INPUI: Hmar News & Info

Lalremlien Neitham

New Delhi, November 10, 2013: Voisun sun dar 12:30 anthok khan Tangkhul Christian Charitable Trust (TCCT) huoihotna hnuoiah "Amazing Grace" ti thupui a hmangin 2nd Annual North East India Choral Singing Competition chu Thyagaraj Stadium, New Delhi-ah nei a nih.

Hi inruolsiekna a hin Delhi-a North East India suok kohran le fellowship hrang hrang hai choir hai chu an thrang a, hla kaupeng hrang hrang hieng classical, folk, jazz le spiritual ti hai inruolsieknahai nei a tih.

Inruolsieknaa thrang hai bak a hin hlasak thiem Fiona Pachuau, Aching Shaiza, David Mate, Maggie Lhouvum, Amongbi Jamir, Lemo Jamir le The Epistles hai chun fekhawmhai hla le rimawiin an inawi.

Hi huna hin Alpha India-a an National Director J. Varadaraj chun special talk a nei bawk.

Hi inruolsiekna hi nikum anthok khan nei tran a ni a, nikum khan HCFD Choir khomin 1st runners up lain, prize money khom Rs. 2 lakhs a dong nghe nghe.

Nakie deu khan result khom puong a ni a, Choir category-a pakhatna chu HCFD Choir in a lak. Pahnina chu Evangelical Baptist Convention Church, Delhi, Choir in a lak a, a pathumna chu Poumai Baptist Church Delhi haiin an lak.

First prize hin Rs. 3 lakhs hawn a ta, second prize hin Rs. 2 lakhs, third prize Rs. 1 lakhs hawn a tih.

New Delhi, October 17, 2013: Zani khan Hmar Christian Fellowship Delhi (HCFD) Thalai Conference vawi 6-na chu Apostles' Methodist Church, RK Puram, New Delhi hmun-ah inhawi le hlimtlang taka hmang a nih.

Thalai Conference hi session 3-a the a ni a, session khatna hi Tv. David Lalditsak Joute-in thuoiin "Praise & Worship" huna hmang a nih. Pastor Lalsiesang Zote in hun hawng tawngtaina a nei zoin, Nk. Christy Hluothangpui Inbuon in tanna hung a nei a. Thalai Chairman Pu Immanuel Khawbung-in Thalai Conference a hung hai le freshers hai lawmlut a nei zoin, Pu Malsawmthang Keivom-in Pathien thucha hrilna a nei. Hi session a hin HCFD Thalai group tin a inthawkin area report nei ani hnungin group inruolsiekna chu Asst. Music Secretary Tv. Eleazer L. Sungte keihruoina hnuoi-ah Thupawlpui hrilna'n hmang tan a nih.

Session hnina a chun inruolsiekna sumzawm nawk a ni a, Thalai Vice-Chairman Tv. David H. Joute-in thuoiin inruolsiekna chi dang dang - Quartette, Malzai, Duet hai nei a ni a. Group dang dang hai inruolsieknaa thang hai hi stage-ah hlasak dinga an vawikhat kai dam nisienkhawm an thiem tawl hle. Inruolsiekna nei zo hin HCFD Missionary Evan. Vanlaltlan Amo-in ruoi inhlanna neiin fatu hai lo suong bawngsa le vawksa chartang inhnik tawk tak le dal le vai anthur but kiltlang a nih.

Session thumna chu Tv. Cliff V. Hekte le Nk. Thelma Faihriem haiin thuoiin inruolsiekna le hla ruoi huna nei a ni a. Pu Lalchungsiem Thlawngate-in infuina thucha tawi a hril zoin Quizmaster Pu Lalramsang Hrangate keihruoina'n Bible Quiz inruolsiekna nei a nih. Nk. Lalruotmawi Pudaite-in financial report a pek zoin Music Secretary Tv. Nehemiah D. Ruolngul-in inruolsiekna lawmman semna hun a nei a. Lawmthu hrilna chu Secretary Tv. Lalneilien Inbuon-in a nei zoin hun khar tawngtaina Upa (Dr.) Lalsiemlien Pulamte-in a nei.

