Sinin, Hrilin, Sanin, Thuoiin, Serve the Nation

By Remruata Varte, Editor ZOlife (Speech for 53rd HSA General Assembly Sinlung, Sakawrdai. 10/12/2011)

Pu Chairman, HSA hruaitu zahawm tak takte leh HSA General Assembly vawi 53-na lokal zawng zawngte a hmasa-in chibai ka buk a che u.

He chanvo duhawm tak thusawina hun leh Special Guest atana min ruat ve avangin HSA hruaitute chungah lawmthu ka sawi tak meuh meuh a ni.Kan hriat heuh angin kan mi hmasa leh mi hahnem ngai te’n HSA hi kum 1939 ah Imphal, Manipurah an lo din a. Hetih hunlai hian Mizo Zirlai Pawl (MZP) pawh kum 4 leka upa a ni, kan mi hmasate’n hmathlir an lo neih thui dan han en hian an ngaihsanawm tak zet a ni. Vawiina HSA hmalaknate leh a han chhoh dante hi han hmu ve se chuan an lawm ve ngei ka ring a ni.

HSA hian pawl kalphung leh tih tur a nei a, chu thil tum chu kan hriat heuh angin ‘Sinin, Hrilin, Sanin, Thuoiin, Serve the Nation,’ tih a ni a, ram leh hnam tan hna kan thawk ang a, hnam tana thil ha chu kan tlangaupui ang a, anpui ngaite anpui zelin ram leh hnam tan hmahruaitu kan ni tur a ni tih hi he pawl ropui takin a thil tum bul ber chu a ni a, vawiinah pawh he thil tum hi hrerengin kan hruaitute’n hah pawh sawi lovin ram leh hnam tan an thawk mek a, an fakawm tak zet a ni.

Kumin General Assembly hi a bik takin keini Hmar hnam tan chuan a pawimawh hle a, Sinlung Headquarter Sakawrdai anih mai bakah kan bul lawk Ruonglevaisuo, tuna vai hming an put tir tak Tipaimukh khu kan pi leh puten kan chhuahna bul pui, zo hnam hrang hrangte lo awmkhawmna hmasa a ni a. A bik takin kan pi leh pute chuan he hmun hi kan Sinlung pahnihna a ni a, kan Jerusalem, Indian hoin Harappa leh Mohenjodaro an tih ang hial a ni.

Ruonglevaisuo hi a hming awm chhan chu kan hriat angin Tuiruang (Barak River) leh Tuivai inluanfinna a nih avangin a hming hi kan pi pute khan fel takin an lo phuah a. Tuiruang hi pipute thawnthu-a dawithiam hmingthang Lalruanga hming chawia sak a ni a, hetilai ram vel hi Lalruanga’n a dawi hmanga hna a lo thawhna hmun a ni a, chuvangin Tipaimukh hi kan hnam tan chuan hmun pawimawh tawp khawk a ni.

British hoin Lusei lalte a run hmasak, The Lushai Expedition keini in Vai lian kan tih kum 1871, December ni 9 khan Tipaimukh hi Cachar lam aanga rawn lutin indo bul an nan an rawn hmang a. A ram hausakna leh phai nena indawrtawnna atan a hat zia sap ho hian an hre chiang hle a, kum 1873 khan Tipaimukh Bazar an lo hawng fel der tawh a ni.

Amaherawhchu tun dinhmuna Tipaimukh awm dan chu kan hnam tan ah leh ha hialna a ni a, sawkarin sa ah chhuak pek taka min pek Sinlung Council pawh Tipaimukh ang maia sawisak nasat a ni. Hmasang aangin Tipaimukh hausakna hi sap ho leh vaiho ten an duh an makin an rawk a, hreipuia cheh vawi engzatnge he tlangdung hian a lo paltlang tawh le? Chutiang bawkin kan martarten an nun an lo hlanna, Sinlung Council hi a duh apiang leh a thei apiangin an sawp ve mai bawk a ni lawm ni? Keini HSA memberte hian i ngaihtuah chiang ang u.

Kan ram dinhmun ngaihtuaha kan rilru kan inpek a ngai tak zet ta. Mite anga nuam tawl leh sum leh pai inchuh ringawtin kan awm ve thei ta lo, vawiinah hian kan ram a him lo a, kan hnam a dam lo a ni. Tunah pawh Tipaimukh Dam siam tumin India sawrkar chuan hma a la leh ta vut vut mai le. He development hming chawi hian kan hnam ralna min thlen dawn a ni. He tuikhuah hian kan unaute, kan chhungte awmna a chim pil anga, kan pi leh pute’n ka ram ka ram an tih hin kha India sawrkar chuan min tihbo sak dawn a ni. Tipaimukh tlangdung kan thlir anga, hangtharte an la ap hin ang, khu khu kan chhuahna kan Sinlung pahnihna a ni asin, mahse a tak hmuh tur a awm tawh lo ang a, tuikhuahin a chim po ringawt tawh ang. India sawrkar chuan kan pi leh pute sulhnu leh kan hnam a ngaihtuah ber lo, engtinnge sawrkar sum kan siam ang a, ram hausakna kan hai chhuah ang tih chiah an rilru a lo awm chu a ni. Tuikhuah thawm riva a lo awm a, Aizawl pa fing ho chuan kan kawtkaiah tuikhuah chim tur chin hre sa vekin in hmun lo ram an rawn lei ta sung sung mai le. Tuikhuah hi lo awm ta tehreng pawh nise, zangnadawmna (Compensation) dawngtu chu keimahni ni lo, a ram neitu pawh ni lo, Aizawl pa hausate an ni leh dawn. Keini zingah pawh compensation an hmuh zat tur lo ngaihtuah lawk a, zantin mai an thil lei tur lo hisap lawk te pawh kan awm tawh ania, a rapthlak a, a zahthlak bawk a ni!!!

