Hmar Christian Fellowship Damzing Raw Se

Ziektu: Pu L.K. Varte, Guwahati

Ang hle sienkhawm zawng chu zawng ana, mihriem ani thei chuong nawh. Mihriem chu mihriema pieng ani leiin mihriem ani ela, i pieng ta rau rau chun mihriem Man ini tho thoa vantirko chu ini ta naw phawt chu a nih, lungngai naw rawh. Hmar nau ini phawt chun dum inkhal ngawk lakhawm, ngo dawng duok lakhawm Negro amanih, Sap Mingo chu ini naw phawt a nih. Ka pansakpa in amanih, ka panthlangpa in zawngah ami ti leia zawng monkey ka zuk ni el dan chu a um naw a, ka dang lam chuong bawk nawh. Hmar ka ni leiin Hmar ka nia, a definition dang a um nawh.

Chuongang bawkin Hmar Welfare chu Hmar Welfare ana, Hmar nauhai ei welfarena dinga eiin din hlak chu ania, unau hnam danghai ruokchu hi Hmar hming bika welfare program hin a huomsa naw a. Chuongang bawkin Hmar Inpui chu Hmarnauhai Inpui Hmar Supreme House anih. Chu Hmar Welfare le Hmar Inpui chun a huop sunga hmar-nauhai hrim hrim zuk hnar el thei dan a um nawh. Hmar ka ni sia, a huong sungah ka um a ni bawk si chun a member ni dingin Natural Right ka nei ve anih. Hotu pakhatin ini nawh, a ti leia zuk ni naw el thei an nawh. Mihriem chu zawng ani thei bawk si naw a, Hmar chu Negro or Sap Mingo ani thei ta si naw a. Chuleiin, hotu, hmathuoitu chun lungril lientak le thienghlim, demkai lovin a unauhai chu a remkhawm lem ding ana, ruollaia tlathlalo mainstream a la umlohai hmusuok tumin mi bengvar deuhai leh Lalpa Beram sawmkuo pakuohai chu ti hla kha an sak lem ding anih. Lalpa hnamthlang Israelhai hi enta u!, vawisun chen hin anni laia hnam inhmanghai kha zawngin, identification camp thawin an Rabi haiin khawvel an dap zing an naw am anih?.

Hmar nauhai ei chanchin sui kirin kum 1910 hma po khan chu Rom 1:18-32 a Jentelhai suolna turu popo kha eiin hnelna ani ve a, khawvel A AW B a innghatin tui-sam po, thingbul lungbul danglam po bie`in an inthawina hrietnaw pathien kuomah anin hlan hlak kha ana, mawlna rama Jentel suolna turu khan mi hem kuolin ei chungah ro arel hlak anih. Kohran khawm ala um chuong naw leiin chu pawl kha pawl ti ding ala um bawk nawh. Hnam kau penghai le family hran hran chu lo um ngei an tih. An Fellowship ni awma inlang chu kumthat kum a Sikpui Ruoi an hmang hlak hi ala nil awm ie!. Tulai khawm, ei hriet ang tawk tawkin pilepu nun kha sukhring tumin ei hriet phak tawk tawka eila sun zawm pei anih; an hawi thei der der si a. Ti tak takah, ei pilepuhai khan iengti ang charin am anlo hmang hlak ding chu aw!.

Amiruokchu, vangnei thlak takin kum 1910 a inthawk khan vawisunna ei buoipui luoi luoi Gospel Chanchintha hin Hmar nauhai ami hung envar tanna, hung indar lien peiin kum 103 zet ei lo chuongkai nawk an ta a. Kristien ei hung ni tan dan le, chanchintha rawngbawlna a hung indar lien pei dan hrietu le ziek thiem ei tam em em, Debate in tawpni ala rel nawh. Chanchintha sukdarna rawngbawlna a lien zuol pei beisei nahai leiin simtieng, hmartieng, sak le thlang ngha velin Krista hminga Kohranhai a hung mawng tuk tuka Hmar nauhai lai Gospel Chanchintha Hqrs. ei tiem chun kutparin a dei ta naw tieng a hung ni tah. Pathien ropui raw seh.

