Tu trum chu hringnuna thu inkawkal, inmil lo (contradictions), sienkhom inzom tlat le inpawthuo tlat ni bok si tukverah dakin mit hang inlen ei tih.
Hindu sakhuoa thil thra lo inphum, nuom anga hma a sawn thei nawna sana an hril tak chu chi-hnam lia inthlierna (caste system) hi a nih. Hindu i ni ding chun thiempu le inchuktirtu chi-hnam Brahmin, roreltu le ram humtu chi-hnam Kshatriya, sumdawngtu chi-hnam Vaisya le a mongkhawn chi-hnam Sudra laia a iemani beka hin thrang ngei ngei a ngai. Chi-hnam i nina chu damsunga sut le thlak danglam thei a ni nawh. Chi-hnama inthlierna hi sukbo tuma nasa taka thrang la pawl an um a, sakhuo pawl tum tum a suok pha a, chuong laia inlar bikhai chu Jainism, Buddhism le Sikhism hai hi an nih. Sienkhom an cho hne naw a, a hung chotu sakhuohai chu chi-hnam hri chun damten a fak siet pei lem a nih. India sorkar khomin Danpui hmangin chi-hnama inthlierna hi sukbo a tum lai zingin reservation lampui hrawin a suknghet deu deu amanih aw ti dingin a um. Ei hril nuom tak chu, chi-hnama inthlierna chu ieng angin thra naw sien khom a letlinga Hindu sakhuo suknghettu hmangruo a ni tlat a nih. Hi lei hin a nih Hindu sakhuo hi thu inkawkal (contradiction) inher thlop leia hring a ni thu an hril hlak chuh.
Hi thu hi a poimaw leiin fie taka ei man theina dingin hang pot sei met inla. Chi-hnama inthlierna chu a tir chun fakzongna thil (socio-economic factor) le inzoma hung suok a ni ring a um. Mi hausa le mi rethei, mi mawl le mi thiem, kalchar insang le inhnuoi ei um a. Hma ei sawn dan angin ei ngirhmun a hung inthlak danglam a, pasie chu hausa, mi mawl chu mi thiem a hung ni thei. Hindu sakhuo ruok chun a zuituhai chu pindan pali-ah a khum hrang a, hnam hnuoihnung tak Sudra (Scheduled Caste) chu ieng anga lekha thiem le hausa khom ni sien Brahmin a ni thei naw hrim hrim a; Brahmin chu ieng anga mawl, sakhaw ngaisak lo le misuol, tuolthattu le rukru khom ni sien thiempu hnam a nina a bo thei nawh. Hienga inthuruol thei lo dinga thre dar vong an ni lei hin hnam dangin an hung run a, an op khum a; a ram pum huopa lalna chel phak Hindu lal pakhat khom an la um nawh. Kum 1947-a British opna hnuoia inthoka zalenna a hung hmu khan, a ram ngirhmun hre chiengtu thruoituhai chun a ram thuthlung dingin, ‘Unity in diversity’ ti chang chu an hung thlang tah chat hrim a nih. Chi-hnama inthrena hi a ram thrangmawbawk laia pakhat ni si, Hindu sakhuoin a dampui san ni bok si, thu inkhawkher tawp, tukver pakhata inthoka en chun thil thra, tukver danga en chun thil thra lo tawp ni si a nih.
