INPUI: Hmar News & Info

By L.Keivom

The power of authority is never more subtle and effective than when it produces a psychological ‘atmosphere’ or ‘climate’ favorable to the life of certain modes of belief, unfavorable, and even fatal to the life of others.-Arthur Balfour

Hmar fin a tlai.-Mizo saying

April 30, 2012-a Tuiruong dunga bu her khawl le darkar riet kan inrùm thlak chur chur laia ka ngaituona hluotu tak chu, Luseihaiin, “Hmar fin a tlai” an lo ti indik le indik naw thu a nih. Hieng ang trongkam hi thu amanih ngirhmun pakhat amanih besana an lo ser suok a ni nuom hle. Trong upa ei tihai hi chuonga an lo ser deuh vong chu a nih. “Hmar var a’n hnu” ti khom hi thil tlung amanih tonhriet pakhata inthoka an hril ni ngei a tih ring a um. Chu ngirhmun le inzom chun a lo indik miel el thei. Amiruokchu, tukver hrang hranga inthoka thlir chun a lo indik naw hle thei bok. A ieng khom chu ni sien, var chu inhnuin inhma sien, var naw nêk chun a thra tah hrim hrim.

Hieng ang deuh pakhat chu “Tuikuk Pathien siam theih loh” ti hi a nih. Hi trongkam hi Mamit Pastor Liandova ser suok, Pathien thu an awi maw èma a hriet leiin, Pathien meu khomin Tuikukhai chu a tawk thei naw thu a hril uorna niin James Dokhuma chun a hril (Trawng Un Hrilhfiahna phek 310). Eini rawi, sakhaw mumal tak khom la nei lo ruolin mingohai sakhaw hung put lut chu a ieng a khaw ngaituo mang loa ei lo phek baw leia kristien tehlem ei suok treuh anga an thaw ve naw lei le eini rawiin bau chaua Pathien thu hril a, ei nungchanga hril si lo ei nizie an hriet chieng talaw leia ei Pathien thu hril an awi naw khom a ni lem thei a nih ti hi pastor hin a ngaituo hlak di’m chu maw! June 15, 2012-a Biaka Renthlei-in Facebook a Special Report a zieka CYMA Treasurer R. Lalngheta-in Aizawl, Armed Veng ‘S’ Branch YMA inkhawma a hril nia a ripawt, “Tuikukte hi Pathianin Mizote chhiahhlawh atana min pêk a ni” a ti dam kha tu lai khawvela mihriem pangngai trong ding chun thil awm lo a ni a, sienkhom ngaithlatuhaiin kut an ben dur dur tho thu a ziek sa tlat a nih. Chu chun ei khawvel dài phàk chin a hril chieng hle awm. Ei kut benna tam tak hi Nazi-hai kut benna chi chauh a nih.

Ka ruolpa Prof. Siamkima Khawlhring ruok chun 1990 khan Delhi-a a hung inzin trumin hieng ang hin a mi hril thung: Tuikukpa hi Pathienin thal kap ding pathum a pek a, a kap ding zatin a thil dit hril a ta, chu chu pekin a um ding a nih. A kap hmasa tak chun, a tin vung vung laiin khuoiin a bawkah a hung bel a, zamawa inpawtin a thal chu a’n thla a. A voi hninaa chun a tin lai tak phaivangin a mazute na deuin a sèpèk a, zamaw boka inpawtin a thal chu a’n thla nawk a. A thal nuhnung tak a kap ding lai chun tlipin a zaperah a hung se zok a, zamaw boka inhràmin a thal an thlà nawk a. A thal inthla laia a sâm tak chu a pieng tira inthoka a nei ta sa a ni bok si. Chuleiin, “Tuikuk Pathien siem thei lo’ ti hi a hung suok a nih. Hi tienami thratna chu, hi thukhawchang hi fiemthubaraw el a ni thu a hril chieng lei a nih.

Kristiena an inpek el nuom naw leia ‘Tuikuk Pathian siam theih loh’ ti trongkam hi ser a lo ni chun, an hnam lungril det lei dam, eini rawi threnkhat anga ring tak tak mang si loa phêk baw ei chìng anga an chìng ve naw lei dam le kristien intihai nungchanga inthoka an mi thlirin, ei sakhuo hi bel tlaka an ngai naw lei dam khom a ni el thei. Amiruokchu, anni lai hi thu leia Pathien khomin a siem thrat thei ruol loa se letdèr taa inngaina lungril a tu nghet chun chèpa thukhawchang an pom tina ni’ng a ta, an hnam ta dinga thrangmawbawk ni bok a tih.

British-haiin an mi op lai khan mingohai hi iengkimah hnam chunghnung lem an nizie le tluk lo rim an innamzie an rampera mihai lungrilah tù nghet an tum tlat a. Mingohai chun thing hi a bulah an hang them a, a hna um zat khom an hriet vong ti dam, silai mu vuong lai khom an man hman ti dam chu an thil hril laia a thren a nih. Borsap pakhat lem chun lalhai kha a khattawkin a ko khawm a. Tukuli silai, a hlo thun chia khan a hlo a’n thuntir treu a, a mu ruok chu arukin a lak suok a, a kutin an fûn a. Lalhai laia pakhat kha, “Mi kap rawh. I silai mu lo man hman ka tih” tiin a’n kaptir a. A puok dur lai chun a kuta a mu man angin a lo ham a, a kuta lum tuta silaimu a fùn kha domin “Hi, in ring naw leh, ka lo man a ni hih” a ta, mak an ti taluo kha am mit a ârintrâ hiel hlak a nih. An misawnarihai chen khan, ringnawhaiin an thu hril an ring theina dingin mitdawivai chi hrang hrang an inentir a; van rama chen khom mingo veng um bik dingin an hril a, chu chu ringtu hmasahai khan an awi èm ém hlak a nih. Chuong ang chun, mingo chauh thaw thei, thiem thei le nei thei nia an lo hril, mihàng le midumhai chun el khom an lo tum sin naw hrim hrim thil, a tam.

Chuong ang chun mingohai khan an rampera mihai lungril bawi an tum a, tu lai chena eini lai mingohai ngaisangna, Pathien ang thawthanga sie tumna lungril hi a hring a nih. Zoram khawvela chu hripui invoi nasa tak chu Aizawl a nih. Chu chu Chanchin Thra hmangraw remchanga hmanga chanchin thra lo eini laia an tù nghet chu a nih. Hi thil hin khawthlang kalchara an lo inthuom tah Gospel hma lak peina ding khom nasa takin a sukchèp pha a nih. Sienkhom hma ei hung sawn ruolin, hieng thil hi indawi vêtna thu (propaganda) mei mei a lo nizie khawvel hmun hrang hrang, abikin Asia khawmuolpuia inthokin ei hung hriet pei a; ei lungril an lo bawina laka inthoka suok zalen tumin, Asian Theology ngai poimaw a trulzie thu dam hi a hung hring suok a nih. Khawthlang kalchar epa khawsak tum rikngot hi kristienna a ni nawh; ei lungril an mi lo bawi hnè leia an kalchar ei biekna mei mei a nih. Television khawvela ei chuong lut hnung lem chun, sun le zân chawl loin an mi rùn a, rùn phâka um hai chu changkangah ei inngai tah lem hiel a nih.

Kan naupang lai, lekha kan inchuk tran lai chun sierkop le science tieng sabzek hrim hrim hi sathu/sithu hmè tlangmihai thluok chun thiem thei ruol loa an mi hril hlak a nih. Hi lei hi’m a ni ding, sierkop le science tieng hi thiem thei lo dinga inngaina ka nei tlat a, thiem thei lo dinga inngai chun inhnikna ei nei naw nghal a. Inhnik tlat lo chun ei inchuk pei naw a, inchuk pei lo chun thiem ngaina a um tlat si naw leiin trum hni zet matric exam-ah ka tlol phà a nih. Ka naupa, ka fak ang fa ve hlak chun sierkop chu hnap ziela a ziel, a fimkhur naw hle chang khoma 90% hnuoi hmu ngai lo a nih.

Nun rama châng trium pakhat chu “Awk ta lailêng” chàng a nih. Chèpa hi chângah a mei ringota inawk a ni khomin, intâl suok tum nêkin “Awk ta laklaw/lailêng” a ta, intâl suok tum loin a awk song hlak niin an hril. Chu chu a thrat zawnga hmang thei a ni ang bokin, a siet zawnga hmang thei a nih. A thrat zawng chun, thil thra ei thaw le thutak ei kengkaw chu ieng angin bansan dingin mi nor hai sien khom, awk tah laileng tiia thrang tlat le ngirhmun inphet lo a nih. A siet zawng chun, thil thra lo thaw ei ching hlak chu einia kop tlat, bansana inthlak thleng thei loa inngaina dam, harsatna le vangduoina tuok changa suok dok thei ta dèr lo dinga inngaina dam, mi thaw thei thaw ve thei lo dinga inngaina lungril dam hi a nih. Chu lungril chun mihriem a pot hnuoi a, a ni ding ang ni phak loin a siem. Sala an man le suoka an sor midumhai chu 1863 khan President Abraham Lincoln-in insuo zalen tawl sien khom, midumin mingo tluk thei lo dinga an lungrila an lo tù det tah khan kum za le sawmnga hnung, midum ngei President-a an nei hnung khom hin mi tam tak lungrilah hmun a la hluo lien hle. Lungril saltang hi thil trium tak a nih.

Hnam tinin indeusawna trongkam hi ei ser seng a, a hau bik ruok chu ei um. Trongsie le zamaw rong kai tiengah ‘R’ Group nekin ‘G” Group an hausa lem daih. Hmar tronga ngat lem chu ‘Zawnga/Zawngi’ ti bak hi chu inbieksisawna trongsie a um naw tluk a nih. ‘Thiempu hnam’ ang deua Hmarhai an hril hlak khom hi a san bo ni naw nih. Sakhaw biekna thil le huoi laka inthawina thila thu le hla tam tak hi Hmar trong a nih. Dawi hla a tam lem khom Hmar trong a nih. Dawithiem hmingthang Lalruong hai, Hrangsaiphui hai, Supheikak hai khan an thaw hlawk. Dawi hla hi chieng taka ei bik chun thluok ril hmanga thu vara inbeina a nih. Dawithiem ni ding chun ukil thiem tak anga ei khingpui let thal thiem a ngai. Chuong a ni si chun, dawithiema inngai le mi ngai hnam, huoi chi tinreng sel dong theina khop lungvar nei hnam chu, an var inhnu ei ti thei ding am a ni?

Hmar hnathlakhai, Old Kuki Group tia Grierson-in a siehai chengna khawvel hi 80% neka tam hiel ka fang tah niin ka hriet a. Zo hnathlakhai laia Tripura ram chena zu thlangtla hmasa pawl, ‘Kuki’ hming put hmasatu an ni a. Sienkhom, an umna zira an inkona hming seng chu hnam hminga puta indelkil an chìng leiin, India hmar saka ram lien tak dela ngir suok thei ding kha, tu chen hin a hrana ram nei lo le inkona hming tlanglawn khom nei loa la khawsa zing an nih. Khawvela hnam khata hung ngir suokhai chanchin ei sui chun, anni laia tu sungkuo le pahnam amanih thilthawthei le inlâr bik hung suokin an sui khawm a ni tlangpui. Chuonghai chu Saptrongin ‘ethnic core’ an ti a, hîpkhawmtu le suikhawmtu ‘hnam laimu’ an nih. Entirnan, Mizoramah ‘Sailo’ lal sungkuo; England-ah ‘Angle’ hnam hai; France-ah Frank sungkuo; Israel thlahai lai Juda sungkuo.

Old Kuki Group sunga inkona hming hrang hrang an nei laia a naupang tak ‘Hmar’ ti hi damten hnam laimu (ethnic core) a hung insiemin, an trong ‘Khawsak Trong’ tia hriet hlak chu Gospel puongdarna ‘leimei’ taka Pathienin a hung hmang leiin anni laia trong tlanglawn (lingua franca) takin a hung inthranglien a, College chena MIL sabzeka lak theiin Assam le Manipur States chun an pom tah. Hnam hming pakhat hnuoia lungruol taka insuikhawm nachang kha hma le tu chena an la hriet naw lei hi ning a ti ‘Hmar var a’n hnu’ an tina san? Annawleh hang bèl dingin ‘bêl koi khit khawm, tui pai thei lo’ an ti anga um, mani le mani indo sungkuo ngirhmuna khawsa an ni leia insungkhawmna tlaka an ngai naw lei? Chuong chu a ni si chun, an hnam ngaituonaah khawfing a la chat naw, var khom an la var hman naw hrim hrim leia Hmar var inhnuk thu hi an hril?

