TUKVER HRANG HRANG-3

By Pu L.Keivom* Inpui columnist

Tinkim ka dawn changin Hmartlangpui,

Ruol kima dar ang kan lengna ram hi,

Kan ram le kan ta ngeiah inchang la,

Lung lawma khuoi ang chawlna ding kan tih.

-T.Khuma Songate

Hi a chunga hla, Pherzawl tlanga inthoka T.Khuma phuok hi i sak ve changin i ngaituona tukvera inthokin khaw tieng ram am nghaa thlirin, ieng ram am i hmu hlak a? Hmartlangpui chu ieng tina am ning a ta? Khaw laia um am ni dingin i ngaituo hlak a? An naw leh, hnam danghaiin ‘Hmartlangpui’ i ti chu khaw laia um am ni dingin bel veng an ta?

Hieng zawnahai hi zawna mawl taka inlang, sienkhom don harsa êm êm el an nih. Manipur sim thlang, Churachandpur District sunga Sub-division pakhat Tipaimukh biela umhai chun Hmartlangpui chu Hmar Ram tia ei ko, Delhi khawpuia veng lien deu tiet khom ni lo, a mipui tamzie khom Delhi Railway Station-a kuli ruol zat phak kher lo ding, a sunga khuo po po deuthaw chu Thado lalhai inlalna hnuoia lo um hlak hih a ni ka ring. Kum khata a biel pumpui sum le pai lam suok bel khawmin Marwari hausa darkar khat lam suok khom tluk kher naw nih. A biel pum hrietna le thiemna kol po po bel khawmin vai mi thiem pakhat theinghil tah zat khom tluk naw bok a tih.

Sienkhom, chu biel chikte hlutna chu sum le paia inkhi thei a ni naw a, inchawk thei a ni bok nawh. Chu biel chu khawvela Hmar hnathlak po poin tu chena ‘Hmar Ram’ tia an hriet le ko thei ram um sun chu a nih. Ieng anga rethei mongtol le ngaisak hlaw lo ram khom ni sien, chu hmun chu Hmar hnathlakhai nina, an aidentiti phurtu le kengkawtu a ni leiin an ta dingin hmun thienghlim, an Jerusalem, an Ruonglevaisuo umna, an Sinlung Pahnina a nih.

Hmar hnathlakhai, G.A.Grierson-in ‘Old Kuki’ hlawm hnuoia a siehai chu hmun dang dangah an inpem dar nasat vei leh iengti leia hieng lai hmun kher kher hin ‘Hmar Ram’ ti hming hi a hung put bik el am a na? Hi hin san inril tak a nei a, chu chu hriet fie a thra khop el. Chu chu an hriet fie pha pha leh mani ninaah hung chieng an ta, Hmar hnathlakhai inkara inzomna khom hung suklienin suknghet a ta, an thlirna tukver hung zauh lien an ta, Zoram khawvela an ngirhmun hung hre chieng an ta, an hmathlir khom sukseiin hung suklien a tih.

Hmar hnathlakhai hi Chin Hills-a inthoka thlang tla hmasa le vaihai zu paw hmasatuhai laia mi an nih. Sienkhom, hming tlanglawn inkona hmang loa mani pahnam senga inko hlak an ni leiin, hnam inthuruol lemhai hnuoiah tu hriet hlaw loin an tlu lut rop a, histawri-ah an hming hmu ding a vang èm êm. Mizorama Lusei lalhai, abikin Sailo lalhai hnuoia hun iemani chen chenghaiin tlan suokna hun remchang an nei phing leh hmar tieng panin an inpèm phei tawl a. Chuonghai chun Lusei lalhai hnuoia an um laia Dulien/Lusei trong le Hmar pahnam trong hrang hrang inchekpola inthoka trong thar an ser suok, Khawsak trong an ti chu an hmang a. Chun, pahnam binga tlang hluo bing ta loin an hung um khawm a, khaw nghet an indin a. Chuonga hmar tienga intawl pheihai chu Luseihaiin ‘Hmarho’ an ti a, chu chu pahnam hming seng nekin inkona hming tlanglawnin an hung hmang a. Chuong hun laia a buka an cheng khawm rawnna tak chun a hnungah ‘Hmar Biel’ ti hming a hung put tah a nih.