By H.K.Kawllienthang
New Delhi, 23.05.2013

Hmar tronga chîterek ei ti hi ei unau zo hnathlak danghai chun a chin hmel tak a nih an ti hlak. Zo hnathlak dang hai hin thil chîn hrilna trongkam nei hai sienkhom hieng anga chinzie hei hril uor theina trongkam hi chu an nei ve naw ni sien a hoi. British lalramin India ram a op lai khan hi trongkam hi anni ta lo ni sien chu “Divide and Rule Policy” hminga khan “Chîterek” an ti hmel a nih. Hi trongkam “Chîterek” ei nei bik lei hi amani ding chîterek reka inthre darna thil rêng rĕng thaw hi ei chemkalna zawng tak a lo ni el tak hi? An naw leh Sap (mingo) hai ngai sang hnam eini leia Kumpinu lalram policy changchawi ‘divide and rule’ chen kha ei ril rem zawng tak a hung ni pei lei?

Abikin Kohran pawl bing sunga hin hi divide and rule hi ei hmang uor leiin pawl tam tak Hmar lai a suok pha niin an lang. Chîterek reka inthre darhai chunga roreltua ei um fir fer hi thaw thra fe-in ei lan ngai nawk nghal! Tamzie le inphua Secretary/President tia ko thei, eini Hmarhai neka hau lem an um ring a um nawh. Hieng zat ei nei taa chu ei hnamin a thrathnem le hmasawn phàna hril ding a tam bek nawh. Ei umna hmun poah mihai sirde ei la ni zing. Pawl khata luongkhawmin inthuruol inla chu, tuta ei ngirhmun nek hin chu kong iengkimah changkang lem ngei ei tih.

Hun liem ta hnung ei thlir kir chun, Hmarhai laia Kohran sunga inthrena hmasa tak chu kum 1929-a NEIGM-a inthrena kha a ni el awm. Hi truma inthrena hi a san dang tamtak laia Setanin hmangruoa a hmang pakhat nia inlang chu trong thuah, Hmar trong hmang le hmang naw hai kara inthrena a nih. Chun lien tham deua inthre voi hnina chu ICI Kohran 1968-a a koi dar kha a nih. Hi truma inthrena ruok hi chu Hmar hnam sungah kohran rorelna thua inkhuongruol nawna le thuneina inchua inthre ei nih. Chu hnung chun, pawl hran hran a hung suok zui ta pei a. Ei pawl chit ei hmangai ngawi ngawi a, ei hmangai dan khom ‘Very, Very’ a ni top el. Inremnawna leia inthredar hai khan, ei kohran/pawl chu Pathien hring kohran, Pathien min dinpui ngeiah ei pom thlap bok. A ni chie di’m ruok chu ngaituo um tak a nih. Pathien chu thrè thei a ni si nawh. Chun, ei inthrena san hai hlak a chin tiel tiel. Pathien ruok chu zani, voisun le chatuona danglam lo a ni bok si.

Tulaia Delhi tlanga inthrena lem hi chu a hmaa inthrena nekin a la chin nawk zuol, chîterek “Divide and rule policy” lei bok niin an lang. Hienga Hmarhai chîterek reka ei inthre pei si chun, ei inthrena san hlak a chin tiel tiel el bok si a, nakie pha lem chu Laibung/Pahnam hming chawiin, Thriek Kohran,Lungtrau kohran, Khawbung kohran etc.in inthre nawng ei tih ti ngam an nawh. ‘Keini pahnam nina in mi pek ve nawh’ ti suonlam siemin pahnam kohran ei lan din seng hmel a nih. Khaw khatah kohran/pawl 20/30 ei um pha zet chu “Halleluia Chorus” ti ang reng, mawi taka hlapawlpui rem chu harsa ta hleng a tih, sungkuo khatin nau 40/50 hon ei nei a ni ngot si naw chun. Vanrama hlak chun tu pawl kha pawl ti reng a um ta awm si nawh, chi tin trong tin pawl khat chau eini ta awm si a. Vanram kotkharah “Very Very kan Kohran” ti an lo tar naw lem chun,Hremhmun tienga inlawi nuom lem khom um ta bang ei tih.