Chu chu hang hril sap met inla. Mizorama political party pieng hmasa tak Mizo Union phuntu le a hnunga enkoltu le thruoituhai lai khan thrungna hmatawngah Hmar mi an inthrung thrup a nih. India rama Scheduled Tribe laia IAS tling hmasa tak Jamchong Nampui (1955) dam, Assam State puitlinga Zo hnathlakhai laia Cabinet Minister kai hmasa tak A. Thanglura (1970) dam, Manipura pieng le seilien, Indian Foreign Service (IFS-1970) lut hmasa tak, hi lekha ziektu dam le misawnari, khawthlang ram zu daidartu le khawvel huopa rongbawltu hmasa tak Rochunga Pudaite hai dam hi Hmar mi an ni naw am a ni?

Manipura tlangmihai laia political party hmasa tak ‘Khul National Union’ (1947) indintu Teba Kilong le a sangawizawnpui Saikham hai kha Hmar an nih. Kum 1949 khan Manipur-a rorelna inpui dinga indin Manipur Territorial Council inthlang hmasa tak a um a, Teba Kilong chu thlang a ni bakah Forest Minister a nih. Ama hi khawvela Zo hnathlakhai laia India ram bung pakhata Minister kai hmasa tak a nih. Teba Kilong hi Kom hnama mi, 1892-a pieng a nih. ‘Kom’ ti chuh ‘Kuom’ amanih, Meiteihaiin ‘Kom’ tia an lam, a umzie chu ‘ruom’ amanih ‘khur’ tina, chu umzie chu ‘pûk’ a ni a, an hnam hung suokna chu ‘Khurpui’ niin an hril a, chu chu ‘Sinlung’ tia mi dangin an hriet hi a nih. ‘Kom’ umzie chu ‘Sinlung suok’ tina a nih. Zo hnathlakhai lai chauh khom ni lo, India khuo-le-tui mi, khawvela nuhmei boxing inruolsieknaa Champion ni rawn tak Mary Kom khom hi Hmar nu tho a nih.

Uongthu chang naw sien, Londona um ka naunu Fashion Designer, Wellington (NZ) um ka naunu Deputy Chairperson (District Council le New York khawpuia um ka naupa Photo-Journalist haiin chawimawina le lawmman an dong hlak hi Zo hnathlakhai lai tu chena chuh tu khom a dong an la um naw el thei. Keini sungkuo chun ieng lai khomin ‘Hmar fin a tlai’ ti hih kan pom ngai nawh. Chuong ang char chun, “Zo fin a tlai” ti an um khomin kan pom bok nawh. Pom nêk hmanin, ringna mita ‘Zoram Khawvel’ la hung pieng pei ding thlir a, a lampui ding sattu laia thrang ve sungkuo kan ni a, kum 1989 khan ‘zoram khawvel’ ti trongkam hi serin, chu hminga lekhabu pariet zet ziek tah ka nih. Varin inhnuk inhmat a nei nawh. Dawha-vervekna ruok chu inhlèmna hmangruo a ni leiin, inbuon tran hmaa mi kher ang a ni a, sawtnawte hrât angin inlang hlak sien khom, thudik le thutak a ngirna, Pathien rorelna hmaah a dingchang sawt ngai nawh.

Mi tam tak zawna indon hlak laia pakhat chu: Ieng leia Hmar bubitna khaw tam lema Hmar nêka Kuki lal an tam lem am a na? ti hi a nih. ‘Hmar’ tia kohai hi Mizorama chambang, Lusei lalhai, abikin Sailo lalhai inlalna hnuoia um, anni rawi 1850-1880 inkara an hung indo kha remchanga la a, an lalnaa inthoka suok dok a, hmar tieng an pan leia Luseihaiin “Hmar-ho’ tia fiemthua an kona, hming tlanglawna hung hmang ta pei chu an nih. Manipur an lut chun tlangrama lalna po po deuthaw hluotu chu Thado-Kuki an ni a. Sailo lalhai le Kuki lalhai chepdèna karah hring khawsuok ngaina uma an hriet naw leiin, Hmarhai cheng rawnna khuo po po deuthawah Kuki lal an sie a, an him pha tah hrim a nih. Entirnan, Khawlien le Phuoibuong le Hmunlet lal Letzakai Sithlou pate chu Manipur Reng sipaia Subedar a ni a. Sailo lalhaiin buoina an hung siem vai chun, Manipur Rengin anni chu san nghal dingin an ring a nih. An var thiem leiin an hring pha tah hrim a nih.

Chu le inzoma thil tlung pei chu, Letzakaiin a naupa Lalmang inlalna hmun ding a khawnbawlhai a’n zongtir leh Tuithraphai simsak kila um Khawpuibung an thlang a, a khaw chenve inpem dingin an ti a, March 1911 khan in 50 an inpem tung phot a. Lalmang chu lala fe a nuom nawk ta naw leiin le Hmarhai lai lal ni nuom an hmu zo naw leiin Laimanaia um Bakpu Singsuon an zu ko suok a nih. Hi khuo hi sirsana hmangin Tuithraphai chu damten leilet hmun dingin Hmarhaiin an thriek a, kum 30 sungin Tuithraphaia leilet thratna po po deuthaw chu an kutzàlah a tla a, khuo 12 chuong an indin bok a nih.

Senvona lal dinga Leiri pahnamhaiin an zu thruoi chu Jiri vadung kama um Changkel lal Khawtinkai naupa Ropui Singsuon a nih. Suonmonga a thi hnungin Kamkhawlun-in lalna a hung chang a, ama inlal lai, February 5, 1910 khan Watkin Roberts a hung a, ringtu an hung um a, sikul an indin bok a, a kum linaah Thado-Kuki Pioneer Mission (a hnunga NEIGM) chu a pieng a. Hi gospel mansa bangna Senvon-a inthok hin Churachandpur Biel, Cachar, North Cachar Hills, Tripura, Chittagong le Chin Hills ah chanchin thra meiser chu sit lutin a um tah a nih. Hi rongbawlnaa a kûl a taia thrang, thla tam inzin hlak Khuma chu Hmar a ni a, Mizorama kristien hmasa tak a nih. Hmar trong khom Chanchin Thra rongbawlna hmangruoa Pathienin a hmang leiin Hmar hnathlakhai laia trong hmasawn tak le inlâr takin a hung inthrang suok tah a nih.

Tuithraphai hnienghnar, Kuki lal hrang hrang inlalna hnuoia uma chun kum 1911 March khan Hmunlet-Phuoibuong-Khawlien a inthokin Hmar mi in 50 chauh Khawpuibungah an inpèm tung a, Chanchin Thra an phur lut bok thu le kum 30 sung chauin, Tuithraphaia leilet thra hmun tam lem chu Hmarhai kutzàlah a lut hman thu ei hril vuot ta a. Hieng lai hun bok hin a nih Tuiruong/Tuiriel dung le a se vel ram hi an lo hluo tran bok chu nih. Hi thil hung tlung hi a poimawzie man phaktuhai chun histawria thil mak (miracle) pakhata tiem tlak hiel a nizie inhmai naw ni hai. Hieng laia an hmun indin tam tak, entirnan Hmarkhawlien le Vairengte dam hi Zo hnathlakhai suok le lutna le an hnukpui tak a la hung ni zuol pei ding a nih ti hih zing nisa suok ding tluka inkhêl lo ding a nih.

Pathien pêk, rangkachak ram an delh hai hi a nina ding angin an hmang trangkai am ti ruok chu zawna don chakum lo tak a nih. Talen khat koltu ang khan, mi dangin sukhlawk sia anniin a ngaia an kol thûk zing ringot chun, inkoltirtu lungsenin a thil inkoltir chu la lapek a ta, a sukhlawk theitu kuomah peng a ta, an talen kol an sukhlawk naw leiin hrem a ta, trapna le harawtna hmun thimah pei hmang a tih. Hmarhai ngirhmun pal lai ei thlir chun, kum iemani zata inthok tah khan invêt thar an thaw amani aw ti dingin an um a, Pathien trina inhmangin, mani le mani insèkhêk le inbakkeiin an buoi a; an leilet thra, an hnuk hrui tak chu in hmuna inchangtirin an zor thlong mek a, Manipur phairuoma chenghai hripui, mani hnuk hrui sat tan hi sinpui pakhata an hung nei mek pei chu a nih.

Hieng ka hung tar lang, chanchin iemani zat hi April 30, 2012-a Tipaimukh-a inthoka Hmarkhawlien pana longa ka fe laia ka ngaituona vuong vel laia mi a thren ka hung thur suok a nih. Hmun hrang hranga an ram delh chin le Zoram khawvela bul trantu an nina tam tak ei thlir chun ‘Hmar fin a tlai’ an ti hi chu a lo indik hlel khop el. Chu chu ei hril lei chun an var hle ei tina khom a ni chuong nawh. (June 23, 2012 Delhi)

Note: Hi artikul hi Sinlung Hills serial-a tawpna tak dinga ngai a nih. Ka ziek zo vong hnung, ka ennon tran chauh tiin kan hmun phittu Anjuli-in ka thrungna hmun a hung phit lai ka zuk inher met chu ka computer keyboard-a a ieng amani ka tawk fuk leiin a bo vong a. Hmawsaruma inzom naw neng nunga ka hung ziek nawk hràm a nih. Author

By Oliver Intoate

Tulaia ei hnam, hnam dang haiin an hmusit em em hi, inhawih naw chu ei ti seng ka ring, a san lentak chu eiin thuruol naw lei a nih. Hi hi mi tu el khawmin eiin phat ngam ka ring nawh. Ei inthuruol nawna san chu ieng lei am ei ti chun, a bulpui tak chu Kohran inthrena, doctrine le ei Pathien ring dan inang char siin mimal duamna leiin sukthrein ei lo um lem tah a nih.

Hi Kohran inthrenain a ra suok hmasa tak chu, unau thisen inzawmpui ngei ngei chunga thisen insuo ngamna, intheidana, etc., hai hi an nih. Sungkuo thila inhmu khawmna einei chang khawm, thlaithleng ei awt hmunkhat thei naw chang khawm a tam, kohrana inthenna leiin.

Hi inthrena le inngei nawna hin ei social life nasa tak in a suksiet, a tak taka inthuroul thei nawna nasa takin a siem. Imphal mithi an um chang, an naw leh social meeting, gathering thaw chang khawm, a ieng korana inkhawm in am siet a tuok, a ieng kohran inkhawm hin am hi social gathering a leardership nina a lak ti hi, mi mawltak khawm a, ei zuk hrietin ei hmu nghal thei.

Chulei chun ei political activity hai khawm a hrat thei ta naw a, nasatakin hnam dang hai a inthawk discrimination, inhmusitna ei hung tuok tung ta pei a. Ei unau Paite le a dang dang hai hi, kumsawm hmain chuong bek beka hnam inza um le ngaizang an hlaw ngai naw. Chu nek hmanin, Christian ei lo ni hmasa lemna leiin, einia inthawk Chanchinthrahai dawngin, ei hla tamtak hai khawm an tronga inletin a um.

Sienkhawm, kohran inthrena ei hung tonga inthawk khan, politically, economically, activity tak tak hi a hnam pumin nei thei a hung ni ta naw, mimal tam tak chun an hlawkpui, ei thilthaw ta popo haihi a kohran bingin a hung fe ta vawnga, khohran pakhat hlawkna chu, pakhat ta dinga natna, thikna thralo siemtu. Ka unau pakhat in kohran danga sawma pakhat va pe sien, keiin a danga, kei ka sawma pakhat pek chu a hringa, ka unau ka dit naw hai kohrana sawma pakhat a va pek ruok chu a thi, ti ngaidan hiel nei khawm ei tam.
Hi factor lei hin sawt khawm trul lovin, ei unau hnam danga inthawk harsatna, hmusitna le kawng dang dang discrimination tam tak ei hung hmasawn a, chu beidawng chun, inthuruolna chi khat hung ra suok a, chu ra suok chun political movement pakhat a hung hring suoka ralthuomhai chen chawi ngamin nasa takin hma ei lak tlang a, a daltu tlawmte umhai sien khawm. Khanglai khan kei chu naupang chite chau ni lang khawm, kha political party leia hnam dangin an mi tri or inzana bourouk kha ka lo intem phak ve. Sienkhawm hi political party/movement hi, kohran daia inthawk an thir fihlim thei tak tak chuong naw, chu nek hman hman chun, a kohran thruotu hai hai kha, hungin rawl luta, a hma latu lai a pawimaw ni nuom in thrang nasa tak an hung lak ti kha mitin in ei inphat ngam ka ring naw.

