Mizo Union Kha

By :- Pastor H.V.Sunga 

"""""""""""""""""""""""""""""""""""""

Mi thenkhatin “Mizo Uniona Hmar hai ei lo thang kha ei thawsuol anih” tiin chanchin bu a dam an hung insuo hlaka. Kei ka ngai dan ve a chu “ei thawsuol ani hran nawa, ei unauhai ringum zo naw lei chau anih” ka ti lem hlak. Vai khawhnunga chanchin hril hi a bau tam thlak tiin ka hril nuom ngai rak nawh a, ana chu ei hriet –fie naw leia intum ding zawng ang ela mi tlawmngai hmasahai thiemnaw inchangtir ang deuva a um pha an hawi ngai nawh a.

Kum 1946 kha Mizo union intanna anih ti chu ei hriet seng awma. Kha kum khan Simte hai laia Pastor sin thaw Pastor Ruolkhum Leiri leh Naupang Sunday School teacher Training dingin Pu Zalawra in ami hung inchaa. 1945 Kristmas khawm Aizawlah kan hmanga. Training kan la thaw hma deu chun Tlang auvin “Vawiinah mipa zawng zawng Thakthing zawlbukah kal theu tur” a hung ti a, iem ani hrim ti in kan fe vea. Chutaka chun “Hotu tur thlang phawt ila” ti thu a hung suoka. Kei ni chu thil umzie enthlaa fe mei mei kan ni leiin vote kan nei ve nawh a.

Vote an hang tiem chun Pu VANLAWMA a tling tah a. Nawtieng nghaa thung pawl lai chun “Pu Vanlawma khan Chair seat la nghal se” an ti leiin Pu Vanlawma chu Chairman hmun a chun a hang thung tah a, ama chun “Kan hming tur enge? A hang ti a, tukhawm in an dawn nawh, Ama bawkin ”Lushai Federation” I ti mai dawn lawm ni ? a hung ti a, Putar deu pakhat , mipui tieng nghaa thung chun “Ngawite u, ‘Lushai’ kan ti hi kan ti mawi mai mai ani, ‘Lusei’ kan nia, atha manglo asin” a hung tia. Thungna hnung tienga thung kan nia, tum anih ti ka hriet nawh a ka kawla thung putar deu pakhat chun “Pastor Haudala anih sawh ata, a hming chu ka ziek nghala. Pu Vanlawma chun “A awmzia rawn sawi fia nghal la maw le” a hang ti a, Pastor Haudala chun hieng hin a hrilfie a:

“Hmanlai, kan pu pakhat hi Lasi nula nena inneih an awma, Lasi nula chu an hmel an tha hlawm sia, Chutia Lalsi nula nena an mut dun lai chu Hmar pa in a va hmu a, a mutpui, nula hmel tha deu anga lank ha Hmar pa mit hmu ah chuan Saphai (Rulpui) ani si ah. Ani chuan, “E.. ruolah, I va luk sei zerzawr de’ a tia, Chuta tanga ‘Lusei’ tih hi lo chhuak ani” tiin a hrilfie tah a. Chuphing chun lekha ka laka kan chik tah a. “Duhlian Organization” I ti ang a hung ti nawka, Chukhawm chu Pastor Haudala bawk chun “Chu pawh chu a lo chhuah dan atha vaklo asin” ati nawka. Chu khawm chu Pu Vanlawma bawk chun “Han sawi fiah leh nghal la, ati nawka hieng hin a hang hril fie a: 

“Nula pakhat khawhring neih a awma, chu nu chu tlangval pakhatin a rim thina. Nupa ang maia awm tawh an nia. Tlangval chhung tren an hria a, an hau ta vak maia, a rim ngam ta lova. Abial nu Nula chuan achah achan thinah;mahse a kal ta reng lovahh. Atawpah chuan a khawhringin a she ta ah. Chuta tang chuan chu tlangvalpa chu hmeichhe tawng in a tawng ta ah. Puithiam in a bawl ta ah. Anula hming pawh puithiam in a hre ta.

