Rev. T Sungte Risang Muol Liem

By Ramthienghlim Varte

February tarik ni 16 (Tuesday), 2010, zing dar 8:15AM khan Rev Thattinlien Sungte (89) chun a khawvel silpuon chu sie hrein rawng a I bawl pek a Lalpa kuom a alo chawl hadam tah.

Ama hi kohran a chau nilovin khawtlanga in hmang mi, a thisen zungzam achang at at thei sunga HSA Shillong Jt Hqrs. Hmar Inpui, Shillong region a Senior Adviser nilai HNAM PASALTHA a nih.

Chuong anga hnam tading thahnem ngai mi ani leiin hnam khawm ei chan ropui hle tiin, Shillong Val-upa, HYA le Hmar inpui hai inrawn tlangin khawtlang inthuoidana a thini a vuiliem el lo dingin rel ania, chuleiin, a ruong chun zankhat nunghak-tlangval le nupui-papui in anla cheltang anih.

A nauhai, Delhi a um, khoma an pa ruong hnawta an rengin an hung tlung hman a.

Tarik Ni 17 February, 2010 (Wednesday) Dar 10:30AM khan vuina programe siem in Shillong Hmar Tlanmuola a sakruong buonlei chang dingin vuiliem alo ni tah.

Ama hi an sumtuol (a pieng le murna) chuh Tuolbung, Churachandpur District, Manipur ana, chutaka inthawk chun Sartuinek inpem in, a pa Chawngneithang (Chawnga) le Sartuinek Lalpa chu thisen inzawm ang ela in ngaina emem a um hlak ana; hi khuoa an um lai hi ani Mizo Union party tlifim hrattaka a hranglai. Mizo Union boruok chun Lal thuneina suktlawma mipui rorelna kha an dit ani leiin mipui kha a khuk in an khu chumchum el a, Sartuinek Lal Pu H.B.Sela khawm a him bik chuong naw a, Pu Chawnga chen khawma lal tienga thang ti a ring hla leiin a chunga harsatna tamtak mipui in an siempeka, hieng hun lai a inthawk a Pathien rawngbawl nuomna lien tak neiin Rev Thattinlien Sungte chun “Tukhawm tan neilo Pathien rawng ka bawl ding anih,” tiin a lungril a suk thluka.

Hienghun lai hin missionary sinthaw dinga Pathien kona ruok chu ala hmu nawh. Kum 1953 in Sartuinek khuo a hin Pathien le in tuokna an nei a, tukhawm tanbik neilo Pathien rawngbawl chu tumin February 2,1960 khan Bhutan a ringnaw tuhai lai a rawngbawlna nei ding a kona chu hriet ta anih. Bhutan rama a rawngbawl dan la hung insuo nisien.

A nuhmei chu (Late) Pi Lalnguri Sailo, Mizoram, Lunglei tieng mi ana; hienganga missionary lungril put mi alo nive a, Rev Thattinlien chanchin alo hrieta a ngaisang emem a, lekhathawn a chanchin inhril tuo in an inhmu na hmasatak kum 1966 Silchar,Assam ana, hi taka hin Rev M.Houghstad Minister na hnuoi Lutherian Church, EFI a ‘TIEM TLAT E tiin kut-in-suina annei nghal ta a nih.

Hi kum vek March 6,1966 hin Ngurte, Manipur a Rev H.L.Sela Minister na hnuoi a Pastor Ordination pek ani bawk. Bhutan rama missionary sinthaw in pension chen a umin, Kum 1995 Kangreng, Manipur a EAC Assembly chun pension alo pek ta anih. Missionary sin a chu pension a an ngai chuong naw a,a sunzawm zing tho anih. Chu hnung hun sawtnaw te a ama ai-aw tu ding Kohranin missionary dang a hungsie a, chun a nauhai Shillong tieng hung siehre in ama chun a sin ala sunzawm pei anih.

Hnam pasaltha ani baka Pathien mihrang pasaltha a nih. Ar nghal ei that chun a ai aw tu ding an hungsuok kha tie, ama ang hi iengtik am ei nei nawk tading. A pam ngawtel.

Nau pasal -1 le Nuhmei-3 a nei a, a Upatak Grace Pathienrawl, 2) Mr Richard Sungte, 3) Ms Pricila Sungte le Ms Dorcas Sungte an nih.

Hun iemani chen a inthawk taksa alo hrattawk tanaw leiin Shillong tieng bukhuor lem kha a tul ta a, kum 1993-2007 Shillong a EAC kohran indin a inthawk Pastor sinthaw in a um a, a kohran bikhai chau pastor ni a tum nawh. Kohran dangdang hieng Mizo Prersbyterian, Baptish kohran, tawngdang hmanghai lai khawm rawngbawlna a tulna tiengtieng a nei hlak.

HSA Shillong Jt.Hqrs in nikum 2009 a Fresher’s meet hmang tum khan Lifetime Achievement Award pek dingin Motor in anhung thuoi students haiin an chel bata, a thuhril mipui laia a nei kha a nuhnungtak an tah. Chutaka students le mipui hai kuom a a thucha nuhnungtak chuh HMAR NAU HAHI VANRAMA A TAMTAK NI TUM EI TIU tihi a nih.

Tuhin chu a taksa Lalpan a thuphmang ta, hmuding a um ta nawh.A rangbawlna le a kuthnung hi thangthar haiin chipchier deuva sui thlak pathien mi, Hnam pa ni bawk anih.A vuiliem nia puon in khumtu le raltu mipui tam zie kha chu hmu seng inla nuom aum.A chanchin hrea hmun hranghranga kohran le khawtlang hunser lo hmanghai chu damten la hung insuo tum ei tih.

A mi thienghlim hai thina chuh Lalpa ngai a chun thil ropui tak ani sia.