An um khawm rawnna tak Senvon khuoa kum 1910-a kristien sakhuo a hung lut lai chun, tuta Hmar Ram tia ko le a se vel Mizoram tienga Hmar inbuk khawmna hmunhai, Sinlung Hills Development Council huop sung le Tipaimukh Biel chu Kristien sakhuo a hung lut lai khan ‘Hmar Thimpui’ tia ko a ni hlak a. Chuleiin, mi thiem le dawnril J. Malsawm-in Vervek le a se vela gospel hung lut tran dan chanchin 1994-a Mizoram Gospel Centenary le inzoma a buotsaia khom ‘Hmar Thimpui’ ti trongkam hi a bu hmingah a hmang hiel a nih. Chun, Mizorama inthoka tirko le misawnari hung hmasahai kha ‘Hmar Thimpui’ sut var dinga hung an nih. January 11, 1922 a Zo misawnari hmasa tak R.Dala -a a thi trumin hla kungpu Awithangpa (Hmarlutvunga)-in R. Dala nuhmei Lianthangpuii ta dinga hla a phuoka khom,

Hmar thimpui tlangleiah,

Trapin zai tin ka chhiar…

Hmar thimpui tlangah hian,

Tu nge Lal hna thawk ang?…

Ka trah hliap ral kai e,

Hmar thimpui tlang leiah,

Lungngaih a fawn….

Hmar thimpui tlangte u,

Vanduai min trahpui r’u

tiin hla chang li sungah ‘Hmar thimpui’ ti voi li zet a hmang hman a nih.

Chu ‘Hmar thimpui’ chu Senvon khuoa inthoka intrana gospel varin a hung kap eng hnungin an kawl le kienga Zohnathlak dang Paite, Rangte (Gangte) Simte, Thado-Haokip le Vaiphei hai sutvartu hmangruo poimaw takin a hung thrang a, Hmar trongin thu le hla nasa takin a hung puok dar a, a si per le vabuchawi chun Churachandpur biela ram thim inzi khup el chu a kap eng chuoi chuoi el a. Chu taka inthok chun ‘Hmar Thimpui’ ti hlak kha ‘Hmar Ram’ tia ko a hung ni tah a nih. Chuleiin, hi hming ropui tak, khawvela hming um sun ‘Hmar Ram’ ti hi gospel hring suok lieu lieu a nih ti inla, khel ei hril ka ring nawh. Hming thienghlim le inzaum a nih.

Ei thil sui ding tieng chauh panin inzin pei inla. Chu taka inthoka iemani chen hnunga chun ei thupui, ‘Hmar tlangpui’ ti hi hlaah a hung inlang tran a. Ei Sinlung hluia inthoka Sinlung thar Bethlehemah ei inpem hnung, chu zara khawvel hringmi hnam ze tinreng le angel varhai le lung ei inruol thei hnung chun Pastor Thangngurin Solomon trongkam hawa (Hlahai Hla 2:1) Israel ram Sharon phaizawla rose par an thliek thu le Isu thi thu hung sehmein,

Saron par i la mawi zo nawh,

Hmar tlangpui inthim sunga hin chu

tiin thrahnem ngai takin a hung khek suok a. Chu thrahnemngaina hlaa chun, a thaw tum hram lei khom ni kher chuong loin, pawlitiks trongkam chuoi ngai lo ding a hung phûm ta tlut el a nih. Hi hi Hmar hlaa ‘Hmar tlangpui’ inlangna hmasa tak a nih. Hi hla hi hnam dangin an inlet pha an ril rem zawngin an sie ve pei el a nih.

