By L.Keivom, Inpui Columnist
‘Pahaiin grep thur an fà k a,
An nauhai hà a trim.
-Judahai thuvar (Jer 31:29; Ezek 18:2)
November 17, 2010 Nilaini kha sorkar chawl a ni thu kamding pakhatin a mi hril a. Chu chu remchanga lain January 8, 2011-a kan mo nei dinga iengkim ruohmangtu ding mi fel le rem hre mi iemani zat kan ruothai chu hmun laili deua inhmu khawm ka rot a. Ieng chawl am a ni thu ka’n don leh a hriet naw a. Mizoram sorkar 2010 kalendar ka en leh Muslimhai ni poimaw Idd –ul-Adha/Zuha (Bakrid) a lo ni zing a. Kum sawmthum lai liem taa kan khawsakna Jeddah (Saudi Arabia) a kan in hluo neitupa le ka ruolpa Ahmed Abu-Dohair le hieng ang huna that ding beram tuoi inchaw dinga Makka panna lampui sira ran huong lien tak ela kan fe lai dam le kan kompaun-a an thaw dan anga a ring at lai le a sung phor a, a thin lum hlieng el at thla a, a beng mol mol lai dam chu mitthlaah a hung inlang a, lung hlui in hnung a kei tho a, khuo a sawt vong vong chu tie! Ran that hlim hlol thin, a la lum hlat laia a sela fak hi thil inhnik tawpkhawka anni rawi hril laia pakhat a nih. An turù khop el.
Muslimhai hin Kût pahnih inang deu el an nei a, chu chu Idd-ul-Fitr (Smaller Festival) le Idd-ul-Adha/Zuha (Greater Festival) an tih. A hmasa hi thla khat sung sunah bu an nghei zoa ni thum sung lawmna ruoi an thre hlak chu a nih. Bu nghei thla hi Ramadan (Ramzan) an ti a, hi sung hin ni suoka inthoka a tlâk chenin ieng khom an bauah a lût ding a ni nawh. A fîr zuolhai lem chun chil takngiel khom an lem nuom nawh. Damnaw le naupanghai ruok chun an nghei ve a trul nawh. An ram thienghlim tak Saudi Arabia-a kum thum le a chenve zet kan um sunga a tak taka an hmang dan tlangpui kan hmu ve ruok chu zankhawvar fak le dawn chèn le sunnithlaka in le chawl hadam a nih. Sùn hi zà nah, zà n hi sùnah an inlet a ni tak. Bu nghei thla e ti lo chun, hi thla hi fiemthua ‘thau thla’ ti pawl khom an um. Ni tlak hnunga trongtrai nuhnung tak an zoin zanbu an fak a, chu zoah an leng suok tran a, zing dar hni chen dawr an hong leiin zan tin hi bazarpui zanin an inchangtir a, khawnvartuia inthoka an hmu sum hmang seng lo ti hiel khop an nei lai a ni bok a, inhoi an ti kher el. Zing dar li velah bu an fak treu a, sunnithlak deuthaw an zal a, sin an thaw mumal nawh. Hi thla hin nun thienghlim taka hmang a, hawp le hmuom insûm a, trongtraia Pathien leh inpawl a, nun nêm le tuor thei inchûk a, thilpêka nasa taka inhmang dingin an inchuktir a nih.
Ramadan thla tawpa inthoka tiema ni sawmsari (thla hni le ni sawm) hnungah an sakhuo le a hmusuoktu zawlnei Muhammad piengna Makka-ah a fe thei taphot biekzinin* (pilgrimage) an fe hlak a, chu chu ‘Haj’ an tih. Biekzina fe hi thangsuona anga an ngai a ni leiin Muslim taphotin dam sunga voi khat bêk Makka-a biekzina fe chu an thil beisei le tum a nih. A fe theihai chun an in kotkhar bieng amanih le an incheina thuom chenah ‘Haji’ ti an târ ngat hlak. Biekzina an fe phaa ni nga sunga an thaw tak chu an thlatua an ngai Adam le Evi hai, Abraham le a nuhmei Hagar le an naulutir Ismael sulhnung sui le an thaw dan insîr amanih inchang nih. Hi taka hin ei thupui ‘histawri inphîr’ hin bu a khuor a, chu chanchin chu a tlângpui chauh thuol malama eini laia kohran histawri inphîrin ei khawvel a nghong dan le kà khawk dan tlawmte hril sa ei tum a nih.