Vawiina HSA member kalkhawmte hian i ngaihtuah chiang ang u. Tuna kan neih chhun Sinlung Council a ramri chhungah vawiina lokal khawmte hi kan awm vek lo mai thei a, mahse kan zavaia ta a ni. Mi tam tak thawnthu chanve hria ten Hmar ho chu Mizo ah an in chhiar lo an ti hin , kei chuan khin thamah ka ruat lo a, hnamah an mit a la keu lo a ni tih kan hriat a ul. Kan duh emaw duh lo emaw zofa kan ni reng, Sinlung chhuak kan ni tawh sa, Sinlung fa Hmar bai thak ngam kan ni mai. Engvanginnge Sinlung Council hi an helh viau le, he council chiah hi Mizoramah pawh hnampual hming ni lo a Council awm chhun a ni. Keini zofate zawng zawng huap hming chawi Sinlung kan ti a, ‘Sin’ tih aiah Chhinlung a ni leh mai a, kan hruaitute kha an lo fing hle mai ka ti hin. He council hi development he tlangdunga a lo awm ve na tura kan uten an lo sual chhuah a ni, intihhranna a ni lo tih hi kan hrereng tur a ni.

Kum 1946 a Mizo union inhmuhkhawm, Hmarkhawlien ah khan zofate tana thu pawimawh ber mai Greater Mizoram an lo khel tawh a. He thlipui hi a bik takin Manipur Hmar bialah chuan a tla na hle mai a, Meitei sikul zawng zawngah Manipur subject an zir duh lo a, Manipur sawrkar kha an thawhpui ha duh lo a. Sawrkar leh Assam Rifle ten man khawmin jailah an khung pawhin lungawi takin an awm a, jail chhungah pawh ‘Mizo chaw lo chu ka ei duh lo’ tiin kan ram thar tur chu an lo lunglen a ni. Chutih laia an hlasak lar em em chu:

“State thuneihna bo a ta, Mizo sawrkar la ngir a tih; Lenruol dit ei chi ei hnamhai leh, Sappui nun ngai lova ei lengna ding.” tiin nula tlangval nu leh pa an lam dual dual mai hin a ni.

Hemi avang hian Manipur Lal ber P.B.Singh chuan “ "Mizo Union tawp san ula, nangmahni pualin District Council ka pe ang che u. A ramri tur pawh a fel sa vek, Tuizang atangin Jiribam thleng a ni ang," tiin a thlem a, mahse Mizo Union hruaituten an lo rem tih loh avangin he duhthlanna duhawm tak hi an lo hnawl a. Vawiinah hian kha Council kha lo nei ta ila chuan kan ram han zauh tur zia leh changkanna lamah pawh khita awm ve tawh tur kan ni a, tunah chuan khang ram tam takte kha Manipur leh Assam ten min ta neih sak a, mi hnuaiah bawk kan kun leh ta a ni.

Tunhma-a thil thleng ka’n sawi lanna chhan ber chu keini hangtharte hian enge kan hmabaka tih tur awm hi kan hre tur a ni. Zirlai kan nih chuan kan hnam tan tiin tumruhna leh taimakna nen lehkha kan zir tur a ni. Kan thiltihna apiangah ram aiin hnam kan dah pawimawh ber tur a ni. Ram kan tih hi chu engtiklai pawhin a danglam thei a, khawvel boundary pawh siam hat a ni reng a, India ram boundary pawh siam hat zel a ni. Hnam erawh chu a inthlak ve thei lo a, thisen boundary chu tih sawn theih a ni lo. Hnam ang pawhin kan inhmu chhuak thar zel a, kan unau tam takte pawh Naga hnamah te min luhsan tak hi, hengte hi i ngaihtuah chiang ang u, a lungchhiat thlak a ni.

A tawp berah chuan kan politics chiri lutuk hi keini halai rualte hian siam hat i tum ang u. HPC hminga thuchhuah siam mai theite hi kan tam lutuk, mipuite min ti chi ai a, chumi pawl tih fo mai hi bansanin huangkhatah kan hnam tan i thawk ho ang u. Chumi atan mi pawimawh ber chu keini halai rualte hi kan ni. Hei kan bialtu zahawm tak Pu R.L.Pianmawia pawh hi a sapawng takin ‘son of the soil’ a ni a, bialchhung mi ngei mai MLA hi kan neih zel hi ka beisei a ni. Hemi ka sawilanna chhan chu Politicsah pawh mikhual kuta kan awm rei lutuk avangin kan changkang ve thei lo a, kan ram kan hnam enkawl chu keimahni kutah a awm zel tur a ni. Sinlung area ani emaw, khawi hmun pawh ni rawh se, Sinlung naufa anih phawt chuan politics-ah pawh rawn zuang lut rawh se, a rem vek. Amaherawhchu pawn lam mi ai chuan a chhunga chengte’n kan hre chiang zawk a, keimahni enkawl tur a ni tih hi i hrereng ang u.

Awle, a tawp berah chuan HSA member Mizoram chhung mai pawh ni lo state hrang hrang aanga lokal khawmte hian he inkhawmpui zawh aang hian enge kan hnam tan kan tih ang tiin kan ngaihtuahna i seng ang u. HSA thupui ‘Sinin, Hrilin, Sanin, Thuoiin, Serve the Nation,’ tih hi kan thinlungah riak reng se, vawikhat dam manah kan hnam tan, zo hnam tan kan tha leh tui ui lovin i seng zel ang u.

HSA dam reng rawh se.