Threnkhat chun Hmar le Lusei indo lai, Sailo lal Lienkham khaw tlangval mi 200 ruol ramsuok le Hmar tlangval 200 bawr vel ramsuok an inkap hrep hnunga an ram tieng pana Lienkham khaw tlangvalhai an kir chu Thanlon le Suongsang inkar, Sabung kot, a hnunga Ralkapkot an hung tit ah peia Hmarhaiin an lo lambun a, tam tak an kap hlum truma,

Hmar thlang doral i la e, Lalhrangchhuanpa,

Milai thra an fam zo ve

tia hla an phuok ela ‘Hmar thlang’ ti chu ‘Hmar tlang’ tiin an bel leiin, hi hla hi ‘Hmar tlang’ ti hung suokna hmasa tak niin an hril a. Sienkhom, hi hlaa ‘Hmar’ a hril hi hnam ni loin, thil nghatna (direction) tieng hrilna ‘hmar thlang’ (north west) a tina a ni ring a um lem. B.Lalthangliana chun, Lusei le Hmar indo hi kum 1887-1890 inkar niin a hril (Mizo Chanchin, 2001 p.255).

Ei thu le hlaah, ziek ngeiin, khaw laia inthokin am ‘Hmar tlangpui’ ti hi a hung inlang nawk a? Kei ka hriet ve dan chun a chunga Pu T. Khuma hla ei tar lang, kum 1950 bawr vel laia Pherzawl khuoa a phuok, tu chena hnam hlapui pakhata ei la nei zing hi a nih.

Amiruokchu, Pastor Thangngur ‘Hmar tlangpui’ le Pu T.Khuma ‘Hmar tlangpui’ hi an inang ta tlat nawh. Thangngur ‘Hmar tlangpui’ chu ‘Hmar Biel’ le a sunga umhai niin a’n lang a, T. Khuma ‘Hmar tlangpui’ ruok chu Hmarhai an leng khawmna ram, an ta la ni lo, khuoi anga Hmarhai an chawl theina ding, ram la hung um ding, lungrila a pai chu a ni dai a nih.
Hi thua hin ei lut sei hmain, Hmar hlaa ‘Hmar Ram’ ti a’n lang hmasakna tak ni dinga ka hriet le ring ‘Aw Kan Hmar Ram’ ti hi hang bi vak ei tih. Hi hla phuoktu hi Zama Keivom le Khuongchong Khawbung hai nau pasal nei sun Lalkhum Keivom, Kuokluong (Budonnagore), Cachar District-a pieng le January 18, 1997-a an lalna Kuokluonga muol lo liem tah chu a nih. February 17, 2003 khan ruol iemani zat thruoiin ka nuhmei Dari leh Kuokluong hi kan va sir a, umni khamin ruoi an lo buotsai a. Pasal thra sulhnung sui chu ngaituo a suksei khop el.

Lalkhum hin Indopuina Pahnina lai, 1941 khan India Army Medical Corps (IAMC) a zom a, Burmaah fein Rangoon chen a tlung a, 1946 khan a hliem leiin penson-in an insuoktir a, sienkhom a hnungin India sorkar hnuoiah penson chenin Medical Inspector sin a thaw zui pei a. 1944-45 lai Rangoon-a an um laiin ruoipui (Barakhana) an nei a, hnam tina mihai an hnam hla seng an insaktir a. Hmar-in hnam hla an la nei si naw leiin a thang a tlawm hle a. Chu zan chun, “Aw kan Hmar Ram, inthim tlang dum duoi” ti hi a chang khatna le chang hnina chen a phuok a, a dang hi India rama a hung kir hnungin a phuok zom a, a chang tawp tak, “Dar ang ei lengna ram hring dum duoi” tia intran ruok hi chu ama phuok ni loin mi dangin an bel sa a nih.