Sari Vs Hagar
Genesis 16 ei tiem chun Sari chu a tar ta si, nau a nei el bok si naw leiin nuhmei mizie-a a holholna hri a suok a, a pasal Abraham a bekbor a. Tu laia nupui tebop ruol trongkam hi hmang sien la lem chu, ka ‘lalpa’ ti tah nêk nèkin “Bhai, i hriet? Kei hlak chu hieng hi ka la ni zing si a, ka rawinu hin nau a mi neipek takduoiin i truk el ding? I hriet am, Bhai” a ti ngei ring a um. Hagar hlak chu Faraw lal ina lalnu enkol le vil vêltu dinga thlang ngat, hmêl liminlo le zeizel tak a ni leiin Abraham khomin invak suorin Sari thu rot chu a lo pom a, kum 86 a niin a naulutir Ismael chu a hung pieng tah a nih. Nau a pai chara inthokin sùl hnienghnar Hagar hlak chun sùl thlaler, a pi Sari chu a hmusit tran a, an tuolthu a se nghal a, a piin nasa taka a sukrimsik leiin Hagar chu thlalerah a tlan hmang a, sienkhom Pathienin a vantirko hmangin a hum tlat a. Ismael chu kum 13-mi a niin a pa Abraham leh Pathien sertan thuthlung zawma ser an tan thuin Genesis bung 17 pum hlum a hluo a nih. Hienghai pafa thilthaw hi a poimaw hle a nih ti inhmai ruol a ni nawh.
Sari innui
Abraham le a naulutir Ismaelin sertan thuthlung an sukdika inthoka kum khat hnungah mikhuol pathumin Abraham an hung kan a, a nuhmei Sari-in naupa a la nei ding thu an hung hril a. Arûka puon ina inthoka an titi lo ngaithla kartu Sari chu a lo innui a. Lawm taluo, sienkhom ringhla deuh bok sia a’n nui lei chun Pathienin a suosal a, “Ka’n nui nawh” tiin a thrang a, “I’n nui ngei kha teh” tiin a kawk ti ei hmuh (Gen 18:13-15).
Chîk nawk zuola ei ngaituo chun, Sari ngeiin a’n nui naw thu a hril hin thu thrieng iemani zat a pai khom a ni el thei. A lo pé tet chauh khom a ni el thei bok. An naw leh ama lo hmusittuhai khah, “In mi hmusit vei maw! Chaw tak ro” tia deusaw a, archal an insuol changa a hrât lemin a tlawm lem a khuong khum anga a zuk nuisawna le nuiêuna dam, ‘A tawpa chu zângkhuo a bungbu ding a ni tah” tia a zuk nuisanna dam khom a ni el thei bok. Hi truma Sari innui hin thil ieng zat hiel am a fûn ti lungril tieng sui mi psychoanalyst-haiin chîk takin sui hai sien ngainuomum ngot a tih. Hi hi histawri-a nuhmei innui ziek ngeia rikawt um hmasa tak a ni hrim a, a poimaw hle chu ning a tih. Hla To a Skylark a P.B.Shelley-in,
Our sincerest laughter
With some pain is fraught;
Our sweetest songs are those that tell of saddest thought.
Ei hlim innui rihai chun,
Luoithli tuitling an pà i rùk a,
Ei kùrinkukpui zaihlahai khom hi,
Lungkham hrilna biethu an nih
a lo ti ang khan, Sari innuia hin hlimna, lawmna, maktina, ringhlà na, awmti-nawna, iniemna, phubalakna, innuisawna le thil dang tam tak an luong khawm a nih. Sari thu rotin Abraham insunga buoina nasa tak a chok suok khah a la hung sosang pei ding a nizie hriltu chu Sari innui hi a nih. Thisen insuona ding ‘biethu’ a pai rawn hle.