Hieng ani tak lei hin North East Hill Tribes hai laia hin a thiempu chi, a Levi chi ni awmtak ei nih, ei unauhai enin ei danglam bik rieu anih, biekbuk indina, thiempu rawngbawlna sin thaw hi ei talent bik rieu niin an lang anih. Ei tha bik tina ruokchu ani naw khawp el. Chuleiin,a thlarau mi am, ei ni naw am, mani khuo le veng or ei umhmun khuorna chit ah Pathien Hring Kohran @ Gospel Chanchintha Hqrs. hai ei tum tawk ang peia ei neihai hi nghettakin chel seng thang a tih. Ei hung inthanglien peia, Pathien zarin 1980-85 vela inthawk khan New Delhi hmunah sin lairawl chel dingin ei hung baw tana, khawpui danghaia khawm hung tlalut tan in, inpawl khawm khawp ruoltha ei hang um tan pei ta a nih. Biekin kai mi, Pathienthu bova umtheilohai eina, Kohran tum tuma inthawka hung hlak niin lakhawm Thuring hmunkhat, Ringna hmunkhathai eini leiin Pathienthu leia inpawl khawmna platform ei zawng ruoi el an tah. Ka hriet suol naw chun Vikaspuri Worship Service, New Delhi 1985 a kan indin kha Hmar nauhai hmalakna a Gospel Fellowship hmasatak ala ni el naw dim ani aw?.

Hun hung fe peiin khawpui lien le chin haiah sin a chin a lien ti lovin Government Departments, NGOs, Private Companies, Business Firms ei hung baw tan ve ta a, inchuklaihai khawpui lien le chinhai ei hluo kim ve deu thaw an tah. A suol le a tha, a var le a thiem, an vet deu le mawl em em, thlemsam vaihai ang deua mitamna tieng tieng luongthli mutkur ang ela kur duol duol khawm ei bo ta nawh. A tha ve hrim hrim anih, Pathien ropui raw se. Kristien sungkuohai ei ni leiin, khuopui chin le lienhaia tlathlahai Pathien bieka inkhawm tlang nuomna leiin tu kohran, kha kohran ti lovin Hmar nau, kristien ni bawk, ringna hmunkhat ei nina in Hmar Christian Fellowship a min dintir hlaka, a memberhai ruokchu permanent tak tak ruokchu ei tlawma, eiin kapupchaw zut zut zing hlak a nih. Chuleiin, Hmar Christian Fellowship hi a damna ding mawl hi ngaituong ei tiu.

Hieng ang hin a tam a tlawm hril lovin Hmar Christian Fellowship in eiin khai luoi luoia, ei rik ta khawp ela, a sehriet mutpuom hi a tha ta bek naw amanih kawipup rawi ati aw` ah, tiin ei inlau dawr dawr tawl ani deu tak ani hih. Utawk tur vawn dam ei hawi hang ti vel inla. Anih, fimkhurtaka a damdawi ding ngaituotu ruokchu ei la um hri naw niin an langa, ngaidan thingler bukkur ei thawa, a natna hrik, a nge`in eiin chang lem nawk ang reng bawk. I lo buoi ve ani chun inkhatpa chan chang in i thluok hmang la ngaituona siem ve rawh. Unau Israelhaiin an hnam inhmang the lost tribes zawngin an buoia identification camps thawin an Rabihai inrawina hnuoiah khawvel tukver an ngha a, Hmar nauhai, e ka ti suol, Israel hnam inhmanghai an zawng zing a nih, anin hmu kim hun chu Lalpa Pathien khawm in a nghak zing anih. Eini chu in zawng hranpa taluo ngai lovin inkeikhawm, inremkhawm hi ei thawding ani lem chau a nih. Chuleiin, Hmar nauhai hin tienlai zawlbuk order ei practise thei ta naw rau rau chun, Indian khuo`letui nina, Indian citizenship neitu in Fundamental Rights, Secularism, Freedom of Speech le zalenna dang dang aneihai hi i mimal nuomthua i kal le keihem el a theinaw ding ani leiin inhriet thiempui tuo lemin mihai an in zawng khawm lai laia lovin hnawt dawk tum ve sen khawm chu a hnawt dawktu ding khawm chu ini reng reng amanih? Hang in en chieng rawh. Hmar naua pieng ta chu zawngpa, ngaupa, negro pa inti hlak inlakhawm zawnghai ngauhai negrohai ei va ni el thei chuong si nawa, zawng amanih, ngau amanih zuk ni pawt pawt sien ti nuom hle lakhawm Hmar nau i thisen inzawmpui kha ani mawl el sia, in kap, in counter ringawt in kawngro suk chuong naw mei nih.