Hi hla hi voisun chena Hmar hnam hlapui tak a la ni zing. Hmar mi tu khomin mani hminga ‘Ram’ nei thu an hisap phak hmain ama chun “Cachar, Haflong, Aizawl, Manipur” a Hmarhai chu inpumkhata ngir a, hnam dang dan thrahai la a, an dan suolhai pei a, inpumkhata ngir tlata ram indin dingin a lo fiel der tah a nih. Hi a hmathlir, hlaa a lo siem lei hin ama hi lungrila Hmar Ram indintu hmasa tak a ni naw khoma a hmasa pawl tak a ni ring a um. A hnunga ama ngeiin poi a ti êm êm nia an mi hril chu Tripura a lo inthrangsatir ve naw hi a nih. Hi hla a phuok lai hin a lungrilah a’n lang naw leia a hmai a ni a, mi dangin hung bel sa dan ngaituohai sien ti khom a thi hmain Rev. Tangka Sangkhum a’n cha hiel a nih. Kum sawm vel hnungah a zai chu T. Khuma’n a hung zawm a. Keini rawiin kan hung zawm ve phak khan chu kum sawmhni vel deuthaw a lo invoi hman tah a nih. Hieng sulsutuhai poimawzie hi hnamin hma a sawn ang peiin hung hre zuol deu deu ei tih. AK-47 sang tam tak nekin Lalkhum hla hin a kâp na lem.

Zawna poimaw tak chu: Khaw la’m Hmar Ram le Hmar tlangpui chu a um? Hmar Biel la hmu ngai lohaiin iengtin am hi ram chikte hi anni Hmar Ram le Hmar tlangpuiah an ngai thei ding? Hi zawna donna um sun nia ka hriet chu: A dittu le beiseitu po po lungrilah, ti ning a tih. Ram hi a taka a pieng hmain lungrilah a pieng hmasa phot hlak a nih. Thuin a pieng hmasa phot a, chu chu a takin a la hung inchang hlak. Ka hla phuok po poa ‘Hmar tlangpui’ ti le ‘Hmar ram’ tihai hi keimaa ram mawi tak um chu a nih. Chu taka inthok chun Zoram khawvelah ka chuong lut a. Ka sirna taphot, ka nei le ka hluo, ka nina iengkim hi keimaa chun Hmar ram le Hmar tlangpui vong a nih. Chu chun Zoram khawvel a siem a, chu thrang lo chun Zoram khawvel a kim thei nawh. Zo hnathlak tin nina infin khawmin Zoram khawvel hi a siem a nih.

Tiemtu, nangma tukvera inthoka thlirin i Hmar ram le Hmar tlangpui chu khaw lai am a um a? I Zoram khawvel khom chu khaw lai am a um ve a? Hi Hmar tlangpui um sun hi Tipaimukh Dam an bawl hnungin la um zing dingin i ring am? Hieng ang Dam lien an bawlna khaw lai hmuna khom tuitingin a ram a chim pil neka inrangin a ram mihai chu mi dangin an chim hmang hlak ti i hriet am? Hmar Biela chenghai chauh khom ni lo, tuitingin a chim phaka chenghai po po hi hnamah dam khawsuok an ti? An dam khawsuokna bik san ding iem a um a? Ei lungril pangngai hi ei put zing chun, Esau anga buthleng voi khat tlaia mani nina le rohluotu nina zor nuom deuh vong ei nih. Roreltuaa ei thlang, ei ram le hnam vengtu le humhimtu ngirhmuna um hai hman hman hi a zuolkai an ni el thei. Ei dam khawsuokna ding inhumhimna fel tak tu ngeia ei duong suok si naw chun, Dam an bawl zo hnung kum sawmngaah hieng lai biel hi fang inla, mani tronga biek thei an la um palh a ni khomin mi nawkora thok mi tlawmte chauh ni tang an tih. Hmar tlangpui ei ti hlak chu Hmar thimpui khom ni zo ta loin, Hmar thlanpui inchang tang a tih. Khawvela hin hmathlir nei lo hnamhai ta dingin Sheol tiem seng lo a um a nih.

=============
[*Editor's Note: INPUI columnist Pu Keivom is a retired Indian Foreign Service officer, respected Hmar Mizo litterateur and author of 'Zoram Khawvel' series. This article is dated June 1, 2010, Delhi].