Chuve leh Ui-pa tha deuh in an bawl (thawi) a, Mipa zamawh lem kiu chen (ban tiat) an siama; an pea. Ani chuan a en vut vutah, a pai daih a, “ate em mai a thawl lutuk ang” a ti a. Ahran in Ui-pa liandeuh mai hian an thawi leh a. Mipa zamaw lem bawk kha malpui tiat in ban chen in an siam ah, chu chu an pe leh a. A en vut vut a “Hei zawng a tawt thap taw hang” a ti a a la ta ah, a kenga, pawn ah a chuah puia, a luk ka ah a bawkkhup in a tlu ah a paih dai a. Chu pa chu a dam ta ah. A thian nu chuan a chhuah san ta anih. Hun dang ah nupui dang neiin Fapa a rawn nei ve leh DUHLIAN an saa. Chuta tanga “Duhlian” ti hi lo chhuak anih” a hung tia. Chup[hing chun an dit nawk nawh a. Anleh, adang an ti nawka, “Zomi” niraw se, an ti nawka.

Chukhawm chu “imphal le Tedim inkar a khin ‘Zomi’ in ti an um” an hung ti nawka, an dit nawk nawh a. Pu Vanlawma bawk chun thurawt hung siem in “MIZO UNION” tieng ei ta chuchun hi po hi huom raw se” a hung ti taa,

Chu tuma an inhuomtir po chu:

 

1. Lusei, 

2. Hmar, 

3. Ralte, 

4.Paite, 

5.Thado, 

6.Vaiphei, 

7.Pawi, 

8.Halkha, 

9.Falam hai hi an nih.

Zorama um popo huomin “Mizo Union” hi sak anih. Hmar ram chu “Block” ti an tuma, ei nuom naw leiin “Area” ti ko ei nit ah a. Manipur, Cachar le N.C.Hills po chu “Hmar Area” ti ani bika. Senvawn ah Assembly ko anih a, Chu tum chun mi thahnem tawktak Mizo-rama inthawk khawmin an hung thang vea. Ka la hriet zing a langsar deu hai chu Pu H.K.Bawichhuaka, Pu Pahlira le Nunghak Varziki hai kha an nih. Varziki lem chu ka Pa khan ‘naunu’ tiin vawk a lo that nghe nghe.

Khangkhan Mizo union chu lungriuoltakin ei thaw tlanga, Assembly vawili na vel Darlawn ah Pu Pahlirah chairman a hung nia, ei boruok a hung dang meta, asan chu tlungkim zan block tin in report an pek senga. Atawp natakah chairman in “Tunah kan unau Lam Hmar amiin thu han sawi ve sela” a hung tia. Senvawn palai Tawna a ngira, aruolhaiin a zakuo thla ah an kei thunga, ama chun “a mi ko ta chu tie” ata.

A ruolhai kan la nuom nawh a, inring deuh in “Lam hmar ami kan awm lo” kan hei ti raka. Ama chun a kut pahni phar in “Ka tawng sual ani eh, min ngaidam rawh u” ‘Hmar lam ami” a hung tia. Chuphing chun report ei pek ve chau ani kha. Chutuma inthawk chunei ni chu ei inhnuk naw deu tan ta a, mak hiel ei tuma ana chu malo dinga nasataka an mi ngenna leiin Agreement sign meuin ei la thang nawk a. 

Tuhin Lusei Hills chu pek an hung rem ti ding ana, “Kan unau Hmar lam ami ten an hmuh hma lo chu Lushai Hills chu kan la loving” in tin gam an gem? Tiin an indawna. “Thawkho kan nia, kan ti nak lovin” an ti leia ei la thang ve pei kha ana. Amiruokchu, Mizo District an hung pek khan chawhma khawm nep zo lovin an unau Hmar hai chu ngaisak talovin an lo lak tah anih kha. Chup[hing chun Mizo Uniona inthawka inhnukdawkna (Makna) lekha chu ei pek tah anih kha. Ana chu Mizo union kha mipuiin ei sawr emem ve anih ti ruok chu ei hriet atha.

Mizo Union leia Mipui phurrik sukbova umhai chu : 

1. Lal busung, 

2. Lal sadar, 

3. Lal thapui, 

4. Pawt le vet, 

5. Artui dawl, 

6. Dere dawl, 

7. Su kei man, 

8. Darh man, 

9. Ran khai, 

10. Vawk khai, 

11. Ar khai, 

12. Kel khai.

Hieng ran hai popo hin te an nei pha Lal-in a dit tak pakhat a lak pek tawl pei hlak a nih. Chuong popo chu Mizo union a inthawk khan suktawp a ni a. Tuhin chu tlangram a khawm ei pek ta ngai nawh.