Hi political party hi hmar popo inpumkhat a ei um theina plateform pakhat ei nei sun kha a ni hrim a, amiruok chu, hi platform ei beiseina popo ei sina le ei neisun chu, chupa, khapa in a nuom nuom a a hmang thei, annawleh chuonghai kohranin an chawm ti thei ding khawpin a hung danglam ta ani… Iengangin hma lain, silaihai chawiin inhro sa inla khawm ei hmelma do anga eiin ngai lai zingin, eini le eini inkap le inthatna naw chu ei thawsuok thei ding umin an lang ta naw. Ei nuorna suk langa SHDC a inhnuk dawk ei in sawn zing lai in, a hung hlu nawk tu chu ei unau ngei ngei hai tho. Mi hmusit tu zukdo tum reng reng inla khawm ani hai le inkhing hma a eiin khingpui ngei ngei dinghai chu, ei hmar unau chanpui hai tho, anni hai zukdem na ding san biek khawm ka hriet nawh, anni hma ei um dan hai kha an dik biek chuong naw, a hnam pum ta niding ni awmtak a kohran, mi mal in an ta biek anga an nuom nuom a an hmang mei mei thei, hmelma zuk do nading hmun a um ta naw. Vaak dum a vungsuok ruol ruol in, ei beisei nahai khawm chu boruok lai a thamral naw ti thei an naw.

By L.Kevom, IFS (rtd), Inpui.com Columnist

The question is not what you look at, but what you see- Henry David Thoreau

Goodbye: Tipaimukh

April 30, 2012 Thawtranni. Zing dar 7:30 vela suok dinga inti kha zing bu fak le sung inkhawm malama kohran pali- EAC, EFCI, ICI le UPC- enkoltuhai le kan tlungna Biellienthang hai Baibul (Delhi Version) kan rochung hnungin 9:30-ah Tipaimukh chu kan suoksan thei chau a. Chu laia ka ngaituonaa thil hung lut chu kum 1871-72 Vai Lien truma an rùnna san hlena Champhaia inthoka Tipaimukh-ah an hung kir thu le March 10, 1872-a an suoksan lai thu Lieutenant Woodthorpe ziek,

“India Sorkar thu suok ka hril tah ang khan, March 10-ah sipaihai le kulihai chun Tipaimukh chu kan suoksan a; bûk hlui le kudam rausan hnunghai pal tlanga hung luong Tuivai chun chawl loa luong ri hieu hieu Tuiruong chu a zuk fin a; kulihai khek so ri le sai inpawt riin an sukbuoi ta naw a, a sè vela ramngawhai khom a pangngaiin an rè nawk dup a, rûntuhai hreipui thlak ri thangkhawk hrim hriet ding a um ta nawh” (By the 10^th of March, in accordance with the orders of the Government before quoted, all the troops and coolies had bidden farewell to Tipai Mukh; and the Tuivai itself, flowing past ruined huts and deserted godowns, once more greeted the Barak with its ceaseless babble, undisturbed by the cries of coolies and the trumpeting of elephants, while the surrounding jungles relapsed into their former silence, resounding no more to the blows of the invaders’ axes”

ti The Lushai Expedition 1871-72 (p.305) a mi kha a nih. Kum 1965-a Gauhati University Library-a hi thu ka tiem hmasa tak truma a mi tawk dan le Tipaimukh an suoksan ding lai hlimthla, ka suongtuonahai chu mitthlaah a hung inlang a.

Tu khom hin Tipaimukh chu a la rê hle a, ri nei ding ramsa le vate hai hlakin an trinsan zo tah si leiin, tui lien so ri le Vai kuli so ri naw chuh thil ri dang hriet ding a um nawh. Amiruokchu, ruoi thrèna dinga sechal thlung, a thi ni ding hre loa ngaingam taka hlo a hmu phâk phàk pet miel miel ang chauh a ni si.

Ram hausakna suktlarantu

Zilthaw-ah kan thil theinghil lam ding le kan Baibul pek dinghai chu inhlàn dingin kan chawl a. Kan Baibul pek ding khah Tipaimukh-a kan tlungna inah kan lo maksan palh leiin annin lo pe sawng dingin thu kan incha a. Zilthawa hin Vai hon khat, bufai, dailuo, alu, têl le thil dang dang, kâr iemani zat ring khop phur, kan longah an hung chuong a. A hma khan long pakhat an làk a, an inkuolpui hrep a, sienkhom trum loin an hung kir nawk a nih. Anni rawi hi raw sata inhlaw tum an nih. Kan fe thlak kha Tuiruong kama raw bil thratna an melkai ngat ngat a, voi khat an trum vàng a, an thrul nawk a. A tawpah Patpuihmun rama raw tamna hmun ni dinga an beiseia chun an trum a. Hienghai hi iemani chen hieng lai ram hnuoia hin silpawlin zarin inkul an ta, ruo le thil dang dang sàt ding an hmu po po an sàt zo pha leh têl hrang hrang chu khit khawmin, pûmin siem an ta, fur tui a hung lien zuol pha leh vairampur tieng zor dingin an tol thlak hlak a nih.

Tuiruong dunga ei ram thing, ruo, taiting le thil dang dang an hung lak nasatzie le ei ram an sukcheureu dan hi hrilin a siek nawh. Pawlitiks thiltum poimaw laia pakhat chu ram humhal a ni a, chu chu ei thaw thei sung chun hnam a him a, ei thaw thei naw chun hnam ngirhmun a derthawng nghal a nih. Lampui thra khom hi dit a um lai zingin, a mihriem chenghaiin ei hmang trangkai phak si naw chun hnam changkang lemhai mi rokna ding lampui ei hongpek duoi mei mei a nina chin a um. Ei ram hausakna an hung thlengna hlak chu taksa ta dinga thratna pai lo le hriselna ta dinga trium, hawp le hmuom chi hrang hrang, dawr mawitu dinga ei khai bawr trek trukhai hi an nih. Ei ram hausakna an rok laiin, ei sum hmu sunin an tùr siem chi hrang hrang ei inchawk a, trûl loin, a lu bawk taphotin mobile ei chawi fir fer a, ei hmet zatin hausa tontawhai ei thrangpui a nih ti ei ngaituo ngai si nawh.

Isun, “A nei taphot pek belsa ning an ta, hung hau an tih. A nei naw chu a nei sun khom làkpêk ni’ng an tih” (Mat 25:29) a ti khah eini chauh khom ni lo, India hmar saka tlangmi chêng po po deuthaw hin ei va hang sukdik chieng de aw! ti dam chu ngaituonaah a hung lût bok a. Hi tekhin thua talen sukpung dinga ditsakna changtu hin sukpung nêkin hmang trangkai loin a sie ringot a, a pu lung a suksen a, a lakpek nawk a, a hrem bok a nih. A nih, thing le ruo tamna, thei le thlai tinreng thrat nuomna Tuiruong dung ei hluo a, ei ram hausakna sukpung nêka a um sun khom ei sukcheureu el hi a san mani le mani indon a, mani ei inbi chieng a trûl ta khop el. Ieng leia ei hluona chin hi thring a, a trawl bor bor el bik am ning a ta? Ieng leia Pathienin a mi pek einia talen le ei ram hausakna zozai hi sukpunga ei hmang trangkai thei naw am a na? Ieng leia fakzongna po poa hlawk naw tak tlâng lo nei hi ei la khèl thei naw am ning a ti aw?

Kangreng Dawr

Hmar Biela inthoka Hmarkhawlien chena Tuiruong vadung kam sir tuoka khaw tam lem hi Hmar hnathlakhai delh, ram thra le hnienghnâr a nih. Sienkhom, an ram dela hausakna inphûm zozai hi ieng leia an hmang trangkai naw am a na? Ei nghatna tieng photah hmasawnna hnuhma hmu ding a um nawh. Tuiruong kama khuo pahni char entirna dingin hang hmang inla. Pakhat chu Kangreng Dawr a na, a dang chu Tupidor, IAS pachal pakhat hringtu hieng lai dunga khaw um sun a nih. Tupidor hi ‘Trubidawr’ tiin an lam tlat chu tie! Mingo pakhatin Tuiruongah a lukhum (Tupi-topi, topee) a sukthlak leia hi khuo hin hminga put tah niin an hril.

Kangreng Dawr hi January, 1964 khan ka sir luot ta a. Kum 45 hnung, February 20-21 2009 khan ka sir nawk a. Chu trum chun zanah RPC sikul tuolah vantlang inkhawm an huoihot a, bau kham rakin ram le hnam thrangmawbawk ka hril a, a tlàk fùkna kil khat bèk chu a um el rawi mawh! Tuta trum April 30, 2012 khan ka sir nawk luot a. Hi hmuna hin 1916 khan Kangreng lal Phakpu inrawina hnuoiah in 11, mihriem 54 lai an zu’n bawk tran a, a lut hmasa tak chu Sana (Zatlingpa) niin an hril. An um trana inthoka kum 93 hnung, 2009-a ka zu sir chun in 160 vel an ni ta a, kum hni danah in thum an pung tluk a nih. A lawilen a’n hoi bakah Mon Bahadur Road-in a hraw a, electric ban chen khom phuna a hrui an keizam uoi phàkna tah khuo a nih. Sienkhom thir leilak chu a khaw mihaiin Mizorama an zor bakah electric hrui khom taiting satin an sat a, an zor vong ti a hmain thuthang ka lo hriet tah a. 2009-a kan inzinin thu indik a ni le ni naw ka’n don a, a nizie thu an mi hril.

Anni ngeiin, “Kan làk lai sipaiin an mi hung tuok fùk a, kan mongtamah an mi hlap a, a na kher el” tiin, inzak hmêl put thrak loin, innui pumin an hril. Mani hmang trangkai le hraw ding leilak thìr amanih, mani sor trangkai ding electric hrui amanih uolâu taka hang inrûk ngamna lungril chun Pathien trîna chu hril lo, khaw var inzàna hlektê khom a pâi ta nawh ti a chieng. Chuong ang lungril put kuoma chun ieng anga talen thra inkoltir inla khom, sukpung nekin suktlaran a tih ti ringhla a um nawh. Isu tekhin thu hrila talen khat koltu chun sukpung naw sien khom sukhmangthai loin kol bêk a la kol thra a nih. Tuiruong kam ram thra le hausa inhluotirtu Pathien chun a ditsakna changtuhai lakah beisei a nei a, chu chu an talen kol sukpung a nih. A beisei anga khawsa lohai chu a lawm ngai naw a, malsawm zui pei nêkin trap le harawtna hmun inthimah a pei lem a nih ti tekhin thu hin a hril a nih.

Kangreng Dawr hi kum thum hnunga ka sir nawk a ni a. Ruo a sûr hmer hmer zing leiin le pheikhoka chihrak kai luoi kha mi ina hang lutpui inphalam a um leiin kotkhar puoa inthokin an lal Rochung ka hang chibai phot a. Chu zoah, kha hmaa ka hung san, RPC School hang sir vuot ka nuom leiin kan pan tung a. An hotupa-in naupang ruol tuolah inngirtir a, thu a lo inbà lai a ni leiin a hril zo hma po veranda-ah kan ngìr ve a, a zo chun kan inhmaw leiin a sungah lut loin kan chibai tawl a, kan suok nawk nghal a. Minit tlawmte ka sir sunga ka hmu dàn chun, 2009-a kan sir lai nêk khan hi sikul hi a tla hnuoi tah lem nia hrietna ka nei tlat a, chu chu ka ngairuotna mei mei, thukhêl ni sien ka ti ngot el. Hmasawnna hnuhma thar ka hmu bok nawh.