Pawl chîterek reka um inhoi ei tia chu, tangka sum ruok chu chîterek ni lo, tamtak ei dit seng. Foreign sum lem chu tamtak Van Mana anga hung sur chur chur dingin ei beisei bok. Ram dang sum hmu dan ding nasa takin ei ngaituo a. Sum tieng chu a Top-up dan ding ei zonga, project chi dang dang, thra tak tak siem chu inchuktir hranpa ei ngai bek nawh. Ei kohran/pawl ei tihai ku hin ami hne dan hi mak tak a nih. Ei pawla hai hin chu Very Very vong niin ei inlang tah. Pawl ei hmangai dan le ei inthruoi danhai khom hi Religious Cult rong a kai deu vong ta khom ni sien a hoi. Hmangai ding tak Pathien le mani u le nauhai le hnam hmangai nekin mani pawl chit ei hmangai ta lem. Pathien zarin chu pawl kha pawl chu ka nih ei inti tawl chu an ta hi! Mak thei ngei. Tulai thrangtharhai nekin, kum tienga upa deu,thranghluihaiin mani pawl/kohran ei hmangai bik danhai hi ngaituo non a trul tah niin an lang. Kohrana thoktu ni lo haiin kohran chungchang an hril pha hlak “I kuong naw ding hung nor naw rawh” ei ti pei bok si. Ei hmabak chu inthim tak a nih.

Delhi tlangah Hmar nauhai inthuruol taka Pathien ei chawibiek diel diel lai, Makedonia kona rawl anga ngaiin,”Makedonia ramah hung kai la, mi hung san rawh” ti kha changchawi in, Delhi hi an hung hmu Makedonia hlur a, divide and rule policy hmangin thrang an hung lak a, a mak thei ngei. Nakie pha lem chu Nehemia 4:17-18 kha ei chang dit tak la hung ni nawng a tih ti ngam a ni nawh. Bible-a inziekhai hi mani trânghma sukfihlim le inthiem chopna dinga Bible chang nuomna lai lai hmet de hi thil trium tak a nih. Muslim sakhuo zuituhai lai “Taliban” an nei ang hi, ei nei vena ding a hla bek ta naw ni sien a hoi.

Taliban hril tâka chun, an intran dan tlawmte hei hril ei tih. Kum 1979 a Soviet Union in Afghanistan a run khan, Soviet sipai hai Afghanistan a inthoka hnot suok dinga movement hung suok laia Mujahideen pawla faction pakhat chu Taliban hi a nih. Chuonglai chun USA le Pakistan sorkarin sipai le tangka sumin nasa takin Mujahideen hai chu an thrangpui a. Chu zar chun Afghan Mujahideen haiin Soviet sipaihai chu nasa takin an suom thei pha a. The New York Times-in a ziek dan chun Soviet Union chun sipai 15,000 Afghanistanah a chân a nih. Kum 1989 in Soviet sipaihai chu Afghanistan a inthokin an inhnuk dok a. An President Sayid Mohammed Najibullah chu suom thlain Mujahideen alliance hai chun sorkar ro an hung rel tran tah a nih.