Genesis ei tiem pei chun bung 21-ah ‘thuthlung nau’ Isak hung pieng thu le Sari ngeiin, “Pathienin a mi suknui a, hi thu hre taphot chun mi’n nuipui veng an tih” a ti hiel thu ei hmu bakah nene nêk a bansan ding truma Ismael-in Isak a nuisaw leia Sari inhrawt thu dam, Hagar le a naupa chu hnot suok dinga Abraham a nor leia bufun le tuium leh chauh an nufaa Beersheba thlalera a hnot suok thu dam, Pathien vantirkoin hung kan a, tui um nawna thlalerah an dawn ding tui a hung inchik suoktir thu dam, Paran thlalera an um laia Ismael-in Aigupta mi nuhmeia a nei thu dam; bung 25-a chun Abraham thi truma Ismael le Isak-in Makpela Puka an vui liem thu le kum 137 a nia Ismael thi thu le nau pasal 12 a nei thu le a thlahai chu Aigupta le Suria le a sè vel ramah inzâr dar a, “an unauhai po po leh intai zing zingin an khawsa a” (25:18) ti ei hmu a, chu chu Baibula Ismael le a thlahai chanchin a lam tawpna a nih.
Histawri inphîr
Sari innui nia inthoka Abraham sungkaw inzomna hung chat hi phuor khawm ruol loin phel hniin a hung inphel phok a. Phel khat chu Abraham nau lutir Ismael le a nu Hagar le an thla pei Arab-hai hluo chu a nih. Anni hin kum 610 AD hnung khan an zawlnei Muhammad inchuktirna Islam sakhuo chu zuiin ram an lak duoi duoi a, Arab ram hrang hrang 18 bakah an sakhuo zuitu an pung tuol tuol a, khawvela sakhuo inthrang hrât tak le a betuhai chengna taphot deuthaw chu ram buoia ngai thei khopa Genesis 25:18-a an chanchin ziektu Mosien a bawkna hi sukdik pei dinga ramtrang ni hielin an inlang. Chuong an hmelma dohai laia an hmelmak dan da thei thrak lo chu Sari innuinaa inthoka hung suok Isak le a thla pei hai chu an nih. Anni hin a hnungin Israel hming putin, chu hnungah Juda hnam ti hung put sa bokin Abraham sungkuoa phel khing an hluo a, a ziding nina changtua inngai tlat an nih. Chu chu naulutir Ismael le a thlahai chun an pom thei si naw leiin, Abraham thralbea suok ve ve, hnam le sakhuo trobul intrawm ni hai sien khom ui le kel anga thlung kop thei dèr lo an nih.
Chuleiin, Ismael thlahaiin an hnam le an sakhaw trobul an sui pha leh Abraham le a hmei Hagar le an naupa Ismael chanchinah an lut a, anni huongah upa lem le ziding lem nina an hui lut tlat a nih. Anni hril dan chun, Hagar le a naupa Ismael kha Beersheba thlalerah ni loin, tu chena Muslimhai ‘Pathien In’ (Kaabah) ngirna, Makka khawzawla invakvai an ni lem. Jerusalem Tempul tieng nghaa Judahai an trongtrai hlak ang khan, in Muslim taphot chun Makkaa an ‘Pathien In’ (Kaabah) tieng nghain an trongtrai hlak. Hi biekbuk hmasa tak hi, tuta a ngirna hmun ngeia Abraham le a naupa Ismael-in an bawl niin an hril bok.
An hril pei dan chun, Eden huona inthoka Adam le Evi hnotsuoka an um khan thla iemani zat ram palailengah an inhmang tuo a. A tawpah Makka bul Arafat phairuomah an inhmu a. Mihriem po po chunga Pathien Rorelna Ni (Day of Judgement) la um dinga hril khom hi Israelhaiin Jerusalem bula Jehosafat Kawna um dinga an hril hlak hi Muslimhai chun Arafat phairuoma ngei hin ni lem dingin an hril.
Arafat phairuoma inthok hin Adam le Evi chu Makka panin an hung a, Muzdalifah an ti hmunah zan khat an riek a. Makka an tlung chun thil mak tak el a hung tlung a. Eden huona an bawsietna khah ngaidam a ni tah ti hrilna dingin Pathienin vana inthokin lung dum (black stone) a hung thlak a. Hi lung hi scientist-hai chun arasi koi dar hlek hung tla niin an ring. Inchi riet vela lien, dum tle sêt el, mam ém èm el a nih. Tu chen hin hi lung hi a la um zing. An hril pei dan chun, Adam chu kum 930 a niin Makka-ah a thi a, chutaka chun an phum a. Evi ruok chu Tuipui Sen kama um Jeddah-ah a thi a. Kum 1980-83 a Jeddah-a kan um lai a thlan ni dinga an hril, Foreign Office bul ela lung banga inhuon chu kan Embassy hnaia um a ni leiin voi tam ka fe pel tah hlak. Anni chun ‘Jeddah’ ti khom hi Evi hming chawia phuok, eini trongin ‘Pi’, Saptrongin ‘Grandmother’ tina a nih, an tih.