Tupidor (Trubidawr)

Hieng lai suka IAS ofisar suokna khaw um sun Tupidor (Trubidawr tia an lam) chu February 20, 2009 khan ka sir luot a. A san chu hi khuo hi ka laibungpa Rothanglien Hmar, Pherzawla lekha hung inchuk hlak piengna le seilienna khuo a ni lei a ni tak. Ama hi harsatna le chona tam tak pal tlanga lekha inchuk, 1968-a IAS tling, 1971-a rongbawl dinga a sina inthoka inbàn a, Diphu-a hmun khuor a nih. Kha hma khan tuta ‘Karbi’ ei tihai hi ‘Mikir’ tia hriet an ni hlak a, Karbi-Anglong khom hi ‘Mikir Hills District’ ti a ni bok. A nuhmei Dr. Arlice hi an hnam laia Medical Doctor hmasa tak a ni el thei a, sorkara thrangna nei a nih. Sin inbàn v eve-in kum thum Burrows Memorial Christian Hospital, Cachar-ah an thok hnungin 1975 khan hmunpuia Diphu hmangin Bible Baptist Church an indin a, chu taka chun an nupain rong an bawl tah char char a nih.

February 1, 2009 khan Diphu-a an inah ka sir a, kum sawmli hnunga kan inhmu nawkna hmasa tak niin ka hriet. A khaw hlui a sir ngun le ngun naw thu ka’n don a, a sir nawk ta thrak naw thu a mi hril chu mak ka ti hle! Hi truma ka’n zin hi RPC (NEI) rongbawlna chanchin le an hma lakna research thaw dinga Ringum Khawbung le inzin kan nei leiin Tuiruong dung chen hrûtin, Rothanglienhai khaw hlui Tupidor khom February 19, 2009 khan ka hang sir vuoi a. Ka thil hmu chun thil tam tak a mi’n ngaituotir leiin, chu thu chu hi ka’n zinna bung le changa hin ka hang zep sa vak a nih.

Hi khuo hi Cachar Biela Forest khuo pakhat, a lawilen inhoi, a ram khom lien tak le hausa tak a nih. Kum 1922 laia Chungpu Changsan rawia an hluo tran niin an hril. A sangpa Lervung le an nuhmei chu unau ve ve an ni a. Kum 1915 laia kristien an hung ni chun an tarpu-in a remti naw leiin a naunu pahnihai chu a lakpek a, nuhmei boin harsa takin an khawsa a. Chuong lai chun a khaw ral Manipur tienga khuo Jakrador-ah inkhawmpui a um a, chu chu hmang dingin misawnari Watkin Roberts (Saptlangval) le a sunghai le Edwin Rowlands (Zosapthara) an hung ve a, Manipur-a riek theina phalna an nei naw leiin Tupidor kai, Tuiruong kamah bûk an khuor a. Hi hi January 12-15, 1922-a Thado-Kuki Pioneer Mission inkhawmpui an hril vet, January 11-an an hotu tak R. Dala chu lampuiah tuihria a thi leia a zán a zàna a ruong an vui chùk chúk trum kha a nih.

Chu tieng pang chu maksanin, ei thu zai le inzom tieng kir inla. Chungpu le Lervung chun an harsatna thu chu Watkin Roberts le Edwin Rowlands kuomah an lo intlun a, kristien khuo siem phalna Forest Department-a hnipui dingin an ngèn a, misawnarihai thrangpuiin Tupidor khuo hi 1922 khan an indin tah a nih. Hi khuo, February 20, 2009-a ka sir ve hin kum 87-a upa a lo ni dèr ta a, in 80 vel chauh an la ni a, chuonghai laia in 20 vel chu Vai an ni nawknghal a. Chuonga khaw upa le ram hausa, IAS pachal pakhat suokna ni sia chun, ka sir lai hin L.P. School pakhat, naupang 50 bawr kaina, bilding chikte, pindan hran khom um lo, zirtirtu pakhat chauh umna an nei chu tie! A hmuna ei hang hmu chie chuh, bauah mei khù a suok el a nih. Vadung kama um a, ram hnienghnar hluo si, ieng leia an inthrang suok thei naw am a na? Ei var thiem dan hi a fûk ta naw am a ni?

Sikula ka ngir lai hin February 1, 2009-a ka unaupa Rothanglien Hmar trong kha ka hriet suok vong vong a. Ieng leia a khuo hi a sir nawk ta ngai naw am ning a ti aw? Kei hlakin ka pieng le seilienna khuo Pherzawl hi ka remchang hun taphotah ka sir bâkah mang le ngaituonaa ka chèng rawnna hmun a la ni zing bok si! Ka nuhmei khom hi Pherzawla pieng ve ngat a ni a, kan nauhai khomin Pherzawl khuo an theinghil a thieng naw a, an theinghil kan phal bok nawh.

Israelhai hi ka ngaisangna san pakhat chu hnama an chiengna le an pi le puhai chengna ram an ngainatna le hlutna hi a nih.

Aw Salem, ka nghil che chun,

Ka kut chang hin a thil thiem,

Arêngin theinghil raw se;

Ka lo innghil pal che a,

Jerusalem sînga hlut,

Thil dang ka nei ngai hrim chun,

Ka lei ka dangah kop raw se

ti hih an hnam thunon a ni kumkhuo. Ka ninaah ka chieng ding chun, ka pieng le murnaah ka chieng phot a ngai. Pherzawl ka ngaina naw chun, mi chawilientu ka nu le pa ngaina lo ang ka nih. Ka nu le pa ngaina loa ka chawimawi naw chun Pathien thu bawsetu ning ka tih. Pherzawl ka ngainat hin tû thû nêk hmanin Pathien thû ka zawm a nih. Inzàpui lang nu le pa inzàpui ang ni’ng ka tih.

Kristien ka ninaa ka chieng ding chun Pathiena pieng le Pathien chi paitu ka ninaah ka chieng a ngai (1 John 3:9-10). Pahnama ka nina ka chieng naw chun Hmar ka ninaah ka chieng thei naw a, Hmar ka ninaah ka chieng naw chun Mizo ka ninaah chieng thei naw ning. India khuo le tui ka nina sui chieng ding chun Pherzawla inthok naw chun a thei nawh. Van ram lekhabu hi nina inchikna lekhabu a ni si chun, ka hming ruolin Pherzawl khom a chuong sa ngei ngei ding a nih.

An leh, a khuo sir ta lo, ka laibungpa ngirhmun hi iem ni ta’ng a ta? Mikir (Karbi) daktor nuhmeiah a nei a, Mikirhai lai rong a bawl a, a tlum hmang veng veng a, thrangthar lai lem chu a hming hrie khom an um ta naw tluk a nih. Sienkhom, chu chu thlaraua inthoka inhriettirna le chona a dong dan a ni tlat chun, nang le keiin ieng am ei hril thei ding? Kei chu nationalist ka ni leiin, mani mihai ngaisak hmasa loa mi dang ngaisak lem daih hi ka Pathien thu hmu dan a ni phàk vé tlat nawh. Mi dang san hmaa mani huon thlo fai hmasak phot hi mi tin kros a ni a, mani huon thlo pei loa trûl bura hla a, mi dang huon thlopui daih chu ni tin mani kros seng puta zui dinga mi hriltu thu leh an inmil chie naw el thei. Paula khomin a tìra a’n voi tak chu a hnampuihai an ni a, anni rawiin an hnawl leiin Jentelhai tieng a ngha chauh a ni khah. Rom 10 & 11 a chipuihai a hang invoizie thu le Jentelhai a sie hnuoizie thu a ziek dam hi Pathien thu rong kai loa ngai pawl an um a ni khomin, thil awm a ni hrim a nih. Mosie khom kha a ni tho. Isu ngei khomin Kanan nupui kuomah, “Israel hnam, beram inhmanghai laia chauh tir ka nih…Nauhai bei lakpek a, uihai kuoma pek chu thil awm a ni nawh” (Mat 15:24-26) a ti top a nih.

Hi thu hi Lala Khobung le kan titinaah a lût rawn ta a. Hnam dang, abikin Vaihai invoi le hmangai khopa Pathien thu awi intihai le sorkara an sin thra tak tlansana rongbawla luthai hi tluk lo rim an innamin kan hriet a, sienkhom ngaisang ding an ni le ni naw thua ruok chu kan buoi. Tukver hrang hranga inthokin kan thlir a. A thren chu hlaw thra lem, hadam lem le Pathien rong bawl ni sia ngirhmun thra lem nia an hrieta lût an nih. Chuonghai chun dannaranin NGO an zom. A thren chu rorelna thra indin hi Pathien thil tum rop a nizie hre lo, ringum le indik taka sorkar sin thaw a, Daniel le a thawpui Hebrai mihai anga a bu zawla inthoka siem thrat sin thaw hi sakhaw mi intihai thaw ding tak le an mawphurna a ni lemzie hre bok lo, sorkar thil hrim hrim sakhaw thil le inaihala ngai suol pawl an ni nuom. A thren nawk ruok chu mawphurna la ngam lo, sorkar sinah an inbùr chun kawrap lo thei lo dinga inngai, chu thila mani an inring zo naw leia tlansan an nih. Tukver danga thlirhai ruok chun Pathien rong nasa taka bawl theina lampui chu sorkara thuneina fong chel phaka um a ni thung. Delhi le khawpui dang danga Hmar Christian Fellowship le Fellowship hrang hrang hung indintuhai chu kohrana rongbawltu ni loin sorkar thoktuhai an nih. Sorkar thoktuhai hi kohran banpui, Sorkar thau sawka Pathien rong bawlna lampui hongtu poimaw an nih. Chu chu rongbawlna thraah ngai loa tlansietsan chu Daniel le a ruolhai khan an thaw ti ei hriet nawh.

Tupidor ngirhmun le inzoma ka unaupa rongbawlna ka hang zapkai san tak hang hril tang ei tih. Ama hi Hmar hnathlakhai laia B.Sc (Agri) hmasa tak a nih. Sorkar sina inhnik lo a ni law law si chun, a piengna ram hi Pathien thu le a thiemna le a nuhmei thiemna hmangin hang siemhai sien chu, a hlawtling lem daih el awm de aw! ti dam chu ka ngaituonaah a hung lèng lut lei a nih. Hlawk taka ram leilung le a sunga thil umhai hmang dan amanih, ramin hlawk taka a tharsuok thei thil chîng ding hriet le a chìng dan thiem hi vangneina hnârpui a nih. Ei thiemna inchuk le chu thil chu a hung inzom pha chauh hmasawnna ngêlnghet rem thei a nih. Lo neina tienga thiemna insang nei ka unaupa hin Pathien thutak leh a khaw hlui Tupidor le a se vel Tuiruong dung hi lo siempui sien chuh, Diphu khawvel, a tarpuhai rama sulhnung a maksan nek daiin hnuhma sui tham a maksan lem ka ring tlat a nih.

Chemkalna zawnga inhmang

Mihriem hin chemkalna zawng ei nei seng a, chu chu Pathienin ei hma khala a mi lo duong dan a ni tlangpui. Mani chemkalna zawng hre inhma le sukpung pei dinga thrang la nasá sà an hlawtling nuom a, an hlim bok. Mani chemkal nawna zawng amanih inkhorna zawng bawzuia hnot nasá sà an nìna ding ang ni phak lo le beidong an tam. Theina mak tak neiin Pathienin a mi siem thei. A ti ang taka Jehovan a Biekbuk bawltu dinga mistiri a buotsai lawk hai chu Bezalal le a thloptu Oholiab an nih. Biekbuk bawl chu an rongbawlna a nih (Exo.31:1-11). Anni pahni rongbawlna le Levi chihai rongbawlna chu danglam tak a nih. Mani chemkalna zawng senga inhmang hi rongbawlna indik, Pathien thu a nih. Kohrana pastor amanih tirko amanih nihai chauh rongbawltu anga inngai le inhril hlak hai hin Pathien thu an hriet chieng naw lei amanih le an chan hril vawng bik an tum lei dam a ni nuom khop el. Pathien lawmzawng a ni ka ring bèk nawh.

Amiruokchu, eini zir naw leiin Pathienin theina a mi pèk khah hmangna bo-ah ei inchangtir thei. Chuong ang mi chu ka hmu rawn tah. Ka khaw hriet thei hlima inthoka thu le hla tienga inhnikna ka dong sukpung chu ka mawphurna a nizie ka hriet inhmat kha kei chu ka vangneina a nih. Mani sor khop bakah ram le hnam sor khop sek khawm ding chun chawl loa sùn le zana thrang lak a ngai a, thä inthla dul a ngai thei naw a, a thieng bok nawh. Chu chu ka bawzui pei theina ding le ka tum ram pan peina dinga mi thrangpuitu ding sin ka dit tak chu Foreign Service a nih. Chu sin chu ka theina lei ni loin ka hma khala mi thruoitu chun a mi pèk a, kum 32 zet chu sin chu ka thaw hnungin Baibut inlet sin thaw dinga a mi lo buotsaina san chu hlen dingin kum ruk pum hlûm a mi chengchil nawk pei a, ama ta, a mi pek, sum a mi lo inkhawltir po po chu Baibul sutna dai tawk char a lo nizie dam khom mak takin ka hung hriet tah pei a nih.