Sienkhom sungrilah an inrem mumal thei naw leiin râl rûka inbeina anni karah a hung suok a. 1994 tawp tieng khan Taliban chu movement hrat tak a hung ni ta a. Pakistan sorkarin ralthuom, military training le tangka sumin nasa takin a thrangpui zui pei a, chuongchun Afghanistana rambung tam tak chu Talibanhaiin an thu hnuoiah an sie tah a nih. Taliban thruoituhai chu an reng deuthawin, Soviet-haiin an ram an hung run leia tlan hmang, Pakistan refugee camp-a inchuk (educated) an nih. Taliban hai hi Sunni Muslim, hnama chu Pashtun an nih. Pushtun mihai hi Pakistan North-West Frontier Province lai tam tak an um a, Pakistan sungah 13 percent lai an nih. Pakistan sorkarin Talibanhai a thrangpuina hi hnama an inkungkeina (ethnic bond) le sakhuona bakah anni hmanga Afghanistan-a thuneina chalai an tum lei a ni deu tak. Sienkhom Osama Bin Laden hung inlang chinah, Taliban hai chu a tira thrangpuitu Pakistan le USA hai ta dinga hmelma lien tak an hung ni tah a nih.

Sakhuonain zung a kei nghet dan hi inthuk tak a nih. Hieng Talibanhai khom hin,’Jihad’ an sakhuo bu Korana inziek hi an hmang indik naw or an inhril hriet dan indik naw leiin firfieka chetna, huoisenna indik lo a hring suok a, poi tawk lo mi tamtakin hringna an chăn pha a nih. Korana inziek “Jihad’ hi a umzie tak chu ‘Indona thienghlim’ ti a ni a. Iraq mi Sunni Muslim-in ami hril dan chun mihriem sunga um suol do tina a nih. Puo tienga inlang suol/hmelma do ni loin, mihriem sunga suol um hi do a hmet deia hne hi ‘Jihad’ chu a nih. Harsatna le buoina ei tuok phaa mani ril rem zawng le tranghma kei zawnga Bible chang nuomna lai lai sirsana hmang ei thaw ei hung thaw el tah dam hi mak tak chu a nih. Jihad indik lo rong ei kai der an ta nawm a nih? Ei Kohran/pawlhai lai hin ‘Taliban’ hai ang hi ei nei fur khom a ni ta el thei. Hnam pumin Pathien rawna ei ngaituo a hun ta hle in an lang.

Hmar Inpui Resolution
24th April, 2013

RESOLUTION

Executive hmasahai le Consultation Meeting-a lo ngaituo tah (Delhi Hmar laia harsatna le buoina thu) le inzawmin hieng ang hin thuthlukna kan siem:

ICI General Assembly vawi 63-na Resolution No. 5 (Delhi khawpuia ICI kohran hminga a hrana inkhawmna na nei), hin Hmar hnam inpumkhatna, inthuruolna le inunauna a suk siet mek leiin Pathien hming le hnam hmangaina leiin lunginsiettaka ennawn (review) dingin ngenna siem nisien tha kan tih.

Hi thu le inzawma tharum insuona le pawl khingtieng khingtieng nat le siet theina dinga hmalakna le Tuithaphai lai vela laibung lo inpuna palai intirna hai suktawp hmak dingin thusuok siem nisien tha kan ti bawk.

Hi buoina thu le inzawma tharum insuona leia tuortuhai hi kutthlaktuhaiin ngaidam an inhni ngei theina dingin Hmar Inpui-in hma la ngei bawk sien. Thataka inremna thuthlung siem thei a ni chun a tuortuhaiin Police-a FIR (First Information Report) an lo peklut khawm hi lakir (withdrew) ngei hai sien tha kan tih.

India ram khawpui haia Hmar hminga Fellowship lo umtah na a hai Hmar kohran pawl tukhawmin kohran hminga inlakhrana inkhawmna nei Hmar Inpuiin tha a ti nawh.