Histawri inphîr a suok tah laklaw chun thu inpawthuoin a tuom sip naw thei nawh. A hmaa ei hril tah ang khan, Muslimhai hril dan chun, Hagar le Ismael hai nufa hnot suoka an umna kha Beersheba thlaler ni loin Makka phairuom a ni daih. Chutaka Safa muol le Marwah muol, yard 440 inkara chun Hagarin a naupa Ismael, dangchara thi el ding chu en ngam loin, trapin voi sari zet a tlân inlon a. A beidong trap ri chu Pathienin a hriet a, vantirko Gabriel a tir thlak a, hnuoi chà rah lunginsietna tui a hung inchik suoktir a, Hagar le a naupa Ismael chun an dawn a, an dampui tah a nih. Hi tui hi ‘Zamzam Tuikul’ an ti a, Makka hmun thienghlim, Kaabah an bawlna sunga um, kang ngai lo a nih. Jeddah-a kan um lai chun biekzina fehaiin hi tui thienghlima an ngai hi an mi hung hawnpek hlak a. Kristienhaiin Jordan tui an ngainat neka nasain Muslimhai chun an ngaina a, India rama inthoka hung khuolzinhai kan inhawntir hlak a, an hlut thei hle.
Hi Zamzam Tui, hnuoi rila luong pei hin Jerusalem Tempul muola Solomon Tempul bawlna thruta lungpui lien tak bula tui hnar hi a zuk fin niin an hril bok. Hi hmuna hin Muslimhai biekbuk lien tak pathumna Al Aqsa mosque chu a ngir a, Jerusalem Tempul a hlu suok der a nih. Hi biekbuk, Solomon Tempul hmuna ngir hi Isak thlahai mit sukkhamtu laia pakhat a nih. Hi biekbuk tlak tieng thrut lung bang hi Trapna Bang (Wailing Wall) an ti hlak, kum 1967-a inthoka Israelhaiin ‘Western Wall’ tia an ko tah chu a nih. September 23, 1993 khan hi bang bula hin ka ngir ve a, ka trap a suok ve teuh naw a, sienkhom ngaituona a fe hla khop el. A chunga Al Aqsa mosque-a Muslimhai Pathien ‘Allah’ biek ri hlak chu a so el bok si. Silai hlo khur ang a na, nèl a um naw khop el.
Hi muol, Solomonin Tempul a bawlna hmun hi Baibula Abrahamin a naupa Isak an hlà nna Moria muol nia Israelhaiin an hril laiin, Muslimhai hril dan ruok chun inhlan dinga a thruoi chu a naulutir Ismael a na, a’n hlanna hmun khom Jerusalema Moria muol ni loin, Makka bula Arafat muol a ni lem. Inhlà n dinga Arafat muol pana Abraham, Hagar le Ismael an fe lai chun Setanin an hnungah zuidîpin a zui a, inhlà n lo dingin a thlêm ngat ngat a. Anni pathum chun lungin an deng a, a zamsan tah a nih. Chu an thaw dan char chu insirin, biekzina fe taphotin Setan lim an sie chu lungin an deng hlak.
Ismael thlahai le Isak thlahai drama inchang hi a tienami chu thuhmun char, a changtu pukhawi Abraham khom thuhmun, sienkhom a changtu dang le an changna hmun chu inang ta lo a nih. Kum tin Muslimhai thla tiem dana thla 12-na, Dhul Hijjaj thla ni 8-12 inkarah khawvel ram tina inthoka biekzina hunghai chun Adam le Evi, Abraham le Hagar le an naupa Ismael sulhnung suiin, an thaw dan insîrin hun an hmang a. Arafat muola inthoka an hung kir hnungin, hnena ruoi an thre a, chutaka ding chun ran an that a. An ran that hi hmêlhemna nei lo, beram a ni chun thla 6, kèl kum 1, bawng kum 2, sanghawngsei kum 5 neka upa a ni ding a nih. A sa chu chan thumin an siem a, chan khat chu sungkuo ta ding, chan hnina chu tuolbawm amanih laichinhai hlè ding, chan thumna chu retheihai kuoma pek ding a nih. Hi ruoi hi a nih ei thu bula Idd-ul-Zuha/Adha (Festival of Sacrifice) ei hril khah. Biekzina fe nawhai khomin mani umhmun sengah ran thata ruoi threin an lo hmang hlak a nih.