Thu le hlaa rongbawlna hi ka ngai poimaw khop el. Mihriem hi ieng konga khom hma ei sawn ding chun ei lungril ram, ei ngaituona khawvel hi nasa taka buotsai hmasak phot a ngai. Chu sin chu inhril hriet a nih. Chu chu sin hautak, sienkhom ram le hnam siemna dinga trûl makmaw, thaw zo tik um thei lo, thaw rawn po leh thaw ding thar pung deu deu, chatuon daih sin a nih. Mihriem sungril mit hi phuhlip thuo tamin a tuom a, chu chu hrietna tuia ei phi thlak rawn po leh a hung var deu deu a, ei hmu chieng deu deu ruolin Pathien ropuizie ei hriet tlawmzie ei hung hriet deu deu a, mihriem hi ieng ei ni nawzie le mihriem varna tak khomin Pathien invetna tak a chen phak teu teu nawzie ei hung hmu thei chauh a nih. Chu phuhlip thuo tam phi thlak theina hmangraw poimaw chu thu le hla thra a nih. Chuong laia a thra fàla hril chu Baibul a nih. Pathien thu a kawk dan ang taka Hmar trong indika inlet le sut hi rongbawlna poimaw, Hmar trong dam khawsuokna ding lampui sielna, hnama mi’n dintu ditzawnga rongbawlna niin ka ngai a, ka lung a awi a, ka lawm bok a nih.

Ka unaupa khomin Karbi-hai laia rongbawl chu Pathien konaah ngai a, mani le mani inenkol a, ringum tak le lungawi taka rong a bawl tlut tlut hi a kros put ve a ni a, kan kona dong dan a danglam thu, mi hril ngai set set lo, long chunga ka ngaituona invâk vel, ka hung thur suok a nih. A lekhabu Messages from the Pilgrim (2005) chu hmun hrang hranga a thu hril 34 thlang khawm a ni a, a puitlingin tiem a manhlâ hle. Sungkuo puitling tak, engineers, doctors etc a keitlei a, a tam lem chu India ram puoa um an nih. Eini laia rongbawl a ni naw leiin kohran inbakkeinaah a thrang ve naw a, kut a daw a ngai ve naw bok a, chu chu a vangnei ém èm san pakhat a nih. A nauhai kut hmang peiin, kutdaw loin, a rongbawlna hi Lalpan ropui lema a sukvul pei ka ditpui a, ka beisei bok. Chu chu kei khoma thu le hlaa ka rongbawlna hi, Hmar hnathlak khawvela chauh ni loin, Zoram khawvel hmun tinah ka nauhai kut hmanga ra hlimum a la hung insuo pei hi ka hmathlir le ka trongtraina a nih. (June 15, 2012 Delhi)

By Timothy Z. Zote

Khawvela mihriem chenghai po po hin nuom dan le lungril inangna pakhat ei nei seng niin an lang a. Chu chu Khum ngainatna hi niin an lang.

A lo va ni ngei, nau nei dinga naupai inhla tak puma um lai khawm a, nu lungrila thilum chu KHUM ngeia nau nei hi a lungril a riek zing chu a ni hlak a.Khum ni lo, tuolzawl, ram fena, bazar, khawlai, Biekin sung a dam, nau hei nei el chu nu duthusam a tling ngai nawh a. Naupai inhla ta hai chun an lungril ngaituona tawp khawkah chun Khum mawl hi niin an lang.

Naupang inhnel insuktap pal hai khawmin an hung inlawi vang vang a, a tawpkhawkah chun Khum bawk belin an tap inhnik fat fat hlak bawk. An ruolhai le an insuklungsenna lei a, ti a, in tieng an hung zam khawm a, an beidawng tawpkhawk ah khawm mihriem ni si lo, Nu le pa ni si lo, Pathien ni si lo, a tawp khawkah an bel hlak chu KHUM a ni nawk hlak a, khumah lo inbi-in , tit akin puonri’n an lo inlukhup hlak.Khum hin thangpui thei nawsien khawm khawvela ei beidawng tawpkhawka ei inhnemna umsun chu KHUM Hmun hi a lo va ni deh!

Khawsakna insang lem le chin lem khawm ni sien, tulai chena nu le pa’n nau hai ei infuina chu , mi inah inleng changin, thil sie thei iengkhawm them ngai naw la, in I lut tawm siliper/pheikhawk hlip hlak la, chun khum room lem chu an phalna I lak zet naw chun lut el ngai naw rawh ti hi ei infuina laia thang tlat a ni bawk.

Nunghak tlangval khawm a, hmangaina lekhathawn an tiem khawmin mani khum ngei a, tiem an nuom hlak.Chun, nunghak lem chun, a tawpkhawkah chun a hlutna le a nuhmei nina Rose par ang a, mawi em em le thienghlimna chu a thlang a pasal KHUM ngeiah chun thliek chu a lungkimna a ni hlak.

Nunghak le tlangval kara hmangaina an tuorem naw deu changa beidawng lungzing nikhuoah khawm,zawi tak a umin, thungphasei a, zal mei mei hlak le Mobile khel mei mei hlak khawm kha, a lungril natna a tuok tawp khawk chun bel ding dang a nei le’m, a nu le pa bel a, rel pui el chi a ni ngai nawh a. Mani’n Khum belin zawi ngaiin Khumah zalin, rawmawl huhnakin an mittui inhnik fat fatin an ngaituonah an di-te ha’n hmun hluo hle sien khawm , an taksa chawl hadamna petu chu Khum a lo ni zing si!

Mofawm phur ni khuoah Mopa ni haiin puonri an hung inchuon chu Mopa Khum ngeiah an nghat hmasa phawt a tul a, chun Khum danga innghat el chi khawm a lo ni nawh a nih.Khum danga lo innghat a ni chun hrilsel a hlaw hlak a, a mawi naw hle a nih ti hriet sa bawk ding a nih.

Mi nupa khum a, inthung mei mei khawm hnam dan chun a khap tlat bakah, mi nu pa khuma pasal le nuhmei lo umpawrche man an ni lem chun siel le salam chawiin rik taka an chungthu rel thei a nih.

Nu le pa’n lunngril sawl le beidawngna tawpkhawk ei nei changa rel tul a um phat khawmin, Common room-a rel el lo vin Khumkil kher kher ei pan hlak hin, Khum hin hring mi lai hin hmun a hluo lien zie a sukchieng hle.

Nupa zal hmun rem ta hnunga khuma inthawka tawng thum bul bul dam hi tien lai pi le pu hai chun an phal nawh a, an rem ti naw hle a nih. Chun, zingkar inhma taka , nupui khuma inthawka tawng thum lung lung khawm hi a mawi naw hle bawk. Hmun danga inthawka hung tawng thum lung lung ni sien chu hril sel a um ngai nawh. Khum hi chu aw….

Dam nawna lei a, Damdawiin pana ei fe khawmin mak taka lungril mi sukna hlaktu chu Khum chang naw lei a, mani sunghai tuolpara ei inzal el kha a ni hlak. Chun, damnaw ei um khawmin khuma um ngei kha a thlakhla biek a nih.

Ei thisen inhnaipui haiin sarthina an tuok chang khawmin, ramre le fienriel, hmun tawpna hmun lai a, a thisaa ei hmuin , lungril sukna zuoltu chu Khuma a zal naw kha a nih. Mi thi ta hnung khawm kuonga ei si hnungin

Sap papui J.K. Pom chun “nupa nun khawm hi hmun dang dang nekin KHUM hi lung a kim tak tiin” a hril bawk .

Khum le inzawm a, sui le ziek ding tam tak a um a. Phek tam ziek ding a um bawk. Lungril le ngaituona mit suk keuna dinga tawite ei hei ziek a nih a.

Khawvela mihriem cheng hai hin hmun pakhat nitin a, ei umsawtna tak a ni a. Chuleiin Khum hi Insunga hmun pawimaw tak a nih ti a sukchieng hle a.

Khawvela mihriem hai hin khum ei nei inhawi dan chu inang naw nih, a then chun donlop, puon pha tawp dam ning ei ta, amiruokchu a chien a lien, a hausa le pasie khawmin Khum hi ei nei deu vawng a. Chuleiin mitam lem nei khum hi dana khawm a lo inlang nasa em em a, Biekin ang le hmunser a nina khawm a um a nih ti hi hre tharin, fimkhur naw lei a, hal le siel le salam chawi theina tam tak a lo um a nih ti hriet thar a tha hle. Chun, pasie khum khawm ni sien inza a tul a nih.mawi naw taka lo va sukpawrche chun, danin an pasiet leiin a the hran chuong naw leiin chungrik dan chu an ang vawng tho ding a nih.

(12/6/2012, Saikawt, Tuithaphai, Churachandpur East District)

By Timothy Z. Zote

Tuithaphai (Rengkai): China, Sichuan Province, Yalung river bul laia ei pi le pu huna inthawka ei lo hluo ram le ei lo chengna ni ngeia hriet le ngaibel thei dinga um ,Sinlung khuo hmusuoktu Rev. L.Rema, Aizawl Venghnuai chun Date 11/3/2012 (Thawtanni) Dar 11:OO Am khan Tuithaphai, Rengkai Community Hall –ah mi thahnem tawk tak hmaah Sinlung khuo a hmu dan le a bebawm report a pek a.

Hi report-na programme hi Dr. Rosiem Pudaite,Chairman, Hmar Art And Culture Society chun a keihruoi a. Rev. Saithanglur Zote tawngtaina’n programme an hlan zo in, Rev. L. Rema, China rama Sichuan Province laia Hmar hai khawhlui le ngai bang thei lo, Sinlung khuo hmusuoktu hmasa tak a nina le huoisen taka harsatna tam tak ner tleng a, a hang hmusuok lawm zie suklangna le ngaisangna khelah Thangsuo-ah a ngai leiin Hmar Arts and Culture Society aiin Pu R.Tawna Khawbung, Secy. HACS le Pu S.N. Ngurte, Vice Chairman,HACS hai pahniin Hmar Thangsuopuon in battirna an nei.HACS Aizawl-a inthawka a hungna a a kal man dingin Rs. 10000/- an inhlan bawk.

Reoport petu ding hi tum : Rev. L. Rema Hualtu khuo niin , B.Th chen zo in China ramah Kum hni chung Missionary sin lo thaw ta a ni a. Phone hmanga bie nuomtu hai chun Contact – 09862860181.

Report A Nei : Rev. L. Rema chun “ Feb.22,2012 khan Aizawla inthawkin , Burma lutin, Burma inthawkin China a lut nawk a. Chuongchun, Sichuan Province chu lut nawkin, chu taka inthawk chun Sinlung khuo chu a fe nawk a. Sinlung kuo a hin ama hi fe a tum reng a ni nawh a, remchang takin a ruolpa a ram mi Pastor Yangjun Fu le an inzinnaah Motor station pakhat tuokfuin chu taka Driver hai chun “Sinlung sinlung sinlung an ti lau lau” an hriet a, chu phing chun an indawn chieng a, Sinlung khuo tieng hi an pan ta a nih. Date 20 March, 2012 ni chun mang khawm a, a la mang phak lo, Sinlung khuo chu Zo pa chun ke ngeiin a sir ta a nih. ( Chuleiin, hi ni hi Discovery date of Sinlung Village ti a nih).

A Ram Ngirhmun : China ram Sichuan Province huom sunga um, Altitude 28 degree le longitude 100 degree inkara um a nih. Yalung vadung bul a va ral ineptuoin building mawi tak tak neiin an um.

Khawsak Dan : An khawsak dan hi Tibet mi an ni deu a hawi a. An nunphung khawm hi Tibet mi hai leh an inang hle.

A Chenghai : A khuoa chenghai hi,Tibet hnam an niin a hriet a.Chun, Budhist sakhuo zuitu an nih. Mihriem sang li vel an um nia hriet a ni bawk.