Ziektu: Pu Zarzolien Keivom, Greater Noida

A hming hang hril ringot khoma naupang hmulthi sukngir suou thei laia pakhat chu ramhuoi hi ni ta veng a tih. A san chu ei pi le puihai khan ramhuoi hi ramhnuoia khawsa hlak khawhri chi khat, thilthawthei tak le huoisâr deu el, mihriem sukna hlaktu ni ngei dingin an ring a, tlon lungawi tumin ran thisenin a kuomah an lo inthawi hlak lei a nih.  Tulai chen khom hin ramhuoi trina hi a la rè naw a, mi thaidawp deuhai chun ram pilril deua makhâta invâk an la ngampa nawh. 

Mi tam takin ramhuoi chanchin ei hung hriet chieng tak takna chu Pathien thu ei hung awi hnung le Baibul dam ei hung tiem thei hnung a ni el thei. A bik taka ramhuoi khawsak dan le a thilthaw nuom zawng a ngiel a ngana Baibula a hrilna chu Chanchinthra bu lihai hi niin a’n lang.   Ramhuoi chu mihriem sunga lutin a nuom ang angin mi a thunun hlak a nih ti ei hmu a, ei pi le puhaiiin an lo ring dan nêk dai khan tri a lo um lem hman hman niin an lang. Ramhuoi inzawlpui taphot chu a nuom ang angin a thuhne a,  an thu le hla ni loin a nuom dan le thra a ti dan taphot chu a’n thawtir a, awm lo baksak hiel damin hratna thahrui khom a pek hlak.  Khawhri amanih ramhuoi lai khom hin a suol bik, mi suknat zawng le poi tawk zawnga che hlak, inthup thiem si, an um. Chuonghai chu voisun chen khom hin ei ni lai thiem takin, a rûk a rălin, a la che zing hlak niin an lang bok. 

Marka 5:1-5 ei tiem chun Gerasin rama thlarau tirdakum, a ‘Nuoia’ pai, thlan hmuna inthoka hung suok le Isu an intuok thu ei hmuh.  Chu mipa chu thlan hmunah a khawsa hlak a, tu khoma an thuhnè thei ta nawh. Thirkhaidieta an thlung khomin a suktan pei, thirkol an in buntir leh a suksiet pei bok.  A sŭn a zănin thlan hmun le tlanga hai a khêk tuor tuor a, lung sǐr ngeiin a’n ăt thi neng nung hlak.  Chuleiin, a hrăngna hmuna hin mi an fe ngam zen zen nawh. Mathai chun, “..ramhuoi man pasal pahniin an hung pan a, an kol ĕm leiin chu lampui chu tu khomin an hraw ngam nawh” tiin a ziek (8:28).

Senvona kan um lai mi pakhat hlimsuol kan ti el hi a um a, chu pa chu a nina tak chu ramhuoi zawl ni lem mei a tih. Ramhnuoiah a tlan hmang a, thingkung insang tak taka kaiin mi dam a enthlak hlak a. A chang leh loa tru trâwpa dam riekin, raw fei ngei deu deu dam a maksan hlak a. Chuonga thil poi a tawk lem chu hriet ni naw sien khom, nuhmei naupang a sukthlabăr a, ngaingam taka mmakhata tui chawi le thing phura fe ngam khom an um ngai nawh. 

Ei hril ramhuoi zawlpa ruok hi chu nuhmei naupang chu hril lo, patling inti ngiel ngielhai ta ding khoma pangzatum, inhnawm inzuna fe khom sukhoi lo chi a nih. A sung le kuohai ta ding lem chun, a trium el chu hril lo, khuo le veng laka khom nghatna ding vang pêk ngot a tih.  Chu mi pa chu ama thu chu ni sien, thlan hmunah chun khawsa naw ni a, ama le ama khom insukna bok naw nih. A zawltuin thrangpui naw sien chu khaidiet le thir kolhai khom chu kei tanin sukse zo kher naw nih. A thlarau tirdakum pai chun a’n thawtir a nih. Hi ramhuoi zawlpa khawsak dan le chet dan anga râpum le maksak hi Pathien ringtu intihai lai hin hmu ding ei la um zing niin an lang.

