih, ngau amanih zuk ni pawt pawt sien ti nuom hle lakhawm Hmar nau i thisen inzawmpui kha ani mawl el sia, in kap, in counter ringawt in kawngro suk chuong naw mei nih.

Tulaia Hmarnau laia buoina ding nilo, buoina burning topic a ei nei chu “Hmar Christian Fellowship dam zing rawh! Kohran hung inther ve naw ro”, ti hi ni awm tak anih. Chuleiin, Kohran le Hmar Christian Fellowship inkar thu hi buoina umah ngai nawng ei tiu a, setan an iem vel mei mei anih ti hi chieng ding a nih. Hmar nauhai lai neka Gospel Chanchintha Hqrs. hmunpui tamna unau tlangmihai lai hmu ding an um nawh, hi hi ei var lei nilo, ei thiem lei nilo, Siemtu Pathien malsawmna lei lieu lieu ani lem. Israel hnam kha lo ni ang inla chu Hmar nauhai hi a Levi chi, Mosie le Aron thla sawng peihai kha ei ni ngei ring a um a nih.

Chuleiin, Hmar Christian Fellowship le inkar thuah, tukhawmin mani kohran maksanin Hmar Christian Fellowship chau hi zawm el tang ka ti, ei ti nuom chie ding am anih?. Chu nek hman in, Fellowship memberhai popo hi mani kohran chitah kohran memberhai ei ni vawng sia, intieng inlawi hunah mani kohran tho kha eiin lawi nawkna ani hlak. Chuleiin, unau dittakhai, hrie thiemtu ni seng tum ei ta, Kohran hmalakna le a thiltumhai reng reng hi support tlat tum ei tiu. Thuthlunghluiah Lalpa hnamthlang Israel thiempuhai chun Urim le Thumim hmangin an lampui ding Lalpa an rawna, chu chu an zui hlak a. Chuongangbawkin, ei Kohran thuoituhai khawm hin an hmalakna chitah ei Lalpa Pathien hi ngunthlukin an rawnin, an tawngtaia hma an lak hlak ngei ani ti hi chieng ding anih. Chuleiin, Pathien Kohran le a hrieknalhai inzatakin thlawp tlat lem ei tiu. I Kor.12:4-5 ah chun, “Chun thilpek chu a hran hran a um a, Thlarau chu hmunkhat a nih. Rawngbawl dan hran hran khawm a uma, nisienlakhawm Lalpa chu hmunkhat a nih”. Chuong angina, Hmar nau laia ei kohran bulpuihai hi Pathien Hring Kohran @ Gospel Chanchintha Hqrs. thilpek hran hran, Lalpa hmunkhat, rawngbawl dan hran hran Lalpa hmunkhat hai an nih. Chu Kohranhai chun Christian Fellowship hi a sukdar naw a, a do ngai naw a, do nekin Hmar Christian Fellowship ban pawimawtak anni zing lem ding a nih. Ei ni Fellowship memberhai hin ei Kohranhai hieng anga ei thlawp tlat chun, Khawtlang ah, Fellowship ah inremtak le lungruoltakin kal pen tlang thei ngei ei tih. Chuongang ding chun Fellowship hotuhai le Kohran thuoituhai hi lungril lientak putin kengrawn hle tum ei tiu. Ni dang khan Hmar Felowship a hin UPC, Roman Catholic hai khawm kha an in lenga, tu ruok hin chu annin leng ve ta naw tlat a nih. A hrana Biekin an kai khawmin ei theida chuong nawh.

Hieng anga ei thawa, eiin thlawp tlat chun iengtik lai khawm Hmar Christian Fellowship hi bo naw nia, a hring zing ding a nih. Kohran chu a mit a vara, a chin alien, hmun kilkhawr ami chen khawm a hmufuk thei pei hlak a nih. Chu chu ei Fellowshiphai ta dinga outreach rawngbawlna suk zau tu opportunity thatak ani lem anih. Pathien Hring Kohranhai hmalakna hi thlawp tlat lem ei tiu! Hnam damna ding le Gospel Chanchintha indarlien peina dingin Damna tui - Hringna tui, damdawi thatak ning a tih. Chuongchun, Hmar Christian Fellowship hi dam zing ata, vul zing a tih. Zawng nilovin Hmar naua Pathienin ami siem ta sahai ei ni leiin le Kohran memberhai eini vawng leiin Hmar Christian Fellowship Damzing Raw Seh, AMEN.

(*Dec 5/12/2013, Pillangkatta,Guwahati-29)