Hieng ang chara Manipur sim thlang biela cheng Zo hnathlakhai mi thre dartu, Gospel Centenary 2010 khom a ni inruola hmang thei loa mi siemtu chu Coleman Factor a nih. Hnam bil senga mi thre dar a, hnam bil tranna thlarau einiah tu a, mani trong senga Pathien chawbiek le inpak chu Pathien lawmzawng thaw ni anga hril mawi a, inthuruol thei lo dinga mi siem a, nuom ang anga mi op khum an tumna chu hmangaitu rawl ei sawn a, thrahnem ngai em emin ei pu seng a, hnam tin inkarah indaidanna bang insi khupin ei intung a; hnam bing tin sungah pindan hrang hrang ei bawl nawk treu a; pindan danga mi beramhai inruk dan ngaituoin ei mel hrek hrek a, zawrna chi tinreng hmangin ei zawr a, a thleng tlorna tieng tienga thle pawl ei inruk a. Kum tawp Assembly-a kohran nambar pung zat uong taka ei ripawt vet hi ei rukruk thiem dan inkhina a nih. Hnam bil amanih kohran pawl bing amanih tranghma chauh ngaina thlarau hringtu chu Coleman Factor a ni leiin, ieng angin ei hming bulah Evangelical ti sie tlar thrut inla khom ei nina tak Setanin a hriet a, a lung a phang naw hrim hrim. Pathien tukvera inthoka thlir ruok chun luoksuok ei va hang um nasa awm de aw!
Paula trongkam haw-in, Coleman Factor-a intang ruol, a mi ditchingna uoiin a vai rui, mani hnam bil le kohran pawl bing ringot tranghma ngaina tirdakuma an mit a sukdelhai, sienkhom thil thra fe thawa inngaina lungril put tlathai kuoma hin, “ Aw, Churachandpura Zo hnathlak mi invethai, tuin am a dawi vet cheu a na? Mita in hmu ve ang khopa chienga Isu Krista an hemde thu, Chanchin Thra, in kuoma tar langa um kha ringtu inti siin, ieng thlarau am changin hieng lawm hin in la invet zing am a na? Thlarauah tran ta siin hnam bing le pawl thilah in tawp el ding a ni maw?” ti ve inla, thil awm lo ni kher naw nih.
Vangduoina vs. Vangneina
Vangduoina ei ti hi ei beisei le hisap lawk anga thil tlung lo hrilna trongkam a nih. Ei beisei anga thil thra a hung tlung chun ei vang (luck) chu thra le a tlung naw chun ei vang chu duoiah ei ngai. Sienkhom, ei thlirna tukver dungzuiin vangneina hi vangduoi intranna, vangduoina hi vangnei intranna a ni thei. Chuong ang bokin, retheina hi hausak intranna, hausak hi rethei intranna a ni thei bok.
Thanga chu rethei tak ngirhmuna inthokin hlawtling tumin nasa takin thrang a lak a. A hlawtling theina ding a ni phot chun rinum ieng khom tuor a huom a, thi le thau inpolin a thrang a, lekha a hung thiem a, sin thra tak a hung hmu a, a tum a hlen leiin a lawm a, mi inhnar a hung kai a. Sienkhom, sin thra a hung hmua inthokin damten a nun a hung zal a, insum theina a hung tlasam tiel tiel a, a kut a hung sukporche ruolin fak le dawn le thil dang dangah a taksa le thlarau hriselnain a ngei naw zawng thaw a hung ching a, a vangneina le hlawtlingna chu ama le a sungkuo ta dinga vangduoina le hlawsamna intranna a hung ni ta daih a nih. Mi tam lem thlirna tukvera inthoka vangneina le hlawtlingnaa ei ngai, ei inhnar bek bek hi thil inhnarum lo a tam.
Nebukadnezzar chunga sietna le vangduoina tlung kha a ropui chungchuong lai tak a nih. Lungril pangngai tak puta inngaia a tukvera inthoka a thlir dan chun, Babulon khaw ropui le mawi chu ama kut hrata a bawl lieu lieuin a hmu a, a lal in chung zawlah bawhla a’n sam a ni khah. Iengkim Lalpa, Chunghnungtak ruok chun chuong ang chun a ngai ve naw leiin kum sari top a hrem a, ram hnuoiah ransa angin hlo a’n pettir a nih. Siemtu inpak nachang a hriet nawka inthokin ngaituona pangngai puta ngai a hung ni a, a ngirhmuna hlangkai nawk a ni chauh a nih. Thlirna tukver infuk le infuk lo hin mihriem nunah thu a lo va hang phur nasa de aw! I vangneina kha i vangduoi intranna a ni pal hlauh nawna dingin inveng fimkhur rawh.