Tulaia Hmarnau laia buoina ding nilo, buoina burning topic a ei nei chu “Hmar Christian Fellowship dam zing rawh! Kohran hung inther ve naw ro”, ti hi ni awm tak anih. Chuleiin, Kohran le Hmar Christian Fellowship inkar thu hi buoina umah ngai nawng ei tiu a, setan an iem vel mei mei anih ti hi chieng ding a nih. Hmar nauhai lai neka Gospel Chanchintha Hqrs. hmunpui tamna unau tlangmihai lai hmu ding an um nawh, hi hi ei var lei nilo, ei thiem lei nilo, Siemtu Pathien malsawmna lei lieu lieu ani lem. Israel hnam kha lo ni ang inla chu Hmar nauhai hi a Levi chi, Mosie le Aron thla sawng peihai kha ei ni ngei ring a um a nih.

Chuleiin, Hmar Christian Fellowship le inkar thuah, tukhawmin mani kohran maksanin Hmar Christian Fellowship chau hi zawm el tang ka ti, ei ti nuom chie ding am anih?. Chu nek hman in, Fellowship memberhai popo hi mani kohran chitah kohran memberhai ei ni vawng sia, intieng inlawi hunah mani kohran tho kha eiin lawi nawkna ani hlak. Chuleiin, unau dittakhai, hrie thiemtu ni seng tum ei ta, Kohran hmalakna le a thiltumhai reng reng hi support tlat tum ei tiu. Thuthlunghluiah Lalpa hnamthlang Israel thiempuhai chun Urim le Thumim hmangin an lampui ding Lalpa an rawna, chu chu an zui hlak a. Chuongangbawkin, ei Kohran thuoituhai khawm hin an hmalakna chitah ei Lalpa Pathien hi ngunthlukin an rawnin, an tawngtaia hma an lak hlak ngei ani ti hi chieng ding anih. Chuleiin, Pathien Kohran le a hrieknalhai inzatakin thlawp tlat lem ei tiu. I Kor.12:4-5 ah chun, “Chun thilpek chu a hran hran a um a, Thlarau chu hmunkhat a nih. Rawngbawl dan hran hran khawm a uma, nisienlakhawm Lalpa chu hmunkhat a nih”. Chuong angina, Hmar nau laia ei kohran bulpuihai hi Pathien Hring Kohran @ Gospel Chanchintha Hqrs. thilpek hran hran, Lalpa hmunkhat, rawngbawl dan hran hran Lalpa hmunkhat hai an nih. Chu Kohranhai chun Christian Fellowship hi a sukdar naw a, a do ngai naw a, do nekin Hmar Christian Fellowship ban pawimawtak anni zing lem ding a nih. Ei ni Fellowship memberhai hin ei Kohranhai hieng anga ei thlawp tlat chun, Khawtlang ah, Fellowship ah inremtak le lungruoltakin kal pen tlang thei ngei ei tih. Chuongang ding chun Fellowship hotuhai le Kohran thuoituhai hi lungril lientak putin kengrawn hle tum ei tiu. Ni dang khan Hmar Felowship a hin UPC, Roman Catholic hai khawm kha an in lenga, tu ruok hin chu annin leng ve ta naw tlat a nih. A hrana Biekin an kai khawmin ei theida chuong nawh.

Hieng anga ei thawa, eiin thlawp tlat chun iengtik lai khawm Hmar Christian Fellowship hi bo naw nia, a hring zing ding a nih. Kohran chu a mit a vara, a chin alien, hmun kilkhawr ami chen khawm a hmufuk thei pei hlak a nih. Chu chu ei Fellowshiphai ta dinga outreach rawngbawlna suk zau tu opportunity thatak ani lem anih. Pathien Hring Kohranhai hmalakna hi thlawp tlat lem ei tiu! Hnam damna ding le Gospel Chanchintha indarlien peina dingin Damna tui - Hringna tui, damdawi thatak ning a tih. Chuongchun, Hmar Christian Fellowship hi dam zing ata, vul zing a tih. Zawng nilovin Hmar naua Pathienin ami siem ta sahai ei ni leiin le Kohran memberhai eini vawng leiin Hmar Christian Fellowship Damzing Raw Seh, AMEN.

(*Dec 5/12/2013, Pillangkatta,Guwahati-29)