Nang Tu Lem Krismas I Hmang Ding? Khawlam?

By Pu Zarzolien Keivom.

Kum bula inthawka dingdihlipa Tlumte thlira ei thlir Krismas chu themphak el ah ei lo tlung nawk ta a, ramdang le hmundang danga thiemzir le sinthawa khawpui hran hrana umhai chun mani khuo ngei a sung kima krismas hmang tumin a thren mani khuo le veng panin an suok nuk nuk meka, a thren chu mani sin le inzawma chawl thei lo pawl chun cham le cham loa mani sinthawna le inchukna hmunah lung tlu lo zeta hmang ding damin an lo in sukthluk mek bok, nunghak le tlangval threnkhat lem chun mani dii hai le hmang tlang tum trala mani khuo le veng tieng pan loa veng dang muol dang zuon mek khom um mei rawi naw ni hai am! Ka tuhai khawm an nu le an sanghai leh krimas hmang tlang dingin Muolhlum Rengkhawpui panin zinghmangin Delhi suok sana an vuong mek lai chun dam le hlim taka an pan ram thuoi tlung dinga Pathien kuoma ka tawngtai lai zing chun, nang teh tu lem Krismas i hmang ve ding? Khawlam? tia mi hung bierukin ka hriet a, a ni ngei ie, kei hi tu le krismas hmang ding luo am ka na, khawlai am ka hmang ding, Ka nuhmei, ka nauhai le ka tuhai leh Delhi Hmar Christian fellowshipah a ni el naw dim a nih ka hang ti leh ni thei chiein ka hriet thei bawk si naw leiin krismas hmangtu mi hran hranhai hmang dan dam ka dap vel ta pei a.

Kan veng lai ankhat tawkin beram vengtu sawm chuong vel dam hi an fak le dawn le an puonthuo phurtu sabengtunghai leh beram a zatel tel tel an hung ching vet hlak a, an fe tawpna hmunah an riek pei hlak , chuong ang deu chun Isu pieng zana berampuhai khawm kha Bethlehem phulah an beramhai an riek ngha ve ni ding a na tiin ka hang zeldin vel a, lung a run ngei ie! Berampuhai hi an hmel le an changchavai le silfenhai en ri ngawt khawmin ngaituo hau rak lo, an beram bak chu thil dang lungkham bek dingin an in lang nawh, chuong anga mi mawl e ti lo chun an krismas hmang ruok kha chu a ropuiin entawn tlak a tling hlen an lang nawk ang reng chu tie, khanga vantirkohaiin van tieng an fesan char khan “Thaw ro, Bethlehemah feng ei ta Lalpa thu mi hril hung tlung chu va en ei tieu” an ta (Luka 2:15). An beramhai kha an maksan tawpa inhmaw takin an fe nghal el a nih, chu lei chun an thil en tum khawm an hmu reng a nih, muong changin a dei ema khuo var phat leh fe el ei tih ti hai sien chu Isu kha Aigupta ram tieng lo tlan hmang pui hman an ta an hlawsam der el ding a nih, Mari le Josefa le ranthlenga naute zal chu an va hmu a, an kuoma vantirkoin naute chanchin an hriettir kha an hril a, a hre taphotin berampuhai thu hril chu mak an ti hle a, Vantirkohai thu hril ang ngeia iengkim an hmu lei chun berampuhai chu Pathien chawimawi le inpak pei puma an kir nawk thu ei hmu a nih (Luka2:20). Isu leh krismas hmang dingin khawvel thilhai maksanin Lalpa thu ei hriet le dawnghai zawma fesuok pui nghal dingin in buotsai ve inla nuom a um ngei!

Khawvel sandamtu hung pieng lawm dinga Bethlehem pana ei fe mek lai hin khawsak mivarhai anga thruoitu Lal arasi en lova mani ngaidan hmang lo dingin fimkhur ei tieu. A kaikuongpa rorel anga sui chun Bethlehem le a sevela pasal naupang kum hnia inthawka a hnuoi tieng po Herodan a that vawng khawm kha khawsak mivarhai lei vawng a nih ti dingin a um. Judahai lal hung pieng ding a ni an ring lei ringawta a phut a phaa anni thruoitu arasi en lek loa ringvang thua Jerusalem an lut chawt el hin thil a tawk pawi nasa hle a nih. Eini khawm thruoitu Thlarauthienghlim ngai sak loa mani thiemna le varna hmanga Jerusalemah Lal Isu ei zawng vai chun mi tamtak hlimna ben deitu ni ngei ei tih, Jerusalem chu hnuoi lal Heroda rorelna tisa ram a ni si a. Khawsak mivarhai khan lal Heroda thu an hriet hnung chun an fe pei a, arasi an hmu chun an lawm hle a, naute umna chung zawn an tlung chenin an hma a thruoi a, In sung an va lut chun Mari le naute chu an va hmua bawkhup meuin chibai an va buk a, an robawm hawngin thilpek rangkachak dam, beraw dam le mura dam an peka an krismas hmang chu hlim hle hai sienkhawm Bethlehem le a sevela chenghai chun an nauhai lu an sun ta tho tho a nih. A pawi khawp el a nih, Bethlehem tieng pana fe seng si tisa rorelna Jerusalem khawpui la hang lut kawi kher kherhai lei hin Heroda hmasielpa lungril chawk thoin kohran in dengthrena chen ei tlung hlak a nih ti hrein tisa le thisen in rawn pui loin mi varhai thruoitu arasi thlarauthienghlim chau enin kal pen ei tieu tiin eiin fiel tak zet a nih,

Sung le kuo, thren le ruolhai le chaua krismas hmang loin Isu le ngei hmang lem inla ei lawm kim a ta, Berampuhai ang bawk khan Pathien chawimawi le inpak pei pumin ei kir ve thei ding a nih. Tiemtu dittak , Isu thrang loa a piengchampha chaulawmtu ni loa Isu le ngei krismas hmang dingin ditsakna insang tak kan hlan che.

(Keivom run Greater Noida)

21 December 2014.