Hlawtlingna vs. Hlawsamna
Hlawtling le hlawsam ei inkhina chu ei thil tum le thaw ei hlen le hlen loah a nih. Ramah chang ei kam a, ve dingin ei fe a, a awk chun ei hlawtling a na, a awk naw chun ei hlawsam a nih. Hmeraw zongin amanih, sa inchanin amanih, nga manin amanih ei ramsuok a, ei beisei ang ei hawn chun ei hlawtling, ei hawn naw chun ei hlawsam a nih. Inchuktu chu ekzamah a tling chun a hlawtling a na, a tling naw chun a hlawsam a nih. Chu chu hlawtling le hlawsam ei inkhi dan tlangpui a nih.
Inril lema ngaituo a, tukver hrang hranga inthoka ei bi ruok chun, hlawtling le hlawsam ei inkhina hmol hi hmang vong thei a ni nawh. A chang chun hlawsam hi hlawtlingna siemtu, a chang nawk ruok chun hlawtling hi hlawsamna hringtu a nih. Kum 1957-58 khan sierkop leiin Matric ekzamah voi hni zet ka hlawsam a, thiphuhakin kum 1959 khan ka zo hram a. Hi trum hin ‘fail’ rinumzie a tak ngeia ka’n tem leiin ekzamah hrim hrim ‘fail’ nawk tah ngai lo dingin lungril ka siem a, ka fail nawk tah ngai bok nawh. Ka matric fail kha ka ta ding chun a hnung peia ka hlawtlingna bul a nih. Thil rinum ei tuok hi ei nuna malsawmna hnar a ni thei leiin lawm ding ei lo nih. A san chu, rinum ei tuok le tuor pha leh mani chan inngaituona hun le inthlak thleng nuomna lungril a mi pek a, insiem thratna kotkhar a mi hongpek bok a nih. Vok bu chen inhnara fak ve nuom hielna ngirhmuna a tlak thlak meu khan naupa tlan hmang chun inngaituo nachang le a pa in tieng pan nachang a hriet chauh a nih. Tuorna hi zirtirtu thra tak a nih. Hlawsamna khom hlawtlingna hnar.
Pastor John C.Maxwell, ziektu hmingthang, lekhabu 50 chuong ziek tah chun a lekhabu The Success Journey: The Process of Living Your Dreams ah hlawtlingna hi inzin leh tekhiin, “Success is journey” a ti a. Hi hi kei khomin ka thlirna tukvera inthoka ka lo thlir ve dan a nih. Ei tum ram pana hma tieng ke ei pen zatin pen khatin ei hlawtling a, ei ke pen ei chawl charin ei hmasawn a tawp a, ei chawl charin, tha thar lakna dinga chawl ei ni naw chun, ei hlawsam tran nghal bok a nih.
Hieng ang hin hang hril fie inla. Lekha inchuktu thil tum chu hrietna, thiemna le varna khawl khawm a ni ding a nih. Chu chu damsung sin a nih. Hrietna chun thiemna, thiemna chun varna, varna chun hmasawnna ngelnghet a’n tlun a, hrietna a lak lut rawn ang peiin thiemna nei rawn a ta, thiemna a hau ang peiin varna tieng insang a ta, varna tieng a hung insang ang peiin hma hung sawn pei a tih. Chu lampui chun tawpintai a nei nawh.