Johan 10:10-a chun, rukru chun inru ding dam, sukhlum ding dam le sukse ding dam chauin a hung tiin Isu’n a hril a.  Ramhuoi ei ti khom hi tu dang ni loin rûkrupa,  mi that hmang, thil um trok trok suksetu, Setan ei ti pa tho a na, an chet dan zirin an hming ei phuok danglam mei mei a ni lem.  Chu thlarau suol le tirdakum ramhuoihai chu tu lai khom hin ei ni lai hin mizie dang dang putin an inlar zing a, thawhla an um em em.  Ei thralaihai lai khom an inlar nasa em em a, zu le sa le damdawi ngawlveinain a man de tlat a, thirkhaidiet le thirkol khoma thlung hnè thei an ni naw a, mani hringna chen khom iengma loah a’n ngaitir hlak a nih. Insungin a tlakran pha a, kohran le khawtlang chen a kakhawkin a dĕng phak a, ama hringtu a nu le pa nun khom thirlinga dep ang elin a trawl hlak. Chu nawa khom chun thralaihai an hmasawn ding anga hma sawn thei lo dinga siemin, inchukna tieng thabona le mani sina depdena tinrêngin a thruoi kawi a, imu thlâkhlăna inneiitirin, internet dam hmangainain a sung sip a, hlawsamna lampui tieng a fen leng hlak. A’n thawtirtu tak chu sukhlum ding le sukse dinga hung pa bok kha a nih. 

Hi ei hang hril, ramhuoi a ‘Nuoia’ tamin zawla an manpa hang vangnei dan hi a ropuiin a mak a nih. Ieng leiin am? Lungril pangngai a hung put nawk el hih a nih.  Lal Isu intuokpui kher kher naw sien chu a hmabak ding chu mihai ta dinga sietna rapthlak intluntu le a tawpah ama le ama inthat ni ngei a tih. Eini rawi khom Lal Isu intuokpui tawl inla nuom a um ngei, ei thlarau tirdakum kolhai ku hi mi hnotdok peka, lungril pangngai puta Lal Isu hnung zuitu ei hung ni theina dingin.

Tu kohran le pawl hneng zawnga kil neia ei hril ni loin eini hnam sunga kohran le hnamin inthuruolna ei tlaksam dan le ei inrem nawzie enin, ei mizie le khawsak danhai hi Pathien ringtuhai um dan ding chu a ni nawh ti ei hriet seng ring um.  Isu hun laia mihai ramhuoi inzawltirtu le an sunga umhmun khuora sin thaw hlaktu kha tulai kum za lawm tah Pathien kohran intihai lai khom hin thiem taka inthup zing pumin, thudik chenve hmangin an lar zing niin an lang. 1Timothe 4 a chun, ni nuhnunga hai chun mihaiin ringna thu hi bansanin, hlemtu thlarau le ramhuoia inthoka suok zirtirna indik naw chu la zui an tih ti chieng takin Thlarauin a hril a, chuong ang zirtirna thu thedartuhai chu khêla mi lemder thiem an ni a, an sie le thra hrietna khom thirlinga dep angin a kang chăr tah ti ei hmuh.