Fak le Dawn Zawng Dan: Vadung bula um an ni leiin thlaihna an chieng nasa em em a. Serthlum khawm an chieng uor hle bawk. Chun, ran vai an taima a, an uor hle a. Chuong an ran vaihai chu : Kel, Beram,Vawk le Bawng an ni tlangpui.

Sawrkar sin le Dawrkaia sumdawng khawm an um bawk.

Zawrhmun (Bazar): Zawrhmun a hin thlaihnah le thlaira, vawksa,arsa,ngasa chenin an zawr ve vawng a.

Sik le Sa: Sinlung khuo hi a chang chun vur dam a tla a, a dei thei hle hlak.

Pi le Pu Sulhnu : An pi le pu mihuoisenhai thlanmuol inza takin an enkawl a.China rama mihuoisen em em Lian Hua,Army General chu Sinlung khawlailungah a lim chu an inngirtir luoi a. Chawimawina chi hran hran le Parte mawi tak tak inhlanin, Pathien biekin an biek hiel hlak bawk.

Sinlunga inthawk hin Km 320 vela, hla a chun pi le pu hai an khawsak dan lim ni dinga ring lungbangah an ziek tlar duot a. Lung an leng nuom hle “ a tih.

Pi le Pu Ro Thil : Tienlai pi le pu ro thil sie thatnachang an hrietin an fel hle a. Dar,bur le bel,Thi (Thri)kawnghren,chem.,thal, fei hai chu zawr a hlaw hle a. Sumin an chang zo tep ta thung.

Vantlang Rawngbawlna : China sawrkarin kum 60 ( old age) a upa chungtieng enkawlna bik an nei a, hi hmunah hin pasal 60 le nuhmei 89 an um bawk. Thangpui ngai nia an hriet chu an harsat dan a zirin an tul ang pei a, thangpui hlak an nih. Chun Tlawmngaina khawm hi a takin an la hmang a nih.

Sinlung Rausanna Lamtluong :Pi le pu haiin Sinlung tit nei am, ral nei lei am ? An suoksanna lampui ni dinga ring chu Yalung vadung zulah a la um thla rul a. Doral leia an lo bel hlak puk pindan 35 vel umna puk hai chu a lo la um zing thu Rev. L.rema kuomah a cheng haiin an lo hril bawk.Tuhin chu ramsa hai riek run an chang mek niin an hril bawk.Sinlung khuo hmar thlang tieng hin, Lung Kawtkhar a ram tawngin LUNGBANGKHA a um bawk. Pi pu sulhnu hi Sinlung thlang tieng hin tam tak hmu ding a la um a nih.

Ei Inhnaina : Ei inhnaina tam tak a um a, chuonglaia pakhat chu ei tawng hi a nih. Tekhina’n: Mangkhawng = Mankhawng,ka nau = ka nau, lung= lung, changkha= Chengkha,saru = saru ti hai hi an nih.” (–Rev. L. Rema,Rengkai,Tuithaphai,Churachandpur East District).

Programme-a thang hai hin zawna tam tak an nei a, chuong an zawnahai chu a thei ang angin Rev. L. rema chun a dawn a.

Resolution : Dr. Rosiem Pudaite,Chairman, HACS, chun mipui hung khawmhai kuomah thurawn siemin “ Sinlung khuo hmun ngeia intira sui chieng dingin” rem ti tlang a nih.

Hi inkhawmnaah hin hnam thuoitu le Vantlanga mipawimaw thahnem tawk tak thanghai laia mi thenkhat : Pu Hrila Zote, MDC, Saikawt, Pu Joseph D. Hmar, Vice President, Hmar Inpui, Pu F. Doliensung, Gen. Secretary, Hmar Inpui, Pu S.N.Ngurte, Chairman, Hmar Literature Society, Pu L. Ruoivel Pangamte, Secretary, Hmar Literature Society,

Rev. Ros. Infimate, Vice Chairman, Hmar Christian Leaders Forum, Pi D. Vari, President, Hmar Women Association, Pu L. Kiemlo Pulamte, Hmar Writer Academy, Pu Joseph Lalrothang , ZEO, Churachandpur District, Dr. Saidokhum Zote, Jt.Director, Vety. Churachandpur,Pu S. Damkung, Rev. T. Khuma songate, Pu H. Zaneisang hai le mi dang dang an thang bawk.

Mipui vantlang inkhawmhai kuomah le Pu Lalhosan ,EM,ADC,Churachandpur chun hi inkhawmna ahmang dingin Rs. 1000/- a hung thawlawm leiin,Dr. Rosiem Pudaite, Chairman,HACS-in lawmthu hrilna a nei.

Hi inkhawm hi Pu Darkapthang Darngawn le team hai chun Video Camera-in coverage thiem takin an thaw a, hi programme a thang lo hai chun enchak a um ta hle el. Hi inkhawmna ah hin medi team, Manmasi Digest Monthly, Mizonews.com le Lelte Correspondent hai khawm an thang bawk.

Hun tawp tawngtaina Rev. Ruolhlei Pakhuongte’n a nei zo in, Photo session neiin khawp lo takin an inlawi dar ta nih. ( Saikawt, Tuothaphai, Churachandpur East District,11/6/2012)

By L.Kevom, IFS (rtd), Inpui.com Columnist

Hmun poimaw, nang Ruonglevaisuo,

Hnam tinreng intuok khawmna;

Ruongtui hmingthang luong buon buon hi,

Kan Hmar tlang hming inthangna.

-Lalbieklien (Tuiruong Hla)

Ditsakna Ruoi

April 29, 2012. Tuiruong an tingna ding hmun vel fang zoa kan hung kìr chun kan tlungna kotah harmei an lo inkhùk a. An Village Council Chairman, kan tlungna pa Lallawmthang Parate chu Parbunga a thang lai ni sien khom Village Council hmingin thlaithleng an lo buotsai tum thu le zan inkhawm trinah khawtlang inkhawm an lo huoihot thu an mi hril a. An mi ditsakna thuah lawm an um takzet a, an bengvarna chungah inpâk an um. Sienkhom, thlaithleng kha kan kìl tlâng tlat nawh! Chawhnung tieng ka hang chawl-zàl sung khan an lo inzo vong a, ka hung tho khan chu chawibiek inkhawmah an lo fe hman ta a, a mikhuol po khan an hnungah kan kìl a, lawmthu khom hril loin kan um a, a poi takzet. Hi lekhaa an mi ditsakna ruoi ka sàm sa hi kan lawmthu hrilnaah mi lo pompek hràm raw hai se.

Ei khawvel hi ei boruok pal ang peiin a danglam nuom sawt ta hle a. Hi lei hin, pawlitisianhai inzin angin mi lo chei an tih ti hi ka thil inlau tawp laia pakhat a nih. Anni rawi hi dit neia inzin hlak an ni leiin an fèna phota lo mikhuoltuhaiin sa hmèna remchângah an lo hmang a. An sengso po po an inthungtir a, a thungtu hlakin mipui chan ai ding a lo puonhnuoi laia a hlek tla chauh a pek kir a ni leiin inphal takin a lo thung a. An ruong a huotpek leiin inthlang pha leh a ruong an huot let ve a beisei a, a ngiet ngei bok a. Chu indawr tuonaa palai thra tak le suikhawmtu chu sa bêlpui a nih. Berampuhaiin an beramhai an hriet chieng nêk hmanin pawlitisianhaiin an bei fatu le an sa bèl kîltu le kuoltuhai an hriet chieng lem. Chu lei chu ni naw nim, Solomon thuvar sawmthum thlang khawm laia parukna le parietna (23:1-3 & 6-8) chu thlaithleng kîl hi fimkhur a ngaizie, indawhàna le inhlèmna ruoi, hnuk le chemte chuktuo ang a ni theizie thu a lo hril chu.

Tipaimukh ngirhmun

Kan tlungna in bula khawthlir an bawl kha dawsawna hmangin, a hmaa chun thrungna an rem sip a, chu taka chun zan inkhawm trinah tlâng inkhawm kan nei a, a khawnawtin an hung a. A hmun thruttu an ni ringota chu Tipaimukh khaw mihai hin thil chinchang, thu fe le hung, an hriet tlawm èm ém a, sienkhom inthiem naw ding khom an ni nawh. Hi hmun hmingthang le poimawa hin khawvel siem tira inthok tah khan thirhrui hrim hrim (elektrik hrui, telefawn hrui, wireless hrui) an la zam lut ngai nawh. Khawnvar le thlikhawnvar baka var an nei sun chu nisa vara inthoka an làk, solar light a nih. Gas an nei ve sun chu an voi chauh a nih. Chanchinbu, ieng trong khomin, a la um nawh. Hieng ang Dam ropui an bawl tumna ni siin, a tû ofis khom hi hmuna hin a um naw a, tû ofis aiawtu khom an um nawh. A hmun nghaktuhai hi ‘Um lo-ah’ an ngai a nih ti a chieng. Hieng khopa hang inngainep le inhnuoisie dàn hi a um ta chuong ding am a ni?

Thu uor thiem deuin hril hai sienla lem chu, Tipaimukh khuo hi van khomin a’n khum phak naw thret, ti mei an tih. A hmun ngeia thil fe le hung thlithlai ding hnam dang mikhuol tum tum an hung hlak thu an hril a, sienkhom Guest House pakhat khom a um nawh. Chu chu Hmar Biela long chawlna (port) lien tak le ropui tak, sumdawngna hmun poimaw tak le ropui tak chu a ni tlat si! Tuolte Vanglaia bawngpui chèr, a bau a ka a, a mong chen hmu tlang thei a ni thu an hril hlak ang khom kha a ni phak naw el thei. Bàu kaa hang phong thei ding mi thiem le chinchang hrie tu khom an um nawh. Dam bawl dinga a honpui an hung tlung ni darkara inthokin chimral ni nghal an tih. An hrang khom chat hman naw nih. Tuta anga thil a fé pei chun a chat sa a nih. An buripna tak chu ‘um lo’ an hauh tontaw hi a nih. Hieng lai hmun nghaktuhai ngei khom hi, ei hril tah ang khan, ‘Um Lo’ a ngai an nih. Pathien khomin hi biel Pathien ni hi a lo inzak palh a ni khomin a awm hlie hlie; Ama chu ‘UMA’, khêl hril thei lo, ama le ama inphat thei lo Pathien a ni tlat si a!

Kum iemani zat liem tah khan Churachandpur Deputy Commissioner rawiin, hieng lai biela Village Authorities hai hi a cham lo a cham loa ko khawmin Tipaimukh-a hin Dam hi bawl ding a ni le ni naw rùndâlin Public Hearing an neipui a, a mik a mak an hriet chieng hmain an inzopui vong a, chu chu a rama chenghai amenpuina angah an ngai thu an mi hril. Naupang in bur bur lai keitho inla, “Bawi, zingah saikal thar inchawpek ka ti che aw” ti inla, “Aw Pa” tiin lawm takin in nawk nghal a tih. Chuong ang deu chun, hi Biela SDO hmasa tak Prongo le a biela seilien ngei ofisarhai khom khan a rama chenghai hi an lo dawi vèt a, an thu kha inhnik ti takin an lo beng tuom tuom a, an hnuk hrui satna ding chemte le inchuktuo an nizie hrim an hriet phak nawh. A’n rui zuol pawl lem chun hla chen phuokin, an lo inawi tlei a ni khah!

November 30, 1999-a Churachandpur Mini-Secretariat Conference Hall-a inkhawm an nei truma an Chairman, Shri Sriram Taranikanti, Deputy Commissioner, Churachandpur-in Minutes of the Meeting a buotsai ei tiem chun a ram mi, thu hriltuhai lai HYA President D. Pudaite, HADCO President Darlienthang le Hmar Welfare Association (Hmar Inpui pieng hmaa a hming) Chairman H.K.Joute an thrang ve a. Hienghai hin thu an hrila chu sorkarin inkhawm a kona san tak chu a thiltum thratzie mipui laia hril dartu dinga a dit lei mei mei a ni leiin, an inkhawm khan umzie a nei nawh. Iengkhom ni sien, a ram mihaiin an ngaidan an hril thu sorkar rikawta chuong ka hmu hmasa tak a nih. Chu chu a trangkaina um sun chu a ni el thei. Chu hma le chu hnung khomin um lo angin an mi la sie tum zing. ‘Um Lo’ laia an ri hriet ding le an sulhnu sui ding um lo chu a biel aiawtu MLA hai an nih. UM LO ruolin UM LO ruola ngai an lo enkol sawt taluo khom a ni el thei. Nasa taka ri neihai chu SIPHRO bakah hnam dang, abikin Naga tieng thruoituhai an ni daih a nih.