Abrahamin ringna ekzama full mark a hmu hnunga Makka tieng a nuhmei Hagar le an naupa Ismael leh an hung kir chun Pathienin biekbuk bawl dingin thu a pek a, a naupa Ismael leh an bawl a, Adam lung dum (Black Stone) ei hril tah kha a kil thrutah an phum a. Hi biekbuk hi a nih a hmaa Kaabah (Thlamuongna/Inremna In) ei hril tah khah. Tuta Kaabah hi kil li neia bawl, fit 55-a insang, a khang chu sim thlang le hmar sak tieng ngha fit 45 ve ve le a khing tieng fit 35 ve ve a nih. A vel tuokin tempul an rem a, a lien hle a, kotkharpui ringot khom 39 a um. Zo hnathlak po po hi a ruolin inkhawm inla khom ei inleng chieng khop el.
Kaabah suo tieng kilah hnuoia inthoka fit 4 vela insangah lung dum, lung thienghlima an ngai kha tangkaraw bawm sungah kuta tawk phakin an sie a. Tangkaraw bawm sunga an siena san chu, kum tin biekzina hung maktaduoi thum neka tamin an fawp seng leiin a dum tletna a dal tiel tiel bakah an fawp ral el ding nia an hriet lei a nih.
Kaabah kotpui zawna hin lungpui, dingthrathruona Abraham trongtraina hlak nia an hril chu a um a, chu lungpuia hniekhnung fie tak um chu a hniek niin an hril bok. Hi lungpui bul ela hin Zamzam Tuikul ei hril tah kha a um. Chuleiin, Ismael thlahai khomin mani tranghma kei zawnga thu an hang zam ve chu intodel tak an nih. A tum a tlanga Isak thlahaiin an chan bika an ngai kha an inchu thlakpek vong el a nih. Mosie tuisunsuo nia an hril chen khom Arab-hai delh rama um a nih. Saudi Arabiaa inthoka Jordan rama sungkuoa kan inzin trumin September 17, 1980 khan Seven Wonders of the World laia thrang zing hlak, Nabatian-hai khawpui hlui Petra sir dingin kan fe a, lampuiah hi tuisunsuo hi a lo um a, lungpui kara inthokin fiertui thieng dei riem el a hung inchik suok zur zur a, chu tui chu dawnin, hmai fai vukin kan phi ve a nih.
Kongkhat ngaituo chun an Pathien rorel dan khom hi a buoithlak ve tho chu a nih. A thil tum le thaw dan hi ei hriet phak naw a, sienkhom thlier bik chu a nei chieng khop el. Abraham hmei Hagar chu Abraham nau lutir hringtu a ni a, sienkhom a naupa chun rohluotu nina a chang a remti tlat nawh. A phirpui Esau le sula an um laiin dawha thûr Jakob chun ditsak a hlaw bik tlat. Israel hnam thlatu Jakob nau pasal 12 laia palihai kha a hmei pahni Bilha le Zilpaa inthoka pieng an ni a, sienkhom thlatu dinga pom an ni nawk bok si. Isak thlahai kha khawvel dâp khopa pung vieu awm tak si, tam tieng nekin tlawm tieng an pan amanih ti dingin an pung maw hle a, Ismael thlahai hlak chu an pung thûr thûr bok si. Hieng lai sierkop hi secular historian-hai inkhinaa inthoka inkhi chun a khikhawk angreng khop el. Sari thil rot le innui kha a lo namei naw hle a nih.