Hi thu hin ringna tum le inchuktirna dang danghai leia inlakhrangnahai chauh a kawk naw a, chi khat, hnam khat, inchuktirna thuhmun, thlarau hmun khat, baptisma hmun khat ni bok si, biekbukin a mi keng ta nawa ti khom ni bok lo, pawl hran hrana inthre dar tumna thlarau khom hi ramhuoi nungchang le thlarau tirdakum thilthaw a ni nawh ti ngam ruol a ni nawh. Sum ngainatna hi suol tingrêng trobul a na, chapona le thu neitu ni nuomna lungril khom hi Lusifar tlak sietna bul a nih ti a hre lo Hmar nauhai lai hin ei um ring a um nawh, a la hre naw dam ei lo um pal a ni chun Pathien ringtu inti sia Baibul tiem ngai thrak lo ni mei an tih.  Mani thlarau chang infuk naw leia Kaina anga unau that nuom tlatna lungril put kohran lai khom hin ei bang nawh. Mani kohran thilthaw chauh thra le indika ngai tlatna lungril nei dam hi Pathiena suok ni loin ramhuoia inthoka suok ni lem dingin ring a um.  Ei Pathien thuin ringtuhai hi Krista taksa ei ni thu le pumkhat ei ni thu ami hril hre zing sia ei ringtu chanpuihai suknat zawng le sukdar le keihek zawnga hma lak ei ching vet khom ku hih ramhuoi zawl, lung sir ngeia in ât thi neng nung le khan a danglamna a um chuong nawh.  Ramhuoi zawlpa khom khan Isu hi Pathien Chunghnungtak naupa a nih ti a’n hmai bik le! Eini tulai ringtu intihai lai khom hin ramhuoi zawlpa nungchang put, Pathien hming sâm inzing ut sia unauhai sietna ding thaw rop ching ei tam.

Ei kohrana Setan kut rolna ra suok ei hnamin a tuor mekhai chu kohran le kohran inhârlakna dam, ei hnam politiks laia inkeichenna le hnam sipai intihai laia innghirinnghona le thisen insuona hai hi niin an lang. Ei khawsak dan le ei nungchang po po hi ramhuoi nungchang le thaw dan char ni lo am a ni?  Mathai 7:17-20 ei tiem chun thing thra chu a ra a thra hlak a, thing sie hlak a ra a thra thei bok nawh. Thing thra chun ra sie a’n suo thei naw a, thing thra naw chun ra thra a’n suo thei bok nawh, Thing tin ra thraa ra naw taphot chu meiah an pei hlak ti ei hmuh. Tipaimuk biela ei hnamin trăm a tuorna hi kum iengzat rau am an ta leh? Ei nunghakhai chalranghaiin an pawngsuol dan hai, sikul le damdawi in tlak siet dan hai, infepawna lam siet dan hai, N.C Hills-a ei mi le sahaiin iengmaloa ei ngaihai kut an tuor nasatzie hai le tu chena khuo hluo thei ta loa rausana um hai hi Pathien ram le hnam invoitu ta ding chun inngaituo chieng a hun takzet tah.

Chu bak chu an le! Mizorama ei hnamin a del chinhai tlakbalzie le an khawsakna inhnuoizie le mihai entleu ei nizie dam hi a hmutu le hretu ei nih. Ei hnamin Autonomous Council a ngenna le inzoma hringna lo chan tahai, fahra lo ding fahraa, hmeithai lo ding hmeithai tahai tuorna hai enin kum sawmhni panga veng vong ei tlangvalhaiin hringna thâpa an lo suol tah le tu chena ei ngirhmun enin lung lai a dam naw hle a nih. Hieng ei hang inzawt kuolhai po poa hin thing thra ei ni le ni naw hriet theina ding um ngei a tih. Hnar hnuoiah inphatna a bo nawh ti ang ziezanga ei thaw suol hriet tum loa ei thaw thrat tlawmte chauh hril vung rak khom ku hih ramhuoi tektik a nih.

Inthuruol hi hratna a nih ti hi taksa le thlaraua dingin thudik tlang, ieng khom pol lo a nih ti ngaituo chiengin, ei thlarau tirdakum pai mi hnotdok pek dinga Lal Isu intuokpui ve dingin ke pên ei tiu. Ramhuoi zawlpa anga lungril pangngai putin, Lal Isu mi tuomna silfenin ei rengin inthuom tum ei tiu. Chu chu ei thratna ding a na, khawvel hmuah mawi ei ta, ei Pathien chawimawiin um a tih. ‘Nuoia’ thuoma ei inthuom sung chun buoi nuoi nuoi le mani le mani innuoi innuoi chauh ei chan ni zing a nih.

KEIVOM RUN (Greater NOIDA)
February 1 2013.