Dam ngirhmun

Tuiruong le Tuivai infinnaa inthoka meter 500-a Tuiruong ting an tum hi a ri ei hriet ngun ringota chu a hung intran dan le an phàk chin hre ruok chu mi tlawmte chauh ei ni leiin, a hmuna chenghai ngei khom hi hril hriet an ngai a, chuleiin a chanchin tlangpui chauh hang tar lang inla. British Kumpinu sorkarin a ramper dinga August 14, 1832-a Cachar a hung laka inthok khan thingpui huon an siem a, sumdawngna hmun thra a hung ni ta a. Amiruokchu, Tuiruong, anni rawiin Barak amanih Surma an ti hih a lien pha leh nasa takin Cachar phai a chim siet hlak a. British hai khan a dang dan ding ngaituoin nasa takin an lo thlithlai ta a, sienkhom sèng a tam talaw dinga an ngai leiin bawzui loin an pamtrùl a. India ramin zalenna a hmu hnung, 1954-65 inkâr khan Central Water & Power Commission (CWC) chun Naraindhar, Mainadhar le Bubhandar hmun hai hi tui lien dangna hmuna siem dan ngaituoin an en a, sienkhom leilet a chìm siet rawn talaw dinga an hriet leiin bawzui loin an um a.

Tipaimukh Project ei ti tak, tui lien dangna ding le kawlphetha siemna ding inkopa siem dan ding thlithlaina chu CWC-in 1977 khan an nei tran chauh a nih. A hnungin, CWC chun Brahmaputra Board kutah an pek suok a. Tui tingna hmun dinga thraa an ngai Jirimukh le Ngaulungret hmun lai an en hnungin kum 1979 khan Tipaimukh an hung tlung a, Ruonglevaisuo thlang 500 meter-a hla, a sir tuoka rawl det tak umnaa ting chu thrain an ngai a, December 23, 1982 khan Final Report an pek lut a. Assam le Mizoram chun bawl remtina an hung pek nghal a. Manipur ruok chun 1997 khan bawl a remti naw thu le ram a chìm siet nasat talaw nawna dinga an ruohmang tum hmasak neka inhnuoia bawl dan ding survey thaw thar dingin a hril a. Brahmaputra Board-hai kuta inthoka la sawngtu North Eastern Electrical Power Corporation (NEEPCO) le Manipur Sorkar (GoM) chun January 9, 2003 khan Memorandum of Understanding (MoU) an ziek a, kum 12 sunga bawl zo dinga a hmaa ti kha kum 7-a zo dingin an intiem a, GoM chun bawl tran dingin thupek a’n suo nghal a. NEEPCO khomin February 15, 2006-a inthoka tender document inchawk thei a nizie le tender po po chu April 3-a pek lut le sin khom kum 2012 a zo fel vong ding a ni thu a puong a. Japana inthokin 3, Iran 1, China 2 le Indiaa inthokin 7 in tender chu an hung don a. December 17, 2006 khan a lungphum (foundation stone) chu Union Minister of Power Sushil Shinde-in a bawlna hmun dingah a hung hong tah a nih.

April 25, 2008 khan hnuoi verna khawl le khawl dang dang NEEPCO sie chu HPC (D) haiin an lo zil met a, ri nei zui ta loin a um a. Hun a hung fe pei a, kum 2010 a hung tlung chun a thawtu ding taka ruot NEEPCO thrang ta loin, National Hydroelectric Power Corporation (NHPC), Loktak Project bawltuhai, Satluj Jal Vidyut Nigam (SJVN) le Manipur sorkar (GoM) chun chan (share) 69%, 26% le 5% chit chang dinga intiemin Tipaimukh Dam chu bawl dingin April 28, 2010 khan thuthlung (MoU) an ziek nawk daih a. Hi prawzek hin bielpa a thlak ngun taluo hi thil buoithlak pakhat chu a nih. Inneina thuthlung ziekpuitu nuhnung takin thu a thlungpui hnung kum hnina champhaa a hmun ka sir chun an hnuhma hmu ding a la um nawh. A bawltu dinga inhrilhai hi mengte nau nei an hril ang deuh an ni a, a biel mizie an lak nasa taluo’m a ni ding, voisuna ‘Um’ kha a zîngah ‘Um Lo’ an la ni deuh pei chu tie! Ngaizawng mumal lo tak an nih.

Hi Dam insang dan le inhnuoi dan zir hin a chìm sang le siet ding le a del rik dan ding a hril ding a ni leiin ngaidan a tam a, sukhnuoi dinga ti pawl le suksang dinga ti pawl inkara insêlna chu a fe zing a nih. Tuta chena an pom tlang chu a tui tingna hmun tak hi a bul thrut seizie 85.3 meter ning a ta, arh intung pei a ta, a chung tak chu a thrut let li neka sei hret, 385 meter ning a tih. A thruta hin lung sakhat lien tak tak rem khawm an ta, a kârah pil sung sip an ta, sukdên an tih. Lung naran an dit naw leiin Rataw le a sè vela lungpui chang tak tak hai hi a thlawnin tol thlang an ta, an rem ding a nih. A’n sangzie chu 162.8 meter; a chìm chin ding 311 km (Manipur tieng 273.5 sq.km; Mizoram 37.5 sq.km). Tui tam laia kawlphetha a pek suok zat ding chu 1500 MW ning a ta; tui tlawm lai chu 434.44 MW. A khawlpui ding, tui inkhaw thlain khaw vira kawlphetha petu ding turbine 6 inbuk ding a nih. Lamlienpui a chim pil ding chu km 10 chuong, khuo a chim pil ding chu khaw 33 a nih. Hmun danga an insonna dinga zangnadomna (compensation) pek zât ding an hisap chu, inzàpui a um bèk leiin tlawmte chauh, entirna ding chauin, hang tar lang ei tih: (1) Inson man le thuomhnaw phurna motor man sungkuo pakhatah Rs. 5000; (2) khaw thar an kaina tina biek in thar bawlna ding, khaw pakhatah nuoi khat pei; (3) kum khat sunga an intungdingna (rehabilitation grant) dingin sungkaw tinin thla khatah Rs. 1500/- hmung an tih.

An tingna hmun hi an bawl zo hma khat tuiin a chim phal a ni naw leiin Tuiruong le Tuivai tui po po hi an tingna hmun tlung hmain hnuoi sungah a luong suokna kilometer hni vela sei tui lam an siem hmasak phot a ngai. Chu siemna ringot ding khom chun sinthawtu a tlawm takah mi singkhat vel ngai mei a tih. Mi chuong zât deuthaw chuh thil dang dang thaw dingin sor ngai bok a tih. Hienghai umna ding hi Senvon le Lungthulien inkara ram Leilang-ah bawl dinga riruong a nih. Chu khuoa chun Dam bawlnaa sinthawtuhai deuh chauh an um ding a ni leiin, a tam tak hung ni nghal an tih. Chuleiin, hi khaw thar hi hieng laia Vairampur khuo pieng hmasa tak a hung ni khomin thil maka ngai ding a ni nawh. Chu pha chun ei lungthu lien ei suong èm ém hlak hi a lo chìnzie hung hre chieng ei ta, ei khaw hming khom Tinpathar-a thlàk chu ei thu le hla ni ta naw nih. Chu phâ chun pêngpelep khuo inhnu talaw tang a tih.

Dam, ka êkther?

Dam an bawl tumna le inzoma thu fe le hung, kan hriet ang ang chu David Buhril leh kan thei ang tawpa kan hrilpui zo chun, mi hrang hrang an hung phaa an lo hril dan ding thu iemani bek maksan dingin an mi ngèn a. Kei chun fiemthu-titakin, “ ‘Dam, ka êkther’ lo ti seng ro” ka ta, an lawm zawng le hriet thiem thei zawng tak ni mei a tih, an innui dar dar a. Patling, kum sawmsari pèl tah thu inchà ding chun a nal techiem naw hle a, sienkhom chuong neka fie lema hang hril dan ding chu ka Hmar trong hrietin a dai mol si nawh. Saptrongin hang hril ding ni hai sien, “Dam, my shit!” an ti ding ni awm a na, pastorhai bau leh inruolrem rak naw sien khom, mi dumhai bau leh chu intu hle dingin ka ring. Anni lem chun dittawk loin, “Damn the Dam!” an ti naw leh “Fuck the Dam!” ti zui ngei ngei an tih. An bàu leh a’n hmé tlat.

Zan dar 11:30-ah kan trîn diel a. Kan thu chai ruok chun a ram le hnam nunah thu a hril tran tak tak ding chauh a nih. A hril tawp pha chu ngaithlatu ding Zo hnathlak tu khom hmu ding um tah kher naw ni hai. Chu pha chun a bieltu Churachandpur angin, ei khaw hming tawpah ‘pur’ tam tang a ta, Aizawl hi Aipur/Haldipur, Lunglei hi Patharpur, Vairengte hi Rajapur, Sakordai hi Ghorapur, Senvon hi Lalpur inchang vong ta mei a tih. Hi thu hi a nih May 9, 1993-a Milan (Italy) -a ka um laia Mizo-Lusei tronga thusep dangdai tak ka ziek ‘Thawnthu Phîr’ tia ka thu inbuonpui tak chu. Ka tienami ziek tum pakhat chu inchimralnaa tawp, pakhat ruok chu hnèna hladoa tawp a nih. A hmasa hi Tipaimukh Dam le inzoma ei histawri thar ziek meka um hi a ni a, a pakhat ruok hi chu hi sietna laka inthoka sansuokna lampui ei dap mek rà suok ding chu a la nih. Dam hi a thratna tam tak a um ang bokin a sietna tam tak a um. Chuonghai chu bûk ton a, rênga dam tlangna ding zong hi ram le hnam hmangaitu tak tak chun an ngai poimaw ding a nih.

Chuong chu a ni lai zingin, ei chawibiek Pathien hi ‘UMA’ a ni si chun, ama mi ni tlâka insiema hring khawsuok chu thil dang po po nêka ei tha bat tlak ding hmasa tak a ni naw maw? English political theorist Algernon Sidney an naw, “God helps those who help themselves” lo ti tu kha? (June 2, 2012 Delhi)

Pu Ramthienghlim Varte, Senior Anthropologist, Shillong.

Bangalore khawpui hi India ram Metropolitan city a chuh ka hmu nuom pawl tak, vawi iemanizat relin ka fetleng tah hlak a chuh, cham a belchiengna hih kala nei ngai naw a. “Silicon valley/City of India” an ti nasan dam, “Garden City” annawleh “India’s most expensive City” anti dam chanchinbua hai ei lo hrietve hlak a. Chubakah a boruok inhawi zie le IT tiengpanga khawvel hrieta khawpui changkang Sofware company lien tak tak Infosys, Wipro le dang danghai ofis lien innghatna ani leiin ramdangmi khawma an ngaisang em em ani leiin hei belchieng ka nuom  em em hlak a nih.

Vangneitlak takin ofis sinthawna le inzawma Mysore khawpui a meeting nei dingin Tarik Ni 9th February 2012 ka fe tum khan Bangalore a cham theina hun remchang ka siema. Bangalore International Airport ka thlung a, Tlangval fel Laltlansuok Khawbung hi airport a thawklai zing le Pu Robert L. Sungte haiin an milo ngaiven leiin buoina um der lovin Pu Sungte in tieng kan tlung tah a nih. Pu Sungte hih Deccan Herald newspaper ah Senior Sub-Editor le Senior Reporter sinthaw mek a ni a. Chun, tuta ei Hmar tawng website inlar em em INPUI.COM bakah Mizonews.net, Mizoramexpress.com, askofficer.com, mothersforum.org hai neitu a ni bawk.

Airport a inthawk kan hungna vawitieng-changtieng ka mit kan len vel a, lampui intluonin Pu Sungte’n, a khawpui kan hmu phak chin thil inchiktlakhai chuh kan dawn hman ami hril zung zunga, a bengvar thlak ngei el.Lampui four lane a siem deu vawng hieng lawm lawm a indai, fly over a tam em em el chu tie.

