December tarik ni 8 khan Bangalore ah Sikpui Ruoi hmang a nia, hi hunah hin MP lo ni ta hlak Pu HT Sangliana chu Sikpui Pa in a thanga; Pu PS Chuasa chu khuollien in hi prokram a uop ve.
Bangalore ah hin Hmar mi hming inxieklut po chu mi 250 vel an ni a, hi Sipui Ruoi ah a tam lem an thang ni'n prokram buoipui hai chun an hril.
Pu Sangliana in mipui fe khawm hai ban inphar tirna a neina ah chun member 100-ah 70 thawkna nei an ni ti hmu chun a lawm hle thu a hril. "Mani umna hmun le ram ah hin insuk mikhuol lovin, in sinthawna hai ah ringum le taima takin thaw pei ro," ti'n mipui hai infuina thucha a hril.
Pu Sangliana in hotu/thuoitu tha mizie ama ngirhmun besan a hmangin a hril nawkna a chun, "Thuoitu chihni an uma, pakhatna chu a hmatieng a inthawka a rawi hai kei hruoi tu; a pahnina chu a hnungtienga inthawka mani rawi hai hawltu a nih. Kei chu a hmatienga inthawka thuoitu ni hi tha ka tih," ti'n a hril.
Sikpui prokram hi hun hni a the ani a, zingtieng prokram ah HSA in an siem Bangalore Hmar Directory chu khuollien Pu Chuasa in a tlangzar el bakah Hmasawnna Thar editor Pu Lalmalsawm Selate chu chawimawina an inhlan. Pu Selate chu hi hun ah a hung thang theinaw leiin a sunghai kutah inhlan sawng a nih.
Hunkhatna khar hma in 'Bangalore Hmar hai ei changkang/changkang nawh' ti thupui hmangin debate nei a nih. Pu Robert L Sungte, BHCF chairman, in hi hun a laka; 'Hmar hai ei changkang nawh' ti a thang hai in hril ding an hriet rawn lem a, mipui ngaidan khawm an kal deu nuoi ni'n an lang.
Prokram hunhnina chu thu le hla el bakah hnam thuoma inchei a chi dang dang ennuom hai suklang anih. Chu karlakah chun HSA Sports a lawmman hai HSA President Tv Rama Khawbung le Secretary Tv Solomon Hmar han an nei bawk. Miss le Mr Sikpui khawm tlangna nei ani, Pu Sangliana Mr inhlana a nei a, chun nikum a Miss Sikpui Nk Grace Khawbung in Miss 2008 par an hlan bawk. (Miss le Mr hai i hriet nuom chun www.hmararasi.com lo en rawh).
Prokram tawpna taka dingin Sikpui hla sakin, mipui fekhawm hai le Sikpui Pa, Khuollien hai nupa ban in chelin lamzawl ah an kut an ke an then a inhawi an ti hle. Ruoi hai inhlan zo a ni in Sikpui Ruoi 2008 chu hlim le lawm takin kil a nih.
More Lims
Post a Comment
Comments not related to the news or article may be deleted.