Threnkhat ruok chu thiemna neka sin hmuna ding chaua dikri ringot hnot an um. Chuong mihai chun an tum dikri le sin an hmu charin an lung a awi tawk a, an ekzam tawp nia an lekhabu phet an inkhup kha an ring song hlak. Hlawtlingna le hlawsamna inkhina hmol ei hril tah kha hmanga ei inkhi chun, dikri an hmu ni khah an hlawsam intranna ni a nih. Chu ngirhmuna chun pawl insang dikri nei, a hminga mi thiem, a taka hrietna le thiemna thar la lut ta lo hrim hrim tam tak ei intal a nih. Chu inkhina hmola inkhi chun mi thiem ruol fe khawm ei ti hih dikri kawruok hmaithinghawnga inbel, pawl sang mawl, kum tam hlawsamna vuta lo inbuol tah ruol fuon khawm dam ei ni nuom khop el. Thil danga chu ei hlawtling khom a lo ni el thei. Sienkhom, ei nina le ngirna ding takah mi hlawsam le kawrong ei ni tlat chun umzie a nei nawh. Mi hlawsam fuon khawm ruolin hlawtling dinga ruoltharhai buotsai ei tum khom chu thil intu lo tak a nih. Piengthar tehlemin piengthar tehlem ei hring a, lemchang ei pung tuol tuol nek hmanin thiemna neka dikri ringot hnot ei pung deu deu dam hi inngaisiet a um lem.
Ka penson zo chara a hran hlaka Baibul inlet sin ka tran dingin mi tam tak ka rawn a, thil huphurum a nizie le ka damsunga ka zo hman an ring naw thu chu ka thu dong rawn tak a nih. Mi thurawn la lang chu a tran khom ka tran ngam naw el thei. Amiruokchu, hlawtlingna formulaa ka ngai le a thei ang anga zui ka tum hlak chu ka nei a. Chu chu hi hi a nih: darkar khatah minit 60 a um a, minit tin ka hmang hlawk chun darkar tinin voi 60 hlawtling ka ta, ni tin darkar 12-16 sung sin ka thaw chun kum 4 sungin ka zo hman ding a nih ti ka ring el khom ni loin Pathienah ka hmu tlang a nih. Chun, ringna ei ti hi a tak ngeia thilthawin a zui naw chun ringna thlawn le thil thi a nizie le thil thra thaw ding hre zing sia thaw lo chu suol a nizie le suol ei thaw tak nek hmanin thaw ding ei thaw naw leia thaw lo suol ei hau lem ti ring rum rut mi ka ni leiin, Lalpan hriselna thra le ngaituona fima a min thuom phot chun keima tieng, hmangruo ka ninaah ka chanpuol chu bitum char char dingin thutlukna nghet tak ka siem bok a. Ka hisap nek hmana inrangin, kum 3 le thla 7 sungin Baibul pum inlet sin chu ka zo hman a nih. Ennon le siem thrat sin le mani sum ngeia sutna dingin kum hni vel a lak nawk a, kum 2007 October khan Chanchin Thra lutna Senvon khuoa ngei Lalpa hratnan mi thruoiin tlangzar a lo ni tah a nih.
Hlawtlingna chu hma tieng pana inzin pei a nih. Ka Baibul inlet sin kha hlen zo hman loin zan khat mitsim lo tuok ni lang, ka phak chin kha ka hlawtling tawpna ning a ta, mi hlawtlingin muol ka liem ning a tih. Tu khom hin, Baibul inlet sin hi zo tah ti um thei lo, siem thrat le siem phuisui pei sin hi khawvel um sunga fe ding a ni leiin Delhi Version Baibul hi sut zo a nia inthok khan siem thrat sin kan tran nghal a nih. Chu chu ka tukvera inthoka hlawtlingna umzie ka hmu le hriet dan chu a nih. Minit tin hmang hlawk chu hlawtlingna, minit tin hmang thai chu hlawsamna a nih.
Note: 2010 Fifa World Cup en puma ka ziek a ni leiin a thu inruol nawna dam a um chun an vuvuzela le an goal thun lai riin a nghong buoi leiah lo ngai el ro. LK
=============
[*Editor's Note: INPUI columnist Pu Keivom is a retired Indian Foreign Service officer, respected Hmar Mizo litterateur and author of 'Zoram Khawvel' series. This article is dated June 18, 2010, Delhi].
Post a Comment
Comments not related to the news or article may be deleted.