A khawpui hming hih Bangalore ti ni tah lovin a Kannada tawng (a ram tawng) hmangin Bengaluru tia tlak an tah. Khawthlang ram hieng- America le ram changkang tamtak haiin IT tiengpanga Company lien lien an hung innghatna hmun pawimaw le an ram nekin fak le dawn le nitin khawrsaw man a tlawm lem bawk si leiin thalai tamtak an hung fuonkhawmna khawpui a nih. Chuleiin, American President nilai zing Pu Barack Obama meu khawma America economy suksangna dinga a ngaimaw phak  ‘Say no to Bangalore and yes to Buffalo’ tia a lo hril phak hiel khawpui a nih. Chuongchuh ani leiin BPO/Call Centre hmunpui India ram hmun hrang hrang a thalaihai tlan khawmna hmun pawimaw a nih. Kawtthler a thienghlim a, lamlien a tlunin an hawi bawk, a boruok an hawiin an nem.

Zantieng ni nema thalai insuk thawveng nuomhai tadingin M.G.Road, Brigade Road (Commercial Street) le Lal Bagh Botanical Garden hmunhai hih duthusamna hmun ani hmel. Mihriem chi an kim a, inthlahrung lo taka um theina hmun a nih.

Bangalore khawpui hih an hawi em leiin hmatlir nei em em lo thalaihai  tading chun umna chi ni kher naw nih. Nitin mamaw, thuomhnaw le inlawnna (travel) man a tam a, a tamlem chun in a inthawk internet hmanga dawr thei vawng ana, keikhawm ka tlungin a inthawk ka fena dinghai inkei buoi chekchuk umlovin ka sukfel thei vawnga a remchang kher el.
Shanti Nagar a um Pu Jonathan Kungate Hostel siemna ah kan va lenga. North East tienga studenthai tadinga rawngbawlna tha le hnam sukmawitu nin ka hriet. Ama zarin Bangalore khawpui a ei unauhai insuk chawngpu lurin an um thei a nih.
BANGALURU ZAWNGTA :
Forest department haiin anphun ni awmtak lamlien kawla thing insanglo tamtakhai khuh zawngta deu vawng ana, ara chuh kutpha chen chauh, a ziet inhawi deu, phak derlo a nih. A rammi haiin an fakve si nawa, i dit zat zat man bova lo thei a nih. Hiengneka zawngta inhnik hih kala bak (fak) ngai nawh. Mak deu a nih! Inhro tawl ita, i kumkhat fak ding chauh chuh awlsam takin i hungphur el ding a nih. In man thei thilkhap annaw a, ti ding a um nawh. Chuleiin, Zawngta duhai chun ara hun inchan unla, chu huna chun inzin ro. Insir kher naw ti niu.

Bangalore a hin eini Hmar tawng hmang 150-200 bawrvel an um a, sawrkar le company a sinthaw iemani zat an um a, student college, university le institution hrang hranga inchuklai an um bawk. Bangalore Hmar Christien Fellowship a um a, Lingaraj Puram a Vivya Shanti Church  ah zantieng Dar hni a inkhawmna an nei hlak.

March 11, 2012 (Pathienni) khan keikhawm ka van khawm vea, thalai deu vawng an nia, mi lawmlut le chawimawi an thiem ngei. Pastor Robert Vanlallien keihruoina hnuoiah phuisui takin sacrament rawngbawlna nei ani nghe nghe a. Hril nuom nei hril dingin chanvo hlutak el an mi pek nawk nghal, ka vang neiin inkhawm an man hla hlein ka hriet. An inthuruol khawp ela, hi fellowship a thuoituhai hih hnam le khawtlang thila thawding le buoina a um chang khawm an mawphurna a ngai ani leiin Biekinah an puonga an inzo pei el. Hi a nih, Kohran pawl bik umlova hmunkhata inkhawmna ra suok le a thatna chuh. Tu kohran pawl khawmin zu chawkbuoinaw hai sien nuom a um.

Churachandpur, Manipur ah Thenmuol Hmar khuo kohran pawl umlo Local Church an um vea, kum 2009 khan ka van khawmve tah nghe nghe. Khawtlang thilhai hrim hrim Biekin a puong thei awm chuh an puonga an inzo pei el. Kohran pawl hrang hrangin chawkbuoiin kutrawl tum hlakhai sienkhawm Pathienin a thangpui hlak leiin  inthuruol takin khawtlang le kohran an fe peia, khuo inhnar um a nih.

Hiengneka Bangaluru chanchin hrietding tul le pawimaw tamtak a uma, ka cham tawi em leiin, hi khawpui hih kala belchieng naw a, inzin nawk pha chuh hunsawt deu hlek cham dinga insiem a, hi khawpui nun le mipui chetdan hih hrietchieng a tha awm.

(Kan zinna –VIII Next)
19th February 2012

By Ramthienghlim Varte, Senior Anthropologist

Ei unau Manipur le hmun dang danga inthawk Mizoram a lut, mihai bel thei ding khawpa nina nei le burip em em tam takel hmu ding an um tah a. Hienghai hin Mizoram, Aizawl khawpui le hmun dang dangah ami suk chawngpu zuol a lawm a um. Mizoram hi ei pilepuhai delna ram, ngirhmun infuknaw leia chawngpu nina changphak talo ei ni reng a. Chuongchuh  ni hri inla khawm thiem tak le Pathien ti dek puma hma ei lak fuk pha chuh zangkhuo ala bungbu ngei ding a nih tihi ei lungbawra tu nghet tlatin um sienla. Mizoram a ei hnam thuoituhai khawm mi inza thei dingin tawng dan, chang dan, um dan thiem a tul.Tawng thei em em ringawt hi iengtina khawm an nawh.

SINLUNG HILLS DEVELOPMENT COUNCIL (SHDC)
Kum 16 zet liem ta a thisen a ei nawr dawk  a ropui am, a chin am, a lien, Mizoram ei Buzawl lo ni tah hlak ramah Sinlung Hills Dev. Council ei neive hi lawm em em.Tuchena a ngirhmun chuh General Administrative Department, Government of Mizoram chuh Nodal Department a hmangin Interim Councilin SHDC chuh a fe teng teng a. Chuongang chauh khawm chuh nisien Isarealhai anga nuom ang anga eiin huk dum dum thei nawkna dinga a bul ei intan thar nawkna ah ngai inla nuom a um.  A hungsuok dan tak ngaituo lem chun Chairman le lal inchu a, sum tlawmte hnawta inse khek le nuom ang anga nun chen ngamna ding chi khawm ani mani. Tu hri hin chuh Mizoram a ei hnam damna dinga hmalakna le innghatna thungpha ang ani leiin hi taka a inthung ding hi inchu nekin  inhlan intuo lem a theitawpa thanglakna a hmang dingah kei chun ka ngai a. Chuong nekin, SHDC a Interim Council chairman nuoma inper ka-lang mi 7/8 vel an um anla ti ta deu deu.Ta lawm lawm ah.

SHDC le inzawma hotu Chairman rim innam chin Pu Malsawm Darngawn, Pu Hmingchunghnung, Pu Thangliensung le mi dang dang mimal taka inhmupuina ka nei vawnga.  A tutu khawmin an hmazawn senga hnam tadinga thahnemngai em em, an tawngbau suoka chun hringna thap ngam khawpa hnam hmangai vawng an nih. Amiruokchuh, kuongkhata an umkhawm thei tlatnaw hi a mak a nih.

Hi Mizoram a ei hnam darthlalang a ni chun puotieng mihai mi tlir dan ding mawlh hi ngai pei a umnaw bek bekel.  Mizoram a Hmarhai del ram SHDC sunga umhai hih inthuruol inla chuh awlsam taka MLA pathum nei thei ani a, Minister chen khawm um thei ei tih. Manipur a khawm chuongang tho chuh a nin an lang.

LUAHLO LUNGDI
Bollywood film ( Hindi film ) ei en changa a an hril uor em em  Bis sal ka pahele( Kum zawmhni liem ta) ti hi a ni a. Chuongang bawkin keikhawm kum sawmhni chuong er-awr liem tah a HSA  thuoitu kani lai  lungruka kalo pai ren-rawn hlak, ruoltha tilo nulepa khawm hril ngamlo ruolhluihai Aizawl khawpuia khawsa ve dam anlo um nuol a. Nau leh buoi em emin lo khawsa ve tawl tah hai le dam kan inhmu a. Hmel dangin lo chuoi deu ta sienkhawm inngainatna ala bo chuong naw a. Kum tam liem ta hnunga ka lungril suongtuona pahla a an rikna khah ala danglam chuong bawk nawh. Mak tak a nih.In chibai seng seng khawm a rik tup bikel.

Ngaituona’n chulram lo theilovin a fang a, ‘Dite kangai em che, sakhmel tawnglo ni reng a sawt ngei’ ti Pu Edawrd T.C. le kan siem hai dam  le ‘A remnaw maw’ti hla Pu Zama hla siemhai khan lungbawr a hung tuomvela, khawsawt chulram fang hi khawsawt alo um zie chuh  Pu H.Thangluoi AIR a Director sin  Shillong a thawlaia a tleirawl nun hai dawnkira khawsawt em em a‘Tawn mang em ni lunglem ka neilo, ka hawivel a ka tawng silo,Zunleng  e rawh a chamreng thinlai a, Luahlo lungdi nghilni i awm lo’ ti hla hai ami sakpui hai kha ka hrietthiem pui thei chauh a nih.Lung an lengve vawng vawng ngei el.Synod Higher Sec. School, Mission Vengthlang, Aizawl a kum iemani zatzet Science Teacher a ka sinthawna hmunhai dam fangkuolin ruolhlui tamlem chuh anlo pension tah a, thenkhatin chungtieng an milo inlawi san tah bawk.Khuo a sawt veng veng a nih.

Aizawl a ka cham sunghin hotu lien le ofisar hai inah ka leng kim deu phuor a. Chethei tak tak, an sinthawna senga  nina insang tak tak nei, insung burip khepkhupa khawsa  anlo ni tawl vawnga, Churachandpur ka pieng le murna le ruoltha tamtak umna hmun a inzin nek hmanin thla a muongin ruolpawl zalen dan a changkanga, inhawi kati lem dai a, in le lo neinawna hmun nisienkhawm kan sukchawngpu lem bawk.A mak khawpel.

Tarik Ni 3, December 2011 zan Ruoltha kokhawmin ka sangpa Samuel Hrangate Tuikhuahtlang, Aizawl bufak tlangna kan nei a, hi zan hin Pu L.Hrangchal IPS inhlan ani lawmpuina Thangsuopuon insil tirna kei le Pu H.Thangluoihai nupa’n kan nei a an hawi kan ti tlang khawpel. A in neinu ka sang Lalnunziri ( Zirtei ) a fel bawk a, a ruoltha nunghak fel tak takel hai leh fak le dawn buoipuia an hei invilik vel kha chuh mit a tlaiin an hawi tawp a nih. An mi vil hne ngei el.

Dr H.THANGLAWRA KAN HMUPUI
Ei mi hlui Dr H.Thanglawra kum 91 mi ( ama mi hril ang chara ziek a nih) a hratlai le vanglai hun a College iemani zat lo hawng le ama thiemna le inpekzona zara Pherzawl H/S  hming tha le mi tamtak lekhathiem lo cher dawktu,  tuhin a pension nun hmangin Edenthar, Aizawl khawpui khawsa mek a.A chengna hmun ngeia ka va pan nihin chuh ngaituona tam tak ka nei a.  Ama hi thiembukinsang bela thiemna le inchukna tienga hnar kai tu ei Hnam pa, taksa ngei inbiekpui thei umsun nin ka hriet leiin ka ngaisanga, kan hmupui thei hi ka lawm tak zet. A hmel ka hmu chara ka lungrila hung inlang chuh “Pherzawl Reader” ti lekhabu ka naupang lai a kan chuk hlak khah a nih.

Lekhabu a buotsai mekhai chuh  (i) Teaching Children of Primary School  (ii) Teaching Children of Secondary School (iii) Teaching Children of College and University  (iv) Tiny book on leadership training ti le (v) Superiority Country I visited hai English le Mizo tawnga sut dingin a buotsai mek a.Chubakah, ama chanchin bik ziekna ‘ KA NUN KHAWVEL’ ( The world of my life ) ti Mizo tawnga sut tumin  a buotsai mek a. Hiengang a thiltum a hlawtling theina dingin taksa hratna le hriselna tha a mamaw leiin tawngtai pui dingin a mi ngen ngawi ngawi a, chu sin chuh hi zan hin ka tan nghal reng a nih.

(KAN ZINNA –VI  Next)
20th January 2012