Kohran histawri inphìr
Vangduoi thlak takin eini ngei khomin histawri inphîr ei nei a, chu chu Manipur simthlanga gospel a hung luta inthoka kum zana, 2010 hin a zepui a hung insuo tak tak chauh a nih. Gospel zabili hi hmun danga chu a ni inruolin an hmang hlak a, eini ruok chun a ruol loa hmang hi ei inthuruol theina zawng a nih. Hi hi iengin am a hring suoka ti ei sui chun kum 1929-a Watkin Roberts le H.H.Coleman inkar thuin a nghong buoi leia kohrana inthrena a hung suok lei a ni tak. A bebawm-ah hieng lai boruok sukhulumtu tam tak a um a, chuong laia pakhat chu hnam zawnga inerna lungril a suok leia phierrukna a um lei a nih. Chu chu kum 1986-a ‘Arthakzawl Pawlitiks le Mission Buoina’ ti ka zieka trongkam ka ser suok ‘Arthakzawl Pawlitiks’ ti kha a nih.
Kohran a hung inphela inthokin a phuntu ngirhmun phet thlûk tumna kutin sin a hung thaw a, gospel hung lutna ni le thla ei hriet dan le hril dan a hung danglam a, a hman hmanin, ei zing tho thrat le thrat naw zirin, Watkin Roberts-in Senvon a hung lutna ni le a cham chen khom ei phuok sa pei a, ei thu a khuongruol thei ta nawh. Centenary ei tlung hma kum 26 liem tah khan a hun a tlung phaa ei muolpho nawna dingin hieng lai thil inhnok hi ching fel dingin Hmar Literature Society, HSA, Hmar hnam sunga kohran po po thruoituhai, hnam thruoituhai, mi thiemhai le mi poimaw dang dang hai fe khawmin 5-8 October 1984 khan Senvon-ah Seminar huoihot a ni a. Chu taka thu rel ang chun Watkin Roberts-in Senvon a hung sirna ni chu a sulhnung maksan le mi hrang hrang rikawt hmu theia um po po la khawmin, inchukna inpui insanga mi thiemhai thil sui dan ruonga a suitu dinga dandehaiin indot thlapa an sui hnungin, an hmu dan chu lunginruol taka pom tlang a ni a. Sienkhom, a hun a hung tlung zet chun kâu tamin ei kohran histawri a hung inphìr a; thudik cheltu ding taka ei beiseihai kha kawmawbawl hrât hrà tah an hung thrang hlauh a nih. Chu khêla chun ei kohran histawri-ah Indian (Local) Version le Western version a hung pieng a; a changtuhaiin ei chanchin ei hriet dan le ei chanchin la hre ngai nawhaiin ei chanchin an hriet dan a hung inpersan tah duoi a nih.
Chuong anga thil fe peiin, ni hrang hranga ei lung tluk zawng ang senga gospel centenary ei hmang hnung chun, ei la lawm ve lo Hmar Gospel Centenary chu Saikotah December 9-12, 2010 inkarah lungruol taka hmang dingin ei inbuotsai a. Chuonga kum za a tlingna ei lawm hiel ‘Hmar Gospel’ chu ieng tina am ning a ta? ‘Hmar Bible’ ei ti leh hin angkhat amani ding maw? Pathien gospel le Hmar gospel hi a thriengin ei lo nei tah hrim am a ni ding maw? Kei chu ka bo map a nih. (November 25, 2010 Delhi)
* ‘Biekzin’ (pilgrimage) ti hi ei nei naw leiin sei duotin ram/hmun thienghlima inzin tiin ei hril hlak a. Kum 1980 April-a Saudi Arabia-ah kan inson hnungin, kha hmaa kan umna hming chawia ‘Nairobi Notebook’ ti ka ziek hlak chu ‘Arabian Notebook’ tiin ka thlak a. Chu kum, June thlaa ‘Haj’a hunghai chanchin Inchuklai Nun-a insuo dinga artikul ka ziekin prilgrimage ti hih ei trongin ei nei naw leiin ‘biekzin’ ti trongkam thar ka ser a, ka ser thar a nih ti khom tiemtuhaiin an hriet naw a ni el thei, a hmang zui an um tlat naw leiin. Hi artikul hi Lusei-Mizo tronga inletin a hnungin MEICHHER-ah a hung suok a, thawk-le-khatin ‘biakzin’ ti hih an hung hmang lâr nghal a, lekhabu hminga hmang khom an um nok tah a nih. LK
Post a Comment
Comments not related to the news or article may be deleted.