Hlawtlingna Vitamin

By: Eden H Pena
Hmarphairuom
*****************
Apple company a Steve Job chun an Garage (Motor siena) a inthawk bul țanin, chu chu an company ințanna bul tak a nih.

J.K. Rowling (Harry Potter) ziektu hi i hriet ve am? Nuthlawi, nau enkawl lai mek  le rethei ve tak a ni a, tukkhat chu coffee a dawna, to țawk țawkin an țhunga, chuonga an țhung lai chun a lungril ah thawnthu pakhat a hung ahung inlang ta thuta, Napkin (kut hrukna) ah chun a ziek tah a, sawtnawte ah chun lekhabu (Harry Potter) a hung suok tah a, tuhin chu khawvela nuhmei hausa an hril laia țhang ve ani tah.

Film star inlar le hlawtling tak tak hai khawm hi an hlawtling hma chun hlawsamna le beidawngna an palthlang nasa ve hle a nih. American film star hlawtling le inlar em em, Gene Hackman le Dustin Hoffman hai khawm kha an classmate ha'n lemchang khawvela hlawtling ngailo dinga an vote a nia, sienkhawm an pahni hin film star inlar le hlawtling ve ve an hung ni tah. Terrison Ford chu  movie executive pakhat in, "Anni hi chu film star ni dingin tlinnna reng reng an nei thlawt nawh" a tia, sienkhawm Airforce  one, Star war le Indiana jones series film hai chu khawvela film inlar pawl an nih.

Chuong ang bawkin hlasak mihai khawm anni tho, Beatles Band hai khawm kha recording company pakhat chun, "An awri le an music hi kan dit zawng ani nawh, hlawtling ngai naw nihai" an lo tia, sienkhawm an bei a dawng țhak nawh.

Khawvelin a theinghil ngai talo ding, 'King of Rock and Roll'  Elvis Presley khawm kha 1954 khan 'Grand Ole Opry' manager Jimmy Denny chun hlasak thiemlo a tia, an group member  a inthawk a bana, hieng hin ala hang ti zui nawk nghal, "Tlangval, khawlai tuiral khawm kai naw ti nih, fe la, truck va khal rawh" a tia, sienkhawm tuhin chu khawvelin Elvis Presley  hi tum a nih an hriet chieng em em tah.

Honda company chu Toyata company in alo hnawla, sienkhawm theitawp in an hang țhanga, an lekhel nghal a nih. Saichiro Honda chun hieng hin a tia, "Khawvel hi a um dan ang hin ka en nawa, sienkhawm ani thei dan dingin ka thlir lem a nih, ienglei am ti chun, kan company hi beiseina a indin lieu lieu a nih" a ti bawk.

Ford motor neitu Henry ford chun hieng hin a hril ve a, "Mi țhenkhat chu hlawtling ve ngei dinga pieng an um a, sienkhawm mi tam lem chu thutlukna nghet tak an siem leia hlawtling an nih" tiin a hril.

Greek thuvar chun, 'Thilțha i dit chun hmun danga zawng naw la, nanga khan a um a nih ti hre rawh' ati ve bawk.

Mi'n thawthei naw ti nih,  a harsa a nih, nang a ang thaw chi ani nawh, ti hai sienkhawm, ring naw rawh, i thaw theia, an thaw thei thei kha i thawthei ve tho a nih ti hre rawh.

Thomas Alva Edison khawm kha, "I thil siem suok tum hi bansan rawh, thawthei naw ti nih, nang a neka var haiin siemsuok an tum tah a, an thei ta naw hnung ani kha" an tia, Edison chun, '"Bansan naw top ka tih, a thei naw dan sangkhat chuong ka hriet tah a, athei dan chu ka hriet țep an tah" ati dei.

Hlawtlingna chun mihuoisen le taima a ditsak bik a nih. Hlawtlingna in a ți tak chu mibeidawng dit naw hi a nih. Thaw nasat le hlawtlingna hi an kawp a nih. Chun hlimna indiktak chu sin thaw sawlna ah hin a um ti hriet a țha. Iengthil khawm thaw inla, lungtil le titak zeta ei thaw chun sun le zan an zui ang pei hin hlawtlingna in mi zui em em a tih. Min an thawthei chu iengleia ka thawthei naw bik am ana?

Pathien hring bie, ei nia, ei Pathien hlak chun mi țhangpui a nuom em em sia, eini hin ei zir naw leia amalsawmna ei dawng naw mei mei a nih.

Thil pawimaw ei hriet ding chu, ei lungril tumru dan hi a pawimaw tak a nih. Ei hlawtling ding le ding naw chu thil  danga an nghat nawa, ei lungril ah an nghat lem a nih.

Ei thluok hi sâphai thluok le Japan hai thluok leh an ang chara, ei hmang naw lei le ei ngaituo naw lei mei mei a nih. Thil iengkim hi ngaituona a inthawka siemsuok vawng a na, chuleiin ngaituo rawh, ngaituo rawh, iengtin am ka thaw ding? iengtin am? Indawnna chun dawnna peng ati che.. Chu indawnna chun hlawtlingna ramah mi țhuoi a tih.

Mihai hin thil an thaw țan reng reng hin ropui tak le lien takin an țan bik ngai nawh. Inhnuoi taka inthawk le ho taka inthawkin an țan hlak a nih.

US President hlui, George Bush chun, "Bang insang tak in US hi inhuon suok vawng inla khawm, US hung lut tum hai chun an hung lut thei tho ding a nih. Iengleia ei ti chun, US lut tumin an lungril ah thutlukna nghet tak an siem lei a nih" a tia, indik vieu din ka ring.

Hlawsamna in a hnenaw pakhat hi a um a, chu pa chun hieng hin a hrila,
(1)  "Hlawtlingna sirbi suksang i nuom chun hlawsamna sirbi i suk tam a ngai a nih".
(2) Hawna ho deu indawn inla, iengtin am kan suk hmasawn thei ding? A dawnna chu, iengtik khawm hi zawna hi bansan naw rawh. Ka thilthaw bansan ka chaka inthawk hi zawna hi vawi sang chuong kan dawn a nih.

Hieng ang ti thei khop hin harsatna hi alo palthlang rawn reng bawka, chuleiin Abraham Lincoln hi miropui ninaw chi ani naw hrim a nih. A harsatna tuok hai hi hei en ei tih.

*1831 in State lagislator an chu vea, a tling nawh.

*1832 in sumdawngna abei țha nawka, a hlawsam.

*1835 in a hmangai6 em em a ngaizawngnu in a thi san.

*1836 in nervous breakdown a nei.

*1843 in congress member an chu vea, a tling nawh.

*1848 in congress member an chu nawka, a tling nawk nawh.

*1855 in Senate an chu vea, ala tling chuong nawh.

*1856 in US Vice President an chu vea, a tling chung nawh.

*1858 in Senate an chu nawka, a tling nawk nawh.

A tawp tawpa chun hlawsamna chun a hne ta ngang nawa, 1860 kum khan US President 16-na ah a tling ta a nih. Khawvel um sung chu Abraham Lincoln hi a hming bo ta ngai naw nih.

Unau dittak, khieng achunga thuhai khi ei lungrila vawng tlat inla, tu nghet inla, vawikhat/vawihni chu ei lo hlawsam ei thei tah, amiruokchu beidawng chuong nawng ei ta, eini neka lo hlawsam mi tam tak miropui an um tah ti hrieng ei ta, bei țal țal ei ta, bei nawn nawk ei te, nangkhawm mi hlawtling ding i nih ti ka hriet.